إتخذت القرار .. وكان لابد منه

[أبو محمد]

قرار البقاء فى الغربة أو العودة للوطن هو قرار شخصى بحت .. لو الإنسان متزوج وله عائلة فهو قرار عائلى بحت .. تعرف يا أستاذ حسن ؟ .. أنا ظروفى كانت مخليانى مش عارف آخد القرار .. عاوز ارجع مصر .. بس انا سعيد فى الكويت .. بصراحة ما كنتش شاعر كتير بالغربة .. كنت فى وسط عائلات مصرية من أصدقاء الدراسة .. تصور ؟ .. لما تلاقى إن الجو المحيط بيك وانت فى مصر انتقل معاك إلى الكويت ؟ أو بمعنى أصح إنك رحت الكويت لقيت أصحابك وزمايلك فى الكلية (أولاد وبنات متجوزين وسبقوك على الكويت) ... بس بصراحة وصلنا لمرحلة كنا (كلنا) بنتلكك على أى حاجة تخلينا ناخد قرار العودة .. كل واحد لقاله تلكيكة .. ورجعنا ...

إللى أقدر أقولهولك .. إنك لازم تكون مرتب نفسك ومستعد إنك تقابل "الجو المختلف" .. الأوضاع فى مصر بتتغير بإيقاع سريع .. ممكن يكون التغيير - فى نظر البعض - للأسوأ ,,, وممكن يكون العكس تماما للبعض الآخر .. المهم استعدادك ومرونتك النفسية على تقبل "الجو المختلف" والرضا به والتعايش معه

دعواتى لك بالتوفيق والخير والسعادة .. وبأهم شئ الرضا

[ابو حودة]

بداية احييك على قرارك الذي تعرف تفاصيله وحدك ولا

يستطيع احد تقديرها غيرك

في مداخلة سابقة لي اشرت اني ان شاء الله ساخذ قراري بالعودة في صيف 2011

قد تزيد لعام اخر نظرا لظروف مررت بها مؤخرا

حيث اني اكملت هنا 4 سنوات بالامانه كانت كما يقولون مرحلة الزراعة وبالكاد بدأت مرحلة الحصاد حيث اني خلال هذه الفترة

تحسنت خبراتي وكذلك تحسنت مؤهلاتي الدراسية التي لم اهمل اكمالها وانا هنا حيث الظروف المادية تسمح بذلك بخلاف مصر

اخيرا اتمنى لك وللجميع حياة موفقة سواء هنا او في مصر

[الغريب]

أنا بصرااحة لو مكانك يأبوعلي أشكر المحاوراتية على الرووح الجميلة اللي ظهرت منهم في موضوعك

بجد أنا فعلا أستفدت كتيير من كلام الناس هنا وأشكرك يأستاذ حسن أنك فتحتلنا موضوع مهم زي ده نقدر نتعرف فيه على وجهات النظر القيمة

أخص بالشكر doha و أبو محمد بصراحة كلماتكم كانت أكثر من رائعة وإن شاء الله لكم نصيب من الحديث (كان الله في عن المرء مادام المرء في عون أخيه)

بارك الله في الجميع

وأخيرا أهمس في أذن الأستاذ حسن "أستخرت ربنا وفكرت كويس يبقى توكل على الله وربك كريم ورزقك عليه متقلقش من أي حاااجة"

[HDarwish]

المصريين العاملين في الخليج ..

راجعين راجعين ...

المسألة مسألة توقيت فقط .. ولكن النتيجة واحدة ...

القرار الذي يتخذه لاشخص بمحض إرادته .. يكون مدروس .. ونتائجه تكون كثيراً أفضل من القرار الإجباري والذي قد لا تكون مستعد له ...

وكل واحد عارف ظروفه .. وفاهم بيعمل إيه كويس .. ومفيش حد صغير ..

أخي حسن ..

أتمنى لك التوفيق من كل قلبي ..

لكن هناك مشكلة ..

كثير من لاأخوة بعد عودتهم إلى مصر .. ينقطعوا عن المحاورات أو يغيبوا عنها ..

أتمنى أن ترصد لنا خبراتك حتى نستفيد

مرة أخرى ..

كل تمنياتي بالتوفيق

أخي أسد،

إنت إنسان محترم بجد أتمنى أقابله واتعرف به أكثر

أكيد كل المغتربين في الخليج راجعين راجعين .. لكن فعلا زي ما انت قلت مسألة توقيت .. الكل عارف إنه راجع راجع بس قليل اللي بيسأل نفسه أنا هرجع إمتى؟؟!! وسنة بتجيب سنة ..

شكراً لتمنياتك لي بالتوفيق كما أتمنى لك مثله وأكثر .. وإن شاء الله لن يكون هناك إنقطاع عن المحاورات، فقد حاولت قبل ذلك إقناع نفسي بالبعد عن المحاورات ولكنني لم أستطع "أستطيع أن أقول لك الآن أني أستطيع الأنقطاع عن التدخين ولا أستطيع الانقطاع عن المحاورات" ..

