التجمع الخامس

[blbl]

سلام عليكم يا جماعة انا عضو قديم هنا بس كسول حبتين في المشاركة وبكتفي بالمتابعة.

عندي سؤال لو سمحتم. انا انوي شراء قطعة ارض لبناء عمارة لاسرتي في التجمع الخامس. وبصراحة عندي اسألة كتير:

1- يا تري ايه ارتفعات المباني هناك

2- ما هي نسبة المباني

3- يا تري ما هي ارقي منطقة هناك يعني انا بسمع اسامي كتير زي البنفسج والنرجس والخ الخ فما هي افضل منطقة

4- برضة انا قلقان من حكية الشراء بالتوكيلات فيا تري فيها قلق ولا مضمونة. ويا تري لو حبيت انقل ملكية في الجهاز بتتكلف كام

5-سؤل اخير يا تري التجمع احسن ولا اراضي المعراج والهضبة الوسطي

ولكم جزيل الشكر مقدما

[blbl]

ايه يا جماعة 130 مشاهدة ومفيش ولا رد

يا ساكني التجمع الخامس اي رد

[طه بدر]

علشان خاطرك انت بس هارد عليك مع انى مش من سكان التجمع ولكن للمعلومية

اولا بالنسبة للارتفاعات فهى تختلف من منطقة لاخرى فهناك مناطق الفيلات التى يسمح فيها بدروم وارضى واول فقط مع غرف السطح ويمكن زيادة دور بعد دفع 25% من ثمن الارض الاساسى

وهناك مناطق العمارات والتى يزيد فيها الارتفاع الى ثلاثة ادوار علوية والفيصل فى هذا الموضوع هو كراسة الشروط التى تحدد الارتفاعات فى كل منطقة

بالنسبة لموضوع التوكيلات فاذا كنت قلقان منها يمكنك عمل تنازل فى الجهاز وسوف تنقل الملكية لك فورا واعتقد ان الرسوم هى 10% من ثمن الارض الاساسى

وطبعا يجب قبل الشراء مراجعة الجهاز للتاكد من الملكية وان موقف الارض سليم قانونا لانى سمعت كلام عن بعض النصب الان وعلى كل حال الاحتياط واجب

مع خالص الدعاء بالتوفيق

تم تعديل 22 يناير 2008 بواسطة طه بدر

[طه بدر]

2- ما هي نسبة المباني

نسبة المبانى مثل الارتفاعات تختلف تباعا لمناطق وعلى حد علمى انها تتراوح بين 40 او 60 % من مساحة الارض وتزيد فى الادوار المتكرة 10% للبلكونات والتراسات

تم تعديل 22 يناير 2008 بواسطة طه بدر

[blbl]

شكرا جزيلا استاذ طه

[khalid]

شكرا جزيلا استاذ طه

احسن للك خذ في الاسكان الفاخر بالعبور المنطقة التاسعة لها مستقبل اكثر من ممتاز جامعة عين شمس سوف تنتقل هناك

http://www.egyptiantalks.org/invb/index.php?showtopic=47179

[blbl]

شكرا استاذ خالد طيب لو تكمل جميلك وتقولي يا تري المتر في المنطقة التاسعة بكام والارتفاعات ونسبة المباني كام.

[khalid]

اسكان عمارات

القرعة الاوفر يبد من 650 الف المميز افر 800 الف و التخصيص القديم المتر يبدء من 1400 ةو المميز 1600 مسموح بارتفاع بدروم ارضي و ثلاث و روف و في مجموعة بتبني هناك

[هشام عباس]

السلام عليكم

انا هرد عليك من خلال تجربه شخصيه انا مشتري ارض في التجمع الخامس من سنتين

وبالنسبه لأراضي العمارات دلوقتي في التجمع الخامس بقى سعر التر فيها حوالي 2500ج والمساحه في حدود ال600م وانت طالع لكن انا اشتريت في العائلي والمساحه هناك من 260 ولعاية 315م والبنا على 60% من المساحه والاوفر فيها دلوقتي بيبدأ من 300الف لغاية 500 الف وفيها مهلة بنا كبيره حوالي 5 سنوات وفي منطقة ابو الهول المهله اكبر من كده لأن المنطقه ديه لسه متسلمتش وادامها على شهر 6 الي جاي لما تتسلم وبالنسبه للتوكيلات فهي مضمونه وانا اشتريت عن طريق توكيل وعلشان تنقل الملكيه في الجهاز( وكلامي كله بالنسبه للعائلي) لازم تبني ولو البدروم الاول وهناك المنطقه جميله وراقيه جدا ومرتفعه عن الارض يعني الهوا هناك يجنن ولو عاوز تسأل عن اي حاجه هناك انا تحت امرك

ولك تحياتي

[blbl]

شكرا يا استاذ خالد تعبتك معايه. :lol:

استاذ هشام معلش استحمل اسائلتي الكتيرة.

