اذهب الي المحتوي
se_ Elsyed

ظهور السيدة العذراء بين الحقيقة والخيال

Recommended Posts

ايه اللي إحنا فيه ده ؟

وإيه حالة الخمول والتخلف العقلي اللي أصابت الجميع دي مثقفين وبسطاء بل ورجال دين أيضاً ؟ وكإنها فِرا ولا وباء لم يستثني أحد وماشي بين الكل بيحصد عقولهم ووعيهم

ما هذا يا سادة ؟

تابعنا جميعاً على مدار الايام الماضية مسألة ظهور السيدة مريم العذراء فوق عده كنائس ..

آه بالمناسبة

تقربياً كل الكنائس دي في مناطق شعبية .. وكإن العدرا ما بتنزلش في مصر الجديدة مثلاً أو في كنيسة في التجمع الخامس

أمبارح كنت باضرب كف على كف

تقريباً كل برامج التوك شو كانت مستضيفه رجال دين مسيحين ذوي شأن في المجتمع الكنسي

وكلهم كإنهم حافظين بؤين بيقولوه

" أيوه صحيح العدرا ظهرت ... واختارت مصر لأنها مكثت بها مع السيد المسيح 3 سنوات ونصف حينما هربت من بني أسرائيل ببيت لحم ... وكمان عشان توصل رسالة لاهل مصر بإنها بترعاهم وتطمنهم وتقول لهم ما تخافوش من وباء أنفلونزا الخنازير .. وتقول للمصريين حبوا بعض وبلاش فتنه وعيشوا في سلام و .. مبارك شعب مصر "

كلهم بدون أستثناء قالوا كده

في هذا الاثناء بعض برامج الوك شو قطعت الكلام لتذيع خبر إن جاءهم خبر بإن العدرا ظهرت الأن في 5 كنائس مره واحده

الله أكبر

وإن الالاف رأوها رأي العين وهي لابسه تاج ازرق ومش عارف فستان لونه إيه !!!!!!!!!!!

طب ما حدش من الالاف دي معاه كاميرا يا أخواننا يصورها ؟

احد البرامج كان مستضيف قسيس في المجلس الملي الأعلى فالمذيعه بتسأله ... صحيح الكلام ده ؟

قال : نعم ... وهانروح بعيد ليه ... العدرا بتظهر في أحدى مُدن البوسنة والهرسك كل يوم بقى لها سنه كاملة دلوقت .. بس ما بتظهرش غير لأربع اشخاص فقط كل يوم ؟

------------------------

يرضي ربنا ده يا اخواننا ؟

ويا ترى الألاف اللي أتلطعوا أيام وليالي عشان العدرا تتجلى لهم ويوهموا نفسهم إنهم شافوها .. يا ترى ما أتجمعوش ليه عالخير لحاجه تخص بلدهم ومستقبلها ومشاكلها ؟

وأخيراً ؟

مش عارف أقول ايه غير

يا امة ضحكت من جهلها الأممُ

شارك هذه المشاركه


رابط المشاركه
شارك

عارف يا ابوعمر انا مت من الضحك لما شوفت سازجة الناس سواء كانوا مسلمين او مسحين لأنه كان فيهم مسلمين ايضا

بس سؤال لأخونا المسحيين المثقفين هل هما مقتنعين بذلك فعلا

شارك هذه المشاركه


رابط المشاركه
شارك

هو عجبني تعليق واحد بس عالخبر قريته ان الموضوع ده بيتعمل باستخدام الهولوجرام

والدليل انه مبيظهرش في الدول المتقدمة او في الاماكن الراقية لأنه هيتكشف بسهولة

ده مش معناه انتفاء وجود المعجزات لكن الموضوع ده وبالطريقة دي ملوش تفسير تاني عندي

تحياتي

شارك هذه المشاركه


رابط المشاركه
شارك

العزيز سي السيد...

هل تؤمن بالغيبيات؟ هل تؤمن أن عبدا فقيرا يحمل للسماء... هل تؤمن بالجن أو الملائكة... هل تؤمن أن يولد نبي بدون أب؟ هل تؤمن بالمعجزات، و لو من باب انها علم لم نصله بعد؟

ما الفرق بين كل ذلك و بين من يؤمن بشفاعة أو كرامة قديس أو نبي؟

هؤلاء الناس يكلمون العذراء كل يوم، و يسألوها في حياتهم اليومية، و تجيبهم في أحيان كثيرة، و هم يؤمنون بذلك... ما الغريب في ذلك؟

- الناس كان معاها كاميرات و كل حاجة، و آدي مثال

http://www.youtube.com/watch?v=wkFywQqauvQ

و حضرتك هتلاقي غيره كتير علي النت... بس هل الفيديو يثبت أو ينفي ظهورها؟ مش جايز خدعة، مش جايز الشيطان هو اللي بيظهر...

