نحو قناة اخبارية مصرية خاصة محترمة!

[1_Nadim]

حقيقة لاادري

لكن إحنا عايزينها قناة محترمة تولد عملاقة فعلا و تثبت نفسها من أول لحظة

.....

طبعا مع تقديري لرايك الا ان الذي يولد عملاق هو سي صفوت وشرفنطح وماتسألنيش مين شرفنطح

اما مسألة عمل قناه بتكلفه بسيطه في البدايه فسوف يكون كالحجر الذي يحرك الماء الراكد مما يدفع بسي صفوت انه يحس ان حكاية ولد عملاق واقوي من سنجام واحلي من البطاطا اللي من غير قشر كله كلام هجص

بس يظهر انه مكتوب علينا عموما فرجه قريب انشاء الله

مع خالص تحياتي

[أسد]

بمنتهى الواقعية

الموضوع ده مستحيل في ظل وجود هؤلاء الناس

طبعاً أقصد الناس اللي بيحكمونا

لازم يمشوا الأول ..

وييجي ناس تانية غيرهم ..

وبعد كده نشوف حينفع .. ولا اللي حييجي حيكون شكله ايه

مدينة الإنتاج الإعلامي .. مفيش فيها أي محطة سوى فقط استوديوهات صغيرة ..

مدينة دبي للإعلام .. مليانه ..

وفيها محطات إذاعة متعددة .. كلها اف ام لا تصل لمصر طبعاً

المتابع لكلام وزير الإعلام .. يجده يتحدث كثيراً عن الريادة في الإعلام

الأكيد .. انه يقصد إعلام الهشك بشك ..

احنا عندنا ريادة في المسلسلات الهايفة والأفلام الهلس والفيديو كليب ..... الخ

لكن أخبار ووجع دماغ وحرية وديمقراطية .. لا .. انسى

القانون .. يسمح بإنشاء محطات خاصة ..

دريم .. المحور ..

هلس برضه

التمويل .. طبعاً ممكن وسهل .. والدليل

عندنا قنوات كتير جداً ..

كلها ملهاش لازمة .. تهريج .. ولعب عيال .. ولو جبنا شوية هواة ممكن يعملوا محطات أحسن من كده..

ممكن يقفلوها .. ويعملوا محطة محترمة للأخبار .. ويوفروا الباقي للشعب ..

تدريب المذيعين ..

يبعدوا عن الواسطة والمحسوبيات .. وحنلاقي مذيعين زي الفل ..

يبقى الحل واضح ..

الناس دي كلهم ... كلهم .. كلهم ..

يمشوا ..

ويرتاحوا بقى ...

وكل شئ ممكن يبقى تمام ...

[Lancelot]

طبعا مع تقديري لرايك الا ان الذي يولد عملاق هو سي صفوت وشرفنطح وماتسألنيش مين شرفنطح

شاكر و سعيد بتقديرك لرأيي يا أستاذ نديم .... و أبادله تقديرا بتقدير .... لكن إسمح لي أن أختلف معك ... تعال نشوف قناة إخبارية "محترمة" عايزة إيه علشان تقوم علي رجليها .... عايز إستديوهات و معدات و أجهزة و مباني مجهزة بالشئ الفلاني ... و عايزة إدارة تحرير و محرري أخبار و مصورين و و و و من الناس العاملين في مقر القناة .... و عايزة إدارة علي أعلي مستوي تكون مرنة و حازمة في نفس الوقت كي تتفاعل مع الأحداث المحيطة بسرعة ... و كذلك تضع قواعد صارمة لمصداقية القناة حتي لا تتحول إلي قناة تبث الأخبار المثيرة لجذب المشاهدين و خلاص .... بل لتكون قناة "محترمة" ..... و كمان عايزة – و ده الأصعب – شبكة من المراسلين تمتد و تنتشر عبر العالم ... و لا أقصد مراسليين فرادي ... بل مكاتب ثابتة في العواصم الكبري تضم مراسليين سياسيين و إقتصاديين و رياضيين و غير ذلك ..... و المراسليين و المكاتب ديه لازم تكون مجهزة بما يضمن سرعة تحركها لمتابعة الحدث و يضمن سرعة نقل الحدث لمقر القناة ....

كل الحاجات ديه تعمل قناة "محترمة" و أقل من كده تبقي قناة لسه قدامها كتير ..... و أقل من كده تبقي قناة عادية ... و أقل من كده تبقي قناة تعبانة .... و أقل من كده تبقي قناة مصرية من اللي موجودين دلوقتي ....

أخ سيد .... إحنا منتظرين إنهم يمشوا ....

[elbana]

يا جماعة المناخ السائد بشكل خاص في مجال التلفزيون مناخ مخيف من حيث حجم المحسوبية والنفاق ، فمعظم إن لم يكن كل المذيعين والمعدين وغيرهم اتعينوا بالواسطة الواضحة والمحسوبية الرهيبة ، سواء في الرئيسي في ماسبيرو أو في القنوات المحلية بتاعة المحافظات ، والقنوات المحلية دي بقى مصيبتها مصيبة ، أنا سفت شباب بيتعينوا معدين برامج وهم خريجين علوم ، ومنهم اللي أبوه صاحب حاتي معروف يعينوه في قطاع الأخبار ، وبلاوي ، وف قناة من القنوات المحلية دول مثلاً متعين أصدقاء كتير ليّ ، ولقيتهم في يوم فرحي جايبين عربيتين ميكروباص وفريق تصوير كامل ومذيعيتين علشان قال إيه يصوروا فرحي وينشروه ، كل ده من غير ما أعرف ، ما هي تكية أبوهم ، والأنكى من كده ، لقيتهم بيتصلوا بيّ في البيت علشان يسألوني ح أخرج مع زوجتي فين النهارده بالليل علشان يروحوا هناك بالكاميرات ويقابلوني (صدفة) :? _ خدتوا بالكو _ فسألتهم : طيب وتقابلوني ليه ، وبمناسبة إيه؟ قالوا لي : يا سيدي نقابلك على إنك واحد من أبناء البلد المغتربين ونعمل معاك حديث عن قصة نجاحك؟!!!!!!

طبعاً ما كان مني إلا إني إديتهم درس محترم ، وقلت لهم التلفزيون ده مش تكية أبوكو علشان تعملوا كده ، وبدل ما تضيعوا الفلوس ووقت الناس في الفرجة الكلام الفاضي ده روحوا صوروا الشوارع المهربدة ، والبيوت الآيلة للسقوط ، واعملوا تحقيقات عن نواحي القصور والإهمال في المحافظة ، فردوا بمنتهى البساطة وقالوا إن رئيس القناة مانع أي كلام من ده ، وبتدخل من المحافظ شخصياً ممنوع أي برامج تتناول الموضوعات دي ... تخيلوا .. فطبعاً رفضت إنهم يقابلوني أنا وزوجتي وقلت لهم أنا لا يمكن أشارك في المسخرة دي :twisted:

قناة محترمة مين يا جماعة ، القناة المحترمة صعب تتولد في المناخ القذر ده .. الشباب اللي زي الورد المثقف المحترم مالي الدنيا والتلفزيون بتاعنا بيعين أهيف نوعية شباب موجودة علشان الوسايط ، وعلشان برضه تسطيح عقلية الناس ، المصورين وبتوع الديكور والإضاءة والفنيين مالهومش اي علاقة بالنواحي الفنية ولا ليهم أي ذوق فني ، والنتجية معظم برامجنا عبارة عن حاجة كده زي ما يكون اللي أخرجها فريق من نادي (فيديو العروسين) ..

الموضوع فعلاً لازم فعلاً يأتي منسجم مع السياق العام ، الإعلام بيعكس الحالة العامة للبلد ، مش ممكن يكون وضع الحكومة كده ويكون إعلامها محترم .

[Sherief AbdelWahab]

بعد تفكير عميق وجدت ان الحل المثالي يبدأ من البرلمان...من داخل مجلس الشعب...إذا وصل ضغط الرأي العام و المثقفين إلى داخل البرلمان يمكننا أن نقول أننا على أول خطوة في الطريق الصحيح...

صحيح أن الأمور كلها ستتم تسويتها على الطريقة الشاذلية ...لكن هناك من في الحزن الحاكم من يستشعر قوة الضغط وتأثيره...وربما يستصدر "من فوق" قرارا بتسهيل اجراءات الاستثمار في الاعلام بشكل عام و الفضائيات بشكل خاص...بدلا من القوانين العقيمة التي "تطفش" كل مستثمر من مصر تسول له نفسه عمل قناة على أراضيها!

و للأسف...يبدو أن كل مشاكلنا تنتظر حلا"من فوق"!...ولن نتقدم حتى يتوقف هذا الانتظار!

خلص الكلام

[1_Nadim]

ولن نتقدم حتى يتوقف هذا الانتظار!

خلص الكلام

صح

وبداية الحل اللي مش من فوق ان بعض المصريين يتعاونوا لعمل تليفزيون من الخارج يظهر حجم ضحالة التليفزيون الحكومي فلا يبقي امام اللي فوق الا انه يغير او يمشي

وعلي رايك

خلص الكلام

مع خالص تحياتي

[Lancelot]

و للأسف...يبدو أن كل مشاكلنا تنتظر حلا"من فوق"!...ولن نتقدم حتى يتوقف هذا الانتظار!

شريف عبد الوهاب جاب من الأخر ..... تقريبا أغلب مشاكلنا تنتظر حل "من فوق" .... مش لأن فوق هو اللي عنده الحل ... و لا هو اللي عنده الرغبة في الحل ... و لكن هو اللي عنده القوة لتنفيذ هذا الحل ....

في هذا الأثناء ... تبقي مهمتنا في تنبيه اللي فوق علشان نوصل لهذا الحل ....