كرسي الأعتراف 2 ( حاليآ الفاضلة Dreamwithme )

[Scorpion]

انا عندي لوكشة اسئلة .. بس حنزلها علي دفعات :

الدفعة الأولي :

1. هل أنت صعيدي .. أم فلاح ... أم من أهل البندر ؟

2. سؤال حريمي ... ما هو برجك ؟

3. لماذا تكتب ؟

4. حين يصبح الهروب حلآ .. الي أين تهرب ؟

5. فين عبده السواق .. و الأهم فين الترومبيل ؟

[حسام يوسف]

الأخ العزيز محمد يوسف

كيف تري بوجهة نظرك الشخصية كلا من:

جمال عبد الناصر

محمد أنور السادات

[shiko]

ظهر..الاوتومبيل الوحيد بالمنطقة ليقف بجوار منزل ال يوسف ..ويشتد صوت عم عبده لينادى على ا/يوسف...لياخذ بيده فى حل الاسئلة المعقدة اللى نزلة عله زى المطر ...من اعضاء المنتدى ..مما يكشف الستار عن دوافع الانتقام الشريرة لدى البعض..

يعتدل يوسف قليلا ليزيح شعره الكثيف من امام عينيه ليعيد قراءة اجاباته والتى تنم بكل تأكيد عن شخصيته العلمية ..وحبه لتناول الكائنات الفضائية.....

تتقدم رضوى بمشروب العناكب المميز ...

استهلالاً لابد منه...علشان تعرف تتجرع الجرعة الاولى من المصل

الجرعة الاولى

1. اتعرفت على المنتدي ازاى؟؟

2. مين اول واحد قرتله فى المنتدى؟؟

3. اسم المنتدى..عجبك؟؟ولو ممكن نسميه اسم تانى هايكون ايه؟؟

4. ايه الموضوع اللى اتكتب فى المنتدى هنا وتتمنى انك تكون انت اللى كتبته؟

5. كتبت كلمات فى المنتدى قبل كدا وندمت انك كتبتها؟

6. ايه المكان اللى ممكن تلاقى نفسك فيه؟؟

7. دمعة ...نزلت من عينيك ...كان مين سببها؟؟

8. ما هو أول انطباع ايجابي بيتاخد عنك من أول لقاء ؟ وايه اكتر انطباع سلبي ؟

9. اذا وانت ماشى وواحده مش عارف تركن العربيه وطلبت منك انك تركنلها العربيه وانت فى العربيه صرخت وقالت حرامى حرامى هتعمل ايه؟هههههههههههههه

10. ذكريات من زمن فات ...؟؟ ايه الذكرى اللى موش ممكن تتمحى من ذاكرتك؟؟

11. الغرور...الانانية...؟؟موقعهم ايه من الاعراب فى حياتك وبصراحة؟؟

12. حد اتهمك قبل كده بالنرجسية؟؟

13. اوصف شخصيتك فى 3 كلمات؟؟

14. ايه رايك فى عمل المرأة؟؟

15. ايه رايك فى تعدد الزوجات؟؟

16. هل تعتبر نفسك شخص طموح؟؟

17. اصعب سؤال اتسألته؟؟

18. من واقع خبرتك مع سمسمة...نصيحة توجهها لعضوات المنتدى الكرام؟؟

19. البيت الى بعد الى جانبكم كام دور ولون الباب ايه ؟؟

20. معجنون سنانك اللى بتستعمله الصبح موش قبل ماتنام نوعه ايه؟؟ومافيش اختيارات...

21. مكالمتك الاخيرة للريس فاكرها...اه ..لما قلتله اوروفوار..فاكر؟؟رد عليك ولا مطنشك لغاية دلوقتى؟؟

22. ممكن اعرف هيثم عاوز يسيب الباص ليه.؟؟ليك يد بالموضوع ده؟؟اعترف

سنعوووووووووود...اوعوا تروحوا فى حتة تانية...اشوف حد دخل فى توبيك تانى ..ميزعلش على اللى هايجراله

[joo]

مش عارف لية يا محمد عندى احساس غريب اوى

ان اليومين دول فى شخصية نسائية بدأت تدخل دماغك وبتحاول تدرس الموضوع وبدأت تنشغل بالحب؟ايوة ولا لالالالالالالالالالالا؟

حتى لو قلت لا 00 انا بردو متأكد :lol:

تم تعديل 23 فبراير 2010 بواسطة joo

[MaYousof]

أسئلة لماضة مصرية جدا:

- ليه منظر الغروب بيستهويك..... ايه الاشخاص اللي هلوا عليك خير اللهم احعله خير و انت سرحان في الشمس و هي بتعمل فشش فششاش...