ده ايمان... مالوش اثبات و لا نفي...

و مستوي التعليم مالوش علاقة بقبول أو رفض المنطق... بعد أكتر من 10سنوات دراسات عليا، ما زال العلم عاجز عن اجابة اسئلتي البدائية (مين اللي عملنا، و عملنا ليه، و هنروح فين بعد الموت)...

الناس دي مش بتصدق النور اللي شايفاه... دي بتصدق العدرا اللي بيكلموها كل يوم و يترجوها تصلي لهم... لو حضرتك ما بتكلمهاش أبدا، عمرك ما هتصدق حتي لو ظهرت لك شخصيا...

- مش بس في الأحياء الفقيرة، أشهر ظهور للعدرا في مصر كان ما بين 1968 و 1970 فوق كنيسة الزيتون... و منطقة الزيتون وقتها كانت من الأحياء النضيفة...

- طبعا انا مش بأكد أو بأنكر ظهور العدرا... و ما أعرفش ايه علاقة ظهورها بانفلونزا الخنازير و بالظروف السياسية المقبلة أو بطول عمر البابا...

ده موضوع ايمان... و كل واحد بيفهم ظهورها علي حسب خبرته معاها...

بس العقيدة المسيحية الارثودكسية قايمة علي أن شعب الكنيسة بعضها حي علي الأرض و البقية أحياء في السماء... و تعترف بشفاعة القديسين و بقوة صلواتهم... هل هذا الكلام غير علمي و به الكثير من الغيبيات؟ أكيد !!

ما هو الجهل في ذلك... أي ديانة سماوية أو غير سماوية، بها الكثير و الكثير من الغيبيات... ديانة قد تعترف بشفاعة البشر، و غيرها قد لا تعترف... و لكن ذلك لا يهدم أصلهما ال"غيبي"... و الا فعقيدتنا صارت مادية و اقتربنا من مفاهيم الScientology و ما شابه...

- موضوع رد القساوسة ده مفهوم... لأن الخالق الذي نؤمن به رفض أن يرسل ملائكته لكل شخص منا، ليؤكد لهم انه هو الخالق الواحد الأحد... و ان دينه هو الدين الفلاني... و رفض أن يبعث لنا بملائكته، لتجيب عن كل سؤال يتبادر لذهننا... سواء كان ذلك لكي نتدبر في خلقته، أو لكي يحافظ علي حرية الارادة التي أرادها لنا... أو لأي سبب آخر

ماذا يمكن لهؤلاء القساوسة أن يقولوا... ما دامت المعلومات المتاحة لهم هي نفس المتاحة لنا... كل شخص يقول رأيه :roseop:

ما دمنا نؤمن بالغيبيات... فلا يمكن لنا نفي ظهور العذراء أو المهدي أو الأنيباء، الا بناء علي فهم معين لنص معين... و خبرتنا الروحية في صلواتنا اليومية... أنا نفسي حصلي أكثر من معجزة شخصية... و أحداث يومية كتير قوي خلتني مع السنين أقتنع بعقيدتي دي و اثبت فيها... برغم نفي العلم لكل ذلك... لكن ده عقلي و خبرة حياتي... ما حدش يقدر يحكم فيهم غيري...

ربنا يباركنا ببركة العدرا... سواء ظهرت أو لا...

كل سنة و حضرتك بألف صحة و عافية و قدرة علي الكتابة...

تم تعديل بواسطة rar

شارك هذه المشاركه


رابط المشاركه
شارك
ده مش معناه انتفاء وجود المعجزات لكن الموضوع ده وبالطريقة دي ملوش تفسير تاني عندي

على حسب ثقافتى الدينيه . المعجزات انقطعت بوفاة النبى محمد صلى الله عليه وسلم .

وانه اذا من الله على شخص ما بشئ فهى هبه وليست معجزه .

تحياتى.