ربنا يوفق الجميع بإذن الله

تحياتي

[HDarwish]

سيدي العزيز قرار العودة ليس بالسهل واصدقك القول هو ان فترة 5 سنوات هي الفترة المفصلية لو اتاخرت هيكون القرار اصعب يعني كل فترة تقعدها ف الغربة هتزيد من صعوبة قرارك

بصراحه طول ما اولادك مش ف الغربة معاك هتكون عيشة مملة ومتعبه اما لو اسرتك معاك فالوضع هيتغير خالص

اما من حيث مصر فانا ف مصر ف اجازتي وانا اعزب وليس لدي اي التزامات وكما ذكرت فانا تربيتي ف الكويت وعملي ف السعوديه بعد 4 سنوات عمل ف مصر

وعن راي مصر ليست بالسيئة لكن محتاجه تركيبة معينه يعني لو انت من سكان القاهرة وضواحيها فعليك بالبحث عن طريقة للتكيف مع زحام الطرق وما ادراك مامشاكل الزحام

وبالتالي العاملين ف اللقاهرة وضواحيها هيعانوا من زحمة الطرق سواء كنت راكب سيارة او بالمواصلات العامة

انا من هم خارج القاهرة فلا يعانوا من هذه المشكلة

اما عن فكرة المشاريع فهي تعتمد ع امكانيات الشخص وهي امكانيات ف شخصيته ليست الامكانيات المادية فقط فالسوق ف مصر محتاج كفاءات خاصة

اما بقى سلوك الناس ف مصر فهو سلوك اي شعب يعاني من الزحام اي انها سلوكيات الزحام غير كده فالشعب المصري مغلوب ع امره وشعب للاسف مالوش بخت ف اللي بيحكموه حاليا

ولكن سيدي الفاضل ما انا مقتنع به مصر محتاجه مع كامل احترامي وتقدير للجميع مصر محتاجه ان نتبع جميعا نصائح كتاب "اعمل عبيط"

بلدنا محتاجه كده عشان نحافظ ع حبه العقل اللي ف دماغنا اننا نرفع شعار " احنا عبط " مع كامل احترامي لعقلياتنا

اما من الناحية المادية ف سقف المرتبات ارتفع ف مصر وبصراحه اصبحت هناك مرتبات ف قطاعات البترول والاتصالات تتساوى مع اي مرتب ف الخليج بمعنى اخر الخليج مش لقطة

وطبعا لان هنا مفيش منافسه من هندي او فلبيني يحرق السعر والمرتبات تقل

لكن مشكلة مصر طبيعة الحياه فمن يتمكن من تكبير دماغه وما يفكرش يبقى تمام قوي

طبعا لو انت مطلعتش بره مصر مش هتحس بشيئ انا كنت بتعب لان اتربيت بره فتعبت ف الاول وف الاخر هي فترة

والاهم من كل ده بصراحه الراحه النفسية اللي ممكن تكون مع شلة حلوة ع القهوة او اكلة حلوة تتلم حواليها العيلة او لمسه حانية من اب او ام فكل شيئ له ثمن

عزيزي هيرو،

كثيراً ما كنت أجد نفسي أختلف معك في العديد من الآراء والنقاشات لكن هذه المرة أجدني أتفق معك إلى حد كبير لم أعهده من قبل

أنا والحمد لله من خارج القاهرة ولا أتمنى أن أسكن بها

إنت قلت مصر عايزة اللي يعيش فيها يكبر دماغة، أنا معاك في دي بس ما يكبرهاش قوي، الحمد لله الناس الكبار لسه سايبين لنا مساحة صغيرة كده نلعب فيها، أكيد إنت فاهمني طبعاً..

تمنياتي بمزيد من الصحة والسعادة وراحة البال

[المعلم عتريس]

"الكويت أو الغربة عامة عاملة زي طربيزة القمار لا الخسران بيقوم من عليها ولا الكسبان بيقوم من عليها لإن الخسران بيقول بكره أكسب والكسبان بيقولك أنا بكسب وطالما ما بخسرش يبئا اقوم ليه"

:sad:

انا عن نفسي اول ما كسبت قلت يا فكيك :lol:

حضرتك طبعا احسن واحد تقرر خطوتك صح ولا غلط

مصر مش مستحيلة لو انت فاهم الحياة وعارف هتعمل ايه

اكبر عيب للكويت والخليج انك بتوصل لحد معين ماتقدرش تتخطاه لانك وافد والاسوأ وافد عربي مش امريكاني

مصر ممكن تعاني في الاول لكن على المدى الطويل هتلقى نفسك بتكبر واختياراتك اكثر

وايا كان الارزاق بيد الله والواحد بيختار له سكة ويقول يارب وثق ان الله لن يضيعك

خيطاني سابق تورنتاوي حاليا

[HDarwish]

شكرا أختنا ضحى على الرد الطويل ده واللي أكيد أخد وقت ومجهود كبير جداً يستحق الشكر والتقدير

دعيني أُعلق على بعض الآراء والتي إتفقت مع إحداها وإعترضت على أخرى ورأيت التناقض في البعض ..

بما اني اخذت القرار ده قبل كده وبما اني غالبا هاخذة قريب برضه ( احنا حاليا في مصر ومحتارين مابين اننا نبقى ومنرجعش او نرجع نصفي امورنا ونرجع بعدها برضه ) ..

بما اني كذلك فاسمح لي اقولك .. مش هقول برافوا عليك ولا استنى عندك..

أنا قولت الظاهر إنك هتقوليلي خليك على الحدود أحسن طالما لا كويس إني راجع ولا في رأيك استقر هنا

هقولك بس عدة نقاط تحطها في بالك ..

اولا

لو حاسس انك تعبت بجد وخلاص مش قادر تكمل فخذ قرارك على هذا الاساس وتحت هذا المبرر مش لاي مبرر تاني ..

لا تقول ان العيشه في مصر هي هي لانها مش هي ..

ولا تقول انا مش مستفيد لان للاسف الواحد لما بيكون ناقصة شيء هو ده الشيء الي بينكد عليه وبيخلي هدفه بس انه يحصل عليه فمبياخذش باله انه يمكن لو حصل على الشيء ده يمكن يفقد اشياء تانيه اهم ..

