رابطة عشاق مصر (أليكس لوفر)

[seeem]

صباح الفل ياعمور.............

احلى صباح واحلى تحية على عيون عمور القمر ديه.....

وسمعوني ...... ياحلو صبح ياحلو طل...... ياحلو صبح نهارنا فل..

[MZohairy]

و سمعني سلام يامعلي راية الحريه للواء هاني شاكر

و يا معلي راية الحريه

يا مقوي الوحده الوطنيه

غالي علينا و جوا عنينا

يحميك ربي لمصر و لينا

عشت يا غالي

جبينك عالي

بإراده حره مصريه

بإراده حره وطنيه

[amrhoras]

صباح الخير يا أ/سيييم ويا أ/مذهرى

ايه المواهب العظيمه دى حبيت بس اصبح على احلى مصريين

تحياتى

[مسالم]

" غمض عينيك وامشي بخفه ودلع ... الدنيا هيّ الشابه وانت الجدع ..

تشوف رشاقة خطوتك تعبدك ... لكن انت لو بصيت لرجليك تقع ... ...... عجبي" إيناس جوهر .. اذاعة الشرق الاوسط..

كنت عندما اسمع هذه الكلمات .. اركض بسرعة خارجاً من المنزل .. حيث ان سماع مقدمة هذا البرنامج معناه انني تأخرت .. وسوف اعاقب على الدخول متأخراً الى المدرسه... او انني لن ادخل اليها اليوم ..

كانت أمي الله يمسيها بكل خير .. تصحينا من النوم بعد ان تكون قد اعدت الفطور والشاي بلبن وكله تمام .. وكنت عندها اقوم بالتهام ما وجد أمامي من ساندويتشات ثم آخد خمسه تحت اللحاف .. خصوصاً في أيام الشتاء القارص .. ثم تأتي الوالده ...

قوم يابني أغسل وشك والبس .. حتتأخر .. حاضر لماّ طارق يغسل وشه الاول .. طب قوم حضر شنطتك .. أنا محّضرها من إمبارح ..

وتمر الدقائق .. واشعر بأن الوقت يضيق .. فأقوم بسرعه من تحت اللحاف .. وانطلق كالسهم نحو الحوض لغسيل وجهي ... تشششش ااااه .. الميه متلجه .. يااااه .. الدنيا سقعه تلج نار... مش قادر ...

فين الفطار .. إنت مش اكلت السندوتشات من شويه .. طب فين الشندوتش اللي حاخده معايا المدرسه ... اتفضل ... شكرا ...

اضع السندويتش في الشنطه .. فين القلم بتاعي .. المسطره .. حتأخر .. هئ هئ .. الله يهديك مش قلتلك قوم بدري حضر شنطتك ...

ثم اسمع " غمض عينيك ....." فأنطلق الى المدرسه .. لألتقي بيوم جديد من الدروس والواجبات والمواجهات ...

كان هذا يحدث كل يوم تقريباً .. معي ومع اخواتي .. فما كَلّت أمي يوماً بما نفعله معها كل صباح ... وما أنفك الراديو عن الصراخ ..

هكذا كنا .. وكما يقال .. إن غداً لناظره قريب .. وما كنت افعله بالامس .. يفعله ابنائي مع أمهم اليوم .. ولكن مالا افهمه .. لماذا لا نصبر عليهم اليوم كما صبر علينا آباؤنا بالامس ....

والسؤال الاهم .. لماذا لا أجد صينية الفطور بما لذ وطاب عند استيقاظي ... كما عودتني امي .. أين ذهب الراديو .. ؟؟؟؟

هل من مجيب ؟؟!!

تم تعديل 17 نوفمبر 2007 بواسطة مسالم

[مونتى]

فى حب مصر مش تسجليني غياب

اصل بعيد عنكم جالي المرض البطال..... وقعدت اهرش فى دماغي ليل ونهار........

رحت لغاية الحكيم .... مالقتش عنده دوا ...... قالي ياحبيبي علاجك مش هنا

هناك....محطة الرمل تحت تمثال سعد زغلول.....

وخد معاك سندوتش فلافل محشية وشوب عصير قصب ........

................................................................................