شارك هذه المشاركه


رابط المشاركه
شارك

لم اقصد بالضبط ما فهمته من كلامي فانا اعرف تماما الفرق بين المعجزة والهبة لكن في الدين الاسلامي معروف ايات كثيرة ستحدث وقد يكون هذا هو اللفظ الأدق والذي خانني تعبيري فيه مثل المسيح الدجال وكذلك نزول سيدنا عيسى عليه السلام وايضا خروج الدابة وهكذا

تم تعديل بواسطة justme

شارك هذه المشاركه


رابط المشاركه
شارك

طبعا التصوير الهولوجرامي او المجسم ، وهي التقنية التي تتطلب ذرات او جزئيات صغيرة كالدخان لاستخدام اشعة الليزر معها لعمل مجسم لشخص ، وطبعا هذا الأمر ينجح جدا خاصة في الظلام او الليل، وأكيد لاحظنا ان الجميع بيتكلم عن سحابة او دخان وضوء متحرك

كل ده مش مهم

المهم ايه الي ورا الفيلم الهندي ده وايه الحدث السياسي اللي ورا هذا الموضوع علشان الناس تنشغل به ،، حد يعرف يتوقع الهدف ايه من ورا الكلام ده.

شارك هذه المشاركه


رابط المشاركه
شارك

اخى العزيز rar

الغيبيات مالهاش دعوه بالموضوع ده

لا تتخيل مدى قُدسية ومكانة السيدة العذراء مريم في الاسلام .. فهي رمز للطُهر والنقاء والتحمل

لكن دي مش غيبيات حضرتك ..

لما راجل دين محترم يقول إنها بتظهر كل يوم في البوسنة ...

ده كلام ؟

لما لسه شايف فيديو دلوقت في التليفزيون فوق كنيسة بشبرا لعشرات الاف واقفين بيتفرجوا على السُحب المتجمعة لإننا في عز فصل الشتاء ومصر برد تلج ... وتيجي حمامه معديه بالصدفة يقول لك دي العذراء وديلها اسود وكلام من ده

عارف يا رار

والله العظيم لو ربع الناس دي اتجمع عشان ننضف قدام بيوتنا بس .. كنا بقينا دولة متقدمة

لو ربع دول أتجمعوا عشان نقول لأ للظلم ولمبارك ولتأييف الدستور .. ما كناش هانلاقي وقت فراغ نتطلع فيه الشوارع عشان نشوف سحابه معديه

مع إن ده كله لا له علاقة بصلاة الأحد مثلاً ولا ذُكر في الأنجيل ولا له دخل بالعقيدة المسيحية ... صح ولا أنا غلطان ؟

شارك هذه المشاركه


رابط المشاركه
شارك

ايه يا رار ده ؟

إنت أتفرجت على رابط اليوتيوب اللي وضعته إنت بنفسك ؟

انا ما فهمتش حاجه

الموضوع عبارة عن كاميرة فيديو برزيليوشن تعبان مُسلطه على الاضاءة اللي فوق قبة الكنسية .... وبس

إيه ؟

في إيه بقى ؟

شارك هذه المشاركه


رابط المشاركه
شارك

بالمناسبة

عشان نقطع الطريق على أي جدل لا طائل منه حول العقائد ....

فهذه الظاهرة لا علاقة لها بالعقيدة المسيحية ..

ولكنها أعتقد نتيجة ضغوطات كثيرة أقتصادية وسياسية وحياتيه وبالتالي الناس بتحاول تهرب من هذا كله إلى مثل تلك الظواهر

وللعلم .. كلها يومين تلاته وتهل علينا ذكرى يوم عاشوراء وهو اليوم الذي أنتصر فيه سيدنا موسى على فرعون وأمرنا الرسول بصيام هذا اليوم ويوم قبله أو بعده لكي نخالف اليهود

لكن فجأه تحول هذا اليوم الى وصمة عار في جبين المسلمين .. نتيجة الممارسات الشاذة التي يرتكبها الشيعه من أراقة دمائهم ودماء أطفالهم لأحساسهم بخذلان الحُسين في معركة كربلاء التي تُصادف ذكرى عاشوراء .. فالاتنين أختلطوا ببعض وما بقاش معروف عندهم هي المناسبة تخص إيه بالظبط

شارك هذه المشاركه


رابط المشاركه
شارك

لما نفهم العقيدة صح هنبطل تخلف و نبص لقدام بدل الدجل و الشعوذة اللى عايش فيه المصريين و بيكلفهم اموال كثيرة على حسب اخر احصائية ده غير الجرائم اللى بتحصل و الحوادث من الدجالين و المشعوذين اللى بيستغلوا جهل الناس بدينهم

الاسلام جه عشان ينقينا من الدجل و الشعوذات عشان كده كان فيه تقدم انما لما الجهل انتشر -وده جهل دينى اولا- رجعنا لورا

لمايكون فيه برامج تخصص حلقاتها عشان العذراء ظهرت ولا لأ يبقى لازم نقف وقفة

على فكرة الجهل الدينى للمصريين سواء نصارى او مسلمين هو سبب مشاكلنا خاصة مشكلة التعصب ورفض الاخر

شارك هذه المشاركه


رابط المشاركه
شارك
و مستوي التعليم مالوش علاقة بقبول أو رفض المنطق...

انا متفق تماما مع اللى حضرتك بتقوله . أعرف ناس للأسف دكاترة جامعه وشهادات عاليه . ومؤمنين بكرامات السيده نفسيه والسيده زينب .

المشكله مش فى درجة التعلم نفسها المشكله ان فى ناس بقى تدبرها فى دينها ضعيف والمامه بأساسيات دينه معدومه .

هاضرب لحضرتك مثال .

مافيش حد مسلم مش مؤمن بالقرأن ومؤمن بكل أيه فيه

تخيل لما تكون فى القرآن آيه بتقول

{قُلْ لا أَمْلِكُ لِنَفْسِي نَفْعاً وَلا ضَرّاً إِلَّا مَا شَاءَ اللَّهُ } . والناس كلها حافظها ومعلقاها فى العربيه وفى البيت وفى كل حته. ومع ذلك ومحدش فكر انه يتدبر معناها .

تخيل لما رسولنا الكريم فى حديث لأبن عباس رضى الله عنه فى حديث صحيح يقول

(( واعلم أن الأمة لو اجتمعوا علي أن ينفعوك بشيء لم ينفعوك إلا بشيء قد كتبه الله لك))

وناس كتير حافظه الحديث ده .

تخيل بعد ده كله تلاقى ناس كتير يروحوا للسيده زينب والموالد عشان يطلبوا منهم الخير كأنهم زى ربنا (أستغفر الله العظيم )

تسمى دا ايه ؟

انا مش ملم بالدين المسيحى بس أعتقد سواء من عندنا او عندكم هيا نفس العقليه السطحيه فى دينها .

ربنا يهدينا كلنا .

تم تعديل بواسطة president

شارك هذه المشاركه


رابط المشاركه
شارك

مسألة كرامات أولياء الله الصالحين و تجليات الصوفية و معجزات القديسين كلها مسائل عقائدية و يختلف حولها أبناء الدين الواحد إلى حد قد لا يتصوره مثقفو محاورات المصريين.

ما سبق كان إستهلالا لابد منه

و على ذلك فالنقاش حول حقيقة ظهور السيدة العذراء أو أن السيد البدوى كان حقا يطلق الأسرى يعتبر حوار غير صحى لن تصل منه لشئ و لن نصل من وراءه إلى شئ.

و الجرائد اليومية مليئة هذه الأيام بمقالا تستنكر الإهتمام الشديد و الترويج لظهور السيدة العذراء و خاصة أنها تكررت كثيرا فى مصر و على مدار سنوات طويلة ، و هناك مذاهب مسيحية تستنكر و ترفض .... و كل هذا ربما من منطلق الجهود التنويرية التى ترفض مسألة كرامات أولياء الله الصالحين و تجليات الصوفية و معجزات القديسين.

دخول المسلمين فى الحوار حول مصداقية ظهور العذراء أعتبره نوع من عدم اللياقة

و أنا تقريبا متأكد أن الفاضل rar ربما يأخذ موقفا تنويريا مختلفا لو كان السياق مختلفا

هل أستأذنكم فى التوقف عن الكتابة فى هذا الموضوع - دون إغلاق الموضوع - كلنا بما فينا من سلفيين مسلمين و مسيحيين نرفض بالكامل التخلف بإسم الدين أو أن يكون الدين هو سبب تخلفنا.

شارك هذه المشاركه


رابط المشاركه
شارك
العزيز سي السيد...

هل تؤمن بالغيبيات؟ هل تؤمن أن عبدا فقيرا يحمل للسماء... هل تؤمن بالجن أو الملائكة... هل تؤمن أن يولد نبي بدون أب؟ هل تؤمن بالمعجزات، و لو من باب انها علم لم نصله بعد؟

ما الفرق بين كل ذلك و بين من يؤمن بشفاعة أو كرامة قديس أو نبي؟

هؤلاء الناس يكلمون العذراء كل يوم، و يسألوها في حياتهم اليومية، و تجيبهم في أحيان كثيرة، و هم يؤمنون بذلك... ما الغريب في ذلك؟

- الناس كان معاها كاميرات و كل حاجة، و آدي مثال

http://www.youtube.com/watch?v=wkFywQqauvQ

و حضرتك هتلاقي غيره كتير علي النت... بس هل الفيديو يثبت أو ينفي ظهورها؟ مش جايز خدعة، مش جايز الشيطان هو اللي بيظهر...

ده ايمان... مالوش اثبات و لا نفي...

و مستوي التعليم مالوش علاقة بقبول أو رفض المنطق... بعد أكتر من 10سنوات دراسات عليا، ما زال العلم عاجز عن اجابة اسئلتي البدائية (مين اللي عملنا، و عملنا ليه، و هنروح فين بعد الموت)...

الناس دي مش بتصدق النور اللي شايفاه... دي بتصدق العدرا اللي بيكلموها كل يوم و يترجوها تصلي لهم... لو حضرتك ما بتكلمهاش أبدا، عمرك ما هتصدق حتي لو ظهرت لك شخصيا...

- مش بس في الأحياء الفقيرة، أشهر ظهور للعدرا في مصر كان ما بين 1968 و 1970 فوق كنيسة الزيتون... و منطقة الزيتون وقتها كانت من الأحياء النضيفة...

- طبعا انا مش بأكد أو بأنكر ظهور العدرا... و ما أعرفش ايه علاقة ظهورها بانفلونزا الخنازير و بالظروف السياسية المقبلة أو بطول عمر البابا...

ده موضوع ايمان... و كل واحد بيفهم ظهورها علي حسب خبرته معاها...

بس العقيدة المسيحية الارثودكسية قايمة علي أن شعب الكنيسة بعضها حي علي الأرض و البقية أحياء في السماء... و تعترف بشفاعة القديسين و بقوة صلواتهم... هل هذا الكلام غير علمي و به الكثير من الغيبيات؟ أكيد !!

ما هو الجهل في ذلك... أي ديانة سماوية أو غير سماوية، بها الكثير و الكثير من الغيبيات... ديانة قد تعترف بشفاعة البشر، و غيرها قد لا تعترف... و لكن ذلك لا يهدم أصلهما ال"غيبي"... و الا فعقيدتنا صارت مادية و اقتربنا من مفاهيم الScientology و ما شابه...

- موضوع رد القساوسة ده مفهوم... لأن الخالق الذي نؤمن به رفض أن يرسل ملائكته لكل شخص منا، ليؤكد لهم انه هو الخالق الواحد الأحد... و ان دينه هو الدين الفلاني... و رفض أن يبعث لنا بملائكته، لتجيب عن كل سؤال يتبادر لذهننا... سواء كان ذلك لكي نتدبر في خلقته، أو لكي يحافظ علي حرية الارادة التي أرادها لنا... أو لأي سبب آخر

ماذا يمكن لهؤلاء القساوسة أن يقولوا... ما دامت المعلومات المتاحة لهم هي نفس المتاحة لنا... كل شخص يقول رأيه :happy:

ما دمنا نؤمن بالغيبيات... فلا يمكن لنا نفي ظهور العذراء أو المهدي أو الأنيباء، الا بناء علي فهم معين لنص معين... و خبرتنا الروحية في صلواتنا اليومية... أنا نفسي حصلي أكثر من معجزة شخصية... و أحداث يومية كتير قوي خلتني مع السنين أقتنع بعقيدتي دي و اثبت فيها... برغم نفي العلم لكل ذلك... لكن ده عقلي و خبرة حياتي... ما حدش يقدر يحكم فيهم غيري...

ربنا يباركنا ببركة العدرا... سواء ظهرت أو لا...

كل سنة و حضرتك بألف صحة و عافية و قدرة علي الكتابة...

ايمانك بالغيبيات لايستلزم ظهور العدرا....

يعنى مش مكتوب فى الكتاب المقدس انها هتظهر فوق الكنيسة...

ولا انت شفتها بعينك فوق الكنيسة

شارك هذه المشاركه


رابط المشاركه
شارك

الإيمان هو أمر نسبى... فما أؤمن به.. قد يكفر به الآخرين, و ما يؤمنون به.. قد أكفر به أنا! حد فاهم حاجة؟ :happy:

أى ان الامر يعتمد على ما تؤمنين به... و العقيدة اللتى تختارينها.

الايمان بأمر ما... لا يعنى بالضرورة انه امر صحيح و حقيقى و بديهى. ولا يعنى انه قد اصبح من المُسَلمات (بضم الميم)... لمجرد انك قد آمنتى به!

العقلانى و العلمانى يؤمن بالمادة و بالسنن الكونية... و بما يراه بعينيه بعيدا عن الغيبيات, اذا فهناك عقيدة يؤمن بها.. إذاً فإعتراضه هنا على ظهور العذراء نابع من ايمانه بالمادة و بالسنن الكونية.

أنا ايضا اؤمن بالسنن الكونية.. و هذا ما يبرر وجود دول كافرة قوية, و وجود دول مسلمة ضعيفة.. لان حسن أخلاقك لا يجعلك تطيرى مثلا.. او يعطيكى القدرة على ان تمشى على الماء!

تم تعديل بواسطة Scorpion

شارك هذه المشاركه


رابط المشاركه
شارك

السلام عليكم

الحقيقة انا مش عارف المعترضين والناقدين معترضين على ايه وزعلانين ليه

ليه بنفترض دائما اننا اوصياء على اﻻخرين خصوصا فى اﻻمور التى تتعلق بالعقيدة

ماحدث ليس بجديد ، ولم يضر احد فما وجه اﻻعتراض اذن ؟

وسواء كنا مسلمون او مسيحيون ، فاتركوا الناس يعتقدون كيفما يشاءون

شارك هذه المشاركه


رابط المشاركه
شارك

السلام عليكم

الاخوه الكرام جزاكم الله خيرا

استاذنا advisor

دخول المسلمين فى الحوار حول مصداقية ظهور العذراء أعتبره نوع من عدم اللياقة

هل نقول ايضا ان المسيحيين المشككين و منكرى الظهور ....ايضا عديمى اللياقه ..؟؟؟

العذراء التى تتكلم عنها اخى الكريم و التى يتم المتاجره حولها يعتبر الايمان بها و بمكانتهاجزء اصيل من عقيدتنا

هناك سوره كامله فى القرأن الكريم بإسمها و ربنا عز و جل اثنى عليها و رفع ذكرها فى القرأن الذى نتلوه الى يوم الدين

بل و اخبرنا نبينا صلى الله عليه و سلم ان مريم واحده من اربع نساء الذين هم من خير نساء العالميييييييين .

بل و انه لم يكمل من النساء الا اربع احداهن مريم ابنه عمران .

ثم يجيئ من ينشر حولها الخرافات و الخزعبلات بشهاده المسيحيين انفسهم و عندما نرفض ذلك بحكم العقل

و الدين نكون عديمى اللياقه ....اسمحلى بالاعتراض على ما قلت .

.

الموضوع واضح للجميع و لا علاقه له بالدين او العقيده ..و المتابع للاحداث السياسيه و ما يحدث داخل الكنيسه الاورثوزوكسيه

صاحبه الشرف فى تجلى العذراء عندها ..دون باقى طوائف المسيحيه الاخرى حول العالم يمكنه استقراء

دوافع هكذا اعلان .

.الاخ الكريم محمد

ليه بنفترض دائما اننا اوصياء على اﻻخرين خصوصا فى اﻻمور التى تتعلق بالعقيدة

ماحدث ليس بجديد ، ولم يضر احد فما وجه اﻻعتراض اذن ؟

وسواء كنا مسلمون او مسيحيون ، فاتركوا الناس يعتقدون كيفما يشاءون

عندما يصل الامر يا محمد الى ان تتعطل مصالح الناس بسبب تلك الادعاءات فيجب الاعتراض .

عندما تتجيش الفضائيات و تقوم بنقل الحدث المزعوم على الهواء و ترى منظر الناس و الزحام

و غسل العقول بالكلام الذى يقوله هذا او ذاك تحزن مما يدفعوننا اليه ..

الناس تجمهرت يا محمد و صار هناك بلبله ليس بين المسيحيين فقط بل و المسلمين ايضا

ليعتقد كل من يشاء ما يشاء .. و لكن بدون تعطيل و بدون تضليل ...ممكن ؟

.

نفس الكلام ينسحب على خرافات الصوفيه فى مصر و ما اكثرها .

تم تعديل بواسطة abaomar

شارك هذه المشاركه


رابط المشاركه
شارك
السلام عليكم

الاخوه الكرام جزاكم الله خيرا

.الاخ الكريم محمد

ليه بنفترض دائما اننا اوصياء على اﻻخرين خصوصا فى اﻻمور التى تتعلق بالعقيدة

ماحدث ليس بجديد ، ولم يضر احد فما وجه اﻻعتراض اذن ؟

وسواء كنا مسلمون او مسيحيون ، فاتركوا الناس يعتقدون كيفما يشاءون

عندما يصل الامر يا محمد الى ان تتعطل مصالح الناس بسبب تلك الادعاءات فيجب الاعتراض .

