موزمبيق التى رأيت

[الباشمهندس ياسر]

بسم الله الرحمن الرحيم

السلام عليكم و رحمة الله و بركاته

كل سنة وانتو طيبين و فى احوالكم مرتاحين سواء اللى جوه البلد او اللى بره طفشانين يارب كلكم تكونوا مبسوطين

و ان شاء الله و قولوا ورايا امين ان رمضان ميمشيش الا وكلنا من المقبولين امين

و زى ما جدتى الله يرحمها و يحسن اليها قالت و هى بتحكيلنا حدوته

يا سادة يا كرام ما يحلى الكلام الا بذكر النبى عليه الصلاة والسلام

هأبدا و اقول كلام جديد شويه على شوية مننا ان مكنش على كلنا لان كل الناس فى منتدانا هنا

دائما بتكتب يا اما عن مصرنا او عن الخليج اللى كان بتاع العرب يا اما عن كندا حلم اكتر من نصنا

و زى ما كلكم عارفين ( على اعتبار انى ادهم صبرى مثلا )انا بشتغل فى شركة بترول فى الخليج

و الشركة بعتتنى دولة اسمها ام زمبيق قصدى موزمبيق و طبعا كنت اتكلمت مع واحد من حبايبنا فى موضوع

فقالى لازم تعملنا عن البلد دى موضوع و لازم اسمع الكلام و عنينا ياباشمهندس مهيب ..

و صلت مسقط فى يوم جميل مش فاكر كان ايه بالتحديد و رحت على الجيست هاوس و مش عارف ان كان تهامى

حكى عن الجيست هاوس أثناء كلامه عن البترول و احواله ولا عداها دى انما نقول هو ايه الجيست هاوس

كل شركة بيبقى ليها مكان اشبه ما يكون بالموتيل لاستقبال افرادها الغير مقيمين بمعنى انك بتنزل يوم او اتنين تلاته بالكتير

على ما تجهز تذكرة طيارتك او يظبطولك فيزا للمكان اللى انت رايحه او اى حاجه من هذا القبيل

بدل ما يودونا كلنا فنادق لان فى الحالة دى هيتخرب بيت الشركة واصحابها.. توفير يعنى توفير

انما تخش الجيست هاوس تلاقي نفسك مش عايز تطلع منه .. طبعا ماهو اكل ومرعى وقلة صنعه

المهم تانى يوم ركبت الباص بتاع الشركة ورحت طالع على المدير ازيك يا مستر ادريان

اهلا يا ياسر اخبارك ايه و اخبار الاسرة و كيف كانت الاجازة وشوية الكلام اللى انتو عارفينه ده

بص بقى يا ياسر انا محتاجك تروح موزمبيق و انا عرفت انك انترست بالموضوع ايه رايك

قلتله مين اللى قالك انى انترست بالموضوع قالى فلان بناءا على نقاشكم قبل كده مع بعض

قلتله حصل فعلا بينا النقاش ده ( فى دماغى اه يا ابن ..... ) و انتوا عايزنى اروح امتى

فى اول طيارة بس استنى تعرف الظروف المحيطة .. البوندرى كونديشنز...

المهم الراجل قعد يشرحلى ساعة عن طبيعة الجو و المناخ والعادات الاجتماعيه و ثقافة المجتمع

و انتشار الامراض و خلى بالك من نفسك و اوعى الناموس بتاع الملاريا

و اوعى دبانه تسى تسى بتاعة مرض النوم

مكنش ناقص غير يقولى اوعى الفحت لتقع تحت

و راح رافع سماعة التليفون و كلم الاديمنستريشن و استاذنت و رحت رايح عندهم

قالولى اكل مخك يا معلم و هتروح موزمبيق تحب نبعت معاشك لمين و ههههههه

يا جماعه ايه اللى انتوا بتقولوه ده ما الناس راحت وجات ومفيش حاجه

قالولى الراجل اللى انت هتروح بداله رفض يرجع تانى لان واحد لوكال هناك رفع عليه سكينة

بتتكلموا جد ولا بتهزروا قالوا والله بنتكلم جد قلتلهم بس انتى وهيه دانا صعييييييييييدى