طيب بالنسبة للعمارات الارتفعات اد اه وما هي ارقي منطقة فيهم

بالنسبة للعائلى بعد الاوفر وخلافه تقريبا المتر يقف بكام والارتفاع كام وسؤال غبي معلش هي العائلي ديه في انهي منطقة

واه رايك في منطقة ابو الهول ومهلتها ممكن توصل لسنة كام

[هشام عباس]

استاذ هشام معلش استحمل اسائلتي الكتيرة.

طيب بالنسبة للعمارات الارتفعات اد اه وما هي ارقي منطقة فيهم

بالنسبة للعائلى بعد الاوفر وخلافه تقريبا المتر يقف بكام والارتفاع كام وسؤال غبي معلش هي العائلي ديه في انهي منطقة

واه رايك في منطقة ابو الهول ومهلتها ممكن توصل لسنة كام

لأ ابدا يا سيدي انا تحت امرك

واسئلتك مش كتيره ولا حاجه

بالنسبه للعمارات في النرجس والبنفسج والياسمين بتكون بدروم وارضي واربع ادوار متكرره وارقى منطقه هناك على وجه العموم هي منطقة الشويفات وهي منطقة فيلات ومش عمارات انما امامها مباشرة منطقة الاحياء وهي راقيه جدا ولكن بوجه عام كل التجمع الخامس راقي ونضيف ماعدا مساكم الجهاز والاسعار في الاحياء مرتفعه جدا بيوصل فيها المتر على شارع التسعين ل 4000ج واقل مساحه للعمارات 600م ومفيهاش مهلة مباني اما في البنفسج والنرجس والياسمين فنفس الارتفاعات ومهلة البناء لغاية شهر 11 سنة 1008 والاسعار فيها حوالي 2500ج للمتر

اما عن العائلي فهي اكثر من منطقه وهي موجوده في منطقة المستثمرين الجنوبيه وديه فيها مهله لغاية 2013 وابو الهول 1و 2و 3 وفي التجمع الاول كمان فيه عائلي

اما عن رأيي في منطقة ابو الهول فأنا شايف انها ممتازه وانا اصلا مشتري فيها وهي بجوار منطقة العمارات في النرجس وامام المستثمرين الجنوبيه يعني مستوى الرقي فيهم هيي هيي نفسها اما عن المهله في ابو الهول

شوف يا سيدي ابو الهول اصلا لم يتم تسليمها وان شاء الله منتظر انها تتسلم بعد حوالي 5 او 6 شهور بأذن الله ومن يوم الاستلام بتبدأ في دفع 10 الاف جنيه للأستلام وبعد سنه تبدأ في دفع الاقساط السنويه وهي عباره عن اربع اقساط متوسط قيمة القسط الواحد حوالي 20 الف جنيه ومع انتهاء الاقساط اي بعد 5 سنوات من الاستلام بتنتهي فترة السماح بتاعت البنا يعني بحسبه بسيطه كده نقدر نقول ان مهلة البنا في ابو الهول حوالي 6 سنوات من الان اما بقى عن تمن الارض الاجمالي

فشوف يا سيدي انت بتدفع اوفر نقول 300 الف وبعد كده عندك 10 الاف استلام واربع اقساط × 20 الف يعني بعد ال 300 الف يبقى فاضلك كمان 90 الف وتكمل تمن الارض بالكامل يعني يبقى تمنها حوالي 390 الف ونقسمهم على المساحه الي هيي حوالي 300م يبقى المتر يقف ب 1900ج وزي ما قلتلك البناء في ابو الهول بيكون بدروم وارضي وثلاث ادوار متكرره ونص الروف

