موضوع جديد جدا - في ايه في المحفظة؟

[بنت شعنونة]

ههههههههههههههههههههههههههههههه

ضحكتوني لعى موضوع الحفاضات دا

انا برضه لما اخويا كان لسا نونو كان معايا دول

بس دلوقتي عربيتي هيا اللي ماااااااالياااانااااا زبالة بسبب الأستاذ الأوزعة :? :lol:

وكل العابي ودباديبي راحت بقدرة قااااااااادر على اوضته :twisted:

[Lancelot]

يا شعنونة .... يعني الراجل بيجمع نقط لحاجات كويسة .... مفيدة يعني .... أنا بأجمع نقط علشان شرايط الكاسيت ... إشتري خمس شرائط و إحصل علي السادس مجانا ... ده لو عربي .... و 3 شرائط و إحصل علي الرابع مجانا .... ده لو أجنبي .... كل شريط الواحد بياخد معاه كرت .. لكن للأسف جمعت كارتين و العرض خلص ......

كرت منهم لسه معايا في المحفظة ... و معاه كارنيهات الكلية (بتاع كل سنة تقريبا) .... و فلوس طبعا .... جيب السبع ما يخلاش .... إلا في الأزمات .... و شوية بيزنس كاردز .... و نوتة تليفون .... و نتيجة السنة اللي فاتت ... و شوية صور ... و تذكرة أتوبيس .... و كارنيه الحزام الأصفر بتاع الكاراتيه ..... كنت بألعب كاراتيه و أنا صغير ... و أي حد دلوقتي بيهجم عليا بالليل ..............

بأجري..

علي فكرة ... سؤال يروقني ليلا .... بتسألي ليه ... يعني لو لاقيتي محفظة واحد أو شنطة واحدة ... هتقولي اه ديه شنطة فلانة و ديه محفظة علانة .... و لا إيه الموضوع بالضبط ....

[Masrawy Abroad]

- رخص قيادة لثلاث دول (محسوبكم مايكل شوماخر :lol: )

- كارت المكتبة

- بطاقة فيزا وبطاقة صراف

- بطاقة التامين الصحي

- بعض فواتير الفيزا

- قصاقيص ورق بارقام تلفونات

- كروت شخصية

- 20 دولار

- 3 طوابع دمغة مصرية (مش فاهم هنا ليه!! :lol: )

- نتيجة صغيرة

- صورة خطيبتي :shock: :shock:

[Seafood]

ممكن إذا سمحتم .... إللي يكتب أن في شنطته أو محفظته كريديت كارد ... يكتب هوا نوعه إيه( فيزا أو ماستر كارد) ... و رقمه ...و يا ريت لو الإكسبايراشن دايت ... عشان أنا من هواة تجميع الأرقام دي ... و شكراً ...

[الطفشان]

ممكن إذا سمحتم .... إللي يكتب أن في شنطته أو محفظته كريديت كارد ... يكتب هوا نوعه إيه( فيزا أو ماستر كارد) ... و رقمه ...و يا ريت لو الإكسبايراشن دايت ... عشان أنا من هواة تجميع الأرقام دي ... و شكراً ...

دة تخصص جديد بقى يا سيفود و الا ايه؟

حاجة كدة دخل اضافي يعني بتقلب رزق؟

على العموم شركات كثيرة بعد انتشار الكروت المسروقة بقت تعمل verification على عنوان السكن، و انه يكون مطابق للي على ملفك، و دي حاجة مش موجودة في الكارت

[etreby]

ممكن إذا سمحتم .... إللي يكتب أن في شنطته أو محفظته كريديت كارد ... يكتب هوا نوعه إيه( فيزا أو ماستر كارد) ... و رقمه ...و يا ريت لو الإكسبايراشن دايت ... عشان أنا من هواة تجميع الأرقام دي ... و شكراً ...

:D :D :D :D

[kokowawa1979]

Seafood كتب: 

ممكن إذا سمحتم .... إللي يكتب أن في شنطته أو محفظته كريديت كارد ... يكتب هوا نوعه إيه( فيزا أو ماستر كارد) ... و رقمه ...و يا ريت لو الإكسبايراشن دايت ... عشان أنا من هواة تجميع الأرقام دي ... و شكراً ...

على فكرة نسيت البن كود اللي بيتكون من 3 أرقام علشان تقدر تشغله :D :D :D :D :D

[Lancelot]

صورة خطيبتي    :shock:  :shock:    

مصراوي أبرود .... طب صورة خطبيتك و فهمناها لكن ليه :shock: :shock: .....

أهم الأنباء .....