و ربنا يسترها علينا احنا غلابة المهم ايه بقى المطلوب دلوقتى

قالوا هتروح وزارة الصحة تاخد حقنة اسمها yellow fever

و بعدين تطلع على مركزمكافحة الملاريا تاخد الاقراص من هناك

و قد كاااااااااان و اخدنا الحقنة واستلمنا شهادة صفرا مدتها 10 سنوات

و معاها 40 قرص بالتمام والكمال لزوم المده فى موزمبيق الجميلة

و استلمت كمان شوية ورق بالتوعية عن كيفية الوقاية و الذى منه

بصراحه يا جماعه انا اتكيفت اوى من الحركة دى وقلت الناس دى فعلا بتفهم

و رجعت على الجيست هاوس و تانى يوم استلمت التذاكر

و نكمل المرة الجاية ان كان فى العمر بقية

تم تعديل 28 أغسطس 2008 بواسطة الباشمهندس ياسر

[حسام يوسف]

اهلا بيومياتك عن بلاد جديدة ياباشمهندس

منتظرين الباقى

[لولا]

انا بسجل متابعه من اول الموضوع واتمنى لو كان فى صور زى مهيب ماقال

ترفقها بالموضوع اعتقد فعلا انها تجربه تستحق العرض للتعرف على بلدان

لا نعرف عنها الكثير.

شكرا مقدما على الطرح.

تم تعديل 28 أغسطس 2008 بواسطة لولا

[الباشمهندس ياسر]

اهلا بيومياتك عن بلاد جديدة ياباشمهندس

منتظرين الباقى

اهلا بيك يا دكتور حسام

دائما اول المباركين كده

ان شاء الله الموضوع يعجبك

[الباشمهندس ياسر]

انا بسجل متابعه من اول الموضوع واتمنى لو كان فى صور زى مهيب ماقال

ترفقها بالموضوع اعتقد فعلا انها تجربه تستحق العرض للتعرف على بلدان

لا نعرف عنها الكثير.

شكرا مقدما على الطرح.

نورت الدنيا يا لولا

و انا محضر الصور

و هحاول انزل الصور تباعا بما يتناسب مع كل مرحلة فى التوبيك

ان شاء الله

[الباشدكتور]

يعني بقي عندي كندا و موزمبيق التي رأيت

ضاعت الباطنة والحمد لله

بسجل اعجابي ( بالموضوع مش بموزمبيق)

[Dr.mmfriend]

وانا كمان بسجل اعجابى

[مهيب]

تسجيل متابعة باهتمام شديد و شغف بالمعرفة .. و تجربة ثرية .. و أغبطك يا عم ياسر على الشجاعة .. فالتجارب اللى بتبدأ بحقنة ملاريا محتاجة برضه قلب جامد شوية .. بتفكرنى بسلسلة أدبية رائعة للكاتب الدكتور أحمد خالد توفيق اسمها (سافارى) بتتكلم عن طبيب مصرى و يومياته فى أحد مراكز محاربة المرض فى أنجاوانديرى فى قلب القارة السمراء .. آه شكلى هبدأ أرغى من غير مناسبة .. كمل يا عم ياسر .. منتظرين .

مهيب

[شاب مصري]

كمل كمل يا باشا متابعين معاك .

[iloveegypt]

ايه الحلاوة دى ياهندسة كمل يا مان

بس اهم حاجة تكون رجيعت بعروسة موزمبيقية

[الباشمهندس ياسر]

يعني بقي عندي كندا و موزمبيق التي رأيت

ضاعت الباطنة والحمد لله

بسجل اعجابي ( بالموضوع مش بموزمبيق)

يا حبيب القلبى ولا يهمك

بلاها موزمبيق نخليها جنوب افريقيا

انت تؤمر بس

و صدقنى موزمبيق هتعجبك برده

[الباشمهندس ياسر]

تسجيل متابعة باهتمام شديد و شغف بالمعرفة .. و تجربة ثرية .. و أغبطك يا عم ياسر على الشجاعة .. فالتجارب اللى بتبدأ بحقنة ملاريا محتاجة برضه قلب جامد شوية .. بتفكرنى بسلسلة أدبية رائعة للكاتب الدكتور أحمد خالد توفيق اسمها (سافارى) بتتكلم عن طبيب مصرى و يومياته فى أحد مراكز محاربة المرض فى أنجاوانديرى فى قلب القارة السمراء .. آه شكلى هبدأ أرغى من غير مناسبة .. كمل يا عم ياسر .. منتظرين .

