Falcon Egypt بتاريخ: 3 سبتمبر 2003 تقديم بلاغ مشاركة بتاريخ: 3 سبتمبر 2003 السلام عليكم انا مستغرب من الكلام اللى بيتقال ده. لكنى فى نفس الوقت مش شايف انه عيب ان البنت تقول انا مستعده للتاْقلم ومسايره الحياه و و و ليه بناخد المواضيع تحت بند الكرامه ونعقد الدنيا. ليه ماتكونش العمليه بمنتهى البساطه ان البنت عايزه تعيش. طيب من فضلكوا شوفوا الحكايه دى واحكموا: تعرفت على رجل طيب من المنصوره بالمسجد بنيو جرسى وصمم فى اول مقابله بعد التعارف انى اتزوج ابنه اخوه التى تعيش بالمنصوره وقال لى انها بنت مافيش زيها جمال وادب واخلاق عاليه ومتعلمه و صغيره ومافيش احسن من البنت المصريه عشان الاولاد والدين وكذا وكذا ...ماشى.. كلامك صح ياحاج. وكنت اول مره ازور هذا المسجد وقلت ربما ربنا خطط لى الحضور لهذا المسجد للتعرف على هذا الرجل الطيب وياعالم ...وورانى صورتها وبصراحه كانت جميله زى ماهو معروف عن بنات المنصوره. ولكن..... بعد فتره قصيره جدا قلت له سلام مربع لبنات الاسكندريه ,..... منتهى التزمت لدرجه التخلف والامخاخ المقفوله,ومساْله الكرامه وعقد نفسيه وحساسيه زياده عن اللزوم وكاْننا نعيش ايام الحكم العثمانى. لماذا كل ذلك؟ شئ مقرف فعلا. ولم يسمح لى بالحديث اليها خلال التليفون فكانت ترد التحيه الاسلاميه وتجرى لتعطى التليفون لابوها او امها وكاْنى ساْخطفها. ثم طلب والدها منى شبكه قال لى الشبكه على مقامك وهى فى الاخر فلوسك.. وانا قلت له حاجيب لها شبكه محترمة وعلى مزاجها وحاابسطها مادامت الحاله ميسوره والحمدلله انا عارف فرحة البنات بالشبكة ثم طلب منى شقه بالمنصوره مع انى متعود على الاسكندريه وماحبش اروح مكان ثانى احنا كده الاسكندرانيه عاملين زى السمك مانعرفش ومانستريحش فى ايه محافظه ثانيه ورغم انى اعيش بالخارج لكن يصح ان يكون لى شقتى الخاصه بمصر فوافقت وكلفت اخى بالبحث عن شقه بالاسكندريه واعطيته فكره عن المبلغ الذى يمكننى دفعه حتى يتحرك على مداه وخلال فتره قصيره ومن خلال علاقاته العامه المتعدده وجد شقق عديده وممتازه برمل الاسكندريه ومنطقه العجمى ومناطق اخرى وارسل لى بعض الصور عن الشقق التى ذهب لمشاهدتها واعجبتنى شقه بالرغم من انها كانت اغلى من المبلغ الذى كنت مقترحه لكنها ممتازه وواسعه وتصميم حديث وفى موقع ممتاز وعشرة على عشرة ودخلت الدماغ وقلنا الحمد لله احد المشاكل تقريبا اتحلت وطلبت من العروسه ان تستعد لزياره الشقه مع اهلها قبل الدخول فى اجراءات الشراء من اجل مشاركتها براْيها وذهب اخى لاحضارهم من المنصوره لكنها رفضت ان تكون الشقة بالاسكندريه وعايزه الشقه تكون تحديدا اما فى شارع الجامعه او فى شارع اخر بالمنصوره مشهور ورئيسى مش فاكر اسمه واعتقد الجلاء تقريبا اذا لم تخوننى الذاكره ورجع اخى بعد محاولاته المتكرره لحثها على روْيه الشقه اولا ثم تحكم بعد ذلك. اما والدها فقد حدد المهر بعشرة الاف دولارا يعنى مايقرب 65000 جنيه مع العلم انى مش عايز عفش ولاحاجه منها مش عايز غير العروسه بشنطه ملابسها او حتى من غيرها وحااشترى لها كل هدومها من هنا , وانا عندى بيت اشتريته منذ عام ونصف وخلال هذه الفتره وانا باروق فيه لما بقى اخرجمال المطبخ واسع ومجهز باحدث الامكانيات من اضاءه واجهزه انا ماعرفش ازاي بتستخدم وله باب على الحديقه والحمام الاساسى ممكن االواحد ينام فيه ذلك ماقاله احد اصدقائى عندما زارنى هذا بخلاف حيز المعيشه الواسع الذى يفتح على حديقه انيقه جدا وحمام السباحه صغير لكنه رائع فى الصيف والمنزل يقع فى منطقه هادئه وراقيه وامنه وقريبه من المدينه فى نفس الوقت اي بنت فى مصر تتمناه وهو مجهز من جميعه يعنى مش عايز قشايه وارسلت لها شريط فيديو بالبيت والمنطقه حوليه و صورت المنزل حجرة حجرة وطلبت راْيها فلم ترد على وردت على والدتها ووالدها وكانا فى غايه الفرح. طيب انا عايز راْى العروسه لانه ده سيكون بيتها .