اخر اخبار قرعة الاراضى

[الحاج فوزى]

عزيزى المعلم ..

أنا مش مهندس من أبو 15000 :rolleyes:

أنا بس بقول نصيحة لوجه الله .

أحب اقول لحضرتك أن تكلفة الجسة الواحدة للأرض بتتكلف حوالى ألف جنية ..

يبقى إزاى المهندس هياخد 1900 ؟!

طبعاً ممكن لو فيه واحد بانى فى القطعة المجاورة ليك مباشرةً وعامل جسة تاخد منها البيانات ..

بس هقولك على مثال علشان تفهمنى ..

ممكن حضرتك تاخد الرسومات اللى ب 1900 دول .. وتروح تجيب مقاول يبنى ومهندس يستلم .. وتيجى لا قدر الله تبنى تلاقى الأرض على طفله ، أو على مياه جوفية .. تكلفك أضعاف أضعاف الأساسات العادية .. ( بعد الشر عليك طبعاً الله يوفقك فى قطعة زى الفل على رمل وثابتة لحد 60 متر )

أو ممكن الرسومات لان المهندس ولا بص على الأرض غير على الخريطة ، يفرض الأسوء فى التربة والتحميل ، وعليه يكلف حضرتك أطنان من الحديد والأسمنت الزيادة عن الحاجة ..

على العموم علشان كلامى ما يتفهمش غلط ..

أقترح على حضرتك البحث والقراءة فى الموضوع ، قراءة على خفيف كده .. تفهم بها ما يدور وأيه الفرق بين تصميم والأخر وأيه الفرق بين إنشائى والأخر ..

اه نسيت أجاوبك ..

أنا طبعاً بتكلم عن المدن الجديدة وعلى عماير المدن الجديدة .. وزى ما قلتلك .. أنا مش مهندس معمارى ولا إنشائى ..

بس انا بتكلم من واقع خبرتى وتجربتى الحالية .

تحياتى سيدى الفاضل .

[هشام عباس]

الأخ الفاضل الاستاز عصام

ربنا يارب يباركلك في ارضك وتبنيها زي ما تحب انشاء الله وبالنسبه لأنك تبنيها على شقه واحده او شقتين؟

فده يتوقف على اكتر من حاجه؟

اولا انت ناوي مثلا بعد البناء انك تسكن فدور مثلا وتأجر الباقي؟لغاية ما الاولاد يكبروا ولا اصلا حضرتك ولادك كبار وانت باني علشان تجوزهم معاك؟

عموما انا افضل ان المساحه تكون على شقه واحده علشان يكون اللعب براحتكم هههههههههههه

وعندي فكره لو انت ناوي تاخد دور وتأجر الباقي لما الولاد يكبروا ده لوهم لسه صغيرين زي ولادي

انا اصلي عندي 4 اطفال ولد و3 بنات وكنت عاوز اعملهم الغرف على هيئة اجنحه صغيره زي الي في الفنادق

يعني مثلا لكل واحد يكون ليه مساحه منفصله علشان البنات لما يكبروا بأذن الله ويتجوزوا يلاقو مكان يسعهم هم وازواجهم لو حبوا يقضوا عندنا كام يوم

يعني تفتح الباب تلاقي انتريه صغير ومنه تفتح باب تاني تلاقي غرفة نوم بالحمام

وبكده يكون ليهم اجنحه منفصله ومساحتها معقوله فنفسي اعمل 4 اجنحه انا والمدام واحد والولد واحد لحد ما يكبر واديله دور يتجوز فيه والبنت الكبيره جناح والبنتين الصغار واحد ولما الولد يتجوز يبقى عندي تلات اجنحه للتلات بنات

