تجمع المصريين في جدة

[Amr Radwan]

شكرا أ. طاهر

شكرا أ. عبد الاله

شكرا علي كل اللي ردوو و تحمسوا للموضوع .. و بينفذوه ..

علي فكرة الشباب متحمسين جداااا و الحمد لله .. و الكل مبسوط من الموضوع .. و برده فيه اسر كتير كانت عاوزة تيجي بس بنعتذر لهم و ان شاء الله هنعمل يوم تاني مخصص ليهم

و ربنا ييسر الحال ان شاء الله ..

طول ما فيه تعاون طول ما فيه تقدم .. wst::

[Diab]

صباح الخير

عجباني الفكرة دي لأن معروف أن السعودية من الدول المحافظة يعني حكاية التعارف دي مش زي الدول المفتوحة زي الأمارات عشان الحماس ميبقاش لحظي أنا شايف أن لو اتعمل أهداف معينة ( بس بطريقة كول مش أكاديمية ) هتبقي أفيد مثلا تعربف الناس بالجمعيات الخيرية ودور رعاية الأيتام والمرضي وعمل زيارات كل فترة لتقديم العون ليهم

عمل دليل ممكن تستفيد منها مثلا السيدات في معرفة أماكن التخفيضات علي السلع زي اللي بتبقي موجودة في الاماكن الكبري زي بندا والدانوب وغيرها

أزاي ممكن توصل للعمال الكويسين في السباكة والكهرباء والنجارة والحاجات دي وعمل دليل تليفون بيها

الأفكار كتير وبالتوفيق للجميع

ملحوظة أنا كتبت ده وانا في اجازتي بالفاهرة وان شاء الله لما أرجع هنكون علي إتصال

شكرا

[Amr Radwan]

السلام عليكم و رحمة الله و بركاته ..

انا سعيد بالافكار دي و اؤيدها بشدة لاني واحد من الناس اللي بيطلع عيني عشان اعرف مكان كويس اخرج فيه مع العائلة بخلاف البحر :(

بالاضافة ان الواحد اتلسع كتير من الصنايعية و خاصة بتوع التكييف :(

عشان الافكار تكون موثقة و ما تتنساش يا ريت تبعتها علي الجروب في الفيس بوك عشان تروح لك اعضاء الجروب ..

[الباشمهندس ياسر]

علي حسب معلوماتي البسيطه,,, أنك مدام معاك تأشيره لدخول السعوديه تقدر تعمل العمره اللي انت عايزها,,, بس بعيد عن اوقات الحج,,, لأن الحج ليه تأشيره لوحده و تصريح خاص حتي للمقيمين في السعوديه..

العكس هو اللي فيه مشكله,, أنك تكون معاك تاشيرة عمرة و تقعد تتمشي بيها فالمدن البعيده عن مكه و المدينه..

بارك الله فيك

[hhanafy]

على فكرة دة موضوع محترم.

وربنا يكرمكم وتكونوا جروب محترم من الصحبة يكون كل افراده اخوة متحابين.

انا هيثم من دبي وسوف هأتى إلى جدة فى خلال 10 ايام للعمل.

طبعا اول شئ سوف يشغل بالى هو السكن فعملى فى شارع الأمانة.فأنا عايز حد يساعدنى واجد شقة فى مكان حلو ومتحرم وميكونش بعيد عن الشغل اوى.

فهل دة ممكن؟

[Amr Radwan]

السلام عليكم ..

ازيك يا استاذ هاني ..

تشرفنا في جده .. و ان شاء الله نكون كلنا جمبك باذن الله .. ما تقلقش ..

بالنسبة لموضوع السكن .. بيكون عادة لما تشرف في جدة .. يعني عادة الشركة اللي انت جاي عليها هتكون حاجزة لك فندق لمدة اسبوع في خلال الاسبوع دة ممكن نلف مع بعض و نشوف لك سكن يناسب لك .. يعني الموضوع بيعتمد عليك في الاول و الاخير .. ngh:

تحياتنا لك و في انتظارك و لو تحب ابعت لنا رقم رحلتك في المطار و نيجي ناخدك و نعمل معاك الواجب :blink:

[hhanafy]

تسلم يأخ عمرو.على فكرة انا اسمى هيثم.

وإن شاء الله عندما اصل سوف اتواصل معكم إن شاء الله.