تحذير عام لكل أعضاء المنتدي ..... فقد رصدت الإدارة تحركات من العضوين seafood و kokowawa1979 ... تنبئ بتكوينهم لمافيا خاصة لتقليب الكريديت كاردز و الفيزا و كل الفلوس اللي معاكوا .... لما أظهروه من خبرة بأمور الأوراق المالية و كروت الإئتمان ....... المصدر رويتر و الأسوشيتدبرس و إيلاف و السي إن إن و الجزيرة و تليفزيون مدغشقر ......

:lol: :lol: :D :D

[Spider]

موضوعك يا شعنونة جه على الجرح وأسمعى حكايتى للآخر

من سنتين تقريبا قمت بشراء كام حتت قماش عشان افصلها بنطلونات...

وكان المتر غالى قوى بس انا قلت لنفسى الواحد حيعيش مرة واحدة أنشاالله ما حد حوش

رحت عند الترزى وفصلتهم وكانوا أيه 10 على 10

بدأت أستعملهم

حطيت المحفظة فى الجيب الورانى ذى ما حضراتكم عارفين...

بعد كام لبسه لقيت الجيوب من وره بدأت تفصد(ما حدش يقولى يعنى أيه تفصد)

رحت للترزى قلتله على اللى حصل وقلتله أنت ليه متبتش على الخياطة كويس :mad:

قالى معلش حعملهالك وكويس أن أنت جبتهملى هنا قبل ما الحكاية تتطور :lol:

وأعطيته كل البنطلونات اللى من القماشة الغالية عشان يعملهم وكلهم بالطبع الوان مختلفة :neutral:

مطولش عليكى

رحت أستلمهم لقيتوا تبت عليهم تمام ووراهملى قلتله الله ينور عليك يا باشا وربنا يخليهملك يا رب :D

رجعت البيت أبص عليهم تانى لقيته متبت عليهم باستعمال خيط لونه بنى كلهم بلا أستثناء :mad:

أستعوضت ربنا على القماشات الغالية ولبستهم ذى ما همّا :lol:

بدأت أحط المحفظة فى الجيب الورانى

القماشات رغم انها متبت عليها جامد بدأت تفصد تانى :shock:

نظرت الى المحفظة والتى هى بحجم الفيل وعرفت السبب

ومن يومها يا أخت شعنونة وأنا أتعقدت من لبس أأأقصدى شيل المحافظ بكل أنواعها وحتى لو فاضية بعد ما بوظتلى القماش الغالى اللى حيلتى

وعشان كده مش حقدر أفيدك كتير فى الموضوع ده لأنى بشيل كل حاجة فى حتة بس من غير محفظة

:wink:

[Cleo]

- المحفظة... بشيل فيها الرخص و البطاقة و تشكيلة من الكارنيهات (قديم على جديد).. صور للعائلة و الأصدقاء و كروت الفيزا

- كيس لما كان يسمى قديما فى مصر و حاليا فى البلاد الأخرى "فلوس" و كارت ال ATM

- كيس لل"عملات" المعدنية (ينفع لما تيجى تحاسب فى جراج العتبة و يقوم الراجل اللى على شباك الخزنة كل مرة يزنقك فى 10 ساغ تقوم تضطر تسيبله ربع جنيه بحاله... :shock: :shock: هو احنا بنحوش عند الكومة ولا إيه...!!!!!)

- نظارة شمس و نظارة نظر

- ماديلية فيها لوكشة مفاتيح (لزوم الشغل بعد الظهر.... :twisted: :twisted: :twisted: )

- سيلف دفنس

- كومة ورق و وصولات المانى ماشين يرجع تاريخها لعام مضى... :D

[linux]

مطوة :roll:

انتى دكتوره تخصص أيه؟ المدبح؟ :wink: :wink:

مفك!!! :shock:

لأ ... كده يبقى تخصصك سرقة عربيات :D :D

[linux]

  هو احنا بنحوش عند الكومة ولا إيه...!!!!!)

التعبير ده لفت نظرى ... اول مره اسمعه ... ده أسكندرانى ده ياموورسى؟

[الطفشان]

- سيلف دفنس

يعني ملكمة و الا قرن غزال زي شعنونة؟

و الا Mace اللي هو بخاخ الشطة دة؟

- ماديلية فيها لوكشة مفاتيح (لزوم الشغل بعد الظهر....    )

ممكن تعملي merger مع عصابة، قصدي شركة سيفود و كوكو واوا، و اهوه يبقى شقق و كروت و كله

[Proud Muslim]

لا أستعمل محفظة !! :?

بصراحة بتضايقني في اللبس .. مش عارف ايه لازمة المحفظة !!

