الشامى رجع من كندا يا رجالة

[ELSHAMY]

اخونى ...اخواتى الأحباء

مغامرات الشامى و المواقف التى مرت به و المفاجأت الحلو منها و اللى مش حلو كانت المرة دى بجد كلها جديدة.....ما حدش بياكلها بالساهل...

المهم تستمتعوا و تستفيدوا من أخطائى ..و تدعو لى اذا كان هناك شىء صح عملته.....ده الحاجة الوحيدة اللى أنا عايزها...

هذه المرة بدأ الاعداد للرحلة مبكرا و هو بالطبع أمر محمود جدا فى أمثال هذه الرحلات خصوصا اذا كان يتخللها أعياد أو أجازات....

بالنسبة لى كان الوقت اللى اخترته لهذه الغزوة ملىء بكل ما يخطر على بالكم من أنواع الاجازات.....أجازة حج – كريسماس – أخر السنة...كله موجود....لذلك كان حجز الطيران بدرى أمر محمود....المليجى...

كان على الشامى الذهاب الى أرض الوطن فى زيارة خاطفة قبل السفر الى أرض المهجر...كان هناك بعض الاوراق الرسمية التى يتوجب عليه عملها بنفسه بالاضافة الى بعض الحبشتكانات الأخرى..

كان من الصعب العثور على شركة طيران واحدة تقوم بالليلة كلها خصوصا ان الطيران السعودى و المصرى العائد الى مصر كان مكدسا بالحجاج العائدين..... المهم بشوية اتصالات و معارف و غيره لقيت بالعافية حجز على رحلة مصر للطيران الى الاسكندرية يوم الثلاثاء 16 ديسمبر بحيث ابقى فى اسكندرية حتى الخميس 18 و الحجز الأخر الى كندا على الخطوط الايطالية ALITALIA فجر الجمعة من مطار القاهرة الى روما (ترانزيت 4 ساعات) و منها الى تورونتو حيث كان من المقرر الوصول اليها حوالى الساعة 2 ظهر نفس اليوم بعد جمع و طرح فروق التوقيت...

ولكن هل تأتى الرياح بما تشتهيه السفن......الجواب: غالبا لأ...

أولى المفاجأت – و ما أكثر المفاجأت فى هذه الرحلة – كان اتصال تليفونى من مكتب مصر للطيران...:

صوت شاب مهذب : د. الشامى

الشامى: نعم

الشاب المهذب: معك مكتب مصر للطيران فى جدة

الشامى مستبشرا: أهلا وسهلا (قلت دول أكيد بيأكدوا معايا الحجز- ناس فعلا ذوق ذوق)

الشاب اللى لسه لحد دلوقت مهذب: معلش يا فندم رحلة مصر للطيران اللى حضرتك حاجز عليها يوم 16 اتلغت......

الشامى بصوت مش مهذب قوى:يعنى ايه ؟.....

الشاب وقدأ بدأ صوته يتغير: باقول لحضرتك اتلغت ....و حولناك لرحلة يوم 17

الشامى مستكينا: بس أنا حضرتك نازل مصر يومين فقط و عندى بعدها رحلة الى كندا....بكده سيادتك نسفت لى برنامج رحلتى كلها من أساسه...طيب مش ممكن تشوفلى اليوم اللى قبله أو حتى نفس اليوم على القاهرة..

الشاب بلهجة حاسمة: و الله يا فندم ما اوعدكش ...انت عارف ده موسم عودة حجاج و الاماكن كلها محجوزة...

الشامى باكيا: طيب عملتوا ايه فى بقية الركاب....؟

الشاب قرفانا : حولناهم تانى يوم....مش فاضل الا انت و راكب أخر...

الشامى ساخرا: يعنى بقيت أنا المشكلة دلوقت...

الشاب :خلينا نحاول يا فندم و انا حأضعك على قائمة انتظار اليوم اللى قبله....ابقى راجعنا

...... و بدأت سلسلة المراجعات الشامية لمكاتب مصر الطيرانية و أخيرا فى مراجعتى لهم رقم خمسة.....بدأ يظهر فرج الله....

يتبع....

[ELSHAMY]

احبائى الغاليين بالذات اللى حاجزين فى الصفوف الأولى رجاء التقدم للأمام عشان المكان يتسع للناس اللى واقفة برة.....

ما شاء الله بمتابعتكم و مشاركاتكم القيمة وصلنا الى 100 صفحة....و قريبا جدا عداد القراءات حيعدى المائة ألف يمكن بكرة أو بعده......

ياترى مين سعيد او سعيدة الحظ صاحب المداخلة رقم 100000 و اللى حياخد جايزة مميزة من الشامى شخصيا....

نكمل الرحلة....

أخيرا لقيت حجز فى اليوم اللى قبله....

وصلت الى أرض حبيبتى أسكندرية....يكفيك يا باشا تشم ريحة جوها من ساعة ما تطل براسك من الطيارة....

الحمد لله حاجات قليلة من اللى كنت عايز أعملها عرفت أعملها...و قضيت و قتى فى زيارة اخواتى وبعض تليفونات من باب صلة الرحم....

كان ميعاد طيارة ALITALIA الساعة 4 فجر الجمعة 19 ديسمبر من القاهرة.... و قام زوج أختى أكرمه الله بتوفير سيارة خاصة بسائق لزوم توصيل القائد الشامى الى باب المطار.... مش عارف الراجل ده بيحبنى ليه مع انه مش عضو فى المحاورات خالص...

و بمناسبة ALITALIA افتكرت لما كنت فى فصل المتفوقين فى مدرسة العباسية الثانوية.... و كان أحيانا تفوقنا بيظهر مش بس فى الدراسة لكن فى حاجات تانية ....فكان أن قام أحدنا بعمل تفسير لمعانى و مدلولات شركات الطيران العالمية و كان نصيب ALITALIA منها كالأتى:

A = Always

L = Late

I = In

T = Travelling

A = Always

L = Late

I = In

A = Arrival

طبعا لم يكن يخطر ببالى فى هذه المرحلة ان حييجى عليا اليوم اللى اشوف فيه هذا الشعار يتحقق....بل أكتر منه كمان زى ما حأحكيلكم...كأن الخطوط الايطالية بتنتقم مننا فى شخصى الضعيف..

فى المطار بعد انهاء الاجراءات تلقيت اتصال تحذيرى من الفيلدمارشال أم على من كندا بتقولى ان الاخبار فى قناة الطقس فى لندن و تورونتو تحذر بشدة من عاصفة ثلجية عنيفة ستضرب المدينتين يوم الجمعة 19 و ان على السادة المسافرين على الطرق السريعة العدول عن ذلك لأن مجال الرؤية منعدم...و لما الجماعة دول يقولوا منعدم يعنى منعدم.... و هذا الكلام ماكنتش مصدقه قوى لحد ما شفته لاحقا خلال وجودى فى كندا.....

طبعا هذا التحذير كان له سببه و هو ان القائد الشامى كان استأجر من على النت سيارة فان لأستلامها من مطار تورونتو و الذهاب بها الى لندن عشان تنفعنا فى الاجازة .... كانت النية موجودة لشراء سيارة فى هذه الرحلة لأن الفيلدمارشال و الجنود كانوا اتبهدلوا بما فيه الكفاية خلال ال3 شهور اللى فاتوا فى التلج من غير سيارة....

عدم و جود سيارة للأسرة فى كندا فى ظل الظروف الجوية الثلجية هو ضرب من المستحيل.... طبعا كمان أوفر على نفسى الضرب من الجندى على اللى كان بيتبهدل كل يوم فى مشوار الذهاب الى المدرسة....العودة كانت مع باص المدرسة....

الولد بدأ الكفاح بدرى من KG2 ...طبعا مش من السهل افهامه فى هذا السن ان ما كانش فيه فلوس كافية لشراء سيارة فى هذا الوقت و ان التعليم شىء هام فى حياتنا.... و ان الرسول صلى الله عليه وسلم قال : اطلبوا العلم و لو فى الصين لأن ما كانش فيه كندا زمان.... (الحقيقة مش عارف مدى صحة الحديث و اقترح على أختنا أم بلال تحقيقه)....

المهم تلقيت المكالمة بشىء من عدم الجدية و كانت نفسى الأمارة بالسوء تميل الى عدم سماع نصيحة أم على و كنت بصراحة ناوى أسوق السيارة من تورونتو الى لندن و اهى تبقى تجربة جديدة حلوة أحكيلكم عليها....شفتوا الشامى قد ايه مستعد يضحى بحياته عشانكم...

و لكم كما قلنا سابقا فان الرياح (خصوصا اذا كانت ثلجية) قد لا تأنى بما تشتهيه السفن بل أكثر من ذلك فقد تغير اتجاه السفن....و الطائرات كمان.....

يتبع..

[ELSHAMY]

وصلنا 100 صفحة بحمد الله

وبمناسبة المئوية الأولى هنجيب برشلونة وفريق هوكي جليد كندي هنا ونلاعبهم

وهنقطعهم ان شاء الله :ninja:

ابو الشباب....حبيب قلبى

موافق على اقتراحك بس حنخلى فريق حرس الحدود هو اللى يلاعبهم....

[ELSHAMY]

الساعة السادسة صباحا بتوقيت كندا...وبسجل متابعة ...صباح الفل علي احلي دكتور. :ninja: :blink:

صباح الفل يا سيد المعلمين اللى مشرفنا مع الشعب الرومانى الشقيق

[ELSHAMY]

تسجيل متابعة ياباشا ومستنين نهاية حلقة السفر من السعودية لمصر ومغامرات الشامي وشركة مصر للطيران.

الجميل ...سامح

انت مش ملاحظ ان الحلقات بقت أكبر شوية من الأول.....

مافيش الله ينور.....؟ ؟

دا أنا عامل حسابك و أنا بأكتب...

[ELSHAMY]

تسجيل متابعة ليك يا دكتور شامى :ninja: :blink:

متابعتك مشرفانى يا .....

معلش أنا عاوز أسميك موسى.....

و أهو اللى تحسبه موسى يطلع فرعون....

انت من هنا و رايح موسى....

تم تعديل 8 يناير 2009 بواسطة ELSHAMY

[ELSHAMY]

اخونى ...اخواتى الأحباء

مغامرات الشامى و المواقف التى مرت به و المفاجأت الحلو منها و اللى مش حلو كانت المرة دى بجد كلها جديدة.....ما حدش بياكلها بالساهل...

المهم تستمتعوا و تستفيدوا من أخطائى ..و تدعو لى اذا كان هناك شىء صح عملته.....ده الحاجة الوحيدة اللى أنا عايزها...

هذه المرة بدأ الاعداد للرحلة مبكرا و هو بالطبع أمر محمود جدا فى أمثال هذه الرحلات خصوصا اذا كان يتخللها أعياد أو أجازات....

بالنسبة لى كان الوقت اللى اخترته لهذه الغزوة ملىء بكل ما يخطر على بالكم من أنواع الاجازات.....أجازة حج – كريسماس – أخر السنة...كله موجود....لذلك كان حجز الطيران بدرى أمر محمود....المليجى...

كان على الشامى الذهاب الى أرض الوطن فى زيارة خاطفة قبل السفر الى أرض المهجر...كان هناك بعض الاوراق الرسمية التى يتوجب عليه عملها بنفسه بالاضافة الى بعض الحبشتكانات الأخرى..