وجالى الفكر واصبحت فى حاله اكتئاب ورغبه شديدة بالاجازة

والمشى على الكورنيش وقت المطر والتمتع بحبى فى الشتاء لاننى احس ان اسكندريه بالشتاء هى لى وحدى وانا الان بعيد عنها منذ سته واربعه شهور

يارب

اليكس اوعى تخدينى غياب انا قليل الجلوس على النت لانشغالى الشديد وحين العودة للسكن النوم هو السبيل الوحيد

ع :closedeyes: اشق بلدى

[مونتى]

رسمنا على القلب وجه الوطن

نخيل ونيل وشعب اصيل وصوناك يامصر طول الزمن

ع :closedeyes: اشق بلدى

[mohsensamak]

هكذا كنا .. وكما يقال .. إن غداً لناظره قريب .. وما كنت افعله بالامس .. يفعله ابنائي مع أمهم اليوم .. ولكن مالا افهمه .. لماذا لا نصبر عليهم اليوم كما صبر علينا آباؤنا بالامس ....

والسؤال الاهم .. لماذا لا أجد صينية الفطور بما لذ وطاب عند استيقاظي ... كما عودتني امي .. أين ذهب الراديو .. ؟؟؟؟

هل من مجيب ؟؟!!

صباح الفل يا أخ مسالم

يا أخى السؤال ده صعب جدا ، علما بان اللى أنت بتحكيه ده كان بيحصل معانا كلنا تقريبا و كأن الأمهات زمان كانوا متفقين على طريقة واحدة أو متخرجين من مدرسة واحدة و اللى فى الصعيد زى اللى فى بحرى اللى فى الريف زى اللى فى المدينة الإختلافات فى الرتوش و بس لكن الجوهر دائما واحد.

دلوقتى الراجل مع الضغوط و الغربة و الخوف من المستقبل على عياله بقى مشدود الأعصاب 24/7 (24 ساعة فى اليوم سبعة أيام فى الأسبوع)

و الست آه من الست شوية شوية اتسحبت بره دورها اللى أترسم علشانها و بدات تحمل نفسها بمسؤليات جديدة و بعض الرجالة الخبثاء ماصدقوا طبعا و ياللاه شيلى مش انت عاوزة كده و النتيجة انه اعصاب الست توترت أكثر من الراجل بكتير و الضحية مش العيال بس لكن العيال و أبوهم و أمهم

و حتى لما الراجل بيحاول يعمل راجل و يجنب زوجته هذه الفوضى الغير خلاقة القليل يستجيب و لكن الكثير جدا يبقى واقع تحت سحر خلينا نجرب و مش ح نخسر حاجة و الدنيا كلها ماشية كده و خلافه

و بس لما تيجى رجلهم بيلافوا ان لا عودة لا إتجاه عكسى تحت أى ظروف أحيانا من الرجالة نفسهم بعد ما يتذوقوا إما دخل المرأة أو جزأ منه أو أنهم يستمتعوا بإن الست بقى لها إهتمامات تانية و بدأت تخف عنه شوية بالدخول فى عالمها الخاص أو ان الراجل يعتبر ان ده التمن اللى لازم يدفعوا حتى ينعم بفترة اقامته فى البيت دون ان يكون مضطر ان يسمع حكاوى الزوجة و خواطرها و هواجسها و خلافه مما تدخره للراجل حتى يعود من العمل

أعتقد فى الظروف دى مافيش مكان لصينية الفطار يا أخ مسالم و خليك اسم على مسمى و اقبل حتى بسندويتش أو إعمل زيى و تسلح بعلبتين تلاتة فول بالخلطة السرية كل إسبوع و انت ح تبقى حديد ان شاء الله

الأولاد بقى هم اللى بيصعبوا على جدا فى هذا الموضوع لإنهم لم يعيشوا الجو اللى احنا عشناه و حبيناه و لازم نعترف ان دى من الأشياء اللى حببتنا فى مصر

أقصد جو العائلة و الترابط و العواطف اللى بقت نادرة فى العالم كله الأن و قلت جدا فى مصر كمان

صباح الخيرات جميعا

محسن

[seeem]

صباح الفل عل الكل....