قيم امورك من هذا المنطلق ..

طيب براحه علي بس علشان عايز أفهم إيه المنطلق ده علشان أقيم عليه أموري لإني ما فهمتش أو هاقول لحضرتك اللي فهمته وإنتي قوليلي هو ده المقصود ولا لأ "إني آخد القرار لما احس إني تعبت وخلاص مش قادر أكمل مش علشان اقتناعي إن مصر اتغيرت وكمان ما انكرش إني مبسوط وفيه حاجات كثير معايا لكن علشان فاقد شيء اللي هو الجو الأسري والاجتماعي والحاجات الحلوة دي يبئا هتبطر على اللي أنا فيه ولما هعيش الجو الأسري والعائلي وكده هافقد السعادة والراحة اللي كنت فيها في الخليج"

لو مش تعبان او حتى تعبان بس تعب محتمل يبقى كمل واحسبها بالعقل ..

طب إيه رأي حضرتك اللي ممكن يتعب في حاجه أو مش تعبان فيها وفي الآخر مالهاش نتيجة أو مش هتحقق طموحه .. يبئا يكمل ولا لأ

بصراحة أختلف مع حضرتك في الكلام ده .. الموضوع ما بيتحسبش كده

لكن لو خلاص مش قادر يبقى ارجع فورا محدش يقدر يلومك بس انتبه .. :lol: ينفع كده الخضة دي .. بكلمة إنتبه أنا قلت قدامي حفرة وخلاص هاقع او وقعت فيها فعلاً !

انت الي هتاخذ قرارك فانت الي هتتحمل تبعاته يعني متجيش بعد كده تقول مكنتش اعرف .. وبالمناسبة التعب وعدم القدرة عل الاستمرار عذر مقبول جدا بالظبط زي واحد ميقدرش يلوم نفسه انه ضيع وظيفة كبير اطباء في مستشفى استثماري وهو اصلا شهادته في الهندسة .. ان مكانش عندك القدرة على الاستمرار فده في حد ذاته مؤهل مهم اوي غير متوافر متلومش نفسك ابدا لو مكانش عندك ..

لأ طبعاً أنا قادر استمر وفيه مغريات كثير جداً تخليني أستمر بس زي ما قولت قبل كده حق الوالدين ورجاحة كفة هناك عن هنا في جميع أوجه المقارنة

واكيد .. تاكد اولا ان السبب الي خرجك من مصر زال وان الظروف الي اجبرتك على السفر للكويت معادتش موجوده او على الاقل تحسنت .. لو انها مازالت هي هي فتاكد ان وجودك في الكويت ماثرش فيها نهائيا بحيث ان يبقى عبث لا طائل من ورائه .. اما لو السفر حسنها شويه وفي امل تتحسن اكتر فممكن ده يكون لصالح البقاء .. :sad:

عفواُ هنا بئا أنا ما فهمتش حاجه

ثانيا .. راي زوجتك مهم جدا اسمعه ومتحاولش وانت بتعمل ده انك تاثر عليها بالسلب او الايجاب ..

متوريهاش الحياه بعينك لانك واخد قرارك فعلا فاي حاجه هتقولها هتبقى في صالح ماقررته مسبقا ..

اطلب رايها فقط بدون تاثير منك وحطه في اعتبارك وانت بتاخذ القرار ..

وخلي بالك برضه انت الراجل وانت المسؤول لو هي رايها غلط واخذت بيه فانت الي هتتحمل النتيجه وبرضه لو صح وماخذتوش فانت الي متحمل مسؤوليته ..

القرار قرارك لوحدك بس خلي بالك انك مش لوحدك الي هتدفع ثمنه سواء كان صح .. او لا قدر الله .. خطا ..

إحترت .. يعني أخد برأيها ولا لأ ؟!

كلام حضرتك إن لو رأيها غلط أنا اللي هتحمل نتيجته والقرار قراري بس لازم أخد رأيها وما أثرش على رأيها ده بالسلب والإيجاب

بس المعلومة وصلت ولو إنها تحير شوية (أنا آخد رأيها وارميه البحر .. وبعدين اشوف قراري إيه وأعمله علشان أنا اللي هتحمل عواقبه سواء خير أو شر)

ثالثا . . لو اخذت قرار بالعوده فاعمل لنفسك فترة انتقاليه نقول مثلا شهر .. ممكن اكتر ممكن اقل .. على حسب ماتشوف .. خليها زي اجازه تعمل فيها الي انت عاوزه بدون ماتفكر بكرا هعمل ايه .. برضه حط لنفسك مبلغ معين هتصرف فيه زي ماانت عاوز بدون حساب او بحساب بسيط كنوع من المكافأة او الترفيه الي اكيد انك تستحقه بعد السنين دي .. بس المهم ان مجرد ماانتهت المده او مجرد ماانتهى المبلغ المفروض ـ ايهما اقرب ـ اياك ثم اياك تستمر في الاجازه الافتراضية دي .. اقطعها فورا وابدأ الجد ..

ده اللي بيحصل مع الجميع وللأسف الواحد بينزل الأجازة شهر شهرين يصرف ويتفسح ويرجع يبدأ من الأول من تاني .. ويقول الحياة غالية ومش نافع الاستقرار فيها ...