بصراحة يا لماضة أنا نسيت أحط وش كريم عبد العزيز في فيلم حرامية KG2 x وهو قاعد كده مع حنان ترك وهم راكبين المركب ساعة الشروق وبيقولها بكل رومانسية "عظيييم الغرووووب" :wub:

بس لا شك إن الغروب عظيم وجميل جدا .. والشروق أيضا .. ولما الكاميرا بتكون معايا باحب احتفظ بلقطة للمشهد الجميل جدا ده .. عموما الفيديو كان غروب بجد! :)

جميل إن الواحد يتدبر عظمة ربنا سبحانه وتعالى وهو بيتفكر في بديع خلقه .. بجد تجسيد لعظمته تعالى وقدرته ..

بالنسبة للاشخاص اللي كانوا في بالي .. أنتم كلكم كنتوا في بالي عشان أنا كنت ناوي أشارككم الصور واللقطات دي

بس إدوني كام يوم كده آخد نَفَسي .. أصل جالي دور برد .. ومحتاجلي كباية شاي أخضر ..

- امتي تاخد قرار ان المنتدي ده كلام و طق حنك.....و مش هرجع هنا تاني؟؟؟

ومين اللي قال إني لما هاكتشف إن المنتدى كلام وطق حنك يبقى لازم اسيبه angl::

مش بالضرورة اسيبه .. ممكن مثلا أغير استراجتي في التعامل معاه .. اخلي مثلا باب موضوعات خفيفة يبقى الباب المفضل بتاعي .. كده يعني angl::

بصراحة .. أنا باقرأ ساعات مواضيع في المنتدى هنا من 2003 و 2004 و 2005 .. بأحس إنها كانت أوقات الأمجاد العظيمة للمنتدى .. ياريت المواضيع الجادة يرجع تناولها بإسلوب حضاري كده زي زمان .. والله باحزن لما بأشوف اللي بيحصل في بعض المواضيع الجادة اليومين دول .. عموما خلاص .. أنا مش حمل زنّ ..

- لو حد جرحك اوي....بتتعامل معاه ازاي؟؟؟

أنا سياستي الحالية في الحياة إني أسيب اللي جرحني حتى لو جرح عميق جدا في حال سبيله تماما وأنسى اللي عمله بشكل شبه نهائي وساعات بشكل نهائي تمام لو أنا متأكد إني مش هشوف الإنسان ده تاني ..

لو بقى عارف إني هاشوفه تاني .. وعارف إنه هيستمر في اللي بيعمله تاني وتاني وتاني .. في الحالات دي .. أنا باستخدم سياسة اسمها "التعذيب البطيء ذو النفس الطويل والممتد" angl::

عموما أنا لا أحكم على شخص من غلطة, ولا أتنين, ولا تلاتة, ولا أربعة, ولا خمسة. بعد كده .. باعتبر بشكل شخصي إن حلال في اللي هاعذبه اللي هيشوفه مني .. وبدون أي وجه للعجلة .. ولو ماشوفتوش تاني يبقى بَركة يا جامع .. لأني لا أؤمن بالانتقام ولا بأخلاقيته ..

فيه حالات تانية ممكن أستعمل معاها سياسة ردع بس بتبقى مع الناس اللي بتخاف مابتختشيش .. يعني أديهم قرصة ودن .. زغدة كتف .. الناس دي عادة بعدها بيفهموا إني جنتل بمزاجي مش عشان أهبل ..

عموما أنا من النوع اللي بيسامح بعد فترة .. بس مش هينفع أسامح واحد مش قادر يمنع نفسه من إعادة حرجي مرة بعد مرة بعد مرة .. مش عشان أنا مش عايز أسامحه ولكن عشان الفترات بين أعماله الجارحة بتكون أقل من الفترة اللازمة ليَّ عشان أسامح :)

- بتعرف تقول انا آسف.... و لا بتحب تعبر عنها بطريقة تانية؟؟؟

شوفي يا لماضة .. أنا باعرف أقول I am sorry وبعرف برضو أقول I apologize .. وانتي يا لماضة أستاذة انجليزي وعارفة الفارق الكبير اللي بينهم .. وعموما أنا ممكن أعبر عن أسفي أو عن اعتذاري بالقول وبغيره .. وماعنديش أي غضاضة من القول .. بالعكس .. أنا باشجع الموضوع ده جدا .. مفعوله في أوقات كتير سحري ..

- نصيحة ممكن تقولها لاخواتك البنات......أيون هات شعرك بقي علي جنب...و احوبك الكوفية....قدامك المكرفون....يالا ذيع؟؟؟

لما الباشمهندز طه يقعد على الكرسي .. مش عايز أحس إني سايب حواليه بنات .. لأ .. لأ .. لأ .. أنا عايز وحوش .. عايز شراسة .. عايز عنف .. دم .. سواطير .. عايز رعب .. أنا عايز السيرفر بتاع المنتدى يقع من كتر الكهربا اللي ماشية في الكرسي angl::

أنا مش هاكون معاكوا ساعتها عشان هابقى باحلّق على المشرفين اللي هيحاولوا يوقفوا المشرحة دي :)

هي دي نصيحتي ليكم يا بنات :blush2:

[MaYousof]

- محفظتك...... ايون اطلع بيها.....فيها حاجة مميزة..... ايه بقي و لمين.. و ازاي و امتي و فين...