منك لله يا أستاذ مسالم ..... ماحنا قاعدين وساكتين ومحتسبين .......

امال انت فاكر انا نازل ومستعجل ليه...... يارب يطيل فى عمرك يامي ويخليكي لينا يارب..... ويدوم عليكي بكل صحة وهنا....

اما عن صينية الافطار ؟؟ احسن نتيجة وصلتلها هي سندوتشين توست باردين .... مع كوباية شاي باللبن((سلق بيض)) متحضرين قبل النوم....واشرب ياعريس.....

حضرتك فيه فروق كبيرة بين البيوت وبعضيها ....... اصعب حاجة ان الست تهمل في بيتها واللى اكتر من كده الراجل اللى يوافق على الهجص ده.......

والولاد فعلا فعلا ..... بيصعبوا على الواحد.....ضحية ((هما وابوهم))....

[seeem]

صباح الفل على عيون الكل.....

النهارده يوم فل ورد وياسمين......

النهارده يوم الناس الرايقين......

ياما نفسي اوصلك واقعد تحت رجلك ياست الحبايب.....

واحب على ايديك وابوس الجبين......

...........................................................................

بوري سنجاري.......وبوري بالردة....... ولو مش حتتعبي !!!! مسقعة

[Alex Lover]

صباح الخير يا مصريين

يا صباح الورد على الكل

ايه المناقشات الجامده دي .. طبعا لازم تطلعو الست هي اللي غلطانه ماهو مفيش واحده ست جربت ترد عليكم ... :happy:

عموما طبعا الام بتاعة زمان حاجة تانية و صينية الفطار وصوت الاذاعه كل ده اتغير مفيش كلام ولكن ليه اتغير ... انا هاخد نفسي مثال

انا واحده (ام )وعندي طفل بيروح الصبح المدرسة وزوجي طبعا بينزل شغله وانا إمراة (( عامله ))

اصلا معنديش راديو في البيت لان ابني على بال ما يلبس ويجهز الصبح بيكون فاتح MBC 3 بيتفرج على توم وجيري .. انا باكون بالبس وعايزه الحق اصلى .. واجهز بسرعه علشان لسه هاوصل ابني المدرسة على سكتي ... جوزي بينزل متأخر شويه .... بالتالي انا مش بافطر من اساسه هي كوبايه شاي بحليب انا وابني وسندوتش مغلف لجوزي يفطر بيه قبل ما ينزل ... وهي دي الوتيرة اليوميه

بس بامانه يا جماعه انا وجوزي حريصين على تعويض الفشل الصباحي ده .. يعني وقت الغدا لازم نتغدا سوا ولو كنا بنيجي في مواعيد مختلفة ... ومع ذلك ميعاد الغدا واحد ونتجمع مع بعض ... انا باكون عامله لهم الاكل اللي بيحبوه من قبلها بيوم ( اكل امي الله يرحمها ) يعني اكل التيك اواي ده مش باعترف بيه واليوم اللي مقدرتش اطبخ فيه بنقضيها سمك مشوي او كباب وكفته المهم نحس بالالفه

احنا في ايدينا اننا نتغلب على الظروف ولو غلست علينا الظروف من ناحية احنا نغلس عليها من ناحيه تانية

وارجع اقولكم هي ايام زمان تتعوض ...؟؟؟ الام اللي قاعده في البيت حضنها دافي تودعك لمدرستك بابتسامه دافيه وتقوم تشوف شغل البيت بعد ما الكل ينزل وترجع من المدرسة تلاقي الاكل سخن وجاهز وهي مرتاحه

الحياه كانت وتيرتها ابطأ من دلوقتي ... ومش عارفين بكره هنوصل لايه

متشكره يا Seeem و سلامنا للغاليه ... متشكرة يا استاذ محسن ,استاذ عمرو ، مونتي وطبعا استاذ مسالم اللي ممتعنا بذكرياته الجميله

ارجو من باقي الاعضاء المتابعه والمشاركة اللي حرمونا منها مش عارفين ليه

تم تعديل 18 نوفمبر 2007 بواسطة Alex Lover

[seeem]

ششششششششششش غير الموضوع ........... الكلام ده مكانه مش هنا......