ادينا بنحلم وربنا يحقق لينا احلامنا كلنا يا رب علشان كده اعتقد ان المساحه الكبيره احسن وخصوصا انك بتقول ان المكان هناك راقي يعني الافضل انك توسع ده رأيي لكن طبعا استشير ناس كتير وحاول تكون رأي يناسب احتياجاتك ومتنساش المستقبل يعني اعمل للنهارده ولبكره وربنا يقويك ويوفقك يا رب

ملحوظه

انا اعتزر بشده اني احتديت من فتره وده كان بسبب شوية مشاكل عندي ومعلش انا اسف على اسلوبي في الكلام والرجاء من الكل ان يعزرني واسف مره تانيه

[هشام عباس]

انا ليا سؤال

انا بنت خالي اتخرجت من كلية الهندسه من عامين فقط وتخصصها مدني يعني ليها في موضوع التصميمات الهندسيه وكانت طول عمرها وطول فترة الجامعه من الأوائل تفتكروا استعين بيها في التصميم وخصوصا اني عاوز تصميمات خاصه في بالي؟ وتفتكروا ان حديثي التخرج بيكون عندهم افكار جديده احسن؟ ولا زوي الخبره احسن؟

وبعدين انا سامع ان كل المكاتب الهندسيه الكبيره بتعين عندها شباب صغير وخصوصا في قسم التصميم علشان بيكون عندهم افكار جديده

ولا ايه رأيكم يا جماعه؟

[الحاج فوزى]

الأخ الفاضل هشام ..

فى التصميم ..

بتقعد مع المعمارى ، بتشرحله اللى انت عايزه ، بقلم رصاص على ورق ابيض ..

ومش مهم الدقة ولا التقسيم من طرفك ، ده شغله هوا .. أنه يحولك أفكارك إلى رسمة متكاملة ..

وبيعملك الرسم المبدىء .. لو فيه من اللى انت عايزه بتبدء معاه تعدل وتشيل وتحط وتوسع وتضيق ..

وتغير من هنا وهنا ..

وتاخد الرسمة البيت وتقعد تفكر ، وترجعله تانى وهكذا حتى تصل للصورة اللى فى بالك ..

بعد ده يجيى دور الإنشائى ..

يستلم الرسمة من المعمارى ويبدء فى حساباته طبقاً لنوعية التربة وظروف الأرض والمساحة والأحمال و .. و ..

بعد كده الرسوم بتتطبع وتتجهز مع شوية ورق كده خاص بالرسوم الهندسية زى الأكواد وخلافة ..

وتتسلم فى الجهاز ..

الجهاز بيراجع على الورق شكلياً ولو فيه أى ملاحظات بيبلغك للتعديل ..

وبعدين الجهاز بيبعت الرسومات للمجمعة العشرية للمراجعة والإعتماد

وبعدين ترجع الجهاز تانى لطباعة الرخصة ..

ومن هنا تبدء المرحلة التالية .. وهى البناء ..

يا رب يوفق الجميع على خير .

[هشام عباس]

شكرا ليك HUSS على المعلومات ديه وانا فعلا راسم او بمعنى اصح زوجتي رسمت كل الي هيي عاوزاه وبالمقاسات وعلى ورق بياني لأنها خريجة تربيه فنيه وعندها فكره شويه عن الحاجات ديه واحنا نفسنا ننفز الرسم ده على الحقيقه ويارب يوفقنا جميعا

[elemam]

عزيزى المعلم ..

أنا مش مهندس من أبو 15000 :rolleyes:

أنا بس بقول نصيحة لوجه الله .

عزيزي الأستاذ

كنت كتبت رد وأنا بأبعته للأسف النت فصل ورجع تاني بس

ما علينا واضح إننا إنشاء الله سنستفيد من خبرة حضرتك في البناء

وأحب أجاوب حضرتك عن موضوع الجيران فأنا حولي 3 عمارات أمامي ويميني وخلفي أما يساري فهو مثلي جديد في القرعة

والقطعة دي مسحوبة من ناس من بتوع زمان اللي كانوا راكنينها وده اللي عرفته من الناس اللي حول القطعة بتاعتي

ولو حضرتك متابع المحاورات فأنا ذكرت إن المجاورة اللي أنا اخترتها والحمد لله نزل فيها فقط 13 قطعة .. والمجاورة كلها عمرانة وساكنة

حتى أنا جنبي عمارة من سنة 1992 كويس كده بالنسبة للمجسات ..

جواب أخر بالنسبة للمهندس فأنا زي ما لاحظتوا أحب أدقق في كل حاجة تخص مستقبلي وأنا يوم ما اتفقت مع المهندس كان معايا اتنين مهندسين أخويا مهندس كهرباء خبير وله في المباني ... وعديلي مهندس ميكانيكا خبير ..

وفضلنا مع المهندس 3 ساعات نتناقش ونتحاور ويقوم يعدل في الرسم ويرجع لنا ويكتب ملاحظاتنا على ورق زي ما حضرتك تفضلت واتفقنا على كافة تفاصيل ونشوف صور وعينات من اللي أنا صورتها ..

كل ده أنا ما دفعتش حاجة وممكن أخد بعضي وأمشي ..

وسألت أخويا وعديلي إيه رأيكم قالوا ماشاء الله مهندس شاطر وربنا يسهل ..

وعلى فكرة أنا فهمت المهندس إني سأستشير ناس كتير في الرسم فوافق وقال اللي حضرتك تطلبه يتعمل لك ..

مش شرط يعني إن المهندس يكون غالي علشان يبقى كويس ..

ونحن في انتظار نصائح حضرتك ..

والسلام عليكم ..

[هشام عباس]

الأخ الفاضل الاستاز عصام...... ياترى شكل التصميم الخارجي بيفرق في التكلفه؟ لأني سمعت قبل كده انه مش بيفرق كتير وانا بسأل السؤال ده بسبب كل العمارات الي مليه القاهره وشكلها زي علب الكبريت علشان كده خطر في بالي ان الشكل الجمالي بيفرق في السعر مع ان المنطق بيقول اني مثلا لو عملت البلكونه على شكل دائره او مستطيل طالما المساحه واحده فده مش هيفرق في التكلفه ولا ايه الصح؟

وحضرتك سألت على التكاليف؟ وياترى ايه الاخبار وبقصد طبعا تكاليف البناء

ولك تحياتي

[elemam]

الأستاذ هشام عباس

السلام عليكم

أشكرك على تهنئتك وعلى ردك على سؤالي وربنا يوفقنا وكل واحد يحقق اللي يتمناه له ولأولاده ,,

بالنسبة لرؤية حضرتك رائعة وممتازة ربنا يوفقك وتحققها ولكن لي تعليق حضرتك مخطط نفس النظام الأمريكي بحكم المعايشة في أمريكا ولكن نحن في الشرق بنحب بيت العيلة بمعنى ليه أنتريه لكل سويت ما كفاية غرفة نوم وحمامها وتجتمع العيلة كلها في الصالونات ونعيش حياة عائلية اجتماعية بتطلع فيها الأفشات الحلوة والتعليقات الجميلة مش يبقى كل بنت مع زوجها وقافلين على نفسهم ..وكل لما نعوز واحد نتصل على المحمول علشان يطلع يشرب معانا الشاي ..

اسمح لي حبيت أبدي رأي في تصور حضرتك لبيت الأحلام ..

وزي ما انت شايف احنا بنستشير بعض ..

ولك كل التحية والتوفيق ..

عصام الإمام

[elemam]

استاذ هشام عباس

أجاوب حضرتك يا استاذ هشام فأنا أولادي صغار ولد عمره 9سنوات وبنت 7 سنوات ..

يعني ممكن نستفيد من الشقق كام سنة لغاية ما يكبروا .. ولا أنا غلطان ...

ولك الشكر على النصيحة ..

