يوميات مشرف فى المنتدى ‍‍‍!!!

[حشيش]

والله ياجماعة مش عارف أشكركم إزاى على مشاعركم الطيبة تجاهى.....لقد فاضت دموعى وأصبت بنوبة من القشعريرة سرت بعنف فى بدنى أعقبها إغماء وتشنجات لكن بقيت كويس....شكراً لكم rs: ....والأن إلى التكملة

عادل أبو زيد مخاطباً هشام: متنساش تجيب الديجيتال كاميرا العهدة بتاعة المحاورات اللى بنصور بيها الأعضاء الجداد وش وقفا وهما بيسجلوا عندنا هنا أول مرة يوم الزيارة علشان تاخدولى كام صورة مع العيلة المالكة hg)::

هشام: أمرك يابوس....نتكلم دلوقتى عن التنظيم ... أقترح إننا كلنا نلبس بدل اسموكن سودا وبابيون أحمر

سى السيد: بس شكلنا كده حنبقى زى السفرجية ياكنج .... أنا بقول يعنى بلاش نلتزم كلنا بنفس اللبس ... يعنى اللى عايز ييجى ببدلة ييجى... اللى عايز ييجى بجينز وتى شيرت ييجى... وكده يعنى

محمد أبو زيد: فكرة حلوة يابو السيد التى شيرت دى....إحنا نلبس كلنا تى شيرت واحد عليه صورة عادل أبو زيد كرمز للمحاورات وبنطلونات شورت زى بتاعة الكشافة وجزم اديدز وشرابات طويلة لغاية الركبة ونشغل فى الخلفية أغنية شادية دى اللى بتقول (غاب القمر يابن عمى يلا روحنى...دى النسمة أخر الليل بتفوت وتجرحنى) علشان الناس يعنى تعرف إن أنا وعادل ولاد عم :blink:

داروين: ياعم محمد شورتات إيه بس وغاب القمر إيه .... أهم حاجة نلبس كلنا نضارات سودا ونحط سماعات فى ودانا ونقعد نتلفت حوالينا وورانا ونبص لبعض كل شوية نظرات قبيحة ومريبة فى نفس الوقت... زى ما الحرس الخصوصى بتوع الريس بيعملوا B) ...ولازم نبقى على إتصال مع بعض باللاسلكى أثناء الزيارة.....مهم جداً اللاسلكى ده علشان ننبه بعض لو عضو ابن هرما من إياهم حاول التسلل أثناء الزيارة

رجب: لازم نحبس الأعضاء أثناء الزيارة إلا اللى إحنا متأكدين من ولائهم للريس ... المشكلة إننا لو عملنا كده مش حيتبقى غير تلاته أربعة ومش حنعرف نجيب أعضاء نوقفهم قدام أبواب المنتدى علشان يهتفوا ويرحبوا بالموكب

إبن مصر: مش مشكلة يادكترة ... نجيب كومبرس على إنهم الأعضاء... كمان حيلزمنا حتتين سلاح.....لازم أوصل البلد عندنا أشترى كام فردة واجيب أنفار rs:

لانس: واجب برده نشترى شوية بالونات وبمب والعاب هوا .... نسينا كمان نعمل باب جديد فى المنتدى نسميه (باب المستقبل) علشان جمال مبارك يفتتحه.....ولازم كمان نحط شريط سوليفان على كل باب من أبواب المنتدى علشان مبارك وسوزان وجمال والشاذلى وسفوت يقصوهم....لازم ياجماعة كل واحد يقص له شريط على الأقل....ولو إتبقت شرايط بعد كده أقصهم أنا clwn:

تعالت أصوات المشرفين إحتجاجاً على رغبة لانس بأن يقص ما تبقى من شرائط

سى السيد: وليه مقصهمش أنا

إبن مصر: محدش حيقص غيرى B)

سى السيد: طب يمين على يمينك محد حيقص إلا أنا....ثم تنتابه نوبة من البكاء الشديد وتدور الدنيا به وتظهر أمام عينيه دوامات كأنه يتذكر أيام الطفولة والماضى السحيق....يتمدد سى السيد على الأرض ويتجمع المشرفين من حوله...يقوم الدكتور رجب بعمل تدليك سريع للقلب ويقوم لانس بإعطائه قبلة الحياة حتى أفاق وبدأ يروى لهم قصته مع الإشراف sdm:..... يقول بكلمات مرتعشة زمان وانا عمرى 7 سنين كنت بروح مع أبويا الدكان كل يوم جمعة بعد الصلاة ...كان عندنا محل أقمشة فى الدرب الأحمر ..... كانت متعتى إنى أشوف العامل اللى فى المحل وهوه بيقص القماش للزباين....كان عنده مقص كبير قوى طوله يجى نص متر ... مره سهيته وخدت المقص وخبيته فى جيب القميص بتاعى لكن أبويا شافه ونزل فيا ضرب بالإقلام والشلاليت وإنضم له كل العمال فى الدكان لحد ما سخسخت.....من ساعتها وأنا أى حاجة بشوفها ببقى عايز أقص منها cr((:

إبن مصر: أمال لو حكيت لكم حكايتى حتقول إيه

عادل أبو زيد غاضباً: خلاص خلصنا....ندخل فى البند اللى بعده :angry:

يتبع

[Lighthouse]

hg):: B) :angry:

يخرب عقلك ياحشيش

يابني حرام عليك قلبي وقف من الضحك

بجد بقى انت مش معقول

المفروض يتعمل لك باب لوحده بصراحة rs: :blink:

[se_ Elsyed]

لأ لأ لأ

أنا كده الشك بدا يتسرسب إلى نفسويتي والموضوع بقى في إن واخواتها ، أرنوب حسين زي ما يكون معانا في باب الإشراف وعارف كل كبيرة وصغيرة وكمان قدر يعرف الخطوط العريضة لعملية الإشراف .. وبهذا الخصوص فقد عقدت إجتماع سريع حضره بعض السادة مشرفي الأبواب والشباك .. وقولنا هو في أربع إحتمالات لا خامس لهم في الموضوع ده لكي نقطع الشطك باليقين :

1- إما أن يكون حشيش عمل هاكينج على سيرفر المحاورات وقدر يدخل على باب المشرفين ويشوف أسرارنا ... وده إحتمال مستبعد جداً لأن حشيش أخره مايكروسوفت وورد على طراطيش إكسل .