كان من الصعب العثور على شركة طيران واحدة تقوم بالليلة كلها خصوصا ان الطيران السعودى و المصرى العائد الى مصر كان مكدسا بالحجاج العائدين..... المهم بشوية اتصالات و معارف و غيره لقيت بالعافية حجز على رحلة مصر للطيران الى الاسكندرية يوم الثلاثاء 16 ديسمبر بحيث ابقى فى اسكندرية حتى الخميس 18 و الحجز الأخر الى كندا على الخطوط الايطالية ALITALIA فجر الجمعة من مطار القاهرة الى روما (ترانزيت 4 ساعات) و منها الى تورونتو حيث كان من المقرر الوصول اليها حوالى الساعة 2 ظهر نفس اليوم بعد جمع و طرح فروق التوقيت...

ولكن هل تأتى الرياح بما تشتهيه السفن......الجواب: غالبا لأ...

أولى المفاجأت – و ما أكثر المفاجأت فى هذه الرحلة – كان اتصال تليفونى من مكتب مصر للطيران...:

صوت شاب مهذب : د. الشامى

الشامى: نعم

الشاب المهذب: معك مكتب مصر للطيران فى جدة

الشامى مستبشرا: أهلا وسهلا (قلت دول أكيد بيأكدوا معايا الحجز- ناس فعلا ذوق ذوق)

الشاب اللى لسه لحد دلوقت مهذب: معلش يا فندم رحلة مصر للطيران اللى حضرتك حاجز عليها يوم 16 اتلغت......

الشامى بصوت مش مهذب قوى:يعنى ايه ؟.....

الشاب وقدأ بدأ صوته يتغير: باقول لحضرتك اتلغت ....و حولناك لرحلة يوم 17

الشامى مستكينا: بس أنا حضرتك نازل مصر يومين فقط و عندى بعدها رحلة الى كندا....بكده سيادتك نسفت لى برنامج رحلتى كلها من أساسه...طيب مش ممكن تشوفلى اليوم اللى قبله أو حتى نفس اليوم على القاهرة..

الشاب بلهجة حاسمة: و الله يا فندم ما اوعدكش ...انت عارف ده موسم عودة حجاج و الاماكن كلها محجوزة...

الشامى باكيا: طيب عملتوا ايه فى بقية الركاب....؟

الشاب قرفانا : حولناهم تانى يوم....مش فاضل الا انت و راكب أخر...

الشامى ساخرا: يعنى بقيت أنا المشكلة دلوقت...

الشاب :خلينا نحاول يا فندم و انا حأضعك على قائمة انتظار اليوم اللى قبله....ابقى راجعنا

...... و بدأت سلسلة المراجعات الشامية لمكاتب مصر الطيرانية و أخيرا فى مراجعتى لهم رقم خمسة.....بدأ يظهر فرج الله....

يتبع....

حمد لله على السلامة اولا , وعلى سلامة الاولاد.

لكن ما شاء الله الابتلائات بدأت معاك بدرى جدا من جدة يا دكتور :ninja: :blink: يعنى لسة ما خرجتش من البيت ودى ناوى معاك ؟؟؟؟ الله المستعان ربنا يعينك فى الى جاى :lol:

رفيق الدرب ...حازم العزيز

انت لسه شفت حاجة....التقيل جاى

[ELSHAMY]

الله يبارك لك يا دكتور علي ما تقوم به لخدمة الاعضاء

تسجيل متابعة بتشوق وترقب :ninja:

:blink:

سمية هانم صالح...

مشرفانى دايما...مش بأقدر ألاقى كلام يكافىء كلامك....

