الرحلة اللاندنجية فى الأراضى الكندية

[ايناس احمد]

تسجيل متابعة يااستاذ عبداللة

حمدلى على سلامتكو ويارب تكونو انبسطتو فى الرحلة

متابعين حضرتك

[ELSHAMY]

تسجيل متابعة يا أستاذ عبد الله...

فين يا عم التفاصيل ؟ أنا على بال ما وصلت تورونتو كنت كتبت ييجى عشر صفحات....

إيييييييييييييييييييييييه......فين أيامك يا شامى...

مش قلناك فتحت على نفسك فتوحة....

شد حيلك يا بطل...

تحياتى

تم تعديل 30 يناير 2009 بواسطة ELSHAMY

[elmadysm]

تسجيل متابعة يا أستاذ عبد الله...

[pharaon]

متابعين مستنين

وعقبالنا يا رب

:)

[samehelassad]

تسلم ايدك يا عبدالله باشا. استفدنا ياريس من كلامك برغم ان سمعنا زية قبل كدة. تسلم ايديك على المواقع الجميلة دي.

تسجيل متابعة

[ابن الصعيد]

تسجيل متابعة

الرجاء تكبير الحلقة

احنا اتهرينا مشاريب علي القهوة بتعتك .......... مشروب قبل الشوط ومشروب بعدة

[اسكندرية تانى]

اجمل تحية للاخ عبدالله

و متابعين الرحلة اللاندنجية!!!

[abdelallah]

د/الشامى بنفسه فى الموضوع بتاعى؟

أنا عاوز أقول لك حاجة "إنى أحبك فى الله" على الرغم إنى لم أرك حتى الأن.

حاجة ثانية ربنا يجازيك خيرا عنى.. ياما ضحكت و إستفدت من مواضيعك.

تسجيل متابعة يا أستاذ عبد الله...

فين يا عم التفاصيل ؟ أنا على بال ما وصلت تورونتو كنت كتبت ييجى عشر صفحات....

إيييييييييييييييييييييييه......فين أيامك يا شامى...

مش قلناك فتحت على نفسك فتوحة....

شد حيلك يا بطل...

تحياتى

[abdelallah]

أزاى الكلام ده أمال فين المشروب اللى بين المشروبين دول!

أنا أتشرف بوجودك معايا.

تسجيل متابعة

الرجاء تكبير الحلقة

احنا اتهرينا مشاريب علي القهوة بتعتك .......... مشروب قبل الشوط ومشروب بعدة

[abdelallah]

الحلقة الثالثة:

السلام عليكم و رحمة الله و بركاته

حاجة ثانية كان لازم نرتب لها و إحنا بنستعد للسفر و هى الإنتقال من مطار "بيرسون" فى تورنتو ألى "داون تاون" خاصة إننا حنوصل الساعة 11 مساءا و لسه إجراءات الجوازات و الشنط و الهجرة.

دخلت على موقع مطار "بيرسون" و هو:

www.gtaa.com

و لقيت عندهم خريطة بالأسعار المتوقعة بين المطار و مناطق تورونتو المختلفة و من بينها طبعا منطقة "داون تاون" و كان السعر فى حدود ال 50 دولار كندى. عملت بحث على الإنترنت على شركات التاكسى و الليموزين و لقيت بعضهم حاطط الأسعار نديهم ال"بوستال كود" و هم يدولك السعر. و بعضهم حاطط ارقام التليفون.

إخترنا شركة بتعمل حجز على الإنترنت بعد ما تديهم تفاصيل الرحلة بتاعة الطيران و جه لى تأكيد الحجز على الإنترنت و شوية خطوات بسيطة علشان ألاقى التاكسى اللى أنا حاجزة .. العملية بسيطة جدا .. حأطبع ورقة تأكيد الحجز و بعد الخروج من" الجمرك" أروح للمنطقة المخصصة لإنتظار التاكسى و الليموزين. تدور على التاكسى بتاعك و بالسلامة على الأوتيل. "مفيش حد مستنيك بره ماسك يافطة مكتوب عليها إسمك!".

