اذهب الي المحتوي
se_ Elsyed

حكاياتي مع ديكوراتي

Recommended Posts

حبيت انقل لحبايبي في المحاورات ما مررت به من تجربه توضيب شقتي الجديدة اللي في العبور

من الاول انا واخد قرار لا رجعه فيه اني هادي الشقة لمكت ديكور

لأني تعبت من التعامل مع صنف الصنايعية اللي بيعلموا الواحد الفضيلة لو تعامل معهم بشكل مباشر

كذب وخداع وسرقة وقلت ضمير

ده العادي

وعكس ذلك هم الشاذ عن القاعدة

وانا وضبت شقق كتير ليه ولأخواتي طوال حياتي

يعني من وانا صغير معجون في الموضوع ده

لكن تعبت بجد وكمان ما بقاش عندي وقت لظروف سفري

وحتى لو كنت في مصر ما كنتش برضوا هاكمل مع موضوع اني اجيب صنايعية كل واحد في مجاله ونقعد بقى في الافلام الحمضانه دي

- المهم

ماكنتش محدد مكتب ديكور ...

لكن كان دايماً في بالي اختي العزيزة " نانسي " زميلتنا في المحاورات وتعتبر جهبوزه من جهابيز الديكور

ولا انسى حبيب قلبي وصاحبي من ايام الانفوشي ... حبيبي وشقيقي المهندس " واحد تاني " يعني اسكندرية وشقاوة الكورنيش ... وقبل ما انزل اجازة كنت عنده في الدمام في زيارة سريعه وقعدنا اتكلمنا في الموضوع ده وخدت منه شويه بهاريز ديكورية

المهم

- دي غير المهم الاولانية -

ماشي كده انا في العبور لقيت يفط كتير لمكتب ديكور معين اتصلت بيهم وعرفت عنوانهم في عمارات العبور في مدينة نصر

دي كانت اول مره اتعامل مع مكتب ديكور بصراحه

المهم الناس سمعوني ... ووروني شوية اعمال سابقة عندهم واتفقنا ان الموضوع هايتم على مرحلتين .... المرحلة الاولى تصميم الرسومات ... والمرحلة التانية الاشراف على الصنايعية اللي هايشطبوا وهما هايجيبوهم .... وانا طبعاً كنت واخد قرار اني هاشتري المون وكمان هاحاسب الصنايعية ..... ومدير المكتب خد الايميل بتاعي وقال لي هابعت لك الكوتيشن بتاعت التصميم الاول بعد يومين

المهم ربنا ما يوريها لحد

فتحت الايميل لقيته فرقع في وشي وحواجبي اتعورت

الخلاصه

البيه بتاع الديكور طالب مني انا

جابر الشرقاوي عم اشقية مصر .. واللي الديكورات اخدت منه رقات

طلب 30 الف جنيه مصري للرسومات فقط ... لأ وايه هايسلمني الرسومات بعد 45 يوم حد ادنى

يعني اقدم استقالتي واقعد جنبه لحد ما يرسم اللوح بتاعته

المهم اخدت الصدمه ولقيت واحد صاحبي حبيبي - هايشوف نفسه دلوقت هنا - من المحاورات وقال لي هابعت لك هديه ... واد مهندس ديكور بيتكمل انجليزي وخريج السكركرير

قلت له اهو انا ما باخافش غير من الناس دي

اديني يابو اشرف وابعت ياللي بتبعت

الراجل جه وعاين البضاعه وما تعبنيش وراح رازعهاني عاليه مدويه

30 الف رسومات

و40 الف اشراف

يعني عاوز 70 باكو اجرة ايده هو بس

انا سكتت ودموع عيني هي اللي اتكلمت

وبرضوا شهر ونص عشان يخلص الرسومات

يادي ام الرسومات .. كل واحد ييجي محسسني انه فان جوخ في زمانه

فقلت له ..... سيبني افكر قد سنتين تلاته وارد عليك

نسيت اقول

يُتبع

شارك هذه المشاركه


رابط المشاركه
شارك

ايه يا اخ سى السيد

ايه الكلام ده ؟

انت صاحى ولا نايم

انت هتشطب العبوركلها ولا ايه؟

انا الحمد لله خلصت توضيب شقتى بس من كتر ال الصنايعية عملوة فيا

منصحكش تشطب اصلا

خليك هنا علطول احسن

منتظرين المزيد والمزيد من الفراقيع والبمب

شارك هذه المشاركه


رابط المشاركه
شارك

صباح الخير يا سي السيد

معقولة الي حضرتك بتقوله ده انت

انا انشاء الله داخل على موضوع التشطيب ده قريب بس في التجمع الخامس وكنت ناوي اخلي مكتب ديكور يشطب لظروف السفر برده وبيني وبينك انا مش عاوز اضيع وقتي مع الصنايعية ومشاكلهم والكلام الي انت عارفه طبعا

