ومضات من نبضات

[عبير يونس]

كومبيوتر يهنج

اعمل له فرمتة

موبايل كل ماتشحنه يفضى بسرعة

شيل الابليكيشنز اللي ملهاش لزمة

الشنط وزنها زايد في المطار

طلع منها اللي ملوش لزمة

وزنك زايد

تخلص من الكيلوجرامات الزائدة

تعليقات فيسبوكية رخمة

نضف قائمة أصدقائك

كل ده و لسه ما وصلناش لكيفية تنظيف العقل و القلب

من "الأفكار" و " المشاعر " السلبية؟!!!

ليه لسه في ناس بتشيل "كراكيب " في البلكونة أو عندها أوضة كاملة للكراكيب :-D

ثقافة "الخوف" تحكمنا

"لتخزين " ما لا نحتاجه

يمكن نحتاجه بعدين

:-)

متخافوش

عبارة "الحاجات متعددة و الموارد محدودة "

كذب متصدقوهاش

نعيش في كون الوفرة يحكمه قيوم السموات والأرض

من لا تنفد خزائنه أبداً

الفقر فقر نفوسنا و قلوبنا و عقولنا

ما بداخلنا هو ما ينفد

لأن جوانا " كراكيب " كتير بيفضى الشحن عليها

ارمي كراكيبك

وصل نفسك برب الطاقة

مَا عِنْدَكُمْ يَنفَدُ وَمَا عِنْدَ اللَّهِ بَاقٍ وَلَنَجْزِيَنَّ الَّذِينَ صَبَرُوا أَجْرَهُمْ بِأَحْسَنِ مَا كَانُوا يَعْمَلُونَ.

[عبير يونس]

" النصاب" أكثر بشاعة من " الحرامي"

فالحرامي يسرق نقودك

أما النصاب فإنه يقتل حلمك

[أبو محمد]

أما النصاب فإنه يقتل حلمك بعد أن يختلس عقلك

[عبير يونس]

أما النصاب فإنه يقتل حلمك بعد أن يختلس عقلك

او بعد ان يتلاعب بمشاعرك

و يعزف على وتر احتياجاتك

[عبير يونس]

لا يوجد شخص ناجح و آخر فاشل

بل شخص مُدرّب

و شخص غير مُدرّب

لا يوجد شخص طيب و شخص شرير

بل شخص مبصر

و شخص لم يبصر بعد

[عبير يونس]

بر الأبناء ليس من البديهيات أو المسلّمات

و لا يجب اعتباره حق نشتكي إذا لم نجده

فهو لا يكون نتيجة تعب الأم مع أولادها

و افنائها عمرها و التضحية من أجلهم

بل هو رزق من رب العالمين

يروقني أن يحبني أبنائي لشخصي

و ليس ردا للجميل!

[عبير يونس]

كل معرفة تحصل عليها ليست لك وحدك

و ليس لك الحق في حجبها أو حجب جزء منها

هي رسائل كونية

ليس لك الحق في اختيار من الذي ستوصلها إليه

و ليس عليك استنباط الحكمة منها

أو الحكم على ما فيها

فلتكن ساعي البريد الأمين

أوصل الرسائل دون تدخل في محتواها

[عبير يونس]

لو أننا رغبنا بهزيمة كل من خالفنا

لتحول العالم إلى كومة من المهزومين!

[عبير يونس]

آية بنوتة زي القمر كانت النهاردة في الاتوبيس مع جدتها المريضة

معرفتش احدد سنها

من جسمها ممكن تكون شابة

لكنهابتتصرف كطفلة في الثالثة

ذكية جدا

حبوبة جدا

قامت و اصرت اني اقعد

و ادتني منديل

طلعت اكل و عزمت عليا

سألتني على موبايلي تتش؟

عندك العاب؟

اما قلتلها الشاشة اتكسرت منها جزء

قالت لي صلحيه؟

سألتني غالي التتش اللي حتصلحيه؟

واحدة جت قدامها قالت لها وسعي عايزة اشوف الشارع

غالبا مفهمتهاش و قالت لها اصل انا تخينة بتريقة

ردت ببرءاة خسي :)

و قالت لي بصوت واطي قوليلهاتخس

راجل كبير برضه قالتله وسع

و قبل مايرد باستغراب انا بصيتله بابتسامة فهم و وسع

كنت في منتهى السعادة بصحبة آية لحد ما نزلت قدام الجامعة

و انا نازلة قالت لي خللي بالك و انتي بتعدي

يا ترى الاوصاف دي تنطبق على مفهوم الاعاقة الذهنية ؟!

