المصريين المغتربين بالكويت

[manoelmasry]

متشكر اوى لاهتمامك بسؤالى الراتب 150 دينار وسكن وتنقالات وتامين صحى والاقامه عليهم وتزكره الطيران عليهم ذهاب بس والعوده عليا الاجازه السنويه 15 يوم على السنه دى كل بنود العقد

تم تعديل 3 نوفمبر 2010 بواسطة manoelmasry

[samehmagdy]

الاخت أم علي .. مدام قلب أبيض ... مسيو ابو فرحة

متجمعين دايما علي الخير يارب وفي الخير أن شاء الله :) :)

انا كنت عايز اسأل كروت paypal منين اقدر اشتريها في الكويت

السلام عليكم

بص يا سيدى

عليك وعلى شارع ابن خلدون فى حولى

فى مجمع خاص بالكمبيوتر ومستلزماته وكروت الكاش يو واى كروت بتسمع عنها واخد ناصيتين فى نص الشارع مش فاكر اسمه ايه بس SOFT مكتوب عليه كلمه فيها

هتلاقى هناك كل الكروت اللى بتسمع عنها وعاوز تشتريها

[الغريب]

متشكر اوى لاهتمامك بسؤالى الراتب 150 دينار وسكن وتنقالات وتامين صحى والاقامه عليهم وتزكره الطيران عليهم ذهاب بس والعوده عليا الاجازه السنويه 15 يوم على السنه دى كل بنود العقد

أرجع لكلام الأخت بوسي أم عمر في الكام مداخلة اللي فاتوا ردت على موضوع الراتب ، وكمان أقرأ بعناية صفحات الموضوع

أما عن رأيي فالعقد ليس به أي ميزة تذكر.. أكرر.. أي ميزة تذكر

تحياتي ، وبأنتظار أستفساراتك على الرحب والسعة، وربنا يوفقك يا أخي لكل خير

[تامر مصطفى]

هو ياجماعه مش المفروض ان احنا هنا بنساعد بعض ولو حد فى ايده حاجه يقولها لتانى انا طلبت منكو مساعده هنا محدش رد عليا وعبرنى حتى اللى رد عليا كان رد مختصر جدا وحبيت اساله تانى مردش عليا وةانا بكرر طلبى تانى وياريت حد يساعدنى انا طالب بس اعرف معلومات عن مركز الطالب فى الكويت ياريت لو حد عند اى معلومه يعرفهالى ويسعدنى ده لو سمحتو يعنى؟

انا قلتلك على اهم المعلومات اللي اعرفها

وانا ناوي اروح اي فرع واسأل اي مصري هناك عن الراتب علشان اقولك

بس معلش الدنيا مشاغل

وهو عموما في مركز الطالب اغلب الموظفين من الجنسية الفلبينية وعدد من المصريين

[تامر مصطفى]

ازيكو يا اهل الكويت من المصريين والكويتيين

هحكيلكم عن يوم اللقاء العالمي

الاخت الفاضلة حمال الاسية اللي هي ام علي قامت بدعوتنا الى مكتبها في مقر عملها

واتفقنا على ان يكون الموضوع مفاجأة للفاضلة قلب ابيض

صحيح ان القلب الابيض تأخرت عن موعد الاجتماع بس احنا قلبنا ابيض وطيب سامحناها

وسبحان الله بالرغم من انها متعرفنيش ولا تعرف بوجودى اساسا الا انها بمجرد النظر في وجهي قالت انا عارفاك

راحت ردت عليها ام علي وقالت لها ده فلان

سبحان الله هي راسمة لكل شخص في المنتدى صورة تخيلية

وبما انها فنانه في الاساس فهي قدرت تحدد اطار عام للملامح قريب من الحقيقة بدرجة كبيرة

حتى بعدها احتمال يطلبوها في مخفر خيطان ترسم صور المجرمين

أما الاخت الفاضلة ام علي اللي هي حمال الاسية

فهي شخصية حبوبة جدا ومرحة واستقبلتنا بحفاوة بالغة وترحيب يدل على اخلاق رفيعة منها

