الموت حق ، والنفاق باطل..

[herohero]

الاخوه اللي اغلقوا موضوعي لان كنت معترض ع الاهتمام بوفاة حفيد رئيس الجمهوريه

اظاهر اننا نسينا العباره ها اللي محدش اتكلم ولا قناه عملت زي دلوقت ياترى هل ده طبيعي

ربنا يرحم الجميع شوفوا معهد الاورام كم طفل بيتعذب وبيموت ومالوش حد يوديه فرنسا

وبيموت عشان ابره مش قادر يدفع تمنها لو ع كده كنا كل يوم عملنا حداد

ياريت الكل يعتبر ان لنا كتير قوي بيموتوا من غير كلمه رحمة بتتقال عليهم

انا عارف ان الولد مالوش ذنب بس احنا ذنبنا ايه

بلدنا يتمتنا بدري بدري

شيوخ وعظماء ماتوا من غير شيئ يا بختك يالي لك ظهر ف مصر ، عاوز بلد حصل فيها كده حفيد الحاكم ياناس فوقو

وياريت ماننساش ان لنا عباره غرقت باللي فيها

[Sherief AbdelWahab]

لا مزايدة على الموت ، وعلى الحزن الذي أصاب كثيراً من المصريين بمناسبة وفاة حفيد الرئيس - غفر الله له ولأمواتنا جميعاً..

ولكن ما تقوم به قناة "المحور" شيء عجيب.. عجيب آخر حاجة..

فتحت التليفزيون على "المحور" فوجدت حلقة خاصة من برنامج "المسلمون يتساءلون" .. كانت الحلقة في البداية تتحدث عن الصبر على المصاب والصبر عموماً وجزاء الصابرين..

أو هكذا كان يهيأ لي..

إلى أن فتح سيادة المذيع - الذي لا ينسى أن يشكر رئيس القناة على هذه الفرصة الذهبية- خط اتصال مع المعزين ، أسوةً بما تفعله القنوات الخليجية عند وفاة أي شخصية في الأسر الحاكمة ، وهوووووووووووب ، بدأت الشخصيات العامة في الاتصال وتقديم فروض الولاء والنفاق الذي لا يتفق إطلاقاً مع مهابة المناسبة ..

من حين إلى آخر يذكر المذيع المتصلين ،ويلح عليهم أحياناً في السؤال ، عن علاقتهم بأسرة الرئيس ، ومواقفهم معه ، أما الشخصيات العامة فتدخل فاتحةً على الرابع .. حتى أن صحفياً بالأهرام أكد أن أبناءه شبه منهارين بعد خبر وفاة حفيد الرئيس ..

لن ينتفع أي شخص يموت - وكلنا سنموت بطريقة أو بأخرى- بكل المديح والنفاق الذي يكال له بعد أن تصعد روحه إلى بارئها ، لكن الذي يحسب نفسه منتفعاً وفائزاً هو المنافقون ، والقنوات التي تتعيش على النفاق ..

ولا تعليق على الجزء الحالي من اليوم الذي نجد فيه على الهواء كل من صاحب القناة الدكتور "حسن راتب" و "كرم جبر"..

الموت علينا حق .. بس النفاق باطل..

خلص الكلام

[ziad]

أرض النفاق هى مصر,1200 ماتو فى العباره والقطر وغيره ولا حد عبرهم حتى بربع أيه,طفل عنده 13 سنه من أسرة صاحب العزبه مات ,أعلنوا 3 أيام حداد والله الطفل المتوفى ده ربنا رحمه من أهله,ربنا يصبر والده و والدته ويصبرنا على ما بلانا

[elshafey]

أعتقد وبدون نفاق

أنه عندما يكون رئيس دولة مثل مصر مسلمة وعربية لديه مكروه لن يكون من اللائق أن تذيع قناة مصرية أغاني ومسلسلات وأفلام ..... إلخ

ده الواحد فينا لو عنده جار حصله مكروه ( ولو حتي دخل المستشفي) يتكسف يعلي صوت الكاسيت ولا الكومبيوتر

فهذا التصرف من قنواتنا المصرية مقبول وغير متجاوز

ولكن مافعلته قناة المحور يندرج تحت بند النفاق الذي هو موجود منذ الجاهلية لدينا نحن العرب .....

وعامة

رحم الله الطفل الفقيد وألهم أهله الصبر والسلون

تم تعديل 19 مايو 2009 بواسطة elshafey

[ziad]

ولما الألاف يموتوا من تسمم وحوادث قطارات وحرايق مبانى الحكومه زى قصر الثقافه ولا لما الألاف يموتوا فى العباره ومفيش حد يتحاسب هل هو ده كان اللائق,ولا هل كان من اللائق إن التلفيزيون حكومى وخاص يكملوا أغانى ورقص وألاف المصريين وعائلتهم فى حزن

أنا هزعل نفسى ليه مهى عزبتهم يعملوا فيها الى هما عايزينه,إحنا مجرد دواب فى العزبه بينعم علينا ناظر العزبه بالمعيشه الهنيه والرخيه

ربنا يصبرنا على ما بلانا

[الرويناء]

انا شايفه اننا بنأفور اوى

يعنى اه ربنا يلهم ابوة وامه الصبر لان مافيش حدد يتمنى انه يكون مكانهم

بس اللى بيعملوه والدعاء والبكاء ياجماعه ده طفل بغض النظر مين ابوة ومين امه هو ربنا رحمه ومرفوع عنه القلم لانه لم يبلغ الحلم

يبقى الاولى ندعى للقتلى والجرحى المسلمين فى فلسطين والعراق والسودان

وندعى للمرضى اللى مش لاقين العلاج ولا الدوا

وندعى لانفسنا بالرحمه واللهم لاشماته

[أسد]

في البداية أعرب عن حزني لوفاة الطفل ..

أعرب عن حزني الشديد ومؤازرتي الكاملة لكل أب يفقد إبنه أو إبنته ..

أقدر مدى الحزن الغالب على عائلة الرئيس مبارك ...

ولكن ...

المشكلة فعلاً عميقة جداً ..

مافعلته تلك القنوات الخاصة .. أكثر مما فعله التليفزيون الحكومي ..

أرى أن الجميع ينافق الحاكم ...

الحاكم الذي لا يشاهدهم أصلاً ... ألحاكم الذي لا يشتري المنتجات التي يعلن عنها في تلك القنوات من الأساس ... الحاكم الذي يمكنه التصريح أو الحجب لتلك القنوات ..

وتلك القنوات ... لم تأتي في يوم لتجامل حتى الشعب المصري الذي يشاهدهم .. والذي يشتري المنتجات المعلن عنها في قنواتهم .. والذي لولاه لما كان لهم وجود من الأساس ..

في كل النكبات والأزمات والمصائب التي حلت بالمصريين الغلابة .. لم يقف أحد من تلك القنوات موقف قريب حتى من هذا الموقف

في مصائب المصريين لم يوقف القنوات برامجها وأغانيها وكليباتها .. ورقصاتها وأفلامها .

في مصيبة العبارة .. والقطار .. والدويقة .. والحرائق الكبرى ..

لم يعلن الحداد في تلك القنوات والمحطات ..

بل تاجروا بأرواح المصريين لتحقيق سبق إعلامي .. أو نسبة أعلى للمشاهدة ..

ما حدث بالأمس ..

لم يقلل من تعاطفنا مع أهل الطفل المتوفي .. أي من كانوا ...

ولكنه قلل كثيراً من إحترامنا لكل هؤلاء ...

هؤلاء الذيت يتقاضون عشرات ومئات الألوف لينغصوا علينا حياتنا كل ليلة ببرامجهم الكئيبة .. والتي نكتشف وقت الجد .. أنهم يتاجرون بها ويسترزقون ليتنافسون فيما بينهم ...

هل من فقد كل أطفاله في العبارة .. لا يستحق أن تقلل تلك القنوات ولو حتى أغنية واحدة من برامجها ..

لم يحدث ..

لم يحدث أن غيرت القنوات برامجها عند وفات أكثر من ألف مصري غرقاً في البحر ..

أو عندما إحترق المئات داخل قطار الصعيد ..

لماذا ..

لأنهم منافقون .. ونفاقهم فج ..

لقد فضحوا أنفسهم ...

حسبنا الله ونعم الوكيل ...

لقد تأكدنا من أنهم يتاجرون بنا وبمشكلاتنا ... لا يدافعون عنا ..

[زعلان]

يا عم ده المذيع كان بيسأل السياسيين المنافقين ايه تأثير الحدث ده على السحة السياسية في مصر و ازاي ان المعارضة لازم تبطل معارضه بقى و كفاية لحد كده و ان الشعب لازم يلتزم بخط الريس و الي يخرج عن خط الريس يبقى عميل

[adrianocrespo]

القنوات الخاصه فاقت كل الحدود في النفاق

المحور - دريم - الحياه

ده حتي ميلودي وقفت الاغاني و الرقص و المسخره و بتذيع قرأن

اتفق معك يا أخي اسد

مافعلته تلك القنوات الخاصة .. أكثر مما فعله التليفزيون الحكومي ..

أرى أن الجميع ينافق الحاكم ...

و المشكله انك لما تقول الكلام ده يردوا عليك يقولولك يا أخي لا شماته في الموت

نحن لا نشمت

نحن نرصد واقع بغيض و متاجره بالموت

و الله لو القنوات دي عملت حداد لما تحصل فاجعه للناس كانت الناس تعاطفت معاهم فيما حدث عند موت الفقيد حفيد الرئيس

[adrianocrespo]

يا عم ده المذيع كان بيسأل السياسيين المنافقين ايه تأثير الحدث ده على السحة السياسية في مصر و ازاي ان المعارضة لازم تبطل معارضه بقى و كفاية لحد كده و ان الشعب لازم يلتزم بخط الريس و الي يخرج عن خط الريس يبقى عميل

و الله الواحد مش عارف البلد دي ماشيه ازاي

سمعت مثل حضرتك كلام مشابه لما ذكرت عن تأثير الوفاه علي مستقبل مصر

و عن وصف المتوفي بانه فقيد الامه

و عن ان الحزن العظيم من الشعب المصري علي الطفل هو نتاج لما قدمه مبارك الي شعبه في السنوات الماضيه

و ان الشعب المصري كله منهار من الصدمه

و ان مصر الان عباره عن سرادق كبير للعزاء

و ان التمانين مليون كانهم فقدوا ابنائهم

الولد مالوش ذنب و ربنا يرحمه و يدخله الجنه

[se_ Elsyed]

تخيلوا إن كان ورايا مليون حاجه أعملها بالأمس لكن من حزني العميق وأسفي على حالنا نمت الساعة 12 بالظبط كمداً وغماً ..

ليس حزناً على الفقيد .. آه أنا حزين على طفل توفى ونحتسبه في الجنه لإنه ليس مُكلفاً .

لكن أنا أسف للجميع .. انا قلت جُمله وقمت نمت بعد اللي شوفته فقلت : إحنا نستاهل اللي يجرا لنا .

- نستاهل مبارك وكل حاكم ظالم يبيع ويشتري فينا

- نستاهل يأكلونا قمح مُسرطن بالحشرات والبذور السامة

- نستاهل ينصبوا لنا كمائن الموت على الطرقات

- نستاهل يأكلونا لحم خنازير وحمير وكلاب حتى

نستاهل كل حاجه وحشه تحصل فينا طالما شايفين وساكتين ..

تابعت الموضع على قناتين تلاتة كانوا شغالين ..

المحور .. وسمعت فيها مكالمة واحدة من مرتضى منصور وجريت على الحمام رجعت وطفيت التليفزيون ...

الفضائية المصرية وبرنامج البيت بيتك .. اللي إستضاف فضيلة المفتى اللي نفخنا كلام عن الصبر عند الشدائد ... وعن توجيهه ومواساته ... لمين يا شُطار ؟

لعُمر أخو محمد الصغير اللي عنده 6 سنين ... ونص حلقة عن إزاي نقول له إن محمد راح عند ربنا يا عُمر ....

عارفين .... أنا زعلان ليه ؟

عشان الناس دي وأولهم المفتي ,,, ولا الكومبارس طنطاوي وهو بيبكي في صلاة الجنازة من التأثر والوزراء اللي والله كان ناقص يلبسوا طُرح سودا ويشقوا هدومهم من التقمص والتمثيل ولقيت بعضهم رجليه مش قادرة تشيله من التأثر والبكاء .... كان دول على الأقل حطوا قطره أو صلصة في عينهم وعملوا نفسهم بيعيطوا على ضحايانا الأبرياء اللي بيتقلتوا بشكل يومي ..

بلاش دي ...

عتاولة البيت بيتك كانوا موجودين إمبارح ولابسين إسود مع فضيلة المفتي ... محمود سعد ... خيري رمضان .. واللزج تامر أمين ... وهما أنفسهم ...

هما أنفسهم

أذاعوا كليب الإسبوع الماضي متصور بالموبيل عن إتنين بلطجية واحد وأخوه وفي عز النهار وفي أحدى المناطق الشعبية مكتفين شاب كبير من سنهم ... وواحد منهم راح ماسك سكينة وفصل رأسه عن جسده مثل الخروف .. والتاني كان ماسك سيف يهدد به أم القتيل واقاربه وأي حد يعترض ...

هؤلاء لم أجدهم يذرفون الدمع على مشهد لم يحدث في عصر هولاكو ... لكنه يحدث بشكل شبه يومي في عصر مبارك الإسود

مبارك اللي يا عيني ما قدرش يحضر الجنازة أمبارح وهايلغي زيارة أمريكا المقرر لها يوم الثلاثاء القادم عشان حزين على حفيده ..

تابعت أيضاً قناة أوربت من الحادية عشر والنصف إلى الساعة 12 فقط وماقدرتش وقلت أنا يا هايجيلي شلل أو الدم سيخرج من رأسي من إرتفاع الضغط

- هل من المصادفة أيها السادة إن أول أمس في بداية حلقة برنامج القاهرة اليوم التي أعلنوا فيها خبر مرض محمد علاء مبارك ونقله إلى فرنسا - قبل ما يموت يعني - هل من المصادفة أن يكون هذا هو اليوم العالمي لمرض الكبد الوبائي ويخرج بيان من مصر ليُبين إن

20 مليون مصري مصابين أو حاملي للفيروس ......

أقسم بالله بكيت ...

لم يحدث في التاريخ ...منذ أدم عليه السلام إلى أن تقوم القيامة أنا متأكد من ذلك ... أن يُصيب مرض ما - أنا لا أتكلم عن وباء طاعن أو إنفلونزا خنازير ودجاج وبلى أزرق أنا أتكلم عن مرض يُمكن الوقاية والعلاج منه - يُصيب ربع سكان بلد ما ... هل حدث وسيحدث هذا أيها السادة ؟

ده غير الفلاحين والناس الغلابة اللي بيبقى عيان ويعيش ويموت من سكات وماهواش عارف عنده إيه لإن ليس لديه ترف الكشف والتشخيص والعلاج ... بالتالي ده بره لعبة الإحصائيات

أليس هذا دافعاً أن نبكي دماً بدل الدموع على حالنا في ظل 30 سنة ظلم وقهر وقتل عمد مع سبق الإصرار والترصد لهذا الشعب من قِبل مبارك المكلوم وعصابته ؟

وعمرو أديب نفسه اللي إنكشف على حقيقته ......... قبلها بيوم جايب كيس العيش وبيناشد الرئيس عن موضوع القمح المسرطن ... ولا حياة لمن تنادي

تخيلوا ... عمال يقدم وصف تفصيلي للجنازة ... وانا طبعاً خلاص باموت من شيء لم يخترعوه بعد في تاريخ البشرية ... ما أسموش نفاق .. لأ ... ده حاجه لسه ما حصلتش ...

وعمال يقول : شايفين .. شايفين علاء مبارك وهو واقف بيصلي على الفقيد وهو منهار .. الراجل لا منهار ولا منقار ... وشايفين الشاب علاء الرياضي الجميل ...( خد بالك معايا يا عم ابراهيم الله يرضى عليك من اللي جاي ) شايفين وهو قد فقد الكثير من وزنه ودبل إزاي

يا لهوي ياما .... الخبر لسه إمبارح بالليل والجنازة تاني يوم العصر وأبو الفقيد الشهيد البطل خس النص وفقد الكثير من وزنه في ساعتين تلاته وكأنه عمل عمل شفط دهون ولحمه وعضم يا عيني ..

وشايفين إصرارة هو وجمال مبارك على حمل النعش لحد السيارة ..

وشايفين تلاحم قوى الشعب بمختلف أطيافه ..

على فكرة- ده كلامه هو وكبير المنافقين حمدي رزق اللي لسه سيدة مظبط له منصب ما كانش يحلم به وهو رئيس تحير جريدة المصور العريقة فبيرد الجميل لسيده مبارك - وكانوا يتحدثون إن شوارع مصر بالامس كانت خاليه تماماً من الناس والجميع في حالة صدمة ووجوم من الخبر .. وكل بيت بكى وحس إن الولد ده إبنه ... ( بيفكروني بموضوع 99.9 % )

راح حمدي مديها واحده ليس مالقتلهاش إسم برضوا وقايل .. تخيل يا عمرو وانا جاي الأستوديو دلوقت .. حتى ام كلثوم - وكتاب الله العظيم زي ما بأقول لكم - كانت بتغني اغنية على إذاعة الأغاني من أروع ما غنت .. والاغنية تتناسب مع اللي حنا فيه ... أغنية حديث الروح ..

الله أكبر .. المعجزة حصلت يا رجالة .. حتى أم كلثوم بتشاركنا في مصابنا الأليم ونزلت أجازة 24 ساعة وراجعه تاني عشن تعزي ..... آه يابن الــــــ ....... رزق ( هههه رايح الأستوديو يديها أمسية نفاق وكان عمال يسمع إذاعة الأغاني ... حكيم بقى وشعبولا ونانسي .. يالله ماحدش واخد منها حاجه )

راح عمرو واخد منه المايك والطبلة والصاجات وإتحزم .. وقام إداها وصلة نفاق وتطبيل ولحس حذاء مبارك الكلاركس وراح قايل له : يا ريس .. يا ريس .. خد أجازة يا ريس ... خد اجازة واعتذر عن رحلة أمريكا يوم التلات الجاي اللي إنت رايحها عشان القضية الفلسطينية .. ( آه بالمناسبة ... سيسجل التاريخ بحروف من نور .. وبمداد من ذهب إن من أقوال الرئيس القائد حفظة الله لنا .. الأخ العقيد مبارك إنه قال لأخوه عماد أديب في الشو بتاع إنتخابات الرئاسة من سنتين تلاته ... إنه من سنة 81 من ساعة ما ربنا بلاه بينا .. ماخدش ولا يوم أجازة ... يعني 30 يوم مدفوعة من الراتب الأساسي نقول 100مليون جنية * 27 سنة يبقى 2700 مليون جنيه بدل أجازات متراكم ..... والله أكبر والعزة لمصر .... )

لا أمريكا هاتطير ولا القضية الفلسطينية هاتطير يا ريس ..

إنت محتاج تقعد مع نفسك وتصبر إبنك وتقعد مع حفيدك ... حفيدك عمر أخو محمد تواسيه ...

في ناس يتقول - ده عمرو خلي بالكم - إيه ده كله .. ما كل يوم عندنا أطفال بيموتوا ... نقول لهم حرام عليكم ... الراجل ده .. والست دي - أمي هههه - قدموا لأطفال مصر كتييييييييير خلال 30 سنة

أنا عشت منهم شويه فعلاً - ده كلام سين سين بقى - من سنة 81 ... قدموا مستشفى سرطان الأطفال ووفروا لها زباين للصبح .. الشيء لزوم الشيء .. يعني نعمل مستشفى سرطان وما يبقاش عندنا زياين ؟ ده حتى الناس تاكل وشنا ( واحد راح للخضرواتي قال له عندك طماطم مفعصه ؟ .. قال له لأ : قال له طب فعص لي إتنين كيلو )

وقدموا لنا مئات الشعوائيات اللي أصبحت دويلات داخل دولة

وقدموا لنا أعلى نسبة سرطان في العالم

وأعلى نسبة كبد وبائي في العالم

وقدموا لنا ممدوح إسماعيل وأحمد عز وأبو العينين .. آه أبو العينين بتاع سيراميكا كيلوباترا كان مع وفد برلماني عالمي لزيارة قطاع غزه من أجل إعمارها بالأمس فقط .. وسمعته بوداني ماسك شوية غزاويين ونازل فيهم تبكيت ومبارك عمل لكم كيت وكيت .. ووقف العدوان ورحم الأطفال .. وبيصلح ساعات ( مش بأقول لكم إمبارح كان يوم غير عادي .. أنا محتاج اجازة يا جماعة أروح شرم الشيخ أو العتبة أريح أعصابي من اللي بأعمله في نفسي ... أنا خايف بعد ما أموت يقوم الجبابرة دول يلعبوا في عدادات التاريخ بتاعنا ويقولوا : الشهيد البطل محمد علاء مبارك صاحب أول ضربة بحرية واللي كان لا يهاب النار ولا ينزل له جار .. الأمير عماره الزيادي )

وقدموا لنا مئات المدارس التي لا تصلح لكي تكون زريبة مواشي

خد اجازة يا ريس وأهو أوباما جاي بعديها بإسبوع خليه يعدل جدولة ويمدده وناقش القضية الفلسطينية معاه عالواقف كده يعني ...

تخيلوا .. - ده كلام عمرو - الرئيس كان مرتبط جداً بفقيد الشباب محمد وبيكلمه كل يوم في التليفون قبل ما ينام .. عارفين كان مرتبط به ليه ؟ لإن الولد كان رياضي ومبارك بيحب الرياضيين والولد كان بيلعب سباحة وكورة ..

طب ما إيه يعني - ده كلام سين سين - مانا بألعب في مناخيري .. مبارك ما حبنيش ليه لحد دلوقت ؟

لحد هنا وماقدرتش اكمل بجد خصوصاً بعد ما فتحوا التليفونات وناس إتصلوا إهيء إهيء وإحنا حسين إن اللي مات ده إبننا وكل بيت في مصر فيه عزا دلوقت ( يابخت بتوع البن والقهوة السادة ويا خراب بيت بتوع السُكر ) ...

أنا باكلم أخويا امبارح لقيته خد عربيته وإتنين صحابه وراحوا يضربوا غطس في إسماعيلية وبيقول لي ولا كإن في حاجه والناس ملهيه على عينها وماحدش يعرف مين محمد علاء مبارك ده ... وعلى العموم الله يرحمه يا سيدي ويرحمنا جميعاً وسيبني بقى دلوقت عشان أنا داخل ورا البرميل ..

إقعدوا بالعافية

[زعلان]

اصلك كنت بتلومن امبارح يا سين سين و احنا كنا بنتكلم عن زفة النفاق الي بصراحه خيالنا ما توقعش انها توصل للدرج ده و انهم عايزين يستثمروا وفاة الطفل لتوطيد اركان حكم ال مبارك المصريين شعب ملهمش اي قيمة

[se_ Elsyed]

بس يا جدع إنت وهو

إوعى من قدامي

هانقفل المنتدى 65 يوم حداداً على فقدان الشهيد

وكمان عشان نقرا جميعاً ونستفيد كلنا من مقال الرثاء بتاع حمدي رزق في المصري اليوم

إن مات فينا سمير رجب .. فكلنا سمير

وإن قُتل فينا ممتاز القط .. فمصر كلها قطط

وسع وصلي عالنبي ... خد حباية الضغط .... وخلي جنبك معجون السنان عشان الأزمات القلبية .... وأي حاجه لعلاج الكالو

الحزن مالى العين

بقلم حمدى رزق ٢٠/ ٥/ ٢٠٠٩

كان عاوز يطلع طيار مثل جده، كان بيحلم يسوق طيارة ويطلع لفوق مثل عمو جمال، كان الجد الطيب يقص عليه أحسن القصص من ماض جميل، كان الجد يحلق بالحفيد عاليا فوق السحاب بطائرة يمطر بقذائفها الأعداء، جدو كان طيارا عظيما، قائدا من قواد أكتوبر العظام، كان الحفيد يتيه فخرا، يتمثل الجد فى حله وترحاله.

جدو طيب قوى، كان بيخبى لمحمد الشيكولاته مخصوص، محمد كان ممنوع عليه أكل الشيكولاتة، وزنه قابل للزيادة، لكن الجد الحنون لم يكن يحتمل نظرة حرمان واحدة فى عيون قرة العين وبهجة النفس.

كان شبه جدو بالضبط فى حركاته وسكناته، حسنى مبارك التانى، مرتين فى الأسبوع على الأقل، يصر الرئيس على زيارة الحفيد، كان يذهب سريعا للقاء الحبيب، كان حبيبه وابن حبيبه علاء، كان يلاعبه ويشاكسه، يلعبان كاراتيه معا، يا حزن قلب الرئيس.

كان يأنس إليه وينصت كثيرا، كان الجد يجد لدى الحفيد ما تسر به النفس وتبتهج به الروح، أجمل الاوقات وألذ اللحظات كان يقضيها الرئيس فى معية الصبى اللطيف، كان طيفا، نسمة طرية تخفف على الرئيس مشاق السفر فى هموم الغلابة من بسطاء المصريين.

محمد كان يحب جدو أكتر من الشيكولاتة، محمد كان بونبونة الرئيس، يمضغ كلماته، ويهضم حركاته، محمد كان روح الرئيس، قلبه، عقله.

«عمر» الحفيد الصغير كان بيناغى، محمد بيسأل وبيستفسر من جدو الرئيس، كان جدو يعده رجلا، الرئيس مصنع الرجال، وكما وهب لمصر نسورا لا يهابون، كان يتمناه محلقا، كانا يحلقان فى فضاء دنيا الصبى الصغير.

الجدة الطيبة سوزان كانت ترى فيه مشروع فنان، رسام، عازف، كثيرا ماحدثت الفنان الوزير فاروق حسنى عن موهبة محمد البازغة، كانت تتيه برسوماته، تغزل من خطوطه شالا من الأحلام، ريشته كانت ترسم حقولا خضراء، وشجرة وزرعا ونهرا، قبل الرحيل إلى روضة السماء، طلبت الجدة من الوزير فاروق صقل موهبة الصغير الفنية، يعد للصغير برنامجا فنيا، أوبرا ومسرح وموسيقى، تشكيلا لمعالم فنان لم تكتمل، وشاء الله وكانت مشيئته، لا راد لقضائه.

عندما كان محمد يغيب عن الجد طويلا كان الجد يسافر إليه حيث يكون، آخر مرة ذهب إليه فى الأقصر لينعم برؤياه، ما كان مسموحا أن يغيب عن ناظريه طويلا، كان ينتظر موعده على أحر من الجمر.

أنظار الجدة وجل مشاعرها كانت تحيط محمد بالرعاية والعناية فى حله وترحاله، لم يكن يغيب عن عقلها، وجدانها مشغول عليه، مهمومة بمذاكرة محمد، تقضى أجمل أوقاتها وهو يراجع معها دروسه.

كانت تستمع إلى صوت عمرها الشجى فتغمرها موسيقى حنون، بيديها كانت تختار لمحمد ألوانه، ترسم هندامه، كم كانت مشرقة ألوان الصبى، تحمل عنه همومه الصغيرة، تغزل من أحلامه خططا للمستقبل كان تتمنى أن تراه موسيقارا تشغف بموسيقاه القلوب.

وإن العين لتدمع وإن القلب ليحزن، وإنا لفراقك لمحزونون، إلى دار البقاء ذهب الصغير محمد مسرعا لا يلوى على شىء، لأول مرة ينسى وداع جدو الطيب، لم يمهله القدر حتى يودعه، اختطفه طائر الموت من بين أحضان والده علاء، مكلوم علاء، قلب الأب، قلب الأم هايدى عليه مفطور، نحتسبه عند الله.

الرؤساء بشر لو تعلمون، ويحزنون، حزنا نبيلا، واعر الحزن العميق لما يسكن براح القلب، يحتله، ثقيلا على النفس الطيبة، لا حول ولا قوة إلا بالله.

الكلمات الصغيرة لا تمحو الأحزان الكبيرة، والمصاب كبير، سيادة الرئيس فلتحتسب عند الله حبيبك وابن حبيبك وقرة عينك، حسبك الله، حسبك ذو الجلال والإكرام، اللهم أفرغ عليه صبرا، اللهم ألهمه السلوان، بلسم ألمه بلمسات حانية وضاءة، إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَاب.

فى مديح الصبر تتعدد الآيات البينات، ولكن فى وصف الألم تعجز الكلمات، فى وصف الحزن لا توفى العبرات، الحزن يجثم على النفس بكلكل، وَبَشِّرِ الصَّابِرِينَ.

(ينشر بالتزامن مع مجلة المصور)

طيار مثل جده وعارفينها ... حيث أن جده كان هو الأخ التالت للإخوان لوميير مخترعي الطائرة ...

إنما يسوق طيارة ويطلع بيها فوق زي عمه جمال إزاي ؟

يا جماعة حد يفهمني .. هل لما كنت مسافر بره .. جمال بقى يشتغل طيار على خط القاهرة - سوهاج ؟

جمال مين يا جدعان ؟ جمال مبارك بتاعنا .. يعني هو إتخرج من كلية التجارة قسم طيران مدني وبقى رئيس لجنة سياسات قبل الضهر .. وبعد الضهر بياخد له فردتين تلاتة طيران عشان يزود دخله ؟

جدو طيب قوى، كان بيخبى لمحمد الشيكولاته مخصوص، محمد كان ممنوع عليه أكل الشيكولاتة، وزنه قابل للزيادة،

بس بقى أحسن هاعيط والدموع هاتفرفر من عيني .. يا كبدي يابني .. وزنه قابل للزيادة .. حاكم جده كان مادد له ماسورة من مصنع جالاكسي من جينيف في سويسرا لحد قصر علاء في القطامية والواد كان حاطط بؤه في بزبوز الماسورة طول اليوم وعمال يشفط شوكولاته وفعلاً زاد 5 جرام الأيام الأخيرة ..

كان شبه جدو بالضبط فى حركاته وسكناته، حسنى مبارك التانى،

أبوس إيدك كفايه واحد ...

محمد كان يحب جدو أكتر من الشيكولاتة،

أنا برضوا كنت بأحب بابا الله يرحمه أكتر من ورق العنب

تشبيه بليغ وفصاحه لغوية خزعبلية

عمر» الحفيد الصغير كان بيناغى، محمد بيسأل وبيستفسر من جدو الرئيس، كان جدو يعده رجلا، الرئيس مصنع الرجال،

عارفه .. ده مصنع في العاشر من رمضان جنب مصنع السفنج بتاع تاكي

الجدة الطيبة سوزان كانت ترى فيه مشروع فنان، رسام، عازف، كثيرا ماحدثت الفنان الوزير فاروق حسنى عن موهبة محمد البازغة،

فنان شامل بقى .. مغني ومطرب ورسام وراقص باليه ... كويس إن ربنا إختاره إلى جواره .. افضل ما يكون إلى جوار فاروق حُسني الــ ........ فنان وربنا أعلم باللي في نيتي بقى عشان ما أنطردش من المنتدى خليني ساكت وربنا يُستر على ولايانا ..

انا مش قادر أكمل يا جدعان ... أنا هافضل مصبر نفسي لحد المقال الإسبوعي لممتاز القط بتاع طشة الملوخية السبت الجاي اللي بالتأكيد هايتكلم عن وفاة الشهيد محمد علاء مبارك وعلاقة ذلك بالازمة الاقتصادية العالمية وتسريح آلاف العمال من شركة تويوتا وأنهيار إقتصاديات منطقة اليور وطفح المجاري في شوارع البدرشين ..

انا لو ماجيتش اليومين الجايين يبقى يا أتشليت .. يا اتشليت برضوا ..

[ابو حودة]

الموت لا يفرق بين كبير وصغير مريض او صحيح البدن ذو منصب وسلطان او بغيرهما

ومن لم يكن له الموت واعظ فلا قيمة لكل المواعظ

هؤلاء الذين ينافقون الرئيس غاب عنهم انهم عما قريب سيسألون عن اقلامهم او الميكرفون الذي بايديهم

خليهم يقولوا كنا عاوزين مناصب

[بركة]

أنا وزوجي حقيقي اتصدمنا في المذيع محمد سعيد اللي بيقدم المسلمون يتساءلون

في المحور ومش عارفة أقول ايه في اللي بيحصل ده غير دعاء المصيبة ويامكتر مصايبنا

إنا لله وإنا إليه راجعون

[مسافر زاده الخيال]

اولا اقدم خالص تعازي في وفاة الطفل (حفيد رئيسكم) تقبله الله وسائر المؤمنين في رحمته

ثانيا (لا ادري ان كان لائقا او من المسموح ان اعقب) على اخر مشاركة للاستاذ ((س س))

بصراحة تعليقاتك اضحكتني و بصوت عال في العمل ولم اضحك بهذه الدرجة منذ زمن...........تستطيع ان تكون كاتبا ساخرا وبامتياز مثل علي سالم او احمد رجب او محمود السعدني............

فكر في ان تمتهن الكتابة (الانتقادية الساخرة) ..................

حكاية انك تحب والدك اكثر من ورق العنب (قتلني ضحكا)

[msayed]

اولا اقدم خالص تعازي في وفاة الطفل (حفيد رئيسكم) تقبله الله وسائر المؤمنين في رحمته

ثانيا (لا ادري ان كان لائقا او من المسموح ان اعقب) على اخر مشاركة للاستاذ ((س س))

بصراحة تعليقاتك اضحكتني و بصوت عال في العمل ولم اضحك بهذه الدرجة منذ زمن...........تستطيع ان تكون كاتبا ساخرا وبامتياز مثل علي سالم او احمد رجب او محمود السعدني............

فكر في ان تمتهن الكتابة (الانتقادية الساخرة) ..................

حكاية انك تحب والدك اكثر من ورق العنب (قتلني ضحكا)

يا سى السيد والله فكرة الكتاب دى ممتازة ما تبدأ فيها من دلوقتى والموضوع ده ممتاز تقدر تبدأ بيه، بس فيه مشكلة صغيرة إنك مش ها تحط على جلدة الكتاب إسم س س أكيد ها تكتب إسمك الأصلى وفى الحالة دى مش شايف أى فايدة لوجودك ورا البرميل، إطلع بالذوق أحين لك.

[se_ Elsyed]

فكر في ان تمتهن الكتابة الانتقادية الساخرة...

ولما أتحبس .. هاتبقى تنفعني ؟ ههههه :lol:

يا مسافر نحن نسخر من همومنا عشان ما نكتمش في قلبنا ويجيلنا بعيد عنك المرض البطال او يطق لنا عِرق النسا ..

[احمد هادي]

يا حاج سين سين

هو... انا مش من أكتر من سنه نصحتك بمقاطعة التليفزيون

شوف انا كملت 3 سنين أهوه والحمد لله صحتي النفسية والعقليه اتحسنت كتير

يعني مش كفاية الوقت .....لا وكمان حرقة الدم

علي العموم لسه عندك فرصة

خصوصا ان مباراة مصر والجزائر قربت واتوقع ان فيه خمسين برنامج علي الاقل هيحللوا اسباب النكسة الكروية الجديدة وعييش بقي يا معلم

ربنا معاك يا ولدي

[سهل جدا]

تسجيل إعجاب بعنوان التوبيك

الموت علينا حق , والنفاق باطل

الموضوع ده وتعليقاته فكرني ببيت شعر مش عارف ليه علاقة بالموضوع ولا لأ

موت امرئ في غابة جريمة لا تغتفر **** وموت شعب بأسره مسألة فيها نظر !!!