وانا تحت امرك في اي سؤال تحب تسأل عليه

ولك تحياتي

[هشام عباس]

انا اسف استاز blbl انا قلت ان القسط حوالي 20 الف لأ القسط 14 الف وبس يعني تقف الارض كلها بحوالي 370 الف مش 390 والمهله بتاعت النرجس والياسمين لغاية 11 / 2008 انا كنت كاتب 1008 معلش ديه بقى غلطه مطبعيه

ولك تحياتي

[blbl]

معلش سؤالين كمان:

هي المهلة دية للانتهاء من كافة اعمال المباني فقط ولا التشطيبات كمان

حضرتك قولت ان ثمن الارض تقريبا 370 الف نقسمهم علي 300 متر يبقي سعر المتر 1300 مش 1900 زي محضرتك قولت يا تري فيه خطاء ولا حاجة

وشكرا علي اهتمامك وردودك

[هشام عباس]

المفروض ان المهله ديه للأنتهاء من التشطيبات الخارجيه يعني شكل المبنى من الخارجوعمل السور الذي يحيط مساحة المبنى والجنينه وتشطيب السور حسب المواصفات المطلوبه

اما التشطيب الداخلي للشقق فلا يهمهم ابدا ولا يسألوا عليه المهم من الخارج

ولو فرضنا انك اتأخرت شويه بيدغعوك غرامه بسيطه حوالي 500ج وبيدوك مهله اضافيه 6 شهور

وانت صح بالنسبه لسعر المتر فعلا هيقف ب 1300 وعلى فكره لو انت جاد في الشراء الحق اشتري دلوقتي بسرعه قبل دخول الصيف علشان انا سامع ان الاسعار دلوقتي منخفضه كتير وهترجع تزيد في الصيف ولو تحب اي مساعده انا تحت امرك

[مصري أصيل]

اما عن رأيي في منطقة ابو الهول فأنا شايف انها ممتازه وانا اصلا مشتري فيها وهي بجوار منطقة العمارات في النرجس وامام المستثمرين الجنوبيه يعني مستوى الرقي فيهم هيي هيي نفسها اما عن المهله في ابو الهول

شوف يا سيدي ابو الهول اصلا لم يتم تسليمها وان شاء الله منتظر انها تتسلم بعد حوالي 5 او 6 شهور بأذن الله ومن يوم الاستلام بتبدأ في دفع 10 الاف جنيه للأستلام وبعد سنه تبدأ في دفع الاقساط السنويه وهي عباره عن اربع اقساط متوسط قيمة القسط الواحد حوالي 20 الف جنيه ومع انتهاء الاقساط اي بعد 5 سنوات من الاستلام بتنتهي فترة السماح بتاعت البنا يعني بحسبه بسيطه كده نقدر نقول ان مهلة البنا في ابو الهول حوالي 6 سنوات من الان اما بقى عن تمن الارض الاجمالي

فشوف يا سيدي انت بتدفع اوفر نقول 300 الف وبعد كده عندك 10 الاف استلام واربع اقساط × 20 الف يعني بعد ال 300 الف يبقى فاضلك كمان 90 الف وتكمل تمن الارض بالكامل يعني يبقى تمنها حوالي 390 الف ونقسمهم على المساحه الي هيي حوالي 300م يبقى المتر يقف ب 1900ج وزي ما قلتلك البناء في ابو الهول بيكون بدروم وارضي وثلاث ادوار متكرره ونص الروف

وانا تحت امرك في اي سؤال تحب تسأل عليه

ولك تحياتي

أستاذ هشام بعد التحيه

حضرتك بتقول أن أبو الهول لسه ما أتسلمتش وأن من يوم التسليم هتدفع 10 آلاف وبعد سنه تبدأ دفع الأقساط وبصراحه أنا ما عنديش فكره عن الأرض دي يعني هيه كانت قرعه واللي هيدفع ال 10 آلاف اللي كانوا حاجزين وفازوا ولا أيه الموضوع . ومعقول تكون الأرض بس ب 90 الف علي خمس سنوات ويكون الأوفر 300 الف وازا كان الموضوع زي ما فهمت فعلا هل يمكن الشراء من شخص لم يستلم الأرض بالفعل أرجوا التوضيح وجزاك الله كل خير.