عندما تتجيش الفضائيات و تقوم بنقل الحدث المزعوم على الهواء و ترى منظر الناس و الزحام

و غسل العقول بالكلام الذى يقوله هذا او ذاك تحزن مما يدفعوننا اليه ..

الناس تجمهرت يا محمد و صار هناك بلبله ليس بين المسيحيين فقط بل و المسلمين ايضا

ليعتقد كل من يشاء ما يشاء .. و لكن بدون تعطيل و بدون تضليل ...ممكن ؟

.

نفس الكلام ينسحب على خرافات الصوفيه فى مصر و ما اكثرها .

السلام عليكم,

هذا بالضبط ما احاول قوله!

شارك هذه المشاركه


رابط المشاركه
شارك

أتفق تماماً مع موضوع التجاهل ونسيب الناس في حالها وإننا لا يجب أن نتدخل في عقيدة الأخرين ...

نعمل .. هم أحرار في عقيدتهم ولهم كل الأحترام ..

لكن عفواً

الموضوع لا علاقة له من بعيد أو قريب بالعقيدة ..

الموضوع يتعلق بالخرافة والجهل والفقر والكبت

الموضوع يتعلق بأبناء شعبي اللي خرجوا بعشرات الألاف في الشوارع وراحوا مناطق معينه بذاتها أنتظاراً لظهور الفرج ...... ثم ماذا ؟

أيوه العدرا ظهرت ... وبعدين ؟

كده إتحلت مشاكلنا يا سادة ؟

وأخص بالذكر أخوتي المسيحيين ... هو كده إنحلت مشكلة أحجام الأقباط عن المشاركة في الحياة السياسية وإنهم عازلين نفسهم تماماً عما يحدث في مصر ؟

ومن أنساق وراءهم من المسلمين وأتلطع بالساعات والأيام عشان يشوف التجلي والكلام ده ...

يا جماعة الخرافات والجهل خطر لا يقل عن الفقر والمرض ..

فوقوا بقى يرحمكم الله

أنا شامم ريحة مش كويسة هذه الأيام

وابتديت أسمع كلام وأتهامات من عينة " إنت بتقول بطيخ مولانا أقرع .. يعني بتعيب في الذات الملكية وبتقول مولانا أقرع لإن بطيخه اقرع "

عيب

عيب إني أجي أتصل ببرنامج أو أكتب واقول إني دي خرافه وعيب كده ... فجآه يتحول الموضوع لمعاداة السامية وأنت تُثير الفتنة الطائفية .... إحنا شعب واحد ونسيج واحد حرام عليك ... سيبونا في حالنا بقى ...

يا نهار إسود ... مين جاب سيرة فتنه وفاتن ونسيج وهدوم ؟

زي ما قلت لكم حاسس إن الموضوع فخ .. واللي يقرب منه يا ويله ... وبالتالي عشان أبقى حلو وكويس لازم أدخل أقول أيوه حصل والعدرا بتظهر في المناطق الشعبية .. حتى بالمرة بتقول لهم أنا جايه الوراق أو شبرا عشان ينتظروها ...

طب ليه ما راحوش لألاف الكنائس الموجوده في باقي المحافظات ؟

إشمعنى الاماكن دي ومين قال لهم إنها هاتظهر هنا وبالليل بالذات ؟

مره أخرى .. فوقوا يرحمكم الله

هذا نوع من الدروشة زي اللي بيعملوا الصوفية عندنا ...

وبالمناسبة من كام يوم كان عند الجماعات الصوفية إحتفال مش عارف إيه مناسبته ... وشوفت مساخر ومهازل وناس لابسه زي الأراجوزات وماشيين في مواكب جنائزية وحاجه تكسف ونحن في هذا العصر ... وللاسف منهم ناس مثفقين وأطباء وذوي مراكز مرموقه ...

وهيصه يا عم ومتاجرة ...

ويالا خلي تجارة المراجيح والحاجه الساقعه والترمس تنتعش زي ما حاصل في شبرا والوراق دلوقت وناس عملت ألوفات ..