أنا أيام ماكان عندي بزنس هنا في مصر كنت شايل معايا علطول في المحفظة طوابع دمغة من أم 30 قرش الطابع وطوابع رسم تنمية من أم بريزة

دلوقتي المحفظة فيها صور شخصية .. حبة خلفية بيضة .. حبة خلفية سودة .. حبة خلفية خضرا .. حبة خلفية بمبى .. وكل صورة بتروح لصاحب نصيبها :)

- البس الخوذة.....اركب آلة الزمن.....هتعيش ف انهي وقت و ليه؟؟؟

ممكن زمن الرسول عليه الصلاة والسلام .. على الأقل ساعتها لو ماكنتش في مكة أو المدينة كنت هابقى في حتة تانية فيها عرب محترمين .. إوعي يا لماضة تكوني ظبطتي المكان اللي هتنزل فيه آلة الزمن على أمريكا الجنوبية .. تبقى حوسة angl::

- لو هتمسك طباشيرة و تشخبط ع السبورة......هتكتب ايه..... بس خلي بالك فصل تالتة اول هنضمه علي فصل تالتة تاني و كلهم هيجوا يتفرجوا ع السمبورة

لا مانع في أن تكون أنانيا .. لكن الغباء في أن تكون غير قادر على رؤية مصلحتك الحقيقية

- بنوتة معجب بيها موووووت جت و حكتلك انها معجبة بصاحبك الانتيم....و انت عارف انه مالوش في الالتزام....(النسخة الهندية من جعلوني مجرما....) تعمل ايه؟؟

مالوش في الالتزام إزاي يعني؟ مابيصليش الفجر في الجامع؟ :blush2:

حتى لو معجب بيها مووووووووت مووووووووت مووووووووت ..مادام هي عقلها مع حد تاني يبقى تأكدي إني عمرى ما هإنترفيير (معلهش يا جماعة أصل أنا طالبة معايا أكلم لماضة بمصطلحات انجليزية)

- كلمة واحدة توصف:

الحياة صعبة

السفر متعة

الغدر قتل

الانكسار مؤلم

السذاجة خيبة

الغباء شر

سمسمة حبيبتي

- سؤال مش ممكن تجاوب عليه؟؟؟؟؟

هو فيه بنت عجباك في المحاورات يا محمد؟ angl::

[MaYousof]

أسئلة رضوي:

- فاكر أول مرة تروح المدرسة !!!!!!!!!!!!!!! ياتري كنت بتعيط زي معظم الاطفال ولا........؟

أعتقد عيطت للأسف ..

أنا كنت متوقع من نفسي أداء أحسن من كده .. بس شكلي كنت عيل بصحيح :)

- لحظة الم مش قادر تنساها ؟

بجد مافيش .. أنا بعد كام شهر بكتيره من أي لحظة ألم بارمي ورا ضهري ..

أو .. يمكن .. مفيش لحظة ألم عنيفة مريت بيها لحد دلوقتي .. ده برضه احتمال ..

- لحظة نجاح غيرت طعم الدنيا ؟

أظن كان فيه كذا لحظة .. كلكم طعمهم كان حلو قوي ..

- مين بس اللي مضايقك ؟

مافيش حد الحمدلله ..

يا رضوى أنا عيان .. شوفيلي كباية كمون بليمون الله يرضى عليكي angl::

- كام أمنية لسة ما اتحققتش في حياتك ؟

تلاتة :blush2:

- قرار لازم تاخده .......... ليه مستني ؟

خايف ..

- مين أكتر حد في المحاورات بتتفق معاه ؟

بصراحة فيه كتير متفق معاهم ..

- اكتر صفة بتكرها في البني ادم ؟

الندالة

- امتي بتقول خلاااااااااااااااااااااااص تعبت مش قادر ؟

مع الزنانين

- صفة في مايوسف بتعتز بيها جداً ؟

صفة .. العدل ..

أمانة عليكي يا رضوى بلاش أسئلة تحسسني إني لازم أشكّر في نفسي .. أنا هربت من كذا سؤال بالشكل ده عشان ما يشكّر في نفسه إلّا إبليس . بس حسيت إني لو هربت من السؤال ده كمان وكتبت "العبط" هاتسترزلوني زيادة ما أنا رزل angl::

- لماذا لغتنا الجميلة ؟

عشان جميلة ..

كمان .. دي لغة قيّمة جدا .. مش مجاملة .. أنا رصيت هنا إهم خمس لغات في العالم .. العربي هو اللغة الأقدم بين الخمسة الأهم ..