بس كده تقريبا مش هشطب على راي ماما نونة وهفضل هنا في ابوظبي على طول احسن

بس يا ريت تقولنا ايه الي حصل بعد كده

شارك هذه المشاركه


رابط المشاركه
شارك

صلو عالنبي يا جدعان ...

الدنيا مش وحشه للدرجة دي .. ناقص تقولوا لي أقعد في الشقه عالمحارة ولمبة جاز

المهم ... كنت حاطط إتنين مهندسين تانيين في دائرة الأتهام عشان أختار بقى وابدأ عالاقل في حاجه وأنا هناك وأشوف طوب طالع ورمله نازله ونشاط وحركه في الموقع .. وانا كده كده سايب أخويا هناك يشرف على الموضوع

لقيت واحد مهنس معرفة أخويا ... وده حطيت عليه " بيج إكس " من أولها ... طلع يعني في مواعيده لمجرد إنه جاي يعاين الشقة ... وكذب بطريقة بشعه .... وبقى يلطعني بالساعات هناك على حس إنه جاي في الطريق .... وفي الأخر يقول لي أصل مش عارف مين عمل إيه والطريق كان زحمه وكان في كمين شرطه والحركات دي والعربية عملتها معايا ...

فقلت لما أنت مهندس محترم بتعمل كده ... أومال سيبت إيه للصنايعي اللي ثقافته قليلة ؟

ومن البداية كنت حاطط المكتب اللي كان بيبني لي الفيلا قبل سابق في الحسبان .. بس قلت برضوا أشوف الدنيا فيها إيه

ويمكن كلمتكم عنه قبل كده ...

ومع إني بأتحاشى في أشياء كتير إني أكون مغسل وضامن جنه .. أو أمشي في جنازة وما تمشيش في جوازه ..

على أساس إنك لو خدمت بعض الناس في حاجات كتيرة .... ممكن يفضلوا طول العمر يعايروك " شوفت مجايبك يا عم " ؟ آه آه أيوه يا سيدي أدي المهندس اللي قلت لنا عليه أو أدي الشقة اللي نصحتني بيها طلعت سلالمها مش نضيفه .. أو الشمس بتتعامد عليها يوم واحد فقط في السنة وهو يوافق الـ 21 من نوفمبر بس ( عيد ميلاد رمسيس الثاني ) ...

ففي أحوال كتيره بأبعد ...

لكن مع الراجل ده ... أنا بأرشحه بقوة لأي حد عاوز يبني بصراحة ... عشان إنسان عنده ضمير نادر .. وكمان كفاءه عاليه ... فهو دكتور مهندس بكلية الهندسة جامعة الزقازيق ... وعنده ستاف محترم ... ولأنه مكتبه في مدينة الزقازيق .. فأسعارهم غير القاهرة ومختلفة 180 درجه ...

المهم كلمت الراجل وبعت لي المشرف على قسم الديكور في مكتبه ... وهو دكتور برضوا ..... وجه وعاين الشقة .. وقال لي

التكلفة 2000 ج رسومات

10.000 أشراف ...

الإشراف ده صداع لأن فعلاً تفاصيله كتيره وبياخد وقت طويل

وبيني وبينكم ما فاصلتش معاه في الفلوس ..

لأني مجربه قبل كده ...

ولما جيت أبني الفيلا كانت شراكه بيني وبين أخو المدام بتاعتي ... وكان هو مرشح أخو مراته وهو مهندس كبير للاشراف فقط على بناء الفيلا ... وعشان خاطر ده بيت أخته والعيش والملح ... والتوست واللانشون ... كان هاياخد مننا أشراف على الأساسات ... وعلى الدور الأول والثاني والروف ... كله في قلب بعضه .... 3000 رسومات و20 ألف إشراف ...

