الشامى رجع من كندا يا رجالة

[ELSHAMY]

متابعين

انت بالذات يا مديح الشامى مبسوط منك خالص...مستخبى ليه..؟

[ELSHAMY]

مسألة الصلاة للطلبة هل يسمح بها ، هل الطلاب المسلمون لهم وقت راحة مثلا للصلاة جماعة ، ؟؟؟؟

وماذا عن صلاة الجمعة ماذا يفعل" علي" ابن حضرتك ليصليها كيف تغلب على هذه المشكلة؟؟؟؟

اللى عاوز يصلى ما فيش حد حيمنعه...

على ابنى لسه لم تفرض عليه الصلاة لأن عنده 5 سنين..

لكن ما أعرفه ان المركز الاسلامى حيث تقام صلاة الجمعة بعيد عن بعض المدارس...و لا أعتقد بيسمح للطلبة الخروج من الدراسة لتأدية الصلاة....

[ELSHAMY]

أخوانى...أخواتى الأحباء

السلام عليكم و رحمة الله

نعود للسياق الزمنى لغزوة الشامى الى لندن..

قضى الشامى الايام الاولى فى لندن فى انهاء بعض المعاملات...و التقديم على بعض الخدمات مثل تليفون البيت و النت و كابل التليفزيون و كذلك الموبيلات...و كل دول تم الاتفاق عليهم من شركة روجرز...غالبا بتكون باكاج ديل ...يعنى شيلة على بعضها و تريح نافوخك....

كمان تم الاتصال بشركة الغاز و الكهرباء لمد الخدمة....كله بيخلص بالتليفون ...

و أيضا تم الحاق الاولاد بالمدارس كما سبق أن حكيت....

كان الجو فى لندن صيفى رائع مع بعض البرد اللذيذ المحتمل... المطر كان بيجى فى أى وقت ...و ممكن يستمر يومين...ثم يعود الجو ربيع تانى...

كان دايما الكونتينر فى البال...كنت باتصل بفيصل فى مونتريال كل يوم تقريبا...

وبعد 4 أيام تلقيت مكالمة من فيصل يخبرنى ان الكونتينر خرج من الميناء و الأن فى طريقه الى تورونتو عن طريق القطار...

بعد ساعات قليلة اتصل بى شخص قال انه من شركة النقل التى ستتولى نقل الكونتينر من تورونتو الى لندن.....و ان الكونتينر سيصل خلال ساعات الى لندن....

يا مسهل أخيرا فرجت....معقولة الكونتينر وصل....معقولة الخطة نجحت....

على فكرة أهم درس اتعلمته من موضوع شحن الكونتينر هو المثابرة....يعنى انك تسعى وراء تذليل العقبات و تحسن ظنك بالله...و تاخذ بالاسباب حتوصل باذن الله...., ده طبعا درس عام فى موضوع الهجرة...

الشامى كان فاكر نفسه أبو الرجالة و يقدر ينزل محتويات الكونتينر لوحده بمساعدة الاولاد و يمكن نستعين باولاد صديقى....

و لكن هيهات...... ففى جلسة مصارحة مع النفس تذكر الشامى انه ديسكاوى قديم...و حمولة الكونتينر مش شوية....127 صندوق بس....منهم صندوق مثلا فيه كنبة....فقرر الشامى انه يحترم نفسه و تاريخه العريق و يلم الدور و يدور على شيالين...

طبعا كندا مش زى شبرا.....يعنى مش حتطلع الشارع تلاقى شوية شباب عاطل تناديهم يعملو لك كل اللى انت عاوزه...الشوارع فاضية من العينات دى...

كان البديل الاستعانة بشركة متخصصة فى هذا الامر....

مسكت دليل التليفون (على فكرة لقيناه محطوط على باب البيت بعد وصولنا بيومين)....بدأت أبحث عن تليفوناتهم...هذه الشركات اسمها :

MOVERS

كان النظام انى أتصل بيهم و أقول لهم على الطلبات و نعرف السعر و نتصل بغيرهم الى ان نصل الى سعر معقول و بعدين نتفق....

كان الكونتينر حيصل على بعد العصر حسب كلام مندوب الشركة...و بعد عدة اتصالات اتفقت مع أحد الشركات على احضار 2 عمال لمدة ساعتين لتفريغ محتويات الكونتينر عند وصوله الى المنزل...

أجرة العامل فى الساعة الواحدة 50 دولار....

اتفقنا..... و عشان وجع الدماغ أعطيت رقم شركة الشحن الى شركة التفريغ عشان يتفقوا مع بعض على ميعاد الوصول...

كام ساعة و سمعت صوت دوشة خارج البيت...بصيت من الشباك لقيت عربية نقل مهولة و عليها يتربع الكونتينر الحبيب...

كان لقاءا مؤثرا....أخدت الكونتينر بالحضن بعد ما اتبهدل فى موانى العالم...لكن ها هو فى النهاية رابض كالأسد أمام البيت....

يا هل وصل الكونتينر سليم ؟؟

يا هل الصناديق اتفتحت و اتبهدلت فى جمرك ميناء مونتريال زى ما بيحصل فى موانىء بلادنا العامرة ؟

يا هل التغليف و التعليب كان جيدا ؟

يا هل ساعتين حيكفوا لتفريغ الكونتينر ؟

و ما حكاية "عبدول"...و "أحمد"....و "جمعة"...؟؟

حكايات مشوقة...الحلقة القادمة

تحياتى

[ELSHAMY]

السلام عليكم ورحمة الله وبركاته

أخى الفاضل

حمداَ لله على سلامتك وربنا يوفقك ويكتب لك الخير

أنا شاب عمري 29 سنه ليسانس حقوق حلمي الهجره لأوروبا خصوصا أيطاليا أو هولندا أو النمسا أنا عايش وبشتغل فى جدة حاليا حاولت أسافر من مصر شرعي لأوروبا مقدرتش علشان كده اضطريت للذهاب للعمل في جده واعتبرتها زي ترانزيت على ماألاقى طريقه لدخول أوروبا بس ياريت تنصحني أنت بالنسبه لكندا ايه طبيعة الحياه هناك من حيث المرتبات و توافر فرص العمل المناسبه ومدى ترحيب السكان الأصليين بالمهاجرين الجدد خاصة العرب والمسلمين وهل الهجرة لكندا مكلفه ولا مصاريف معقوله وهل الهجرة لكندا أفضل من اوروبا ولا أيه ؟؟؟؟؟ وما هي أقصر الطرق من جدة للحصول على الفيزا لأوروبا أو كندا ؟؟؟؟؟؟؟

أنا متزوج وعندي طفل وعلشان كده أنا عاوز أحسبها من جميع الجهات علشان مش عاوز أبهدلهم معايا ...

طبعا أنتم عارفين أن الحياة فى دول الخليج عموما تسمح لك بحياة كويسه لكنك مش هتقدر تعمل حاجه لمستقبلك ولا طموحك وعلشان كده أنا بفكر فى الموضوع ده ومش عاوز أتخذ أى قرار بدون حكمه ومشوره من الناس اللى عاشت وجربت قبلى ياريت تفيدنى وجزاك الله خيراَ

وآسف على أنى بتقل عليك ..

والسلام عليكم ورحمة الله وبركاته

أخى الحبيب عاشق الترحال

و عليكم السلام و رحمة الله

أبد يا راجل انت ما تقلتش و لا حاجة...!!!

أما بالنسبة لل 59 سؤال اللى حضرتك عايزنى أجاوبك عليهم فأعتقد لا الوقت و لا حتى صفحات المنتدى كلها حتكفى...و حتى لو كفت مش حتلحق انت تهاجر...

أنا أسف لكن أنصحك تقرأ الملف المثبت عن الهجرة الى كندا بالتفصيل...أنا شخصيا عملت كده قبل ما أسأل أى سؤال..و لما تخلص حتلاقى نفسك مش محتاج تسأل أى سؤال...

تمنياتى لك بالتوفيق

[ELSHAMY]

متابعين ... وبلاش كروتة فى الحلقات .. مش تكبر الخط وتضحك علينا

الله يا أبو علاء...انت أخدت بالك...

[ELSHAMY]

انا عاوز حلقة دسمة كدة يا دكتور ... علشان مزاجى مش ظريف اليومين دول..

انا عندى سؤال .. هو انت مأجر بيت هناك ولا اشتريت بيت..طيب الايجار كام ولمدة قد اية

سلامة مزاج سيادتك...بكرة حلقة دسمة بالكوليسترول

أنا مأجر البيت...الأيجار سنوى و قيمته....

مش حأقولك...

[ELSHAMY]

ELSHAMY مشاركة بتاريخ اليوم, 05:23 PM

إقتباس(alaashabana @ Oct 25 2008, 01:55 PM) *

متابعين ... وبلاش كروتة فى الحلقات .. مش تكبر الخط وتضحك علينا blink.gif

الله يا أبو علاء...انت أخدت بالك... whistling.gif

اصل كنا بنعملها فى موضوع التعبير ايام الثانوية العام ربنا لا يعودها ايام .. كنا نكتب موضوع عشر صفحات بس على سطر وتسيب سطر والكلمة ما شاء الله تشوفها من على بعد 100 متر ...

والله انت دكتور زى العسل ..انت دكتور اية صحيح ؟

أنا استشارى فى الأشعة التشخيصية...

[ELSHAMY]

الأخ الكريم الدكتور الشامي

أولاً ألف حمد الله على السلامة وربنا يوفقك إن شاء الله

ثانياً أنا سمعت إن أسعار العقارات حصل فيها انهيار كبير وخاصة في تورونتو

فهل يا ترى حضرتك مفكرتش تشتري بيت في ظل الظروف دي ؟

أخى العزيز

يبدو أنك لم تفرأ حلقة البحث عن السكن و فيها أنا ذكرت ان الواحد لا يستطيع شراء بيت الا بعد مرور فترة كافيه من الاقامة يبنى فيها سمعة تشفع له عند البنك فى الرهن العقارى..... غير كده حتكون نسبة الفائدة عالية جدا....و كذلك مقدم السعر حيكون عالى....

على فكرة انهيار أسعار العقارات صاحبه انهيار فى كل اللى حيلة الشامى...

شكرا لك على المشاركة

[ELSHAMY]

مساء الفل يا دكتورنا...

أسجل إعجابي بعودة السيزون الجديد من المسلسل...

وأسجل نجاحي في الــ 3 كورسات (الــ BLS والـ ACLS والـ ITLS) ، وربنا يستر ع الرابع بأه (السياسة الطبية لشركتنا :blink: )!

وآدينا عُدنا والعَوْدُ أحمد.

وتحياتي لك يا قائد من الناحية الأخري من شبه جزيرة العرب

تهامى...حبيبى

حمدا لله على سلامتك...ألف مبروك...و عقبال الباقى على خير ان شاء الله..

[ELSHAMY]

رووووووووووعه يا د/الشامي أكيد حضرتك كنت متفوق في

التعبير في المدرسه

متابعين

الله يكرمك يا أختنا بنت مصر

كنت متفوق فى التعبير و الحساب... :blink:

[ELSHAMY]

رائع كما هي عادتك يادكتور

واضيف كما قال احد الاعضاء وهو alaashabana ولكن بعد اذنه طبعا بنسق اخر بلاش بخل علينا يادكتور ( وانت كريم وتشكر بس عشمنا فيك كبير ) وكمان صغر الخط واكثر من مادة الحلقة الواحدة عشان احنا محتاجين فعلا لمعلوماتك وخصوصا انني لم يتبقى لي على السفر الا اقل من اسبوعين ومستمتع بمعلوماتك وخبرتك وحاسس انها هونت علي الامر كثيرا واجابت على مليون سؤال وسؤال كانت حائرة في رأسي كانت عامله لي قلق وصداع وخصوصا بما يخص الاولاد ولكن الان بعد ماعرفته منك ومن بقية الاخوة في هذا المنتدى ارتحت فعلا من كل ذلك فلك ولهم الشكر وبلالالالالالالالالالالالالالالالالالالالالالالالالالالالالالالالالالالالالالالا

لالالاش ب خ ل يادكتور

شكرا لك أخى عزام

بس الحقيقة و الله الوقت ضيق جدا...مع الكتابة لازم أرد كمان على أسئلة كتيرة سواء هنا أو على بريدى الخاص....الموضوع مش سهل...

بالنسبة لظروف حضرتك الشامى بينظم كورسات مكثفة للمسافرين قريبا...التكاليف مش كتيرة

[ELSHAMY]

أخوانى.....أخواتى

السلام عليكم و رحمة الله

خرجت من البيت فورا....شاحنة ضخمة فى الشارع أمام البيت....يفتح الباب و يقفز منه شاب صغير السن و الحجم...اسمر اللون....على وجهه ابتسامة لطيفة...

مد يده بالسلام قائلا (باللغة الانجليزية طبعا)....

استنوا حاترجم للأخوة اللى لسه بيدرسوا كورس انجليزى...

السائق: هاى سير (يعنى ازيك يا أبو الشام)

أبو الشام: هاى (نفس المعنى اللى فوق)

السائق: اسمى "عبدول"

الشامى و قد فغر فاه : عبدول ايه ؟

عبدول: أونلى عبدول....

الشامى: ار يو مسلم ؟ (يعنى بتشتغل ايه) :blink: وير أر يو فروم ؟ (يعنى من أى بلد)

و ذكر عبدول انه من جزيرة فى البحر الكاريبى....سبحان الله....و كمان متزوج و عنده بنت صغيرة اسمها صفية....مين يصدق....

كان عبدول شخصية لطيفة جدا... وكان مبسوط بالتعرف على الأسرة..

دقايق و حضرت سيارة فيها 2 شباب واحد أبيض و واحد أسمر...لابسين تى شيرتات عليها اسم شركة التفريغ...

عرفونى بنفسهم "أحمد" و "جمعة".....يا حلاوة....حسيت انى فى مصر ...طبعا ألفة شديدة حصلت بسرعة..

أحمد...شاب لبنانى...عايش فى كندا منذ 7 سنوات...و الجميل كمان انه متزوج من اسكندرانية و صاحب شركة التفريغ...

جمعة....شاب سودانى...فى كندا منذ 4 سنوات...عاش قبل كده فى اسكندرية...فى المنشية....بيشتغل عند أحمد...

ايه الحكاية...هو انا فى كندا و لا فى الانفوشى فى اسكندرية يا جدعان ؟

دى الحقيقة بعض الأدلة على الناس اللى بتشكك ان أسكندرية أجدع ناس....

كان الوقت أمامنا ساعتين مجانى لتفريغ الكونتينر...بعد كده العداد يعد 75 دولار فى الساعة...

كان أحمد يناول جمعة من الكونتينر...و جمعة يدخل الصناديق داخل البيت...بس بعد مرور ساعة كان لسه بدرى على الكونتينر ما يخلص...تم تغيير الخطة على أن يتم التفريغ بالكامل أمام البيت و بعدين يتم الادخال لاحقا عشان عبدول ما يزعلش...

أذن المغرب...طبعا كان لازم نعزم عليهم بالافطار....

عبدول كان فاطر علشان على سفر...ماشى...

جمعة كان فاطر مش عارف ليه... :sad:

أحمد قال لى انه فطر قبل المغرب بساعة عشان كان عارف ان عنده شغل :lol: :sad: ....وجهة نظر برضه...

تم التفريغ بالكامل بعد ساعتين ونصف...شكرت عبدول اللى كان متعاون معانا جدا..

شعر أحمد ان الموضوع كبير و يحتاج الى أفراد اكتر و معدات أخرى...راح الشركة و رجع معاه نفرين كمان...و الغريب انهم كانوا كنديين mfb: ...مش معقول مش لاقى حد من اسكندرية :lol: ...ما علينا زى بعضه...لازم برضه ننفع أهل البلد :blink: :lol: ...

يرجع مرجوعنا الى الكونتينر و الصناديق و التغليف...

عبدول أول ما وصل فتح البرشام اللى على القفل بتاع الكونتينر و أعطاه لى دليل على ان الكونتينر لم يفتح منذ تم شحنه من جدة.... :lol:

ازاى يا عبدول ؟...و كيف تم التفتيش؟...فال ان الكونتينر لا يفتح...بس بيدخل بكامله الى سكانر ضخم و تخلص القصة فى دقايق...

و تصديقا لكلامه...الصناديق لم تمس...بنفس تغليفها اللى تم فى جدة...

طب و كان لازمة استمارة ابى 4 ايه.... و اللستة...و مش عارف ايه...الحقيقة لا أدرى...

ولا صندوق اتفتح...و لا الكونتينر نفسه اتفتح...ده اللى حصل

نيجى للتغليف....الحقيقة و لا أروع من كده....الشركة فعلا محترفين و فاهمين شغلهم جدا...يعنى تلاقى صندوق...تفتحه تلاقى لفة...تفتحها تلاقى ورق اسفنجى...تفتحه تلاقى فى الأخر كباية....منتهى الحرفية... مافيش حاجة اتكسرت ولا حصل فيها خدش...

حتى كان فيه نضارة مكسورة راميها فى البيت...برضه غلفوها بعناية و بعتوهالى عشان أرميها فى كندا...

و اللى موتنى من الضحك انى اثناء فتح أحد الصناديق هرب منه صرصار صغير....لاحقته الفيلدمارشال أم على بقذيفة شبشب أردته قتيلا فى الحال...

بقى الصرصار استحمل البهدلة فى الموانى...و سافر شهر من غير أكل...عشان يحقق حلم الهجرة الى كندا...و بعدين أول ما يوصل يموت الموتة الفظيعة دى....أعمار....

على فكرة الصرصار ده مش بتاعنا ده من الكونتينر...

127 صندوق تم تنزيلهم...و ادخالهم الى البيت

المنظر داخل البيت بقدر ما كان مش لطيف...بقدر ما أسعد الشامى انه أخيرا حينام على سريره و مرتبته...

كان لازم نتفق مع أحمد انه يبعت لنا عامل تانى يوم يساعدنا فى فك و تركيب العفش ..

و هنا فجر أحمد المفاجأة....

ترقبوا مغامرات الشامى فى فرش البيت...

يتبع

[ELSHAMY]

الله يكون في عونكم ، كل ما أتخيل شكل الكراتين ، عمل بلا نهاية استريحتوا و نمتوا بعدها كام يوم يا دكتور ، الحمد لله انها عدت ربنا يهون عليكم يا دكتور كل عسير

فعلا يا م بلال الموضوع كان صعب شوية...بس كل شىء اتنسى و البيت اتفرش الحمد لله

عقبى لكم

[ELSHAMY]

الأخ الكريم الدكتور الشامي

أولاً ألف حمد الله على السلامة وربنا يوفقك إن شاء الله

ثانياً أنا سمعت إن أسعار العقارات حصل فيها انهيار كبير وخاصة في تورونتو

فهل يا ترى حضرتك مفكرتش تشتري بيت في ظل الظروف دي ؟

أخى العزيز

يبدو أنك لم تفرأ حلقة البحث عن السكن و فيها أنا ذكرت ان الواحد لا يستطيع شراء بيت الا بعد مرور فترة كافيه من الاقامة يبنى فيها سمعة تشفع له عند البنك فى الرهن العقارى..... غير كده حتكون نسبة الفائدة عالية جدا....و كذلك مقدم السعر حيكون عالى....

على فكرة انهيار أسعار العقارات صاحبه انهيار فى كل اللى حيلة الشامى...

شكرا لك على المشاركة

عفواً يا دكتورنا العزيز أنا قرأت موضوعك بالكامل

بس أنا كنت أقصد إني سمعت إن حصل إنهيار كبير في الأسعار وإن دي ممكن تكون فرصة لشراء بيت صغير نقداً وليس أقساط

عموماً ربنا يعوض عليك ويكرمك ويوفقك وإن شاء الله تشتري أحسن بيت في القريب العاجل

أخى MOAB

عندك حق لكن الموضوع ليس فى طاقتى حاليا....و أظن ايضا ولا فى القريب العاجل...ربك يرزق

شكرا لك

[ELSHAMY]

أما عن جد خفة الدم دي رزق من عند ربنا

:lol: mfb: :blink:

وسبحان من أعطاك منها الكثير يا دكتور شامي

الله يحفظك وأهلك أجمعين ومن نجاح إلى نجاح بإذن الله

متابعين ومنتظرين مفاجأة الواد :lol: wst:: أحمد المووووووووفر !!!!

أخى كريم

الله يجبر بخاطرك...و شكرا لكلماتك الجميلة..

تقبل تحياتى

[ELSHAMY]

ياعيني والله على الصرصار الغلبان الي استحمل الجوع والبهدله

علشان يوصل كندا الحبيبه و ياكله لقمه نظيفه يقوم يموت الموته دي :lol:

بس أظن ان الفلدمارشال برضوا رحمته من القهره الي كان الله يرحمه

هيتقهرها لما يشوف صراصير كندا :lol: mfb:

أبدا يا بنت مصر...انتى فاكراه صرصار هفتان....ده اجتاز الكشف الطبى و امتحان الايلتس... :blink:

لكل أجل كتاب....وما تدرى نفس بأى أرض تموت....

هى دى الدنيا...مش دايمة لأى صرصار...

بس الحقيقة نفسى أعرف الصراصير الكندية مستخبية فين ؟

[ELSHAMY]

أما بالنسبة للجريمة الشنعاء التي اقدمت عليها حرمكم المصون والتي نحتج وبشدة عليها لاقدامها على قتل حشرة بريئة بدون ذنب اقترفته او جرم فعلته الا لانها صرصوووووووور ؟ ايه ده يادكتور انتو ماسمعتوش بموت الرحمة والا ايه بالشبشب ياراجل ياطيب ؟ هو في ايه ؟ انا بكتب ايه ؟ اه فلم وثائقي من الجزيرة ؟ بدأنا احتجاج ومعارضة واحنا لسه هنا ؟ الله يستر ؟

ربنا يوفقك ويسعدك ويسهلك امورك والف شكر وتحية وتقدير وفي انتظار المزيد من روائعك

شكرا أخى عزام...

"من لم يمت بالشبشب مات بغيره"..

تم تعديل 27 أكتوبر 2008 بواسطة ELSHAMY

[ELSHAMY]

أخوانى....أخواتى

السلام عليكم و رحمة الله..

فى هذا اليوم كانت هناك حاجة واحدة لازم تتعمل قبل النوم وهى فرش السراير....ما أحلى النوم على مرتبتك اللى انت متعود عليها خصوصا بعد مجهود يوم طويل...

طبعا جميع أفراد الجيش ناموا كالقتلى من كتر التعب...

فى الصباح كان ميعاد العامل معنا الساعة 11 ...حضر فعلا فى ميعاده...و كان الشامى محضر له كل الكوارث الكبرى اللى عايزة فك و تركيب....كنت مصدرهم له عشان يعيش حياته و يحلل الفلوس اللى حياخدها...و الحقيقة طلع عين والدته على ما خلص....

اللى يضحك ان فيه بعض قطع الاثاث نسينا كانت متركبة ازاى أصلا mfb: ....لكن بعد عدة محاولات و تباديل و توافيق اتركبت ....تقريبا زى ما كانت...

استغل الشامى هذه الفرصة...و بدأ محاولات تركيب عوارض الستاير :blink: ....و نجح فى ذلك نجاحا مبهرا بس مع بعض الجروح و الكدمات :lol: ....معلش مافيش معركة من غير تضحيات...ما تنسوش احنا فى حرب يا أخوانا..

كنا فى الليلة السابقة قد قمنا بتخزين معظم الصناديق فى الدور الأرضى فى حجرة الخزين.....و هى حجرة كبيرة جدا تمتد فيها مواسيرالمياه و الغاز و الكهرباء و التليفون.... و ما كان علينا بعد كده الا فتح الصناديق واحد واحد.....

الجميل ايضا ان شركة التغليف عملوا حاجة ظريفة و هو انهم كتبوا على كل صندوق من الخارج محتوياته .... وده سهل المهمة جدا فى توزيع مكونات الصناديق على الغرف..

محصلة الموضوع ده كمية مهولة من الاوراق و الكراتين امتلأ بها الجراج عن بكرة ابيه.... لحد هذا الوقت ما كنتش عارف ايه هى طريقة التخلص من هذه النفايات....الموضوع طلع كبييييير.....

و دى فرصة جيدا لنتعرف على نظام الزبالة هناك...

طبعا حيتضح الفرق بين نطام الزبالة فى كندا....عن النظم الزبالة اللى فى أماكن أخرى من العالم...

تقوم البلدية بجمع القمامة من أمام كل منزل فى كل حى كل 8 أيام عمل يعنى بالانجليزى

Every 8 buisiness days

و بالفعل فى اليوم المعروف للحى تجد كل ساكن بيخرج من الليلة السابقة صناديق الزبالة و يضعها أمام بيته..... و بعضهم بيضع الاكياس و يقلب فوقها الصندوق عشان اذا ما مطرت ما تبقاش العملية خلطبيصة......

طبعا ظهر لى ان الشعب الكندى ما عندوش زبالة كتير زى حالاتنا....يعنى كل ساكن لما يتمطع بعد 8 أيام يطلع كيس صغير و لا كيسين...

و ده أكيد يعطينا انطباع أخر....ان الناس بتشترى حاجتها على قد استهلاكها....

و عرفت كمان اننا لازم نشترى صناديق خاصة لونها رمادى تضع فيها أكياس الزبالة و أخرى لونها أزرق للحاجات اللى ينفع فيها اعادة تدوير

Recycling

يا نهار أزرق على رمادى...طب حنعمل ايه فى اطنان الورق و الكراتين اللى حدانا دى..

مافيش مقلب هنا يا جدعان....؟؟

مافيش ...

و لا حتى صندوق زبالة كبير على ناصية أى شارع ...؟؟

أبدا

الحل كما تفضل أخونا أحمد انه يتفضل علينا و ياخذ الحاجات معاه فى عربية الشركة الكبيرة و يوديها على مقلب الزبالة العمومى خارج البلد.....طبعا دى بتتحسب ساعة عمل لعامل...يعنى 50 دولار.... :lol:

الحقيقة لما شفت كمية الورق و الكراتين اللى تم بها التغليف حسيت ان شركة التغليف دى بتخسر...

بعد الأفطار...كلمنى صاحبى عشان نروح نصلى التراويح فى المسجد...طبعا وافقت على الفور مع اننا كنا فى منتهى التعب...

أصدر الشامى أوامره لكل الميليشيات بالاستعداد للذهاب...كنت عاوز الاولاد يشوفوا مظاهر اسلامية فى المدينة عشان نزود ايمانياتهم و نرفع روحهم المعنوية...

ركبنا السيارة و مشيت خلف سيارة صديقى...الحقيقة كانت فكرتى عن الموضوع انى ممكن الاقى مسجد صغير ...فيه 15 أو عشرين واحد بيصلوا...لكن أول ما وصلت هالنى ما رأيت...لدرجة أن الدموع فرت من عينى.

يا ترى ماذا رأى الشامى ؟

و كيف شكل المسجد ؟....و كم عدد المصلين ؟

بكرة حلقة حلوى...

يتبع

[ELSHAMY]

السلام عليكم ورحمة الله وبركاته

ربنا يكرمكم جميعا أخجلتم تواضعنا ، ده انتم الخير والبركة وطبعا الدكتور الشامي صاحب الموضوع ، أنا في الواقع باستخدم النصاحة الإيمانية ، لو دعيت لأخوتي في الإسلام الملائكة هترد ولك بالمثل ، يعني دعوتي فوقهم دعوة من الملائكة مجانا .

الإخوة والأخوات الأفاضل ربنا يجعلكم جميعا من سعداء الدارين ، ومن الموفقين برضا الله ، ويرزقكم بصلاح قلوبكم مع الله وذريتكم

و أزواجكم( الزوج تطلق على المذكر والمؤنث في اللغة العربية).

وصفة بنص ريال ( بعد إذن د. شامي) تزن طن:

- فز بدعوات الوالدين

- دعاء المسلم للمسلم بظهر الغيب مستجاب

- دعوة المسافر مستجابة

- احذر من دعوة المظلوم عليك

الله يلهمك الدعاء ويرزقك الإجابة ويثيبك على دعاءك له في كرم أكتر من كده.

بصراحة يا دكتور الشامي أنا أضم صوتي للأستاذ شاب مصري وتتجه للكتابة والله هتكسب دهب، أسلوبك مميز ربنا يكرمك

كعادتك أم بلال....أكرمتينا...و أغدقتى علينا من فضلك...

بالنسبة لموضوع الكتابة...الحقيقة أنا عايز حد يكتشفنى....

أخويا س س مطنشنى..

بالعكس يا دكتور .. وإنت عارف إني بأتبنى كل المواهب الشابة فبالرغم إني لا أفكر في الهجرة وبالذات لكندا عشان صحتي ما بتجيش عالتلج .. إلا إني باتسلل بعد ما كلكو تناموا وأقرا الموضوع وأستمتع بأسلوبك ... ويمكن إنت ماخدتش بالك إن روحي ترفرف فوق المكان وتشجعك تشجيعاً غير مباشر وهي تقول : إستمر يا شامي يانبي .. ربنا يستر طريقك ...

اخوك س س من عالم الأرواح ( أرواح وملبس وكرملله وفندام )

الله يكرمك يا س س

فعلا أنا شفت روحك طالعة فوق الموضوع...

ربنا يديك طولة العمر

[se_ Elsyed]

أخوانى...أخواتى

السلام عليكم و رحمة الله

اليوم - عذرا - سنخرج قليلا عن السياق الزمنى للقصة و ندخل مؤقتا للحديث عن أهم ما يميز كندا ..و هو موضوع التعليم...