ولاحياه لمن ينادى . اجعلينى احس انك مبسوطه واننى احرزت نجاح بعد مشوار من الصعوبات السقيمه. انا تعبت جدا لحين ماوصلت هذه المرحله واشتغلت كل ماتتخيلونه . اشتغلت مره امسح سيارات فى كار واش فى بروكلين وسمعت فتاه مصريه بتقول لامها داخل السياره ايه دا ياماما دا شكله نضيف اوى . هو مالاقاش شغله احسن من دى. والله العظيم انا سمعتها بالرغم ان الزجاج كان مقفول وكانت السياره يادوب خارجه من المنشف Blower وكنت اعمل مع عيال اسبان وصيع وشكلهم وحش فتركت المغسله بعد سماعى هذا الكلام وربنا سهل ومن شغله للتانيه حتى حصلت بعد معاناه على الدكتوراه فى سن صغير وتحولت من شخص تافهه يقوم بتنشيف السيارات عند خروجها من المغسله الى ان اصبحت المصرى الوحيد الذى اسند اليه اعاده تشفير برامج الاقمارالصناعيه بعد محاوله العبث فيها خلال حرب العراق فى مشروع سرى تابع لوزاره الدفاع .ولم اكن احلم فى يوم بمثل مرتبى والحمد لله رب العالمين اتذكر مره اشتغلت فى كافتيريا فى منطقه اسمها القريه village وهى مليئه بالمقاهى والمطاعم ومن اشهر مناطق نيويورك وحملت صينيه كبيره مليانه اكواب العصائر واثناء قيامى برص اكواب العصير فى احد الموائد لم احفظ توازن الصينيه ووقعت ووقع كل مافيها وكان ذلك فى اول يوم اشتغل فيه فى هذا المكان فاخذتها من قصيرها وخرجت من المحل بدلا من ان اطرد منه. وكنت اعمل وادرس تحت ظروف فى منتهى الصعوبه ووالله العظيم ياجماعه وان كان لاداعى لذكر هذا الا انى كنت احيانا اكل مره واحده فى اليوم علشان اوفر مصاريف المواصلات .. ومما خفف عنى علاقتى الحسنه والممتازه مع اساتذتى فكنت دائما محبوبا من جميع الاساتذه واتذكر انه عندما توفى والدى رحمه الله لم استطع الذهاب الى الامتحان واتصلت بالدكتور استاذ الماده فما كان منه الا قال لى: لاتخشى شيئا وعندما تستقر حالتك النفسيه اتصل بى كى نحدد سويا موعدا اخر للامتحان وحدث. ولم تتحسن احوالى الماديه والمعيشيه الا قبل نهايه الماجستير عندما بدات اشغال القمصان البيضاء وانتهى عهد الاشغال المهينه وعندما كنت فى السنه الثالثه من الدكتوراه حصلت على اكثر من ثلاثه عروض لفرص ممتازه ثم تفتحت لى امريكا واصبحت صديقتى منذ ذلك الحين. واثناء مناقشه الرساله كان هناك بروفسور يهودى قدم من سان فرانسيسكو ولم اعجبه لسبب ما, فقال لى موضوعك صعب وكان يجدر بك اختيار موضوع اخر ولااعرف كيف تمت الموافقه لك من البدايه وكانت الرساله فى: Specialty in Classical Real Analysis. "A New Characterization of Cesaro-Perron Integrals Using Peano Derivates." وظل يساْل فىّ اسئله متمكن عقدنى وهرانى اسئلة وانا اجاوبه وكلما يضع لى عائق اجتازه بمنتهى الثقه ثم ساْلنى عن رسالتى ى الماجستير وكانت فى: "On the Reflection Laws of Elliptic Differential Equations" فآخذ يساْلنى عن هذه القوانين ودخل معى فى تفاصيل التفاصيل حتى توقف عقلى عن التفكير ثم اقترحت اللجنه فتره استراحه فدخلت حجره محاضرات مجاوره وامسكت القلم وامامى نصف ساعه فقط كى اجد برهانا على حيثيه رياضيه طلب منى اثباتها ووجدت الحل فى اخر لحظه واتحفته به ولم يستطع ان ينفيه حيث وافق الاساتذه الاخرون عليه وفى النهايه شكرتنى اللجنه الا هذا البروفسور الذى تقدم بهدوء شديد ورفع نظارته وقال لى امام الحاضريين من اساتذه وطلبه وزائريين انا لست مندهشا ...لانه بلدك التى بنت الاهرامات تستطيع انجاب ابن مثلك ثم وقف الجميع فى عاصفه من التصفيق ,اما انا فلم اكن ارى سوى خيالات من انهيارالدموع التى لم استطع اخفائها. وخرجت مسرعا من القاعه دون تلقى التهانى لكنى نسيت كل سنوات التعب فى لحظه, من الكار- واش ومحطه البنزين والكافتيريا ودانكن دونتس والفرن ومحل الورد واشتغلت مساعد طباخ مع انى ماعرفش اطبخ وللعلم وليومنا هذا لا اعرف اعمل طبق الارز ودائما يطلع معجن مثل الكله .وينتهى الامر بشراوْه من المطاعم يعنى برضو الواحد اتمرمت لحد ماربنا كرمه. وكرم ربنا كبير اوى اوى. وافقت على دفع هذا المبلغ لانى ماحبش الكلام فى الماديات ولان الماديات دائما تفرق بين الناس الا ان هناك من نصحنى ان اتريث و اراجع نفسى لان العمليه شكلها كده دخول على طمع وخاصه عندما وجدته يريد الشقه باسم العروسه ويريد مبلغ كبير موْخر باين حايضعه فى البنك ضمانا للعروسه اذا ماحبتش امريكا وحبت ترجع يبقى عندها فلوس... كلام كده ماعجبنيش انا حسيت انها ممكن تيجى امريكا وبعد شهرين تطلب الخلع وترجع مصر وعندها شقه ومبلغ فى البنك. دى صفقه تجارية. عشان كده انا مستغرب من الكلام اللى بتقولوه ده. اذا كانت البنات مش لاقيه عرسان جاهزين امال بنت المنصوره دى مش عاجبها العجب ليه؟ وعلى فكره والدها راجل مكافح موظف بيعلم ثلاثه بنات واحده فى ثانوى و اثنتان بالجامعه بخلاف العروسه التى انهت التعليم بالجامعه منذ 3 سنوات ويعنى ناس بسطاء من عامه الشعب. دا انا اتجوز احلى منها وبنات بدون قوانين الخلع كمان. انا مش عايز بنات المنصوره . وللاسف غيرت فكرتى عن ابناء المنصورة........ توبه دى اسكندريه على كده تعتبر اوروبا بالنسبه للمنصوره. او يجوز انا وقعت مع ناس معقدين . معذره للمنصوريين معلش على الاطاله ماكانتش مقصوده لكن قلمى سرح من غيظى ,فانا اعطيك كل مامعى طواعيه لكنى مااحبش الانسان الذى يستغل طيبه الاخريين...... سلام بقى. اَلَا يَعلَمُ مَن خَلَقَ وَهُوَ اَللَّطِيفُ الخَبِير ُ The pessimist sees difficulty in every opportunity. The optimist sees the opportunity in every difficulty. Winston Churchill رابط هذا التعليق شارك المزيد من خيارات المشاركة
فــيــروز بتاريخ: 3 سبتمبر 2003 تقديم بلاغ مشاركة بتاريخ: 3 سبتمبر 2003 :) :) :) الاخ المحترم فالكون ايجيبت شئ لطيف ان الموضوع يكون سبب ان تحكى لنا قصة كفاحك المشرفه .. هو بس فيه نقطه احب اوضحها بخصوص موضوع الكرامه .. حضرتك اما وقعت الصينيه آثرت ان تترك المطعم و ترحل قبل ان تتلقى قرار بطردك .. ليه؟ مش عشان كرامتك كانت هتوجعك اوى لو حدث هذا لا سمح الله؟ رغم ان اى عقاب كان سيفرض عليك كنت هتبقى مستحق له لانك ارتكبت خطا فى عملك حتى لو كان غير مقصود و رغم هذا كرامتك لم تتحمل تصور الموقف .. فما بالك ان يكون جرح كرامتك لغير سبب سوى انك مسالم او عاوز تعيش كما تقول !! مفيش اى تعارض بين الحفاظ على الكرامه وبين ان الواحد يبقى عاوز يعيش .. المشكله ان البعض يتصور انه عشان اعيش يبقى افرط فى كرامتى !! ايه العلاقه اصلا :) على العموم بخصوص موضوع جوازة المنصوره او دمياط كل الموضوع انه ماكانش فيه نصيب .. واعتقد ان اهل العروسه ماكانوش داخلين على طمع هو بس النظريه ان بعض الفتيات تقول حيث انى لا احب فلان اللى متقدم لى ما الذى سيجعلنى اضحى من اجله؟ وبالتالى تطلب طلبات قد لا تطلبها من شخص تعرفه هى و متقدم لها بعد اعجاب او حب مثلا .. وقد لا يكون هذا هو السبب و يكون ان اهل العروسه مش عاوزينها تسيبهم و تهاجر و فى نفس الوقت شافوا انك عريس مناسب فكانوا فى حيره من امرهم فقرروا يشوفوا آخرك ايه :) يعنى لو طفشت ضميرهم مايوجعهمش ومايحسوش انهم السبب فى فركشة الجوازه .. و فى النهايه الله اعلم طبعا بالنفوس دى مجرد افتراضات مع تمنياتى لك وللجميع بالتوفيق و السعاده ان شاء الله .. "أَمْ مَنْ يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ وَيَجْعَلُكُمْ خُلَفَاءَ الْأَرْضِ أَإِلَهٌ مَعَ اللَّهِ قَلِيلًا مَا تَذَكَّرُونٌَ" صدق الله العظيم ----------------------------------- قال الصمت: الحقائق الأكيده لا تحتاج إلى البلاغه الحصان العائد بعد مصرع فارسه يقول لنا كل شئ دون أن يقول أى شئ مريد البرغوثى رابط هذا التعليق شارك المزيد من خيارات المشاركة
Lighthouse بتاريخ: 3 سبتمبر 2003 تقديم بلاغ مشاركة بتاريخ: 3 سبتمبر 2003 الاخ فالكون ايجيبت ربنا سيعطيك ثمرة تعبك وصبرك فلا تتعجل ولا تحزن المشكلة ياعزيزي ان هناك من هذه النوعية من الفتيات التي يعتبرها الجميع كمثال لجميع البنات وفي المقابل هناك فتيات اخريات على خلق وعلم ودين ومستعدات ايضا للتعاون وبمجرد ان تبدي استعدادها للتعاون الا وتبدأ المأساة حيث ينتظر منها الجميع ان تتنازل باستمرار فعلا الناس غريبة جدا من تتعاون يبدأ الناس في الاستهتار بها بل ويشكك البعض في نواياها ويذهب بهم الخيال لبعيد لتخمين سبب تعاونها هذا !!! واعتقد ان نوعية البنات المغاليات في طلباتهن يلجأن لهذا الاسلوب لسماعهن عن ماينتظرهن اذا ابدين تعاونا وفي النهاية الزواج نصيب وكل شخص له نصفه الذي قدره له الله مٌر الكلام زي الحسام يقطع مكان ما يمر اما المديح سهل ومريح يخدع صحيح ويغٌر والكلمة دين من غير إيدين بس الوفا ع الحر رابط هذا التعليق شارك المزيد من خيارات المشاركة
Falcon Egypt بتاريخ: 4 سبتمبر 2003 تقديم بلاغ مشاركة بتاريخ: 4 سبتمبر 2003 السلام عليكم العزيزه الاخت فيروز اشكرك جزيلا على تعقيبك وافتراضاتك فى محلها وجزاكى الله خيرا ان شاء الله. العزيزه الاخت لايت هاوس المنتدى بوجودك احييكى على ردك وكلامك سليم وفى محله تقبلى تحياتى اَلَا يَعلَمُ مَن خَلَقَ وَهُوَ اَللَّطِيفُ الخَبِير ُ The pessimist sees difficulty in every opportunity. The optimist sees the opportunity in every difficulty. Winston Churchill رابط هذا التعليق شارك المزيد من خيارات المشاركة
بنت شعنونة بتاريخ: 5 سبتمبر 2003 كاتب الموضوع تقديم بلاغ مشاركة بتاريخ: 5 سبتمبر 2003 استاذ فالكون بجد بجد انت نموذج مشرررررررررف وياريت كل الناس تبقى زي حضرتك وبجد بجد انا فرحاااااانا جدا اني اعرف اخ عزيز زي حضرتك حتى لو اننا مجرد حروف على صفحة واحدا " كلالالالالالالالام كبير اوي اوووووووي" بس يا عيني على بنات المنصورة رااااحوا هدر "ربنا يسامحك يا جدي حد قالك تبقى من المنصورة" وبعدين مهر 10 الاف دولار؟؟؟؟؟؟ دا انت لقططططططططططةةةة على كدا بص يا استاذ فالكون صبرك عليا وانا راجعا من السلوم ها استلقطلك عروسة من ع الحدووووود تكون ع الزيرو و اخر موديل وب 10 الاف مصري بس ياااااا بلالالالالالالالاشششش نرجع بقى للكلام الجد فعلا هيا تجربة وحشة لكن للأسف احنا بشر ولازم نتعقد من التجارب وتسيب اثر بس المهم اننا نحاول نفهم ان مش كل الناس كدا "يا عيني ع العقل........... يخرب بيت اللي يزعلني بجد يعني" اسمع حضرتك الفلم العربي دا من عشر ايام بالضبط رحت اتفرج على عريس في منزل احد الأصدقاء العريس 42 سنة وعايش من 12 سنة في السعودية وحالتة المادية ميسورة جدا من عربية لشقة لفلوس وهايل وخريج تجارة فيما عدى السن انه قد والدي تقريبا ماكنش في اعتراض ورحت اشوفه الحق يقال شكله في التلاتين لكن اول ما بدا يتكلم حسيت اننا قدام عجووووز متصابي "وش متنرفز: هوا حاسس انه كبير ف بيحاول يبين انه شاب بساله انت بتصلي قالي بالحرف انا متدين بس بروشششششنة طبعا انا سمعت الجملة دي وجاتلي هستيرية ضحك متصلة قلتله ازاي حضرتك يعني قالي يعني مش متزمت خااااالص "يااااااي" وبعدين انا بحب اكون up dating كل ما انزل اروح اماكن الجديدة بتاعت الشباب زي كارفور و جراند كافية و المولات الجديدة " هأ هأ هااااا" -؟؟؟؟؟!!!!!!! " دي علامات التعجب اللي كانت على وشي منه" وبرضه كان عاوز دكتورة والسبب انه اخته دكتورة وعارف انها ماعندهاش وقت تعرف شباب انما صديقات الدراسة في الكليات النظرية كانوا طول السنة يحبوا في بعض او يخرجوا مع بعض واخر شهر يذاكروا عشان كدا عاوز دكتورة!!!!!! - هوا باباكي عنده كام سنة - في الخمسين - علامات ذعععررر ورعب .... ايه دا بس؟؟ دا صغير اوي؟؟ - في سري... اه من سنك كدا تقريبا ... افففف المهم قعدنا نتكلم شوية مع بعض وهوا اترسم علياااا جدا بفلوسه وانه عنده وعنده لدرجة عصبتني خليتني اقوله لو حضرتك عاوز قرطاس جوافا يبقى طلبك مش عندي!!!!! دا غير انه كلمة عربي وعشرة انجليزي زي ما اكون بكلم الحج رامسفيلد زمانه!!!!!!! وكل شوية يكلمني عن شباااااااابه الفذ اه والنكتة بقوله عاوز اهم حاجا في مراتك ايه قالي بالحرف انها تدلعني !!!!!!!!!!! ازاي يعني؟؟ يعني تبقى انثى كدا وتدلعني انا عندي استعداد ارجع البيت الاقيها مش طابخا ولا حاجا لكن متزوقة وامورة اخدها ونتغدى برا واهم حاجا ما تبقاش selfesh ooooooohhh !!!!! طب وايه كمان - بس - نعم؟؟؟؟ بس كدا اه همممممم في سري حضرتك عاوز رقااااااااصة ومششششششششششششششيت يارب يا مصبر نييييييييييييييييييي شايف المناظر يا استاذ فالكون بالذمة الحج الرووووووش دا تقوله ايه؟؟ قال و 42 سنة قاااااال وانا من البلد ديييييييييييي رابط هذا التعليق شارك المزيد من خيارات المشاركة
KWA بتاريخ: 6 سبتمبر 2003 تقديم بلاغ مشاركة بتاريخ: 6 سبتمبر 2003 بسم الله الرحمن الرحيم السلام عليكم ورحمة الله وبركاته الآخ الفاضل ....Falcon Egypt محاوله الزواج من مصر تجربه قام بها الكثير من الشباب من الجنسين و نسبه النجاح للأسف لا تتعدي عشره في المائه لأن للأسف فكره هذه النوعيه من الزواج تبني علي الطمع و احيانا يتم الزواج و تحضر الزوجه و يحدث لها ما يسمي بصدمه التكيف مع المجتمع و تتعدد الأسباب سواء اللغه و عدم اتقانها ما يسب انعزال عن المجتمع ...او العادات و التقاليد و عدم التكيف او الأنبهار بالحياه الجديده و اختلافها عن مصر ....او الأفتقاد للوطن و الأهل....و الذي اقوله لك واقع و تجده في مشاكل المصريين خصوصا في الجوامع و عرض مشاكلهم و المساعده علي حلها...