ايه اكتر حاجة بتوحشك فى مصر

[iloveegypt]

بقلم الشاعر احمد فؤاد نجم :

أنا مصرى أبن مصرى وليا الشرف

برغم المهانة برغـــــــــــــــم القرف

برغم الزبالة اللى مالية الشــــــوارع

برغم الفســـــــــــاد اللى بيه أعترف

سمو معـــــــــــــــالى رئيس الوزارة

نتيجة موظف بسيـــــــــــــط أنحرف

برغم المجاعة اللى داخلين عليهــــــا

وفينا اللى عـــــــايش حياته فى ترف

برغم البطــــــــالة فى أوضة وصالة

برغم أن أخر جنيـــــــــــــه اتصرف

برغم طـــــــــــابور الصباح السخيف

وكل منايا يادوب كــــــــــــــام رغيف

برغم أسايـــــــــا لمنظر عشايـــــــــــا

وأقول مش مهم يــــــــــا واد نام خفيف

برغم إنى شايف بــــــــــلاوى وساكت

وعايش مطنش كـــــــــــــــــأنى كفيف

برغم وزارة رئيسهـــــــــــــــا حرامي

وشوفوا البجاحـــــــــــــة يقولوا نظيف

برغم الســـــــــــلام اللى غرقت بناسها

برغم العيـــــــال اللى ساكنة الرصيف

برغم حكومة شعـــــــــــــارها الكلام

ورغم رئيسنــــــــــــــــا عليه السلام

ورغم أن كله يــــــــــــــا عالم بيغلى

إلا كرامتى بترخص قــــــــــــــــوام

برغــــــم إنى عايش في بلدى فريسة

ووجبة شهية لبعض اللئـــــــــــــــــام

برغم أن كـــــــــــــل تاريخك يا بلدى

فعهد جنابه كـــــــــــــلام فوق رخام

برغم ده كله يــــــــــــا مصر بحبك

وطظ فيهم ودا آخر كلام

وانا زيه ورغم ده كله بحبك يا مصر للابد واموت فى ترابك واحب اهلك وناسك

وكفاية بقى اخت لولا لانى مش مستحمل n2&(

[لولا]

ساعات بتوحشنى الزحمه :lol:

جروبى .. بحس فيه تاريخ طوويل. :blush2:

كوبرى قصر النيل. :lol:

[لولا]

بتوحشنى شرم الشيخ فى الصيف

وفى عز الشتا :blush2:

[لولا]

فى مصر بنفكر كتير فى كل حاجة حولينا هى ليه كده؟

بيوحشنى فى مصر ان مصر بتخلينى اشوف نفسى ..

اشوف الحاجات ..

اشوف كل شي بعمق اكتر من اللى بحسه فى جده.

يمكن لأنى ببقى بتفرج وانا حزينه على البلد.

ولغه الحزن دوما اكثر تعبيرا من لغه الفرح!

[aimen]

بيوحشنى طلعة صيد ...اى نعم ما بعرفش اصطاد قد كده لكن الفكرة نفسها

بيوحشنى قعدة فى الأرض واحنا نازلين طحن فى كيزان الذرة المشوية

بيوحشنى نمط النميمة والناس اللى بتكمل عشاها فى سيرة الناس دا اشترة ودا جاب ودى اتخاقت ..

بيوحشنى اتغدى مع ابوى والعائلة

بيوحشنى صلاة الجمعه ...الناس صحيح قرفانه من الشيخ عيد ونصف الناس اى نعم نفسها تقوم تضربه مش عارف ليه .....بيوحشنى التجمع والتلاقى بعد الصلاة

بتوحشنى نفسى من قبل الغربة ..

بتوحشنى فلافل ام وليد والفول اللى كنت باحاول اروح لميدان المحطة مخصوص علشان اكله برغم انه ما وراى اى شئ هناك

بيوحشنى اكله عدس وبصل فى الشتا ( اجرام مش كده )

بيوحشنى لما الكهربا تقطع العشا و اطلع فى سطح البيت واقعد اتفرج على البلد والسما

بتوحشنى الرياض وحرية الحركة فيها وكونى غير مرئى ( محدش حيسأل رحت فين ولا جيت منين ولا اشترى ولا كل ولا ما تكلش )

كفاية كده بقى

[iloveegypt]

بيوحشنى طلعة صيد ...اى نعم ما بعرفش اصطاد قد كده لكن الفكرة نفسها

بيوحشنى قعدة فى الأرض واحنا نازلين طحن فى كيزان الذرة المشوية

بيوحشنى نمط النميمة والناس اللى بتكمل عشاها فى سيرة الناس دا اشترة ودا جاب ودى اتخاقت ..

بيوحشنى اتغدى مع ابوى والعائلة

بيوحشنى صلاة الجمعه ...الناس صحيح قرفانه من الشيخ عيد ونصف الناس اى نعم نفسها تقوم تضربه مش عارف ليه .....بيوحشنى التجمع والتلاقى بعد الصلاة

بتوحشنى نفسى من قبل الغربة ..

بتوحشنى فلافل ام وليد والفول اللى كنت باحاول اروح لميدان المحطة مخصوص علشان اكله برغم انه ما وراى اى شئ هناك

بيوحشنى اكله عدس وبصل فى الشتا ( اجرام مش كده )

بيوحشنى لما الكهربا تقطع العشا و اطلع فى سطح البيت واقعد اتفرج على البلد والسما

بتوحشنى الرياض وحرية الحركة فيها وكونى غير مرئى ( محدش حيسأل رحت فين ولا جيت منين ولا اشترى ولا كل ولا ما تكلش )

كفاية كده بقى

زى انا بموت فى العدس فى الشتاء

بس حكاية النور لما يطفى دى بالنسبةلى تبقى مشكلة لانى كنت شغال فى شركة الكهرباء :unsure: :blink:

تم تعديل 12 يوليو 2008 بواسطة iloveegypt

[hany shokry]

KOL 7AGA 7ATA ELSALBIAT BETA3ETHA

3AMAR YA MASR

[nizza la bella]

الناس الطيبة

[enerky]

والله يا جماعه مش عارف اقول ايه

انا حسيب مصر كمان شهر ورايح ابوظبي ولو وصفت ايه اللي ممكن يوحشني ف مصر مش حيكفي مجلدات

انا بس اللي بيرعبني اني حاسس ان كل اللي بيافر مبيرجعش وانا نفسي اخرج عن القاعده دي

مصر بجد حاجه حلوه اوي ف حياتنا ويمكن يكون في اوضاع فيها كتير مش بتعجبنا لكن لازم نقبلها زي ماهيا ونحاول نغيرها بايدينا

[لولا]

فى الغربة - أحمد حداد

سلملي ع الكراريس و ع الأوتوبيس وفرن العيش

سلملي ع العشــــاق ومشـــــيتهم على الكــورنيش

سلملي ع البنت اللي فـاتحـة من زمـــان شـــــــباك

يمكن يعــدّي ابن الحـــــلال لابس هـدوم الجــــيش

سلملي ع الجــرنـان .. موظف شــايله تحت البـاط

سلملي ع الدلـع اللي بيكــهــرب و ع الحـــــركات

يامــــا ألف شـــاعر للعـــيـون والغــــمازات غنّى

سلملي ع الـواد اللي عقله من غـــرامهم شــــــاط

سلملي ع الحـــلــوة وعلى غــنـــوة قــــالتــهــالي

فـاتت عـلـيـهـا ســــنين وتــاه اللـحــن من بــــالي

سلملي ع الصـــــحـبـة و ع الســـــهـيرة وفـلـوكة

مـاشـــية في وسط النيـــل تغني والمـــــزاج عالي

سلملي ع الحــــكايات من الجــــدات و ع البراويز

سلملي على ســـاعة العصارى وضـحكة العواجيز

سلملي على مكنة خـــياطة قـديمـــة في لاظوغلي

سلملي على طـبقين "كـريم كرامِّل" طـعمه لذيـــذ

ســكران و قلبي بالغـنـــــا والفــضــفــضــة والـع

ســكران ببـحـر إســـــكـنـدرية وســـرها البــــاتع

ســكران بليــل القــــــــاهـرة ... سـلّم وســمعـني

دقـة حـوافـر خـيل في عـز الليــل على الشـــارع

(أحمد حداد)

[شموع]

حب العزيز

الحرنكش

البطاطا بالدقة

الفراخ... مش باكلها غير في مصر

[nizza la bella]

انت بتتكلمو عن مصر mfb:

يالطيف اللطف يا رب :D

[أحمد سيف]

باحب اللحظة اللي بانزل فيها مصر

بس صدقوني ... من اللي باشوفه هناك لما أنزل

باحب أكثر اللحظة اللي باسيب فيها مصر

وصدقوني أنا لا أشعر بالذنب بسبب هذا الإحساس

لأن من يحب مصر وهي في هذه الحالة إما مستفيد من الوضع الحالي ويرغب في بقاءه أو ليست لديه أدنى فكره عن نوعية الحياة التي يستحقها الإنسان

قرأت كل التعليقات ووجدت أن معظم الناس لا يحنون الى مصر نفسها ، بل الى ذكرياتهم في مصر