ولأسباب كثيرة منها الكفاءة ما كملش وأعتذر فقلت بركه يا جامع اللي جت منك أنا مش مرتاح من الأول

وإذ بنا نتعرف على الراجل ده عن طريق صديق مقرب لنا وكان برضوا بيبني معانا في العبور .... ومن ساعتها ما سيبناهوش ...وأول كلمة طلعت من بؤه ( 1500 ج إشراف على الدور الواحد ) وهما بيعتبروا الأساسات دور ... يعني كده بنتكلم في 4 ادوار يعني كله كله 6000 ج .... والرسومات 2000 ج

وكان بيبعت مهندس من عنده يومياً للموقع ... وهو بيييجي بنفسه بعد نهاية كل مرحلة ... يعني خشب .. حديد ... صبه أسمنت ... بناء طوب .... تلاقيه موجود بنفسه وبيستلم من المقاول ويطلع عينه ...

وحدث من 3 شهور إن المدير المالي عندنا حب يبني فيلا في مسقط رأسه - أرياف - ورشحت له الراجل ده .... وكان هايديها له مونه وأجره ... يعني المهندس يشتري المواد والخامات ويشرف على البنا ويسلم له الفيلا عالمفتاح على اساس أنه مغترب زي حالاتنا ...

وما عرفتش أو حبيت أعرف هما أتفقوا على إيه ..

فلما نزلت مصر لقيته بيقول لي : صاحبك قال لك إحنا أتفقنا على إيه ؟

قلت له : لأ ومش عاوز أعرف أصلها حاجه مش مهمه بالنسبة لي ..

فقال لي : أنا رفضت المشروع من البداية

قلت له : ليه ؟

قال لي روحت عاينت المكان ... فلقيته غير مميز ووسط بيوت ريفيه متواضعه ....

عادي زي معظم الريف

فنصحته إن بناء فيلا وسط الجو ده مش هاتنفع من اساسه وسمع بنصيحتي ولغى الفكرة ... لأن العمليه مش رص طوب وخلاص

أستغربت والله للامانة المهنية الشديدة النادرة دي ..

واحد غيره كان طرقعها له .. إن شالله تكون فيلا وسط مقابر ...

وإنتو عارفين إن موضوع الخامات والأشراف بتكسب معاهم قوي غير لما يكون إشراف بس ...

وأتفقنا إنه هو اللي هايجيب الصنايعيه من عنده .. وهيديني خطوط عريضة ويقول لي أتفق معاهم إزاي ... والصنايعي اللي مش هايعجبني هايجيب لي غيره ... أو أنا لو أعرف حد مش هاتفرق ممكن اجيبه بس أسلمه للمهندس عشان يفهمه الدنيا هاتمشي إزاي

يُتبع

شارك هذه المشاركه


رابط المشاركه
شارك

أيوة كده يا راجا طمنتني اني ممكن اسكن في البيت الجديد

بس سؤال لو سمحت

هو أنا لو احتجت من حضرتك تليفون الدكتور او عنوان مكتبه هيكون ممكن ولا حضرتك ما بتحبش تتدخل في الحاجات دي علشان الدوشة

بس يا ريت تكمل الموضوع ده انا متابعك

شارك هذه المشاركه


رابط المشاركه
شارك
أيوة كده يا راجا طمنتني اني ممكن اسكن في البيت الجديد

بس سؤال لو سمحت

هو أنا لو احتجت من حضرتك تليفون الدكتور او عنوان مكتبه هيكون ممكن ولا حضرتك ما بتحبش تتدخل في الحاجات دي علشان الدوشة

بس يا ريت تكمل الموضوع ده انا متابعك

لأ إزاي

من عيني يا بيه ..

الواحد لما يحس إن الموضوع هايبيض وشه زي ما بيقولوا .. فلا أتردد . خصوصاً إني مجرب إن موضوع البنا بيبقى لناس كتيره عامل زي حوست الأرملة اللي بتجري على معاش جوزها ...

ولو الواحد مغترب .. فبيحتاس حوسه الأرملة اللي بعد ما مات جوزها إكتشفت إن مالوش معاش وإنه كان متجوز واحده تانيه عليها وهي ما تعرفش

عنوان المكتب : عمارة المحافظة ... خلف قصر ثقافة الزقازيق .. مدينة الزقازيق ..

