احم..عندكم مكان لحد جديد بس قديم ؟ ؟

[SnipeR]

اولا اسمحولي اقولكم انا عضو جديد بس موش عضو جديد

قصدي اني اول مره اسجل في المحاورات (ونادرا مابسجل اساسا في منتديات عربية) الا اني كنت متابع كويس جدا لدرجه اني حاسس اني عارف كل واحد فيكم قبل كده..

سافرت فتره طويلة ويمكن نمط الحياه العملي زياده عن اللزوم بيخلي الانسان اشبه بالماكينه لدرجه انو احيانا بيحن لدفء العيله الا موش بيلاقيه الا في مصر

يمكن لان المستوي الفكري اللي الواحد بيصادفه في كتير من المنتديات العربية التانية بيخلي الانسان يفكر ميت مره قبل مايسجل او يكتب حرف واحد الي جانب ان الواحد بيشعر احيانا ان المنتدي عباره عن جروب واحد كبير وهو دوره مجرد دخيل عليهم (احتمال بردو ربنا يستر)

انا حاليا رجعت مصر تاني..حاسس ان طبقة الجليد اللي حواليا ابتت تدوب تاني

انا سنايبر(الاسم ده ملازمني من طفولتي لاني كنت بطل ناشئين في الرمايه في البلد اللي انا اتولدت واتربيت فيها )

عمري 29 سنه - ماجستير تحليل انظمة - متخصص في تأمين شبكات الاتصالات والمعلومات ..

متابع المحاورات من زمااااااااان (من ايام حزب الوفد) وحاسس بالفه كبيره ناحيتك..كتير منكم قابلتهم في منتديات او اماكن تانيه بيكتبو ..بس بالتأكيد ده البيت الام او ال home land زي مابيقولو ..(كل مامصر كانت توحشني كنت ادخل المحاورات ساعه واخرج)

حشيش..انسان تحفة بمعني الكلمة..مبروك الجواز ;) (وصفة الفول المدشوش دي لو سافرت تاني اكيد هعملها ..تفتكر هلاقي فول مدشوش في بلدان الجليد اللي الواحد كان عايش فيها؟)

كليو..موش عارف ليه بحس انك فنانه تشكيليه (يمكن تمثال كليوباترا عامل ايفيكت) .. علي فكره كان نفسي اقولك اللي يزور تركيا ميروحش اسطنبول ولا انقره ..ياروح بورصه علي البسفور او يياخد الباص وينزل للجنوب في رحله هتاخد من يومين لتلاته ناحيه انطالية ماشي علي ساحل المتوسط ..هتشوفي اللي عمرك ماشوفتيه ولاتتخيلي انو موجود بالروعه دي ..هي دي بقي تركيا الحقيقية

لايت هاوس..اسمك موش غريب بالمره..ومستمتع جدا بحب حضرتك للغه العربية اللي بيشوهوها يوم بعد يوم ..

ابن مصر..احتراماتي ومحبتي وتحياتي ل (امتثال )

انت ومستر حشيش اضفتم للمحاورات عضوين معروفين جدا رغم انهم لااعضاء ولابيكتبو ..مسز امتثال ومستر ارنوب حسين :)

مستر عادل ابو زيد..اعتقد انك تستحق تهنئة كبيره جدا..موش عشان عرفت تعمل بيت زي ده بس..لا ..عشان عرفت تحافظ علي المستوي اللي انت رسمته ليه..

دكتور حافظ egypt5 :شفت مشروع حضرتك تقريبا في عمرو خالد..مشروع رائع بس تفتكر ممكن يتنفذ في مصر؟(معنديش فكره حضرتك لسه موجود هنا ولا لا بس اتمني تقري كلامي)

مستر هشام عبد الوهاب.. :)

دكتور شانا..في زمن الانترنت فيه مليئة بالمرضي النفسيين اللي اكيد قابلتي منهم كفايتك ..شيء يسعد اني اشوف انسان صادق مع الذات وتلقائي وبيحاول يكون ايجابي قدر المستطاع زيك..دايما كنت لما اقري اسمك هنا او ف المصري(الله يرحمه بقي) كنت افتكر مصر وابتسم

سي السيد..هاندي كرافت..شلة السعودية كلها (ازيكم بعد اكلة الفسيخ :angry: ) فكرتوني بالكام سنه اللي قضيتهم في مقبره العزاب مع اهلي وبالسنه الي قضيتها لوحدي هناك..تخيل انت بقي واحد تلات اربع ذكريات طفولته في الرياض ..مأساه يااخي

مستر كفاية..انضميت لطوابير المتسألين عن السنجاري fsh::

اوعدك هخطف رجلي قريب خالص لاسكندريه اشوف ايه القصه دي .. عندي في البيت بيقولو شعر ف اسكندرية علي يد المحجوب ..تقريبا بقو مقيمين هناك علطول..