عصام

[هشام عباس]

عزيزي الاستاز عصام انا مش عايش في امريكا ولا حاجه انا عايش في مسقط في سلطنة عمان وكلامك اكيد صح بالنسبه لبيت العيله لكن انا حبيت اديهم شوية خصوصيه علشان يحبو يجولنا كتير !!!! اصل انا سافرت لعمان قبل ما اجيب شقه واتجوزت واخدت مراتي ولغاية دلوقتي لما بننزل مصر بنقعد عند اهلها لأن اهلنا احنا الاتنين في عماره واحده لكن اهلها عندهم غرفه فاضيه (غرفتها وهي بنت) علشان كده بنفضل النزول عندهم وكنت شايف ان لو المكان اكبر شويه يكون افضل علشان كمان لما يجيبو اطفال الانتريه الصغير يبقى غرفه اضافيه للطفل ولا انت ايه رأيك؟ اصل انا بحب دايما ابص لبعيد .......

وعلى فكره احنا اولادنا في نفس العمر ابني يوسف الكبير 9 سنوات وليله 5 وسهر 3ونص وسما 2ونص وربنا يخليلك ولادك ويخليلي ولادي

[elemam]

الأستاذ هشام عباس ( أبو يوسف ) ربنا يحفظك لأولادك ويحفظ أولادك ليك ويحفظ لك أمهم يارب

الله يوفقك وإنشاء الله تقدر تعمل اللي انت عايزه بس خليها معقولة ..

وبعدين هي فين المساحة اللي تديلك كل السويت دول خللي بالك انت بتبني على جزء من الأرض حسب مساحة الأرض ..

والسلام عليكم

عصام

[هشام عباس]

يا سيدي احنا عاملين رسم كروكي كده بالمساحه وعاملين كل سويت 30م وبما ان مفيش طرق داخل السويت فالمساحه مستغله بالكامل وانا هبني على 240م بدون البروز وانت بتقول فيه بروز كمان 10% انا كنت عاوز الغرفه تكون 3.5×3.5 والحمام 2×2.5 والانتريه 3×4 وبكده تبقى المساحه لكل جناح تقريبا حوالي 30م ونضيف شوية طرق بين الاجنحه الارلعه ممكن نقول 30م كمان كده يبقى 150م والباقي مطبخ وريسبشن وسفره ها ؟ ينفع؟ عموما انا بقلك ادينا بنحلم والله اعلم ساعة التنفيز الواحد هيعمل ايه واكيد فيه حاجات كتير ممكن تأثر على تفكيره

بس مقلتليش عرفت تمن البناء هيوصل لكام تقريبا؟

[هشام عباس]

يا جماعة الخير انا قرأت الان موضوع عن انشاء فرع لجامعة عين شمس في مدينة العبور وشايف ان الجامعه ديه هتخدم معظم المدن الجديده بما ان العبور على طيق مصر الاسماعيليه وكمان الشروق والعاشر من رمضان واعتقد ان بدر ليها مدخل من طريق مصر السويس وكمان ليها مدخل من طريق مصر الاسماعيليه ولا ملهاش؟ يا ريت الي يعرف يرد عليا علشان والله كنت من كام يوم بقول لما نسكن في بدر ازاي بناتي لما يكبروا ان شاء الله هيروحو الجامعه؟ ههههههههه انا عارف ان الكلام ده لسه بدري عليه اوي بس اهو الواحد بيحب يفكر لبعيد والسنين بتجري

[vipwithyou]

فى جامعة روسية فى بدر

[sigma]

يا جماعة

أنا عملت مشاركة بالمنتدى تتحدث عن البناء بالحوائط الحامله بدلا من الحديد المسلح وأجابنى الأستاذ الفاضل هشام ببحث رائع

أرجوكم قرائته وتركيز المناقشات فى هذا المجال لما يكن أن يوفره

مع الشكر الجزيل لصاحب البحث

[vipwithyou]