ت المكتب :20552340256 +

فاكس : 20552311256 +

موبيل المهندس التنفيذي المسئول : م / عصام 20123191520 +

صاحب المكتب : د. م. / محمد منتصر

شارك هذه المشاركه


رابط المشاركه
شارك

شكرا لاهتمام حضرتك بس على فكرة انا مش هبني انا هشطب فيلا دوبلكس في التجمع الخامس

دعواتك يا سي السيد ويا ريت تقولنا على تطورات مرحلة التشطيب عندك علشان نستفيد من خبرة وتجربة حضرتك

وكل سنة وانت طيب

شارك هذه المشاركه


رابط المشاركه
شارك

فلتحيا الشرقيه حره مستقله

ياه الواحد لما قرأ الكلام ده كان نفسه يسمه والله وعملوها الرجاله ورفعوا راس شرقيه بلدنا

تسجيل متابعه الاسعار فى الشرقيه مرتاحه خالص عن اى مكان تانى

شارك هذه المشاركه


رابط المشاركه
شارك
انا عايزة افهم انت هتشطب ولاهتبنى

يعنى ايه الاشراف ده ؟

وايه الرسومات دى ؟

انا اسف يا استاذ سي السيد اسمحلي ارد مكان حضرتك ويا ريت اكون بتكلم صح

الرسومات الي هي تصميم الديكور الداخلي للبيت

والاشراف يعني المكتب هيشرف على العمال الي هينفذوا الرسومات

يعني المكتب هياخد اتعاب للرسومات واتعاب للاشراف غير ان الناس الي هتشطب هي الي هتشتري الخامات وهتحاسب الصنايعية على اجرتهم

ارجو اني اكون فهمت صح من خلال سرد الاستاذ سي السيد للموضوع

شارك هذه المشاركه


رابط المشاركه
شارك

ده ايه ده ؟

ده انتو يامصراوية حكايتكو حكاية

وانت تضمن منين المون ال هيستخدموها

انا عن نفسى بعد معاناتى مع الصنايعية

اقول وبجد مفيش ولا صنايعى على وجة الكرة المصرية عنده ضمير وبيراعى ربنا

ولا ضمير ولا التزام بمواعيد

انا عن نفسى صممت لنفسى انا عايزة ايه؟

ونفذته على سنتين يعنى على اجازتين ومشى الحال الحمد لله وخلصت التشطيب

يعنى مثلا انت مش هتعلاف تصمم حمامك ولا مطبخك

مش هتعرف تحدد انت عتحط البانيو فين والا الحوض فين

فين مليون سايت عالنت بيوريك كل جديد بس تابع

شارك هذه المشاركه


رابط المشاركه
شارك

على فكره أنا شرقاوي برضوا يا عنبي

united state of Shargya

:sad:

من الطرائف والعجائب اللي قابلتها

كان عندي شغل ألوميتال كتير في الشقه

المهم لقيت صاحب العمارة مركب شباك على واجهة العمارة ... شيك قوي وفي كل الأدوار عشان عاوز الواجهة يبقى لها شكل ولون معين .... المهم عجبني التقفيل والخامة بتاعت الألومنيوم .. فسألته عن الورشة اللي عامله له الشغل الجميل ده ...أتصلت بصاحب الورشة وجه معايا العبور

اُفاجأ برضوا بشخص عجيب

او نقول مش عجيب ... هو أمين ومحترم في زمن عز فيه ذلك

على سبيل المثال

أنا عندي تراسين في أوض النوم ... والغرفة الثالثة فيها شباك ... فقلت هاعملهم كلهم ألوميتال بجانب الشغل الأخر ....

وجبت الراجل عشان نتفق

فوجئت بشخص بينصحني بعكس ذلك ويقول لي : بيني وبينك وللامانة مافيش أحسن من الشبابيك الخشب اللي بتتكون من شيش وقزاز وضرفة سلك عشان الناموس والذباب ... وهي أفضل من الألوميتال حيث إنك لو عاوز تهوي الغرفة أو تدخل ضوء وشمس مش شرط تفتح الشباك كله وومكن تواربه وبيبقى كمان وراه ستاير .. عشان لو جنبك جيران أو بتاع ...

فأستغربت ... يعني واحد جاي بيرفض شغل مُكلف وتقريباً 40 % من الشغل كده طار منه ...

لكن هو من الواضح إنه شخص محترم وشبعان كمان ...

فاحترمته وفعلاً أشتريتهم خشب

سألت صاحب العمارة.. هو عامل متر الألوميتال النضيف ده بكام ؟ ... فقال لي : 400 ج

سألت على نفس النوعية دي لقيتها في السوق بـ 470

طبعاً في شغل بـ 270 ج اللي هو بسيط قوي قوي قوي وما فيهوش أي شغل وكمان خامته مش كويسه ..

لكن أتضح إن مافيش أي ألوميتال بيركب إلا بعد ما تركب السيراميك والحلوق الخشب بتاعت الشبابيك وكمان تبلط المطبخ لو هاتفصله ألوميتال .... فالراجل قال لي كمل الحاجات دي وأجي أرفع المقاسات على نضافه ...

أول حاجه بدأت فيها ... كان الهد

هههههههه

جبت ناس يهدوا كذا حيطه عندي ويوسعوا شبابيك وينقلوا مكان أبواب ... بالعربي كده شلفطت الشقه ....

تخيلوا بقى أكتشفت إن الهد بيكلف أكتر من البُنا .. آه والله

جبت واحد يهد عدد 4 حائط ... ويوسع يمكن 3 شبابيبك .. ويفتح مكان لثلاث شفاطات هوا .... ويعبي كل ده في شكاير ويسيبها في الشقة ..

تخيلوا طلب 1200 ج !!!!!

فعلاً بذلوا مجهود جامد ... 4 أيام لما طلع عينهم ...

الأغرب بقى

ممنوع تنزل الكسر ده في الأسانسير ...

فجبت ناس ينزلوه على كتفهم ويعبوه في عربية نقل والعربية ترميه في اي داهيه هما بيبقوا عارفين طريقها

الناس دي أخدت بالعافية 600 ج

والعربية أخدت البلاوي دي على مرتين بـ 500 ج

وأشتريت لهم كمان 150 شوال دقيق من الحجم الكبير !!!!!!!!! .. غير إن الكسر الجامد كانوا بينزلوه على كتفهم ..

تخيلوا ده ؟

يعني كإن الواحد بيهد عماره

اللي بيساعد على الهد إن الحوائط في العماير اللي زي دي بتبقى معموله بنظام إسمه " فلات سلاب " يعني سقف مسطح من غير كمر ساقط وأقل عدد من الاعمده ... وبالتالي تجيب الحيطه هنا أو هنا .. براحتك ما فيش حاجه حكماك اللهم إلا لو في عمود فبتبقى محطوم بيه إلى حد كبير ...

الغريب برضوا إن إنت هاتلاحظ إنك ممكن تجيب عربية رمل .. هانفترض مثلاً بـ 300 ج ... تخيل بقى لو جبت عمال يطلعوها بتوصل إلى 1000 ج .... آه والله لو ساكن في الخامس ولا حاجه ... ولو جبت ونش هاياخد برضوا مبلغ قريب من ده

وللحديث بقية

شارك هذه المشاركه


رابط المشاركه
شارك

ربنا يكون فعونك

بس الاسعار عندك عالية اوى

وبعدين الاوميتال ده مبيركبش غير بعد الدهان

ليه من الوقتى ده احنا لسه فمرحلة التأسيس

انا بقى فالدور التاسع

كنت بطلع متر الرمل ب 130 جنيه للمتر الواحد

انا صرفت فتطليع المون اكتر من تمنها

شارك هذه المشاركه


رابط المشاركه
شارك

ربنا يكون فى عونك ياريس والله

أنا ركبت سيراميك فى 3 غرف شفت فيهم العجب.

أنا ساكن فى الدور الرابع والأخير, كالعادة طبعاً الرمل والأسمنت وطلوعهم بيكلف أكتر من تمنهم كخامات فعلاً.

مبلط السيراميك -منه لله- طلب رمل ضعف المطلوب, عرفت بعد كده إنه متعود إن العربيات بتعاير المتر أقل من المتر الحقيقى, عشان كده عمل حسابه فى زيادة.

المهم اشتريت 3 متر رمل تمنهم 120 جنيه, وتطليعهم عمل 120 جنيه كذلك.