2- الإحتمال الثاني إن يكون فيه بيننا داسوس وهو اللي بيبيع أخبارنا للاعداء .. وكلنا قولنا هو ده الإحتمال الأكيد .. وفضلنا نفرز في السادة المشرفين لحد ما أستقرينا على واحد بس ..ومش هانقول إسمه دلوقت إلا لما نظبطة متلبس ... وهو بصراحة " إسو " وذلك لخمس أسباب لا سادس لهم :

1- هو المشرف الوحيد اللي إخضر وإزرق في زمن قياسي لا يتعدى أيام قال إيه بحجة الكفاءة !!! ومش عارف يعني إحنا كنا كفتجية ولا إيه ؟!!!!.

2- ظهور علامات الثراء المفاجيء عليه وبقى يلعب بالفلوس لعب .. وفي أحد الزملاء المشرفين - برضوا للحفاظ على سرية مصادر معلوماتنا مش عايزين نقول إنه الأخ إبن مصر الشهير بأبو إمتثال - شاهده في يوم 15 أيلول من العام الجاري وهو بيشتري 2 كيلو موز بنقطة من عند الفكهاني ، كمان في دليل قوي ومعظم الاعضاء شاهدين عليه وهو الحركة الجريئة اللي عملها في الجراند كافية وصرف يومها أكثر من 3 جنية وربع ده غير التبس ...

لذا يا سادة ممكن أقول إن إسو باع أرضه .. قصدي بلده بل وحقق أرباح كمان ...

بس ما أقدرش أقول كده دلوقت إلا أما أكمل الملف عشان ما نرميش الناس بالباطل .... وبصراحة الرأي الأخير للبيج بوس هو اللي في إيده الحل والربط .

[Set_Amina]

حشيش .. إنت احلى شجرة خشخاش شوفتها في حياتي .. هات بوسه بقى .. وده عشان قدرت ترجع لنا ست أمينة بعد غياب 14 سنة عن المنتدى ...

أمونة .. كل سنة وإنت طيبة بمناسبة عيد الفطر بعد الزحمة وبهعد ما الكحك خلص .

شكرا يابو السيد على ترحيبك برجوعي وكل سنة وانت وعمر واخوه بالف خير

بس تعديل مهم اسمها شجيرة ومش شجرة

ماهي لسه في ريعان نموها يعني ومش بتكبر rs:

[عصام]

الإحتمال الثاني إن يكون فيه بيننا داسوس وهو اللي بيبيع أخبارنا للاعداء .. وكلنا قولنا هو ده الإحتمال الأكيد .. وفضلنا نفرز في السادة المشرفين لحد ما أستقرينا على واحد بس ..ومش هانقول إسمه دلوقت إلا لما نظبطة متلبس ... وهو بصراحة " إسو "

يا ترى مين؟ . .... مين؟ mfb:

طيب ما تسهلها شوية يابو السيد ما تبقاش رخم!!

هو المشرف الوحيد اللي إخضر وإزرق في زمن قياسي لا يتعدى أيام قال إيه بحجة الكفاءة !!! ومش عارف يعني إحنا كنا كفتجية ولا إيه ؟!!!!.

wst:: wst::

كمان في دليل قوي ومعظم الاعضاء شاهدين عليه وهو الحركة الجريئة اللي عملها في الجراند كافية وصرف يومها أكثر من 3 جنية وربع ده غير التبس .

fr1:: والله العظيم بريء .. أنا قالوا لى إن البنات سابوا جنيه ونص من الحساب قبل ما يمشوا .. أنا دفعت جنيه ونص بس cr((:

بس ما أقدرش أقول كده دلوقت إلا أما أكمل الملف عشان ما نرميش الناس بالباطل .... وبصراحة الرأي الأخير للبيج بوس هو اللي في إيده الحل والربط .

:D لا هوا انت ماعرفتش ؟ :P

[se_ Elsyed]

بعد إذن حشيش انا هاكمل مشهد هنا أنا حضرته بنفسي أثناء ترتيبات زيارة السيد الرئيس وصحبته الحلوه :

عادل أبوزيد : طيب .. دعونا يا سادة ننتقل للبند التالي والخاص بالمأكولات والمشروبات التي ينبغي ان نوفرها للسيد الرئيس واللفيف الذي سيأتي معه ، ممكن أسمع أرائكم ؟

سي السيد : بــــــــــــــــــــس أنا جت لي فكرة حهنمية ، منها نعمل حاجة تشرفنا قدام الناس دي ومنها نوفر .

إبن مصر : وهو ممسكاً بسبحته التي إشتراها مؤخراً من مكه : قول يا أخ س س إحنا سامعين .

س س : أنا انزل السوق أشترى كرومباية على 2 ك بتنجان أبيض وحزمة ملوخية خضرا و3 او قول 4 ك لحمة ضاني وأخلي مراتي تعمل لنا حلتين محشي وآذان ملوخية وناكل كلنا ونهيص والريس برضوا ياكل ويهيص ... والله الأكلة دي أنا فكرت فيها وتوصلت إليها إستيحاءً من شكل كمال الشاذلي .

هشام عبد الوهاب : ممكن يا اخ س س تطلع بره شويه وهانندهلك لما نخلص .

س س : حاضر .. بس ليه يا كنج ؟ .

عادل أبوزيد : يا اخ سيد بنقولك ريس ووزرا ومرات الريس وولاد الريس ... تقولنا محشي ، يا اخي عيب كده .. ده كان إستهلال لابد منه .. هـــــا يا سادة انا عايز مشاركين لا متفرجين .

إبن مصر : بس وجدتها ... إحنا نعمل علب وجبات وكل وجبة فيها سندوتشن جبنة رومي وحتت جاتوة .

د / رجب : إيه نظام الأفراح البلدي ده ؟ عايزين أفكار محترمة يا أخوانا .