الكلام جميل بس اللى حصل مش كده خالص. تعالوا نعمل "فلاش فورود" عكس "فلاش باك" يعنى نسبق سياق الأحداث و نروح ليوم اللاندنج و نشوف اللى حصل.

الموقف كلاتى الساعة حوالى 11 و نصف بتوقيت تورونتو ( تورنتو هى مدينة كبيرة فى بلد إسمه كندا), و درجة الحرارة حوالى (-2) ( يعنى صفر و نقًص إثنين) و الدنيا بتمطر (بتمطر يعنى السماء بينزل منها مياه) بعد رحلة إستمرت أكثر من 17 ساعة ( 17 ساعة يعنى 24 و ننقص 7) و الأولاد على أخرهم من التعب و معانا 4 شنط حجم كبير + 2 حجم صغير + شنطة لابتوب + عربية أطفال و كلنا خلصانين تعب و أروح أدور على التاكسى مفيش له أثر و كل دقيقتين ييجى تاكسي يأخذ واحد من الواقفين على الرصيف زى حالاتنا و يمشى أقول معلش الغايب حجته معاه أو "نو بيوز جود بيوز " بالإنجليزى علشان إحنا فى كندا .

و بعد حوالى عشر دقائق قلت ما بدهاش بأدور حواليا لقيت كشك فيه حد مدفى على الأخر قلت أروح أشوف إيه الأخبار رحت عنده و خبطت فتح لى أكنه كان نايم فى كهف ( الدنيا كانت ساقعة جدا)

قلت له : إيه ياعم النظام .. التاكسى فين.

هو: شركة إيه؟

رحت رميت الورقة فى وشه – أقصد إديتها له و قلت له إتفضل – .

راح باصص فى ورق قدامة و قال لى : أه ده جه و إنتم إتأخرتم عليه فمشى!!!!

بصيت له شوية مش مستوعب و دماغى بتشتغل بسرعة الصاروخ طب و حأعمل إيه دلوقت ؟ كندا جابت فينا جون بسرعة كده فى أول دقيقة فى الماتش ؟ (إقتباس من د/الشامى) و اللا المصريين حيقدروا يصدوا الكرة و يعملوا هجمة مرتدة؟

ربنا كريم قوى.. و أنا بأبحث فى الإنترنت قبل السفر وجدت شركة ثانية كانت كاتب"ة لما توصل المطار كلمنا و نصل إاليك فى 10 دقائق" و فيه رقم مجانى للإتصال بهم. أخذت رقمهم للإحتياط – أنا مرديتش أكلمهم من الأول علشان ما بيبعتش تأكيد للحجز!

بصيت حواليا لقيت فيه تليفونات جوا المطار قلت للأولاد تعالوا ندخل المطار علشان أتكلم بس هم كانوا عاوزين يقعدوا فى المطر و زى ما قلنا( المطر يعنى السماء بينزل منها مياه) . جريت على جوا و كلمتهم و أخذ عدد الأفراد و عدد الشنط و قال لى مينفعكش غير عربية فان. طبعا لو قال لى مينفعكش غير عربية نقل كنت حأوافق.و راح إدانى رقم العربية و قال لى 10 دقائق حتيجى لك.

عدت الدقائق زى ساعات و دماغى بتفكر لو مجاش حيكون إيه الوضع .. بس العربية جت و نزل منها راجل ملامحة باكستانى (أنا الحمدلله بأقدر أميز كثير من الجنسيات من مجرد النظر لكثرة) و جه يدخل الشنط و أنا بأدخل الأولاد العربية علشان الدنيا ساقعة جدا.. و كان فيه مشكلة صغيرة إنى أقنع الأولاد بلبس حزام الأمان بس لأنهم كانوا تعبانين جدا المقاومة المتوقعة كانت قليلة.

و إنطلقت العربية فى شوارع تورنتو إلى الفندق.

