ايه اكتر حاجة بتوحشك فى مصر

[nizza la bella]

نضرب بمب ونحدف بعض بيه :lol:

دة شى خطير يا استاذ الروبناء

انت ممكن تاذى ناس :lol:

[محب مصر]

مراتى وابنى واهلى كلهم اما بقى الأكل انا شايف الأخوه هنا مش مقصرين قالو

كل حاجه نفسي فيها :lol:

اما مصر نفسها مش عايز افتكر فيها حاجه لا حلوه ولا وحشه كفايه بس

انى بعيد عن احب الناس لقلبى ومحروم منهم.

[engmoh]

أنا اكتر حاجه بتوحشنى هى والدى ومراتى وبنتى ودى اكثر واحده فعلا وحشانى

أما الاصحاب فكل واحد مشغول باحواله

[somayasaleh]

بيوحشني في مصر

اهلي

اصحابي

رمضان في مصر غير اي بلد تاني

اكيد اكتر حاجة بحبها رمضان في مصر وخاصة الفطار في الحسين وسط الناس

[Amr Radwan]

السلام عليكم ..

http://www.egyptiantalks.org/invb/index.php?showtopic=62569

دي من احسن الحاجات اللي متعودين نشوفها في مصر .. و برده بنحبها في مصر ..

مصري في الغربة

[محمد محمود صبحي]

أما أنا فوحشني قوي مصري زمان .. إلي كان يدور على جارة .. ويسأل عليك من غير ما يكون وراك مصلحة .. وحشني جدتي لما كانت تبعتني لجارتنا أم أمل بطبق وفية حاجة حلوة .. وتبعت جارتنا أمل بنتها بنفس الطبق وبرده فيه حاجة حلوة .. والقهوة في شرعنا الكل يمسى والكل بيرد المسى .. تسمع زغروطه من أول الشارع وفجأه يردوا عليها بعشره زيها ويباركوا من غير ميعرفوا الموضوع إيه نجاح ولا فرح ولا حتى طهور .. ولو حد تعبان بيزورة إلي يعرفه وإلي ما يعرفه .. وحشني المصري وقت الشده تلقاه من غير ما تطلبه..

طيب حد يرد عليه مين موحشوش كل ده .

[iloveegypt]

انا بيوحشنى فى مصر هواها وضحكت الناس ووقفتهم جنب بعض وقت الشدة

[لولا]

أما أنا فوحشني قوي مصري زمان .. إلي كان يدور على جارة .. ويسأل عليك من غير ما يكون وراك مصلحة .. وحشني جدتي لما كانت تبعتني لجارتنا أم أمل بطبق وفية حاجة حلوة .. وتبعت جارتنا أمل بنتها بنفس الطبق وبرده فيه حاجة حلوة .. والقهوة في شرعنا الكل يمسى والكل بيرد المسى .. تسمع زغروطه من أول الشارع وفجأه يردوا عليها بعشره زيها ويباركوا من غير ميعرفوا الموضوع إيه نجاح ولا فرح ولا حتى طهور .. ولو حد تعبان بيزورة إلي يعرفه وإلي ما يعرفه .. وحشني المصري وقت الشده تلقاه من غير ما تطلبه..

طيب حد يرد عليه مين موحشوش كل ده .

كلامك حلو قوى قوى يا استاذ محمد.

فعلا كلنا مفتقدين الروح دى اللى كانت فى الشارع المصرى زمااااااااااااااااااااان.!

[tahereyad]

أنا أكتر حاجه وحشتني فمصر هي الاجتماعيات,,, كلها كده علي بعضها..

أفراح و هيصه و مناسبات ..

زيارة القرايب و المرضي و حضور واجبات العزاء ..

قعدة القهوة مع أصحابي من ايام الثانوي حوالين الشيشه و الطاوله (مع إني مش مدخن)..

قعدة الكورنيش عالبحر فالسويس فالصيف لحد الفجر,, ساعات مع الأسره و ساعات مع الأصدقاء, و ساعات جلسات عائليه..