G.G .. (حضرتك جيجي اللي بتكتب في جروب دردشة؟)

ميتالكا..حاسس اني عارفك من زمان قوي يااخي موش عارف ليه ..

سير لانسلوت .. ايه اخبار الملك ارثر s-:

فيروز.. الطفل اللي في صورتك الرمزيه كان دايما بيفكرني باخويا الصغير ..

كل حد في المحجاورات (اعتذر عن اي حد سقط مني سهوا بجل كلكم روعه) ليه فعلا عندي ذكري ..طيف.. لما بيعدي في بالي كنت بفتكر مصر وببتسم..

شكرا انكم كنتم موجودين في غربتي ..

عقلي الباطن: موش عارف ليه ان محدش اساسا هيرد علي وشكلي هيبقي بااااااااااااااااايييييييييخ ..ربنا يستر مبحبش الاحراج خالص..

تم تعديل 23 نوفمبر 2004 بواسطة SnipeR

[kfaya]

اهلا بيك يا قناص .... B)

طبعا ما نرحبش بيك ... ده انت يا ابنى صاحب بيت وحافظ السكان نفر ...نفر .. :)

على فكرة الناس اللى بتكون متابعة من بعيد لبعيد لمدة طويلة لما تييجى تسجل .. بتعمر .. غير اللى يخش الصبح ويختفى تانى يوم ... :angry:

انشاء الله يتكتبلك عيش معانا.. :) ..... تفيدنا و ننستفيد منك ;)

[سقراط المصري]

اهلاً وسهلاً بك ، شرفت المحاورات ونورتها.

مداخلتك حسيت فيها بصدق وحنان كبير.

مشكلتي اني مبعرفش اكتب عبارات تهنئه او مجاملات حلوفه يييييييييه اقصد مألوفه.

عامه انت اكيد عارف اني برحب بك.

وتعالى هنا ، انت لابد في الدره بقالك اكتر من شنتين (اقصد سنتين معلش طقم السنان والزمن بهدلوا الواحد ياجدع). هو انت بقى كنت الزائر اللي بيظهر في الموجوديين . وحرمنا ليه من مشاركاتك يا عم.

اهلا وسهلاً ومرحباً. :angry: ;)

كبايه ينسون يا ابراهيم للأستاذ.

تحياتي

سقراط

تم تعديل 23 نوفمبر 2004 بواسطة سقراط المصري

[se_ Elsyed]

[اهلا وسهلاً ومرحباً. ;)  :)

كبايه ينسون يا ابراهيم للأستاذ.

وهات طاولة مع اليانسون يا إبراهيم والحساب عندي ( عالنوتة كالمعتاد )

ويلكم يا مستر سنايب ...

أنا حاسس إن المنتدى متراقب وإن فيه ناس عامله لنا ملفات وأخرتنا هاتكون هنا :angry: ..

بس علي النعمة لو إتسجنت في مره وسيبتوني في العمبوكة من غير ماحد يشد لي محامي هاعترف على كل التنظيم وفي الحالة دي هابقى شاهد أمير قصدي ملك وهاطلع انا وأزوقكوا جوه ... آه ما هو يا نعيش سوا يانموت سوا ...

[G.G]

صباح الخير استاذ Sniper,,

حقيقي نورت هنا, :angry:

أهنئك على رقم عضويتك "3000" ..رقم Unique ..هو حضرتك كنت موصي عليه؟ eey::

لأ انا مش جيجي بتاعت دردشة ,,أنا لا أكتب في أي منتديات,,بس هذا المنتدى كان له وقع خاص جدا في قلبي ,,رغم أني أول مرة دخلته بالصدفة لم أألف الجو أوي !شعرت أن أنا دخلت على ناس قاعدين وكأن الناس بتقول لبعض "سا الخيييييييييييييير" و "يا مرحب" و حاجات كده. ax: .

وجدتني أشعر بكل فرد فيه ,,و أرسم صورة له في مخيلتي ,,ووجدتني أتعلم منه كما لم أتعلم في الحياة العامة ,,و أزعل ساعات و أرجع أضحك بصوت عالي ,, حياة بأكملها حلوة ساعات و بايخة أوقات..

