مشكلة أزلية إسمها " الزمالك "

[se_ Elsyed]

الزمالك اصبح حاجه كده زي المشاكل التي لا يوجد لها حل عند احد

فللعام السادس على التوالي يدخل الزمالك في مشاكل سوء الاداء وسوء الاداء وسوء كل حاجه بصراحة

لكن هذا العام الوضع مختلف تماماً من ناحية كل شيء

فبعد ان قالت الجمعية العمومية كلمتها واختارت ممدوح عباس بالانتخاب الحر

فتح ممدوح عباس باب خزائنه على مصراعيه وعضد الفريق بصفقات من النوع الفوق الثقيل

ويكفي ان نعرف ان احمد حسام ميدو جاء للزمالك إعارة لمدة عام ... الكل يمسك أعصابه

بـ 14 مليون جنيه

وعفواً يعني " الجنازة حارة والميت كلب " يعني دوري مهما كانت قوته ومنافسته لا يستحق ان ندفع في لاعب هذا المبلغ لمجرد الأعارة

يعني لو شاري عقده هاقول ماشي .. هابيعه تاني أأتسفيد منه لو كان لاعب متميز

لكن 6 مباريات عدوا وميدو ما رفعش كورة خطرة حتى ..

وعمرو زكي .... 5 مليون في السنة

لييييييييييه ؟

ناهيك عن اللاعبين الأجانب والصفقات الاخرى العديدة

وبعد كل ده

6 مباريات = 18 نقطه ... حصل الزمالك فيهم على 7 نقاط ... وهو شيء قمة في المسخرة الحقيقة لفريق يدعي إنه قطب من اقطاب كرة القدم ومنافس على البطولة ...

فوزين

3 هزائم

تعادل واحد

هل هذا يُعقل ايها السادة ؟

طب هانقول العيب فين ؟

العيب طبعاً في ممدوح عباس اللي ظن إن كل شيء ممكن تشترية بالفلوس .. وبالتالي ما سمعش عن حاجه اسمها تجانس وتفاهم بين اعضاء الفريق وبعضه

ووجدناه بمنتهى التهور والعشوائية يُقيل المدير الفني السويسري " دوكاستال " بعد 3 مباريات فقط .... وهو الذي كلف النادي ملايين الجنيهات في المعسكر المغلق الذي تم تنظيمة قبل إنطلاق الدوري بسويسرا

وبمنتهى التهور والغوغائية يذهب عباس ليستقدم للمرة الثانية المدير الفني الهارب العام الماضي الفرنسي " هنري ميشيل " والذي كلف النادي ملايين الجنيهات العام الماضي في معسكر بفرنسا حيث الطبيعة الخلابة ... ثم في نهاية المعسكر وقبل إنطلاق الدوري بإيام يفر هارباً من بره بره ليتولى تدريب منتخب المغرب ويفشل في بداية مشواره معه فشلاً ذريعاً فيتم طرده ليذهب الى جنوب افريقيا ويدرب احد الفرق الكروية هناك ويفشل فشل أكبر وأكبر ويتم طرده

ومع ذلك ينسى عباس الابيض كل هذا ويقوم بأستقدامه ويتلقى هزيمتين متتاليتين من طلائع الجيش والاسماعيلي

والمصيبة الأكبر ان كل النقاط التى خسرها الفريق كانت على أرضه ووسط جمهوره

فما بالنا عندما يتقابل مع الاهلي ذهاباً وأياباً أو عندما يخرج لفرق قوية مثل بتروجيت والمصري والمحلة وبترول أسيوط والمنصورة وغيرهم من الفرق الصعبة المراس على أرضها

والسؤال الذي يدور الأن في ذهن كل من يفهم كرة قدم

ماذا بقي لكي يتم تغييره

إدارة ... وتم تغييرها

مدير فني .....تم تغييره أكثر من مره محققاً أرقام قياسية هوجائية

لاعبين .... أكثر من مره يتم تغيير قوام الفريق تغييراً تاماً

؟؟؟؟؟؟؟؟؟؟؟؟؟؟؟

اتصل بي زوج اختي وهو يعيش بأوروبا وكله حزن وخوف قبل المباراة وهو بالمناسبة زملكاوي قديم ....... وقال ...... هل يفعلها الأسماعيلي كالمعتاد ... و

يهزمنا على أرضنا ؟

فقلت لهم ضاحكاً

يارب يتعادلوا عشان تبقى في مصلحة الأهلي

ففوجئت به يصعقني بخبر مؤلم ...

