البنت المصرية و المشكلة الأزليه...!

[بنت شعنونة]

البنت المصرية

دي حدوتة كبيرة جدا في جميع مراحل حياتها

ففي رحلة الطفولة نبدا ب عيب يا بنت

وفي مرحلة المراهقة نصل الى رايحة فين وجايا منين

وفي مرحلة الشباب تتحول الى لبس البوصة تبقى عروسة وتحتاج عريس

واخيرا نصل الى المقبرة الا وهي بيت الزوجية!!!!

وهذا هو بيت القصيد..

هل صحيح ان البنت المصرية تربى على اساس ان وظيفتها في الحياة اصطياد الزوج؟؟

واذا لم يكن هذا صحيحا

فلماذا يتهمها الأزواج دائما بانها غير مهتمه بنفسها وانها دايما بتتحول لشيء تاني خالص بعد الزواج

شيء اشبه بالألة خالي من الجمال او المشاعر؟؟!

وهل حقا البنت المصرية مذنبة في هذا؟؟ ام مجني عليها؟؟؟

اسمع رايكم عشان عندي ليكم مفاجأة ها تصدمكم :lookaround:  :D

[Alshiekh]

[b:post_uid0]شعنونة

الموضوع بسيط خالص

البنت المصرية مثلها مثل العربية او الأوروبية او الأمريكية

فى الصغر كلهن لازم يتعلمن الصح والغلط

لكن الدين والعادات والتقاليد تزيد من جرعة الصح والغلط للبنت والولد على السواء

وبعدين لا ننكر ان طريقة التفكير النسوى تقريبا متشابهة بين كل البنات او النساء فى العالم

فى سن الطفولة وبحكم طبيعتها كبنت فهى تحب اللعب بالعرائس وليس المسدسات او السيوف،

مرحلة المراهقة

طبيعى يبقى لازم يكون فيه كنترول طالما ان البنت من اسرة لها عادات وتقاليد ، والموضوع ده بيختلف من مكان لمكان ومن شعب لشعب ومن دولة لدولة.

مابعد المراهقة وان كان هذا يبدا من المراهقة، تتجه البنت تلقاءيا للاهتمام بشكلها ومظرها والموضة والكريمات وما الى ذلك، ونفس الحكاية تنطبق على الشاب، فهو دائما يهتم بمظهره، علشان يلفت نظر البنات.

اذا فلو كانت الفكرة هى اصظياد زوج فعلى المقابل فكرة الشاب ستكون اصطياد زوجة، وهذا طبعا تعبير لا احب ان استخدمه، والأفضل هو لفت نظر شاب او شابة ، قد يكون من نصيبها او تكون من نصيبه، وطبعا ان تختم بالزواج فهذا هو كل مايتمناه اى شاب او شابة.

اما مايحدث بعد سنين من الزواج، من ملل او غيره، فهى على مستوى العالم.

الزوجة مشغولة بالمنزل والاولاد، الزوج مشغول بتوفير مزيد من المال للاسرة، كله تعبان من الدنيا واللى فيها

مافيش نفس لزينة او تجميل الا لزوم الخروج او مقابلة الضيوف والغرباء.

وحقيقى هذا مايحدث عندنا فى مصر او خارج مصر

حاجة مهمة قوى،

البنت المصرية او المرأة المصرية فوق انها زيها زى بنات العالم فى  هذا الموضوع،

الا انها تتفوق على الكل باخلاصها لزوجها واسرتها وتفانيها لاسرتها

الموضوع بسيط ومش محتاج الدخول فى فلسفات ودراسات لان ده هو اللى بيعقد الأمور اكثر

وياستى ربنا يجعل مفاجآتك خفيفة علينا[/b:post_uid0] :D  :D

[بنت شعنونة]

يا سلالالالالالالالام يا استاذ محمد

مش عارفا اصقف والا اقولك ايه يعبر عن مدى اعتزازي برايك اللي نااااااااااادرا ما هنلاقي زيه

المشكلة يا اخي محمد ان ككككللل الرجال يتهمون المراه العربية او المصرية انها ممله وروتينيه في حين دائما يقارنوها بالمراة الغربية على اعتبار انها ضد الملل!! ???

ازاي انا مش فاهما!!