و إستغليت الفترة دى فى الحديث إلى السائق اللى طلع فعلا باكستانى ..

إن شاء الله أكتب لكم الحديث ده لما نتكلم عن اللاندنج نفسه لأنه قال كلام مهم يهم كل اللى بيفكر يروح كندا.

أستأذنكم كفاية كده النهاردة – متنسوش الدعاوى.

[ABO ADAM]

تسجيل متابعة يا .MR عبداللة

و اللة المصريين اللى فى كندا ااااخر جدعنة و ناس 100 /100 .....ربنا يجمعنا فى كندا و يفضلوا جدعان كدة ISA

ربنا يجازيك خيرا عنننا.......كلنا.... انت و الدكاترة الشامى و التهامى و باشمهندس ايهاب

[hazemtara]

السلام عليكم و رحمة الله و بركاته

تمت رحلة اللاندنج بحمد الله لى أنا و أسرتى (أنا و زوجتى و ثلاثة أبناء – سبع سنوات – خمس سنوات و سنتان و نصف) و سأحاول سرد رحلة اللاندنج و ما قبلها من إستعدادات اللتى أعتبرها هامة جدا لنجاح الرحلة و خاصة مع وجود الأسرة.

أملى أن يستفيد جميع إخوانى و أخواتى منها و رجائى الوحيد منكم هو الدعاء لى و لجميع أهلى.

أنا فكرت كثيرا إمتى أنزل بالحلقات و قررت لما أستاذنا الكبير الشامى يخلص حلقاته علشان- لمؤاخاذه ماننضربش فى السوق-.

توكلنا على الله

الاخ عبد الله حبيب الملاين افتح فى التفاصيل شوية اعمل موضوع كبير كدة

بوص وشوف الشامى عامل اية وتفاصيل اية ( ادق التفاصيل )

بحبح ايدك شوية فى التفاصيل انت عارف المصءين نحب التكرار والتكرار :sad:

ولا شوف التهامى, الواحد بيحس انة قاعد معاة وماشى معاة حتة حتة وتاتة تاتة :rolleyes:

[hazemtara]

متابعة يا باشا وحمد الله على السلامة

ماتنساش انك لسة طازة ومعلوماتك لسه خارجة من الفرن يعني زباينك هاتقف بالطوابير بس انت لاحق عالزباين :rolleyes:

تسجيل متابعة الله يوفقك انا ان شاء الله هاقلدك فريبا في كل الخطوات

منتظرينك يا طارق تحكى لنا عن تفاصيل رحلتك لما توصل ان شاء الله بالسلامة مش تبخل علينا , حاجزين لك قهوة لوحدك وأنا أول زبون فى أول كرسى :sad:

[SoSo R]

متابعيييييييين

[newcomer]

"فلاش فورود" عكس "فلاش باك" يعنى نسبق سياق الأحداث .

تورنتو هى مدينة كبيرة فى بلد إسمه كندا

و درجة الحرارة حوالى -2 يعنى صفر و نقًص إثنين

و الدنيا بتمطر بتمطر يعنى السماء بينزل منها مياه

بعد رحلة إستمرت أكثر من 17 ساعة ( 17 ساعة يعنى 24 و ننقص 7)

و زى ما قلنا المطر يعنى السماء بينزل منها مياه

مممممممممم هيه ده بقى الشرح الوافى :happy:

بس و الله ضحكت من قلبى....ربنا يجازيك خير يا استاذ عبد الله :blush2:

[ايناس احمد]

متابعين يااستاذ عبداللة بس اللة يكرمك طول الحلقة شوية

علشان احنا كمان نكتر الدعاوى ربنا يجازيك خير ويوفقك انت وافراد اسرتك

[pharaon]

متابعييييييييييييييييييييين :blink:

[abdelallah]

سامحينى أنا باحاول أجمع المواضيع فى حلقات علشان الناس تفتكر المواضيع بدل ما أدخل كذا موضوع فى حلقة واحدة.