وهو إن اخوه ... وهو زملكاوي متعصب مجنون وقد تخطى الخمسون عاماً ... قد أصيب بجلطة في القلب .... عندما أهدر أحمد حسام ميدو ضربة الجزاء أمام بتروجيت وتم نقله الاى المستشفى وهو الأن يستعد لتركيب دعامه في القلب ...

لا تعليق

وللحديث بقية

وبجد والله قلبي عند كل زملكاوي يائس

وأخص بالذكر أخي الدكتور حسام

وحبيب قلبي موديست المختفي في أحراش المجهول

وأبعث أحر التهامي بمناسبة العيد لمام وتيتا وطنط عديلة وعمو شلبي وخالتو جلبهار ... وأنا وإنت

[se_ Elsyed]

بالمناسبة

ربنا ما يقطع للزمالك عاده

اعتاد الزمالك دائماً على التنكيد على جمهورة في المناسبات السعيدة والاعياد

انا عندي 37 سنة أهو وما شوفتش الزمالك فرح قلب جمهوره في عيد ولا حتى في عيد ميلاد

شيء يرفع الضغط فعلاص والله

[الترجمـان]

ففوجئت به يصعقني بخبر مؤلم ...

وهو إن اخوه ... وهو زملكاوي متعصب مجنون وقد تخطى الخمسون عاماً ... قد أصيب بجلطة في القلب .... عندما أهدر أحمد حسام ميدو ضربة الجزاء أمام بتروجيت وتم نقله الاى المستشفى وهو الأن يستعد لتركيب دعامه في القلب ...

لا تعليق

دانا ضحكت ضحك ساعتها .. :closedeyes:

حاسسيت الواد وهوه داخل يشوط البلنتي انه داخل يصور إعلان مش داخل يجيب جون علشان يكسب النادي اللي دفع فيه فلوس..

للأسف الزمالك اشترى أسامي يمكن نفعته في الحملات الإنتخابية ولكن مش ضروري انها تنجح على ارض الملعب ..

[tarek hassan]

أمتى يرجع الزمالك مش عارف

الزمالك حضر له جمهور النهارده محضرش لأي فريق تاني

مفيش فايده

والآخر الجمهور هو اللي غلطان

واللعيبة مالهمش ذنب

شيكابالا بيشتمهم وعايز يضربهم

منتهى السفالة

حراام عليهم

لم ينظر لمستواه المتدني وأنانيته

عموما اللي اختشوا ماتوا

بس مش عارفين نغير

نعمل ايه

تم تعديل 22 سبتمبر 2009 بواسطة tarek hassan

[حسام يوسف]

لا أراك الله مكروها فى عزيز لديكم يا عزيزي س س

الحقيقة بعدماتش انبي

قلت خلاص

كله يوعي من وش الزمالك

ومن ماتش بتروجيت

لما شفت ميدو بياخد الكورة فى حضنه ويصر انه اللى يشوط البنالتى

رغم ان المفروض فتح الله اللى يشوط

في اعادة لمشهد عمرو زكي-جمال حمزة فى 2007

قلت تمام

على رأي سعيد صالح فى العيال كبرت

طبق الأصل العلقة اللى فاتت

لا قلم نقص

ولا قلم زاد

بعدها سي عباس يتحفنا بتصريح يقول فيه

العشر بطولات اللى جاية ورا بعض دول للزمالك

ياسلااااااااااااااااااااااااااااااااااااااام

أولا اللى يقول انه هيكسب ماتش قبل ما الحكم يصفر يبقى بيهبل

ويهرتل

وقريبا فى اللغة المصرية

بيعبس

نسبة لعباس الأهبل مالك وسية نادي الزمالك

10بطولات؟

ازاى يعني؟

وهوة المحروس ايه مؤهلاته عشان يقول كدة؟

لا رياضي

ولا بتاع كورة

زكيبة فلوس وبس

ولما بيتكلم بحس ان معاه اعدادية قديمة أو معهد قطن

وكملت بعودة الخامورجي الخاين ميشيل

وطول ما فيها عباس

يبقى لازم الفاس

تقع فى الراس

وربنا يشفي قريبك يا س س

وبهدي كل اللى بيحصل للى كانوا بيهللوا لعباس ومجلسه

ولنا الله يا زملكاوية

تم تعديل 23 سبتمبر 2009 بواسطة حسام يوسف

[سكر]

