ايه اكتر حاجة بتوحشك فى مصر

[yassir]

الأعزاء

عارفين أكتر حاجه وحشاني في مصر أيه .....مصر نفسها ....اللي بدور عليها ومش لاقيها ...ليه ؟..لكل الأسباب اللي قالها الأخ ياسر والأخ أيهاب سالم .....صحيح انا مختلف مع أخي ايهاب في موضوع الهجره ...لاني بحب مصر ..ونفسي الاقيها ....تصوروا انا نازل أجازه بعد أقل من شهر وخايف جدا ...خايف أن يحصل زي السنه اللي فاتت والاقي نفسي غريب في بلدي ..مش عارف أتعامل مع حد الأ اذا دفعت ........الأصحاب كل واحد في همه وأكل عيشه علشان يكفي بيته في ظل الدنيا اللي ولعت .....الأهل هما اللي فاضلين وبرضه مشغولين ....فلقيت نفسي قاعد في بيتي وحيد في بلدي ...عارفين إحساس الحبيب لما فجأه يصحي يلاقي حبيبته أختفت ويفضل يدور عليها في كل مكان وكل بلد ....هي ممكن تكون ماتت ....بس هو مش مصدق وعنده أمل يلاقيها وعلشان كده هي وحشاني ..... يمكن ده الفرق بيني وبين بعض الناس اللي صدقوا أنها ماتت .....لكن انا لسه عندي أمل وحفضل أدور عليها لغاية لمل الآقيها

أسف لو كنت خرجت عن الموضوع كما رسم له ...

ياأخ مصرى جدا بلاش كده...كلامك بيجى على الجرح .....مش عايز يلم أبدا....تحط عليه رمل الخليج ....يصوت .... نلهيه بزياره لديزنى لاند ...يعيط ....نحط عليه تلج من كندا....سكت شويه ....ماتخليه ساكت ...بلاش الكلام اللى يوجع القلب ده . ما أنت عارف أنها ماتت و أن ده اللى حتلاقيه حنعمل ايه ....الله يرحم حمايا قعد فى الكويت 30 سنه و كان دايما يقول ....اللى يسافر بره ....ولاعمره حيرتاح بره و لاجوه .....

مصر اللى أعرفها بحاول أخلقها هنا , اللى هناك دى مسخ ...مخلوق دميم معرفوش ...مش ممكن يكون ليا مكان فى أرض فيها ناس نايمه فى عز البرد على أرض السجن البارده المشاعر ملهموش غير اتجاه واحده يبصوا ناحيته ....فوق ....يمكن يرحم ....يمكن ينهى عذابهم و يموتوا ...أو الظالم يموت ....

و الله ياأخت لولا كنت عايز أعديها أغانى ....و أهو شويه نسرح بخيالنا و نفتكر أيام الكورنيش و محطة الرمل و سيدى بشر و قهوه والى ...كل شىء ممكن نيجى على نفسنا و نبلعه ووراه زير قناوى مليان ميه ...التعليم زفت ...ماشى أهو أحسن من أفريقيا , أحنا نمره أتنين فى حوادث السيارات فى العالم ....موافق برضه تركيا قبل مننا .....البطاله عاليه ....و لايهمك أحسن من العراق ..... التضخم عالى ...برضه أحسن من السودان الى كيلو البطاطس ب14000 جنيه ... :blink:

......بس الظلم ......الظلم ....الناس اللى تموت و هى واقفه على رجليها من التعذيب ....نعديها ازاى ...حنقوله ايه طيب ....كنا بنربى العيال ....مهو قالنا هاجروا ...المستضعف يهاجر ....كل ده مش استضعاف فى الأرض ....أمال الأستضعاف يبقى ايه طيب ....

أنا ليا صديق عمل مقاول لأعمال تجديدات فى مكان من أماكن الترويح عن النفس بتعذيب خلق الله , جاتله أزمه قلبيه من اللى شافه من زياره واحده بيشوف بس العمال عملوا ايه علشان المستخلص ....عارفه يعنى ايه أزمه قلبيه لواحد عنده 42 سنه ...شاف ايه ده عمل فيه كده .....و هو مالوش دعوه بأى حاجه ...ده بيعمل تجديدات علشان المكان يبقى فخم و يليق بانه يكون سلخانه ....