وحشتني كمان الطيبه و الابتسامه و حسن النيه,, اللي مفتقدهم أوي هنا

يا عم Iloveegypt ربنا يسترها معاك,, بلاش المواضيع اللي توجع القلب دي,, كلنا هنا مغتربين

[reem]

السلام عليكم و رحمة الله و بركاتة

يا جماعة الغربة وحشة فعلا .. لكن الأوحش أنك تبقي غريب في بلد متعرفش فيها حد

أحنا هنا المصريين المغتربين في جدة-السعودية بدأ واحد عمل أقتراح و الحمد للة حصل تجاوب معاة

الأقتراح هوة أننا نتجمع كمصريين و نعمل حفلة شوااااااء

مش مصدقين!!!

طيب أدخلوا على الموضوع دة

محاورات المصريين > موضوعات عامة > المغتربين المصريين - egyptian expatriates > تجمع المصريين في جدة

الدعوة مفتوحة للكل أى مصري عايش في جدة

أما بالنسبة للعائلات بمعنى أصح يعني السيدات ( مة أى راجل متجوز ممكن يحضر الحفلة لوحدة .. محدش هيضربة ولا إية ؟؟ ngh:

هنا تكمن المشكلة

العدد قليل قويييي ... تقريبا 2 أو 3 بالكتير

مش عارفة لية .. المكان الى هيتعمل فية الشوى مكان مفتوح و الستات هتقعد مع بعضها على جنب .. و الأكل هييجي لينا لحد عندنا

الرجالة همة الى هيشووا (مش بالزمة راحة )

يا جماعة أى واحدة شايفة أن الموضوع دة لذيذ تعرض الفكرة على زوجها ولو وافق خلية يرد على الموضوع الموجود فوق و يقول أنة هييجي بالعائلة و المهندس عمرو ( كاتب الموضوع ) هياخد نمرة تليفونة و لو فية تجاوب من عدد كافي من العائلات هيتم الأتصال بيهم بكرة (لأن التجمع بكرة الخميس) للتأكيد على أن عدد العائلات بقى كافي مثلا 100 الأمل موجود

من الآخر هيتم الأتصال و التأكيد على أن فية مكان هيتخصص للنساء

إنما لو فضلنا 2 زى محنا .... أعتقد مش هينفع خالص .... و ربنا بقة يعوضنا خير منها في مرة تانية

[melhamy]

لولا ... انتى فعلاً مصرية فاهمة ياعنى أيه مصر ... ياريت الناس تقدر تعبر عن مشاعرها ... بطريقتك الجميلة دى ......

نسيتى سيره الأتوبيسات .... ولا أنتى بنت مش وش بهدلة ;) ......... شكل محطة مصر ساعة الفجر و رمسيس و القران وهو شغال من محلات القصب ... و الجرايد لسه سخنة و الأشتغلات اللى فيها (تأمين 250 الف وظيفة للشباب الخرجين ) !!!!!!

فى توشكى

طيب لو كنتى من أسكندرية كنتى هتقولى أيه وقفة كلية تجارة يوم الخميس .... والخروج على البحر .......

محلات محطة الرمل.... محمد أحمد بتاع الفول .... جيلاتى بحرى .... نادى سموحة ...... الأبراهيمية ......

يارب رجعنا بلادنا سالمين ..... و أكتب لنا الموت بين أهلنا ...

[rafy]

بصراحة انا بفكر فى مصر يوميا رغم ان معى اسرتى والحمدلله

بس اكترحاجة بتوحشنى بعد ابى وامى واخواتى واصحابى

منظر النيل ليلة 14 هجريا والقمر مكتمل ومنظر طلاب المدارس وهم راجعين بعد الدراسةومنطقة الحسين وقت الفجرونص البلد بالليل وهى زحمة وحاجات كتيرررررررررر يارب قر بالبعيد ويجى شهر 1 الجى علشان اكون عند حبيبتى مصر

وياريت كل الاخوة اللى نازلين اجازة يسلمولى عليها لحد ماانزل

اكتر حاجه بتوحشني بعد كل دول الطيبه اللي كانت في عيون اهلها راحت فين ليه قلت حتى اصبحت قرب العدم انا عارف ان الناس لسه فيها خير بس الاول كان عامل زي زرع ارضها بيطلع رباني دلوقتي بقى بيطلع بالعافيه حتى مع احسن انواع السماد ينكم لان معظم انواعه بقت مسرطنه يمكن .