- مين أكتر الادباء المصريين قرباً الي قلبك ؟

أنيس منصوووور angl::

شوشة كمان عليه قلم جميل جدا .. قصيدة هذه بلادي أبكتني ..

عموما حتة ذكر أسماء دي دايما بتظلم ناس كتير جدا .. مابحبهاش angl::

- ليك في الادب الانجليزي ....... شيكسبير والناس دي ....... ولا العربي لايعلي عليه ؟

الاختلاف في الرأي لا يفسد للود قضية ولكن .................................. أكمل

ولكن الشيخ زبير ده إنسان مارق .. تفرنج أول ما عرضوا عليه الجنسية وغير اسمه من الشيخ زبير إلى شيكـ سبير

[MaYousof]

- نقطة ضعف مايوسف ؟

الكاراتيه (البوزو) angl::

- مصدر الامل الذي تستمد منه طاقتك ....... فين ؟

الله

- تتمني تعيش كام سنة ؟ وعايز تعمل فيهم ايه ؟

أتمنى .. أعتقد إني الحياة مش مغرية جدا بالنسبالي .. اتسألت رأيي فيها وقلت صعبة وقلت استثمار يبوء في أوقات كثيرة بالفشل .. يعني الحياة إز نوت فيري تيمتينج تو مي (شكلي هاقلب انجليزي مع رضوى هي كمان)

عموما أنا كإنسان .. مش عارف ليه حاسس هأتم الـ 60 ..

- لما تتجوز ان شاء الله ( روح لعنبي وهو يفكلك اللعنة ) ممكن تساعد المدام في شغل البيت لو هي تعبانة او مشغولة اوي ؟

أكيد .. على فكرة أنا هاحب مراتي جدا انشاء الله .. بس نتجوز الأول angl::

أنا ماعنديش حتة راجل وست دي .. كلنا بني أدمين .. وممكن ست تبقى بميت راجل .. راجل راجل .. أنا التفريق عندي هو يا متخلف يا غير متخلف .. وعندي عنصرية شديدة ضد التخلف .. شيء لا أفخر بيه إني عنصري تجاة المتخلفين :blush2:

أوه صح نسيت .. أنا .. طباخ ماهر :) وباعمل أحسن بيتزا في مصر كلها غير تخصصات تانية كتير ..

- اتعلمت ايه من الدنيا ؟

الصبر

- كم عدد أصدقائك المخلصين ؟

مخلصين angl::

- استفدت من المحاورات ؟ ولو الاجابة بنعم ....... استفدت ايه ؟

جدا .. جدا .. جدا ..

اتعلمت من معلمين كتير ليَّ هنا .. رجال ونساء .. أتمنى إني أكون ربعهم

تم تعديل 23 فبراير 2010 بواسطة MaYousof

[رضوي]

السلام عليكم ورحمة الله وبركاته

عندك رضوى مثلا .. من ساعة ما طلبت الموز أبو لبن وهي قافلة البوفيه بكالون الأهرام أبو ست تكات

ياااااااااااااااااااااااااااااااااااخبرررر معقول لسة الموز ماوصلش

ياخبر أبيض

لالالالالالالالا

حالا الموز بالبن يكون جاهز

بس ليه راجع من الرحلة كسلان ومش بترد علي كل الاسئلة ؟

لا المفروض يبقي كلك نشاط وحيوية كدة

يلا بقي خد السؤال الفزيع دة

اجبااااااااااااااااري علي فكرة

جاوب علي السؤال اللي مش ممكن تجاوب عليه ؟

:blush2:

يالا والا مافييش موز

جو

أخويا الكبير

منورنا :)

[MaYousof]

الدفعة الأولي من أسئلة Scorpion:

- هل أنت صعيدي .. أم فلاح ... أم من أهل البندر ؟

فلاح :)

بس الحمدلله أنا عمري ما فرّقت بين اتنين مصريين بناء على أصلهم إطلاقا ..

طب أنا هقولك حاجة غريبة ..

أنا .. شرقاوي!

وعمري مادخلت قهوة الشراقوة إلا النهاردة بس angl::

والسبب سؤالك ده .. قلت أتاكد إنهم بيكرموا الناس على القهوة هناك قبل ما اعترف إني شرقاوي angl::

أصل بجد أنا شايفنا كلنا مصريين وخلاص angl::

- ما هو برجك ؟

السرطان :blush2:

- لماذا تكتب ؟

كثيرا ما سطرت سطورا لم تقرأها نفس سواي ..

أنا أكتب لأن في الكتابة مُتنفس ..

عموما أنا عندي ييجي عشرين محاولة شعرية ممكن أحطهالكوا في موضوع إذا بتريدوا :wub:

- حين يصبح الهروب حلآ .. الي أين تهرب ؟

أنا هارب بطبيعتي ..

شوفوا يا جماعة .. أنا هانفتح شوية معاكم واتكلم بحريّة ..