مهيب

حبيب قلبى د.احمد خالد و كنت زمان متابع كل السلاسل بتاعته سافارى و اسطورة رفعت

و استفدت بيها جدا فى الرحلة دى

اما عن الشجاعة بتاعت الحقنة فيهمنى انك تعرف انى شجاع جدا مع الحقن والحقن بس علشان مخك ميرحش بعيد

[الباشمهندس ياسر]

وانا كمان بسجل اعجابى

اعجابك لوحده مش كفاية

اتبرع و لو بربع ريال

طبعا منورنا يا دوك

[الباشمهندس ياسر]

كمل كمل يا باشا متابعين معاك .

ادعيلنا نعرف نكمل .. مش عارف الشفت ده ماله كده معصلج ليه

ايه الحلاوة دى ياهندسة كمل يا مان

بس اهم حاجة تكون رجيعت بعروسة موزمبيقية

عروسة.. بتتكلم جد

الله يسامحك

بس لو من المستعمرين البرتغال

بصراحة

هتفرق كتي ر

[Senior]

طب فين الباقى انتا خليتنا انترستيد فى الموضوع اخر حاجه و تخلع كده ياهندسة

[الباشمهندس ياسر]

احنا وقفنا يا ابو اليسر ... امممممممم

اه افتكرت و قفنا عند التذاكر ... يا نهار ابيض يا نهار ابيض ( على راى المعلق شلبى على ما افتكر ) دول 3 تذاكر يا جدعان

اه 3 تذاكر اومال انت فاكر نفسك رايح البحرين اصحى يا معلم هكذا قال لى احد افراد الكرو بتاعنا

و ببص فى التذاكر و بقول ايه دول بقى الاولانية على دبى يا سيدى هو ده الكلام و على رأى اخوانا الخلايجة دبى ارض الحى

و الحى يحييك و التانية بالصلاة على النبى رايحة على جوهانسبرج ياسلام سلم دانا هروح اشوف نيلسون مانديلا كمااااااان

ايه العز و التالتة على موزمبيق ..... يااااااااااااااه ايه المشوار الجامد ده و طبعا الكلام هيبدأ بكره وتستمر المعركة قصدى الرحلة

الى هناك لغاية بعد بعد بكره اللى هو كام يوم يعنى ؟؟ ادينا هنشوف .. المهم اخدت التذاكر و كل الامور تمام التمام واخر الصطة

و اذا بواحد من الكرو بيقول ما تيجى ننزل نتمشى شوية ... فقلتله تتمشى ايه يا عم الحاج انت مش شايف الجو جميل ازاى

و التلج عمال ينزل ... طبعا الدنيا ناااااااااااار و خصوصا ان مسقط رطوبتها عالية اوى .... و نزلنا رحنا سوق فى اطراف البلد

اسمه سوق مطرح .. مش مطروح ولا حاجه.. و ده يعتبر اقدم سوق فى البلد من ايام السلطان سعيد بن تيمور رحمه الله ولما تشوفه

يفكرك بالموسكى القديم .. ايوه اللى فى العتبة اللى فيه حارة اليهود ... عارفينه .. متشتروش منه حاجه علشان البضاعة هناك مضروبه..

نفس المبانى القديمة بنفس الطريقة و نفس الحوارى الضيقة .. و انصح اللى يروح مسقط يزور الحى ده علشان يشوف مسقط القديمة..

و بالمناسبة هناك سوق السلاح يعنى السيوف و الخناجر اللى بتتشهر بيها السلطنة و قلنا نطلع كفاية كده و رحت واخد كام صورة للكورنيش

من هناك .. ان شاء الله يعجبوكم...

[الباشمهندس ياسر]

يا جماعه انا من امبارح بحاول اشوف موضوع تنزيل الصور دول

وحاولت مع احد المشرفين و اخر قرار وصلناله ان الجهاز بتاعى

لابسه عفريت ويلزمه زار

هو اللى قال كده مش انا

و ادى اخر حل

يا رب ينجح

الصورة الاولى

الصورة الثانية

الصورة الثالثة

الصورة الرابعة

الصورة الخامسة

[اسكندرية تانى]

الاخ الكريم ياسر

موضوعك صاعد وواعد فعلا

فى انتظار مغامراتك فى بلاد احيانا تركب الافيال

[الباشمهندس ياسر]

الاخ الكريم ياسر

موضوعك صاعد وواعد فعلا

فى انتظار مغامراتك فى بلاد احيانا تركب الافيال

مشكور على المرور

و ان شاء الله الموضوع يعجبكم

[sayed metwally]

الصور منزلتش عندى يابشمهندس

أنا خايف ان يكون جهازى انا اللى راكبه عفريت

ربنا يجعل كلامنا خفيف عليهم