الفلوس في الجيب .. و البطاقة -إن وجدت - في الجيب هي كمان .. و خلاص !!

طبعا .. بطاقات الائتمان .. نظام أمريكي فاشل ..يبقى ملهاش لازمة !! :D

و كذلك ال ATM زي بطاقات الائتمان .. يبقى نوفر مكان أكثر ..

:? :? :?

و رخص السواقة و الحاجات دي تبقى في العربية لأنها عرضة للضايع دائما مني !!

يعني .. لا فائدة للمحفظة !! :D :cry:

و لا ايه ؟؟

بس على فكرة مهم موضوع ال سيلف ديفينس ده للأخوات .. أنا فاكر إن أسعاره ارتفعت العام الماضي في نفس هذه الأيام تقريبا .. علشان السفاح الذي كان يقتل الفتيات !!

و كانت سوق سودا ..

ممكن كمان مطوة .. من نوع الأتوماتيك .. و قرن غزال تقضي الغرض ..

بس لو محترف يبقى butterfly هي الأنسب .. :twisted:

أو عصاية baseball ألومنيوم في شنطة العربية لتهشيم عظام الأعداء الغزاة !!

يفضل وجود سلاح ناري خفيف ..فرفر مثلا !! :?

و إن كنت أنصح بحتة M16 ظريفة ..يعني من باب أداء أحسن و أسرع و ألطف ( من باب الرفق بالأعداء ) !! :cry:

و بعد كده يقولوا العنف بينتشر .. فين ده يا جماعة !! :?

[وسام]

يفضل وجود سلاح ناري خفيف ..فرفر مثلا !!  :? 

و إن كنت أنصح بحتة M16 ظريفة ..يعني من باب أداء أحسن و أسرع و ألطف ( من باب الرفق بالأعداء ) !!  :D 

و بعد كده يقولوا العنف بينتشر .. فين ده يا جماعة !!  :?

:cry: :cry: :cry: :cry:

غريبة حكاية السيلف ديفينس اللى انتشر قوى الفترة الاخيرة و نفسى اسأل كل بنت شايلاه فى شنطتها هل اضطرت لاستعماله فى يوم ما ؟ عارف الاجابة حيقوللك الوقاية خير من العلاج

و مش بعيد يطلع علينا يوم فى خبر ان فتاة اردت احد معاكسيها قتيلا برشاش آلى كان بتاع دادى :cry: :cry: :D لانه حرق دمها فعلا بكلامه المش لطيف

نرجع لموضوع المحفضة

ممممممم لما اشوف فى ايه

- 2كارت للبنك (فيزا) و ATM للى بيسأل :D

- 2 كارت للتامين الصحى والرقم القومى

- 2 كارت الرخصة و ورق العربية

- 2 كارت نوادى فيديو (بلك باستر وفيديو ترون)

-2 كارت لتجميع النقط ( واحد للبنزين والتانى للقهوة...البنزين بتاعى)

- 4كارت بتوع حاجات هايفة و تليفون

- 1 كارت كلية

-1 كارت الاقامة

عدة كروت لشركات

فواتير شراء كتيرة قديم على جديد

مفتاح عربية احتياطى

فلوس كنديان تاير.....نفسى اخلص منها :mad:

اول عشرة جنيه اقبضها فى حياتى ..... للتفائل :D

1مليم قدييييييم من مصر .... دة قرش الحظ بتاعى :D

صور ليا و لوالدى رحمه الله

مصحف صغير جدا فى جيبى

و قصاقيص ورق عليها نمر تيلفونات فى مصر

و للامانة الميدالية فيها مطوة متنكرة بريئة المظهر لكن حادة زى المشرط :twisted:

بس كدة :D

[achnaton]

يفضل وجود سلاح ناري خفيف ..فرفر مثلا !! :?

و للامانة الميدالية فيها مطوة متنكرة بريئة المظهر لكن حادة زى المشرط :twisted:

:cry:

ودى بقى تنفع فى وقت الأزمات .. وخاصة الوظيفية أو الماليه .. ؟؟ أنا سألت نفسى السؤال ده .. يعنى الواحد يجيب زيها منين .. نفسى أقطع ريش غراب الخراب بمشرط .. :: :D :D : :cry: :cry:

[kokowawa1979]

مسلم فخور كتب :                  و رخص السواقة و الحاجات دي تبقى في العربية لأنها عرضة للضايع دائما مني !! 