بعد مالشغلانة خلصت كان فى حوالى 1.5 متر رمل متبقيين مش عارف أعمل فيهم إيه, جبت واحد ينزلهم تانى قام طلب 120 جنيه تانى :)

قلت له تصدق بالله, أنا مطلع 3 متر ب 120 جنيه, وحضرتك عاوز تنزل نصهم ب 120 جنيه ؟!!!

المهم من هنا لهنا اتفقنا على 70 جنيه, وبدأ ينزلهم, والكلام ده كان أول ليلة فى رمضان, سبته شغال ورحت أصلى العشا والتراويح وبعدين جبت معايا عربية نقل عشان نحملهم ونتصرف فيهم وتمت العملية فعلاً.

وبعدها بيومين أفاجأ إن العامل اللى ماعندوش ضمير ده استغل إنى سبته ورحت أصلى وقام مطلع حوالى ربع أو تلت الرمل فوق السطح, عشان أنا ساكن فى آخر دور وكده أريح له. mfb: وطبعاً انا بحسن نية ما أخدتش بالى إلا بعد يومين.

ودى كانت حكايتى مع الرملة, وطلعت منها بدرس مستفاد وهى إنى ماتعاملش مع أى عامل بحسن نية أبداً ولا أعامله معاملة كويسة حتى بسبب الموقف ده.

شارك هذه المشاركه


رابط المشاركه
شارك

التعامل مع الصنايعية شيئ عظيم

عظيم

عظيم

ولو كنت قلتلى يا أبو السيد كنت كلمتلك اخويا مهندس معمارى وديكورات داخلية فى القاهرة

ولو أى حد من المحاورات عنده ديكورات فى القاهرة يبعتلى ع الخاص أبعتله موبيل أخويا

وهنعمل معاكم الواجب وزيادة

كفارة يا ابو السيد :)

شارك هذه المشاركه


رابط المشاركه
شارك

بتعجبني طريفة التفكير العملية.. اللي دائماً بيعملها واحد أعرفه..

هو ما شاء الله عليه ميسور

وله واحد قريبه ظروفه على أد الحال.. لكن راجل أمين جداً وذوقه عالي جداً..

فيديلو مبلغ مقطوع مقابل إنه يتولى تشطيب الشقة أو الفيلا بتاعته..

وهو اللي يجيب المون ويحاسب الصنايعية والكلام ده كله ...

وطبعاً في أثناء التشطيب كل شوية يتصل بيه ويتابع معاه.. ولو تطلب الأمر إنه يروح بنفسه يبص بصة كل 4 أيام.. بيروح ..

وبالطريقة ديه وفر وقته لأنه راجل مشغول..

ووفر فلوسه.. لأن أجور مهندسي الديكور فعلا مُبالغ فيها ..

وخدم واحد قريبه , بالفلوس اللي ادهاله.. (وهي طبعا بمقابل وليست صدقة)

شارك هذه المشاركه


رابط المشاركه
شارك

شكراً لتفاعل ابنائي الاعزاء المحاورين والمحاوريات الاحياء منهم والاموات

من كلام الزملاء اتأكد لي حاجه مهمه

وهي اننا بنبخس حق مهندسي الديكور او بمعنى اصح مش عارفين دورهم ايه بالظبط

على سبيل المثال الكلام اللي قاله الرفيق سهل جداً ، واحد قريبي ميسور كل ما يعوز يوضب شقه يجيب واحد معرفته امين ويديله فلوس وهو يشرف على الموضوع ويروح يزوره كل 4 ايام

شوفتوا الهنا ؟

يعني بقينا نساوي بين من يعلم ومن لا يعلم

او كلام طنط ماما نونا .. انها هي اللي بتصمم وتنفذ عشان قرفانه من الصنايعية

وده مش عيب على فكره ... انا مش شايف ان في مشكلة .... بس ما ينفعش اسمع كلام يقول : ده انا هاخلي الشقة دي ولا كأن مهندس ديكور هو اللي مشطبها !!!!!!!!!

نفس الكلام ده سمعته منا ناس اصحابي ... يا عم يعني انت اكتع ولا ما بتفهمش في الامور دي ؟ مانت طول عمرك بتبني او بتشوف الناس بيبنوا ... وادخل عالنت وجوجل وعيش يا معلم وهات تصميمات واستجلب صنايعيه وتابعهم انت بلا مهندس بلا بطيخ ....

