دون كيوتى..... و القذارة

[se_ Elsyed]

صباح الخير يا جوبي

مش عايزين نعلق حجة توفير البديل على أشياء بديهية المفرض تكون موجودة في حياتنا

- يعني تقدر تفسر لي إيه بديل تكسير الممتلكات العامة للدولة ؟

- أو معنى إن ناس كتير تعودت ان تبصق على الأرض مش مهم بقى إذا كان في الشارع أو في الشركة أو يفتح زجاج السيارة ويعمل الحركة الزبالة دي اللي ممكن الهوا يطيرها وتلزق في وش حد ماشي في أمان الله ... بالرغم من إن ممكن يكون معاه كلينكس او حتى يا اخي منديل محلاوي ؟

في مثل كانت بتقوله جدتي الله يرحمها يا جوبي - إنت ما شوفتش جدتي الله يرحمها .. صح ؟ - وهو إن الشاطرة بتغزل برجل حمار ...

يعني والله يا عم لو ناس إتعودت على النضافة وحاسه إن الشراع ده ملكها وإن نضافته ستعود عليهم أولاً وأخيراً .. وما كانش في صناديق قمامة في مصر كلها ... الناس هاتتصرف برضوا وهاتلاقي طريقة حضارية لتصريف زبالتها زي ما كنا بنعمل زمان يا اي وكان في أشخاص بيجمعوا القمامة من امام كل شقة بخمسة جنيه في الشهر وهما بشطاء جداً وكل معداتهم عبارة عن قُفه تحمل على الظهر وعربية يجرها حمار ميت قبل كده 3 مرات ... يا أخي على الأقل لو في حس نضافة عند ناس كتير مش هاتشوف بعض المناظر المؤذية من ناس غير متحضرة ممكن تلاقيها ماسكة مقشة وبتكنس قدام بيتها- كتر خيرك يا عم الحاج - لكن ده بيجيب طين ويحطه على اللي عمله وبيزيح الزبالة بمنتهى البساطة أمام جيرناه اللي جنبه ....

الموضوع مش نضافة بس .. لأ دي حلقة متكاملة متعلقة من حب الوطن إلى حب الجار والإحسان إليه ... والتطبيق السليم للدين ... يعني لو إتكلمنا عن الدين الإسلامي اللي بيأمرنا إننا نتوضا 5 مرات في اليوم ويعلمنا الأصول السليمة للإغتسال وإماطة الأذى عن الطريق وإفساح الطريق للمارة ويُحذرنا الرسول الكريم بعدم الجلوس في الطرقات .. التسكع يعني او زي ما بنشوف كده القهوة من دول وهي مطلعة 100 كرسي بره المحل وتحتل الشارع ومش بس كده دول بيأذوا الرايح واللي جاي إن لم يكن بسماع ألفاظ مؤذية يبقى بنظرات وتعليقات أشد إذاءً ...

حكيت قبل كده إني كنت اتابع الحملة الترويجية لعرض فيلم " شفرة دفنشي " او دفنشي كود ... مش هاتكلم عن أوروبا لإن الناس دول مسلمين حقيقيين في سلوكهم والشوارع عندهم ممكن تفرش فيها وتنام مطمئن إنك في مكان نضيف ... ولكن هاتكلم عن دولة زي الفلبين .. فجابوا مناظر فيها وسنيمات ودور عرض وتحس إنك فعلاً في بلد أوروبي من كتر النضافة

كذلك في كثير من دول الخليج .... فالإختلاط بالاجانب بصراحة زرع في نفوس الموجودين سواء أبناء البلد أو الاجانب بالتعاون مع مجهودات الدول والاجهزة المعنية .... زرع فينا إننا نحافظ عالشارع والممتلكات العامة ... بغض النظر عن قوانين عقوبات او ما إلى ذلك ... ولكنه كما قلت أصبح سلوك عام ... ولو لقيت واحد ماشي في الشارع ورمى حاجه الجميع يبص له بإشمئزاز ... او لو واحد فتح قزاز عربيته ورمى علبة عصير أو منديل بتلاحقه اللعنات لإنه معفن ... وكذلك بالرغم من وجود سلوكيات خاطئة لبعض الصبية الصغار اللي بأعتبرهم مراهقين غير أسوياء ومذاجهم يجيبوا علب إسبراي ويشوهوا بها جدران المنازل أو المصالح الحكومية وغيرها ... فتجد ذلك سلوك مستهجن أيضاً وأمر لا يُمكن السكوت عليه ...

وفرصة نضيفة جداً إني إتعرفت عليك :lol:

[الأفوكاتو]

حبيبى إبن العم سى السيد

سعدت جدا بزيارتك لهذا الموضوع, و خاصة أننا قد شاركنا فى الماضى فى محاولات انتحارية لمحاربة الفساد البيئى, و التسيب الإجتماعى.