[Amr Radwan]

توصل بالسلامة و في انتظارك ان شاء الله

يا استاذ هيثم ngh:

[reem]

السلام عليكم و رحمة الله و بركاتة

أزيكوا يا جماعة و إزاى كل مصري موجود في مصر أو براها

يا جماعة الغربة وحشة فعلا .. لكن الأوحش أنك تبقي غريب في بلد متعرفش فيها حد

فكرة تجمع المصريين جمييييييلة جدا و أن شاء الله تعود بالنفع علينا كلنا و خصوصا أن الدعوة مفتوحة للكل أى مصري عايش في جدة

أما بالنسبة للعائلات بمعنى أصح يعني السيدات ( مة أى راجل متجوز ممكن يحضر الحفلة لوحدة .. محدش هيضربة ولا إية ؟؟ ;)

هنا تكمن المشكلة

العدد قليل قويييي ... تقريبا 2 أو 3 بالكتير

مش عارفة لية .. المكان الى هيتعمل فية الشوى مكان مفتوح و الستات هتقعد مع بعضها على جنب .. و الأكل هييجي لينا لحد عندنا

الرجالة همة الى هيشووا (مش بالزمة راحة )

يا جماعة أى واحدة بتقرا الموضوع دة و شايفة أنة لذيذ تعرض الفكرة على زوجها ولو وافق خلية يرد على الموضوع و يقول أنة هييجي بالعائلة و المهندس عمرو هياخد نمرة تليفونة و لو فية تجاوب من عدد كافي من العائلات هيتم الأتصال بيهم بكرة (لأن التجمع بكرة الخميس) للتأكيد على أن عدد العائلات بقى كافي مثلا 100 الأمل موجود

من الآخر هيتم الأتصال و التأكيد على أن فية مكان هيتخصص للنساء

إنما لو فضلنا 2 زى محنا .... أعتقد مش هينفع خالص .... و ربنا بقة يعوضنا خير منها في مرة تانية

طبعاً فية ناس هتقول ( ياة و هوة أنتي لسة فاكرة تقولي )

بصراحة مكنتش متخيلة أن محدش هيرد من العائلات و لما فكرت فيها قلت مة ممكن محدش يعرف أن هيتخصص مكان للستات على جنب يقعدوا مع بعض لوحدهم

على العموم أديني بقول و أهه محاولة لو صابت يبقى تمام , ولو خابت يبقى مخسرتش حاجة

و السلام ختام

[Amr Radwan]

فكرة كويسة و انا مستعد للتنفيذ ان شاء الله

اي اسرة محتاجة تتجاوب معانا حتي لو فيها اطفال ما فيش اي مشكلة ;) بالعكس نكون سعداء بشباب المستقبل معانا ..

[Amr Radwan]

ما تنسوش اليوم phn: موعدنا

[ELSHAMY]

موعد ايه ؟ bv:- phn:

تبلت اللحمة ؟

ما تنساش الطحينة :P

[moheltohamy]

ناس ليها بخت... وناس ليها ترتر phn:

[ahmadmosa]

اشكرك استاذ عمرو - فكرة هايلة - انا عملت زيها بس ينبع مش جدة :closedeyes:

يارب الاقي مصريين فيها :closedeyes:

[Amr Radwan]

يا رب نعمل كلنا كده في بلاد الغربة و نكون جمب بعضنا في اي مدينة .. احنا اسرة كبيرة و لازم نتجمع ..

[Diab]

متنسوش أنا أحنا بتوع جدة لسة في أجاز ة لما نرجع نقدر نتواصل معاكم

[tahereyad]

ايه اخر الاخبار يا جماعه و ايه اخبار الريف النمساوي والله عجبنى الاسم ده جدا و قعدت اضحك عليه كتير والله ربنا يكرمك ياحبيبي يااسلام

المهم ايه للاخبار واليوم كان عامل ايه طمنونا وفي انتظار الاخبار و الصور عالفيس بوك

[Amr Radwan]

السلام عليكم و رحمة الله و بركاته ..

ازيك يا أ. دياب .. في انتظااااااااارك ان شاء الله

ازيك يا حبيبي يا طاهر .. وحشتنا من قبل ما نشوفك ..

احب اعرفك و اعرف احبابنا المصريين ان التجمع (اول تجمع للمصريين في جدة ) تم امس و كان غاية في الروعة .. و حضره حوالي 25 مصري و مصرية غير الاشبال الصغيرين ..

و سيتم رفع الصور باكر السبت علي الفيس بوك .. ان شاء الله .. و هتلاقوا علي الفيس بوك ان شاء الله اللي حصل بالتفصيل و اراء الناس اللي حضرت :)

شكرا لكل اللي حضر .. بجد .. بجد .. تجمع جميل ..

[Amr Radwan]

تم رفع الصور علي الجروب علي الفيس بوك للنشر ..

http://www.new.facebook.com/event.php?eid=34775592856

و في انتظاركم و انتظار مشاركتكم معانا .. و الحمد لله الفكرة بدات تنتشر في مدينة اخري و هي ينبع و بالتوفيق لكل حبايبنا ..

[DIA ELDIN]

تم رفع الصور علي الجروب علي الفيس بوك للنشر ..

http://www.new.facebook.com/event.php?eid=34775592856

و في انتظاركم و انتظار مشاركتكم معانا .. و الحمد لله الفكرة بدات تنتشر في مدينة اخري و هي ينبع و بالتوفيق لكل حبايبنا ..

ما شاء الله الصور جميلة والصحبة كلها زي العسل والله وربنا يديمها