منك لله يا مصرى جدا قلبت عليا المواجع .....معلش برضه ربنا يسهل أجازتك و تنبسط فيها ....وحياتك لو لسه فيها نفس أبقى أبعتلى يمكن ....يمكن ..... bv:-

[المصـــــــرى]

بتحصل معاكوا ساعات إنكو تتخلبطوا فى كلمات زى "مسافر" و"راجع"، ساعات تلقائيا تلاقى نفسك تقول "راجع" وتقصد بيها البلد المهاجر ليها، و"مسافر" يعنى نازل مصر، صح؟

[yassir]

بتحصل معاكوا ساعات إنكو تتخلبطوا فى كلمات زى "مسافر" و"راجع"، ساعات تلقائيا تلاقى نفسك تقول "راجع" وتقصد بيها البلد المهاجر ليها، و"مسافر" يعنى نازل مصر، صح؟

:blink:

[لولا]

تصدقوا بالله.

خلاص مبقتش عايزة انزل مصر..

ولا فى اى حاجة وحشتنى فى مصر.

وخلاص يا جماعة انا صحيت وغسلت وشي كمان.

والنهارده حجزت عند اكبر دكتور عيون هنا عشان اعمل كشف نظر

ويكتبلى على نظاره مكبره سوده فحم. بحيث اقدر اشوف مصر

من مكانى هنا على حقيقتها وابطل احلام.

وبعدين مصر ايه دى اللى حتوحشنى وهى وسخة كده..

مش استنى لما تستحمى الأول وتنظف وبعدين ابقى ابصلها

واخدها بالأحضان.

بس معليش بقى عيله لسه وعندى احلام واحلام واحلام.

وزى ما كان بيقولنا بابا حماس الشباب واخدكم يا عيال!

اّه يا بابايا ..

مش كنت تفهمنى يا بابا ان مصر وحشه قوى لدرجة احرم انى احس نحيه

اى حاجة فيها بشوق !

وسمااااااااااااااااااااااااااااااااااااااااااح للجميع . انا بنسحب خلاص

بس قبل ما انسحب بقولكم حاجة وحده بس ..

انا قلت وحشنى ايه فى مصر.. وحشكم ايه فى مصر..

والله مقلتش تعالوا نعيش فى مصر! (يتقطع لسانى !!)

مقلتش تعالوا خلينا نرجع مصر !! ( تتشل ايدى قبل ما اكتبها !!)

وميرسي يا ياسر على جردل الميه اللى دلقته فى وشي ..

الحمد الله فقت وصحيت خلاص.

[المصـــــــرى]

وسمااااااااااااااااااااااااااااااااااااااااااح للجميع . انا بنسحب خلاص

بس قبل ما انسحب بقولكم حاجة وحده بس ..

تنسحبى إزاى يا فندم، وإحنا نقدر نعيش من غير مداخلات حضرتك.

فكرتينى بحاجه لازم أظبط فيها نفسى قبل ما أنزل مصر، لإنى متعود من هنا لما حد يقوللى "أنا ماشى"، أقوله "مع السلامة"، وبرضه لو الوقت متأخر وعندى شغل الصبح أو ورايا مشوار مهم بقولهم "مع السلامة"، نسيت مشاوير التقل والدلع وعزومة المراكبية وباقى اللسته وإن الناس مش دايما بتقول اللى تقصده.

بس بصراحة المشاوير دى مش واحشانى.

1:طب أستأذن يا جماعة

2: لا يمكن خليك قاعد

1: طيب قعدت

1: طب الساعة بقت إتنين الصبح ممكن أروح

2: لا يمكن يا راجل خليلك

1: أوكى.

تم تعديل 5 يوليو 2008 بواسطة المصـــــــرى

[محمد عبدالعزيز]

وحشنى فى مصر إنى ألاقى ناس بتحبها بالفعل مش بالكلام.

بمعنى إنها مستعدة تضحى ولو بالقليل عشان تعمل لها حاجة كويسة ترفع من شأنها وتساهم فى مستقبل أفضل للجميع.

فى فرق بين إنى أحبها وإنى أحب أستمتع بيها.

لو بحبها يبقى ممكن أضحى عشانها وعشان ترجع أحسن من اﻷول وحتوحشنى دايماً حتى لو هى أقذر بلد فى العالم, بس أنا عارف إن أصلها مش كده.

لو بحب أستمتع بيها بس, يبقى مش حتوحشنى إلا بشروط, لو كانت نظيفة مثلاً, غير كده تغور فى ستين داهية, ماهى بلد قذرة بقى وأنا بحب النظافة.