واضح جدا ان عباس الابيض بجد متعبش فى الفلوس

يعنى لا سافر الخليج وتعب وشقى ولا حتى اوربا

وبجد ممكنن نطبق علية عدة امثال

الى معاة قرش ومحيره يجيب ميدو ويطيره

بالرغم من ادراكى الشديد لاهمية الرياضة فى حياة الانسان وليس الكورة فقط

الا ان مايحدث من بعزءه اموال فى الزمالك هو اقل ما يقول علية سفه

والناس الى مش عجبها التبرعات الى بدعاية واعلان

تيجى تشوف التهريج الى بجد بس دة تهريج بالملايين

[سكر]

بالمناسبة نسيت اقول

لا يمكننا حل مشكلةٍ باستخدام العقلية نفسها التي أنشأتها.ألبرت أينشتاين

يعنى لازم نضرب عباس ومرتضى بالنار الاول وبعد كده

نفكر ازاى نحل المشكله

[hanzalah]

قادني حظي الى الشاشة الفضية

وقعدت مع مصطفى افندي (7 سنوات) ناكل ترمس و نحرق ف دمنا !!!!

انا مش زملكاوي

عشان محدش دماغه تروح لبعيد

لكن اللي بيحصل فعلا يحرق الدم

ربنا يكون ف عون صاحب الدعامة - دعواتك يا عمو س س -

وربنا يكون ف عون كل زملكاوي

واتمنى ان الغاء نادي الزمالك يكون من ضمن البرنامج الانتخابي القادم للسيد الرئيس

:sad:

[mandoo]

والله ياأبو الأسيان الواحد حاسس إن نهايته حتكون بسبب الزمالك ... يعنى مثلا إمبارح كنت متفائل نكسب واحد ولا إتنين ولو مقدرناش ... يبقى أضعف الإيمان ... تعادل يعنى .... وبعد بداية المباراه حسيت حيجيلى الضغط وفقدان النطق والشلل اللى بمقياس عشرون ريختر ( الشلل الرعاش بقى موضة قديمة ) ... المهم ياباشا ينطرد هانى بيه سعيد وتحس إن الدفاع شوارع من قبل ماينطرد ... ياليلة سوخه ياولاد ... ده كده حنشيل كتير .... وشوية والمخرج اللى شكله أهلاوى ... يروح نازل بخبر الموسم ... خسارة فاروق حسنى رئاسة اليونيسكو ... ياعم المخرج هيه ناقصاك ... وطبعا لأن لعيبة الزمالك قلبهم أبيض ورهيف ... أول ماعرفوا بهزيمة فاروق حسنى ... قالوا لازم نخسر تضامنا مع حسنى ... وده يوضح لمعاليك مدى وطنية فريق الزمالك وتضامنهم وإلتفافهم حول القيادة السياسية .. فنحن كالجسد الواحد إذا إشتكى منه عضو تداعى له سائر الجسد بالسهر والحمى ... المصيبة الكبرى ... لاعب تانى عاوز يروح الأهلى أو الزمالك .... حسام غالى ... وأعتقد إن الأهلى مش ممكن يدفع فيه المبلغ اللى دفعه النصر حين قام بشراء اللاعب ... يبقى مافيش غير مين اللى ممكن يدفع .... مين الأهطل اللى معاه فلوس كتير ومش عارف يصرفها فى إيه ... مافيش غيره عبس ... الله يخرب بيت اللى كان السبب فى إننا نشوف الوجوه العكره دى ... وياسلام ياباشا قبل الدورى يقولك سوف نحصد عشر بطولات ........... راجل مجنو فعلا ( يعنى مجنون ) ... عشر بطولات منين !!!! هو كان بيحسب بطولات أوروبا وأمريكا الجنوبية معاهم .... ربنا ينتقم منك ياعبس ... وأشوف فيك يومين ولا تلاتة قبل ما أموت

اللى مخوفنى بجد بعد إحلال وتغيير اللاعبين والجهاز الفنى والإدارى ... حيكون من الطبيعى المطالبة بتغيير الجماهير بحجة وشهم وحش على النادى ... أصل إحنا جمهور فقرى .. حسبنا الله ونعم الوكيل ......

[se_ Elsyed]

ويحك يا ماندو !!!!!!!!!!!!!!!