وأول حاجة هأقولها هي إني إنسان إنعزاااااااااالي بشكل منفّر للّي يعاشروني لو ماكانوش من أهلي ..

بس

أنا ماعنديش مانع إني أقفل الباب على نفسي أيام .. عادي جدا ..

- فين عبده السواق .. و الأهم فين الترومبيل ؟

أقولك بس اوعدني إنك ماتنهرهوش من اللي حصل لما تشوفه .. ممكن؟

أنا بعد ما عبده جابني من كتراكت .. ونزلني حارة الطلاينة .. رحت مميل عليه ودبيت في حجره برطمان ملوحة صغير .. ودبيت في جيبه جوز جنيهات ورق .. وقلتله .. روح يا عبده اشتريلك لبشة بصل اخضر زرايعي مزهزه تاكل بيهم السمكتين دول هتعمل أحسن دماغ .. وسيبني أنا دلوقتي مع أبو جنيور عشان عايزه في كلمتين ..

الراجل خد الطرومبيل وروح بيتهم بعد ماجاب البصل ..أكل سمكتين الملوحة من هنا .. ودماغه لفت من هنا .. ومش عارف يفوق من ساعتها أدِيله يومين .. وإنت يابو جنيور سيد العارفين إن اللي بيسوق في حارة الطلاينة ودماغه لفة بتجري وراه عربية البوليس الألفا روميو لحد ما بيمسكوه .. فأنا قلتله يا عبده اوعى تسوق الطرومبيل لحد ما راسك تفوق من أكلت الملوحة دي angl::

[MaYousof]

أسئلة حسام يوسف:

- كيف تري بوجهة نظرك الشخصية كلا من:

جمال عبد الناصر

محمد أنور السادات

السؤال ده ماشاء الله يا دكتور, قيم جدا جدا ..

شوف يا سيدي .. أنا إنسان من النوع اللي صعب جدا إني أتطرف في فكري .. ولو تطرف فيه بيكون مجرد ادّعاء بواجه بيه تطرف مضاد مش أكتر ..

جمال عبد الناصر الناس انقسمت عندة إلى فرقتين .. كلاهما من وجهة نظري غلا في فكره ..

بس فيه في الآخر حقائق بغض النظر عن مسبباتها ..

حقيقة رقم 1:

- أكبر جنازة في تاريخ البشرية في حينها mfb:

حقيقة رقم 2:

- كاريزما منقطعة النظير bv:-

إذا, لا يستطيع أحد ان ينكر مدى أهمية جمال عبد الناصر لمعاصريه في حينه. لكن أنا رأيي فيه للأسف سلبي, دون تطرف مني. يعني, أنا ممكن أدعي إنه كان ينوي الصالح العام, فلم يوفقه الحظ!

أنا أعرف إن فيه ناس ممكن تتكلم عن انجازات الزعيم. لكن أنا مقياسي مختلف دوما. أنا بمسكها كده:

البداية - المدخلات:

الثورة 1952 - إلغاء الملكية وإعلان الجمهورية ورئيسها محمد نجيب 1953 - تنحية نجيب واعتلاء جمال عبد الناصر كرسي الرئاسة 1954

النهاية - المخرجات:

وفاة الزعيم جمال عبد الناصر 1970

إذا كانت الإجابة إن وضع مصر العام (كوطن) كان أفضل عند النهاية إذًا هاعتبر عبد الناصر كان زعيم ناجح ..

ممكن نعدد إنجاز .. اتنين .. خمسة .. ميّة .. ألف ..

كلهم عندي مايغفروش ضياع سيناء, عزة, الضفة, والجولان, خصوصا إن عمره ما قال اسرائيل خصم لا يستهان بيه ..

ماليش دعوة إذا كان قدره لم ينصفه .. ماينفعش نتكلم عن مدى إناصف القدر كمبرر لنتائج إدارة الرؤساء لأوطانهم ..

طب أنا قدري لو كان نصفني ومسكت البلد هاسوّي الهوايل .. هل عدم انصاف قدري لي مبرر كافي إني ماعملتش الهوايل لحد الآن؟

إذا, قبل 1952, مصر كانت من صافي الدائنين لبريطانيا بعد خروجها من الحرب العالمية التانية مديونة لأكتر من بلد ..

مصر كانت تمتلك أرضها في سيناء, وكانت مسئولة عن إدارة غزة وكمان السودان.

بعد 1970, مدينين لدول كتير .. راحت سينا .. راحت غزة ..

أنا مش عايز أعدد تحفظاتي في جوانب أخرى عديدة .. لكن في النهاية .. أنا فكرة الطاغوت الأكبر اللي فيه فئات بتشوفها في فاروق, ناصر, السادات, أو مبارك (طبعا ماعرفتش أحط نجيب عشان لم يسعفه "قدره") باعتبرها للأسف سفه .. مافيش حد ملاك .. مافيش حد شيطان .. مافيش يوتوبيا .. مافيش البطل الأعظم .. مافيش الطاغوت الأكبر ..