هنا اللى مزاجه رايق يدخل ..... يمتع ويستمتع....

المشاكل تروح ...... والهم يغور.....

الله يسلمك يافندم.......

[مسالم]

السلام عليكم ..

أخي العزيز .. محسن .. أشكرك على ماتفضلت به من توضيح وإضافات ..

أخي العزيز سييييم ... أشكرك ايضاً على ماتفضلت به من نصائح ..

الاخت العزيزه .. Alex-Lover.. أشكرك على المتابعه الجيده وإحتضانك للموضوع الذي طرحتيه .. ولولا إهتمامك بما قدمتيه لمَا كنا وصلنا الى هذه السطور ...

لكم جميعاً أود ان اعقب على ما تفضلتم به .. أيه اللي حصل ...؟؟

اللي حصل ان المرأه والرجل والابناء ايضا حصلهم تغيّر فسيولوجي ... والتغيّر الفسيولوجي .. هو تغيّر يطرأ على الانسان نتيجه لعوامل خارجيه أو داخليه .. وهي تغيرات يمكن ان تكون عضويه وايضاً نفسيه ..

عايز اركز (بدون سرد طويل) على دور المرأه منذ خلقها الله الى عصرنا هذا .. والتغيرات الفسيولوجيه التي حدثت لها حتى اوصلتها واوصلتنا الى ما نحن عليه الان ..

المرأه لابد أن يكون لها دور في المجتمع ..!! طب وماله ماهيه أصلاً لها دور في المجتمع منذ أن خلقت .. الم تخلق لكي ييستأنس بها آدم وتستأنس به .. الم يكن هذا دوراً هاماً لها في هذا الوقت .. ناهيك عن موضوع التفاحه واللي حصل .. الله يهديهن ..

المرأه يجب أن تكون حره ..!! يعني ايه..؟؟ ... يعني من حقها أن تخرج الى الشارع وتذهب الى الاسواق لتشتري حاجياتها .. من حقها انها تَزور وتُزار كما يفعل زوجها تماماً .. اليست بشراً .. طب ومين قال غير كده .. الله يهديكم حد قالكم ان احنا معترضين .. !!

أوكي مادام الامر كذلُك .. فلابد أن تتعلم المرأه .. وتلتحق بالمدارس والجامعات وفصول العلم .. اليس من العار ان تظل المرأه في غياهب الجهل وقد حباها الله بعقل مفكر .. مدبر .. !! طب ومين قال انها جاهله .. او ان سبب جهلها هو عدم ذهابها الى المدارس .. ولنا في نساء الرسول صلى الله عليه وسلم والصحابه أسوه حسنه .. الم يكن هؤلاء النساء من خيره نساء العالمين في الادب والذوق والعلم (علوم الدين والحياه) والاخلاص والوفاء وتربية الرجال وليس الابناء و و ...

المرأه لابد وان تساعد زوجها .. وكيف لا وقد ضاقت على الرجل سبل العيش واصبح .. كالبعير يحمل أسفاراً .. (حق ارُيد به باطل) .. واصبح الحاضر الغائب .. ولم نكد نراه الا عندما يشتاق الى سويعات قليله يلقي بجثته على سرير فارقه لساعاتٍ.. !! لا الاه إلا الله .. آمنت بالله .. ومن فعل هذا بالرجل .. من الذي ضيق عليه الخناق في البيت والشارع والطرقات والاوتوبيس والمترو والميكروباص والمكتب والقهاوي أيضاً و أنظر حولك .. الستم انتن اللاتي فعلتن هذا بالرجل .. كما هو عددكن بالنسبه للرجل .. الستم تفوقون الرجال عدداً وعدةً وعتاداً ... بالله عليكم حد راح وزارة الزراعه أو وزارة العدل .. او الوزارات التي تجد فيها الرجل وقد أصبح ذكرى.. من فعل هذا الستم انتن ..

والنتيجه ...؟؟؟!!