اصبئت يا رجل ... ؟

بقى طلعت زملكاوي وأنا اللي كنت عاوز أتبناك واعمل منك محاوراتي ما حلصش وكنت هاديلك كل عصارة نخاع خبراتي

إخص يا ماندو

وااااا ماندوهاه

-----------------------

بالمناسبة

أكثر ما يُبتلى به أي فريق رياضي هو .. الإداريين الكفتجية

من عينة مرتضى منصور وبيسو الأبيض وأخيراً أبراهيم لا مؤخذه يوسف

أقسم بالله سمعت له كلام في مودرن سبورت بعد المباراة يندى له الجبين ويُحاسب عليه كرجل مسئول في النادي

يا نهار مش فايت

واحد عضو مجلس إدارة المفروض إنه محترم .. وعضو لجنة كره ... يقول بعد الأسبوع السادس إن فريقه خرج من المنافسة على بطولة الدوري !!!!!!!!!!!!!!!!

وواحد محترم وإداري يقول إن اللعيبة بقوا زي موظفين الحكومة وبييجوا النادي يتدربوا الساعة 2 ونص العصر كل يوم ؟

يا نهار مش فايت

أومال إنت بتعمل ايه يا عم الكفتجي ؟

ودورك إيه في مجلس الإدارة وإنت شايف ده ؟

وهل دي كلمة تتقال إن فريقك بقى خارج المنافسة وإحنا لسه بنقول يا هادي ..؟

[فريح]

من رأى أن مشكلة الزمالك كإدارة و كجماهير أنهم لم يقتنعوا بعد أن لاعبيه هم لاعبى فريق عادى فى المستوى متقارب فى مستواه مع

فرق أنبى و الجيش و

بتروجيت و خصوصاً بعد أرتفاع مستوى هذه الفرق و أصبح صعب حتى على الأهلى نفسة التغلب عليها و التى جعلت الأهلى مثلاً راضى جداً

لتعادلة مع حرس الحدود منذ

أيام و أيضاً حصل الأهلى على بطولة الدورى العام الماضى بصعوبة بالغه .

بعد هذه المقدمه أود أن أقول أن الإداره عليها عامل و المدير الفنى عليه عامل لكن العامل الأهم هم اللاعبين أنفسهم و الدليل على ذلك

( كم لاعب من الزمالك أساسياً فى

المنتخب طوال السنوات العجاف الماضية للزمالك ؟ ) ستجد أن عدد لاعبى الزمالك الأساسين فى نفس عدد لاعبى حرس الحدود أو أنبى أو

بتروجيت هذا معناه أن مستوى

لاعبى الزمالك لم يؤهلهم لتمثيل المنتخب حتى ظننا أن بطولة أفريقيا للأمم 2006 يمثلها فريق النادى الأهلى مع بعض المحترفين .

المشكله الحقيقية أن كثيراً من الوقت تتحدث إدارة الزمالك أن فريقها يملك أحسن لاعبين فى مصر و للأسف جماهيره تصدق ذلك طيب بعيداً

عن النتائج فين اللاعبين دول عند

مقارنتهم بباقى لاعبى الفرق الأخرى عند الأختيار للمنتخب .

الحل من وجهت نظرى أن تبتعد الإداره عن كل الشعارات الأنتخابية الرنانه و تقف على أرض الواقع و تعرف مستوى لاعبيها جيداً و تعمل فى

صمت على بناء فريق حقيقى ليعود

للمنافسه بعد عام أو أثنين ( على فكرة فى نهايات الموسم الماضى ظننت أن الإدارة بدأت تعى ذلك عندما دفعت بالعديد من اللاعبين صغار

السن المتحررين من الضغوط

الجماهيرية و المطالبة بالبطولة فقدموا أداء جيد لدرجة أنهم أحرجوا الأهلى جداً و كانوا الأفضل و لكن للأسف مع هوجة الأنتخابات رجعت

ريمة لعادتها القديمة و أشرب يا عبس

صفقات للطرقعه الأعلامية مثل ميدو )

على فكرة أنا أهلاوى بس نفسى يعود الزمالك الى سابق عهده

[se_ Elsyed]

من رأى أن مشكلة الزمالك كإدارة و كجماهير أنهم لم يقتنعوا بعد أن لاعبيه هم لاعبى فريق عادى فى المستوى متقارب فى مستواه مع