رابعا .. يفضل متعملش مشروع دلوقت نهائيا قبل ماتشتغل فيه فعلا .. يعني لو قلنا مثلا عاوز تفتح محل ملابس .. روح الاول اشتغل في محل ملابس بعدين افتحه .. لو مفيش امكانية انك تشتغل في محل يبقى انسى الفكرة دي ودور على غيرها .. مصر مختلفة جدا عن اي دولة تانية في طبيعه النشاط الاقتصادي وفي ( مايحتاجه الامر ليسير ) الي تعلمته في الكويت حاجه والي هتتعلمه في مصر حاجه تانية خالص .. ومش معنى انك كنت ماشي في نشاط ما كويس انك تقدر تطبق نفس النشاط في مصر حتى لو كنت ماشي فيه زمان في مصر فالدنيا اكيد اتغيرت .. تروى قبل ماتحط تحويشه العمر او تنزل بثقلك في مشروع ممكن لاقدر الله يخذلك لمجرد انك مش عارف ( الدنيا في مصر ) ماشية ازاي اليومين دول ..

:) متفقين جداً في النقطة دي الحمد لله

خامسا .العوده لمصر مش عوده للجحيم زي مالبعض متصور بالظبط زي الخارج مهواش الجنة المنتظره .. اخذك لقرار العودة في التوقيت ده في حد ذاته شيء كويس خاصه لو الهدف الي طلعت من اجله لم يتحقق خاصه برضه وده الاهم لو ناوي ترجع مصر تشتغل بنفس الهمه والمجهود الي كنت بتعمله في الكويت ..

وفي دي كمان

سادسا وده اخر شيء .. متحرقش مراكبك قبل السفر واترك الباب موارب وبرضه متعتبرش ان وجودك في مصر هو قرار نهائي وانما بالظبط زي سفرك للكويت ( تجربة ) لو نفع كملت فيها لو منفعش هتدور على تجربة اكتر افاده . وغالبا من اول سنة في مصر هتقدر تقرر ان كنت هترجع تاني او مترجعش ..

وفي دي كمان مع فارق إني مش حاطط في الاعتبار إن سفري لمصر تجربه كسفري للكويت ..

برغم بعض الاختلافات في الرأي لكن الإختلاف في الرأي لا يفسد الود

أشكر حضرتك جداً .. وأتمنى تاخدوا القرار الصحيح بإذن الله

تحياتي

[HDarwish]

قرار البقاء فى الغربة أو العودة للوطن هو قرار شخصى بحت .. لو الإنسان متزوج وله عائلة فهو قرار عائلى بحت .. تعرف يا أستاذ حسن ؟ .. أنا ظروفى كانت مخليانى مش عارف آخد القرار .. عاوز ارجع مصر .. بس انا سعيد فى الكويت .. بصراحة ما كنتش شاعر كتير بالغربة .. كنت فى وسط عائلات مصرية من أصدقاء الدراسة .. تصور ؟ .. لما تلاقى إن الجو المحيط بيك وانت فى مصر انتقل معاك إلى الكويت ؟ أو بمعنى أصح إنك رحت الكويت لقيت أصحابك وزمايلك فى الكلية (أولاد وبنات متجوزين وسبقوك على الكويت) ... بس بصراحة وصلنا لمرحلة كنا (كلنا) بنتلكك على أى حاجة تخلينا ناخد قرار العودة .. كل واحد لقاله تلكيكة .. ورجعنا ...

إللى أقدر أقولهولك .. إنك لازم تكون مرتب نفسك ومستعد إنك تقابل "الجو المختلف" .. الأوضاع فى مصر بتتغير بإيقاع سريع .. ممكن يكون التغيير - فى نظر البعض - للأسوأ ,,, وممكن يكون العكس تماما للبعض الآخر .. المهم استعدادك ومرونتك النفسية على تقبل "الجو المختلف" والرضا به والتعايش معه

دعواتى لك بالتوفيق والخير والسعادة .. وبأهم شئ الرضا

ياه .. إثنين مشرفين مره واحد هنا في موضوعي .. لأ وإيه كمان دول من أكثر الناس اللي لما بشوف موضوع ولا مشاركه ليهم ما بقدرش أعدي كده وخلاص إلا ولا زم أقف وأقرا كل حرف بيكتبوه .. ده أنا خايف أتحسد

أنا كمان إحترت جداً في أخذ القرار لإن في جزء كبير من العائلة الرئيسية موجود هنا بالإضافة لمجموعة من الأصدقاء بالإضافة إلى أنني من النوع الاجتماعي ففي هذه الخمس سنوات كونت مجموعة من الأصدقاء كبيرة جداً ،، والجميع حزين وسعيد لهذا القرار .. مش عايز أشكر في نفسي لكن الحمد لله .. الواحد محبوب من ناس كثير هنا وكنت مثال للمصري الجدع اللي بيقف بجانب الجميع في وقت الأزمات ومعظمهم سواء كبير أو صغير كان بيستشيرني في صغائر الصغائر الأمور وكبائرها أيضاً

أكبر نعمة اللي لو ربنا أنعم بها على إنسان كان أسعد الناس وهي نعمة الرضا .. ربنا ينعم علينا جميعاً بهذه النعمة

الحمد لله الاستعداد والمرونة النفسية على تقبل الجو المختلف موجودين يا فندم ..

أدعو لك أيضاً بالمزيد من الصحة والسعادة وراحة البال والرضـــــــــــــــــــــا .

تحياتي

[HDarwish]

بداية احييك على قرارك الذي تعرف تفاصيله وحدك ولا

يستطيع احد تقديرها غيرك

في مداخلة سابقة لي اشرت اني ان شاء الله ساخذ قراري بالعودة في صيف 2011

قد تزيد لعام اخر نظرا لظروف مررت بها مؤخرا

حيث اني اكملت هنا 4 سنوات بالامانه كانت كما يقولون مرحلة الزراعة وبالكاد بدأت مرحلة الحصاد حيث اني خلال هذه الفترة

تحسنت خبراتي وكذلك تحسنت مؤهلاتي الدراسية التي لم اهمل اكمالها وانا هنا حيث الظروف المادية تسمح بذلك بخلاف مصر

اخيرا اتمنى لك وللجميع حياة موفقة سواء هنا او في مصر

أتمنى لك التوفيق ..

ولكنك أثرت نقطة هامة وهي فترة الزراعة ووقت الحصاد .. وبما إني مهندس زراعة فأنا ممكن أفيدك في النقطة دي

أنا زيك برضه يا دوبك بعد ما اتبهدلت أول سنتين ونصف كده وربنا الحمد لله كرمني بشغل في شركة الكل هنا نفسه يشتغل فيها أي حاجه لإن سمعتها ممتازة ومعروف عنها إن اللي يشتغل فيها كإنه شغال في الحكومة وأحسن، وبعد كمان ما اشتغلت في الشركة دي الحمد لله تعديت كتير من الناس اللي كانوا شغالين قبلي بسنوات عديدة وف خلال السنتين والنصف أنتقلت من مكانة لأفضل منها حتى وصلت إلى العمل في مكتب مدير عام الشركة اللي كنت بشوف صوره في مجلة الشركة وكنت أتمنى بس أشوفه معدي قدامي مش أشتغل معاه وبعد أن كان الناس (مدير مشروع أو مدير مشاريع أو رئيس قسم حتى أعضاء مجلس الإدارة) يتجاهلوك ويغضوا النظر عنك لو صادفوك في طريق مثلا الآن وبعد الوصول لهذه المكانة الجميع بدأوا يقدموا فروض الولاء والطاعة والتقرب والاستلطاف في المعاملة واصطناع الضحكات .. سبحان الله .. ما بين القوسين أعلاه هو الترتيب لمن عملت معهم حتى وصلت إلى أعلى مكتب في الشركة .. والكل كان في استغراب والبعض كان يعتقد إنني وصولي مثلاً أو متسلق .. لكن كل هذا كان من بعض الحاقدين فالحمد لله والله وحده يعلم إنني لم أسعى إلى ذلك إلا بالدعاء من الله واستجابته لي بالتوفيق وباجتهادي وتركيزي في عملي حتى اكتسبت الاستحسان من الجميع.

والحمد لله تنهال علي الاتصالات وعروض العمل في أكبر شركات الكويت منها مؤخراً وخاصة بعد إتخاذي للقرار .. مثل شركة فيفا للاتصالات وشركات حفر بترول .. وشركات استثمار عديدة .. لكن كان ردي واحداً وهو أنني عائد إلى مصر ولا أستطيع الإلتحاق بعمل آخر .. سبحان الله ..

لكن ما أود قوله أنه إذا لم تضطرك الظروف إلى العودة كحاجة الوالدين إليك مثلاً لتكون بجوارهم فلا داعي إلى العجلة وتريث حتى تحصد زرعك.

تحياتي ليك .. وتمنياتي بالتوفيق

تم تعديل 10 فبراير 2010 بواسطة HDarwish

[HDarwish]

"الكويت أو الغربة عامة عاملة زي طربيزة القمار لا الخسران بيقوم من عليها ولا الكسبان بيقوم من عليها لإن الخسران بيقول بكره أكسب والكسبان بيقولك أنا بكسب وطالما ما بخسرش يبئا اقوم ليه"

:sad:

انا عن نفسي اول ما كسبت قلت يا فكيك :)

حضرتك طبعا احسن واحد تقرر خطوتك صح ولا غلط

مصر مش مستحيلة لو انت فاهم الحياة وعارف هتعمل ايه

اكبر عيب للكويت والخليج انك بتوصل لحد معين ماتقدرش تتخطاه لانك وافد والاسوأ وافد عربي مش امريكاني

مصر ممكن تعاني في الاول لكن على المدى الطويل هتلقى نفسك بتكبر واختياراتك اكثر

وايا كان الارزاق بيد الله والواحد بيختار له سكة ويقول يارب وثق ان الله لن يضيعك

خيطاني سابق تورنتاوي حاليا

:lol:

خيطاني (القديمة ولا الجديدة؟ .. أصلها تفرق قوي) .. حضرتك تورنتاوي حالياً (ماشاء الله عليكم عيني عليكم بارده يا بتوع كندا إنتوا) .. إوعى نلاقيك خيطاني تاني ..

أنا كنت لسه عايز أكمل المقولة وأقولك إن الكل بيقوم من على الطربيزة خسران بس الشاطر اللي يلحق نفسه أول ما يكسب يقوم على طول ويبطل طمع علشان ما يخسرش اللي كسبه .. والأمثلة والنماذج اللي شفتها كثيرة جداً ...

بجد كلام حضرتك واقعي جداً .. وطالع من حد فاهم قوي وعاش الحياة هنا كويس

تحياتي وتمنياتي بالتوفيق

[ابو حودة]

لكن ما أود قوله أنه إذا لم تضطرك الظروف إلى العودة كحاجة الوالدين إليك مثلاً لتكون بجوارهم فلا داعي إلى العجلة وتريث حتى تحصد زرعك.

تحياتي ليك .. وتمنياتي بالتوفيق

ما قد يضطرني للعودة هما شيئين

الاول هو عدم موافقة جهة عملي في مصر على الاجازة ( فيها مشاكل حاليا ) بس رينا ييسر الامور ان شاء الله

والسبب الثاني هو اني من النوع الاجتماعي حيث افتقد جو العائلة الكبيرة ( عائلتي الصغيرة معي ) لكن تقول ايه

الحلو ما يكملش

المرتب زاد والحمد لله بما يعادل ثلاثة او اربعة اضعاف ما بدأنا به لكن برضه قرار العودة موجود ولكن مؤجل الى حين

تمنياتي بالتوفيق للجميع

[عطر الجنة]

اتخاذ القرارات المصيرية شئ صعب

لكن اجعلونى اقول شئ الماكث فى مصر كسبان و المسافر كسبان

و حقولكم ده فى حالة الاطباء و المهندسين

الطبيب المسافر بدون دخل مقبول فى مصر بيكسب فلوس حلوة بحد ما حسب مؤهله

هذا الطبيب لو هوه من خارج القاهرة فخلال مدة السفر بيرجع يجد اصدقائه فى مصر عملوا اسم فى المهنة و دخلهم قد يكون تعدى قيمة دخله فى الخليج

و دخلهم فى ازياد بعكسه ففلوس الغربة رجع اشترى عيادة فى مكان شيك و اسسها حلو فاستنفذت جزء كبير من الرصيد لكن بلا مرضى لان ملوش اسم فى السوق و زباينه نسيته

الا طبيب الاشعة لانها مهنة بتعتمد على الاجهزة اكثر و دى عوزة قدرات مالية عالية

نيجى للمهندسين فمصر الان فى عصر تنمية عمرانية عالية و راتب المهندس حديث التخرج قارب

على راتبه اذا سافر لكن فى مصر معدل زيادة الراتب اكثر و فرص الترقى ايضا

وده من واقع خبرتى فى السوق بالنسبة للمهندسين المدنى و المعمارى اما مهندسين الميكانيكا

فليهم فرص حلوة ايضا فى الخارج و الداخل

نيجى للمهندسين الزراعيين فيختلف حال القاهريين عن الريفيين بصورة كبيرة و ايضا عن سكان المدن

فالمشاريع الريفية ذات مدخول عالى و خاصة للى بيفهم فيها

لذا القرار هنا ليس بالقرار السئ بالعكس ده قرار حكيم لان بداية مشروع فى اليوم افضل من الغد

طالما توافر قدر من السيولة المالية

ففى كتير من زملاء زوجى من هم من اصل ريفى فى مهنة الطب و يحملون درجة الدكتوراة

كونوا ثروات كبيرة فقد كانوا يشترون اراضى مسنصلحة ففى واحد منهم عنده عشرون فدان يصدر محصولهم من البرتقال

و منهم من دخل فى مشروعات تربية ابقار و ما الى ذلك

مشاريع الزراعة و الثروة الحيوانية كنز كبير يا ليت الكل ينتبه ليه

[doha]

ولايهمك ياباشمهندس اعيد لك كلامي تاني لان واضح اني مقدرتش اوصل لك المقصود ..

بما اني كذلك فاسمح لي اقولك .. مش هقول برافوا عليك ولا استنى عندك..

اقصد اني مش هشجعك على قرار العوده ولا هثنيك عنه ولكن هقولك بعض النقاط الاسترشادية الي ممكن تساعدك انك تتاكد من صحة قرارك او عدم صحته ..

اولا

لو حاسس انك تعبت بجد وخلاص مش قادر تكمل فخذ قرارك على هذا الاساس وتحت هذا المبرر مش لاي مبرر تاني ..

لا تقول ان العيشه في مصر هي هي لانها مش هي ..

ولا تقول انا مش مستفيد لان للاسف الواحد لما بيكون ناقصة شيء هو ده الشيء الي بينكد عليه وبيخلي هدفه بس انه يحصل عليه فمبياخذش باله انه يمكن لو حصل على الشيء ده يمكن يفقد اشياء تانيه اهم ..

قيم امورك من هذا المنطلق ..

مش قصدي انك ترجع في حالة تعبك فقط .. التعب احد المبررات المصوغه للعوده ولكنه ليس المبرر الاهم بكل تاكيد .. انا بقولك كده لو تعبان خليك صريح مع نفسك وقول ايوه انا تعبت ومش قادر اكمل ومتحاولش توجد مبررات تانيه ممكن ميكونش لها وجود في الواقع .. يعني كتير اوي من الي بياخذوا قرار العوده بيمنوا نفسهم بالحياه الرغده في مصر وان القليل فيها كتير وان ممكن اشتغل في الحته الفلانية واطلع فلوس من العلانية ورغبتهم الشديده في العوده بتخليهم متصورين الحياه وردية وكتير برضه بيقول انا هرجع لان بقائي جنب اهلي بالدنيا او صحابي والحته والبلد وريحتها .. كلام كتير بنقوله في لحظة تعب بندور فيها على مسبب منطقي يصوغ لنا الرجوع .. الصنف ده من الناس لما بيرجع بيصطدم بالواقع وبيجد ان كل الي كان مفترض بيه يساعده اصبح ضده ده غير ان شعوره بالتعب من الغربة بيكون زال خلاص فيبدا يفوق ويقول الله ؟ انا ازاي تركت كل ده ورجعت .. عقلي كان فين لما اخذت القرار ؟

عشان كده بقولك خليك صريح مع نفسك لو هو التعب السبب قول ايوه انا تعبت خلاص مش قادر اكمل وبالتالي لما ترجع مصر ومهما كان الي هيقابلك هناك من صعوبات الحياه عمرك ماهتندم على الكويت ببساطة لانك عارف كويس اوي ايه الي طلعك منها وعارف انك خلاص مكنتش قادر تستمر .. بعكس لو مخلي سبب تاني هو الدافع لك والسبب ده غير حقيقي زي فكرة عن انشاء مشروع ما او رغبه في البقاء بجوار شخص او غيره .. لو كل دي اسباب واهية والسبب الحقيقي هو تعبك هتبقى مشكلة لما ترجع وتلاقي انك مقمتش بالمطلوب منك ومبقيتش جنب والديك كما كنت تتصور او المشروع الي في بالك مطلعش زي ماكنت فاكر ..