و حيث تتكون في كثير من المساجد مجموعه من المسلمين كبار السن و الخبره و متطوعين في المساعده علي حل مشاكل المسلمين و خصوصا العائليه و كل فرد في الجامع يساعد علي قدر ما يستطيع اذا اراد....و ايضا بيساعدوا علي التقرب بين الشباب للزواج و انت عايش في ولايه كبيره و لماذا لا تحاول و تتزوج من هنا مصريه او عربيه او امريكيه مسلمه ....و بالتالي لم تتصادم مع اي من المشاكل المذكوره و هاتحتفظ بالناحيه الدينيه و توافق في الفكر و الفهم للواقع و المجتمع و اشجعك علي الزواج و لا تكف عن البحث و الزواج قسمه و نصيب و تمنياتي بالتوفيق انشاء الله ....و ما تنساش دعوتنا للفرح ...و مبروك مقدما..... Egypt is my home , USA is my life. رابط هذا التعليق شارك المزيد من خيارات المشاركة
Farida بتاريخ: 6 سبتمبر 2003 تقديم بلاغ مشاركة بتاريخ: 6 سبتمبر 2003 الدكتور فالكون ايجيبت انت فعلا نموذج للشباب المصرى و قصة كفاحك جميله و نجاحك لازم تفخر بيهم و بصراحه انا مستغربه جدا انك تفكر تتجوز عن طريق صوره و اسمح لى اللى بيقوله الأ خ ك.دابليو.أ عن فشل الجوازات من النوع ده المفروض و الأكيد انها تفشل مش تنجح عمر ما كان الجواز موضوع سهل كده عن طريق الصور و عن طريق التليفون انا مش مصدقه انسان بالعقليه العلميه الفذه دى و اسمح لى يفكر و مش بس يفكر لأ يمشى خطوات كبيرة فى الموضوع ده .... أولا : فيه مصريات كتير عايشين فى امريكا و كندا و بيدرسوا و متدينات و زى الفل ليه ما فكرتش فى حد فيهم .... الصراحه ان الشاب المصرى عايز مهما لف و مهما شاف و مهما كانت درجه علمه و ثقافته مش عايز واحده تتعب دماغه و تعرف حقوقها و وواجباتها بيخافوا ليه مش عارفه ... مع انى فى رايي ان الزوجه من النوع ده بتكون اقدر على تحمل المسئوليه و المشاركه مش تكون حمل عليه و شيله يشيلها على ضهره بدل ما تقف جنبه و تشيل معاه ثانيا : حكايه ان البنت كانت مقفله و متزمته و انك عرفت ده من التليفون برضه فشنك ....انا أعرف واحده فى الكليه و كان لها قصة حب مش عاديه و رحلات ايه و فسح ايه بس يا حرام ما تمتش و علشان ما تطلعش من الجامعه من غير عريس عملت ايه .... طلعت مع كليه تانيه رحله و طبعا البنات و الولاد طالعين عادى من غير اهاليهم لكن هى (خدلى بالك انت) خدت اخوها معاها علشان ايه أهلها مش بيرضوا يطلعوها رحلات لوحدها !!!!!!!!! و ايه كانت النتيجه جالها 3 عرسان اختارت احلى و اغنى واحد فيهم و اتجوزته و معاها 3 اولاد دلوقتى المهم ان ال3 دول اعجبوا بأخلاق القريه و اخلاق البنت و ادبها و ادب اهلها اللى مش ممكن تطلع رحله لوحدها لأ لازم اخوها ....... أخيرا :: الزوجه دى مش قطعه اثاث و لا صوره حا تعلقها على الحيطه ل لازم الواحد يتعب و يدور و يتاكد من شريكه المستقبل يعنى حضرتك تكافح الكفاح الرهيب ده و تتعب علشان تاخد الدكتوراه و مش عايز تتعب علشان تكون اسرة و بيت و اولاد يدعولك فى حياتك و بعد مماتك ... يعنى انا اعلم ان الدكتوراه و المستقبل العلمى مهم لكن الأسرة مهمه و يمكن تكون اهم فمش المفروض الواحد يستهين بالأمور دى و يعتبرها ثانويه يا دكتور ......... لكن الصور و التليفونات و الإنترنت و التليفزيون ما بيفتحوش بيوت *اللهم انى اشكو اليك ضعف قوتى و قلة حيلتى و هوانى على الناس *اللهم و لى امورنا خيارنا و لا تول امورنا شرارنا * الساكت عن الحق شيطان أخرس * الشعوب تستحق حكامها رابط هذا التعليق شارك المزيد من خيارات المشاركة
se_ Elsyed بتاريخ: 6 سبتمبر 2003 تقديم بلاغ مشاركة بتاريخ: 6 سبتمبر 2003 بالصلاة عالنبي كده ماتنقلولنا الموضوع ده فى باب الأسرة والطفل .. لأنه موضوع جدير بالمناقشة ومكانة مش هنا . الأخ الكريم صقر مصر .... مش معنى أن تجربة مانجحتش يبقى كل التجارب القادمة ستكون كذلك ... والتجربة التى مررت بها يا صديقي هي من ضمن الضرايب التى ندفعها في الغربة حيث لا يكون عندك متسع من الوقت انك تتعرف على بنت وتخطبها وتعيش الفترة التى تعتبر أحلى فترات العمر ( أسألني انا من كنت سوابق ) لكن أرجع وأقول لك انك لازم تحاول وتسعى وبعدين فى الآخر نصيبك لابد يصيبك - مافيش مفر - بس اللي انا مستغرب له فى القصة بتاعتك إزاي فيه ناس لسه بتطلب مهر لغاية دلوقت طالما مش هاتجهز البنت ؟!!!! وبعدين فيه سؤال تاني بجد هو أبوها لما كلمك فى الموضوع ده طلب المهر بالدولار ولا بما يعادله بالسحتوت المصري ؟ يا عزيزي بلدنا مازلت بخير ومليانة ولاد حلال وبنات عائلات محترمة - يا اخي بص عندك هنا فى المنتدى شوية بنات يخلوا المتجوزد يفكر انه يتجوز تاني ( وش شكله هايتبطح ) - بس الجواهر الثمينة والأحجار الكريمة تتطلب أن نبحث وننقب عنها جيداً وكلما بذلنا مجهود وتكبدنا المشاق فى الوصول إليها كلما أحسسنا بقيمتها بعد ذلك ( يا نهار أبيض أيه الكلام ده ... الواحد بيقول درر والله مش كلام ) أنزلك بس كده اجازة حوله وخلي والدتك واخواتك البنات يعملوا شغل ويدوروا لك على عروسه بنت حلال وهاتلاقي الخبر أنتشر من الانفوشي لرأس التين .... ألحق يا جدع شاب أمريكاني جاي يدور على عروسه .. وهاتشوف كام سي في هاتجيلك . عايز أقول رأيي فى موضوع الجواز من اجنبية - من غير ضرب لو سمتحوا -أنا فى إعتقادي الشخصي بإن الجواز من غير المصرية بيبقى عامل زي اكل الفراخ البيضا أو فراخ الجمعية ممكن يبقى حلو لكن مالهوش طعم ، مافيش أحسن من فكيهه البلدي المبطرخه الجميله حاجة كده تملى العين وتشغل حيز من الفراغ فى البيت ( انظر الكتاب صفحة حرب الفكيهات ) س س فرارجي وجواهرجي بعد الضهر الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
White heart بتاريخ: 7 سبتمبر 2003 تقديم بلاغ مشاركة بتاريخ: 7 سبتمبر 2003 se_ Elsyed كتب: عايز أقول رأيي فى موضوع الجواز من اجنبية - من غير ضرب لو سمتحوا -أنا فى إعتقادي الشخصي بإن الجواز من غير المصرية بيبقى عامل زي اكل الفراخ البيضا أو فراخ الجمعية ممكن يبقى حلو لكن مالهوش طعم ، مافيش أحسن من فكيهه البلدي المبطرخه الجميله حاجة كده تملى العين وتشغل حيز من الفراغ فى البيت أما انا فرأيي من رأى العزيزة "Farida " فيه مصريات كتير عايشين فى امريكا و كندا و بيدرسوا و متدينات و زى الفل ليه ما فكرتش فى حد فيهم .... و هذا بالطبع بالنسبه للجنسين... فأنا اعتقد بصعوبه التأقلم لدى الكثيرين، فالمهاجر او المهاجرة، فى بدايه مهجرة يتعرض لمختلف أنواع الضغوط و التجارب و الأهم التعامل و الأختلاط مع أجناس من البشر مختلفة تماما عما عهده فى وطنه.... و قد تمتد هذة الفترة و هى بمثابه "امتحان عسير" الى بضعه سنوات يثبت بعدها ان كان فى استطاعته أو استطاعتها التأقلم و تقبل المجتمع الجديد بناسه و عاداتهم و تقاليدهم و طباعهم .... فلا يمكن تناسى هذة الفترة من حياة أى مهاجر أو مهاجرة ... خاصه عند قرار الزواج ... فأنا ارى الصعوبه متمثله فى "المغامرة" بأحضار زوج أو زوجة من والوطن الى المهجر و من ثم بدء هذة الفترة من الأختبار... التى قد تنجح و قد تفشل و هذا وارد أكثر و لهذا انا اميل اكثر الى أن يختار كل شريك شريكه فى نفس بلد المهجر سواء كان هذا الشريك من نفس الجنسيه أو غيرها فهذا يرجع أولا الى النصيب.. ... أن واحدة من آساليب النُظم الديكتاتورية هى : وهى بكل أسف كانت ومازالت مٌنتشرة ومُستخدمة في بلدنا الحبيب وعلى كافة المستويات بلا إستثناء ! رابط هذا التعليق شارك المزيد من خيارات المشاركة
بنت شعنونة بتاريخ: 7 سبتمبر 2003 كاتب الموضوع تقديم بلاغ مشاركة بتاريخ: 7 سبتمبر 2003 معلش سؤؤؤؤؤؤؤؤؤاااااااااااال بس للأستاذ فالكون طالما حضرتك كنت ها ترتبط عن طريق صورة هل ممكن ترتبط عن طريق برنامج الهوا سوا دا؟؟ وليه؟؟؟ وانا من البلد ديييييييييييي رابط هذا التعليق شارك المزيد من خيارات المشاركة
freefreer بتاريخ: 8 سبتمبر 2003 تقديم بلاغ مشاركة بتاريخ: 8 سبتمبر 2003 قصة كفاح جميلة يا أخى فالكون .. و لقد رأيت فيها ما أود اقتباسه ..بعد اذنك فى موضوع اخر بسم الله الرحمن الرحيم .. إن المنافقين فى الدرك الأسفل من النار ولن تجد لهم نصيرا .. صدق الله العظيم ( النساء – 145 ) رابط هذا التعليق شارك المزيد من خيارات المشاركة
se_ Elsyed بتاريخ: 8 سبتمبر 2003 تقديم بلاغ مشاركة بتاريخ: 8 سبتمبر 2003 قصة كفاح جميلة يا أخى فالكون .. و لقد رأيت فيها ما أود اقتباسه ..بعد اذنك فى موضوع اخر طب الموضوع راح فين علشان نروح وراه ونشارك ؟ الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