وهذا شئ طبيعي لأن الإنسان يحن الى أيام شبابه والى تجاربه السعيدة أيا كان مكانها

بعيد عن الكلام العاطفي، عاوز فعلا تعرف إذا كانت حاجه واحشاك في مصر

إسأل نفسك هل عندك استعداد تقايض الوضع اللي إنتا فيه بالحالة اللي كنت عليها في مصر

وإذا كان عندك استعداد إيه اللي مانعك ترجع مصر

ولا أنتا عاوز فلوس الخليج وآدمية كندا و "....." مصر

وأنا استخدمت "...." لإني بصراحة مش عارف إيه اللي ممكن يكون واحشك أوي كدا في مصر، دا حتى الجو بقى زي جو الخليج باستثناء إن كل الأماكن في الخليج مكيفة، من غير ما نتكلم عن التلوث والفساد والعشوائية والإهمال والأنانية والطمع والفهلوة والجهل والفوضى والزحمة والتسيب والديكتاتورية و الخدمات المنهارة وفوق كل ده الفقر والعنطزه

أنا معاكم برده باقول ... مصر دي كانت أيام حلوه الله لا يرجعها

[شموع]

أنا معاكم برده باقول ... مصر دي كانت أيام حلوه الله لا يرجعها

لا ... عن نفسي لو ممكن ترجع ياريت ترجع :D

ولكن قل للزمان ارجع يا زمان mfb:

اما الآن.... :lol:

ما يربطني بمصر هما والداي ده اولا واختي واولادها ثانيا اما اخي ربنا يصلح له الحال

مصر في ذاتها بلدي وان جارت علي :)

انا ابحث عن الأمان والحمد لله لم اجده في مصر ولا في الخليج :lol:

اقتنعت انه لا امان في الدنيا ع الأقل بالنسبة لي فهو رأيي الشخصي فقط

تنازلت عن حق لم اعي معنى التنازل عنه الا بعد فوات الأوان :lol:

والآن حان الوقت لدفع الثمن :wub:

الحمد لله على كل حال

[jemy]

المحشي بتاع ماما :blush2:

[nizza la bella]

المحشي بتاع ماما :blush2:

[nizza la bella]

المحشي بتاع ماما :blush2:

يا عم jemy اول مدخلة ليك وبتقول محشى smk:

[المهاجر]

انا بقالي 4 سنين بره مصر عايش في السعوديه شغال محاسب هنالك نزلت مصر في خلالهم 3 مرات بس كله كوم واول مره انزل فيها مصر بعد سنه ونص في الغربه كوم تاني

كنت فرحان جدا وعاوز ابوس ارض الميناء انا نزلت المره الاولي بره وياريتني ما نزلت بري

نزلت عن طريق ميناء ضباء السعودي ووصلت الي ميناء سفاجا الدولي ( قال دولي قال )

كنت حاسس بشوق جامد قوي كان نفسي ابوس ترابها والله من الفرحه وشوش الناس الطيبه والابتسامه الجميله رغم الآلآم اللي بيعيشها الشعب

وانا في السعوديه مدفعتش ريال واحد لحد اول ما نزلت مصر حمد الله علي السلامه يا باشا زي ما يكون نازل بشوال ريالات ويمدلك ايده

العساكر والظباط ماسكين خرزانات وكرابيك زي ما يكون معتقلين وموقفينهم تشريفه قلت عادي لحفظ الامن لقيت المهزله لما العسكري والبيه امين الشرطه يمد ايده علي مواطن مصري والله حزنت قوي قوي قوي

واللي زاد وغطي بقه الجمارك والست ساعات اللي قعدناها هناك في سفاجا بين اطفال وشيوخ ونساء

واحد جه قالي 15 جنيه يا بيه كارته قلت له وماله الجمرك بقالك كام سنه يالا 800 جنيه ورد في الخزنه

والله كان معايا 4 شنط فتحوا واحده بس 800 جنيه ادفع يا باشا

قلت له لا مش هدفه قالوا متظلم قلت ايوه طيب اركن يا عم الامور

ساعتين فوق السته اللي فاتوا لوحدي

قلت لهم اكلم المدير جالي المدير بعد شويه كتار لابس بدله من بتوع عمر افندي ماركه 70 نعم يا بيه

قلت له 800 جنيه ايه اللي عاوزين ادفعم اقولك هاتوا انتوا ال 800 جنيه وخدوا الاربع شنط اللي معايا

قام قالي خلاص خليهم 400 جنيه مش عارف هو بيفاصل في سوق العبور والا ايه

امري الي الله دفعت ال 400 جنيه جينا للعفش قدي الشنط العمال بتحدف واصوات طاااااااخ دششششششش حمدت ربنا اني مفيش معايا حاجه تتكسر وسامع بودني والله وشايف بعيني وصورتها كمان بالموبايل

بس بعد ما ارتحت نفسيا من المقابله الجميله الغير متوقعه نزلت لفيت في الشوارع مش عارف رايح فين بس شوق لام الدنيا بس

فعلا زي ما قالت الاغنيه

بحبك وحشتيني بحبك وانتي نور عيني ولو كنتي مطلعه عيني بحبك موت

[mitcey]

لولا تعبتيني بكلامك بجد كل ده فعلا واحشني زيك بالظبط

انا وحشني اوى اني احس بامان الامان اللي كنت بعيشه في كل لحظة وانا في مصر

ريحة الشوارع

رمضان وريحة الاكل وهيا طالعة من كل بيت في المغربية

لمتي انا والجيران في الشارع نلعب ونجري علشان نضيع اخر ساعة قبل الفطار من جوعنا

صوت استا حسن وهوة بيقرالنا قران الصبح في المدرسة

عيد الزعف زى ما كننا بنقوله واحنا صغيرين ولما نجيب الزعف ونلعب بيه ونعمله سلاسل وخواتم وورد ونعلقه علي بيوتنا

ابلة ماري لما كانت تدعيلي كل يوم الصبح وتديني الشيكولاتة قبل ما اروح المدرسة

ريحة التراب اللي في بير السلم لما كنت استخبي من الجيران وانا بلعب مساكة زمان

الطوب اللي في الشارع لما كنت اتريق علي العيال وااقولهم اهو واقفة علي حاجة عاليا واحنا بنلعب كيك ع العالي وكيك ع الواطي

مش هتصدقوني لو قلت وحشتني ريحة التلوث عوادم العربيات الشوارع والزحمة واللمة والناس

احلي ريحة سمك علي شط اسكندرية وهوة بيتشوي

كوبية حمص الشام السخنة الساعة 10 بالليل علي شط اسكندرية ونسمة الهوى سقعة ونتدفي في حمص الشام ونزود الشطة علشان ندفي

الجري واللعب والضحك

الضحكة الصافية اللي من القلب

مدرسة ناصر الثانوية بنات وشارع الترعة والشارع الجديد وشارع الجنينة وشارع الحبيبة اللي ياما وقفت فيه انا واصحابي اودام مدرستنا

الزوغان من المدرسة والجري في الشارع زى العيال واحنا بنهرب من المدرسين

الشباب وهما بينطوا من علي صور مدرستنا علشان يدخلوا يشوفنا ويتسحبوا في الفصول

اجمل اكلة كشري في الشارع شبرا عند الامير مع ازازة البيبسي ونحبس بعديها بطبق الرز بلبن

شارع المستشفي في الهرم والشباب الهاي اوى وهما بيعكسونا باحترام و كايرو مول باجمل وقفة بنقفها واحنا بناكل في مؤمن في الشارع وبنخطف الاكل من بعض

كافيه افريكانو والقرد اللي كان فيه اللي كان بيتنطط فوقينا و الديك الرومي الضخم اللي كان بيمشي تحت الترابيزاط مطلوق في الكافيه

وحشتيني اوى يامصر بكل حاجة فيكي

كل مصر وحشتني كل حاجة حلوة ووحشة وحشتني

وحشتيني اوى ووحشني النيل والمراكب اللي في المنيل والكوبري اللي كنا بنستخبي فيه من الناس انا واصحابي علشان نفضفض براحتنا ونعيط زى ما نحب

الميكروباصات اللي كنت لو عيطت مرة وانا فيها كل اللي في الميكروباص يفضلوا ورايا لحد ما اضحك

قلوب الشعب المصري الجميل الحنية والحب والرقة وكل حاجة

حتي الشحاتين اللي كانوا بيفوقوني لما احس اني اعلي من الكل يرجعوا يعرفوني ان الدنيا مش دايمة

باجمل دعوة تدخل القلب يدعولي علشان بريزة ولا ربع جنيه

حب مصر دى حبيبتي الحب الوحيد الحقيقي في حياتي

وحشتيني يا مصر اوى

[الرويناء]

انا فى مصر حاليا بعد مطلعت من سنه اولى غربه

اكتر حاجه كانت وحشانى فى مصر بعد اهلى التراويح فى رمضان والعيد والصلاه وتوزيه الحلويات على الاطفال و لمه الجيران البيت كله بعد صلاه العيدمصليهونرجع نضرب بمب ونحدف بعض بيه وبعدين نفطر كحك وترمس وشاى ونقعد شويه وبعدين كل عيله تروح لاهلهم تعيد عليهم