يعني .. لا فائدة للمحفظة

طيب ياعم مسلم وإذا العربية كلها اتسرقت باللي فيها تعمل إيه ! :) :D :lol: :lol: :lol: :lol:

[se_ Elsyed]

أيه يا جدعان هو الواحد يغيب شويه عن مصر يحص كل ده ، أيه حكاية السلف ديفينس وأسلحة الدمار لاشامل اللى الجنس الناعم بيشيلوها دي ... لأ ده الواحد يخاف كده أحسن حاجة تفرقع فى وشه أو على الأقل ممكن ياخودلوا 111 على الماشي . :(

أنا بأه باشيل فى محفظتي ما قل ودل :

1- الإقامة ( واللى جه السعودية عارف هي أيه طبعاً ) يعني ال أي دي بتاعتي.

2- كروت الصراف الآلي . ( وهابعت أرقامها لسي فوود وكوكواوا على البي ام )

3- مفتاح اسبير للعربية.

4- ورقة فيها نماذج من توقيعاتي فى بنوك مصر والسعودية ( شوفتوا العبط . يعني الحرامي اللى هايسرق محفظتى مش هايغلب فى تقشيطي )

5- مبلغ 25 جنية مصري بقىلهم 4 شهور مكسل أشيلهم فى الدولاب ودول شايلهم علشان لما أنزل مصر أدفع أجرة عربية الشنط وكمان أجرة الناس الغريبة االلى فى المطار اللى كل ماتقابلك تقولك كل سنة وانت طيب مش عارف ليه.

6- دبلة الجواز ( لزوم التمويه )

7- اتنين كوبون جبنة لا فاش كري على أمل أنى أكسب عربية ( عشم أبليس )

[MuslimaEgyptian]

السلام عليكم،

أنا بقى بشيل حاجات كتير اوى من كترتها بتبقى قبه من على وش الشنطه وكل شويه تقع واتكعبل عليها وشغلانه بعيد عنكم

لما أديلكم نبذه:

-كتب كتب ثم المزيد من الكتب الدراسيه

-مفاتيح للشغل والعربيه ومن كترتهم ساعات بحاول أفتح العربيه بمفاتيح الشغل وبتبقى حكايه برضه :)

-كتاب أذكار صغير

-قرآن صغير

-كتاب احبه لقرآته لما أتزنق فى حته محتاجه أستنى فيها، عياده دكتور ولا حاجه.

-محفظه هتفرقع من اللى فيها: فلوس، شيكات، كروت ATM وخلافه (من غير أرقام) :D ، نمر تليفونات هامه، أحدث صور لبنات أختى ،وصولات لا تحصى ، قصاقيص لعبارات أقرأها فى مكان ما أعجب بها وأنقلها بسرعه، رخصه قياده.

-تذكره لمترو الانفاق :lol: وقصاقيص مختلفه من أماكن بها ذكريات فى مصر (لدرجه انى أحتفظ بكيس لبان Adams صغير فاضى نكهه الفراوله (إيه اللى انا بعمله ده..) :lol: شفتوا الغربه بتعمل إيه فالواحد

:(

-وسيله self-defense برضه :lol:، بس حاجه تعبانه كده. هى حاجه كده لو تعرض لى حد (يا مامى) أدوس على زرار كده يعمل صوت ربنا ما يوريك..يفقدك السمع تقريبا :lol:. بس حلنى بقى لما ألاقيها وسط الموال اللى أنا شايلاه. ربنا يستر ويحفظنا من كل سوء..بس بفكر جديا أشترى mace وخصوصا مع تنبؤات تصاعد العدوان على المسلمين مع موضوع العراق ...وهو عباره عن بخاخه صغيره كده لو حد قرب منك يكومه على الارض حتى ولو كان قد الفيل...وميخليهوش يشوف كويس (بينه وبين العمى درجات بسيطه) :twisted: أحسن!

:twisted:

-شنطه تانيه صغنونه فيها أشياء خاصه ..دبابيس زياده للحجاب،

وكده.

كفايه كده لحسن أنا حكيتلكم السيره الذاتيه لشنطتى:)

وأخيرا حد يعرف أشترى منين شوال شيك؟ :)

(أنا متهيألى دخلت الموضوع الغلط، انتوا بتسألوا على المحفظه ولا الشنطه) :D :D

[وسام]

ما شاء الله واضح ان العامل المشترك فى شنط حواء فى هذا الزمان هوا السيلف ديفينس وكيس دبابيس للحجاب (تستعمل كسلاح برضه) و كروت البنك لزوم تحويل الاموال من الاخرين

و ليه وجع القلب دة يأخت مسلمة ما تجيبى رشاش آلى ولا شوت جن لزوم الدفاع عن النفس و اهو بالمرة اشوفك فى نشرة الاخبار :)

استرها معانا يا رب :D