و كده كمان أقعد معاكم فترة أطول .. و اللا زهقتم منى؟

بس ده ما يأثرش على الدعاوى الله يكرمك.

تحياتى

متابعين يااستاذ عبداللة بس اللة يكرمك طول الحلقة شوية

علشان احنا كمان نكتر الدعاوى ربنا يجازيك خير ويوفقك انت وافراد اسرتك

[abdelallah]

الحلقة الرابعة:

السلام عليكم و رحمة الله و بركاته

شوية حاجات مهمة للسفر و صدقونى مش كلام كتب و أعذرونى لو حيبان الكلام زى المدرسة بس لازم أقوله للتنبيه و الإفادة.

المفروض تكون موجود قبل ميعاد الإقلاع بثلاثة ساعات على الأقل فى المطار. لو المطار زحمة حتبقى مشكلة و أنا لى تجربة سابقة كنا مسافرين إنجلترا و رحنا قبل الطيارة بساعتين و نصف و قلت كفاية قوى ساعتين لاقيت أمم واقفة على الدخول من البوابة الأولى بتاعة الأمن و قاعدنا كثير جدا لحد ما دخلنا و طبعا كان ال"تشيك إن" زحمة جدا هو كمان و يادوبك لحقنا الطيارة و الباب بيتقفل.

الشنط اللى حتتحط فى بطن الطيارة لازم ماتعديش وزن معين (43 بوند أو 20 كيلو جرام) و أبعاد الشنطة متعديش (158 سم) و إلا حتدفع وزن زيادة. كل فرد له شنطتين.

بالنسبة للشنط اللى حتطلع بيها الطيارة لازم متكونش أكبر من 58*45*25 سم. كل فرد له شنطة واحدة و شنطة لابتوب.

ده بالنسبة لمصر للطيران بس لازم تتأكد من الشركة اللى إنت حاجز معاها قبل السفر – الموضوع ده بقى على تركيز جامد جدا .

السوائل عليها حظر جامد جدا – لازم نخلى بالنا مانتخدش تقريبا ألا أقل القليل فى حدود 100 مل – بالنسة لى كان لبن لبنتى الصغيرة و مع ذلك فى بعض مطارات أمريكا أصروا نرمى اللبن مع إنه من أمريكا و ماركة معروفة بالنسبة لهم – أنا فى الرحلة دى سافرت أمريكا بس مفيش مجال للحديث عن الرحلة دى دلوقت - .

توكلنا على الله و رحنا على المطار يوم السفر و التنبيهات على الأولاد إن الرحلة طويلة و ماتتعبوناش علشان نعرف نتفسح هناك و نشوف الثلج و طبعا ما تعبوناش خالص . و أخذنا معانا شوية لعب و ألوان لزوم الطيارة.

الغريب – و أعذرونى إنى أقول إن ده مش العادى - إن مصر للطيران كانوا كويسين جدا و متفاهمين و حقيقى إتبسطنا معاهم التفسير اللى عندى إنهم لما إنضموا "للستار ألاينس" بقى فيه "كواليتى كونترول " عليهم.

وصلنا بالسلامة لمطار هيثرو فى لندن و إبتدينا ماراثون جرى للوصول من البوابة اللى حنسافر منها على تورونتو – أنا رحت مطار هيثرو مرتين قبل كده و سمعت عن التوسعات الجديدة بس أول مرة أشوفها و لإن الوقت بتاع الترانزت كان قليل كان لازم نشد حلنا و نحر الاولاد و الشنط. الظريف منظرنا بالشنط اللى معانا و لا كأننا مهاجرين!! أمال إحنا إيه! :unsure:

وصلنا بوابة الأمن اللى بتودى على البوابة بتاعة الطيارة على تورنتو و كان لازم كل المسافرين يقلعوا الجواكيت و الجزم و تمر على الشاشة بتاعة الأمن – بينى و بينكم الواحد مش واخد يمشى بالشراب –بس ما باليد حيلة كله كان بيقلع! .