مدام سلوى : انا بأقترح المنيو الآتية : المين كورس يبقى بيكاتا بالشامبينيون مع كريب جورجيت وتشكين آلاموند والحلو يبقى باقيا بالمسطردة .

شريف عبد الوهاب : يا مدام سلوى الناس اللي جايه دول مصريين ولازم نعمل لهم حاجة يفهموها عشان ياكلوها ... خلص الكلام

محمد أبو زيد : عادل عادل .. ممكن أقول رأيي يابن عمي ؟

عادل : أيوه وماله من حقك بغض النظر عن كونك إبن عمي .

محمد أبو زيد : زي مانتو عارفين أنا عندي مزرعة في الكيلو 36 وانا مربي هناك كام دكر بط على فرختين عتاقي ، فأنا بأقترح إننا ندبح البط ده جنب الفراخ مع شوية برتقان بصرة من بتوع المزرعة ونمشي الليلة .

داروين : والله شكلكوا هاتكسفونا مع المحشي والبط والكلام ده والريس هايجيب دراف المحاورات بسببكم ، يا جماعة الناس اللي جايه فيهم ناس كبيرة في السن يعني بالتأكيد عندهم السكر والضغط والكوليسترول والكلام ده .. عايزين حاجات خفيفة وصحية وعلى رأي المثل " صحي ومفيد "

هشام عبد الوهاب : شكراً يا سادة .. بعد ما أستمعنا إلى جميع الآراء بشكل ديمقراطي ديماجوجي .. احب أقول لكم إن انا وعادل أبو زيد إتفقنا من البداية إننا نتصل بمطعم مكسيم عشان يبعت لنا وجبات جاهزة وتبقى حاجة محترمة قدام الريس ...

س س : يحيا العدل هي دي الديمقراطية ... الله ينور عليك يا هشام بس عدم اللامؤخذه إنتوا كنتوا جايبنا ليه وسمعتوا أرئنا ليه ؟ .

هشام : ممكن تسكت ؟

س س : حاضر يا إتش .. حاضر ياخويا .. مكسيم مكسيم .. أهو برضوا أحسن من مطعم أخر ساعة اللي جنب الجامعة العمالية .

مدام سلوى : بس يا أستاذ هشام ماتنساش تزيد الوجبات عشان الاعضاء .

إسو : اعضاء مين يا مدام سلوى اللي هايكلوا من مكسيم ؟ يا ست الكل دول هانجيب لهم ساندوتشات فول وطعميه وحتتين طرشي وأقلب .. قال نأكلهم من مكسيم قال .. والله عال .. ناقص تقولي كمان ييجوا يسلموا على الريس ويتصوروا معاه .

هشام : ننتقل للبند اللي بعده ... المشروبات ... ولو سمحتوا اللي هاشاور عليه هو بس اللي يتكلم مش عايزين فضايح ... أيوه أتفضل يا اخ إسو مع إنك مش مسموحلك بالكلام إلا بعد ما تقضي 6 شهور إشراف شاق مع الشغل .. لكن زي بعضه إنطلاقاً من تعميق تجربة الديمقراطية وكنفحة من عطفي ونبذة من حبي وشلحة من حناني هاسيبك تتكلم ......بس إوعى تعُك .

إسو والدموع تفر من مقلتيه : ربنا يخليك لنا يا كينج ده أحنا من غيرك ولا حاجة وناقصنا كام مليون حاجة .

س س : هايشتغل بقى في الاغاني الحمضانة بتاعت شادية ومصر اليوم في عيد وهاينكش لنا القًصة بتاعته .. الشغل ده أنا عارفه .

هشام : مش انا قولت ماحدش يتكلم إلا اللي أشاور عليه .. قول يا إسو قول يا حبيبي .

إسو : إحنا نجيب قزازتين نبيذ احمر يا كينج وكل واحد ياخد له بؤ عشان يفتح نفسه وياكل بمزاج .

إبن مصر : خيبك الله !!!!!! خسئت وخسئت أفكارك ... خمر ؟.. منكر ؟ إنت عايز الناس تسكر وتقوم تدور الضرب في بعض .. وبعدين إحنا مستمحلينهم وهما فايقين لما نستحملهم وهما سكرانين ... بلاش كلام فارغ .. إتقى الله يا اخي .. ده أنا لسه راجع من العمره والـ 1500 ج اللي صرفتهم ما بردوش ... اعوذ بالله .. اعوذ بالله

إسو : إيه يا حاج إبن مصر منكر إيه وخمر إيه ؟ بالراحة علينا شوية .. انا قصدي عصير عنب وأنا اللي هاعصره بإيدي كمان .

هشام : خلاص خلاص .. انا قررت أساساً إننا نقدم لهم يانسون .

د /رجب : برافو عليك يا إتش .. أنا بصفتي إختصاصي أعشاب طبية .. بأشجع جداً الحاجات النيتشورال اللي زي دي .

س س : ممكن اتكلم بقى ولا أروح ؟ أنا معاك يا كينج في فكرة اليانسون والمهدئات دي .. ربنا يهدهم يارب .

تم تعديل 25 نوفمبر 2004 بواسطة se_ Elsyed

[Cleo]

س س ..... مش ممممممممممممممممكن.....!!!!!!!

[حشيش]

أبو السيد ياعسل wst:: wst::

Keep Going

إيه رأيك تكتب إنته حلقه وأنا حلقه....عالأقل أبقى محمى فى الحكومة بدل ما أنا عمال أخبط لوحدى

[حشيش]

عادل أبو زيد: الفاضلة فيروز أثارت نقطة مهمة وهى ركن المكتبة ... إزاى ماعندناش مكتبة فى المحاورات طول السنين اللى فاتت دى ... إنتم عارفين إن سوزان مبارك أول ما حتوصل حتسئل على أى مكتبة علشان تفتتحها ... لازم نعمل ركن للمكتبة بسرعة فى المحاورات يكون ملحق بيها بوفيه واستراحة ودورة ميه

شريف عبد الوهاب: المكان موجود... فيه مساحة فاضية فى باب الثقافة والعلم كنا عاملينها خرابة بنحبس فيها الأعضاء المشاغبين ... ممكن نجيب كام بولدوزر يساويها بالأرض ونبنى مكانها مكتبة ... بس المشكلة حنملى المكتبة كتب منين ... محتاجين تمويل...خلص الكلام

محمد أبو زيد: ولا تمويل ولا حاجة ... إحنا نستعير كتب من الأعضاء لحد ما الزيارة تنتهى ... فيه أعضاء كتير مثقفين هنا فى المحاورات عندكم كليو...سى فود...كفاية...لايت هاوس...فيروز... وعندك محبط ... ده لوحده موسوعة ... بيقرا كتير جداً ... ده حتى فى ناس بيقولوا إنه إتعمى من كتر القرايا وبيتعالج حالياً فى مستوصف عكاظ فى جدة ... بيحطولوا مرهم كل ساعتين فى عينيه ورابطينهم له بشاش... يعنى مش حيحتاج الكتب دلوقتى فى حاجة

سى السيد: ما عميش ولا حاجة ياعمى ... أنا رحت زورته فى المستوصف إمبارح وقربت من عينيه لمبة 400 وات سمعته بيقول أح أح وده معناه إنه شايف الضوء mfb:

محمد أبو زيد: مش شرط يكون شايف ... ممكن تكون سوخونية اللمبة حرقت له الشبكية فانته إفتكرته إنه شايف

لانس: يعنى إيه شبكية ياعمو؟! cr((:

محمد أبو زيد: دى أكلة اسكندرانى زى الصيادية كده بيعملوها لانجارى زى الجدع اللى اسمه كفاية ده ما كان بيقول ... إسئل عمك كاتامندو بيفهم فى السمك كويس

يفتح عادل أبو زيد علبة دواء الضغط ويتناول حبة بعصبية ثم يقول ممكن نركز شوية ياجماعة wst::

رجب: أنا عندى مجموعة كتب مش بطالة فى الأدب والشعر وكتب طبية ممكن أبعتها

إسو: هايل...بس محتاجين كتب أطفال...إنتوا عارفين شوزان...لازم يكون فيه كتب أطفال

داروين: ممكن حشيش يساعدنا فى الموضوع ده ... أنا حتصل بيه يبعت لنا شوية كتب من عنده :P

سى السيد: ما عندوش أى كتب غير ميكى ... أنا رحت استلف من عنده سوبرمان ملقتش

شريف عبد الوهاب: ليه ياجماعة منبعتش حد الجبل يروح للمطاريد يستلف منهم شوية كتب...فيه منهم ناس كتيرمثقفين وأكيد عندهم كتب محترمة....خلص الكلام

هشام: حد الله ما بينا وبينهم ... تغور الكتب اللى تيجى من ريحتهم...قلبى وربى غضبانين عليهم إلى يوم القيامة wst::

لانس: مين المطاريد دول ياعمو؟!

سى السيد: ادخل نام إنته ياحبيبى علشان عندك مدرسة الصبح fr1::

لانس: طب تصبحوا على خير

سى السيد: يعنى كويس كده لما تفتحوا عينين الولد على الحاجات دى

إبن مصر: يظهر مفيش حل ياكنج غير إنى أوصل الجبل أقابل المطاريد shk():

يتبع

تم تعديل 25 نوفمبر 2004 بواسطة حشيش

[ragab2]

هايل

سواء أبو السيد أو حشيش

حاجة فوق الوصف وإبداع ماحصلش

كنتم مسخبيين فين

الله ينور

[حشيش]

هايل

سواء أبو السيد أو حشيش

حاجة فوق الوصف وإبداع ماحصلش

كنتم مسخبيين فين

الله ينور

ربنا يجبر بخاطرك يادكتور رجب wst:: ... دايماً إنته وباقى الأعضاء بترفعوا من روحنا المعنوية wst::......أود أن أرحب أيضاً ترحيب كبير جداً بالست أمينة وننتظر عودة باقى الغايبين إن شاء الله

[se_ Elsyed]

عادل أبو زيد : نيجي لأهم واخطر نقطة لابد من الإتفاق عليها ووضع أُطر وآلية تنفيذ لها .. حيث إن مستقبل المحاورات كله يتوقف عليها .

هشام عبد الوهاب : خير يابو محمد قلقتني .

عادل أبو زيد : أظن كلامي واضع يا سادة وماهوش رمادي ، نقول كمان .. أنا أعني هنا يا أفاضل نقطة توزيع الادوار .. بمعنى كل واحد مننا هايعمل إيه أثناء زيارة الريس .

هشام عبد الوهاب : أنا فهمتك يا بوس ، بوص يا سيدي .. أنا طبعاً هالبس الحتة السموكن السودا اللي عندي من أيام الفرح واللي ما بطلعهاش غير في المناسبات وأضرب البيبيون المفتخرة على شوية جل على شعري والنظارة الريبان السودا وهابقى ولا الخديوي عباس حلمي في زمانه ... وإنت كمان تعمل زيي وتتصرف لك في أي حتة سموكن ولك مطلق الحرية تلبس بيبيون تلبس كرافتة او كوفية مش مهم .. وانا وإنت بس نبقى في إنتظار سيادة الريس .

عادل : عظيم عظيم .. كمل يا هشام ..

هشام عبد الوهاب : داروين بقى هايقعد جنبنا على المنصة يلم الأسئلة اللي هاتتسأل للريس ويفرزها وينقحها والأسئلة اللي فيها قلق يرميها في الزبالة .

عادل : ممتاز إكسلنت .. أنا كمان بأقترح إن د / رجب يشرف بنفسه على الأكل عشان يتأكد إن كل حاجة ماشية حسب المعايير الطبية .

إبن مصر : إنتوا نسيتوا حاجة مهمة ... الريس لما ييجي يفتتح الأبواب الجديدة بالتأكيد هايطلب يُلقي نظرة على البيبان المفتوحة عندنا واللي ممكن تودينا في داهية .

عادل : قصدك إيه ؟.. أفصح تكلم أيها الزميل الفاضل .

إبن مصر : يا عادل بيه أنا قصدي باب السياسة الداخلية .. والريس أساساً ما بيطقش السياسة وعشان كده مخلي الشعب ما بيفهمش غير في سياسة التوفيق اللي شعارها بيقول ( يا بخت من وفق راسين في الحلال ) .

داروين : اتفق تماماً مع أخي أبو إنجي ، وعندك كمان باب مكافحة الجراد قصدي الفساد ده لوحده فيه 15 سنة سجن في معتقل المغول لكل واحد فينا .

س س : وما ننساش باب هدي الإسلام .. الريس ورجالته عندهم أرتكارية من كل ما هو إسلامي ... انا رأيي نقفله مؤقتاً ونحبس جواه كل الاعضاء ذوي التوجهات الإسلامية .. والله انا خايف عليهم من الريس .

إبن مصر : وعندك باب فلسطين .. ممكن نقفله أو نخلية موارب ونخلي فيه بس موضوع العزا بتاع أبو عمار الله يرحمه وأهو كان حبيبة .

هشام : يعني بإختصار نخليلة الحاجة الخفيفة واللي فيها فرفشة .... أنا فهمتكوا .

محمد أبو زيد : في كمان يا جماعة موضوع كلمة المحاورات التي يجب أن يُلقيها أحد الزملاء بالنيابة عننا ... أنا سيبولي الموضوع ده هاحضر كلمة محترمة وأقولها قدام الريس .

عادل وهو بيجز على سنانة : يا محمد لو سمحت إستنى شوية .. كلمة إيه ؟ ده انت قعدتك في السعودية وألمانيا نستك العربي .... خليك إنت لزيارات السادة الرؤساء الأجانب إبقى أتكلم براحتك وما فيش حد هايفهمك مننا او منهم .

هشام : يبقى ما فيش غير محبط ... نخلية يكتب كلمة مختصرة وبأقول تاني مختصرة والأختصار بتاعه ده أنا عارف ممكن يبقى 5 صفح A4 ويملاهم شوية مصطلحات مكلكعة زي العودة لمائدة المفاوضات والسلام العادل والشامل ونزع جميع الأسلحة من العرب ومنطقة الشرق الاوسط ما عدا إسرائيل والحاجات دي ... الريس بيموت فالكلام ده وبينشكح قوي لما بيسمعه .

إبن مصر : على جثتي يا كنج .. محبط لأ ... الأخ ده بقى له فترة له توجهات مش عجباني وأخرها تحفته المعمارية " إسلامستان "

س س : وسع يا جدع إنت وهو ... اما يا أستاذ عادل أنا فكرتلك في فكرة ... اولاً هاستهال عليها نص شهر مكافأة .. وثانياً اتحدى إن ماكنش الريس ينفحنا فيها قد 100ألف دولار علاوة .

عادل : قول انا في عرضك .. أنا في حاجة ماسة إلى أي ألية تدفع السيد الرئيس وتخليه يرضى عننا .

س س : انا طبعت المجلد بتاع " إسلامستان " وجلدته وزخرفته وبقى عامل زي الملازم اللي كنا بنصورها أيام الجامعة قبل الإمتحانات بيومين ... فممكن بمنتهى البساطة أقوم مغير بس العنوان من إسلامستان إلى " مباركستان "

وانا عارف إن مستحيل الريس هايقرأ الحشو اللي جوه لأنه مش فاضي .. هو بس هايشوف العنوان وهايزقطط .. إيه رأيك ؟.

إبن مصر : أبوس تلافيف نخاشيش دماغك . ... إنت عبقري إنت فلته .... روح يا شيخ إنت فعلاً تستاهل الدعوة اللي دعيتهالك قدام الكعبة في عمرتي اللي فاتت واللي كلفتني 1500 جنية .

عادل : برافو يا س س ..... جود لك .

س س : تربيتك يا باشا وكل ده من خيرك .

داروين : أنا بقى بأقترح إن اللي يكتب الكلمة الإفتتاحية البنت لايت هاوس ، ما شاء الله عليها ضلعية في قواعد اللغة العربية وفي أصول اللغة العربية .. ونخليها كمان هي اللي تلقي الكلمة بين يدي الرئيس ... بس نشتري لها فستان جديد على جزمة سودا وتعمل شعرها فينوكات وهاتبقى زي الفل .. والريس مش بعيد يتبناها زي البنت أمال ماهر اللي بتغني .

هشام : برافو .. أنا معجب كمان بلايت هاوس ( وش واحد بيتكلم من ورا قلبه ) هي طالما بتبعد عم المربى والمخلل بتعمل شغل عالي قوي .

س س : بس في نقطة انا أقتل نفسي عليكم لو ما نفذنهاش ...

عادل : إيه خير إتكلم أنا أبتديت أُعجب بك بعد ما عدلت أفكارك المسمومة بتاعت المحشي والموخية .

س س : يا أستاذ عادل .. أنا عارف إن الريس أهلاوي .. فلو جه ولقى عندنا في باب الرياضة مواضيع عن الزمالك وأعضاء زملكاوية عمالين بيبعبعوا في الكلام .. ممكن الراجل يأذينا .. لذا بأقترح إننا نقوم بعملية سحل مؤقت للزملكاوية وعلى رأسهم محبط وأفيونة وزملكاوي والاخ اللي ما بيكتبش الا هناك اللي هو البحار الجريح .. ونسيب أحمد محسن احسن جايله مولود وممكن نتصرف معاه بعد السبوع ... ونجيب لينوكس وقطز ومحمد كبارات الاهلاوية في المحاورات ونمسكهم أحلام حمرا ونلبسهم فانلات حمرا وندهن وشهم احمر ونحفظهم كام شعار من بتوع بص شوف الأهلي بيعمل إيه .. وصالح سليم يا مدرسة .. والحاجات دي ويقفوا على باب الرياضة وأول ما يلمحوا الريس جاي من بعيد يدوها على طول .

هشام : قشطة يا س س .. ده الريس كده عمره ما هاينسى الزيارة دي .

محمد أبو زيد : بس أنا عرفت إن جمال بيه له ميول زملكاوية وممكن يزعل .

س س : يا حاج محمد خلينا مع الرايجة ... وطالما الريس موجود يبقى عاش الملك ... لما جمال يبقى يترستأ على الكرسي يحلها ربنا وعلى طول نقوم عاكسين الأية ... فنسحل الأهلاوية .. ونلمع الزملكاوية ... ده شغل كبير يابا .

يُتبع .

[Ahmed Mohsen]

س س : يا أستاذ عادل .. أنا عارف إن الريس أهلاوي .. فلو جه ولقى عندنا في باب الرياضة مواضيع عن الزمالك وأعضاء زملكاوية عمالين بيبعبعوا في الكلام .. ممكن الراجل يأذينا .. لذا بأقترح إننا نقوم بعملية سحل مؤقت للزملكاوية وعلى رأسهم محبط وأفيونة وزملكاوي والاخ اللي ما بيكتبش الا هناك اللي هو البحار الجريح .. ونسيب أحمد محسن احسن جايله مولود وممكن نتصرف معاه بعد السبوع ... ونجيب لينوكس وقطز ومحمد كبارات الاهلاوية في المحاورات ونمسكهم أحلام حمرا ونلبسهم فانلات حمرا وندهن وشهم احمر ونحفظهم كام شعار من بتوع بص شوف الأهلي بيعمل إيه .. وصالح سليم يا مدرسة .. والحاجات دي ويقفوا على باب الرياضة وأول ما يلمحوا الريس جاي من بعيد يدوها على طول .

ربنا يكرمك يا س س ....

ركبي مش شايلاني من التأثر بكرم أخلاقك وعطفك الغالي ......

ربنا يخليلك أولادك ......

بس مانتش شايف إن السبوع كتير ..... يا عم خدوني بعد الولادة بيومين

علي الأقل نوفر تكاليف السبوع (وش واحد بخيل جلدة)

بس بجد بجد .......

حشيش وس س يستحقان جايزة نوبل في إنتزاع الضحكات من قلوب مستمعيهم .......

وربنا يستر عليا عشان رفدي من الشغل هايبقي علي إيديهم من تحت رأس الضحك اللي مش بعرف أتحكم فيه أبدا

[Set_Amina]

هايل

سواء أبو السيد أو حشيش

حاجة فوق الوصف وإبداع ماحصلش

كنتم مسخبيين فين

الله ينور

ربنا يجبر بخاطرك يادكتور رجب ... دايماً إنته وباقى الأعضاء بترفعوا من روحنا المعنوية ......أود أن أرحب أيضاً ترحيب كبير جداً بالست أمينة وننتظر عودة باقى الغايبين إن شاء الله gra:-

الغياب ماكنش بايدي ياحشيش ياخويا انما كنت بادور على الواد برعي ما انت عارف انه تايه ياعين امه من كام شهر كان بيدور على البت اخته سعاد، وبما ان العيال مالهاش اثر وكانهم فص ملح وداب قولت اجي انا استمتع بمواضيعك وفي داهية العيال، فداك يعني :huh:

[Ahmed Mohsen]

هايل

سواء أبو السيد أو حشيش

حاجة فوق الوصف وإبداع ماحصلش

كنتم مستخبيين فين

الله ينور

ربنا يجبر بخاطرك يادكتور رجب ... دايماً إنته وباقى الأعضاء بترفعوا من روحنا المعنوية ......أود أن أرحب أيضاً ترحيب كبير جداً بالست أمينة وننتظر عودة باقى الغايبين إن شاء الله gra:-

الغياب ماكنش بايدي ياحشيش ياخويا انما كنت بادور على الواد برعي ما انت عارف انه تايه ياعين امه من كام شهر كان بيدور على البت اخته سعاد، وبما ان العيال مالهاش اثر وكانهم فص ملح وداب قولت اجي انا استمتع بمواضيعك وفي داهية العيال، فداك يعني :huh:

سعاد ........

سعاد ........

سعااااااااااااااااااااااااااااااااااااااااااااااد

إنتي فين يا سعااااااااااااااااااااااااااااااااااااااااد

كان حتة موضوووووووووع

حدش شاف سعاااااااااااااااااااااااااااااااااااااااد

[se_ Elsyed]

عادل : بالنسبة لدور الأخ شريف عبد الوهاب بتاع الإعلام .. إنت هاتبقى مهمتك في غاية الخطورة والحساسية ، إشرح له يا هشام .

هشام : بص يا شريف .. إنت هاتكون مرافق للبعثة الإعلامية المرافقة للسيد الرئيس وركز قوي على سمير رجب وراضيه على قد ما تقدر .. وكل دورك هايبقى منحصر في إنك تمسك كشاف وتقعد كل واحد في مكانه اللي هانتفق عليه .

شريف : يعني هاشتغل Placer يعني ؟

عادل : شاطر أديك فهمت اهو .

شريف : حاضر ... خلص الكلام .

عادل : محمد أبو زيد .

محمد أبو زيد : أفندم

عادل : إيه يا محمد هو احنا في كانتين الجيش .. أقعد يا حبيبي ... بص يا محمد إنت دورك هايكون مهم وحساس للغاية أيضاً ، إنت عارف إننا هانحبس بقيت الأعضاء الأفاضل في المحاورات وراء حاجز زجاجي مضاد للرصاص وكل دورهم هايكون إنهم يتفرجوا علينا سواء وإحنا بنلف على الأبواب أو وإحنا بناكل الاكل بتاع مكسيم يعني " متفرجون لا مواطنون " .. لذلك إنت هاتقف معاهم ورا الساتر وهاتاخدلك ساتر على جنب وكل دورك إنك هايبقى معاك يافطتين ...

محمد أبو زيد : أيوه عارف .. يافطة مكتوب عليها للإيجار والتانية تمليك .

هشام : إيجار إيه يا حاج محمد ؟ .. إيه شغل السماسرة ده ؟ يا سيدي يافطة هايبقى مكتوب عليها تصفيق .. ترفعها لما أشاور لك بإيدي اليمين ... ويافطة مكتوب عليها هتاف ودي ترفعها لما أشاور بإيدي الشمال .

هشام : اما س س وإبن مصر فهايمسكوا شوم ويقفوا جنب محمد أبو زيد والعضو اللي مش هايتسجيب أو يسقف زي ماحنا عايزين .. يدولوه على طول .

س س : نعم يا خويا ؟!!! بقى أنا مقطع نفسي عشانكوا وعمال أزور في دول رسمية من إسلامستان لمباركستان لجمال آباد ومحشي ومش محشي .. وفي الاخر تقعد أهلي مع عامة الشعب .... طب والأكل يا كنج ؟

هشام : يا بني هاتكل ما تخافش .. هاعينلك علبتين من بتوع مكسيم تاخدهم معاك وإنت مروح .

س س : هشام : لو حصلت أي حركات كده ولا كده .. انا ممكن اخسرك .. إلا الاكل .. انا هاموت وأشوف الأكل بتاع مكسيم ده عامل إزاي .. ده مستقبلي ومستقبل عيالي .

عادل : بالنسبة للأخ لانسلوت فدوره هاينحصر في إنه ياخد الشباب الصغير اللي هما جيل الطلائع زي فيولينكنج ومحمد و GG وارنوب حسين وإرهاصة السيسي وباقي الأخوة الطلبة ويقفوا بره خالص وأول ما الريس ينزل من عربيته يرفعوا أعلام مصر الصغيرة ويروح قايلين النشيد الوطني لجمهورية مصر العربية .

هشام : انا بأقترح يا بوس نحفظهم برضوا كام طقطوقة من الحاجات الوطنية اللي عندنا .. زي كل بلاد الدنيا جميلة لكن أجمل من وطني لا ..... ومصر يا أول نور في الدنيا شق الظلام بالليل ... بس لو هايعكوا يبقى نتعاقد مع محمد زروت احسن .

مدام سلوى : إنتوا نسيتوا نقطة مهمة يا جماعة ..... السيدة الفاضلة سوزان مبارك .. مين اللي هايستقبلها مننا ؟

عادل : حضرتك طبعاً يا مدام سلوى ومعاكي لفيف من نسوة المنتدى كممثلين عن الجنس اللطيف هنا .

هشام : انا بأقترح يبقى معاكي .. فيروز وكليو و د/ فريدة و GG وشعنونة .

س س : إعتراض ... فيتو .... أولاً فريده هاتصدع دماغ الست سوزان وتكلمها عن حروق المرأة والظلم والاضطهاد التي تتعرض له النساء في عصر مبارك والست سوزان ما بتحبش كده هي بتاعت مكتبات والتطعيم ضد شلل الاطفال والثلاثي ... وبالنسبة لـ GG فمش هاتقدر تيجي في اليوم ده لأنها قالت لي إن عندها تدريب عملي في جنينة الحيوانات عشان تحضر ولادة مرات الأسد والحاجات دي مهمة وبتجيلهم في الامتحان ، شعنونة بقى حكايتها حكاية وراحت لوزير الصحة من كام يوم في مكتبة وكانت هاتبطحه ، فرضنا دلوقت الراجل جه مع الريس وشعنونة شافته .. مش بعيد تضربه برقبة قزازة أو تعمل لنا شوشرة قدام الريس .

عادل : يبقى ما فاضلش غير فيروز وكليو .

س س : أنا بأقترح أخدهم وانزل بيهم الموسكي أشتريلهم كام فستان على كام شراب فيليه وشنطة وجزمة شكل بعض عشان يبقى منظرهم حلو ... إيدك بقى يا ريس .

عادل : إيدي إيه ؟

س س : إيدك على 120 جنية عشان الحاجات دي .. أنا خارج من العيد والكحك مقشفر وبستلف ثمن أكلي .

عادل : طب خلي فيروز وكليو يدفعوا وهابقى احاسبهم .. أو ياخدوا ببقية حسابهم إنذارات .

هشام : عايزينك بقى يا مدام سلوى إنتي والبنات تسلوا الست سوزان وتبعدوا عن أي حاجة تزعلها .. وخلي كليو تقعد تحكيلها شوية من مغامرتها في بلاد فارس وما وراء النهرين .. انا عارف الحريم بيحبوا الحكاوي دي قوي ، وانا بأحذر فيروز إنها تتلامض او تتفلسف قدام الست .. عايز الليلة تعدي على خير وعايز روحكوا تبقى خفيفة .

س س : بالمناسبة يا كنج .. أنا عندي إقتراح تاني هايل ، إحنا ممكن نبعت نيجيب أخونا أبو فصاد من أسبانيا عشان يظبط شوية أمور معانا ، الراجل كان في الخارجية وبيفهم في البروتوكول والتشريفات والطوابير كويس .. وكمان هاتبقى فرصة إنه يتقابل مع زميل الدراسة السابق أبو الغيط ويتكلموا بقى عن بذور الملوخية والفجل الرومي والكلام يجيب بعضه . وعشان نعرف برضوا الريس إن معانا ناس مش أي كلام .

إسو : إيه يا جدعان وانا وقعت من قعر القفة .. دوري فين مانا مُشرف برضوا ...ولا أنا كمالة عدد وجايبيني عشان بتتفألوا بي ؟

عادل : يا أخو إسو ( مازلت أرجو ان تُغير إسمك اللي بيسبب لي حسياسي مُفرطة ) إنت حولك علامات إستفهام سوف يتم مناقشتها لاحقاً بعد ان نخلص من هذا الكابوس .

هشام : يبقى خلاص كده موافقة ... ربنا معاكوا يا ولاد وما تنسوش تستحموا كلكوا يوم الزيارة وكل واحد يروح على موضوع " ما هي كولونيتك المفضلة " ويختار له نوع من الحاجات اللي أفتر شيف على حسابي .

انا تعبت بقى ... كمل يا شيشو ..

[فــيــروز]

س.س. .. حشيش

ربنا يسعدكم كما تسعدونا

[Farida]

س س : إعتراض ... فيتو .... أولاً فريده هاتصدع دماغ الست سوزان وتكلمها عن حروق المرأة والظلم والاضطهاد التي تتعرض له النساء في عصر مبارك والست سوزان ما بتحبش كده هي بتاعت مكتبات والتطعيم ضد شلل الاطفال والثلاثي

ماشى يا عم المشرفين طب ده انا نفسى مووووووت اشوف ماما سوزان و اوعدكم مش حا أفتح بقى و حأخرس خالص و حأفضل احكى لها على الأنجازات اللى عملها المجلس القومى للمرأه و التغيير اللى حصل للشعب المصرى بعد اغنيه انا بنت مصريه و اللى كانت نتيجته الأب اللى دبح بناته السبعه علشان نفسه فى واد

انا حتى عندى فستان بكلفه و جزمه حمرا تحفه كنت جايباهم من التوحيد و النور العيد اللى قبل اللى فات و حألبس على سنجه عشرة و حأشرفكم جدا بس اشوفها و النبى اما بابا انا شفته قبل كده و سلمت عليه كمان و الله لما مرة عملنا معرض كبير للمكان اللى باشتغل فيه و عندى صورة ...فأنا عايزة اكمل الألبوم لو سمحت و النبى يا سى السيد و النبى ها ها ها

[Lighthouse]

حشيش وس س

يخرب عقلكم

ايه الحلاوة دي

استمروا ياشباب استمروا

:unsure: tth: mc:

[حشيش]

اليوم الموعود:

هدير الموتوسيكلات الذى يسبق موكب الرئيس يدوى فى المحاورات.....تتبع الموتوسيكلات سيارات جيب محملة بجنود من الحرس الجمهورى وقوات الكوماندوز.....صوت سارينات سيارات الشرطة والأمن المركزى والحراسة يصم الأذان.....سيارات مرسيدس سوداء تتبع الواحدة الأخرى....سيارة السيد الرئيس وقرينته لا تزال غير معروفة لأن جميع السيارات المرسيدس يشبه بعضها البعض لدواعى أمنية.....يقف كل مشرف من المشرفين على باب من أبواب المحاورات وقد إرتدوا تى شيرتات موحدة عليها صورة عادل أبو زيد كرمز للمحاورات وشورتات زرقاء وبيد كل واحد منهم بالونة ومقص clwn: .....عادل أبو زيد وهشام يقفون فى المقدمة فى إنتظار سيارة السيد الرئيس والتى لم يعرف بعد على أى الأبواب سوف تقف ...... تجرى الرياح بما لا تشتهى السفن....فقد وصل للمخابرات الحربية معلومات مفادها أنا المحاورات مليئة بالأعضاء المشاغبين وأعداء النظام الرئاسى فى الدولة....ينتشر جنود الأمن المركزى بهراوتهم الغليظة ويضربون بعنف فى المشرفين ظانين أنهم أعضاء المحاورات وأنهم يضمرون السوء للرئيس ومرافقيه mc:

هشام: الله الله الله ..... إيه اللى بيحصل ده يابوس f((:

عادل أبو زيد: بوس إيه وسخام إيه دلوقتى ... أى ياعينى

يقع سى السيد على الأرض والدماء تسيل من فمه على إثر شلوت من بيادة جندى هلف من جنود الأمن المركزى أصاب موقع حساس فى جسده .... يردد سى السيد أغنية عبد الحليم حافظ (إن مت ياأمى ماتبكيش...راح أموت علشان بلدى تعيش...إفرحى يمه وزفينى...وفى يوم النصر افتكرينى) mf(

محمد أبو زيد وقد أصابته ضربة شومة والدماء تغطى وجهه : بلادى بلادى بلادى لكى حبى وفؤادى... ...ياخوانا دى محاورات المصريين مش بيت العرب ولا شئون مصرية ... إنتم أكيد غلطانين فى العنوان ... إحنا بنام ونصحى فى حب الأسرة المالكة ... وحياة توشكى ياريس لتخليهم يبطلوا ضرب ... خصيمك مترو الأنفاق ياشيخ خليهم يسيبونا....حلفتك بسيوة والفرافرة .... طب ب 6 اكتوبر :blink: ...ثم يسقط على الأرض مغشياً عليه

يحتمى دارون خلف لانس الذى كان ممسكاً بصميطة فى يده ويقول : وحياة أبوكى يامدام سوزان تخليهم يوقفوا الضرب... مش علشان خاطرى...علشان خاطر الطفل ده bk:

تقوم قوات الحرس الجمهورى باعتقال رجب وشريف عبد الوهاب وسلوى وإسو وتمشط المكان بحثاً عن إبن مصر إلى أن تجده مختبئاً فى باب المطبخ فتقوم باعتقاله .

يذهب قائد الحرس الجمهورى إلى سيارة السيد الرئيس مؤدياً التحية العسكرية ومعطياً إياه التمام بأن المحاورات قد أصبحت تحت سيطرة قواته وأن المكان قد أصبح أمناً s-:

ينزل الرئيس وسوزان وجمال وسفوت والشاذلى وزكريا عزمى والشيخ طنطاوى ومرافقيهم إلى المحاورات وهى خالية من المشرفين

مبارك مخاطباً الشاذلى: أدى أخرة الحرية ياكيمو....العيال إفتكروا إن لحمنا مش مر وهاتك ياكتابة...العيال مخلوش حاجة ما كتبوش فيها...فساد...إحتكار سلطة...توريث...جراد...علاء والتوكيلات...حتى دينا الرقاصة الطاهرة ما سلمتش من لسانهم ... خلينا ندخل نشوف إيه اللى مكتوب هنا...يشير معاونوا الرئيس عليه بأن يبدأ بباب هدى الإسلام حتى تنقل الصحف ووكالات الأنباء نزعته الدينية التى تتسم بالإعتدال والفهم الصحيح للدين الإسلامى الحنيف بعيداً عن التطرف والإرهاب ty:)

يدخل مبارك إلى باب هدى الإسلام ويقوم بأداء ركعتين شكراً لله ظناً منه أنه قد تخلص من الأعضاء المشاغبين ولا يدرى أن جميع الأعضاء محبوسين داخل باب السياسة الداخلية وأن من تم إعتقالهم هم المشرفين....يؤم الصلاة الشيخ طنطاوى داعياً الله عز وجل أن ينصر صاحب الضربة الجوية التى فتحت باب الحرية وأن يخزى الأعضاء الفاسقين على إختلاف مذاهبهم ومشاربهم وأن ينصره عليهم vmp: .

يتبع