كلم مصر ببلاااش .. خاص للمصريين المغتربين

[hishamelsayed]

اقدم للأخوة المصريين المغتربين في اي مكان في العالم واللي بيخلصوا فلوسهم على التليفونات ؟؟ حل رائع وعملي وممتاز جدا

جهاز الاتصال عن طريق الانترنت،، لكم بعض المميزات

مكالمات دولية غير محدودة مجاناً ( من جهاز إلى جهاز آخر )

عند شراء جهاز BESTip جديد سيتم منحك رصيد مجاني

جودة صوت عالية تماثل الهاتف العادي

سهولة في التشغيل والاستخدام

لا حاجة لوجود جهاز كمبيوتر

أقل الأسعار للاتصالات الدولية ( الدقيقة لمصر ب 17 سنت فقط)

للمزيد من الاستفسارات عندكم الايميل ،،، انا جربت الجهاز من سنة واكتر ،،، اداء رائع واسعار قياسيه حاليا ،،، انا كنت شاري ب 300 دولار تقريباً

تحياتي

[vipwithyou]

انا جربت الجهاز من حوالى سنتين وسعرة فى السعودية من 350 الى 450 ريال لا اعرف تحديدا ً الآن كام سعرة

ابحثوا عن الارخص لأن السعر اللى فى العرض دة مبالغ فيه

[tahereyad]

الجهاز أنا برضه جربته من حوالي 6 شهور,, و هو ممتاز جدا,, و سهل الاستخدام,, و جودة الصوت رائعه,, أنا اشتريت منه جهازين, واحد في مصر و التاني هنا,, و بالتالي باقدر اكلم أهلي في مصر زي مانا عاوز و ببلاش منغير ولا مليم غير اشتراك النت,,, و كمان في حاجه مهمه جداجدا,, الجهاز اللي انا اشتريته في مصر فيه خاصيه تحويل المكالمات,, و بالتالي لما توصله في مصر علي خط أرضي ممكن تعمل منه مكالمات داخليه في مصر كأنك في مصر,, و المكالمات بتتحسب داخلي علي الخط بتاع مصر,, و كمان ممكن و هو متوصل علي الخط الأرضي فمصر أي حد يتصل بيك برضه كأنه بيكلم حد جوه مصر عادي جدا....

بس علي فكره الجهاز مش بييجي معاه أي رصيد ولا حاجه,, و لازم حضرتك تدخل عالنت و تضيفله رصيد اذا احتجت تعمل مكالمات دوليه بسعر 18.9 سنت للدقيقه,,, و كمان في مشكله بسيطه بس أنا لقيتها ميزه,,, ان الخط بيفصل كل 15 دقيقه بالظبط و بتحتاج تتصل تاني عشان تكمل رغي... و بالنسبه للسعر, أنا تقريبا جيبته زي الاعلان كده..

و من الآخر كده,, أنا رأيي أن الاختراع ده أحسن وسيلة اتصال اخترعوها لحد دلوقتي للمغتربين

[se_ Elsyed]

هو ده الجهاز اللي بتدخل عن طريقه على سكاي بي ؟

ولو عايز تتصل منه على تليفون عادي أو محمول في مصر .. هل يحتاج إشتراك في أحد المواقع المتخصصة بالإتصال ؟

[vipwithyou]

ياريس احب ابشرك ان فى جهاز من نفس النوعيه جربته امس فقط ونتائجة اكثر من رائعة

وبيتركب على الدى اس ال وتقدر تتصل بيه على رقم تليفون فى مصر بتعريفة مصرية 100 %

بشرط انه يكون لديك خط به الزيرو فى مصر

للتفاصيل فضلا اتصل على رقم 0900000000000

بس الجهاز كويس يا جماعة وجارى معرفة التفاصيل عن الجهاز الاحدث لاخبار الجميع عنه

لا اعرف السعر ولا مكان الشراء حتى تلك اللحظة لكن سأعرف كل التفاصيل وامدكم بها لاحقا ً