عبد الناصر عندي ياخد 45% حد أقصى, و5% رأفة عشان أنا بحب دكتور حسام. ينجح :)

السادات نفس المقياس, أمسكها كده:

البداية:

وفاة ناصر واعتلاء أنور السادات كرسي الرئاسة 1970

النهاية:

اغتيال الرئيس أنور السادات 1981

مسك البلد وضعها إيه؟

سابها وضعها إيه؟

هل المخرجات كانت أحسن أم أسوأ من المدخلات؟

السادات ثعلب عبقري .. أدار السياسة الخارجية المصرية - قد أدّعي - بالصورة الأدهى على الإطلاق .. تلاعب لعب بما توفر ليه من مقومات بكل من روسيا, أمريكا, بريطانيا, إسرائيل. مش هاقول بلد, لأ, لأ مش بلد, وإنما شخص, شخص كان بيدير بالمقومات اللي في إيده قرارات من الكرملين, البيت الأبيض, تن داونيج ستريت, والكنيست. شخص.

فاشل اقتصاديا؟ أنا شايف إنه كمجمل فشل, وقدره كما أحكم لن يشفعله فشله اقتصاديا. كامل لأ. مافيش حد كامل. لكن السادات قدّرة الله لمصر من رأيي, لأن حتى العباقرة ما كان في استطاعتهم إدارة ما أداره السادات سياسيا وحربيا. مقوماتنا كانت أهون بكتير جدا جدا من اللي استطاع السادات انجازه بها. دي مش عبقرية, دي أعلى بكتير من كده في رأيي. توفيق إلهي أكيد وراه حكمة. تقدر تقول إن من رأيي إن السادات قدره أنصفه :ninja:

بس أنا ماليش دعوة بالقدر .. الشخص عندي هو اللي في وش المدفع ;)

ياخد 100% من رأيي .. لأن ما أنجزه في وضعه اللي كان فيه ما كان غيره لينجزه بأي شكل ..

الـ 100% دي مش تطرف مني mfb: لأن السادات واخدها عشان قدره ساعده .. واحنا اتفقنا إني مش مستعد أعطي أي مبررات مبنية على القدر, عشان كده درجة التقد الكاملة يحصل عليها هو بشخصه.

تم تعديل 23 فبراير 2010 بواسطة MaYousof

[MaYousof]

على فكرة .. أنا عيان جدا ..

حاسس كإن حد رماني من بلكونة الدور التاني وعضامي كلها اتكسّرت :ninja:

ادعولي أخف ..

عيني عمالة تدمّع .. ورشح ..

ماظنش فيه سخونة .. لكن اعطس العطسة من دول أحس إن عضامي هتتفرتك من جوَّه .. عمري ما جالي دور رشح وعطس بالعنف ده .. عضام كتفي ودراعي والقفص الصدري كله بعد كل عطسة عنيفة بتؤلمني جدا جدا لأكتر من دقيقتين mfb:

ادعولي mfb:

[Damo]

الف الف سلامة. ان شالله اللي يكرهوك

انا عندي سؤال وحييييد (اصلي طيبة مش زاي التانيين :ninja: ) و سهل خااالص:

ـ الصورة بتاعت حضرتك دي عمرها اد ايه و مين اللي مصورهالك؟

mfb: Get Better Soon mfb:

[alex fox]

شفاك الله وعافاك وسلمك من كل سوء...

د انا كنت محضرلك شوية أسئلة mfb: ...

يالا... لما تخف وترجع لنا بالسلامة ان شاء الله :ninja: ...

خد ده ع الماشى :

ياترى من وجهة نظرك الراجل يبقى أهتمامه ببيته أكتر ولا شغله؟

عايز رأيك أنت... مش اللى المفروض يكون

[حسام يوسف]

على فكرة .. أنا عيان جدا ..

حاسس كإن حد رماني من بلكونة الدور التاني وعضامي كلها اتكسّرت mfb:

ادعولي أخف ..

عيني عمالة تدمّع .. ورشح ..

ماظنش فيه سخونة .. لكن اعطس العطسة من دول أحس إن عضامي هتتفرتك من جوَّه .. عمري ما جالي دور رشح وعطس بالعنف ده .. عضام كتفي ودراعي والقفص الصدري كله بعد كل عطسة عنيفة بتؤلمني جدا جدا لأكتر من دقيقتين mfb:

ادعولي bv:-

الف الف سلامة عليك يا محمد بيه

ممكن يكون بس من تغيير الجو

أنصحك بأبيمول اكسترا

قرصين الصبح

وقرصين بالليل

واديها عصير برتقان

جرب

ولو صابت

ادعيلي

الف سلامة عليك يا عمنا :ninja:

[engtaha]

الحجاج بن يوسف الثقفي الف سلامة عليك وخد بوصف الدوك واسال الله العظيم رب العرش الكريم ان يشفيك

2. بدون زعل "إلى من تنسب هؤلاء الشخصيات نسبة إلى اعضاء المنتدى"

 الناظر صلاح الدين

 طباخ الريس

 الامبراطور

 سيد العاطفى

 اللمبى

 صعيدى فى الجامعة الامريكية

 عمروسلمى

3. لمين تهدى "من الشخصيات العامة"

...جائزة اوسكار

....جائزة ..نوبل

...تاج ملكة جمال القلوب

وسام الجمهورية من الطبقة الاولى....