فرق أنبى و الجيش و

بتروجيت

اختلف معك تماماً يا فريح

من زمان معروف ان الزمالك بيضم افضل لاعبي مصر

خلينا نتكلم عن الوقت الحالي

محمد عبد المنصف ... عبد الواحد السيد من أفضل حراس المرمى في مصر

فتح الله وهاني سعيد .... مدافعين دوليين

حازم امام الصغير ... حدوته بصراحة

علاء المرغني ... صبري رحيل ... لعيبه واعده صاعده

شيكابالا ... لا جدال على مهارته

عمروز زكي مش محتاج كلام

وغيرهم وغيرهم

لكن المشكلة في اننا نتحدث عن لعبه جماعيه مش تنس طاولة ولا مصارعه

إذاً .. اذا لم يتم صهر تلك المهارات في كيان واحد ملتزم .... يبقى عليه العوض مثلما يحدث الان

[mandoo]

ويحك يا ماندو !!!!!!!!!!!!!!!

اصبئت يا رجل ... ؟

بقى طلعت زملكاوي وأنا اللي كنت عاوز أتبناك واعمل منك محاوراتي ما حلصش وكنت هاديلك كل عصارة نخاع خبراتي

إخص يا ماندو

وااااا ماندوهاه

-----------------------

إخص عليك يا ماندو .... وأنا بضم صوتى لصوتك يا أبو الأسيان ... الراجل ده إما يعلن التوبة ويغير ملته ... أو حيكون مصيره أمراض مستوطنة ... إلحق نفسك يا ماندو وشجع فرقة تانية ... ومافيش غير فريق الأ........

وليمبى ....

[حسام يوسف]

بعد افتكاسة هنري ميشيل انه بيبني فريق جديد فى تبريره للهزايم الجاية

بيطلب مدرب مغربي

وطبعا هيتلبي طلبه

كعادة نادى الزمالك عقب كل إخفاق يبحث مسئولوه عن أى تجديد داخل الجهاز الفنى لإلهاء الجميع عن التحدث فى تلك الإخفاقات.. وفتح بابا للجدل حول تلك التجديدات.

وفى هذا الإطار دارت بين مسئولى النادى وبين المدير الفنى الفرنسى للفريق هنرى ميشيل لمناقشة أسباب تردى النتائج، وحدث خلاف شديد فى وجهات النظر بين الطرفين، حيث جدد ميشيل طلبه بضرورة الاستعانة بالمدرب المغربى سمير عجمام لينضم للجهاز المعاون، وهو ما كررت إزاءه إدارة الزمالك رفض طلب ميشيل لعدم جدواه فى ظل وجود عبد الرحيم محمد كمدرب عام للفريق.

فى المقابل يبحث المجلس تعيين مدير للكرة لحل مشاكل اللاعبين الإدارية لفرض النظام داخل الفريق، وطرأ على السطح أسماء كل من أحمد رفعت مدير الكرة السابق وفاروق السيد مدرب الفريق الأسبق.

وحتى الآن لم تتضح الأمور بشكل نهائى، وفى انتظار عقد جلسة رسمية بين ميشيل ومجلس الإدارة فى الأيام المقبلة، والأرجح أن تكون يوم الأحد المقبل.

[فريح]

من رأى أن مشكلة الزمالك كإدارة و كجماهير أنهم لم يقتنعوا بعد أن لاعبيه هم لاعبى فريق عادى فى المستوى متقارب فى مستواه مع

فرق أنبى و الجيش و

بتروجيت

اختلف معك تماماً يا فريح

من زمان معروف ان الزمالك بيضم افضل لاعبي مصر

خلينا نتكلم عن الوقت الحالي

محمد عبد المنصف ... عبد الواحد السيد من أفضل حراس المرمى في مصر

فتح الله وهاني سعيد .... مدافعين دوليين

حازم امام الصغير ... حدوته بصراحة

علاء المرغني ... صبري رحيل ... لعيبه واعده صاعده

شيكابالا ... لا جدال على مهارته

عمروز زكي مش محتاج كلام

وغيرهم وغيرهم

أمس أختار حسن شحاته قائمة المنتخب 24 لاعب لا يوجد منهم غير أثنين من الزمالك هانى سعيد و عمرو زكى

حتى حارسى مرمى الزمالك الأثنين لم يتم أختيارهما أحطياطى حتى !!

حتى محمود فتح الله لم يتم أختيارة

وكما أكدت سابقاً عدد لاعبى حرس الحدود أو أنبى فى المنتخب مثل عدد لاعبى الزمالك بل بالعكس أكثر

الموضوع مش موضوع مدرب جاى و مدرب ماشى و الزمالك فريق محصلش و المفترض أنه يأخذ كل البطولات اللى

جاية كما يقول عباس

المفترض أن الزمالك يبدأ ببناء فريق حقيقى كما كان قد بدأ فى نهاية الموسم السابق بدون ضغوط جماهيرية

أو شعارات مجلس إدارة أو إتخاذ قرارات عشوائية لتهدئة الجماهير

هذا هو خبر أختيار عناصر المنتخب فى أهرام اليوم :-

44853 ‏السنة 133-العدد 2009 سبتمبر 25 ‏ 6 من شوال 1430 هـ الجمعة

شحاتة يختار‏24‏ لاعبا لمباراة زامبيا

دودي الجباس وعبد ربه المحترفان الوحيدان بالخارج‏

كتب : ‏ علي بركه

اختار حسن شحاتة المدير الفني لفريق كرة القدم الأول للمنتخب الوطني‏24‏ لاعبا لدخول معسكر الاستعداد لمباراة زامبيا المقامة في زامبيا يوم‏10‏ أكتوبر المقبل‏,‏ في التصفيات المؤهلة لمونديال‏2010.‏

ضمت القائمة كلا من‏:‏ عصام الحضري‏,‏ ومحمود أبو السعود‏,‏ والهاني سليمان‏,‏ ووائل جمعة‏,‏ وأحمد سعيد أوكا والمعتصم بالله سالم‏,‏ وشريف عبد الفضيل‏,‏ وحسني عبد ربه‏,‏ ومحمد شعبان‏,‏ ومحمد حمص‏,‏ وأحمد فتحي‏,‏ وأحمد المحمدي‏,‏ وسيد معوض‏,‏ وأحمد كمال‏,‏ ومحمد أبو تريكة‏,‏ وأحمد حسن‏,‏ ومحمد بركات‏,‏ وأحمد عيد عبد الملك‏,‏ وعمرو زكي‏,‏ وأحمد رءوف‏,‏ ودودي الجباس‏,‏ وصلاح أمين‏,‏ وعبد العزيز توفيق‏,,‏ وهاني سعيد‏.‏ وبذلك لم يتم اختيار احد من المحترفين بالخارج سوي دودي الجباس وحسني عبد ربه‏.‏

[se_ Elsyed]

يا ريس ما هو الفريق في حاله سيئة وواخد اللعيبة كلها لتحت ..

لكن هذا لا ينفي مهارتهم الفردية

وبالمناسبة محمود فتح الله مصاب بخلع في الكتف يسترلزم علاج لا يقل عن 3 شهور

---------------

على فكرة برضوا ... هنري ميشيل معاه الجنسية المغربية ومرستق نفسه هناك ... وبالتالي تلاقي الاخ المغربي ده نسيبه ولا حاجه عشان كده من بداية عمله مع الزمالك مع بيحبش حد كبير معاه ويكفي حربه ضد محمود سعد اللي برقبته

كنت أُفضل أن يتولى سعد تدريب الفريق هذا الموسم على الاقل ما كانش هايبقى اسوء من دو كاستال أو ميشيل ... وكمان الراجل عنده فكر كروي عالي ... والأهم هو غنه يعرف يعالج اللعيبه نفسياً .. أما المدرب الأجنبي فلا يستطيع عمل ذلك لأختلاف الثقافة واللغة والدوافع

عارفين إن هنري ميشيل لم يُمانع من وضع ممدوح عباس لشرط جزائي لفسخ التعاقد مقداره 4 شهور مرتب ...

وأشرب يا بيسو

[EL SHABRAWY]

طب انا بتكلم بجد دلوقتى انا فعلا محتاج مساعدة نفسى ابطل كورة بسبب فرقة الزمالك و محدش يقولى شجع الاهلى.

انا فى امريكا و بالرغم من كده مش عارف ابطل جربت كل حاجة و اللى اكتر من كدة الواد يوسف ابنى طلعتوا زملكاوى اصيل و هو عمره ما عتب مصر لسة وبيجيلى كوابيس من اللى عملتوا فى ابنى كل مرة اجى من الشغل يسالنى الزمالك عمل ايه النهاردة ساعات اقوله مش فاكر ماشوفتش الماتش .

دلونى اعمل ايه ( مع الختام بموسيقى برنامج همسة عتاب )

[se_ Elsyed]

طب انا بتكلم بجد دلوقتى انا فعلا محتاج مساعدة نفسى ابطل كورة بسبب فرقة الزمالك و محدش يقولى شجع الاهلى.

ده سؤال جالنا من صديق البرنامج .. الكابتن شبراوي المقيم في ولاية ألينوي بالولايات المتحدة الأمريكانية ..

وبعرض السؤال على كونسلتو من أطباء الطب النفسي الجواني اللي متخصصين في علاج الحالات المستعصية ...

أفادونا بالرد التالي :

بسم الله وحده وكفى

والصلاة والسلام على النبي المصطفى

يا أخ شبراوي إنت جنيت على أبنك جناية مش هاتعرف نتائجها الا في المستقبل ... بقى يا راجل بدل ما تعمله صنعه ولا حرفه تروح ترميه في التهلوكه وتخليه يشجع الزمالك ؟

عامةً ... الاطفال بيتقبلوا التغيير بسهولة ... وحاول تكرهوا في الزمالك أو سيبه هو هايكرهه لوحده

اما أنت

أما أنت ... فعليك بالأستعاذة من الشيطان الرجيم

والفرجه على ماتش 6/1 3 مرات في اليوم قبل الأكل عشان ما ترجعش وده لمدة شهر

جرب وادعي لي

أخوك الدكتور عقدة المتخصص في الأمراض الكروية السمبساوية

[mandoo]

طب انا بتكلم بجد دلوقتى انا فعلا محتاج مساعدة نفسى ابطل كورة بسبب فرقة الزمالك و محدش يقولى شجع الاهلى.

ده سؤال جالنا من صديق البرنامج .. الكابتن شبراوي المقيم في ولاية ألينوي بالولايات المتحدة الأمريكانية ..

وبعرض السؤال على كونسلتو من أطباء الطب النفسي الجواني اللي متخصصين في علاج الحالات المستعصية ...

أفادونا بالرد التالي :

بسم الله وحده وكفى

والصلاة والسلام على النبي المصطفى

يا أخ شبراوي إنت جنيت على أبنك جناية مش هاتعرف نتائجها الا في المستقبل ... بقى يا راجل بدل ما تعمله صنعه ولا حرفه تروح ترميه في التهلوكه وتخليه يشجع الزمالك ؟

عامةً ... الاطفال بيتقبلوا التغيير بسهولة ... وحاول تكرهوا في الزمالك أو سيبه هو هايكرهه لوحده

اما أنت

أما أنت ... فعليك بالأستعاذة من الشيطان الرجيم

والفرجه على ماتش 6/1 3 مرات في اليوم قبل الأكل عشان ما ترجعش وده لمدة شهر

جرب وادعي لي

أخوك الدكتور عقدة المتخصص في الأمراض الكروية السمبساوية

بقى ياراجل حد برده يبقى فى الولايات المتحدة الأمريكاتية ... وبيشوف أوباما ... وعمونا الجدافى ... وأونكل نكادا ... ولسه بيشجع الزمالك ... ياقلبك ... والله بحسدك على قوة أعصابك .... تصدق وتآمن بالله ... أنا ولادى حيجننونى ... أأولهم الزمالك حليب وقشطة ... يقلولى الأهلى حمار وحلاوة ( بفتح الحاء علشان ماحدش يفهمنى غلط ) .. حتى المفعوصة الصغيرة كل ماتشوف حد لابس فانلة لونها أحمر تقوللى .. تليكة .. تليكة يابابا أولاد عاقييييين ... ياللا نصيبنا كده ... بس بينى وبينك أوعى تسمع كلام الدكتور عقده ... وإثبت خليك زملكاوى وطلعله لسانك :blink: ياليلة سوخة دا الراجل لسانة أحمر .... وده كمان ضحكته حمرا ... حاجه تجن بصحيح

[se_ Elsyed]

الشعب المصري ده مالوش حل

بُصوا جالي إيه بالأيميل

بمناسبة اعلان اتصالات الجديد

الزمالك فرقة.. دلوقتي وقتها ..ماحدش بيخسر زيها ..كل الفرق قبلها و محدش بعدها... ناس كتير شجعتها واتحرق دمها ..ميدو و زكي و شيكابالا خربوها و قعدوا على تلها ..والباقي مايستاهلش يشيل اسمها ..الزملكاوية..السكر والضغط عندها ..ربنا يتوب عليهم منها