البنت كل اللي بتعمله و الناس ممكن تستغربه انها تلقائية

بتقول اللي جواها

من غير ماتفكر

او تزوق الكلام

هو مين اللي معاق بالضبط؟

؟!

[Salwa]

اصحاب القلوب القاسية هم المعاقين..

آية ..قلب نقى لم يتلوث بماديات الحياة المعتادة..

آية..ظلت عائشة فى دنيا البراءة الطفولية..

ليت البعض من اصحاب الاعاقة الذهنية - المستترة - يتعلم من هؤلاء الملائكة ..الصدق والشفافية.

شكرا عبير الخير على اهدائنا هذه النفحة الانسانية. :flr1:

[عبير يونس]

دايما كنت اتساءل من وانا صغيرة يعني ايه امومة

و البرمجة الاعلامية اللي محاوطانا

في المدرسة و عيد الام و ست الحبايب يا حبيبة

كابنة,,, عمري ما اختزلت امي في عيد الام و شوية اغاني

الامومة مش بس رعاية ممكن تقوم بيها اي دادة

سرها في الحب

اللي بيفرق الدادة اللي شغلها تنضف و تطبخ و تغسل عن الام هو عمل الاشياء دي بحب

عشان كده في دادات احن من الامهات اللي خلفت

الامومة كمان مش بس حضن و دفا

الامومة تعليم و تدريب

كل المخلوقات تدرب صغارها

مفيش طائر مثلا بيربط لابنه رباط الجزمة

و لا فيش قطة بتجري ورا ابنها بطبق أكل و تحايله عشان ياكل

و لا فيش كلبة بتقعد مع ولادها يعملوا الواجب

قيمة الام برأيي انها تعرف ولادها على رب العالمين و تعلمهم ازاي يعتمدوا عليه و انه هو سبحانه هو السند الحقيقي

و انها لو ماتت او غابت هو الحضن الحقيقي و هو الدفا

و هو الباقي

رحمك الله يا أمي

مدينة لكِ طول حياتي انك عرفتيني على ربي

و لن انسى ما حييت انها حفظتني ايه الكرسي و قالت لي اللي يقولها ما يخافش ابدا

و انها كانت بتبدأ يومها و تنهيه بدعاء

أصبحت لله ضيفا و ضيف الله لا يُضام

[عبير يونس]

كنت أعتقد أن المشكلة هي أننا لا نعرف

و أن هناك أسرار لو عرفناها لتغيرت حياتنا

و المفاجأة..

لا توجد أسرار

الأسرار مكشوفة و معروفة

لكل من"أراد" أن يعرف

فقط هناك

من لايسمع

أو لا يعقل!!

وَقَالُوا لَوْ كُنَّا نَسْمَعُ أَوْ نَعْقِلُ مَا كُنَّا فِي أَصْحَابِ السَّعِير

إنه العدل الإلهي

[عبير يونس]

خايف تقول لها بحبك لاحسن تصدمك انك زي اخوها

و بعدين يقولوا عليك كان حيموت عليها و هي رفضته

طب و ايه يعني

هو انت بتحبها هي و الا بتمثل فيلم يهمك فيه رأي الناس؟!

و بعدين اللي بيرفض الفرصة هو اللي ممكن يندم

مش اللي بيعرضها

خايف تقول في شغلك انك محتاج شغل اضافي

لاحسن صورتك تتهز و يقولوا عليك لا سمح الله بتحب الفلوس!