وسام الجمهورية من الطبقة الثانية.....

كتاب شكلها باظت..........

[مغتربة]

على فكرة .. أنا عيان جدا ..

حاسس كإن حد رماني من بلكونة الدور التاني وعضامي كلها اتكسّرت :rolleyes:

ادعولي أخف ..

عيني عمالة تدمّع .. ورشح ..

ماظنش فيه سخونة .. لكن اعطس العطسة من دول أحس إن عضامي هتتفرتك من جوَّه .. عمري ما جالي دور رشح وعطس بالعنف ده .. عضام كتفي ودراعي والقفص الصدري كله بعد كل عطسة عنيفة بتؤلمني جدا جدا لأكتر من دقيقتين :D

ادعولي :wub:

الف لا باس استاذ محمد

تغير الجو مع الارهاق لما بيجتمعوا بيفرزوا اعراض مزعجه زى دى

كتر من الليمون و الجنزبيل

و ان شاء الله يمن الله عليك بالمعافاه السريعه

[MaYousof]

أسئلة shiko:

- اتعرفت على المنتدي ازاى؟؟

كنت بابحث عن معلومة بخصوص موضوع الهجرة لكندا ..

- مين اول واحد قرتله فى المنتدى؟؟

الدكتور قناوي qenawy ..

- اسم المنتدى..عجبك؟؟ ولو ممكن نسميه اسم تانى هايكون ايه؟؟

اعتقد إن ممكن يكون فيه أسماء أقوى .. لكن .. مع الوقت والشهرة .. ممكن جدا اسم مالهوش أي معنى من الناحية المجردة يكتسب قمت جبارة ويساوي مليارات .. Vodafone مثلا إسم من الناحية المجردة مالهوش أي معنى .. وأصله جاء من Vo من Voice للصوت, da من Data للبيانات, و fone من Phone للتليفون .. ممكن جدا أجيب اسم أقوى من كده ويعجبني أكتر .. بس في الوقت الحالي Vodafone كإسم وعلامة ليهم قيمة رهيبة وإسم رنان ويساوي مليارات (مجرد الإسم وليس الشركة)

منه نستنتج .. سيبك إنتي من الإسم الرنان .. "محاورات المصريين" دلوقتي علامة ذات قيمة ضخمة جدا بأقلام بعض من يكتب فيها ..

- ايه الموضوع اللى اتكتب فى المنتدى هنا وتتمنى انك تكون انت اللى كتبته؟

تعالوا نقول الحمد لله .. أنا بأغبط عنبي جدا عليه .. أحسن موضوع في المنتدى كله .. تعرفي يا شيكو .. لو كل الناس بتعرف تقول الحمد لله مرة على الأقل في اليوم كنا هنبقى أقوى بلد في الكون .. ماهو طالما فيه قدرة على الرضا يبقى مافيش حاجة لبيع الذمم .. إند أوف ذا ماتر :big_boss:

عَمَّال أنا أتتريق على الجيل السيس اللي بيضرب انجليزي بين الكلمة والكلمة ومش واخد بالي من الخيبة اللي أنا فيها wst::

- كتبت كلمات فى المنتدى قبل كدا وندمت انك كتبتها؟

ليس بعد :blink:

- ايه المكان اللى ممكن تلاقى نفسك فيه؟؟

وانا قاعد في أوضتي على جنب وماسك القلم في إيدي ..

- دمعة ...نزلت من عينيك ...كان مين سببها؟؟

فيروس الأنفلونزا اللعين :sad:

- ما هو أول انطباع ايجابي بيتاخد عنك من أول لقاء ؟ وايه اكتر انطباع سلبي ؟

بجد ماعرفش ..

- اذا وانت ماشى وواحده مش عارف تركن العربيه وطلبت منك انك تركنلها العربيه وانت فى العربيه صرخت وقالت حرامى حرامى هتعمل ايه؟هههههههههههههه

:blink:

ولا حاجة .. هانزل من العربية وامشي واسيبها تصرخ زي المجنونة wst::

- ذكريات من زمن فات ...؟؟ ايه الذكرى اللى موش ممكن تتمحى من ذاكرتك؟؟

أفلام الكرتون المدبلجة اللي كنا أنا وأختي اللي من جيل الرواد بنتفرج عليها واحنا صغيرين ..