تم تعديل 5 يوليو 2008 بواسطة محمد عبدالعزيز

[المصـــــــرى]

وحضرتك شفت أغلب الناس اللى نزلت مصر وتابعتهم وبعدين لاقيت إن فيهم بيضحوا وفيهم مش بيضحوا ،ووحشك الناس اللى مضحتش؟

أنا لما بنزل مصر بشوف الناس اللى عايشه فى مصر، لاكن عشان أشوف الناس اللى راجعه مصر لازم أقف فى المطار وأمشى ورا كل واحد وأعرف هوه بيعمل إيه وقصة حياته إيه، وبعدها أقدر أستنتج، صح؟

تم تعديل 5 يوليو 2008 بواسطة المصـــــــرى

[محمد عبدالعزيز]

والله يا أخ المصرى الجواب بيبان من عنوانه

ومفيش دخان من غير نار

شوف المواضيع اللى موجودة فى المنتدى وحضرتك تعرف أنا جبت الفكرة دى منين.

شوف أى واحد بيفكر يرجع مصر حتى وهو مستريح ومبسوط وعاوز يعمل مشروع يشغل فيه بعض الشباب اللى مش لاقيين فرصة عمل, بعض الأخوة الأفاضل بيردوا عليه يقولوا إيه

شوف موضوع أى واحد بيفكر يسافر يشتغل أو يهاجر, وشوف بعض الأخوة الأفاضل بيردوا عليه يقولوا عن مصر إيه.

ولو كنا بنضحى بجد كان حال مصر اتغير للأحسن.

تم تعديل 5 يوليو 2008 بواسطة محمد عبدالعزيز

[المصـــــــرى]

والله يا أخ المصرى الجواب بيبان من عنوانه

يعنى حضرتك لو حبينا نعمل إحصائية عن تعداد سكان مصر، ممكن نكتفى بتعداد حارة كوم الدكه؟ ونقول الجواب باين من عنوانه، تعداد مصر زاد الضعف مثلا.

تم تعديل 5 يوليو 2008 بواسطة المصـــــــرى

[محمد عبدالعزيز]

يا أخى الفاضل, اللى حضرتك عاوز تعمله اعمله, بس دى وجهة نظرى الشخصية وقلت لك مبرراتى, مش عاجباك مفيش مشكلة بس أنا مقتنع بيها.

[se_ Elsyed]

بصراحة كلام بيقطر سم وسواد ...

الإخوة اللي قرفانين من مصر .. تأكدوا تماماً هي تبادلكم نفس الشعور ... وتتمنى ان تعيشوا وتموتوا وتندفنوا بعيداً عنها ... فارض مصر لا يُمكنها أن تحتوي شخص بهذا السواد وهذا الكُره لها ....

يا ريت والله العظيم لو طلبات سحب الجنسية بترتبط بالعاطفة والأُمنية .. كنت أول واحد طلب سحب الجنسية عنكم ...

فما أسهل إنك تقول مصر مش مستحميه أو مصر ما وحشتنيش لإنها ياي فيها حاجات وحشة ... او تقعد في التكييف وتقعد تعد المساويء اللي فيها .. اللي إنتو نفسكو كنتوا سبب من مسببات تلك المساويء بسلبيتكم ومصمصة شفايفكم .... فّا لم تكن قدمت شيئاً لها ... فالأولى لك ان تسكت وتتوارى بعيداً عن الأنظار لإنك لا تستحق أن تنتمي لتلك الأرض الطيبة التي قابلت إحسانها لك بكل جحود وتعالي لمجرد إنك مسكتين قرشين في إيدك ومعك جواز سفر أخر تحسبه إنه تذكرة الدخول للجنة ... !!!!!!!

وأتمنى من كل قلبي إن ربنا يوعد كل واحد بيكره مصر بالشكل ده .. ربنا يوعده بأولاد عاقين يقولوا له في يوم من الأيام : ما اعطلكش أنا سايبك وماشي لإنك مش مستحمي .. او إنت يابا راجل فقير .. فلما تتغني إن شاء الله ويهبط عليك الذهب والفضة من السماء أبقى أشوف هارجعلك ولا لأ ..

آه بالمناسبة ... حاولوا كده تعرضوا التنازل عن جنسياتكم المصرية اللي قرفانين منها لأي حد مالوش وطن زي إخوتنا الفلسطينيين وشوفوا هايندفع لكم كام فيها ....

واتمنى ان نقابلكم بإذن الله يوم القيامة ونرى زرعكم وغرسكم لأودلاكم في تلك البلاد ..... زي ما هانشوف كده أبو وام واجداد باراك أوباما بعد ما كانوا مسلمين موحدين بالله وفجأة طلع لهم إبن تحول للمسيحية وبقى يحلف بالطلاق في كل مقابلة إنه لا مسلم ولا يعرف حاجه عن الإسلام بل اصبح يتنصل ويتهرب من كل رمز إسلامي حتى المحجبات اللي كانوا جايين بكل نية صافية يسلموا عليه .. وكل ده الأب والام هما اللي مسئلين عنه .. لإنك ما تحطش البنزين جنب النار وتقعد تعيط وتقول الدنيا ولعت

وبما إنكم إخترتوا الدُنيا .. فبإذن الله نشوف يوم القيامة عملتوا إيه لنفسكم ولأودلاكم في الأخرة ...

[المصـــــــرى]

يا أخى الفاضل, اللى حضرتك عاوز تعمله اعمله, بس دى وجهة نظرى الشخصية وقلت لك مبرراتى, مش عاجباك مفيش مشكلة بس أنا مقتنع بيها.

العملية لازم تكون علمية أكتر من كده، مش مجرد "دى وجهة نظرى، مش عاجبك إعمل اللى إعمله"

الإنسان العلمى والعملى لازم يبنى أراءه على حقائق وإحصائيات، مش مجرد إحساس شخصى تجاه أشخاص آخرين، وهذه القاعدة عامة ولا تقتصر على موضوع بعينه.

يبدو أن هناك مسافة شاسعة فى إسلوب التفكير، ودى برضه حاجه لازم أضعها فى الإعتبار لما أرجع.

وشكرا

تم تعديل 5 يوليو 2008 بواسطة المصـــــــرى

[محمد عبدالعزيز]

لعملية لازم تكون علمية أكتر من كده، مش مجرد "دى وجهة نظرى، مش عاجبك إعمل اللى إعمله"

الإنسان العلمى والعملى لازم يبنى أراءه على حقائق وإحصائيات، مش مجرد إحساس شخصى، وهذه القاعدة عامة ولا تقتصر على موضوع بعينه.

يبدو أن هناك مسافة شاسعة فى إسلوب التفكير، ودى برضه حاجه لازم أضعها فى الإعتبار لما أرجع.

وشكرا

متشكر يا أستاذ على النصيحة

وإن شاء الله أحاول أبقى علمى على ما حضرتك ترجع عشان نقعد نعيد ونزيد فى الكلام ونتكلم ثم نتكلم وبعد أن نتكلم نتكلم تانى مفيش مشكلة ماحنا فاضيين بقى ماعندناش حاجة نعملها.

المهم بس نبقى علميين

[المصـــــــرى]

مش عارف حنتكلم فى إيه، حضرتك ببساطه بنيت إستنتاجاتك بدون أى إحصاءيات أو مصادر، مجرد رأى شخصى، فمفيش موضوع نتكلم فيه، عشان نبدأ تحليل البيانات، لازم تكون فيه الأول بيانات، مفيش عند حضرتك بيانات، عند حضرتك أحاسيس شخصية ،وده موضوع تانى يتعلق بشخصية حضرتك ومالوش أهمية عندى.

تم تعديل 5 يوليو 2008 بواسطة المصـــــــرى

[محمد عبدالعزيز]

مش عارف حنتكلم فى إيه، حضرتك ببساطه بنيت إستنتاجاتك بدون أى إحصاءيات أو مصادر، مجرد رأى شخصى، فمفيش موضوع نتكلم فيه، عشان نبدأ تحليل البيانات، لازم تكون فيه الأول بيانات، مفيش عند حضرتك بيانات، عند حضرتك أحاسيس شخصية ،وده موضوع تانى يتعلق بشخصية حضرتك ومالوش أهمية عندى.

طيب إنت شفتنى حضرتك قلت إنها حاجة غير رأى شخصى؟

مش انا برضه قلت إنها وجهة نظرى الشخصية؟

نفسى أفهم إيه اللى استفز حضرتك عشان تعلق عليها مادام رأيى مالوش أهمية عند حضرتك؟ اشمعنى أنا يعنى؟

ولا هو اللى على راسه بطحة؟

[لولا]

انا صحيح قلت حنسحب .. وقصدى كان انسحب

من محاوله انى اخليكم تشوفوا مصر فى برواز

احلى وتشتاقوا للحاجة الحلوه اللى فيها.

على الأقل هنا فى الموضوع ده اللى احلف بالله

العظيم ميه الف يمين ان مفيش حد منكم دخله

الا وهو بيموت فى ترابك يا مصر.

كلنا بنحب مصر يا جماعة ودى مش محتاجة

اى اثبات .