شكرا

[se_ Elsyed]

روح إتغدى وخلص طبق الكبسة وتعالى يا تامر

يعني عارف الجهاز فين ولا ايه ولا بيتشغل ازاي وجاي تتكلم

وبعدين تعريفة مصرية مخرومة إيه يا عم ؟

هات التفاصيل يا تامر ثم أقترب وأدخل بصدرك في الموضوع

[AMEIR]

طيب انا عايز جهاز ايه هو احسن جهاز في هذه الاجهزة عشان اكلم الوالد في مصر

[vipwithyou]

بص يا سيدى الفاضل

الجهاز انا استخدمته من فترة كبيرة وكنت باتصل على نفس الجهاز فى مصر بدون تكلفة غير تكلفة الدى اس ال العادية

لحد هنا كويس

المهم امبارح يا سيدى كنت بأزور واحد صديق وقالى تعالى علشان تشغلى الجهاز وأظبطهوله علشان يشتغل فى مصر كويس

لما رحت هناك لقيت الجهاز نفس اللى عندى لكن فيه اضافة موجودة فيه

وهى مخرج زيادة بيتوصل على خط تليفون ثابت

من خلال المخرج دة لو انت اتصلت من اى مكان على الجهاز بالطريقة العادية اللى كلنا بنتكلم فيها

المخرج دة بيحولك على خط التليفون المربوط عليه وتقدر تدخل رقم اى حد فى مصر ( تليفون ارضى أو موبايل ) وليس جهاز آى بى

يعنى الأول كان الاتصال محدود مجانى بمكان فيه نفس الجهاز

لكن دلوقتى تقدر لو عندك جهاز فى مصر وجهاز هنا تتصل على اى تليفون ارضى او موبايل فى مصر بالتعريفة المخرومة بتاعة التليفون المربوط على الجهاز اللى فى مصر

بس يا ريس

لكن السعر لم اعرفة حتى الآن لكن باذن الله بكرة اكلم الراجل واعرف سعرة ولو عايز مكانه كمان اجيبهولك

وشكرا بس بجد جهاز تحفة وان شاء الله لما اشتغل بس هأجيبه

[النجم الثاقب]

فى واحد زميلى جايب جهاز لنفس الغرض بس معرفش نوعه ، سعره من 900 لـ 1000 ريال و شغال dial up

[Handicraft]

الموقع ده فيه بدائل متعددة لجهاز الإتصال

[se_ Elsyed]

وده بالصلاتو عالنبي بيعمل كام يا معلم هاندي ؟

ونجيبوه منين ؟

قصدي هاتجيبه منين عشان تجيب لي معاك حبتين

[metwallly]

السلام عليكم ورحمة الله وبركاته

أنا أخوك أحمد الجديد معاكم فى بحر الغربة بس شكلى محدش عاوز يعرفنى

المهم أنا بشكر الأخوة اللى فتحوا موضوع الإتصالات الدولية لأن الإتصال الدولى بيكلف كتير والراتب لسه ضعيف

ويا ريت لو حد عنده أى حاجة فى الموضوع ده ما يبخلش علينا

وده رابط لموق بيدى ثلاث دقائق لكل رقم جوال تسجل بيه ممكن يستخدم الغلابة اللى زى حالى

ثلاث دقائق إتصال دولى مجانى لكل رقم جوال

[اسكندرية تانى]

سعر الجهاز المشار اليه هو 150 دولار

و لو الاخ اللى بيبعه حبيبك تاخده ب 130 دولار فقط لا غير و لا يحتاج الى اشتراك سنوى

[hishamelsayed]

اخواني الأعزاء أعضاء منتدى محاورات المصريين

اي حد عاوز استفسار عن الجهاز او امكانياته او سعره او طريقة عمله انا جاهز،،

وقبل اي استفسار انا هشرحلكم الموضوع من اوله لآخره

طبعا زي ما الكل عارف ان المكالمات الدولية رغم التخفيض الكبير اللي فيهل ولغاية دلوقتي لسه غاليه ،، ايام زمان بتاع 15 سنه كانت الدقيقه من السعودية لمصر حوالي 7 ريال وتقف طابور في الشارع وبالدور،

الأيام دي الوضع اتغير وبقت الدقيقه من السعودية لمصر ب 1.5 واحيانا توصل 1.26 هلله؟؟؟

المكالمات مش هترخص اكتر من كده واحنا مش هنبطل نتكلم

ايه الحل؟؟؟!!!!