[هشام عباس]

استاز مصري اصيل تحياتي لك

وردا على سؤالك بالنسبه لأرض ابو الهول لم تكن من اراضي القرعه وانما كانت بتتحجز من قبل اي شخص والكلام ده كان من حوالي 3 سنوات قبل موضوع القرعه والارض ديه اتحجزت بالكامل في خلال ربع ساعه من فتح الجهاز ابوابه للحجز وده طبعا معناه انها اتحجزت قبل ما يفتح الجهاز ابوابه!!!!!!!!!!!! يعني للمحاسيب طبعا

المهم ان الساده الافاضل الحاجزين قامو بدفع 15000ج مقدم للحجز واتخصصت ليهم الارض بالفعل بعد مده من دفع مقدم الحجز يعني كل واحد فيهم عرف مكان قطعته ورقمعا ومساحتها بالضبط

اما بالنسبه للأستلام فلم تسلم حتى الان ومنتظر انها تسلم في شهر 6 القادم ان شاء الله اما عن ال 10 الاف جنيه بتوع الاستلام فدول يعتبروا باقي المقدم وبكده انت بتشتري منهم وبتدفعلهم بدل ال 15 الف 300 الف وطبعا ده غير منطقي بالمره لكن هو ده الحال الان في هذه المنطقه

وبالنسبه لأنهم بيقدروا يبيعو قبل الاستلام فنعم بيقدروا وانا نفسي اشتريت من واحد من حوالي سنتين قطعه في ابو الهول 1 المنطقه ق ودفعت اوفر على ال 15 الف 190 الف انا دفعت 210 الف ولما استلم ان شاء الله هدفع ال 10 الاف وبعدين الاقساط الخمسه والشراء كان عن طريق توكيل بالأداره والتصرف واستخراج التراخيص ودفع الاقساط ولك شيئ متعلق بالأرض وكمان البيع للغير والنفس

وهذا التوكيل غير قابل للألغاء الا بوجود الطرفين وفي الجهاز بتعطيهم التوكيل وبموجبه لا يتم التعامل الا عن طريق من معه هذا التوكيل ولا يتم التعامل مع صاحب الارض الاصلي

كمان بيتعمل عقد بيع وبيكتب فيه المبلغ المدفوع وبيسجل في الشهر العقاري لكن لا يستخدم في الجهاز حيث انه لا يسمح بالبيع الا بعد رمي الاساس في الارض

ولو حبيت تسأل عن اي حاجه تانيه انا تحت امرك

[blbl]

استاذ هشام حضرتك فعلا فدتني كتير وربنا يسهل وهحسم امر الشراء قريب ان شاء الله.

امبارح وانا بدعبس علي النت لقيت فروق اسعار بيوصل ل150 الف ما بين ابو الهول 1 و2و 3 وكذلك منطقة ي وط وحجات كده طيب حضرتك عندك فكرة ايه الفروق.

حاجة كمان ابو الهول بتتباع تقريبا بسعر المستثمرين الجنوبى و المستثمرين الجنوبيه مستلمين الارض مش احسن اشترى منهم.

نقطه اخيره فى جنب ابو الهول الغابه المتحجره فى ناس بتقول انها ممكن تسبب مشاكل للمبانى.

[هشام عباس]

شوف يا سيدي اكيد فيه اختلاف بين اسعار ابو الهول 1و1و3 وذلك للأتي

1- بالنسبه لأبو الهول 3 هتلاقيها اقل اسعار وده بسبب قربها من المنطقه الصناعيه لأن المنطقه الصناعيه تحتها مباشرة

2- وابو الهول 2 فوقها على طول وفيها المنطقه التجاريه يعني في المستقبل ممكن تكون زحمه شويه

3- ابو الهول 1 اكثر تميزا لأنها بتطل على النرجس والمستثمرين وده معناه ان العمران قريب منها اكتر

اما بالنسبه للفرق بين ابو الهول والمستثمرين فهو فقط فترة السماح للبناء يعني لو انت مستعد انك تبدأ في البناء فورا فبالتأكيد هتكون المستثمرين احسن اذا كانت الاسعار هي نفسها في ابو الهول

اما لو كنت محتاج فترة سماح اكبر ولسه مش ناوي تبني فورا يبقى ابو الهول افضل علشان فترة السماح لم تبدأ حتى الان بالأضافه الى ان دفع الاقساط لسه عليه شويه