اصبحت المرأه في خبر كان .. وكيف لا .. وقد أصبحت المرأه من الكائنات البشريه المطحونه بالليل والنهار .. وزادت الاحمال عليها .. وتراكمت المتطلبات وقصرت في حقوقها مع نفسها قبل الرجل .. واصبحت كالآله التي تعمل بلا انقطاع .. وضاع سكونها وضاع حيائها وضاع جمالها .. وضاع بريقها .. وضاع وفائها .. وضاع معه ابنائها .. ولولا أن الله قد حسم مسألة الحمل على النساء فقط .. لطالبونا بها في هذا الزمان .. ولكن الله سّلِم..

حقيقة .. تصعب عليّ زوجتي .. (وهي لا تعمل بإرادتها) .. وهي الأم المسئوله عن أعمال البيت المختلفه .. والتي تدخل فيها مسئوليتها عن ابنائها وعني .. وفي النهايه عن نفسها .. ولا تجد متسعاً من الوقت لكل هذا .. فما بالك إذا أقتطعت من هذا الوقت الغير كافي اصلا .. سويعات للعمل كونها مثلها مثل الرجل .. ويجب ان تعمل ويكون لها وجود في المجتمع ... ؟؟؟ يا سنه سوخه ياولاد ... بقى بعد كل اللي بتعمله فينا من صباحية اليوم لحد آخره ولسه مالهاش وجود !!... حد قال ان مالهاش وجود ياشباب .. أنا ماقلتش ... يمكن انت ... !!

تم تعديل 18 نوفمبر 2007 بواسطة مسالم

[amrhoras]

صباح الخير يا مصريين

ايه الكسل ده الصبح بدأ ينزل اهوه

منظر جميل جدا جدا جدا

قوموا وفوقوا وروقوا كدى حضروا الفطار وفطروا الولاد عشان المدرسه

حبيت بس اصبح بما انه مفيش حد غيرى على المنتدى طوال الليل

يصباح الخير ياللى معانا الكروان غنى وصحانا ......

عمرو حورس

[نانو]

صباح الفل والورد والياسمين عليك يا عمرو وعلي كل اللي هنا ... :lol:

انت عرفت منين موضوع السندوتشات بتاع المدرسه ده :D ... ده عذاب الصباح ...أنا أكره الروتين و لكن.....لابد منه

تحيه ليكي يا اليكس وكل اللي كتبوا هنا ....الموضوع رائع وجميل وبيفكرنا بأحلي أيام ....شويه كده أشحن البطاريه و أنزل

بشويه ذكريات سكندريه جميله ....

[Alex Lover]

صباح الخير عليكي يا نانو صباح معطر بكل الحب والخير .نورتي الموضوع يا قمر .

سندوتشات ايه يا جماعه انا في الشغل وبافطر خلاص ,,,, ابتدا اليوم والعمل

انا بس حبيت اصبح عليكم واقولك يا صباح الخير ياللي معانا ،، ولو اني ماسمعتش في الكويت صوت الكروان ده ابدا ... :lol:

ممكن اقول صفارة الانذار غنت وصحتنا ,,,,, هههههههههه

صباح الخير يا عمرو ويا مسالم ولو اني مش عارفه يا مسالم انت مع المرأة ولا ضدها ومع ذلك لي رجعة معاكم بس اشرب الشاي وارجعلكم

صباحكم سكر

تم تعديل 19 نوفمبر 2007 بواسطة Alex Lover

[amrhoras]

صباح الخير نانو وصباح الخير اليكس

تأخير 3 ساعات طبعا الا 8 دقايق

بس نعديها المره دى

:lol: :D

[mohsensamak]

صباح الخير يا جماعة

إيه السؤال ده يا ألكس الأستاذ مسالم طبعا ضد المرأة و دى عاوزة كلام.......