و قد كنت قد فتحت موضوع طويل عن التواليتات فى الواحة سميته" أدبيات التوليتات. و سوف أضع الوصلة للوصول إليه فى مداخلة لاحقة.

ما علينا, سوف أرد بتفصيل على رسالتيك الكريمتين, و على رد الأخ الفاضل جوبى, كى نوحد الجهود, و نوصى ببعض الحلول, بعد وضع أصابعنا على مصادر الضرر.

تحياتى لكما, و شكرا على مروركما الكريم.

تقبلا تحياتى.

[Ahmad Farahat]

أستاذي الكبير / الأفوكاتو

عندما تكلمت سيادتكم في الشأن المروري تذكرت أشياءا ظريفة للغاية

كمقال للأستاذ أنيس منصور حول الفشل المروري في مصر وأن الأجانب شعروا بسعادة بالغة عندما رأوا ان كل الناس ماشية

يقول أنيس إن الأجانب يشعرون بغضب شديد من السائقين الذين لا يكسرون الإشارة حتى ولو كان الطريق مفتوحا!!!!!!!!

يعني عندهم قمة التزمت واحنا سايبين خالص

ماشي

طبعا حكاية ما تاخدوا بالكم يا بهايم دي متتعداش

صعب تلاقي سواق في مصر مبيشتمش

أيا كان

السواقة في مصر حتى ولو كانت لسيارتك الشخصية تحتاج منك لمراجعات في علم البذاءة

وكله عامل إنه طيار

مش سواق لأ كابتن طيار في أحسنها شركة طيران

أذكر إن الكاتب الساخر أحمد رجب قد نصح اتحاد الكرة المصري بإرسال حكام مصر في كرة القدم لتعلم السباب في معسكر مع سواقين ميكروباصات العتبة

نكتة مش كده؟!!!!!!!

لكن الرجل لم يبتعد عن الواقع كثيرا

على كل حال

إن أهرامات الحاضر في مصر من القمامة أغزر من أهرامات الحضارة البائدة

ربما كانت أقل ارتفاعا

لكن مهندسيها هم من شباب وشابات ورجال ونساء هذا الشعب العريق

صح

بلد أهراما صحيح

[gopy]

صباح شريف يا سى السيد,

هى صحيح فرصة جميلة أنى أتحاور مع شخصية رائعة زى الأستاز الأفوكاتو وشخصية جميلة زى حضرتك أنا أعرفكم من زمان من خلال المحاورات وباسجل إعجابى بأرائكم وأراء معظم المشاركين اللى باتعلم منها الكثير,

إحنا تقريبا بنقول نفس الكلام بكلمات مختلفة, بس أنت شايف ان السبب الرئيسي لهذه السلوكيات الغلط هو ضعف الشعور بالإنتماء وضعف الوازع الدينى والأخلاقى باختصار الناس بتعمل كده لأنهم أوغاد وهذا قد يكون صحيحا فى رئيي ولكن فى حالات قليلة ولكن الأغلب أن الناس بتتصرف غلط لأن ما فيش حد عرفها الصح إيه

يعنى حكاية تكسير ممتلكات الدولة دى أصبحت محدودة جدا بعد ما الناس بدأت تعرف أن الممتلكات ديه فى الواقع بتاعتهم هم " تعرف أيه السبب الرئيسى أن الناس ما بتقطعش كراسى الأوتوبيس بالموس دلوقتى لأن مافيش أتوبيس ممكن يكون فاضى بما يسمح بهذا التخريب والأهم أن ظاهرة لعب الكرة الشراب تقريبا أنتهت بين الشباب ,بالتالى مش محتاجين سفنج الكراسى"

البديهيات فى الحياه محتاجة خلق وتقوية وعى إجتماعى وفردى يستنكر التصرف الغلط ويخلق رفض و ضغط على الشخص يقوم تصرفاته (توعيه) وساعتها حتى ممكن ما تحتجش لقانون

و الأمثلة كتير على ده (مثل توقف المدخن عت التدخين فى وسط مجموعة غير مدخنة – أو مقهى فتح فى عمارة سكنية وقفل بعد فترة قصيرة لرفض السكان وجوده بينهم )

أنا طبعا ما شوفتش جدتك الله يرحمها ويرحم أموتنا جميعا ولكن أنا مقتنع أن الناس دى رغم بساطتهم كانو فاهمين الحياة بصوره أفضل واعمق من فهمنا لها وفى أحيان كثيرة بعد لف و تجارب متعددة تلاقى نفسك بترجع للى هما قالوه

وهى فرصة نضيفه صحيح أنى تعرفت عليك

[Scorpion]

للرفع