حلقة اليوم شيقة جدا...و هى مهداة للسادة مسئولى وزارة التربية و التعليم. :lol: ..يمكن يعرفوا ليه كندا أصبحت الأولى فى التعليم على العالم...و احنا مش على الخريطة أصلا...اذا كان الأمر يهمهم... :lol:

يشمل مصطلح الهاى سكول (4سنوات دراسية) يعنى الأطفال ابتداءا من الصف التاسع و حتى الصف الثانى عشر...

خلال هذه المرحلة يدرس الطالب 32 مادة مختلفة بواقع 8 مواد دراسية كل عام على حدة...

كل عام دراسى بيكون 2 سيمستر...يعنى 4 مواد فى كل سيمستر...

سهلة دى...؟

يختار الطالب المواد التى يحب أن يدرسها على مزاجه...و خد بالك من "يختار" دى...لأن ذلك بيتم حسب ميول الطالب و رغباته و تطلعاته المستقبلية...يعنى مثلا الطالب غير مجبر مثلا انه يدرس مادة التاريخ اذا كان ميوله فى الأخر أنه يدرس طب....ليه نعكنن عليه و على عيلته اذا كانت ميوله مش تاريخية...

يجلس الطالب فى أول أيام الدراسة مع مسئول أو مسئولة توزيع المواد الدراسية و يتم اختيار المواد المرغوبة بحرية تامة مع بعض النصائح اللطيفة من المسئول حول اختيارات الطالب و ماهية المواد التى سيدرسها حتى لا يفاجأ بمكونات فى المنهج غير متوافقة مع اسم المادة التى اختارها للدراسة...

و كمان مع معرفة رغبة الطالب فى المستقبل يتم مساعدته فى اختيار مواد أخرى قد تكون مكملة لأختياراته...

و هناك مواد كنا نظنها ترفيهية كمادة الألعاب الرياضية و الموسيقى و الدراما و الفنون....الا انها تعامل بنفس الجدية التى تعامل بها المواد الأخرى و لها نفس الدرجات فى التقييم النهائى....

و يبقى أن المطلوب من الطالب قضاء عدد معين من الساعات الدراسية فى كل مادة يختارها...و يتم تقييم الطالب بامتحانات دورية مع مراقبة شديدة لتقدمه فى المادة المختارة و استيعابه لها خلال كامل فترة الدراسة...و قد يتدخل مدرس المادة و ينصح بعدم ملائمة ميول الطالب لهذه المادة اذا لاحظ عدم قدرته على التجاوب...و ساعتها يتم اخطار الأهل و الطالب بذلك ليتم احتيار مادة أخرى بديلة....

أيضا من حق كل طالب بنفسه أن يغير فى اختياراته حسب قبوله للمادة بعد بدأ الدراسة...فقد يرى الطالب أن اختياره لم يكن دقيقا و أنه مش مرتاح للمادة...للمدرس ...لزملائه... للكرسى اللى قاعد عليه mfb: ....أى شىء .....فيكون من حقه تغيير هذه المادة فى الأيام الأولى للدراسة...

طبعا لكل مادة مدرس و فصل خاص لتدريس هذه المادة... و يتحرك الطلبة الى مكان الفصل وليس العكس ...يعنى الفصل و المدرس ثابتين و يقوم الطلبة بعد كل حصة بالذهاب الى مكان الحصة الجديدة...

لكل فصل طاقة استيعابية...يعنى لازم كل طالب يكون محضر المواد اللى حابب يدرسها و يحجز مكان بدرى قبل بدء العام الدراسى...

فى حالة الطلبة اللى حضروا متأخرين (زى حالاتنا)...فان الست المسئولة قامت بكل ود و تفهم لظروفنا كمهاجرين جدد بأن تم استثناءنا من ذلك و قام الأولاد باختيار المواد التى يرغبوا فى دراستها براحتهم...بل أكثر من ذلك ذهبت معنا بنفسها لكل مدرس تستأذنه (مش عايز أقول تؤمره) انه يقبل طلبة جداد عنده حتى لو كان استكفى...

ناس ذوق...ذوق...ذوق...

الفصل مساحته مهولة...و هناك حرية للطلبة فى الجلوس على طاولات متفرقة دائرية منتشرة فى مساحة مفتوحة...و يجلس الطلبة فى مجموعات نقاشية...تدار فيها المناقشات بحرية تامة....و يترك للطالب فيها المجال للتعبير عن أراؤه...و هى فى الوقت ذاته فرصة يقتنصها المدرس لوضع تقييم للطالب دون أن يشعر عن مدى فاعليته فى الصف و اشتراكه فى المناقشات و قدرته على الخلق و الابداع كذلك اعتماده على نفسه...

الفصول التى يكون بها جزء عملى فى الدراسة تحتوى على أحدث الأجهزة للتدريب و التطبيقات المختلفة...

طبعا ناهيك عن الفصول الخاصة بمهارات معينة...و المكتبة الكبيرة...و ورش العمل و المعامل و معامل الكمبيوتر.... و غرف الموسيقى...و المسرح...و الصالة المغطاة للألعاب الرياضية و هى بحجم ملعب كرة السلة....و المطعم..و المتحف...و صالة الكئوس و الدروع التى حصلت عليها فرق المدرسة...

المدارس هنا ليس لها سور ...سور ليه ؟ مافيش سور عشان مافيش حد حينط من عليه و يزوغ....ثم يزوغ يروح فين...عدم حضوره للفصل يسجل عليه و بالتالى يسقط تقييمه فى هذه المادة....و هو الخسران...

معظم المدارس محاطة بكمية خضرة غير عادية...مدرسة بنتى محاطة بملعب كرة قدم...و ملعب كرة قدم أمريكية...و 8 ملاعب تنس...

الحصة الواحدة مدتها 75 دقيقة...و يكون يوم الطالب عبارة عن أربع حصص بينهم فترة راحة و غذاء مدتها 75 دقيقة أيضا يمكن خلالها للطلبة الخروج من المدرسة حتى الى البيت و العودة.

يستلم كل طالب فى بداية الدراسة دولاب خاص به (لوكر) يضع فيه كل احتياجاته عشان مش لازم يشيل على ضهره شنطة كبيرة....و ياخد معاه فى البيت الحاجات فقط اللى يحتاجها لمراجعة مادة معينة أو عمل مشروع على الكمبيوتر أو ما شابه...

لا يوجد زى مدرسى معين...

كل ما سبق ذكره مجانى...ماعدا 5 دولار تمن القفل بتاع اللوكر و 25 دولار تمن الصور التى ستلتقط للطلبة خلال الدراسة و كارنيه المدرسة....استغلال فظيع.. :blink:

بمناسبة الصور...مسئولة المدرسة جاءت لتستأذن اذا كنا لا نمانع ان يظهر الأولاد فى الصور الجماعية خلال المباريات و المناسبات المختلفة التى يقوم التليفزيون و الصحف بتصويرها فى المدرسة...كوميديا و الله...

لسه الموضوع فيه كلام تانى

حد عنده سؤال...

سؤال ؟!!!!

سؤال إيه بقى ده أنت سديت نفسي وكان في إيدي كوباية شاي روحت رميها وإترميت على المكتب وفضلت أعيط

يا راجل ده حتى في المدارس الإنترناشونال اللي هنا في السعودية واللي قلنا فرق السما والأرض بينها وبين مدارس مصر .. برضوا بيشتغلونا وبيعبوا دماغ العيل وكإنهم بيعبوا صفيحة سمنه واهم حاجه إنهم يخلصوا المنهج ويقفلوا الموضوع ..

وكله كوم وشنطة المدرسة اللي جابت لي شخصياً " لومباجو " وكلو في رجلي كوم تاني ... والله العظيم يا دكتور ولا لك عليه يمين .. الولا عُمر إبني - مانت عارفو - في سنة تانية إبتدائية .. او بلغة الفرنجة في جريد تو ... عنده شنطة زي شنطة السفر بالظبط .. بل هي شنطة سفر بالفعل ( والله يا عم بنستخدمها في التغليف والتعليب في اجازة الصيف وإحنا نازلين مصر .. وفي الشتا بنرجعها لأصلها كشنطة مدرسة .. شنطة مالتي فانكشن يعني ) .. المهم اتحدى بطل العالم في رفع الأثقال إنه يحركها من مكانها سواء نطر أو خطف ... والواد يا عيني الإسبوع اللي فات كان أول إسبوع في الدراسة ونازل السلم وهو لابس اليونيفورم وفرحان وواخد ساندوتش الجبنة بالقوطة وزمزمية الميه ومطوته في جيبه وقلمه في شنطتة وهو قاطر المقطورة دي وراه ويروح متكعور عالسلم وواخده من اوله لاخره زحف ..

فقلت ما بدهاش .. الواد هايروح مني وهو مش ناقص كسور ... فوضعت خطة سميتها " اللي يحب النبي يزوق " وقلت إن عُمر بعد ما يذاكر ويخلص دروسة ويحضر جدول تاني يوم وينام على العشا كده أروح انا مأجر 5 صعايدة وأديلهم مرتب ونيجي نتكاتف جميعاً ونشيل الجثة دي ونحطها في شنطة عربيتي .. الموضوع ده هايتكرر كل يوم تحت جُنح الظلام والناس نيام .. والحمد لله لي صديق أولاده في نفس المدرسة فبييجي ياخد النقلة بتاعت الصبح .. فهاسيب الريموت كنترول الإحتياطي لسيارتي معاه بشكل دائم وييجي هو الصبح يفتح ويشيل الجُثة .. وفي الرجوع أنا بأتولى اللودينج والآب لودينج والتدفيس والتشوين ...

كل الفيلم ده عن شنطة حمزة بس ..واخدلي بالك ...

أما المناهج ... فبرضوا الله يسامحك .. سديت نفسي وهاروح أولع في المدرسة وفي هاركورت وفي الكل كليلة .....

بالمناسبة .. تسمح لي أبروز مداخلتك دي عن التعليم في كندا وأطبقها على شكل مثلث واعلقها حجاب في صدري عشان الحسد ؟