Farida بتاريخ: 8 سبتمبر 2003 تقديم بلاغ مشاركة بتاريخ: 8 سبتمبر 2003 الأستاذ العزيز سى السيد حضرتك تعجبت كيف ان والد عروسه الأستاذ فالكون ايجيبت طالبه بالمهر و هو لن يساهم فى تجهيز المنزل ....فرجاء قراة هذا الموضوع : http://www.egyptiantalks.org/bforums/viewt...opic.php?t=7569 *اللهم انى اشكو اليك ضعف قوتى و قلة حيلتى و هوانى على الناس *اللهم و لى امورنا خيارنا و لا تول امورنا شرارنا * الساكت عن الحق شيطان أخرس * الشعوب تستحق حكامها رابط هذا التعليق شارك المزيد من خيارات المشاركة
crossfield بتاريخ: 8 سبتمبر 2003 تقديم بلاغ مشاركة بتاريخ: 8 سبتمبر 2003 معلش سؤال يعنى كده على الماشى للأخ فالكون و لباقى السادة الرجال الللى فى المنتدى:هو لما واحدة أهلها يطلبوا مهر مباااااااالغ فيه قوى زى الجماعة بتوع المنصورة دول ايه اللى بيخلى الواحد برضو يوافق و يتمسك بالجوازة مع ان الواضح كده من غير ما ندخل فى تفاصيل ان الجوازة فعلاً على طمع؟؟؟؟؟؟؟؟ هل المغالاة فى المهور بتخلى الواحد عينه تزغلل ؟؟؟؟يعنى آه طالما غلوا المهر كده يبقى أكيد اتندم لها كتيييييير و همه اللى مش راضيين و مش عاجبهم و ان كان عاجب و ده اللى عندنا و احنا بنتنا تتاقل بالدهب و الكلام اياه ده... الناس فعلاً اتصرعت على الفلوس . نرجع للموضوع يا شنشن(شرباتك موجووووود يا ست الكل و قرب يبوظ من الركنة) تفتكرى واحدة طالعة تعلن عن نفسها(ما هو اعلان برضو بس ببلاش) على انها سلعة و تقعد تسرد فى محاسنها و مميزاتها ؛تفتكرى واحدة بترخص نفسها بالشكل ده ممكن يكون شكلها ايه قدام اللى حتى هيتجوزها بالطريقة دى؟ثم و لنفترض انها متجوزتش بالطريقة دى خااااالص شكلها بعد كده قدام الناس هيبقى ايه؟جوزها فى أى خلاف هيقولها هوه نتى كنتى لاقية جواز؛احمدى ربنا انى رضيت بيكى ...الخ. الطريقة بصراحة رخيصة و مهينة جداً و لا تتماشى اطلاقاً مع تربيتنا و ديننا و خصوصاً لما تبقى على مرأى و مسمع من الكرة الأرضية كلها .ثم ان المفروض فى الأمور دى الخصوصية ؛ازاى اتجوز على الهواااااااااااااااااااااااااااا؛يا نهار اسود(وش مذبهل على حولان)؟ أنا كنت شىء وصبحت شىء ثم شىء شوف ربنا .. قادر على كل شىء هز الشجر شواشيه ووشوشنى قال : لابد ما يموت شىء عشان يحيا شىء عجبى !! رابط هذا التعليق شارك المزيد من خيارات المشاركة
بنت شعنونة بتاريخ: 8 سبتمبر 2003 كاتب الموضوع تقديم بلاغ مشاركة بتاريخ: 8 سبتمبر 2003 كنت بتكلم انا واخويا في الموضوع دا وقالي كلمة واحدا فزعتني جداااااا قالي وانا اتجوز واحدا مفضوحة ليه !!!!!!! فكرت فيها فوجئت ان الكلمة للأسسسسسسسسف صح اوي "وش حزييييييين" وانا من البلد ديييييييييييي رابط هذا التعليق شارك المزيد من خيارات المشاركة
Sherief AbdelWahab بتاريخ: 8 سبتمبر 2003 تقديم بلاغ مشاركة بتاريخ: 8 سبتمبر 2003 و اللي قالته كروساية هو اللي بنقوله من صباحية ربنا...المسألة انحدرت و بقت مجرد صفقة تجارية من خلال المفهوم السطحي جدا للقناة دي...مجرد صفقة بيع وشراء و كل اللي بتعمله القناة دي باختصار هو القيام بدور السمسار...اللي بيقرب طرفي التعاقد و ينتهي دوره بتوقيع العقد... الغريب هو ان يكون فيه موضوع مطنشه آخر تطنيش و تهتم بيه فجأة...أنا ملاحظ اهتمام غريب جدا بموضوع العنوسة و الجواز أكتر من اللازم في الايه ار تي كلها...قناة مخصصة للغرض دة من وجهة نظر أصحابها، زائد المحاضرات الجديدة لعمرو خالد...و المصحوبة بحملة دعائية ضخمة...هو فيه ايه بالضبط؟ خلص الكلام Sherief El Ghandour<br /><br />a furious Egyptian رابط هذا التعليق شارك المزيد من خيارات المشاركة
se_ Elsyed بتاريخ: 9 سبتمبر 2003 تقديم بلاغ مشاركة بتاريخ: 9 سبتمبر 2003 والغريب هو ان يكون فيه موضوع مطنشه آخر تطنيش و تهتم بيه فجأة...أنا ملاحظ اهتمام غريب جدا بموضوع العنوسة و الجواز أكتر من اللازم في الايه ار تي كلها؟ الناس تعبانه يا شريف ياخويا وبقت تشم فى الجبس ... والشاب من دول بيتخرج من الجامعه ويفتكر ان الحياه لونها واردي وفاتحه له ذراعيها ييجي يقرب منها تروح مدياله مقص حراميه جايباه على بوزه ويقع على أرض الواقع .. وإذا لقى شغل يفضل برضوا يحرت لحد مايبقى عنده 30 سنه ولسه ماعندوش فلوس يأجر بها أوضه وصاله .... وطبعاً ده رفع سن الزواج عند البنات برضوا ومابقاش موجود الفارس بتاع زمان اللي راكب حصان وجاي يخطف البنت . لكن ليس معنى ذلك أن الموضوع يوصل لدرجه قنوات خاصة وبنات تعرض نفسها وناس تتصل وتختار أحسن واحده فيهم والكلام الفاضي ده ... وزي ما قالت ست العاقلين كروسايه الطريقة بصراحة رخيصة و مهينة جداً و لا تتماشى اطلاقاً مع تربيتنا و ديننا الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