ب

الظبط بالظبط بيفكروني بالشخص اللي عنده مغص فبيدخل عالنت يشوف المغص ده اعراض لأنهي مرض ... فبيتوكل عالله وبيختار الزائدة الدودية من بين كل الامراض اللي بتؤدي الى المغص... فاصبح يفكر جدياً يجيب سكينه ويبج بطنه ويكون محضر ابره وفلته .. ويقوم ساحب الزايدة بحنيه ... ومن ثم يلفق الجرح وكأن شيء لم يكن ... هههههههه

يا جماعه التصميم الداخلي او الديكور علم ودراسه وناس مضيعه حياتها فيه ... ومستحيل أشطب انا شقه وتطلع بنفس الدقة او الفنش زي شقة تاني بيشطبها مهندس ..

ومهما عملنا او كان عندنا ذوق في تناسق الالوان او التعامل مع الصنايعية ... مستحيل هانكون زي الناس دي

هاضرب لكم مثل

انا جبت ييجي 4 مهندسين ديكور جم عملوا معاينات ... وبالرغم اني ما اتفقتش الا مع واحد وهو اللي كنت سايبه في الاخر ... الا اني بصراحة استفدت وسرقت منهم افكار جميلة بمجرد ما كان ييجي يشوف الشقة فأسكت انا خالص واقول له ممكن بقى تقولي بعض الافكار اللي عندك ... طبعاً ما بيقولش كل حاجه في قاعدة واحده... لكن بيلفت نظري لأمور تكاد تكون غايبه عني تماماً ومهما كانت خبرتي فمستحيل كنت اوصل لها

على سبيل المثال

انا عندي في الريسيبشن عامودين بارزين حوالي 30 سم وواخدين شكل زجزاج عرضه متر في احد الحوائط وهي الحيطه اللي عالشارع الجانبي ومش مآثرين في شكل الريسيبشن .. فلو كنت انا اللي هاشطب كنت هاقول اهم يتدهنوا وخلاص وكل سنة وانت طيب

فلقيت المهندس بيقول لي : العامودين دول نمحرهم ونزودهم اسمنت بطريقه معينه ونعملهم الاتنين بشكل نص عمود دائري ونعمل لك واحد تاج مزخرف من فوق وقاعدة من تحت وندهنهم بلون رخامي يدي كونتراست مع باقي الالوان

يعني لو هادهن الريسيبشن بيج مثلاً .. فممكن العامودين دول ندهنهم لون – بيتضرب دلوقت كله بالكمبيوتر برقم كودي تختاره من الكتالوج وبيدنهن بطريقه معينه بحيث يعيطك شكل الرخام ونعومه الزجاج – اللون ده يعمل كونتراست يعني مثلاً اورانج في اصفر او نبيتي في اي حاجه

وصممهم لي عالكمبيوتر ووراني شغل واقعي زيهم هو عامله .. وبصراحه شكلهم عالورق وبالالوان وهما متشطبين كان تحفه

بالاضافة الى ان وجود المهندس بيشرف بيعمل رعب للصنايعي اللي بينفذ افكاره وبيكلمه في حاجات دقيقة مستحيل تخطر على بالنا خصوصاً في شغل التأسيس

وحصل قدامي

الكهربائي اللي جه كسر ومد مواسير الكهربا عالارض و الحيط ونفد الاسلاك .. جه كل متر ونص كده عالارض وبقى يعمل صبة اسمنت عليها بمساحه 50 سم وخلاص

جه المهندس يستلم منه وفجأة لقيته اتحول لجرندايزر وكان هايمسكه يضربه ... وحكم عليه انه يصب اسمنت على كل المواسير بأمتدادها ... ليه يا عم .؟

قال : لأن لسه السباك هاييجي يشتغل ... والنجار .... ومبيض المحارة اللي هاييجي يرمم الحوائط والأماكن اللي أتكسرت .. وكمان بتاع شغل الجبس في السقف وفي الحوائط ...

وسيادتك على ما نوصل للمبلط اللي المفروض هايطلب رمله فرش للبلاط وهاتغطي المواسير ... تكون المواسير دي تادغدغت من كتر الدوس عليها ...

بالاضافة الي اني بأشوفه بيقعد مع كل صنايعي قبل ما يبدأ ويعرفه خطة العمل ...وهكذا

ولنا تكمله ...