لازم نرجع الشعب الطيب ده تاني اللي طيبته مالهاش حسابات اخرى بس ازااااااي؟؟؟؟؟؟

[لولا]

لولا ... انتى فعلاً مصرية فاهمة ياعنى أيه مصر ... ياريت الناس تقدر تعبر عن مشاعرها ... بطريقتك الجميلة دى ......

نسيتى سيره الأتوبيسات .... ولا أنتى بنت مش وش بهدلة :wub: ......... شكل محطة مصر ساعة الفجر و رمسيس و القران وهو شغال من محلات القصب ... و الجرايد لسه سخنة و الأشتغلات اللى فيها (تأمين 250 الف وظيفة للشباب الخرجين ) !!!!!!

فى توشكى

طيب لو كنتى من أسكندرية كنتى هتقولى أيه وقفة كلية تجارة يوم الخميس .... والخروج على البحر .......

محلات محطة الرمل.... محمد أحمد بتاع الفول .... جيلاتى بحرى .... نادى سموحة ...... الأبراهيمية ......

يارب رجعنا بلادنا سالمين ..... و أكتب لنا الموت بين أهلنا ...

انا مركبتش اتوبيسات صراحه.. بس تفتكر البهدلة فى مصر مجرد اتوبيسات ؟؟

مصر بتوحشنى رغم كل ما فيها. مصر هى بلدى. معنديش كلمة اكبر من كده اوصف اللى جوايا.

[شاب مصري]

بس محدش يضحك

سندوتشات الطعمية (الفلافل)

كانت بتوحشني قوي

ودلوقتي رجعتلها والحمدلله :wub:

[الباشمهندس ياسر]

بس محدش يضحك

سندوتشات الطعمية (الفلافل)

كانت بتوحشني قوي

ودلوقتي رجعتلها والحمدلله :lol:

حمد الله على السلامة

[شاب مصري]

بس محدش يضحك

سندوتشات الطعمية (الفلافل)

كانت بتوحشني قوي

ودلوقتي رجعتلها والحمدلله :blink:

حمد الله على السلامة

حبيب قلبي يا ياسر باشا

الله يسلمك :lol:

[عبقرينو]

المسحراتي

وكنت باستغرب ازاي بيعدي الشوارع الزحمة دي مع انة كفيف ؟!

ولية كلماتة بتفضل ترن في المكان

حتي بعد ما يمشي !

[iloveegypt]

الله يسامح اخويا عبقرينو فكرتنى برمضان فى مصر ده لوحده حاجة تانية خالص

كنا واحنا اطفال نقعد نغنى قبل الفطار: يا مدفع اضرب بلاش شقاوة النس جعانة بوووووووووووووووووم

ولو لاقينا حد مفطر نقول:

يا فاطر رمضان يا خاسر دينك

القطة السوداء بتاكل مصرينك

وحشتينى يا مصر

[dentist egypt]

يا سلام على مصر و على اسكندرية و منظر الشمس وهي نازلة بتعمل تشششش في البحر و اكلت سمك جامدة كدة و لمتي انا و صحابي في القهوة و الشيشة و الضحك من القلب

[بنت جنان]

مع اني ماني مصريه

لاكن فية منطقتين على وجه الارض لما اروح ترتاح نفسي واحس بسكون وراحة داخلية مش طبيعية

المدينة المنورة ومصر الحبيبة

اكيد الدول الثاني فيها مناطق حلوة بس شعور راحت النفس هذا لايقدر بثمن

الغريبة انك ماتدري ليش ايش السبب مع ان فية دول كثير اجمل منها

بس صدق من قال مصر ام الدنيا والي يشرب من نيلها يرد لهاااا

تحية لمصر

مصر الاصيله يارب اهلها يعرفوهااااااااااااا

تحياتي