ده على أساس انهم مبيحبوش الفلوس يعني هههههههه

و الا بيشتغلوا محبة مثلا

خايف تتنطط في رحلة

او ترقص في فرح

لاحسن هيبتك تروح

و النبي محيجرى حاجة انت بس اللي شايف كده

و اللي يبصلك بصة متعجبكش

عادي

بص له انت كمان بصة متعجبوش

هههههههههه اول مرة عملت كده في نفسي كان و انا لسه ما تمتش 12 سنة

و كنت باضحك على الناس اني ماشية في

14

انسة بقى و كده

:)

و بسبب ده ضيعت فرصة اني التحق في النادي بكورس لتعليم الباليه

و كان حلمي الكبير اوي اني اكون باليرينا

كانوا مشترطين السن ميعديش 12

خفت ليقولوا كدابة

ههههههههههههه طب و ايه يعني

يعني لو مش كدابةحاخد نيشان يعني؟!

و حيهتفوا تعيش عبير اللي مش كدابة

اللي بيقيموا الناس و يحاكموهم

همة أضعف الناس وأقلهم حكمة

و مش دول اللي كلامهم يتعمل له حساب اساسا

خليهم يقولوا

و اسمع و قول كماااااان

جاي لك من طنطا يا ست

:)

[عبير يونس]

كل يرى بعين نفسه

أي موقف احنا اللي بنديله المعنى و على المعنى ده تتحرك المشاعر

مش لازم نحط معنى لكل موقف

في اشياء كتير لازم نسيبها تعدي بدون تحليل

لان مش كل شيء داخل في حيز اهتمامتنا

تحليل كل شيء استنزاف و اهدار للطاقة

مفيش خير خالص او شر خالص

و كل شيء له جانبين

واحنا اللي بنختار ننظر لأي الجانبين

الحل ... برأيي ... هو

أولا

" تقبل" كل الأشياء

و "التقبل هو أدنى مراحل " القبول" و " الحب"

و ثانيا

احترام كل الاراء و عدم مهاجمة أو مقاومة الرأي المخالف

لو مش قادرين نحترم

على الأقل ناخدها من باب أن المقاومة تتناسب طرديا مع العنف

و أن كل ما نقاومه يستمر

[عبير يونس]

لا قيمة للتصديق

إذا كان فيما يصدقه الجميع!

[عبير يونس]

في ناس معندهاش مانع يروحوا في داهية

بس عشان يثبتوا أنهم صح

و تلاقيه يقول لك بفخر

أنا قولتلك اني رايح في داهية

عرفت ان كان عندي حق

الناس دي ابتسم لهم من بعيد

و اجري بالمشوار من أي فرصة تجمعك بيهم

و ابقى ادعيلهم بصلاح الحال

و انت بتجري :)

[عبير يونس]

البساطة لا تتفق و سوء النية أو سوء الظن

البساطة توأم اليقين

[عبير يونس]

كل حد في الدنيا عنده حاجات بالنسبة له مقدسة و بالنسبة للآخرين هبل وجنان

مينفعش اننا نستخف بيها لأننا شايفينها كده

كل حد من حقه حدوده تُحترم مهما كنا شايفينها غريبة

It is that simple :)

[عبير يونس]

نحن بالطبع لا نملك أرواحنا

و أيضا لا نملك أجسادنا

و حتى أفكارنا ليست حكرا علينا

بل تنتقل عبر بلايين العقول

حتى قلوبنا بين يدي مقلب القلوب يقلبها حيث يشاء

فقط "مشاعرنا " هي ما نمتلكه حقا

و هي و هي فقط

ما بوسعنا تغييره

و بتغييرها يتغير كل ما حولنا

غيّر مشاعرك

ارسم حياتك

[عبير يونس]

غريب العقل البشري

لو كلمناه بشكل مباشر

يشك

It's too good to be true

يعند

يمل

يتجاهل

يهرب

و لو كلمناه بشكل غير مباشر

يقول لك انت حتحور يا اسطى

انت فاكرني مبفهمش؟!

أنت بتهين ذكائي

It's too bad to continue

يعند

يمل

يتجاهل

يهرب

عشان كده الصانع الأعظم

أعطانا سر "الوسطية "!

نقطة التوازن لا توجد إلا في المنتصف

و لحظة القرار الحاسم لا توجد إلا في المنتصف

حيث يستوي الجهد المبذول في العودة

مع الجهد المبذول للوصول

و لكن....

هل تستوي النتائج؟