شارك هذه المشاركه


رابط المشاركه
شارك

متفقة مع كلام سين سين .. ادي العيش لخبازه لو اكل نصه ..

ايام لما اتجوزت زوجي شطب الشقة تشطيب سوبر لوكس .. ماشاء الله طلعت تحفه .. بس الي شطبها صنيعية شاطرين وخلاص بدون مهندس ولا شيء والالوان والديكورات وماشابه بعضها عملناه وبعضها الصنايعية هم الي اقترحوه زي شغل الجبس وماشابه ..

بعدها بسنتين تلاته والدي ووالدتي اعادوا تجديد شقتهم واستعانوا بمهندس ديكور .. مش هقولكم بقى ..

ماشاء الله تبارك الله طلعت خياااال . . شقتي جنبها عشه لا مؤاخذه ..

اصلا في فرق شاسع مابين الاثنين مع ان الخامات واحده ..

اولا المهندس بيكون عنده فكرة عن البيت كله يعني متصور البيت كله وحده وحده ويبدأ يوزع فنه على الغرف بحيث تكون كل غرفه مختلفة عن التانيه وبرغم كده في رابط بينهم .. المهندس هو الي بيقترح الرابط ده سواء كان لون معين او طراز معين او خامة معينة ..

المهندس برضه على اطلاع بآخر التطورات في علم الديكور يعني افتكس حاجات كده في المطبخ غريبة .. انا كان آخري قبنوري وديكوراته .. هو ماشاء الله مطلع على على احدث التصميمات العالمية والاهم عارف السوق فيه ايه يعني احنا لما شطبنا رحنا جبنا من افضل محل في مدينتنا هو عارف افضل محل في القاهرة والمدن الاخرى فطبعا الي جابه كان افضل بكتير ..

كمان من كتر ماهو مطلع على تصميمات بيقول افكار متجيش في بالك اصلا .. يعني كان عندهم بلكونه في الريسبشن في جدار والجدار الممتد بعده فيه شباك والاثنين فيو .. وجهة نظري وانا فاكره نفسي فلته في علم العماره ان البلكونه تدخل في الريسبشن وتبقى الموتال مثلا او خشب .. هو قال لاه هنشيل سور البلكونه ونخليه بدال ماهو اسمنت نخليه حديد مشغول وعليه كوبست خشب والشباك االي على الجدار الثاني المكمل ليه هنكبره خاااالص يعني تقريبا شال الجدار وحط بداله شباك كبيييير عليه حديد مشغول برضه من اسفل ومن اعلى براويز خشب وملهاش شيش طبعا . قال يستفيد من المنظر ويدخله من ضمن الديكور .. اعتقد دي لو مت حتى مكنتش هعرفها لوحدي .. هو ببساطة عرفها لان ده شغله ولانه مطلع وشايف سواء في بيوت تانيه لناس شافت برا وجات تنفذ عندها او في كتالوجات مضطر عشان صميم شغله يتابعها اول باول ..

بس تبقى كلمه حق اننا شطبنا شقتنا في حدود الامكانيات وطلعت كويسه بينما المهندس بخاماته واجرة ايده في التشطيب بس كلف والدي ثمن شقتي كلها بتشطيبها :roseop:

تم تعديل بواسطة doha

شارك هذه المشاركه


رابط المشاركه
شارك

Join the conversation

You are posting as a guest. If you have an account, sign in now to post with your account.
Note: Your post will require moderator approval before it will be visible.

زوار
اضف رد علي هذا الموضوع....

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


  • محاورات مشابهه

    • حكاياتي

      حواديت يا بيه حكايات يا هانم بنص جنيه قرب يا هايم المهنة إيه ؟ شاعر سلالم يا سلام عليه فـ الحب حالم .................. بكتب في الهوى أجمل حكاوي وكله في الهوا أسمع يا غاوي كتاباتي وحواديتي في الحب وايامه عن كيتي وكتاكيتي عن قلبي وأحلامه عن عمر ضيعته بأكتب فوق السطور عن حب صنعته لقلب كان مغرور أخر كلام : ما بين قلمي وحواديتي أحلام وأحزان وبين هذه وتلك تنتحر العبارات!!! [/align]

      في أدب و شعر و قراءات

×
×
  • اضف...