اذا كنتوا يا جماعة هتتكلموا عن الحوائط الحاملة ارجوا انكم متتعلقوش بالموضوع بدرجة كبيرة وياريت يتحدث فى الموضوع

الناس المتخصصين فيه ويفيدونا هل ينفع من غير حديد 4 ادوار وصلاحية المبنى كام سنه وايه مزاياه وعيوبه

وعايزين كلام واقعى وعملى

شكرا

[هشام عباس]

طلب من الاخوه الي موجودين في مصر حاليا وبالخصوص الي عندهم قطع ارض في مدينة بدر

ياريت يسألولنا في جهاز المدينه عن موضوع البناء بنظام الجدران الحامله بالطوب الاحمر هل هذا ممكن وبيتم الموافقه عليه ام لا؟

لأن بالتأكيد سعر الطوب هيفرق كتير جدا عن الحديد المسلح وخصوصا بعد جنان اسعار الحديد الي حاصل الفتره ديه مقرنة بأسعار الطوب

والطلب الاخر يا ترى النظام ده معمول بيه اصلا في مصر؟

يعني فيه اصلا شركات هندسيه عندها الخبره في تنفيز مباني بهذه الطيقه؟يا جماعه الموضوع ده لو كان ممكن تنفيزه هيفرق كتير جدا لأن حسب الدراسه الي قرأتها ووضعتها في المنتدى انه بيوفر في البناء 24% وده كان قبل زيادة اسعار الحديد اما الان فأتوقع انه هيوفر اكتر من كده انشاء الله

تحياتي

[هشام عباس]

طلب من الاخوه الي موجودين في مصر حاليا وبالخصوص الي عندهم قطع ارض في مدينة بدر

ياريت يسألولنا في جهاز المدينه عن موضوع البناء بنظام الجدران الحامله بالطوب الاحمر هل هذا ممكن وبيتم الموافقه عليه ام لا؟

لأن بالتأكيد سعر الطوب هيفرق كتير جدا عن الحديد المسلح وخصوصا بعد جنان اسعار الحديد الي حاصل الفتره ديه مقرنة بأسعار الطوب

والطلب الاخر يا ترى النظام ده معمول بيه اصلا في مصر؟

يعني فيه اصلا شركات هندسيه عندها الخبره في تنفيز مباني بهذه الطيقه؟يا جماعه الموضوع ده لو كان ممكن تنفيزه هيفرق كتير جدا لأن حسب الدراسه الي قرأتها ووضعتها في المنتدى انه بيوفر في البناء 24% وده كان قبل زيادة اسعار الحديد اما الان فأتوقع انه هيوفر اكتر من كده انشاء الله

تحياتي

[هشام عباس]

فعلا استاز تامر انت عندك حق جدا في كلامك طيب مفيش هنا عضو مختص بقدر يفيدنافي الموضوع ده؟

بس يمكن موضوع الجدران الحامله ديه تنفع اكتر في بناء الفلل بالنسبة للي اراضيهم خاصه للفلل زي حالاتي

والي يعرف طريقه نسأل بيها المختصين او طريقه نوصل بيها للمختصين ياريت يدلنا عليها

[هشام عباس]

اعزائي انا بقالي اكتر من ساعه وانا بحاول اعرف عن موضوع الحوائط الحامله من على النت ووصلت لحاجتين

1- يفضل عدم بناء اكتر من 4 ادوار بهذه الطريقه

2- من سيئات او مساوئ هذه الطريقه انه صعب جدا ويكاد يكون مستحبلا التعديل في البناء في المستقبل من ناحية هد جدار معين لتوسيع مكان او نقل جدار من مكانه كما نفعل احيانا لتغيير نظام المبنى من الداخل ولذلك فعلى من يقوم بهذه الطريقه التفكير جيدا مسبقا لأنه لن يستطيع تغيير المساحات في المستقبل

سوف ابحث مره اخرى واذا توصلت الى اي شئ سأطلعكم عليه