freefreer بتاريخ: 11 سبتمبر 2003 تقديم بلاغ مشاركة بتاريخ: 11 سبتمبر 2003 قصة كفاح جميلة يا أخى فالكون .. و لقد رأيت فيها ما أود اقتباسه ..بعد اذنك فى موضوع اخر طب الموضوع راح فين علشان نروح وراه ونشارك ؟ فى السياسة أخبار و تحاريف .. بس لسة ما كملشى .. بسم الله الرحمن الرحيم .. إن المنافقين فى الدرك الأسفل من النار ولن تجد لهم نصيرا .. صدق الله العظيم ( النساء – 145 ) رابط هذا التعليق شارك المزيد من خيارات المشاركة
بنت شعنونة بتاريخ: 14 سبتمبر 2003 كاتب الموضوع تقديم بلاغ مشاركة بتاريخ: 14 سبتمبر 2003 معلش سؤال يعنى كده على الماشى للأخ فالكون و لباقى السادة الرجال الللى فى المنتدى:هو لما واحدة أهلها يطلبوا مهر مباااااااالغ فيه قوى زى الجماعة بتوع المنصورة دول ايه اللى بيخلى الواحد برضو يوافق و يتمسك بالجوازة مع ان الواضح كده من غير ما ندخل فى تفاصيل ان الجوازة فعلاً على طمع؟؟؟؟؟؟؟؟ هل المغالاة فى المهور بتخلى الواحد عينه تزغلل ؟؟؟؟يعنى آه طالما غلوا المهر كده يبقى أكيد اتندم لها كتيييييير و همه اللى مش راضيين و مش عاجبهم و ان كان عاجب و ده اللى عندنا و احنا بنتنا تتاقل بالدهب و الكلام اياه ده... الناس فعلاً اتصرعت على الفلوس كروساية انا اختلف بس حتة صغنونة هنا اوقات الموقف دا يحصل كا اختبار يعني يكون سمعة البنت وعيلتها فل الفل لكن الجوازة جوازة صالونات فتلاقي البنت من خوفها هيا واهلها يطلبوا رقم عالي عشان يشوفوا الراجل "شاااااااااااااريهم" والا لا داخل على طمع والا لا خصوصا لما تكون عائلة مستريحة الكلام دا اتكلمنا فيه انا وعمي الطفشان مييييييييت مرة لآني اوقات كتير اقع في الغلطة دي انما مش الرقم المهووووووووول اللي اتقال مع اخونا فالكون لآنه بيكون عاوزين نفهم اللي قدامنا لكن يمكن اسلوبنا فيه شيء من الخطا واوقات بيكون صح بيني وبينك انا احترت "وش محتار حزين: وانا من البلد ديييييييييييي رابط هذا التعليق شارك المزيد من خيارات المشاركة
White heart بتاريخ: 15 سبتمبر 2003 تقديم بلاغ مشاركة بتاريخ: 15 سبتمبر 2003 crossfield كتبت: لنفترض انها متجوزتش بالطريقة دى خااااالص شكلها بعد كده قدام الناس هيبقى ايه؟ انا خطر على بالى سؤال تانى... هل فعلا ان اللى بنشوفهم على الشاشة هما فعلا الأشخاص الحقيقيين؟؟ يعنى مش ممكن يكون الأشخاص الحقيقيين وراء الكواليس و بيانتهم مختلفة و اللى قدامنا دول مجرد ممثلين؟؟ هنا فية برامج كتير بالشكل دة .... بعنى فية برنامج ألمانى على احدى القنوات الألمانية بتدور أحداثة داخل قاعة محكمه و نشاهد قاضية مع مستشاريها و هى تبحث و تبت كى تحكم فى قضايا شخصية خاصة الطلاق و الحضانة ... و نتابع أحداث الجلسة كاملة .. فنرى الزوجة و هى تقص تفاصيل مشكلتها مع زوجها أو العكس، و نرى و نسمع الشهود من الطرفين و دفاع المحامين.... و فى النهاية نسمع الحكم .... بالطبع القضية بتفاصيلها حقيقية اما ما يدور أمامنا فهو نوع من أنواع التمثيل ... هناك أيضا برنامج فرنسى يستضيف فية المذيع دائما شاب و شابة مما لدى أحدهم مشكلة ما تجاة الأخر و ليكن أكتشاف أحدهم خيانة الأخر و نشاهد أحداث و وقائع المواجهة و تفاصيل و شهود الطرف المدعى .... فهذة ايضا أحداث حقيقية و لكن ما نراة هم ممثلون .... هذة البرامج معدة خصيصا كى تظهر على انها حقيقية و واقعية و لكنها فى الحقيقة غير ذلك ... اليس من الممكن أن يكون موضوعنا هذا هو من نوعية هذة البرامج ... أى مكتب زواج وراء الكواليس، و احداث تمثيلية فى العلن ؟؟!! كيف نستطيع اثبات العكس؟؟ ... أن واحدة من آساليب النُظم الديكتاتورية هى : وهى بكل أسف كانت ومازالت مٌنتشرة ومُستخدمة في بلدنا الحبيب وعلى كافة المستويات بلا إستثناء ! رابط هذا التعليق شارك المزيد من خيارات المشاركة
Recommended Posts
انشئ حساب جديد أو قم بتسجيل دخولك لتتمكن من إضافة تعليق جديد
يجب ان تكون عضوا لدينا لتتمكن من التعليق
انشئ حساب جديد
سجل حسابك الجديد لدينا في الموقع بمنتهي السهوله .
سجل حساب جديدتسجيل دخول
هل تمتلك حساب بالفعل؟ سجل دخولك من هنا.
سجل دخولك الان