و أجمل حاجة كمان لو تكونت صداقات حقيقية ,,نوع مميز جدا من الصداقة لم ينشئ نتيجة مصالح أو تشابه ظروف,,

و لكن نشأ بسبب كلمات كتبتها يوما بصدق و عفوية ووصلت لقلب أخر في مكان ما بنفس الصدق..

قربت بينكم هذه الحروف على غير ميعاد ..,نوع راقي جدا من العلاقة الإنسانية..

أنا فعلا نفسي أحيي أصدقائي الذين التقيت بهم من المحاورات;) ,,و أحيي أصدقائي الذين لم ألتقي بهم بعد :) ..

و أحيك أنت لأنك يسرت لي فرصة التعبير عن امتناني لهذه المحاورات الجميلة.

[فــيــروز]

حشيش..

كليو..

لايت هاوس..

ابن مصر..

..مسز امتثال ومستر ارنوب حسين  ;)

مستر عادل ابو زيد..

دكتور حافظ egypt5

مستر هشام عبد الوهاب.. :angry:

دكتور شانا..

سي السيد..هاندي كرافت..شلة السعودية كلها

مستر كفاية..

G.G ..  (حضرتك جيجي اللي بتكتب في جروب دردشة؟)

ميتالكا..

سير لانسلوت ..

فيروز..

يا نهار ابيض المنتدى شكله متراقب

حتى امتثال و ارنوب حسين اساميهم فى الكشف

ممكن طيب طلب بايخ يا سنايبر؟ ممكن تكلمنا شويه على موضوع الرمايه ده لو مفيهاش توتر؟ طبعا مش هاقدر اقول لك اهلا وسهلا دى كان حقها اتقالت من زمان .. اهلا وسهلا

[Cleo]

Sniper العزيز...

أهلا بك فى المحاورات وشكرا ليك إنك أخيرا قررت تسعدنا بمشاركتك الفعلية (أنا متأكدة إنك هاتسعدنا كلنا)...

بس أنا لى عندك عتاب صغير....

يعنى جاى تقوللى على تركيا دلوقتى........!!!!!!! :angry:

:)

أهديك أرق تحياتى ;)

[se_ Elsyed]

ممكن تكلمنا شويه على موضوع الرمايه ده لو مفيهاش توتر؟

إخص عليكي يا فيروز .. طب ماحنا نعرف بعض من زمان .. وأنت تعلمي جيداً بإني احسن واحد في الرماية سواء بالنبلة اللي كنت باعملها من الخرطوم اللي بيعلقوه في أيد العيانين .. او بالأستك بتاع الفلوس وقشر البرتقان - دي الرماية الشتوي - .. ومع ذلك عمرك ما طلبت مني اعلمك لا رماية ولا تزقيل طوب حتى ... :angry:

صحيح زي القرع يمد لبره ..

عزيزي سنوبر .. تعالي نحط إيدنا في أيد بعض وندي دروس خصوصية في الرماية .. ونوعد اخواتنا في المنتدى اللي هاياخدوا دروس إنهم يحققوا ميدالية أوليمبية زي بتاعت الشيخ مكتوم بن حشر آل مكتوم ;)

تسعيرة دروس الرماية ( ومافيش فصال ) :

* رماية بالبندقية في الموالد : 50 ج للحصة .

* رماية بالنبلة : 20 ج /الحصة

* رماية بالأستك مع قشر البرتقان او ورق الكراريس المقطع فتافيت : 5 ج .

* رمي الجتة : 2 ج ( بس دي ممكن تتعلمها ببلاش من لعيبة الزمالك في ماتشهتم )

[Handicraft]

صباح الخير يا Sniper واهلا وسهلا بيك فى بيتك وبين اخواتك

يلا اشحن قلمك قصدى الكيبورد طبعا وامتعنا بكتاباتك.

هاندى

[بنت شعنونة]

حمدالله على سلامة الوصول يافندم

لارض الوطن اولا..

ولآرض المحاورات ثانيا ;)

ب انبسط اوووووي لما اشوف حد متابعنا من زمان وعارفنا

ب احس اننا مشهوووووورييييييييييييييييييييين :) "وش منى زكي واحمدحلمي " fsh::

اكرمك الله وشكرا بجد على كلام حضرتك

" امال ياربي انا ما بفرحش بنفسي ليه كدا!!"

( عقلي الباطن بيتسائل هوا بيكلمني على اني ولد ليييييييييييييييييه!!!!!!!!!!!!!!!!!!!!!!!!!!" :angry:

[Katamando]

عمري 29 سنه - ماجستير تحليل انظمة - متخصص في تأمين شبكات الاتصالات والمعلومات ..