بحكم خبرتي العريضه في مجال التصالات والنترنت والحمدلله مازلت خبرة ضئيله جدا،، الا اني جربت كل الحلول اللي موجوده ، من اول الماسينجر مرورا بالسكي بي والمكالمات من النترنت وكروت الاتصال في السعودية حتى وصلت لهذا الاختراع العجيب والرائع

الجهاز وبكل بساطه شبيه مودم انترنت خارجي،، فيه العديد من الموديلات بس انا هجبلكم من الاخر

اول موديل بيتوصل على خطوط التلفون العادية وده بتكون تكلفته زي تكلفة الانترنت بالضبط يعني في السعودية الساعة ب 3 ريال !

الموديل التاني وده بيتوصل على خطوط الدي اس ال والمتوفرة بأسعار زهيدة اليومين دول (لو ناوي تشتري الجهاز الحق قدم على DSL مجانا من الاتصالات=توفير 300 ريال) وده تكلفته اشتراك شهري في حدود 30-40 ريال لو سرعه كويسة 128 او 256 ك بايت/ث

ايه الحكايه بقى؟؟!!!

لو سيادتك عايش هنا في السعودية وأهلك عايشين في أي مكان تاني ان شاء الله في استراليا العظمى تقدر تكلمهم ببلاش ؟؟؟

طبعا ببلاش مش معناها انك هتسرق التلفون وتتكلم بدون مقابل ، لأ انت هتدفع مقابل اشتراك انترنت مش اكتر،،،

مثال:

سيادتك عايش في الرياض ،، والدك ووالدتك في القاهرة ،،، اخوك ومراته في الكويت ،،، خالتك أو عمتك في المنصورة،،، حماتك ساكنة في اسكندرية،،،حماة اخوك ساكنة في البرازيل،،،وليك اخ قرفان من الدنيا وعايش في كندا

لو عندك 7 اجهزة من الجهاز ده كل مكان فيه جهاز اللي عنده جهاز التلفون العادي واللي عنده الدي اس ال ،، مش هتفرق .... وفي كل مكان حطيت جهاز من دول

هقولك جملة واحده مش اكتر ( أي حد يكلم أي واحد في أي وقت) !!!!!!!! شفت سهله ازاي

اذا كانت اختك بقى او أخت مراتك مش في البيت ونزلت الجامعه او النادي ،، عندك رصيد ممكن تشحنه وتكلم بيه اي حد على اي موبايل في اي مكان والدقيقة برخص الترااااب لمصر الموبايل ب 17 سنت يعني لو اتكلمت 10 دقايق (10*17= 1.7دولار * 3.77 =6.40 ريال /10 = 0.64 هلله للدقيقة ،،،،)

انتهى المثال

قلت ايه هتكمل ولا ايه

طبعا بعض الناس اللي جربت الماسينجر او السكايب او حتى مكالمات النترنت وكروت التلفون هيقولك الصوت بيعمل صدى وبيفصل وفي تأخير في الكلام ؟؟؟

هقولك بقى الحكاية ،، مع الجهاز ده سيادتك لو موصله على دي اس ال سرعته 128 وفي مصر الولد جايب وصل من السيبر بأي سرعه ،،، اضمنلك ان الجهاز ممكن يتكلم 3 ساعات بدون انقطاع ،،لو الكهرباء قطعت او النت فصل في اي مكان لازم هيقطع(مش واحد يشتريه ويجي يقولي ده فصل لما النت فصل عندي :closedeyes:

دلوقتي اي حد عنده استفسار انا موجود

تحياتي

[hishamelsayed]

اف

نسيت الاسعار

سيادتك قدامك 3 حلول

الحل الأول وهو جهاز 10L وده بيشبك على التلفون العادي (سعر الساعة 3 ريال) طبعا سعره 149$ = 562 ريال سعودي ،، ده غير الخصم لو اخدت اتنين واشتريت دقايق كمان

الحل التاني وهو جهاز 10D وده بيشتغل على الدي اس ال (30 ريال في الشهر) طبعا نفس السعر اللي فوق

الحل التالت وهو جهاز Combo وده بيشتغل على الاتنين الانترنت العادي والدي اس ال ، وسعره 189$ = 713 ريال سعودي ،،، ونفس الخصم

تحياتي

[hishamelsayed]

معلش نست اقول معلومة صغيرة جدا نسيتها بسبب ضغووط العمل ووقت الغذاء

هذا الجهاز لا يحتاج لأي كومبيوتر او سوفت وير او برنامج او موقع عشان تتكلم بيه

هذا الجهاز يحتاج فقط لخط النترنت وعدة تلفون تشبك عليها،،،،،،،

الأخ vipwithyou

الجهاز اللي حضرتك بتقول عليه ده الكومبو اللي بيشبك على الاتنين الانترنت العادي او الدي اس ال ،، حكاية انه بيكلم اي تليفون في مصر دي فبتم عادي عشان انت موصل خط تلفون مصري،، ممكن من هنا بقى مباشر تتكلم وصدقني بيبقى احسن !!

انا كده خلصت ياجماع ،، واسف على الاطاله

[vipwithyou]

الاخ هشام الفاضل شرح كل حاجة يا جماعة

يعنى اللى مش عارف اى حاجة عن الموضوع كدة يبقى عرف كل حاجة

مطلوب تحويل 5 ريال على حساب هشام على المعلومات القيمة دى

وكدة يا جماعة اللى معندوش الجهاز اصلا يشترى الكومبو علطول وميترددش لحظة انه يبدل بأى حاجة تانية ويقول ارخص

لأن الكومبو دة كدة تحفة فنيه يشتغل دى اس ال ويشتغل تليفون

مش كنت تعرفنى بالكومبو دة يا هشام من سنتين يا راجل

دا انا جربت الدايل اب 10D الاول وكان الى حد ما وجربت بعديه الدى اس ال 10L وكويس معايا جدا ً والله

بس الكومبو دة بقى لما جربته فعلا رائع

نصيحة للكل يشتريه

انا والله حتى تلك اللحظة لم اعرف السعر الذى اشترى به صديقى الجهاز الذى لديه لكن سأعرف باذن الله واخبركم

بالسعر ومكان وطريقة الشراء

شكرا

[se_ Elsyed]

طب بالنسبة للرياض يا جدعان

البتاع ه بيتباع فين عشان ناخد لنا حتتين

[free bird]

:closedeyes:

اشكركم جزيل الشكر على المعلومات القيمة في هذا الموضوع

و شكر خاص لمن اضاف الشرح المفصل للجهاز

لي فترة اسمع عن هذه الاجهزة و لكن لم اعرف كيف تعمل او اعرف تفاصيل عنها.

نسيت اعرفكم بنفسي

انا اخت ليكم متابعة المحاورات من فترة، و استفدت كثيرا من المعلومات القيمة التي تقدمونها، و لكن هذه اول مرة اشترك معكم.

ياترى ممكن حد يفيدنا بالاماكن التي يباع فيها هذا الجهاز بالامارات، و يا حبذا لو في مدينة العين؟

و لو حبيت اسأل عنه في المحلات، اقول اسمه ايه

و مرة تانية اشكركم جميعا على تعاونكم.

[vipwithyou]

انا عرفت سعر الجهاز الكومبو 430 ريال والجهاز الافضل وهو 11L سعرة 640 ريال

دا السعر فى الرياض

المكان يا سي السيد لسة والله بس بعد طبق الكبسة اللى جاى