الفرق بينا وبين بعض ان فيه ناس مجروحة

والجرح بيختلف من شخص للتانى.

واحنا فاهمين بعض وحاسين بهموم بعض

بس بلاش نجرح فى بعض او يكون فى تشكيك

فى الوطنيه نفسها . كلنا هنا مصريين.

كلنا هنا ولاد مصريين.. كلنا هنا حنفضل طول

عمرنا مصريين.

وهدوا النفوس يا جماعة.

الموضوع بدايته كانت كلها حب ليه نهايته تكون كده.

انا والله حتى فتحت الموضوع التانى عشان تفضفضوا

هناك عن مشاعركم واهاتكم اذا كانت موجوده نحيه

مصر بس مش هنا.

ووحدوا ربنا بقى .

[المصـــــــرى]

طيب إنت شفتنى حضرتك قلت إنها حاجة غير رأى شخصى؟

مش انا برضه قلت إنها وجهة نظرى الشخصية؟

مفيش حاجه إستفزتنى يا فندم، وأنا مش بأهاجم حضرتك، أنا كنت بس بتأكد إن رأى حضرتك مش مبنى على أى بيانات أو إحصاءيات أو معلومات، وإنه مجرد إحساس شخصى، بس حضرتك تفتكر إسلوب التفكير ده ليه علاقة بكون المصرى يعيش بمصر أو الخارج؟

وأقصد بتفتكر هنا ، يعنى عند حضرتك بيانات ومعلومات، مش إحساس شخصى. لو متعرفش مفيش مشاكل، من قال "لا أعرف" فقد أفتى.

[محمد عبدالعزيز]

لا أعرف, ياريت حضرتك تحن على الغلبان اللى داخل مصر ومش عارف أى حاجة وتعرفنى.

يارب حضرتك تكون مبسوط كده, عشان صاحب الموضوع لم يشترط أن كل واحد يثبت وجهة نظره الشخصية بطريقة علمية معملية بحتة, عشان الناس العلميين العمليين اللى خارج مصر يفهموا الناس العاطفيين غير العمليين اللى داخل مصر.

بالمناسبة, ياريت الأخوة اللى قالوا إن الحواوشى من أكتر الحاجات اللى بتوحشهم فى مصر يذكروا لنا المصادر اللى اعتمدوا عليها فى الشعور بهذا الإحساس.

[المصـــــــرى]

أنا مش ممكن أقول إن اللى داخل مصر ميعرفوش حاجه واللى خارج مصر يعرفوا، وبرضه مش ممكن أقول إن اللى داخل مصر أكثر حبا وإنتماءا لمصر من اللى خارج مصر، فليس لدى إحصائيات لأحكم على طبقة كاملة من الناس، ففى هذا ظلم.

فكما رأيت مصريين داخل مصر يفكرون بإسلوب عقلانى، ورأيت مصريين ولدوا وتربوا خارج مصر وهم أكثر إنتماءا من مصريين فى الداخل، إلا أننى لا أستطيع أن أحكم على طبقة كاملة من الناس دون أن تتوفر الإحصائيات وإلا لظلمت الناس، وطريقة التفكير هذه ليست غربية ولا مصرية بل إسلامية، فهو إثم كبير أن تحكم على الناس دون دليل.

تم تعديل 5 يوليو 2008 بواسطة المصـــــــرى

[iloveegypt]

الاخوة الافاضل م ايهاب ا ياسر ا المصرى الاخت لولا ا سيد متولىا مصرى جدا ا سكادا كلكم فكرتونى بمصر

بس ياريت بلاش النظارة البسوداء لكل حاجة فى مصر وخصوصا فى هذا الموضوع لان الغرض الاساسى ذكر الايجابيات المرة دى علشان خاطرى وشكرا لمداخلاتكم الجميلة ولكم فى ذمتى موضوع جديد اسمه بتكره ايه فى مصر مية مية

نرجع لموضوعنا

اكتر حاجة بتوحشنى فى مصر ضحكة النا س الجميلة

رمضان فى مصر روعة

العيد صلاته تجنن (فى الاستاد والله يا مهندس ايهاب :happy: )بضحك معاك لحسن تزعل

وحشتنى الدورات الررمضانية بتاعت الكورة بس انا احشن واحد يشجع

وحشنى حلقات تحفيظ القران فى المسجد واحلى صحبة فى الدنيا كانت بتاعت المسجد

وحشنى ريحة هوا مصر رجعلك قريب B)

تم تعديل 5 يوليو 2008 بواسطة iloveegypt