ده لو كنت تعبان وطبعا تعبان المقصوده هنا مش متمرمط يعني وانما خلاص الحياه نفسها مش قادر تستمر فيها لاي سبب .. لو مش تعبان يبقى خير وبركه وابدأ ( قيم الامور منطقيا ) يعني احسبها بالعقل ايهما افيد لك .. واحسبها برضه بما يرضي الله يعني هل اهلك محتاجينك فعلا وهل بقائك في الخارج عقوق لهم او لا وهل برضه وجودك في مصر هيخليك تؤدي مسؤوليتك تجاههم وتجاه زوجتك وابنائك ولا لاه ..

وبالعكس مبقولش ابدا انك تاخذ القرار لما تتعب فقط وغير كده تستمر وانما تاخذه لما تحس ان هو ده وقته .. وانت لوحدك وبناء على اسباب سفرك واهدافك منه ادرى شخص بامتى وازاي هييجي الوقت ده ..و بغض النظر ساعتها كنت وقتها تعبان او لا.

واكيد .. تاكد اولا ان السبب الي خرجك من مصر زال وان الظروف الي اجبرتك على السفر للكويت معادتش موجوده او على الاقل تحسنت .. لو انها مازالت هي هي فتاكد ان وجودك في الكويت ماثرش فيها نهائيا بحيث ان يبقى عبث لا طائل من ورائه .. اما لو السفر حسنها شويه وفي امل تتحسن اكتر فممكن ده يكون لصالح البقاء .. blink.gif

عفواُ هنا بئا أنا ما فهمتش حاجه

ولايهمك اقول تاني ..

مثلا لو انت مسافر الكويت بس عشان تجيب فلوس .. مثلا معندكش فلوس خاااالص وعاوز تجيب شقة مثلا .. ده السبب .. يبقى النهرده لو انت راجع مصر فتاكد انك جبت الشقة والا هترجع تعمل ايه ؟ ولو مجبتهاش وقررت تقعد فتاكد برضه ان في فلوس بتحصلها في الكويت تخليك تقدر تجيب الشقة دي في يوم من الايام والا هيبقى وجودك هناك عبث بلا طائل لانك طالع تعمل فلوس ومش ممكن هتعملها يبقى قاعد بتعمل ايه ؟

بالنسبة لي مثلا احد اهم الاسباب لسفري ان لم يكن السبب الاوحد هو رغبتي في ان اسرتي ـانا وزوجي وبنتناـ تبقى في مكان واحد .. النهرده واحنا بناخذ قرار العوده او الاستمرار حاطه في ذهني تماما السبب الي اخرجنا من مصر وهو وحدة الاسرة وازاي ممكن اوفر بديل في حالة عودتنا ميضرش بالوحدة دي .. تعبي في الغربة بحتمله لاني عارفه كنت تعبانه في مصر قد ايه اكتر بسبب وضع الشتات الي كنا فيه .. وطالما ان الوضع ده هيبقى قائم فبالتاكيد ده ماثر على قراري بالاستمرار ..

اعتقد كده الصورة بقت اوضح بالنسبة لك بخصوص الجزئية دي .. شوف ايه طلعك من مصر بداية وتاكد انه معادش موجود .. لو حاجه كانت ( مطفشاك ) من هناك تاكد انها زالت او تحسنت ولو حاجه كانت ( محبباك ) في هنا فتاكد من انها اسباب حقيقية تستحق قبل ماتاخذ قرار الاستمرار ..

ثانيا .. راي زوجتك مهم جدا اسمعه ومتحاولش وانت بتعمل ده انك تاثر عليها بالسلب او الايجاب ..

متوريهاش الحياه بعينك لانك واخد قرارك فعلا فاي حاجه هتقولها هتبقى في صالح ماقررته مسبقا ..

اطلب رايها فقط بدون تاثير منك وحطه في اعتبارك وانت بتاخذ القرار ..

وخلي بالك برضه انت الراجل وانت المسؤول لو هي رايها غلط واخذت بيه فانت الي هتتحمل النتيجه وبرضه لو صح وماخذتوش فانت الي متحمل مسؤوليته ..

القرار قرارك لوحدك بس خلي بالك انك مش لوحدك الي هتدفع ثمنه سواء كان صح .. او لا قدر الله .. خطا ..

إحترت .. unsure.gif يعني أخد برأيها ولا لأ ؟!

كلام حضرتك إن لو رأيها غلط أنا اللي هتحمل نتيجته والقرار قراري بس لازم أخد رأيها وما أثرش على رأيها ده بالسلب والإيجاب

اقولك ياسيدي .. حضرتك هتسمع ( رايها ) وتاخذ ( قرارك ) .

مثلا قرارك انك هترجع وتفتح مشروع مثلا في مكان تمتلكه الاسرة .. هتقول لزوجتك والله انا ناوي ارجع افتح المشروع الفلاني .. افرض انها مش موافقاك قرار العوده .. من منطلق رفضها ده هتكلمك بمنطقها الرافض في محاولة لاثنائك عن القرار او حتى (فرملتك ) في اندفاعك .. ممكن تقولك مثلا لاه المشروع ده مش نافع لان كذا وكذا . او تقولك طيب فكرة كويسه بس فيها ايه لو تستمر عدد كذا شهر نعمل فيهم كذا بالظبط بعدين نرجع او ماشابه ؟

بل والعكس برضه ممكن يكون صحيح ..