كانت مدبلجة بالعربية الفصحى ;)

- الغرور...الانانية...؟؟موقعهم ايه من الاعراب فى حياتك وبصراحة؟؟

أناني؟ دي شبة منعدمة على حسب علمي ..

مغرور؟ يمكن .. إحم .. حقي

شوفتي الحتة اللي فاتت دي

أهو ده غرور :closedeyes:

- حد اتهمك قبل كده بالنرجسية؟؟

ولا حتى بالكبر .. ولا حتى بالغرور .. يمكن من ورايا وانا ماعرفش .. أو من ورايا وماحدش حب يوصّلي ..

[MaYousof]

- اوصف شخصيتك فى 3 كلمات؟؟

عبيط, مغرور, ورزل ..

أظن التلاتة عليهم شواهد كتير في كل ركن في المنتدى wst::

- ايه رايك فى عمل المرأة؟؟

لا أعترض عليه إطلاقا .. ده اختيارها الذاتي ..

وماعنديش مشكلة لو زوجتي كانت رغبة في العمل .. ده اختيارها الذاتي ..

- ايه رايك فى تعدد الزوجات؟؟

ياريتني كنت أتمناه لنفسي .. كان زماني اتجوزت اتنين لحد دلوقتي وباجهّز في التالتة :sad:

عموما الأسلام إسلوب حياة .. مناسب لكل مكان وزمان .. الطلاق والتعدد مش مشرّعين فيه للتسلية أو المتع الشخصية .. لكن معروف إن تاريخ البشرية مر عليه كذا مرة فترات كان فيها التعدد رحمة اجتماعية .. زي ما الطلاق حلال .. هل معناه إني هاخالف شرع ربنا لو ماطلقتش مراتي! فيه مواقف بيكون فيها الطلاق أرحم للجميع من منعه ..

على أي حال .. أنا لو كنت بحار .. كنت اخترتلي أربع مواني من اللي باتردد عليهم في أسفاري وأخدتلي في كل مينا زوجة ;)

بس ياخسارة .. أنا مش بحار :closedeyes:

- هل تعتبر نفسك شخص طموح؟؟

بالتأكيد :blink:

- اصعب سؤال اتسألته؟؟

سؤال المشاركة 236# .. ومش هاعرف أجاوب عليه wst::

- من واقع خبرتك مع سمسمة...نصيحة توجهها لعضوات المنتدى الكرام؟؟

يا عضوات المنتدى الكرام .. لو عنديييكم زحلفة .. حافظوا عليها .. طلّعوها في الشمس كل يوم .. أكِلوها كويس .. الغذا ضروري لكل أنواع الزواحف .. خصوصا الزلاحف والسحالي .. لازم تدّوا زحلفتكم صوص الجزر على الفطار .. وأبل باي على الغدا .. وتعشوها خس بالكالسيوم .. وتتربى في عزّكم يا رب

- البيت الى بعد الى جانبكم كام دور ولون الباب ايه ؟؟

أربع أدوار .. أو يمكن تلاتة

ماعرفش :big_boss:

وماعرفش لون الباب إيه :blink:

[MaYousof]

- معجنون سنانك اللى بتستعمله الصبح موش قبل ماتنام نوعه ايه؟؟ومافيش اختيارات...

أنا بصراحة سمعت عن معجون إسمه سمن الهانم .. رحت أجيب منه أنبوبة لاقيته بيتباع صفايح .. أخدتلي صفيحة وجربتها

وياريتني ما جربتها :blink:

سناني إصفرت من ساعتها ومش عارف أعمل فيها إيه :sad:

- مكالمتك الاخيرة للريس فاكرها...اه ..لما قلتله اوروفوار..فاكر؟؟رد عليك ولا مطنشك لغاية دلوقتى؟؟

الريس عمره ما يتأخر عليَّ في طلب wst::

وعشان تتأكدي بنفسك .. انظري إجابة السؤال التالي :closedeyes:

- ممكن اعرف هيثم عاوز يسيب الباص ليه؟؟ليك يد بالموضوع ده؟؟اعترف!!

أنا كلمت الريس قبل ما أسافر بخصوص هيثم وأخوه .. سألني أنت مسافر إمتى .. قلتله بكرة إنشاء الله يا ريس .. فاكرة المكالمة دي ولّا نسيتيها؟ فاكرها طبعا :blink:

أنا كنت عايز سواق خصوصي ليَّ .. قلت لازم يكون واحد مجدع .. وجنتل .. ولمّا يكلمني .. يقوللي "يا بيه" wst::

أجيب مين .. أجيب مين ..

بعد ما اتخذت قراري .. واخترت السواق اللي أنا نفسي فيه .. كلّمت الريس .. عشان أنا عارف إن ليَّ دلال عليه .. وماحدش طبعا يقدر يكسّر كلمة للريس ;)

شوفي بنفسك .. للآخر

:big_boss: