وبعدين يا حكومه شحنه قمح اخري فاسده لصالح واحد مسنود ابن مسنود

[ابو محمد المصري]

نشر في جريده اليوم السابع خبر عن شحنه القمح الفاسد التي قام احد المسنودين باستيرادها وفجر النائب مصطفي بكري قنابل عنقوديه من العيار الثقيل مثل

1 - انه تم نقل الشحنه علي الطريق الصحراوي حتي لاتتضرر المحاصيل علي الطريق الزراعي

2 - القمح لونه بني غامق ورائحته كريهه وبه اثار ملحوظه لحشرات نافقه وبذور مختلطه مع القمح

3 - المسؤل في وزاره الزراعه صرح انه سيتم غربله الشحنه للتخلص من الشوائب الضاره كما انه سيتم المعالجه بالتبخير قبل وبعد الغربله

الي حضارتكم المقال كما جاء في جريده اليوم السابع

اليوم السابع الاربعاء

أجرى مجلس الشعب محاكمة برلمانية للحكومة ووزارة الزراعة بسبب تسرب شحنات من القمح الروسى الفاسد إلى الأسواق المصرية والصعيد.. ودفعت ثورة نواب المعارضة والحزب الوطنى د. فتحى سرور رئيس مجلس الشعب إلى توجيه عدة أسئلة إلى الحكومة عن المستورد الحقيقى للشحنة، وما الدافع إلى الاحتفاظ بالشحنة الفاسدة؟!

من جانبه أكد الدكتور مفيد شهاب وزير الشئون القانونية والمجالس النيابية، أن نتائج فحص شحنة القمح المستوردة من روسيا فى 24 من إبريل الماضى أثبتت وجود حشرات ميتة، وارتفاع نسبة البذور الخبيثة عن المعدل الطبيعى، وأشار شهاب إلى أن تقرير هيئة الرقابة على الصادرات والواردات طالب بغربلة الشحنة وإعدام المخلفات.

تحولت الجلسة البرلمانية إلى ساحة من الجدل عقب رفض المهندس أمين أباظة وزير الزراعة، الاتهامات بفساد صفقة القمح الروسى، وقال "ليس معنى أن الشحنة بها حشرات أن تكون غير صالحة للاستخدام الآدمى"، وهو ما دفع العديد من النواب إلى الغضب، وطالبوا بسرعة تشكيل هيئة سلامة الغذاء لتحقيق أمن وسلامة الغذاء سواء من المستورد أو المنتج المحلى.

وطالبوا بإعادة النظر فى التشريعات المنظمة لعملية الاستيراد والتصدير لتحقيق الانضباط الكامل والسيطرة التامة على سلامة الغذاء، فيما اقترح الدكتور فتحى سرور قيام لجنة الزراعة فى المجلس بزيارة ميدانية إلى الحجر الزراعى للتأكد من سلامة شحنة القمح الروسى.

وأكد المهندس أمين أباظة وزير الزراعة، مرة أخرى أن هناك مواصفات قياسية لدخول القمح إلى مصر وليس معنى أن القمح أقل درجة أنه فاسد أو مضر أو سام ولكل درجة سعر، وكلها صالحة لإنتاج الخبز، وهناك مواصفات قياسية.

وقال إن كل شحنة تدخل مصر تفحص قبل استيرادها ويتم "التبخير" لها، وهناك نسبة مقبولة، وبالنسبة لهذه الشحنة تم التبخير لها فى بلد المنشأ، وهنا فى مصر تتم الغربلة ويصبح القمح مطابقا للمواصفات، وليس هناك أى مخالفة أو تجاوز والحكومة حريصة أكثر من أى أحد على صحة المواطنين وعلى عدم دخول أى شحنات غير مطابقة إلى مصر، وتساءل الدكتور فتحى سرور: على حساب من تتم الغربلة ؟ ولماذا؟!. وطالب النائب حازم حماد مجلس الشعب بضرورة اتخاذ قرار فورى الآن بحظر دخول هذه الشحنة إلى مصر.

وقال أحمد أبو حجى إن هناك شحنة فاسدة ولابد لمجلس الشعب أن يأخذ قرارا، ويقول "كفاية كده يا حكومة ولن نسمح بدخول الشحنة الفاسدة". كان التقرير الصادر عن لجنة الزراعة بمجلس الشعب قد أوصى بضرورة إخضاع كافة الأغذية الواردة من الخارج للفحص والتحليل من أكثر من جهة، وضرورة دعم المحاصيل الاستراتيجية وخاصة القمح والأرز لتحقيق الاكتفاء الذاتى ووجود فائض إلى التصدير لكافة الأسواق العالمية, وحذرت اللجنة من إهمال دعم الفلاح الصغير لافتة إلى أن ذلك يدفعه فى بعض الأحيان إلى التخلى عن زراعة المحاصيل الاستراتيجية.

رفض النائب كمال الشاذلى تقرير هيئة الصادرات والواردات، وأكد بوجود تضارب فى المعلومات الواردة فى التقرير الذى تلاه الدكتور شهاب وبين حديث وزير الزراعة، وطالب بتشكيل لجنة للفصل فى خطورة هذه الشحنة من عدمه.

أكد النائب حسين إبراهيم نائب رئيس كتلة الإخوان المسلمين بأن القسم الذى أقسمه النواب هو الحفاظ على سلامة الأمة والنظام الجمهورى، واحترام الدستور والقانون. وتساءل عن إمكانية إعدام الشحنة للحفاظ على صحة المواطنين، وانتقد حسين إبراهيم من تهرب الحكومة فى الإجابة على أسئلة رئيس مجلس الشعب، وقال "هذا يعنى أن الحكومة تتستر على الفساد وأن البرلمان عاجز عن التوصل إلى حل لهذه الكارثة".

كانت الجلسة البرلمانية قد شهدت فى بدايتها مواجهة ساخنة بين النائب المستقل مصطفى بكرى والحكومة، وقال بكرى "إن الحكومة وافقت على دخول شحنة قيمتها 300 ألف شحنة من القمح الفاسد مستوردة من روسيا"، وطالب بكرى بضرورة إعدام الشحنة أو إعادة تصديرها، وأكد أن مجلس الشعب يجب أن يأخذ قراراً حاسماً لمصلحة الشعب.

[Amr Radwan]

انا قرات نفس الخبر علي المصري اليوم

http://www.almasry-alyoum.com/article2.asp...mp;IssueID=1404

و بصراحة مش عارف لحد امتي هيفضل الفساد بالشكل ده .. الي متي يظل المواطن المصري قليل الحيلة و لا يعرف ما يحدث .. حتي ان عرف ما يحدث لا يستطيع عمل شئ ..

ايضا انقل لكم اقتباس من الخبر

فيما رفض الدكتور سرور طلب بعض النواب تشكيل لجنة لتقصى الحقائق، قائلاً إن الموضوع لا يستحق أكثر من زيارة ميدانية

و اتحدي .. هذه الشحنه ستتبخر من الصوامع قبل اعدامها .. او اعدامها علي الورق

لك الله يا مصر

تم تعديل 13 مايو 2009 بواسطة Amr Radwan

[se_ Elsyed]

شكراً يابو محمد يا مصري ...

لقد تابعت جلسة مجلس الشعب أمس عن هذا الموضوع ... وكذلك التغطية الأكثر من رائعة من برنامج القاهرة اليوم على قناة أوربت

وطلعت بنتيجة واحده وهي " إن الناس دي لو كفره ما بيعرفوش ربنا وبيعبدوا العجل .. ما كانوش عملوا فينا كده وكانت هاتبقى في قلوبهم رحمه ناحيتنا "

ويروح يوسف والي بعد ما وضع مصر في المكانه الأولى في مرضى السرطان والكبد الوبائي .. وييجي أمين أباظه ... برضوا نفس الأداء ونفس التخطيط بل أكثر كمان

- وزير الزراعة يقف أمبارح أمام مجلس الشعب ويرفض رفضاً تاماً في البداية الإعلان عن إسم مستورد الشُحنة الفاسدة ... تخيلوا يا مؤمنين يا موحدين بالله ؟ ... وفي الأخر ضغطوا عليه يقوم قايل إسمه وهو " اشرف العسال " وأتحدى إن ما كان منظر وأساساً وراه واحد من الكبار ده إن ما كانش أمين أباظه نفسه هو المستورد اللي بيدور على زبالة البشرية من القمح ليأكلها للمصريين الحلوين ...

- وزير الزراعة يقف وبكل بجاحة يقول .. لقد منعت التريلات المحملة للقمح من المرور في الطرق الزراعية المؤدية إلى الصوامع عشان الحبوب ما تتنطروش كده ولا كده في الأراضي الزراعية وهي حبوب خبيثة وسامه أساساً وتبقى بداية لإنبات قمح فاسد أخر .... !!!!!!!!!!!!!!

يابن الــــ ............. ولما هو فاسد بتفرج عن 65 ألف طن ليه وتبعتهم مطاحن الصعيد عشان يبقوا دقيق ؟

- عايزين تعرفوا الحكاية من أولها ؟

- الحكاية إن هذا المستورد جاب من روسيا 300 ألف طن ودخلوا مصر بتاريخ 24/4/2009 ... يعني من كام يوم ....

- من المعروف إن جميع الشحنات اللي جايه من أوروبا بتنزل في إسكندرية أو دمياط .... لكن إزاي دي عصابة من معدومي الضمير تحكم البلد .... دخلوا الشحنة من ميناء سفاجا في البحر الاحمر .... تخيلوا ؟ يعني يخلي السفينة تمشي ده كله عشان تبعد عن العيون في عمليه أقرب إلى تهريب المخدارات وهما عارفين مين هايسلكها هناك ؟

- من ستر ربنا ... بعض رجال سلطات الحجر الصحي في المينا إكتشفوا إن ريحة الشُحنه فايحة قوي ومش محتاجه فحص والقمح مكسر ولونه غريب ومليان حشرات ميته تخيلوا يا مؤمنين ؟ والحشرات الميتة دي يا سادة قبل ما تموت بتفرز مواد مسرطنة تودي في ستين داهية وتسبب السرطان وإنت سايب إيدك .. وكمان لما تنضرب في الخلاط مع القمح هاتبقى أحلى بروتين مُسرطن ...

- الشحنة فضلت مرنخه في المينا من 24/4 إلى 6/5 ... لحد ما جه تليفون في 10/6 لمدير جمرك سفاجا .... من مين بقى ؟ من وزارة المالية .. تخيلوا .. من المستشار المالي ليوسف بطرس غالي يأمره بالإفراج عن الشُحنة على دفعات .. خلو بالكو .. بدون أمر إفراج من وزارة الزراعة يُفيد بصلاحية تلك الشُحنة ... وفعلاً أفرجوا عن 65 ألف طن ( 65 مليون كيلو قمح ) .. ووزارة الزراعة طبخوا المسألة وفرقوا دم الشُحنة بين القبائل وراحت 3 صوامع في 3 مُدن مختلفة لكن في الصعيد على اساس إن ماحدش شايف حاجه ودول صعايدة جامدين ومعدتهم تطحن الأسفلت ... وهي " أسيوط .... قنا ... قوص " .... ودخلت الشحنات وخلطوها بالقمح المصري النضيف ... أصل عقبال عندكم ده موسم توريد القمح من الفلاحين .. عشان كده وزارة الزراعة والمستورد جم أذكيا ودخلوا أبو قرش مع أبو قرشين عشان العملية تتوه ...

- راح مصطفى بكري مشكوراً وصور التريلات دي ... وجاب عينة إتنين كيلو قمح فاسد وعرضهم أمبارح على النواب امس وكان منظر بشع وشيء العلف الحيواني أنضف منه وصورة تتكلم ومش محتاجه توضيح .. والحشرات باينه في القمح .. والقمح لونه غريب ومكسر كمان مش صحيح ...

- ومع ذلك يقف أمين أباظه بكل بجاحة ويقول إنهم أمروا بتبخير وغربلة الشحنة من الحشرات ... يقوم عرق الرجولة ينطر في قفا فتحي سرور ويقول له : والغربلة والتبخير هايتم على حساب مين ؟ فيقوله : على حساب مستورد الشحنة طبعاً ... ( بيقولك ... واحد قاعد عالقهوة فجه واحد صاحبه بيقول له : إلحق مراتك ماشيه مع الولا سعيد الكهربائي فقال له : حالاً خلتوه كهربائي ؟ ده لا بيفهم في الكهربا ولا عمره كان كهربائي أساساً "

- ترد وزارة المالية تقولك : إحنا أفرجنا عن الشحنة بتحفظ !!!! لا مؤخذه يعني إيه ؟ يعني هاتخزنوها في الصوامع لحد ما تنبت تاني ؟

- الغريبة إن نواب كتير من أعضاء الحزب الوطني ومنهم كمال الشاذلي كانوا في قمة الغضب أمس ومنقلبين على وزير الزراعة .... تخيلوا ؟

- ونواب كتير إستغربوا هي ليه ما راحتش القاهرة ؟ أيوه يعني وديتوا الشحنة الفاسدة عشان أهل الصعيد ياكلوها هم هم ليه يا لُئمه ؟

وجاري الأفراج عن باقي الشحنة يا سادة كما أُفرج عن سابفتها ... أنا شوفت برضوا من حوالي سنة شُحنه مليانة حشرات وزي الفل برضوا وإطحنت وعملنا منها عجين الفلاحة وباتون ساليه الفلاحه كمان .... وإتبرع يا عم لمستشفى السرطان ولو بجنيه ..

300 مليون كيلو قمح مُسرطن وفاسد ومليان حشرات ولا يصلح للإستخدام الأدمي وبالهنا والشفا .. وكلوا عيش أحسن لكم

للمره المليون ...... أسأل ... هي البلد دي لها رئيس ؟

آه نسيت أقول .... نفس رجل الاعمال أستورد 43 ألف طن من نفس الحشرات المختلطة بالقمح ( مش قمح مختلط بحشرات ) ودخلوا ميناء سفاجا أمبارح بسلامة الله ... حاجه زي الفل وسبوبة محترمة ..

[ابو محمد المصري]

اشكرك اخي سي السيد اسهبت فشرحت

ياساده اعضاء الحكومه المحترمين مبيكلوش معانا دول ليهم اكل مخصوص مضمون

كان نفسي امبارح يطلب مصطفي بكري من وزير السرطانات الهمام وزير الزراعه سابقا يحط حبه او حبتين من القمح اللي بيحاول يقنعنا انه سليم في بقه الكريم وطبعا جنابه هيرفض بحجه انه صايم

يا وزير السرطانات حرام عليك الشعب الغلبان

بارئيس المجلس الرقابي حرام عليك المصريين المطحونين

يا كل مسؤلي جميع الوزرات من صحه لتضامن لماليه لعدل ارحوموووووووووونا

يا شهاب يا متحدث باسم الحكومه نفسي واحد ابن حلال يحط لك كام حبه من الحشرات المخلوطه بالقمح في عينك قبل بقك بتدافع علي ايه ياراجل ومش مكسوف وانت بتقول ان الشحنه فيها بس شويه حشرات وبذور غريبه

ترضي حد من عيالك ياكل منها ولا يعني عشان محنا ولاد البطه السودا العرجه المصابه بالانفولنزا وانت وعيالك وجميع المسؤلين ولاد البطه البضه الحلوه المربربه

[Amr Radwan]

الوقاية خير من العلاج .. هذا ما نعرفه و نسمعه طوال عمرنا ..

اما الحكومة ..

يا عم كل بالهنا و الشفا و لو جالك سرطان هتتعالج ببلاش .. و لا يهمك ..

هو الهدف ان الحكومة تأكل الشعب و خلاص ؟؟ تراب .. حشرات .. بذور سامة .. قمح مسرطن !!

المهم ما يحصلش شكوي من قلة العيش ..

يعني نحل المشكلة بمصيبة عشان تطلع لنا كارثه بعد كده !!!!!!!!!!!!!!

حسبي الله و نعم الوكيل ..

[ابو محمد المصري]

اشكرك اخي عمر علي ردك الجميل

الحكومه لابتحل ولابتربط

الحكومه بتعي ومبتعالجش

الحكومه نفسها نص الشعب يروح عند ربه عشان تقدر علي الباقي

الحكومه مبتحاولش حتي ترجع المخطوفين من القراصنه وحجتها ما حنا كتير

الحكومه مبسوطه من شهداء الاسفلت وكله في مصلحتها

الحكومه اخر رضا بتدني العلاج في المستشفيات وكل عدد الضحايا ما يكتر تحس انها ادت دورها

حكومه العكننه كل يوم تخرج بجديد يزود المعاناه شويه كادر شويه نظام امتحان جديد شويه ضرايب من بطرس باشا شويه قوانين من مجلسي الانتقال لجدول الاعمال

حكومه بش حاسه بناسها

حومه ذكيه بتاعه شويه رجال اعمال نسيوا الجوع والمرض

[elfakhrany]

أكيد يا جماعة فى حد من الناس التقيلة أوى ورا الموضوع دة وهتلاقى كل واحد واخد نصيبة من التورتة اما الشعب المصرى فمن وجهة نظرهم انه كده كده بياكل الزلط بداية من مياه نهر النيل الملوثة مرورا بشحنات اللحوم الفاسدة وصولا الى الدقيق المسرطن واللبن المضاف اليه بودرة السيراميك ... لك الله يا مصر

تم تعديل 13 مايو 2009 بواسطة elfakhrany

[dawn walker]

حكومة رخيصة

[~Heba~]

.....

للمره المليون ...... أسأل ... هي البلد دي لها رئيس ؟

آه نسيت أقول .... نفس رجل الاعمال أستورد 43 ألف طن من نفس الحشرات المختلقطة بالقمح ( مش قمح مختلط بحشرات ) ودخلوا ميناء سفاجا أمبارح بسلامة الله ... حاجه زي الفل وسبوبة محترمة ..

يااااه معقولة كل ده يا سى السيد

انا اعرف ناس عايشة على دقيق التموين ( و فعلا بيلاحظوا ان لونه مائل للسواد) اللى القمح ده مسيره هيبقى زيه و يتوزع لهم

اتوقع اول حاجة تحصل بعد ما الرئيس اللى ما يتسمى ده يتشال ان كل رؤوس الفساد دى تتحاكم و يقضوا البقية الباقية من اعمرهم فى السجن...و لعذاب الآخرة اكبر

و حسبنا الله و نعم الوكيل

تم تعديل 13 مايو 2009 بواسطة ~Heba~

[الترجمـان]

للأسف رد الحكومه كان قبيح جدا ...!!

واثبتت الأيام انها حكومه لا تصلح للإستخدام الآدمي ..!!

دا حتى مستوى التبرير الحكومي لهذه الكارثه الصحية والإقتصادية لا تدل على ذرة احترام لمقدرات ولمصلحة الشعب المصري والذي من المفترض انها تعمل من أجله ومن المفترض ان الفلاح يقع على أول قائمة محدودي الدخل في مصر الذي لا يخلى من ذكره أي خطاب محلي يوجهه رئيس الجمهورية للحكومة مطالبا بدعمه المستمر...

فقبل أيام من فضح هذه المؤامره امام الشعب المصري خرجت الحكومة بقرارات مجحفة تلزم الفلاحين بتسليم قمحهم بدرجة نقاء عاليه رغم ضعف الإمكانيات المادية والتوجيهات العلمية التي من المفترض أن توفرها نفس الحكومة التي تدعم بها الفلاح المصري حتى يستطيع تسليم قمحه بالمواصفات العالمية التي تتحجج وتتبجح بها الحكومة حتى ترضى على القمح المصري وتشتريه..

فكيف تدافع حكومتنا الرشيدة والنظيفه عن هذه الشحنة الفاسده وبأي وجه تقف امام هذا الشعب بعد اليوم ..؟؟!!

هذه الحكومه يجب ان تقال فورا ويحاسب كل من تسبب بالسماح لدخول تلك الشحنة من أول معالي الوزير إلى سيادة الغفير ..

[se_ Elsyed]

النائب العام اصدر قراراً اليوم بالتحفظ على الشُحنة

طب والـ 65 ألف طن اللي إتطحنوا وإتخلطوا بالقمح النضيف ... بخ كده خلاص ؟

في مفاجأة لك يا زميلنا العزيز الترجمان

الفلاحين والتجار اللي راحوا يوردوا قمح بتاع بني ادمين لتلك الصوامع الثلاثة من يومين ... رفضت الصوامع ان يستلموا منهم القمح عشان ما فيش مكان ...

كل شيء مرسوم بالمسطرة ....

فضي يا عم الصوامع للزبالة ...

وموت الفلاحين وخليهم يعملوا القمح النضيف بليله ويقفوا يبيعوها على ناصية الشارع ...

وأنا اهو وإنتو أهو...

الموضوع هايعدي والدنيا هاتمشي والسرطان هايزيد والمجرمين هايحصلوا على وشاح النيل ووسام الجمهورية من الطبقة الأولى زي يوسف والي ...

وسلم لي عالرئيس ..

[msayed]

يا جماعة إنتم بتلوموا على الريس والحكومة كده ليه

ياجماعة حرام عليكم خلوا عندكم شوية ضمير وحب للبلد

كلنا متفقين إن الإنسان المصرى رخيص

علشان إحنا كثيييييييييييييييييير فالعرض أكثر من الطلب

طب علشان نرجع نغلى تانى نعمل إيه

لازم العرض يقل عن الطلب

وهو ده إللى الحكومة الواعية بتعمله

زى ما امريكا بترمى القمح فى البحر علشان يغلى

الحكومة بتخلص علينا علشان نغلى.

ويعيش سيادة الرئيس على حسن سلوكه على بعد نظره.

[se_ Elsyed]

لسه عارف دلوقت ان وزارة الزراعة خلعت ايدها من الاستيراد واوكلتها الى شركات خاصة ... سبوبه طبعاً

وان نفس الشركة بتاعت السوس المقمح دخلت البلد العام الماضي 700 الف طن قمح من روسيا برضوا في الستكم بكتم

والسنة دي ومكافأة لها اخدت امر توريد من وزارة الزراعة لتوريدة مليون ومتين الف طن ... وصل منهم حتى الان 350 الف طن ... اتسلك منهم 65 الف طن واتطحنوا ... والباقي موجود في الجمارك

كل سنة وانتم طيبين

[Abu Reem]

فاكر يا سي السيد العبارة التي استعرتها من أحد المواضيع التي كنا نتكلم فيها عن بع السلبيات التي تحدث في مصر وكان هذا ردك

***********************************************************************

(((والحمد لله مازلت جريء وأكتر واحد بينتقد نقد موضوعي ومازال يرى إن عندنا وفينا خير ...

والفساد والجرائم موجودة في كل حته ... بس غحنا الكتكوت عندنا بنخليه جمل ..

واظن اللي بنسمعه كل شوية عن جرائم في اوروبا وأمريكا بيرتكبها الطلبة اللي بيشيلوا سلاح واللي لو حد أخد مصماص من التاني بيقوم جايب الرشاش ومموت له 10 أشخاص في المدرسة .. يجلعنا نقول إن اللي عندنا كلام فارغ ...

وخلي بالك العملية نسبة وتناسب ..

يعني لما يكون عندك 18 مليون تلميذ وألاف مؤلفة من المدرسين وتحصل حالة أو أتنين في السنة ويعاقبوا عليها ... يبقى هي نسبة لا تُذكر ...

الخلاصة ... لو فضلنا نعدد في السلبيات فقط بدون مشاركة في تعديلها .. يبقى على الدنيا السلام وهاتبقى مبرر لفشلنا إحنا .. حتى على المستوى الشخصي ..))))

******************************************************************************

فاكر الجملة الأخيرة في مداخلتك بالأعلى ،،، !!!

علشان بس كنت زعلان لما كنت أنا باتكلم عن السلبيات التي تحدث بين المصريين وبعضهم ، وكان هذا ردك على كلامي ،

الأن وبعد ان أتحفتنا بهذه المعلومات الخطيرة التي تحدث في بلادنا ويقتل فيها المصريين بابشع الأمراض ، يا ترى لو استعرت جملتك دي وقلتها لك في هذا الموضوع الأن ياترى هايكون شعورك إيه ،، ؟؟؟؟

تم تعديل 13 مايو 2009 بواسطة Abu Reem

[الترجمـان]

النائب العام اصدر قراراً اليوم بالتحفظ على الشُحنة

طب والـ 65 ألف طن اللي إتطحنوا وإتخلطوا بالقمح النضيف ... بخ كده خلاص ؟

في مفاجأة لك يا زميلنا العزيز الترجمان

الفلاحين والتجار اللي راحوا يوردوا قمح بتاع بني ادمين لتلك الصوامع الثلاثة من يومين ... رفضت الصوامع ان يستلموا منهم القمح عشان ما فيش مكان ...

كل شيء مرسوم بالمسطرة ....

فضي يا عم الصوامع للزبالة ...

وموت الفلاحين وخليهم يعملوا القمح النضيف بليله ويقفوا يبيعوها على ناصية الشارع ...

وأنا اهو وإنتو أهو...

الموضوع هايعدي والدنيا هاتمشي والسرطان هايزيد والمجرمين هايحصلوا على وشاح النيل ووسام الجمهورية من الطبقة الأولى زي يوسف والي ...

وسلم لي عالرئيس ..

ياريت يابو السيــد تخلص على وسام الجمهورية وكسر الحصّاله اللي كانت بيحوشوا فيها العمولات والتّبسات بعد نهاية خدماتهم الجليله للشعب والوطن ...لا دنتا نسيت ان امامهم مشوار وطني آخر في مجالس الشعب ومجالس الشورى التي ستستعين بخبرتهم في إصدار القرارات والقوانين التي ستكمل مسيرة الفكر الجديد الذي وعدنا بها سيادة الرئيس ربنا يعفي عنه ويكرمه ويحسن خاتمته..

اتساءل هنا هل يعلم الرئيس عن هذه الكارثه أي شئ ...؟؟

وإذا كان قد علم بذلك هل يرضى ابتزاز الحكومة للشعب والمساومة على صحته والمتاجرة بحاجاته وأمنه الغذائي والإقتصادي بهذا الشكل ؟؟

[se_ Elsyed]

فاكر يا سي السيد العبارة التي استعرتها من أحد المواضيع التي كنا نتكلم فيها عن بع السلبيات التي تحدث في مصر وكان هذا ردك

***********************************************************************

(((والحمد لله مازلت جريء وأكتر واحد بينتقد نقد موضوعي ومازال يرى إن عندنا وفينا خير ...

والفساد والجرائم موجودة في كل حته ... بس احنا الكتكوت عندنا بنخليه جمل ..

واظن اللي بنسمعه كل شوية عن جرائم في اوروبا وأمريكا بيرتكبها الطلبة اللي بيشيلوا سلاح واللي لو حد أخد مصماص من التاني بيقوم جايب الرشاش ومموت له 10 أشخاص في المدرسة .. يجلعنا نقول إن اللي عندنا كلام فارغ ...

وخلي بالك العملية نسبة وتناسب ..

يعني لما يكون عندك 18 مليون تلميذ وألاف مؤلفة من المدرسين وتحصل حالة أو أتنين في السنة ويعاقبوا عليها ... يبقى هي نسبة لا تُذكر ...

الخلاصة ... لو فضلنا نعدد في السلبيات فقط بدون مشاركة في تعديلها .. يبقى على الدنيا السلام وهاتبقى مبرر لفشلنا إحنا .. حتى على المستوى الشخصي

******************************************************************************

فاكر الجملة الأخيرة في مداخلتك بالأعلى ،،، !!!

علشان بس كنت زعلان لما كنت أنا باتكلم عن السلبيات التي تحدث بين المصريين وبعضهم ، وكان هذا ردك على كلامي ،

الأن وبعد ان أتحفتنا بهذه المعلومات الخطيرة التي تحدث في بلادنا ويقتل فيها المصريين بابشع الأمراض ، يا ترى لو استعرت جملتك دي وقلتها لك في هذا الموضوع الأن ياترى هايكون شعورك إيه ،، ؟؟؟؟

يا أبو ريم الموضوع مختلف تماماً ..

أنت أقتطعت جزء من كلامي في موضوع معين عشان تدلل على إن مصر كلها فساد وأصبحت جحيم لا يُطاق .... وده كلام بيعجب ناس بتحلي بضاعة بلاد بره أو تحلل سبب وجودها الدائم خارج مصر .... وهذا ليس رأيي ولا تفكيري .. وكل واحد حر في تفكيره ..

وأعتقد إن كلامي كان في موضوع المدرس اللي ضرب الولد وموته وقلت إن دي ليست ظاهرة .. ومع إنها جريمة نكراء إلا إن في ظروف وملابسات محيطة بها منها كثرة عدد الأطفال في الفصل الواحد وتدني أجور المدرسين ... إلخ ..

أما هنا يا سيدي الفاضل فنحن أمام قضية رأي عام تهم الملايين ولا يُمكن أن نغُض الطرف عنها ...

وفرق كبير بين أن تجد إنسان المفروض انه مصري كل مداخلاته وكل أراءه إنتقاد إنتقاد بل تصل إلى السب كبعض الزملاء للأسف هنا وإنت عارفهم بالتأكيد كويس ... وبيصل الأمر إلى إنه بيشتم بلده أو التي كانت بلده ....

وفرق بين أن نناقش قضية لنوعي الناس ونسلط الضوء على الفساد والمفسدين بل ونقترح حلول ..

أما عن السلبيات التي تحدث بين المصريين وبعضهم ... فمازلت مُصر إننا مازلنا مصريين ومازلنا جزء من هؤلاء المصريين ... وأنا ضد تصنيف المصريين إلى أحزاب ..

أي انني اتناول سلبيات المصريين اللي ما بيساعدوش بعض .. وبيبهدلوا في بعض خصوصاً في الغربة .. على أساس إن أنا الحلو الوحيد وأنا المظلوم وبالتالي هناك معسكر مصريين أشرار ووحشين ...

بأسميها بمنتهى الكوميديا " التكفير والهجرة " فاكرهم ؟

كان في جماعات متطرفة في الثمانينات ظهرت في مصر كانوا كده ... هما الحلوين اللي هايدخلوا الجنة ... والباقي وحشين ...

وبرضوا مازال السؤال اللي بيطرح نفسه بدون أن نغير مجرى موضوع القمح : هو ليه عُمري ما شوفت واحد مصري وحش دخل منتدى ما وأظن أعضاء المنتديات ومرتادي الإنترنت بالملايين .. وإتكلم عن الناس الوحشين اللي هو منهم وكيف يتفنن هؤلاء في ظلم إخوانهم المصريين الأخرين ؟

عارف ليه يابو ريم بمنتهى البساطة عشان نقفل الموضوع ؟

السبب : لإننا أنفسنا فينا الخير وفينا الشر وهما مختلطين ببعض .. لإننا بشر ... وبالتالي نحن بالتأكيد نشارك في ظلم الأخرين سواء بشكل مباشر أو بشكل غير مباشر ... ولكن لما نيجي نتكلم .. نتلكم عن ظلم الأخرين لنا وليس عن ظلمنا للاخرين وقليل من هم يتحدثون عن أخطاءهم ..

عارف أقرب مثال هو إيه ؟

الموقف اللي حكاه زميلنا الفاضل محمد العنبي في إن شركته ما كانش فيها إلا واحد مصري فقط .. وفي شركة تانية معاهم في نفس المبنى وفيها مصريين .. فزعل منهم وأتهمهم بعدم التعاون لإنهم ما سألوش عليه كواحد لسه جاي جديد ومحتاج مساعدة ... فهل تظُن إن الأخرين دول شعروا إنهم فجأه بقوا ظالمين وفي معسكر المصريين الوحشين ؟

تحياتي ... ونرجع لموضوع القمح بقى أفضل

[~Heba~]

الخلاصة ... لو فضلنا نعدد في السلبيات فقط بدون مشاركة في تعديلها .. يبقى على الدنيا السلام وهاتبقى مبرر لفشلنا إحنا .. حتى على المستوى الشخصي

يا سى السيد

انا اللى فهمته من كلام ابوريم

ان التحدث عن الفساد و السلبيات فى مصر لا يكفى و الأولى اننا ندخل مباشرة فى تقديم الحلول

انت قمت باللى عليك و عيتنا و عرفتنا بحاجات مكنش نعرفها بخصوص قضية القمح الفاسد دى

الخطوة اللى بعد كدة هنعمل ايه

ازاى نوصل صوتنا لاولى الأمر و نفهمهم اننا معترضين

انا عن نفسى اتمنى ان الحكومة تتشال و فى مرة واحدة بس يقوم مجلس الشعب بمبادرةتاريخية و يحجب الثقة عن الحكومة

و ياريت كمان يعملوا لنا انتخابات رئاسة مبكرة

يا ترى مفيش عضو فى مجلس الشعب و الا الشورى جرئ كفاية عشان ينادى بالانتخابات المبكرة دى

لان سبب الفساد الأصلى معروف لينا كلنا طول ما هو موجود معتقدش ان الحال هيتعدل

تم تعديل 14 مايو 2009 بواسطة ~Heba~

[لولا]

شكرا يا سي السيد على هذه التوضيحات العميقه ..

تابعت الأخبار واللقاءات بخصوص هذا الموضوع فى عدة قنوات .

عايز الحقيقه يا سي السيد الخبر دوت بالذات كان بالضبط زى مابيقوا القشه اللى قصمت ظهر البعير !!

ومش لاقيه اى تعليق من درجة الصدمة الداخلية اللى حسيت بيها ومش لاقيه اى وصف اقوله فى اللى بيحصل

ومش لاقيه اى تبرير اقنع نفسي بيه على درجة الإجرام الغير طبيعه اللى وصلت لدرجة اعفن عفونه من الجيف الميته

التى تفوح بأقصى درجات العفن لأن اللى بيحصل اعفن حتى من عفونه الجيف !!

وفعلا زى ماقلت لو كان هؤلاء كفرة او صهيون او بدون دين ولا ملة لكانت قلوبهم أرأف وأرحم بنا من ذلك ..

و ...

بجد كفايه بقى ..

خلاص مش معقول كده ..

خلاص مبقتش عارفه اتفرج على اى حاجه لا العاشره مساء ولا تسعين دقيقه ولا 48 ساعه ولا فى الممنوع ولا الحقيقه ولا ولا ولا اى برنامج

بيتكلم عن مصر لأن جوايا وصل لدرجة غير طبيعيه من الغضب والحزن والألم ..

آه بجد يا مصر .. دنسو ترابك ياغاليه بفساد ضمايرهم .. شوهو معالم جمالك يابلد..

نهشو لحمك ..

سرقوا خيرك ..

حتى هواكى يا بلد سمموه ,, وميتك لوثوها .. وعيشك يافقير خلوه يبقى سم تاكله وتدفع تمنه كمان!!

تمد ايدك تقول بسم الله .. احمدك يارب على النعمه وانت راضى بقليلك ..

لكن قليلك ده استخسروه فيك !! انت كلك استخسروك فى الحياه !!

طب ليه ؟؟!!

لأمتى السكوت ؟؟

وامتى حنقف ونقول فى نفس واحد كفايه ؟؟

كفايه بجد ..

كفايه كده كتير قوى

كتير قوى قوى..

طب ننادى نقول ايه ؟؟

بأسم الدين ؟ معندهمش دين !!

بأسم الأخلاق ؟ معندهمش اخلاق!!

بأسم الضمير ؟ ميعرفوش هو ايه اصلا !!

بأسم الإنسانيه ؟ استحالة يكونو بشر زينا !!

بأسم ايه بس ؟؟ حد بس يقولى ؟؟

كاسك يا وطن ..

قلبى عليكى بينفطر يابلدى .. والوجع فاق كل الحدود .

لولا

[Amr Radwan]

قلبى عليكى بينفطر يابلدى .. والوجع فاق كل الحدود .

لولا

فعلا .. :(

[ssmaly]

الخلاصة ... لو فضلنا نعدد في السلبيات فقط بدون مشاركة في تعديلها .. يبقى على الدنيا السلام وهاتبقى مبرر لفشلنا إحنا .. حتى على المستوى الشخصي ..))))

انا لى تعليق على الجملة دى

هو مين بيعطيك فرصة ان تشارك فى التعدبل و التغيير ؟

احنا بنتكلم عن مصر وعن الحكومة المصرية التى لاتعطى اى واحد فرصة ان يعمل حاجة

الحاجة الوحيدة انهم بيعطونا فرصة ان نتكلم فقط ولكن هم لايسمعون

الحكومة دى لاتسمع اى صوت غير صوتها

واذا سمعت لاتفهم اى رأى الا رأيها

واذا فهمت لا تتخذ اى اجراءات الا الاجراءات المتبعة والمكتوبة سابقا

يعنى انت وانا ليس لنا اى شىء نعمله الا ان نصرخ بعلو صوتنا ليرتد لنا صدى الصوت فى هذا الجب العميق الذى نحن فيه من زمن

ممكن ان تسأل و ما الفائدة من الصراخ؟

حتى لا نصاب بالجنون و الخرس