شارك هذه المشاركه


رابط المشاركه
شارك

تابعت عن بعد ظهور العدرا و انشغال الصحافه و الفضائيات به

عن نفسى مقتنعه مليون فى المائه ان الموضوع نصب فى نصب

الذى اعرفه تماما ان اى معجزة بيكون لها سبب محدد و رساله محدده

ما هو سبب هذه المعجزة و ما هى الرساله

اذا كانت العذرا ظهرت فلماذا

و لماذا يقتصر الموضوع على مجرد ضوء

و لماذا لم تنبس العذراء ببنت شفه

لماذا لم تقول لنا لما اتت

لماذا لم تبلغنا رسالتها و تركت كل انسان و ما يستنتجه

حتى وصلنا الى من يقول انها جاءت بسبب انفلونزا الخنازير

لماذا تظهر عاليه عن الجميع لماذا لم تلامس الارض

و لماذا لم يحاول احد من الموجودين فى الكنيسه الصعود الى اعلى ليحدثها و ياخذ بركتها

لماذا بقى الجميع فى الاسفل

و لماذا تظهر بنفس الملبس التى اشتهرت به بسبب لوحات مرسومه من مخيله فنانين و ليس لانه حقا ملبسها

هناك طابور طويل من لماذا يدور فى راسى و لا اعتقد انه من الممكن ان اجد له اجابه شافيه

شارك هذه المشاركه


رابط المشاركه
شارك

Join the conversation

You are posting as a guest. If you have an account, sign in now to post with your account.
Note: Your post will require moderator approval before it will be visible.

زوار
اضف رد علي هذا الموضوع....

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


  • محاورات مشابهه

    • الشمول المالي بين الحقيقة و الأسطورة هل أنا فاهم غلط

      طوال العام الماضي نسمع ونرى إعلانات و تصريحات عن الشمول المالي  … و المتحدثون قامات عالية في الدولة. طبعا جايز جدا إن واحد عادي لا يعرف ما المقصود بالشمول المالي … و تم الاعلان انه تم وقف المدفوعات النقدية للحكومة … سمعتها بأذني و قرأتها بعيني. المهم نحن الآن في موسم دفع الضرائب و بالذات الضريبة العقارية … سألت العام الماضي  ممكن ندفعها بتحويل  بنكي … مش ده هو الشمول المالي   لا لازم تروح بنفسك و تدفع الضريبة …  أنا يظهر فاهم غلط

      في الملتقى العام لزوار محاورات المصريين

    • روز اليوسف: أمن دمياط يكشف زيف ادعاء شابين خطفهما ويصدر بيانا لتوضيح الحقيقة ‎

      أصدرت مديرية أمن دمياط اليوم الأربعاء بيانا حول حقيقة اختفاء شابين بمحافظة دمياط بعد غيابهما منذ ثلاثة أيام وعودتهما أمس في ظروف غامضة& بيان مديرية الامن ... لوسائل الاعلام بالنسبه لواقعه &a.. View the full article

      في أخبار العالم - world news

    • السيدة فـــــيـــــــــــروز

      ولدت فيروز باسم نهاد حداد, كأول مولود لوديع حداد وليزا البستاني, في الحادي والعشرين من تشرين الثاني/نوفمبر لعام 1935. كانت عائلة حداد تعيش في بيت متواضع مؤلف من غرفة واحدة في زقاق البلاط , الحي القديم المجاور لبيروت. نهاد, التي ستصبح فيما بعد فيروز, والتي تعتبر واحدة من أشهر المطربات في الوسط العربي والعالم أجمع, وأسطورة زمانها, كان لديها نزعة عفوية إلى الغناء منذ نعومة أظفارها. كانت نهاد معروفة بحبها الكبير للزهور. فقد كانت تمضي الكثير من وقتها بجمع الزهور البرية, تنسقها في باقات لتزيّن البيت

      في الفنون

    • الحقيقة وراء صورة «رشوة المطار» لمراسل BBC

      الحقيقة وراء صورة «رشوة المطار» لمراسل BBC  

      في الإعلام المصرى

    • عمر السيدة عائشة عند دخول الرسول بها ؟

      قرأت عدة مقالات فى هذا الموضوع مع الإلحاح أنها "مسألة هامة تصحح الفهم السائد دينيا " هكذا ببساطة. ما سبق كان إستهلالا لابد منه بداية أذكر - عن نفسى - أنى لا أذكر أنى قرأت فى كتب الدين الدراسية ما يلزمنى بمعرفة عمر السيدة عائشة وقت زواج الرسول بها ، كما أن معرفة تاريخ الصحابة - رغم أهميته - ليس جزءا من الدين. مقالين للأستاذ سليمان جودة يستنكر عدم إهتمام الأزهر ببحث للأستاذ إسلام بحيرى يثبت فيه أن عمر السيدة عائشة وقت أن تزوجها الرسول كان ثمانية عشر عاما و ليس تسع سنوات. لا أعرف مدى أهمية ه

      في هدى الإسلام

×
×
  • اضف...