ممكن تقولها ايه رايك ارجع فهي تقولك فكرة ممتازه ونفذها فورا .. ممكن تجاوبك من باب العاطفة لا اكثر

ولهذا بقولك خذ رايها وشوف هتشور عليك بايه ( ولا تتجاهله ) وانت بتاخذ قرارك يعني ضع في اعتبارك ماقالته زوجتك ـ زي مايطلع ـ كنقطه ضعف او قوة لصالح او ضد قرار العوده ..

ده غير حاجه مهمه جدا ان مين غير مراتك هيقعد يزن عليك اربعه وعشرين ساعه في اليوم لو لا قدر الله ثبت مستقبلا ان قرارك كان غلط ؟ خذ رايها عشان تبقى شريكتك فيما سيحدث لانكم انتم الاثنين هتتحملوا تبعات الامر ..

ثالثا . . لو اخذت قرار بالعوده فاعمل لنفسك فترة انتقاليه نقول مثلا شهر .. ممكن اكتر ممكن اقل .. على حسب ماتشوف .. خليها زي اجازه تعمل فيها الي انت عاوزه بدون ماتفكر بكرا هعمل ايه .. برضه حط لنفسك مبلغ معين هتصرف فيه زي ماانت عاوز بدون حساب او بحساب بسيط كنوع من المكافأة او الترفيه الي اكيد انك تستحقه بعد السنين دي .. بس المهم ان مجرد ماانتهت المده او مجرد ماانتهى المبلغ المفروض ـ ايهما اقرب ـ اياك ثم اياك تستمر في الاجازه الافتراضية دي .. اقطعها فورا وابدأ الجد ..

ده اللي بيحصل مع الجميع وللأسف الواحد بينزل الأجازة شهر شهرين يصرف ويتفسح ويرجع يبدأ من الأول من تاني .. ويقول الحياة غالية ومش نافع الاستقرار فيها ...

ايوه ده الي بيحصل والواحد بيتوقف بعد شهر شهرين ( اجباري ) بعد ماتكون فلوسه خلصت او اوشكت .. انما ماقصدته انك تعمل لنفسك اجازه او ترفيه تعمل فيها الي نفسك فيه بعدين توقف وفلوسك لسه كاملة بحالها لانك اكيد هتحتاجها بعدين في حاجات اهم ..

ممكن تتصور ان المستوى الي عايش فيه قليل ومع ذلك المصاريف مش مكفية ولكن مع الوقت ومع استمرار تناقص الي معاك هتكتشف انك ممكن تعيش بفلوس اقل كتير جدا من الي كنت متصور انها آخر المطاف .. ده اسمه تاقلم ..

ولا علاقه بالاجازة الي بقولك عليها بضرورة التاقلم على مستوى الحياه الجديد وانما هي نوع من ( المكافأة ) على مجهودك السابق اولا .. وعشان متبقاش في نفسك حاجه لما تشد الحزام على وسطك لآخره بعد كده ثانيا ..

اول ماترجع باذن الله شوف معاك فلوس قد ايه وطلع منها مبلغ صغير وحدد لنفسك شهر او ماشابه تعيش فيه بالطول والعرض وتصرف فيه المبلغ ده زي ماانت عاوز .. خلص الشهر او خلص المبلغ تكون بقى مجهز قبلها خطه هتعيش ازاي وتصرف كام ف الشهر وتبدأ تلتزم حرفيا بالخطه دي ..

واخيرا فطبيعي جدا انك متكونش حاطط سفرك لمصر تجربة لانك لسه في البدايه لكن متعرفش بكرا فيه ايه ولا تعرف الايام هتغير تفكيرك ازاي .. من عشر سنين كنت في السعوديه مع اهلي وتركت وظيفة مرموقه ورجعت مصر عشان اكمل دراستي العليا .. كملت الدراسة واخذت شهاده معلقتهاش حتى ف الصالون .. مرت الايام والسنين ومش في بالي ابدا اني ارجع السعوديه ولا غيرها لاني عارفه اني مهما طلعت مش هعمل شي ولو عملت فهو في النهايه لا شيء بجوار مااستركه خلفي في مصر .. اضطرتني الظروف وبعد سنين اني ارجع تاني لنفس البلد الي اخذت قراري قبل كده بتركها .. وقتها لما اخذت قرار العوده زميلاتي كانوا بيقولوا لي عمرك شفتي حد يسيب السعوديه بمزاجه ؟ كنت اقولهم وانا بضحك ايوه .. انا ..

والنهايه رجعت هناك وبرضه وانا بدرس قراري بالعوده ولو اخذته مش لاني تعبانه هناك ولا لان اهدافي لم تتحقق ولكن لاني مازلت من داخلي مقتنعه تمام الاقتناع بان في الخليج بتبيع عمرك بالفلوس فتاكد انك محتاج الفلوس دي اوي كده او انها تستاهل والا متطلعش ..

من عشر سنين مكانش في ذهني اني هسافر هناك وسافرت .. ولما رجعت مكنتش مخططه اني ارجع تاني واديني رجعت .. والنهرده غالبا هسافر تاني ومش في ذهني لا هرجع او مرجعش لان بجد محدش عارف ـ مهما تصور العكس ـ بكرا فيه ايه ..

[HDarwish]

أيوه كده .. الصورة وضحت وبئت ميه ميه .. الظاهر إني ما كنتش لابس النظارة

كلام حضرتك منطقي جداً وواقعي .. أشكر حضرتك على هذا المجهود الرائع

وفقنا الله وإياكم إلى ما فيه الخير إلينا وإلى المسلمين جميعاً

تحياتي