أنا بس بأهدى النفوس و بعدين أرجع لكم تانى علشان عندى مرووووووور

سلام

[amrhoras]

يـــــا مصريين يــــــــــــا

انتى فين ياجهاد احم احم

انتو فين ياخونا محدش عاد بيجي يصبح ولا يمسي

صباح الخير صباح الخير صباح الخييييييير

هو مفيش حد انهارده موجود

كلكم غياب ومخصوم عليكم اسبوعين واربع ايام ونص

حد يسألنى اشمعزى؟

اقوله الأفيه حكمت بكده حكم القوى :lol:

يله منتظركم ترجعو بألف عافيه

نداء خاص

حد شاف اليكس لوفر مش انتى اللى كتبتي الموضوع ده :ninja: ليه بقي تغيبي عنه ولا بطلنا زكريات ولا ايه

عمرو

[Alex Lover]

انا يعمرو باغيب ده انا كل يوم باجي اصبح وامسي بس انت تلاقيك مش واخد بالك

بس بجد انت تستاهل :ninja: علشان انت مواظب على الحضور اليومي

انا انهاردة جايبالكم موضوع حلو اوي ... عايزة كل واحد من اعضاء الرابطة المبجلين يحكيلنا عن ذكرياته يوم شم النسيم

لاننا عارفين ان شم النسيم مش بيحتفل بيه غير في مصر ... ودايما اليوم ده له طابع خاص من ساعه ما تقوم من النوم الصبح تلاقي التليفزيون مليان اغاني ( الدنيا ربيع والجو بديع قفلي على كل المواضيع قفل قفل قفل قفل .. مافيهاش كاني ومافيهاش ماني كاني ماني ايه الدنيا ربيع الدنيا ربيع الدنيا ربيع

وبعد شويه اغنيه فريد ( أدي الربيع عاد من تاني والفجر هلت انواره .. )

اعتقد مفيش مكان في الدنيا بيحتفل بالربيع زينا في مصر .. بس الفسيخ بقى بيغطي على ريحة الورد ... انا بحب الفسيخ جدا .. افتكر اننا كنا ننظف الفسيخ والخس وماما تعمل فطيره شم النسيم ونروح المنتزة نقضي اليوم هناك ... والناس كلها تبقى سايبه بيوتها والسماء تبكي ومن رائحة الفسيح التي غطتها ههههههههههههه

ايه اخباركم انتم

[amrhoras]

صباح الخير يا اليكس

شميت ريحة الفسيخ يووه قصدى الربيع والورد جيت اشوف ايه اللى حصل

لقيت اليكس ومواضيعها معطره الجو بريحه الربيع انهارده

افتكرت علطول سندريلا الشاشه سعاد حسني وهى بتقول الدنيا ربيع والجو بديع قفل قفل قفل على كل المواضيع

افتكرت البيض الملون (مش عارف مدام ناش مصره على ورد السيراميك وسيبانا حنموت من الجوع)

افتكرت الطعميه السخنه بالسمسم وماما مدوخانى روح جيب الفول وعاوزين كسبره وخضره طول الليل بقى

وبعدين تيجيلى بقى روح هات من عند جحا السهليه ياحلو (المشوار ده بقى عندى الموت اهون منه) ياماما دلوقتى الدنيا زحمه وكمان مش بتقولى ليه من الصبح

زى مايكون انا اللى حشم لوحدى ياستى مش عاوز اشم والله مش انتوا قولتوا ان الشمامين دول وحشين :blink:

تروح كبسانى بضحكتها اللى مفقتدها دلوقتى تخليني اعمل اى حاجة من غير ما اتذمر (امى بتضحك عليا كدى ديما تروح مديانى ابتسامه عارفه قلبي ارق من قلب الخسايه)

نيجي بقى للصبح وهى جايه تصحيني وتوريني البيض الملون واختى قعده مشغوله فى التلوين (الوان طبيعيه طبعا)

بعد كدى احضر نفسي للفطار ومع اول استفتاح وخلاص البيض قرب يستوى وبنقدح الزيت وانا عمال اعاند بقى والعب وماما طبعا تجرى ورايا عشان تضربني بس كله هزار نلاقى خلانى طبوا علينا ياخدونا بالقوه علشان نروح نشم فى البيت الكبير :ph34r:

وادى يوم الاجازه ضاع بس اللمه احلى برده بيني وبينكم بس ضاع مجهود امبارح بالليل اروح واتعب وفى الاخر ارزع فى الفريزر الطعميه وناخد الفسيخ معانا :ninja:

هييه والله يا اليكس انتى تشكرى بترجعينا لايام اتمنى انى افتكرها :lol:

ربنا يسعد ايامك :phar: وايامنا جميعا

عمرو