يعني موضوع الاختيار بيتوقف على استعدادك المادي

بس فيه ميزه اضافيه في ابو الهول وهو ان المنطقه ديه على ربوه مرتفعه وتقريبا شايفه التجمع كله انما المستثمرين شويه الارض فيها منخفضه واكيد الارض المرتفعه بيكون الهوا فيها افضل

وانا تحت امرك في اي سؤال ولا تتردد ابدا في سؤالي عن اي شئ خاص بالمنطقه ديه لأني زي ما بيقولو قتلتها بحث قبل الشراء وان شاء الله نبقى جيران

ولك تحياتي

[مصري أصيل]

استاز مصري اصيل تحياتي لك

وردا على سؤالك بالنسبه لأرض ابو الهول لم تكن من اراضي القرعه وانما كانت بتتحجز من قبل اي شخص والكلام ده كان من حوالي 3 سنوات قبل موضوع القرعه والارض ديه اتحجزت بالكامل في خلال ربع ساعه من فتح الجهاز ابوابه للحجز وده طبعا معناه انها اتحجزت قبل ما يفتح الجهاز ابوابه!!!!!!!!!!!! يعني للمحاسيب طبعا

المهم ان الساده الافاضل الحاجزين قامو بدفع 15000ج مقدم للحجز واتخصصت ليهم الارض بالفعل بعد مده من دفع مقدم الحجز يعني كل واحد فيهم عرف مكان قطعته ورقمعا ومساحتها بالضبط

اما بالنسبه للأستلام فلم تسلم حتى الان ومنتظر انها تسلم في شهر 6 القادم ان شاء الله اما عن ال 10 الاف جنيه بتوع الاستلام فدول يعتبروا باقي المقدم وبكده انت بتشتري منهم وبتدفعلهم بدل ال 15 الف 300 الف وطبعا ده غير منطقي بالمره لكن هو ده الحال الان في هذه المنطقه

وبالنسبه لأنهم بيقدروا يبيعو قبل الاستلام فنعم بيقدروا وانا نفسي اشتريت من واحد من حوالي سنتين قطعه في ابو الهول 1 المنطقه ق ودفعت اوفر على ال 15 الف 190 الف انا دفعت 210 الف ولما استلم ان شاء الله هدفع ال 10 الاف وبعدين الاقساط الخمسه والشراء كان عن طريق توكيل بالأداره والتصرف واستخراج التراخيص ودفع الاقساط ولك شيئ متعلق بالأرض وكمان البيع للغير والنفس

وهذا التوكيل غير قابل للألغاء الا بوجود الطرفين وفي الجهاز بتعطيهم التوكيل وبموجبه لا يتم التعامل الا عن طريق من معه هذا التوكيل ولا يتم التعامل مع صاحب الارض الاصلي

كمان بيتعمل عقد بيع وبيكتب فيه المبلغ المدفوع وبيسجل في الشهر العقاري لكن لا يستخدم في الجهاز حيث انه لا يسمح بالبيع الا بعد رمي الاساس في الارض

ولو حبيت تسأل عن اي حاجه تانيه انا تحت امرك

أستاذ هشام الف شكر علي التوضيح وبالتأكيد بعد شرحك الجميل مافيش أسئلة تاني والا أبقي طماع الف شكر مره تانيه

[قديم]

بأسعار متحركة من دولار إلي 100 دولار للمتر

أراض جديدة للاستثمار السياحي بالقاهرة و6 أكتوبر

كتب ـ طاهر يونس:

أعلن زهير جرانة وزير السياحة أنه تم الاتفاق مع وزارة الإسكان وبالتنسيق مع محافظتي القاهرة والجيزة علي تخصيص أماكن للاستثمار السياحي خصوصا في مدينتي القاهرة الجديدة و6 أكتوبر وذلك لاستيعاب الحركة السياحية الوافدة إلي مصر وتعويض نقص الطاقة الفندقية بالقاهرة خاصة مع زيادة الحركة السياحية إلي مصر وافتتاح المتحف الجديد عام 2011.

قال الوزير خلال المؤتمر الصحفي الذي عقده أمس الأول إنه تم الاتفاق مع مستثمرين بالقطاع الخاص علي إنشاء ما يقرب من 27 ألف غرفة فندقية جديدة بالقاهرة الكبري.. مشيرا إلي أن الحكومة المصرية تدعم كل المستثمرين الجادين بكل الطرق وفي نفس الوقت لم تسمح بالتلاعب بأراضي التنمية السياحية.. مؤكدا أنه تم علي مدي السنوات الثلاث السابقة سحب 17 مليون متر مربع من مستثمرين غير جادين وسيتم إعادة طرحها مرة أخري.. كما أن هناك عددا من المشروعات القائمة التي بدأ تنفيذ أجزاء منها وتوقفت، وهناك لجنة لتقييمها وتحديد موقفها لاستكمال تلك المشروعات حتي لا تتعطل مسيرة التنمية.

وأوضح جرانة أن حق الانتفاع بالنسبة لأراضي الاستثمار السياحي لا يتم تطبيقه إلا في شبه جزيرة سيناء فقط وإنما بقية أراضي التنمية السياحية علي مستوي الجمهورية فيتم تمليك الأراضي بعد الانتهاء من كل مراحل المشروع خلال المرحلة المقبلة.. مشيرا إلي أن هناك عجزا في الطاقة الفندقية بالقاهرة يصل إلي 11 ألف غرفة حيث أكدت عمليات الحصر أننا نحتاج في القاهرة الكبري خلال الفترة القادمة طبقا لمعدلات الزيادة السياحية إلي ما يزيد علي 12 ألف غرفة.

أوضح جرانة أنه تلقي بعض الطلبات من مستثمرين بالقطاع الخاص يؤكدون أنهم علي استعداد لإقامة العديد من المشاريع السياحية والفندقية بالقاهرة الكبري في حالة توفير الأراضي.

وأعلن الوزير وجود 4 أسواق سياحية كبري دخلت نادي المليون سائح إلي مصر العام الماضي وهي أسواق روسيا وألمانيا وبريطانيا وإيطاليا بينما جاءت فرنسا في المركز الخامس أقل من مليون سائح ثم أوكرانيا وهولندا والولايات المتحدة الأمريكية والسعودية وليبيا، مؤكدا أنه رغم عدم إصدار الاحصائيات الخاصة بعدد السياح والليالي السياحية بشكل رسمي حتي الاَن فإن المؤشرات تؤكد أننا تخطينا حاجز الـ 10 ملايين سائح بكثير وأننا اقتربنا من تحقيق المستهدف من البرنامج الانتخابي للرئيس مبارك بالوصول إلي 14 مليون سائح عام 2011 أي بعد 3 سنوات من الاَن.

وأضاف جرانة أن الطاقة الفندقية في مصر أصبحت الاَن 191 ألف غرفة وأن هناك 156 ألف غرفة تحت الإنشاء وتدخل الخدمة منها هذا العام 30 ألف غرفة، مشيرا إلي أن هناك اهتماما كبيرا بالعنصر البشري والبيئة باعتبارهما مفتاح السبق في التنافس السياحي.

وأكد الوزير أن هناك قواعد جديدة لتخصيص أراضي التنمية السياحية تتضمن أسعارا متحركة لتلك الأراضي وذلك طبقا لمعدل التنمية في المنطقة، وسيتم تخصيص سعر خاص لكل منطقة حسب تقييمها بمعرفة الخبراء، مشيرا إلي أن المناطق التي وصلت فيها معدلات التنمية السياحية إلي 80% من الممكن أن يصل سعر المتر فيها إلي 100 دولار والمناطق التي تصل فيها معدلات التنمية السياحية إلي أكثر من 50% من الممكن أن يصل سعر المتر إلي 50 دولارا، أما المناطق الجديدة التي تقل فيها معدلات التنمية عن 20% فيبقي السعر دولارا واحدا للمتر.

وقال إنه سيتم طرح الأراضي المخصصة للاستثمار السياحي مرفقا بها البيانات الفنية المطلوبة من المستثمر والأسعار المقررة والخبرة وغيرها من الإجراءات حتي لا يتقدم سوي من تتوافر فيه شروط الطرح.

المصــــــدر

اعتقد مثل هذا الخبر لازم يشعلل منطقه المدن الجديده وخصوصا القاهره الجديده

تم تعديل 1 فبراير 2008 بواسطة قديم