اما موضوع اصطياد الزوج ف للأسف دا اللي حاصل اليومين دول

دا بقى في افلام بتترسم رسم من الأهل او الأم لتزويج ابنتهم لشخص بعينه

بس برضه خلوا مفاجأتي على جنب لحد ما اسمع بقية الأراء :D  :D

[Faro]

بس برضه خلوا مفاجأتي على جنب لحد ما اسمع بقية الأراء

دعوة لحفل الزواج أو الخطوبة ؟؟؟؟

[بنت شعنونة]

من بقك لبااااااااااااااااب السمااااااااااااااااااااااا

بس

هممممممممممم

اقولك...

لا مش دي حاجا تانية

بس مالهاش اي علاقة بيا :colgate:  :D  :D

Edited By hisham a wahab on Aug. 20 2002 01:56am

[Faro]

البنت المصرية ستظل مذنبة طالما لم يحدث تغير جذري فى العادات والتقاليد وكلام الناس ... ولكن يجب أن تعلمي إن الرجل أصبح مذنب لعدم قدرته على الزواج قبل أن يصل لسن المعاش .

إيه هيه المفاجأة بقى ؟؟؟؟؟

[محب لمصر]

السلام عليكم ورحمة الله

البنت المصرية فعلا زينة البنات  ولكن مع الاسف هذا في الماضي الان في عصرنا الحاضر مع التطور الحاصل في العالم دفعت البنت المصرية ثمن التطور  والسبب هو الظروف المحيطة بها ترى التطور وترى الحياة ولكن لاتصلها الا بتضحية غاليه جدا اندفاع البنت وراء المظاهر وغياب القيم عند بعض الشباب والرجاله مع الاسف كان السبب الرئيسي في فقدانها لمركزها المرموق المضايقات التي تلقاها البنت دفعتها الى الانحراف وراء التيار المتهدم الذي انزلها من برجها العالي حبها لمواكبت الحضارة جعلها تفقد الشرف والعزة التي تملكها انجرافها وراء المغريات ووراء الشباب جعلها تخسر كل شئ نراها في كل مكان مع الشباب في الشواطئ والعربيات والمقاهي وفي معظم الاوقات في الشقق من اجل المال باعت مبادئها وشرفها من اجل المال والسبب الرجال والشباب لانعدام الاخلاق فلو اعتبر كل واحد منا ان البنت  اختة او امه او زوجتة لما اوقع بها الى وصلت  اليه  من الشبهات والسبب يعود كذلك للاهل والتربية والى الحياة الصعبه التى تواجهها البنت في العمل مضايقة من زميلها يريد ان ينال منها مضايقة من مديرها او صاحب العمل لكي تستطيع العيش يجب عليها ان توافق على بيع نفسها لواحد من هؤلاء او يكون مصيرها الرفض من الوظيفة وهذا ما جعل البعض منهن يجارينا اهواء امثال هؤلاء الرجال ويكون مصيرها الفساد وغيرها لقد اصبحت صورة البنت المصريه مهزوزه جدا في نظر الشباب بسبب سهوله الوصول اليها ببعض المال وهذا هو سبب كثيرة المشاكل لدينا اني ادعو الشباب المراهق ان يخاف الله ويراعي الله في تعامله مع البنت في العمل والحياة العامة ويعطيها الامان لتعيش بحرية وصدق والاهل عليهم واجب كبير مخافة الله في المعاملة لاني  من واقع ما اسمعه واراها يوميا  ارى المثير من البنات تخرج الصباح للعمل وهي تكون في احدى الشقق اة المقاهي او النوادي مع صديق او عشيق او زبون تعثر عليه في اول يومها لمجرد المال وتقضيه اوقات سعيدة في جمع المال لتوفر لنفسها الملابس المناسبة والمغريه لتواكب جيلها ثم تعود في المساء  وكانها راجعة من عملها الشاق وهي متعبة امام اهلها وتنام لتبدء جوله جديدة في صباح اليوم التالي  وهكذا كل يوم  وتعود مبكرا بعد صلاة العشاء بحجة ان اهلها محافظين يمنعونها من السهر والتاخير  اين مسئولية الاهل  اعرف صديق لي  له  عشيقة تقابلة كل يوم من الصباح وحتى العشاء ومن ثلاثة سنوات وهي كذلك و يعاشرها معاشرة الازواج وهي في نظر اهلها عذاء  اذا اين المسئوليه من الاهل  وغيرها كثير لن تكون البنت مثل زمان ولا   الاهل مثل زمان ما دام الرجال والشباب ينظر الى البنت على انها فريسة ولقمة سائغة سهله له ........