متابع المحاورات من زمااااااااان (من ايام حزب الوفد)

فكرتوني بالكام سنه اللي قضيتهم في مقبره العزاب مع اهلي وبالسنه الي قضيتها لوحدي هناك..تخيل انت بقي واحد تلات اربع ذكريات طفولته في الرياض ..مأساه يااخي

أهلا بيك

الجمل التلاتة دول دخلوك قلبي رشق

أحب أقولك ان مقبرة الغزاة (العزاب) ليها عندي ذكريات 23 سنة (حاجة تغم) وإنك كمان ابن عمنا في الكار واخونا في المحاورات من أيام حزب الوفد

[فــيــروز]

إخص عليكي يا فيروز .. طب ماحنا نعرف بعض من زمان .. وأنت تعلمي جيداً بغني احسن واحد في الرماية سواء بالنبلة اللي كنت باعملها من الخرطوم اللي بيعلقوه في أيد العيانين .. او بالأستك بتاع الفلوس وقشر البرتقان - دي الرماية الشتوي - .. ومع ذلك عمرك ما طلبت مني اعلمك لا رماية ولا تزقيل طوب حتى  ... rs:

)

لا الحقيقه ماكانش عندى معلومات يا س.س. انك من هواة الرمايه على العموم ملحوقه ..

صحيح زي القرع يمد لبره ..

bxg::

لو سمحت يا اخ سنايبر سيبك من س.س. :) ده اول ما يسمع طلقة بندقيه هتلاقيه اول واحد جرى .. :o عشان يجيب الطلقه طبعا مش عشان اى حاجه تانيه mc:

[disappointed]

على فكرة الناس اللى بتكون متابعة من بعيد لبعيد لمدة طويلة لما تييجى تسجل .. بتعمر .. غير اللى يخش الصبح ويختفى تانى يوم rs:

ملحوظة فى محلّها بالفعل

و أهلا بالقنّاص معانا :) (أعجبتنى التلقائيّة بشدّة فى كل ما كتبه )

[Lighthouse]

إحم إحم

اشمعني انت يعني mc:

مرحبا بأخونا الجدد القديم

نورت المحاورات :o

واضح طبعا انك مراقبنا من زمان rs:

وشكلنا كده ح نتعكش كلنا في عملية واحدة :)

ياللا خير

مرحبا بك مرة اخرى ونرجو ان تكون اقامتك بيننا دائمة وتفيد وتستفيد :) bxg::

ورينا الهمة بقى :)

[c'est la vie]

يسعدنى جداً جداً أن أبدأ هذه الخطوه ..واتخلي عن مقعدى مع الزوارrs:

فأنا أيضاً متابعه للمنتدى من فترة طويله وسبق وان اشتركت بالفعل من فترة ليست بالقصيرة :) لكن حسيت بإختلاف الوزن النسبي بين عقلي وبين القوى الفكريه في ذلك الوقت ..ولحد دلوقتى طبعاً bxg:: مماجعلنى اشعر بإحباطات متتاليه ..لكن اهو اتقدمت شويه ax: واتمنى ان اجد مكان انا الاخرى -~على صفحات المحاورات-~..

وأَأسف(صح كدة)لو كنت دخلت يمين في موضوع الاخ سنايبر فقط أعتقدت انه في نفس المحتوى .. mc:

وشكراً :o

تم تعديل 23 نوفمبر 2004 بواسطة c'est la vie

[عصام]

وأَأسف(صح كدة)لو كنت دخلت يمين في موضوع الاخ سنايبر فقط أعتقدت انه في نفس المحتوى .. :)

يمين وللا شمال ..

أنا ما يفرقش معايا الكلام ده .. rs:

أنا مشرف مفترى .. ما بارحمش :)

تمشى جنب الحيييييط .. يا سلام! .. تبقى حبيبى! ...

غير كده ..! .. أعثـــٌــرَك .. تنزل أعضاء ثــُـغيرين ... bxg::

مرحبا بكم .. أفادكم الله بنا وأفادنا بكم ..

mc: :o :)

[Cleo]

يسعدنى جداً جداً أن أبدأ هذه الخطوه ..واتخلي عن مقعدى مع الزوارmc:

فأنا أيضاً متابعه للمنتدى من فترة طويله وسبق وان اشتركت بالفعل من فترة ليست بالقصيرة :o لكن حسيت بإختلاف الوزن النسبي بين عقلي وبين القوى الفكريه في ذلك الوقت ..ولحد دلوقتى طبعاً :) مماجعلنى اشعر بإحباطات متتاليه  ..لكن اهو اتقدمت شويه ax:  واتمنى ان اجد مكان انا الاخرى -~على صفحات المحاورات-~..