بس علشان الواحد واخد على السفر فيه حيله دايما بأستخدمها حطيت كل حاجة فى جيوبى معدن و مش معدن فى شنطة السفر اللى معايا زى الحزام و الساعة و المحفظة و الأقلام - و الشنطة كده كده بتعدى على الشاشة لحد ما أعدى من البوابة و أخد الحاجة تانى أحطها فى جيبى.

يا دوبك عدينا من هذه البوابة لقيت كعب جزمة بنتى اليمين إتخلع! يا حلاوة – ماشى الحال كان لسه فيه طبقة صغيرة فى قعر الجزمة مخليياها مش ماشيه على الأرض - بس كانت ماشيه بتعرج علشان فرق الكعب. و أدى أول مشوار إن شاء الله فى كندا.

عدينا و رحنا على ال"تشيك إن" ( و إحنا فى مصر الراجل بتاع مصر للطيران إدانى "بوردينج باص" بتاع الرحلة الأولى و قال لى حتاخد ال"بوردنج باص"بتاع الرحلة الثانية من مطار هيثرو) فرحت على الكونتر بتاع إير كندا و دار الحديث الأتى:

موظفة إير كندا (هى بنت إنجليزية): هاى أى خدمة (بإبتسامة عريضة )

أنا: هاى أنا و العائلة مسافرين كندا و عاوزين "بوردنج باص" و إديتها التذاكر

موظفة إير كندا: طبعا .. قالت امال هم فين .. شاورت لها عليهم كانوا واقفين على جنب علشان الشقاوة المعتادة كانوا بيخربوا فى المطار فقلت يخربوا بعيد عن الكاونتر ... إبتسمت لما شافتهم و بدأت تشتغل على الكمبيوتر و فجأة وقفت عن الكتابة و ملامحها متحهمةو قالت هو فين و قالت إسم إبنى الأوسط "خمس سنين" فشاورت لها عليه ..

فلقيت ملامح وشها إستريحت بعد ما كانت مشدودة.

أنا: هو فيه حاجة؟

موظفة إير كندا –بإبتسامة-: إصل إسمه شبه إسم واحد مطلوب أمنيا!!!!

إبتديت أفكر هم لحقوا يعرفوا التخريب اللى عملوه فى المطار و إشمعنى هو بس ما الثلاثة أولاد قربوا يخلصوا على المطار – طب أعترف باللى عملوه و اللا أستنى شوية.. أفقت على صوتها قالت : أظن ده تشابه أسماء و رفعت سماعة التليفون و كلمت واحد شوية تشرح له الموقف و سمعتها بتقول له "معاك حق .. مين عارف ممكن هو!" إديته شوية بيانات

إبتديت أفكر "ممكن هو !" رحنا فى أبو نكلة حيدفعونا تمن المطار.

بعد شوية قفلت مع الراجل و قالت هى خلاص كله كويس .. قلت لها إتأكدتى إنه مش هو .. إبتسمت و قالت أيوه.

أخدت ال"بوردنج باص" و قلت يالا يا أولاد بينا....على طيارة كندا.

أستأذنكم كفاية كده النهاردة – متنسوش الدعاوى

[tarekgomma]

متابعة يا باشا وحمد الله على السلامة

ماتنساش انك لسة طازة ومعلوماتك لسه خارجة من الفرن يعني زباينك هاتقف بالطوابير بس انت لاحق عالزباين :unsure:

تسجيل متابعة الله يوفقك انا ان شاء الله هاقلدك فريبا في كل الخطوات

منتظرينك يا طارق تحكى لنا عن تفاصيل رحلتك لما توصل ان شاء الله بالسلامة مش تبخل علينا , حاجزين لك قهوة لوحدك وأنا أول زبون فى أول كرسى

ماشي وعلشان نربي زبون عل رأي أ عبدالله. المشاريب مجاني لاول 100 زبون. اما شيشة التفاح والسحلب عل حسابهم.