ارجو ان يفوق هؤلاء الرجال ويراعوا الله في تعاملهم مع البنت قبل ان تعترضوا على كلامي انظروا الى صالات السينما والى الشواطئ  ثم قارنوا كلامي بالواقع وردوا علي

اني اتمنى ان ارى البنت المصرية في اجمل صورة ولكن هذا هو الواقع  وعندي قصص كثيرة وواقعية ومازلت حتى الان موجوده في الواقع وكثيرة

ومدعمة بالدليل  ومنها ضباط ومسئولين يستغلون مناصبهم لصيد البنات   والسيدات  ومن له معارضة على كلامي  يرد علي

والله الموفق

[بنت شعنونة]

اخي محب

كلامك للأسف صح جدا

ولقد اثارني لكتابة ما كنت ساكتبه في موضوع مستقل

بس مادام جات السيرة بقى يبقى اكتبه هنا :angry:

في يوم كنت مع مجموعة من الفتيات منهن المخطوبة ومنهن لا ومنهن من هي "مصاحبة" او يعني على علاقة حب

وفتح الحوار عن علاقة كل واحدا بخطيبها او حبيبها ومدى تطور هذه العلاقة

وفوجئت انهن بلا استثناء على علاقة بالطرف الأخر او قاموا بانشاء علاقة ما

وعشان اكون محددة اكتر

فان تعريف كلمة علاقة عندي انا يبدا من

مسكة اليد ...مرورا بقى بالقبلات او الأخضان الى ان ينتهى على اعلى الدرجات

كل دا في نظري اسمه علاقة

هاتقولولي مسكة اليد الأهل بيبحوها

بس ولو

معلش في نظري انا ما تصحش

المهم

كل واحدا اتككلمت وفوجئت ان 50% منهن ذهبن مع حبيبها الى شقة لتبادل العواطف المحمومة بدرجاتها المختلفة

على اعتبار انهن كلهت عذروات

يعني على حد تعبيرهم باللفظ

ما عملوش حاجا غلط!!!

المهم

انا اعترضت على ما يفعلوه وقلتلهم

طب مادام كدا

طب ما تروحوا للمأذون واتجوزوا في السر عشان لما تعملوا حاجا تبقى حلال على الأقل!!

مادام كدا كدا انتوا عايزين تعيشوا معاهم وناوين على الأرتباط بيهم او على الأقل بتحبوهم

فوجئت بشهقة جماااااااااعية منهم وكلمة واحدة نطت في وشي منهم كلهم قائلين

يالهوي؟؟؟؟

ونفضح نفسنا

!!!!!!!!!!!

يعني هوا الجواز على سنة الله ورسولة بس في السر بقى فضيحة واللي بيهببوا دا مش فضيحة؟؟

وكانت الأجابة انه كدا نسبة معرفة اهلهم بما يحدث ضئيلة

انما لو اتجوزوا رسمي ممكن يتفضحوا في اي وقت!!!

هذا الحوار جعلني افكر

ليه هما سموا انكشاف الزواج السري فضيحة؟؟

وليه لو الأهل اكتشفوا ان بنتهم متجوزة من وراهم بيتجنوا؟؟؟؟؟؟؟

مع انها ما عملتش حاجا حرام

وفوجئت انهن عندهم حق نوعا ما

لأنه المجتمع هوا اللي خلاهم يعملوا كدا

:(

والا ايه رايكم؟

[amir]

تانى ياشعنونة؟؟!!!!!!

انتى اثرتى موضوع شائك جدا......موضوع العلاقات الحميمة بين المخطوبين و لا داعى أا أقول العلاقات الجنسية علشان محدش يزعل....

هل هى موجودة فعلا..... هل أصبحت ظاهرة الان....ماذا يفعل الشاب أو الفتاة اذا تزوج من فتاة مخطوبة سابقا ..هل يصارحها، هل تصارحة.....كلنا نعرف ان هذة الامور تحدث و لكننا ننكرها اذا كانت تتعلق بى أو بابنتى...دانا بنتى أشرف من الشرف.. و محجبة و بتعرف ربنا كويس

أسئلة كتير بس عايزة الا نخفى رؤسنا فى الرمال...هل عندك استعداد للمناقشة؟؟

[بنت شعنونة]

معااااااااااك

يمكن اعرف افهم الوضع المقلوب دا

مادمنا داخل اداب الحوار

معاك طبعا

المهم نكون واقعيين في ما نقوله

وزي ما قلت ما ندفنش راسنا في التراب :lookaround:  ???

[Faro]

الزواج فى مصر وبقية المجتمع الشرقي كان ومازال وبدرجة أقوى  صفقة بيع وشراء . كثيرا من الشابات والشباب لم يستطعوا الزواج بالحبيب أو الحبيبة بسبب شروط أولياء الأمر المعجزة .

يأخت شعنونة ... لو كنت رجلا ... متى ستفكري فى الزواج  ... مع الأخذ فى الإعتبار أن مرتبك 150 جم ؟؟؟؟؟؟

[بنت شعنونة]

عاوز الحق يا فارو

كلامك صح فعلا

ولو انا راجل

كنت ها اعمل زي ما انا بعمل دلوقتي

اشتغل كل حاجا واي حاجا من وانا في الكلية

عشان اجيب فلوس

اما عن موضوع الجواز

فدا يعتمد على حظي

يعني اتكل عىل الله واختار بنت الحلال اللي تحبني وتقبل بحالي

ومش ضروري الشقة والمهر والشبكة المهم الحب الحقيييييقي مش الموهوم

وانا ها اطحن نفسي شغل عشان خاطرها

ومش مهم عيال لحد 5 او 6 سنين

وشقة ايجار جديد

ونعيش

ها اقولك على ظاهرة جديدة انا شايفاها بعنيا

ان الاب والأم للبنت المقتدرة ممكن يجهزوها من الألف للياء بشرط انهم يتاكدوا ان الراجل شاري بنتهم بجد

دي ظاهرة

حاجا تانية

فاكرين فيلم عادل امام كراكون في الشارع

والله انا عندي استعداد اعمل زيه

بس اعيش عمري

قبل ما يبقى عندي 37 سنة مثلا وابن عنده سنتين؟؟؟؟؟

طب ها اربيه امتى دا!!!!!!!!

[دكتور عادل الليثي]

الغرب ريح نفسه تماما من هذه المشكلة التي تؤدي إلى عواقب وخيمة نفسيا واجتماعيا ولها تداعيات أبعد من ذلك

أقصد مشكلة ( الجنس )

ما يمكن أن نطلق عليه ( تحرير الجنس ) حاجة كده زي تحرير الاقتصاد عندنا بس بجد

البنت والولد من حقهم بل من واجبهم البحث عن صديق أو صديقة

وقد تتم بمساعدة الأبوين في حالة الفشل المتكرر

وعند مرحلة معينة من العمر يمكن أن يقيموا مع بعض دون زواج ولكن بمعرفة الأبوين من الجانبين

وممكن أن تفشل هذه العلاقة للوصول للزواج الرسمي ، فإلى علاقة أخرى

هذه العلاقات مقبولة من المجتمع كله ، وليس هناك اعتراض فعال عليها

ولهذا فهذه السلوكيات تتسم بالطبيعية من جميع الأطراف

أي ممكن أن نقول أن هناك توافق بين الطبيعة البشرية والطبيعة الاجتماعية في المجتمع الغربي

أما عندنا

فلا يوجد هذا التوافق بين الطبيعتين البشرية والاجتماعية

ونجد الجانب الاجتماعي يفرض قانونه بقوة على الطبيعة البشرية

والظاهر أن الرجل هو الذي يتزعم هذا الفرض لأن كله في النهاية يأتي على رأس البنت دون الولد

بل بالعكس الولد ماشي على حل شعره ، وربما يتباهى هو بنفسه جهرا ، أو تتباهى به أسرته عندما يحكى عن صولاته وجولاته في عالم النساء .

ولكن كم من بنت وئدت في جزيرة العرب

وكم يقشعر بدني عندما أتذكر بنات في عمر الربيع ، عندما قتلن باليد التي يجب أن تمتد بالرحمة والحب والحنان ، لمجرد الشك

والقاتل لم يكن هو الأب في حد ذاته ، ولكنه المجتمع القاسي  

ولهذا فكل السلوكيات التي تتم خارج هذا الإطار تمارس كما تمارس الجريمة ( سرقة أو انتقام ) ، ولا تمارس من أجل إشباع حاجات طبيعية معترف بها

[بنت شعنونة]

اخي طه كلامك صحيح

ولكن

بما اننا قررنا انه نتكلم بواقعية ونفتح الملف دا

يبقى خلونا نستثني الغرب والمقارنة معاه

عشان كدا ها نتوه بجد

وخلونا نتكلم بواقعية فعلا عن اللي بيحصل واللي حاصل

ونشوف ايه الحل

بدل ما كل مرة يتفتح الموضوع ويتقفل على مجرد تبادل في وجهات النظر!!

والحال هوا الحال

:notify:

[Faro]

ياأخت شعنونة

مايحدث فى الغرب يحدث فى مصر ولكن فى السر وأولياء الأمر على علم بذلك ولكن هموم الحياة تمنعهم من متابعة الأبناء بعد الحصول على الثانوية العامة . الحب جميل لكن التضحية غالية وتكلف الكثير - إن جاء الفقر من الباب هرب الحب من الشباك - حتى البنات الأوروبيات يفكرون فى الزوج المليان وصاحب الوظيفة - وظيفة الطبيب - الدائمة , حيث إن فقد الزوج لوظيفتة من أسباب الطلاق لإن الزوجة تتقمص دور الآمر والناهي ... يعني الحب إنتهى بنهاية وظيفة الزوج.

الحب والصبر فى هذا الزمن  خيـــــــــــــــــــــــال.

أوافق على رأى الأخ طه

[بنت شعنونة]

يا اخ فارو

كلامك صح

بس برضه كدا ما عملناش حاجا

???

دلوقتي سؤالي كان

البنت و الولد اللي بيحبوا بعض او حتى مخطوبين بتوافق انها تتبادل معاه قبلات او احضان او همسات او اي حاجا اقل او اكثر من كدا عشان بتحبه

وكل دا حرااام

ولا تقبل انها تتزوجه في السر على يد مأذون

واكرر مأذون مش ورقة محامي

علشان الفضيحة!!!!!

لماذا نسمي الحلال فضيحة لمجرد انه من ورا الأهل

وعشان نتكلم بمنطقية اكتر

تعالوا نحط نفسنا جوا الصورة مرة بصفتنا الأهل ومرة بصفتنا اصحاب المشكلة

طبعا العزة ليكم واكرمكم الله عن مواقف زي كدا

بس انا نفسي نتكلم بمنتهى الموضوعيه

ناخد اول فرضية

لو عرفت ان بنتك متجوزة على سنة الله ورسولة من شخص بتحبه وبيحبها على اعتبار انه ابن ناس وشاريها ولك حاجا كويسة بس المادة هيا اللي معطلاهم

ايه رد فعلك؟؟

وبمنتهى الأمانة؟؟

[Faro]

ولا تقبل انها تتزوجه في السر على يد مأذون

واكرر مأذون مش ورقة محامي

علشان الفضيحة!!!!!

لماذا نسمي الحلال فضيحة لمجرد انه من ورا الأهل

إذا تزوجت فى السر فهذا يعني تصحيح خطأ - يعني حامل - فى نظر العائلة وستوصف بالزانية ... والجيران كلامهم كتير .  طالما الزواج حلال فلماذا الزواج السري ... إلا إذا كان عندها أمل فى الزواج من عريس ثرى أو قادر على دفع مهر وتمويل حفل عرس حول حوض السباحة ولذا لامانع من التمتع بالمرفوض ولكن مرغوب لحين ظهور العريس القادر .

[بنت شعنونة]

يا اخ فاروا

برضه انت مش معايا في الصورة

انا بتكلم عن جواز مش لتصحيح خطا كا الحمل

وبرضه ما ردتش عليا

حط نفسك مكان الأب والام

ممكن تقولي رد فعلك الشخصي ايه؟ ???

[Faro]

يا أخت شعنونة

لا يوجد سبب آخر غير ذلك ... الزواج الشرعي حلال ... وكأب ستكون مفاجأة ذات تأثير نفسي خطير ... لماذا لم تخبرني أو تخبر والدتها ... لابد أن يكون هناك شيئ ما تحاول إخفائه ... أو إنها لا تعطي أى إهتمام للوالدين . هل هناك سبب آخر ؟؟؟

[بنت شعنونة]

طبعا

اهم سبب

تأكد البنت من عدم موافقه الاهل على الشاب لمجرد انه حالته المادية لا تسمح له بالارتباط في الوقت الحالي

او انه اقل ماديا منهم

دا اهم سبب موجود على الساحة فعليا دلوقتي

فرضا كان دا السبب الوحيد وعرفت انها اتجوزت من الولد

رد فعلك ايه؟