شكرا لك

[ELSHAMY]

حمدا لله على السلامة دكتورنا الغالي :ninja:

تسجيل متابعة واعجاب dtcv:

ولي بعض النقط ولاقتراحات أرجو أن يصادق عليه منتدانا الموقر

أولا عدد رحلات دكتورنا أصبحت كثير وأنا لي اقتراح لو يوافق عليه السادة الأعضاء وهو انشاء شركة خطوط طيران شامية ha)

منو نتنفع ومنو ننفع دكتورنا بخصم محترم لأنه زبون غير عادي clp::

ثانيا مسألة أطلبوا العلم ولو في الصين أنا لست متأكد من صحة الحديث لكن محتواه نبيل ويوافق ديننا الحنيف والعرب فعلا راحوا للصين

مش للعلم طبعا لكن عشان يجيبوا الشاي ha)

وسلم لي على أبو العربي dtcv:

مستنين باقي الحلقات

وبلاش حكاية مصريين وغير مصريين المنتدى وطن من لا وطن له :blink:

أهلا بك أخى الحبيب وسط أهلك و أخوانك.... :lol:

[ELSHAMY]

متابعين يادكتور :ninja:

ومن وجهه نظرى ان احسن خطوط طيران مكن تسافر بيها هى ال British airways وسك على الباقى :blink:

عندك حق.....

أنا جربتهم اكتر من 5 مرات....كانوا محترمين....بس برضه لوفتهانزا و الاماراتية و القطرية خدماتهم شديدة....

المهم فى الأخر انهم يوصلوك فى المكان اللى اتفقتوا عليه.....

مش زى ما حصل معايا....

اقرأ الحلقة الجاية..

[ELSHAMY]

عمنا...

ألف حمد الله ع السلامة ، ونوّرت السعودية بلد الأنتخة والدماغ والفراغ والوأت الفاضي clp::

(يمكن ده بالنسبالي أنا بس!) :blink:

وباسجّل استمتاع مع الإبيسوود التالتة من المسلسل dtcv:

صحيح أنا فاتتني الإبيسود التانية بالكامل ؛ لكن ده برضه ليه جانب مُشرق ؛ عندي ولا 50 صفحة أمخمخ فيهم على رواءة وأعمل دماغ ؛ دا طبعاً بخلاف التلاتين صفحة بتوع د. هشام :lol:

باسجّل إعجابي بالتميُّز ، وبرضه بالتلطيش اللي انتا دايما موعود بيه ياريّس :ninja:

بس برضه أنا هاموت واشوف تلج كندا... واحشني موووووووت dtcv:

في انتظار الحلقة اللي عليها الدور ha)

الحاج تهامى (هورتونز) سابقا...

مشرفنى يا جميل.....

بس غير مسموح لك بقراءة الغزوة الجديدة قبل ما تخلص القديمة.....

كده يا بنى حيحصل لك لخبطة بيولوجية....

تم تعديل 8 يناير 2009 بواسطة ELSHAMY

[ELSHAMY]

يالا يا دكتور بقالي كتير مستنيك في مطار اسكندرية لما نشفت :ninja:

كمل حصل ايه في ايطاليا ؟

الزناتى باشا خليفة..... أبو اسكندر

معلش ماخدتش بالى ......

منورنى يا باشا...

[ELSHAMY]

حمد الله ع السلامة يا جاى من السفر..... واحشانا الأبتسامة......إلى أخر الأغنية ....... :blink:

شكرا يا دكترة ع الترحيب :ninja:

SoSo هانم RaNi

اسمك صعب قوى فى الكتابة.....حروف small و حروف CAPITAL

أجمل حاجة تشريفك لى......يارب أكون سبب فى رسم ابتسامة على وجه كل الأحباب...

سلمك الله من كل سوء

[ELSHAMY]

اسجل اعجابي يادكتور بالاسلوب الرائع في السرد وفي انتظار باقي الحلقات لاني متلهف جدا لمعرفة أخبارك حتى نحذو حذوك لاني بقالي شهر ونصف منتظر التأشيرة مش عارف امتى تطلع من الفرن!!!!!!!!!!!!!!!!!!

كمان احيى جميع الاسكندرانية تما

أخى طارق....منور يا جميل

على فكرة أنا رديت على أخر رسالة منك على الخاص لكن بريدك غير مفعل للأستقبال...

ربنا يتم لك الأمر على خير....لا تقلق.....ربنا موجود و يحفظك....

بيتى تحت أمرك...

تم تعديل 8 يناير 2009 بواسطة ELSHAMY

[ELSHAMY]

ده الموضوع طلع كبير قوي و أنا اللي فاكر إن اللي حصل في أمريكا بس هي الحكاية كلها .... قول يا باشا شوقتنا أكتر :ninja:

أخى الفاضل دكتور هشام...

لقائى بك فى مطار تورونتو كان أجمل ختام للرحلة.....

شكرا لك على انقاذى من الورطة الأخيرة فى المطار.....

بالنسبة لجميع أحبائى- ما عدا دكتور هشام - انتظروا الحلقات الأخيرة عشان تعرفوا ايه الى حصل...

شوية تشويق كده على ما نوصل للأخر.....

[ELSHAMY]

3 ايام فى الاسكنرية من غير ...كلام ...كده؟؟!!

الدنيا سلسه و جميلة؟؟!!

حاسسه ان الشغل فى القهوة دى ...مش واخد حقه!!

عموما اتفضل سعادتك

متابعين ....مستنييييييييين ...يا دكتور

حتشبسوت....ازيك....

طلبات مخصوصة حتنزل لحضرتك حالا.....

كفاية انك منورة الموضوع...

[ELSHAMY]

أخوانى......أخواتى.....الأحباء

السلام عليكم....

نستكمل السرد التاريخى من الغزوة الثالثة لكندا....

سارت الرحلة الى روما بسلام.....درجة الحرارة فى المطار كانت حوالى 8 درجات مئوية...

المطار جربان و كنت متخيله أفخم من كده.....لكنه قديم و بيحولوا يلصموه بأى شكل....

وصلت الطائرة حوالى الساعة 7:30 صباحا بعد أربع ساعات طيران....كان على الشامى الانتظار فى الترانزيت اربع ساعات أخرى حتى الساعة 11:30 موعد اقلاع الطائرة الثانية الى تورونتو.... شوية تسكع فى المطار مع شاى و قهوة...كنت نفسى أشترى أى تذكار من ايطاليا زى عادتى فى كل البلاد اللى زرتها بس ماكانش فيه محل يفتح النفس..

على فكرة كمثال عندى تذكارات و سوفينيرز من السعودية و الامارات وانجلترا و فرنسا و أسبانيا و أيرلندة و اليونان و ماليزيا و كندا..... الظاهر ايطاليا مالهاش نصيب.....اكتفيت بالشاى كتذكار....

تأخر الاقلاع حوالى ساعة تحقيقا لشعار الخطوط الايطالية الذى ذكرته فى الحلقة السابقة....كانت الرحلة ستستغرق حوالى عشر ساعات الى تورونتو... يعنى بحسبة بسيطة كان ميعاد الوصول المفترض هو الساعة 2 ونصف أصبح بعد التأخير 3 ونصف عصرا.... كنت زعلان قوى على الساعة اللى راحت من الأجازة من غير ما أشوف الأولاد.....طبعا الشعور ده يعرفه اللى جربه خصوصا ان زيارتى كلها كانت حوالى 16 يوم بما فيهم السفر...لكن لو تعلمون الغيب لأخترتم الواقع...و ياريتها كانت ساعة واحدة اللى راحت.....

من شباك الطائرة كان منظر سلسلة جبال الألب ذات القمم الثلجية البيضاء أكثر من رائع...تتناثر بينها قرى و منازل ريفية صغيرة...

دايما الواحد بيقرب بمشاعره جدا من ربنا لما يكون فوق السحاب.... المرة دى جالى خاطر غريب و احساس بمدى ضعف هذا المخلوق الذى يدعى الانسان أمام الله صاحب مثل هذا الملكوت الواسع.... أكيد هناك فى هذه البيوت أسر تعيش يرزقها الله من فوق سبع سماوات...وهذا الانسان الخيبان مازال يجادل فى أحقية هذا الاله بالعبادة...بل و يزيد الطين بلة بمعاصيه و جحوده و نسيانه ....و مازال الرزاق يطعمه و يسقيه..

ما علينا....

عبرنا المحيط و ظهرت الاراضى الكندية.... و الله كندا كبيرة يا أبو الشام...ربنا يعينك على حكمها بما يرضى الله....

الاجواء كانت رايقة فوق سانت جونز و كذلك مقاطعة كيبك....بصيت من الشباك قلت يمكن أشوف أخونا محمد عمر...معرفتش.... باين عليه كان نايم بعد الغدا....

لما بدأت الطيارة تعبر فوق مقاطعة أونتاريو....اختفت معالم الارض تحتنا تماما و ظهرت خيمة بيضاء لا نهاية لها....الطيارة كمان بدأت ترجرج و تتهز بعنف...شعر الركاب بشىء من القلق خصوص لما ميعاد الوصول المفترض عدى عليه ساعة ...يعنى بقالنا 11 ساعة فى الطيارة....... و الطيار شكله عمال يلف و يدور فوق مطار تورونتو....الظاهر كان مش شايف له مدخل.....الى أن فجر الطيار مفاجأة كالقنبلة على أسماع الركاب عندما قال : .......

خليها الحلقة الجاية.......

يتبع....

[ELSHAMY]

يخرب بيت الساسبنس

يا دوك إحكي على طول

مش هأعرف انام كده

المهم ...... عرفت تجند د / هشام أثناء لقائكم في المطار و الا نزق عليه ساره

الحمد لله قائد جناحنا العسكري الدكتور التهامي طلع صلب و معترفش في مصر على حاجه

معاك رئيس المكتب السياسي للحركه

ملحوظه : معرفتش اخبي الأسلحه في الباك يارد زي ما امرتني

أصل انا معنديش باك يارد أصلا .... سبتمبر القادم إن شاء الله سنصبح من أصحاب الباكياردات إذا ربنا أراد

أنا خبيتهم في البلكونه تحت التلج

البوب الكبير

الدكتور هشام دلوقت بقى من رجالتنا و تقدر تعتمد عليه.....خبى البضاعة عنده فى سانت كاثرين عشان أنت العين بقت عليك...

لو اتمسكت ...أكتم ايمانك.....أنا لا أعرفك و لا شفتك....

التهامى مأنتخ فى البريمة و شكله باع القضية....لما يجيلك فى فبراير ابقى ظبطه.....

صبح....صبح

[ELSHAMY]

جزاكم الله خير وبجد بدعى ربنا من قلبى انى انضم الى جيوش الشامى والى القائد ايهاب وتهامى والمستجد فى الجيش دكتور هشام ..

املأ الاستمارة و قدم طلك مع 6 صور وش و جنب.....

ما تنساش القيش و التشبيه....

حنبقى نرد عليك... :unsure:

[ELSHAMY]

أخوانى…أخواتى الأحباء

السلام عليكم و رحمة الله….

صلوا على النبى..

تكلم الطيار أولا باللغة الايطالية قائلا:

لا كوستا بيلو انديامو نومو...... باستا كورتا ألتوبيللى.... مطاراتو تورونتو مقفولاتو .....ثلجو كتيراتو.... مش شايف قداماتى.....مش عرفتو روحتو فينو... اخر كلامو مطاراتو شيكاغو امريكانو....مع السلامو عليكو

الركاب فى نفس واحد قالوا : واااااااااااو....

فهمت القصة من غير ما انتظر الترجمة بالانجليزية….

طبعا الشامى كان عامل حسابه عشان يفهم الطلاينة بيرطنوا ازاى وبالفعل استغليت ساعات الترانزيت فى روما و قريت كتاب كيف تتعلم الايطالية فى اربع ساعات الا ربع.. ..... (ملحوظة: أوعوا تصدقوا...)

و للأخوة اللى ما يعرفوش ايطالى كانت ترجمة كلام الطيار ان مطار تورونتو مقفول نظرا لعاصفة ثلجية عنيفة و الحل الوحيد كان النزول الى مطار شيكاغو فى أمريكا...

حلو الكلام...مغامرة جديدة جات لك على الطبطاب يا أبو الشام....حقيقى المثل اللى قال " يتأمرك المرء رغم أنفه "....ها أنا ذا لم أسعى الى دخول أمريكا و هاهى ذى تستقبلنى غصب عن عين كونداليزا رايس....

و نظرا لتأصل نظرية المؤامرة فى الوجدان العربى بدأ الفار يلعب فى عبى.... و ماكانش معايا سم للفيران....

يا ترى ال CIA عرفوا ان القائد الشامى على متن الطيارة فقرروا يخطفوها و يطلبوا فدية من المنتدى...؟؟

الحقيقة ما كانش عندى أدنى شك انكوا حتتأخروا فى دفع الفدية....

و لا ايه ؟

يا ترى بوش حب يعمل ملعوب فى أوباما و يجيبلوا الشامى عشان ينافسه فى الانتخابات الجاية...؟ ممكن...

يا ترى الامريكان كانوا عايزين يستفيدوا من خبرة الشامى فى الهجرة الى كندا عشان ياخدوا الباسبور الكندى...؟ ؟ وارد....

كان هناك ألف احتمال يدور فى راس الشامى عن سبب اختطاف الطائرة...

بس ذنب الركاب التانيين ايه ؟

بعد حوالى ساعة طيران أخرى حلقت الطيارة فوق مطار شيكاغو.... واضح ان الدنيا مليانة تلج برضه....يعنى ما أصخم من ستى الا سيدى...كان علي ايه اللف و الدوران ده كله...ماهو تلج بتلج ...درجة الحرارة كانت – 5 .....

هبطت الطائرة و كان واضح جدا على طاقمها التخبط التام...مش عارفين يجاوبوا على أسئلة الركاب.... حنروح فين ؟ و لمدة قد ايه ؟ و حنبات ولا حنسافر ؟ ...طب حننزل من الطيارة و لا حنطير تانى....

البنت الكندية اللى كانت قاعدة جنبى مثلها مثل باقى الركاب أصابها احباط شديد...كان معظمهم جايين كندا لقضاء اجازة الكريسماس لقوا نفسهم فى أمريكا و مش باين لهم صاحب....

بدأ الطاقم بتوزيع طلبات الحصول على الفيزا لدخول الجنة الموعودة.....لخبطة شديدة لمدة ساعة كمان لما اتخنقنا....أخيرا أفرجوا عنا .... نزلنا المطار و بعد مشوار طويل لقينا نفسنا فى صالة الجوازات مع طابور طويل فيه ألف نفر تقريبا....

وصل الشامى الى ضابط الجوازات.....أخد الباسبور و ال PR Card و قعد يخبط فى الكمبيوتر اللى قدامه..... وكل شوية يبص لى بصة طويلة كأنه مش مصدق انه وجها لوجه مع القائد الشامى.....

قلت فى نفسى....أخيرا وقعت يا أبو الشام.... عرفوا يصطادوك.. ياترى حيعملوا فيك ايه.....؟ مالهاش حل.... دلوقت ينادوا على العساكر و يتكهرب الجو و يحطوا فى ايديك و رجليك الحديد و تلبس أحمر....و على جوانتانامو عدل...

و دار بخاطرى شريط ذكريات حياتى...و افتكرتكم كلكم.... وقلت قد ايه حافتقدكم...و يا ترى حتعملوا حملة للافراج عنى على الفيس بوك و لا حتقلبونى ...مش عارف..و افتكرت مصر...و ترابها...و الاغنية اياها اللى بتيجى فى مخى مع المناسبات اللى زى دى...انا مصرى و أبويا مصرى........ماشربتش من نيلها....

و فقت من الاحلام على صوت ضابط الجوازات :

....على جنب يا شامى خلف الخط الاسود اللى هناك........ وبدأ العساكر فى الظهور…..

و بدأت أم المعارك.....

يتبع