وما لاحظناه عليها اثناء الجلسة الاولى هو شدة الكرم الشديد

يعني كتير اوي

فكانت ضيافتها لنا على اعلى مستوى وارقى ذوق

وتكلمنا كثيرا عن اهم موضوعات المنتدى وخصوصا باب المغتربين في الكويت

وذكرنا بالخير جميع احبابنا الاعضاء وتمنينا وجودهم معنا

واتفقنا على ان يتكرر اللقاء بوجود من يجرؤ من الاعضاء

وكانت مفاجأة اللقاء هي حضور شخص اعتز جدا بأني تعرفت عليه وهو الدكتور الفنان محمود

والذي حضر خصيصا لمناقشة ام علي في موضوع سي السيد الذي اثارت به ضجه في الاوساط الرجالية

والذي استفدت منه بمعلومات قيمة فنية لم اكن اعرفها من قبل

واترك المجال للقلب الابيض تقول عن الدكتور محمود لاني حدودي لغاية كده بس

فتحياتي لاخواتي حمال الاسية وقلب ابيض واتمنى لهن دوام الصحة والعافية وان يبارك الله لهما في قلبهما الابيض

وعظيم تحياتي للدكتور محمود

[أمل حياتي]

تآنسوا وتشرفوا

والبيت بيتكم ومكتبي مكتبكم

انتوا وكل الأخوه المصريين المغتربين يمكن في الكويت

ولكن مش مغتربين عندي

وكمان ارحب بالأخ ابومحمد طبيخ واقوله تآنس وتشرف وانا اختك قبل الكل

وكمان اختنا بوسي والغريب ومارو ونو نيم وكل الافاضل انا اخاف اكون نسيت حد

تم تعديل 4 نوفمبر 2010 بواسطة حمال الأسيه

[aboutabeakh]

كلك كرم اختنا ام على واحنا اللى نتشرف بمعرفتك والله وربنا يسهل نقدر نتقابل ان شاء الله

[manoelmasry]

[quote name

انا قلتلك على اهم المعلومات اللي اعرفها

وانا ناوي اروح اي فرع واسأل اي مصري هناك عن الراتب علشان اقولك

بس معلش الدنيا مشاغل

وهو عموما في مركز الطالب اغلب الموظفين من الجنسية الفلبينية وعدد من المصريين

معلش ياتامر انا هتعبك معايا وربنا يوفقك يارب

[sindbad]

ينفع كده ياجماه

تعملوها وتتجمعوا وانا في مصر!!

ماشي انا ليا حق عرب :closedeyes:

ومش ح تنازل عن صنيه بسبوسة كمان

عزائي الوحيد هو البط البلدي المعتبر وشويه الحمام اللي انتوا عارفنها

[sindbad]

سلامي للجميع

تم تعديل 5 نوفمبر 2010 بواسطة sindbad

[تامر مصطفى]

ينفع كده ياجماه

تعملوها وتتجمعوا وانا في مصر!!

ماشي انا ليا حق عرب :closedeyes:

ومش ح تنازل عن صنيه بسبوسة كمان

عزائي الوحيد هو البط البلدي المعتبر وشويه الحمام اللي انتوا عارفنها

مش كفاية انك قاعد اجازة في مصر واحنا مداومين

البسبوسة دي انت تجيبها معاك من مصر

عموما ارجع بس انت بالسلامة وربنا يسهل ونعيد التجمع تاني

[grandizr]

صباح الخير علي اجمل واجدع ناس بالكويت

اجمل تحيه من مصر لاحسن ناس وخايف اقول اسماء لانسي حد

انا منضم جديد للمنتدي مع اني لسه في مصر

وده لاني عندي حلم السفر والموضوع قائم وبجهز ليه

انا قولت اسلم مبدايا

................................... وللحديث بقية

[Simba]

صباح الخير علي اجمل واجدع ناس بالكويت

اجمل تحيه من مصر لاحسن ناس وخايف اقول اسماء لانسي حد

انا منضم جديد للمنتدي مع اني لسه في مصر

وده لاني عندي حلم السفر والموضوع قائم وبجهز ليه

انا قولت اسلم مبدايا

................................... وللحديث بقية

:welcome: :welcome:

تنور وتآنس يا جراينديزر

وشد حيلك معانا لحد ما تقدم وتترقي هنا في الموضوع :flr1:

وتطلع تقعد ما كبار المشاهدين والمستمعين وبس :rolleyes:

[noname]

السلام عليكم جميعا

اولا شكرا اختنا ام على لدعوتك الكريمة

ثانيا : انا سامع اوشاعة كدة انكم ناويين تتجمعوا فى العيد ان شاء الله كل سنة وانتم طيبين

بس والنبى تاخدونى معاكم انتو عارفين انى وحدانى

هزعل اوى لو نسيتونى ..السيدة فى ضهركم ما تنسونى

عموما انا على الاكل ( متفهمونيش غلط هاكل مش هاجيب الاكل )

يجعلة عامر

اخوكم حاتم ( نونيم سابقا )

[nour mageb]

صباح الخير يا شباب يارب تكونو كلكم بخير واحد واحد

انا لسه جديده هنا فى المنتدي و دي اول مشاركه ليه حبيت اسلم عليكم و انعرف عليكم

انا نور مفروض ان شاء الله اسافر لجوزي فى الكويت بس بعد ما اعدي من الكشف الطبي ابو دم تقيل جدا جدا جدا

الوضع مآسوي اوي قدام المستشفي و بيتلككو للناس و بيخلوهم يعيدو مره و اتنين و تلاته و فى ناس فى الاخر بيقوللهم غير لائق

انا عملت الكشف و اتصلو بيا و قالولي تعالي اعملي اشعة مقطعية على الصدر بالرغم ولله لا بدخن و لا بكح و لا بنهج ولا حاجه الحمد لله

بس ربنا يستر و ميطلعوش حاجه تاني

انا عندي سؤال لو لا قدر الله قالولي غير لائق ممكن اروح زياره ؟ طيب و ممكن احول الزياره لاقامه هناك خصوصا الحمد لله مفيش امراض معدية ولا فيروس سي ولا بي و لا موانع السفر الي مكتوبه فى مكتب الحجر الصحي ياريت تردنو عليا علشان قلقانه

[noname]

سلامي للجميع

سندباد ترجع لنا بالف سلامة

[أبوعمار]

صباح الفل على كل المصريين المغتربين في الكويت

وان شاء الله نلاقي دايما الدفء والأخوة والجو الجميل ده هنا على طول

صباح الخير يا جرانديزر .. ايه الاسم الجامد ده

ربنا ينولك اللي في نفسك ... وتحقق كل أحلامك

وتكون ناجح سواءا في مصر أو بره مصر

الأخت نور

ان شاء الله هايكون كله تمام ... ربنا يطمنك

تقدري تيجي زيارة بدون كشف طبي ولا حاجة

بس آخر معلوماتي ان الزيارة ما تتحولش التحاق بعائل جوا الكويت

كان من كام سنة ينفع ... وأعتقد دلوقت ما ينفعش

ربنا يوفقك ويلم شملكم ان شاء الله

[تامر مصطفى]

عايز توقيعاتكم في موضوعي

http://www.egyptiantalks.org/invb/index.php?showtopic=112409&pid=655206&st=0entry655206

منتظركم هناك

[أمل حياتي]

ينفع كده ياجماعه

تعملوها وتتجمعوا وانا في مصر!!

الأخ سندباد على رأي الكويتيين

(( حياكم الله ويا هلا ومرحبا )) :) :) :)

تم تعديل 6 نوفمبر 2010 بواسطة حمال الأسيه

[grandizr]

اجمل تحية لاجمل ناس

الف شكر يا سمبا

وصباح الفل يا ابو عمار وربنا يسمع منك ان شاء الله

وشكرا علي الترحيب

وان شاءالله ربنا يحقق لكل شخص الي بيحلم بيه

تم تعديل 7 نوفمبر 2010 بواسطة grandizr