:)

مش عارفة ليه المداخلة دى فكرتنى بواحدة دخلت المكان ده من سنتين تقريبا... و كان عندها نفسسسسسسسسسس الإحساس... و كان عمنا محبط و عمنا متسائل عملولها عقدة فى حياتها و ملوها إحساس بالدونية و الجهل... لحد ما فى الأخر أخدت الخطوة الجريئة و اقتحمت عرين السبااااااااع bxg::

مين يا كليو؟؟؟؟ ميييييييين؟؟؟؟؟؟ rs:

:)

أهلا بيكى يا سى لا فى و نورتى المكان إنتى و سنايبر و إن شاء الله هاتتفوقوا علينا كلنا بس لما يحصل ما تبخلوش علينا بعلمكم و يبقى أول مداخلة ببلاش بعد كدة بفلوس و الحجز قبلها ب3 سنين ;)

[SnipeR]

اهلا بيك يا قناص ....  :)

طبعا ما نرحبش بيك ... ده انت يا ابنى صاحب بيت وحافظ السكان نفر ...نفر .. bxg::

على فكرة الناس اللى بتكون متابعة من بعيد لبعيد لمدة طويلة لما تييجى تسجل .. بتعمر .. غير اللى يخش الصبح ويختفى تانى يوم ...  rs: 

انشاء الله يتكتبلك عيش معانا.. mc:  ..... تفيدنا و ننستفيد منك  :)

مستر كفايه ..شكرا جزيلا علي ترحيبك وبجد اتمني اكون عند حسن ظنك :o

[SnipeR]

اهلاً وسهلاً بك ، شرفت المحاورات ونورتها.

مداخلتك حسيت فيها بصدق وحنان كبير.

مشكلتي اني مبعرفش اكتب عبارات تهنئه او مجاملات حلوفه يييييييييه اقصد مألوفه.

عامه انت اكيد عارف اني برحب بك.

وتعالى هنا ، انت لابد في الدره بقالك اكتر من شنتين (اقصد سنتين معلش طقم السنان والزمن بهدلوا الواحد ياجدع). هو انت بقى كنت الزائر اللي بيظهر في الموجوديين . وحرمنا ليه من مشاركاتك يا عم.

اهلا وسهلاً ومرحباً. :)  bxg::

كبايه ينسون يا ابراهيم للأستاذ.

تحياتي

سقراط

ههههههههههههه........حلوه لابد في الدره دي..حسستني اني كنت ناوي اخد بالتار واضطريت اطلع عشان الدنيا برد :o

اشكرك علي ترحيبك...انا ياسيدي الزائر اللي كان بيطلع بين الموجودين..

في الاغلب بتلاقي في المحاورات الواحد اول مره زياره وبعدين ينتقل لخانه التسجيل علطول..صحيح شروط المشاركه بقت 50 الف بند بس اكيد اغلب اللي سجلو كانو متبتين يااما مضو علي بياض(انا قريتها بند بند من قبيل الغتاته mc: )

اعتقد يبقي انا للي كنت بدخل لوحدي زائر..منتا متابع اهوه rs:

[SnipeR]

[اهلا وسهلاً ومرحباً. :)  bxg::

كبايه ينسون يا ابراهيم للأستاذ.

وهات طاولة مع اليانسون يا إبراهيم والحساب عندي ( عالنوتة كالمعتاد )

ويلكم يا مستر سنايب ...

أنا حاسس إن المنتدى متراقب وإن فيه ناس عامله لنا ملفات وأخرتنا هاتكون هنا rs: ..

بس علي النعمة لو إتسجنت في مره وسيبتوني في العمبوكة من غير ماحد يشد لي محامي هاعترف على كل التنظيم وفي الحالة دي هابقى شاهد أمير قصدي ملك وهاطلع انا وأزوقكوا جوه ... آه ما هو يا نعيش سوا يانموت سوا ...

الينسون وصل من مستر سقراط وموش عاوز اقولك الينسون ده كان واحشني قد ايه..

بس الطاولة فيها مشكله عويصة(من غير ضحك من فضلك) ..

عندك وقت تعلمني الطاولة دي لاني بشوفها وبس؟(في تركيا الطاولة بتنزل معاها كوبايه صغننه عشان يترمي بيها الزهر عشان محدش يقرص عليه ولو لعبت من غير الكبايه دي العشرة تروح منك )

يااما نوسعها ونعلب دومينو امريكاني..

ثم يافندم تليفون صغنن واوعدك تلاقي نص محامين البلد عندك..اخوك الصغير ثورجي قديم بردو ميغركش المنظر me0: