يوم غربة

[amrhoras]

تمر الايام واحده تلو الاخرى لا اجد فيها تجديد فكل يوم كسابقه

هل هذا ما يشعر به جميع المغتربين؟

اليوم هو ثالث ايام العيد هنا ولا اجد ماهو جديد اشعر باننى فى بقعة منسية من الكون انتهت الاتصالات مع من اعرف لحظة العيد ولحظات المعايدات واعود كما تعودت الى الوحده اقبع امام الانترنت لعدم وجود اى نوع من التسالى

ولكن اليوم يمر كانه شهر من اليوم فى بلدى هل هذا بسبب الوحده ام الغربه؟

افتقر الى صديق اتكلم معه الان وعندما يتواجد الصديق اجد ان الوحده افضل صديق لعدم التواصل مع احد لا اعلم لماذا هل اصبحت طبيعتى ام ماذا؟

هل تشعرون بمثل ما اشعر ام اننى فى طريقى الى الجنون؟

اليوم فى الغربة يختلف عن بلدنا ام انا فقط من يفكر هكذا؟

شكرا :lol:

تم تعديل 14 أكتوبر 2007 بواسطة amrhoras

[قاهرى]

نفس الاحساس والله يا عمرو .... وبجد زى منت قولت فعلا الوحدة هى افضل صديق

انت عارف اكيد انت شوفت وجربت تتصل بمصر سوء بالاهل او الاحباب وشوفت ازاى ان الشبكة مش عيزة تجمع من كتر الضغط عليها بسبب الاتصالات لمصر .. انت عارف والله تانى كان وقتها هيحصلى حاجة مقتش قادر اتحمل كونت عايز انزل وقتها مصر على طول .. مش عارف لدون الواحد ميصبر نفسو ان يسمع صوت اهلو كان ممكن يعيش ازاى ... الله يكون فى عونا بجد .

[amrhoras]

تخيل فى يوم عيد وتحس انك منسي احساس بجد حزين

يمكن اسرتى لا انما اصحابي كل واحد الدنيا شغلاه بس زعلت اوى لما مش عارف اكلمهم بسبب الشبكة وكل ماكلم حد يقولى والله كنت على بالى مش عارف هل ده صدق ولا لا بس الكلمة الطيبة ساعات بتفرحك وان مكنتش بدوم الا لدقايق

تخيلو بقالى 12 ساعة قاعد مبعملش حاجة مكلمتش اى حد اليوم وكل ما ارن على حد الشبكة مفيش والاخر الجوال بتاعى مفيهوش شبكه هههههه يعنى مقطوع خالص حتى الماسنجر عندى مشاكل فيه

طب لو الواحد حصله حاجة وده مش بعيد مثلا امبارح النور اتقطع قعد 4 ساعات والحمد لله انا عايش لوحدى مفيش حد حوليا على مرمى البصر الا المقابر قعدت اسلى نفسي بالنجوم هههه واعد الطيارات الجاية والماشية لغاية الساعة 3 الفجر وفكرت طب انا لو حصلى حاجة دلوقتى مين حيسأل فيا؟؟؟؟

لو مت مثلا هل حقعد كام يوم لا احد يعلم عنى شيء؟

انا بجد اسف بس انتو اقرب ناس ليا حاليا يمكن معاكم بكون صادق جدا كما لو كنت اتكلم مع نفسي واسف للرخامة والنكد ده

شكرا:(

[nash]

واضح أنها حاله عامه.... :lol:

لليوم الثالث علي التوالي نقضي العيد في البيت...اللهم مابعض التليفونات من بعض الأصدقاء للمعايده...

للاسف أولادي ليسوا بنفس عمر أولاد أصدقائنا لذلك لا يوجد أهتمام مشترك بين الأولاد ونضطر لقضاء العيد مع أنفسنا....

الحمدلله إستطعت الإتصال بحبايبي في مصر :lol: ...والجميل أن في أول يوم الذي هو يعد ثاني يوم عندنا...وجدت الجميع مجتمعين في البيت الكبير...بس للأمانه أقول أنهم كانوا يتذكرونني.......أو هكذا يقولون :lol:

تم تعديل 14 أكتوبر 2007 بواسطة nash

[رمضان]

الحياة بتكون زي ما احنا بنكون عاوزينها تكون

[The Cavalier]

الوحدة شئ فظيع بس ابقى حاول تشغل نفسك بحاجة وتلاقي اصحاب مصريين في المنطقة اللي انت فيها

[Tafshan]

كان هذا شعورى في سنه اولى غربه .. اعتقد يا عمرو انك جديد على الغربه !!

اول سنه كانت كئيبه فعلاً .. لكن الان انا الحمد لله بدأت اكون حياة اجتماعيه و اصدقاء و نمط حياة معقول خاصةً ان معى زوجتى و اولادى .. الحمد لله

الغربه يا عزيزي قدر و ليست اختيار .. لان من يرجع منها يجد نفسه مغترباً من جديد في ارض الوطن .. فلا مناص من الغربه .. لكن ما نحاول ان نفعله هو ان نتناساها و نتعايش معها .. لانه لا مفر منها ..

كل سنه و انت طيب ..

بالمناسبه انت فين ؟.؟؟

ممكن الحوارات تساعدك على تكوين صدقات تعينك على الغربه و قد فعلت معى هنا في الامارات .. تعرفت على شخصيات كلها عزيزه على قلبى و اقابلهم باستمرار ..

جرب !

[شعراوى ابو حديد]

اولا كل سنه وانت طيب ومش هاقولك معلش ولا الغربة ولا الكلام ده كله

هاقولك انت اكيد عندك صداقات فى بلدك وكونت علاقات يبقى تقدر تكون علاقات وصداقات فى مكان اقامتك وزملاء عملك واضحك للدنيا علشان الدنيا مابتحبش اللى يكشروا ولا تنسى رب اخ لك لم تلده امك وارجو ان نصبح اصدقاء ولا تنسى ان تعلمنا عن بلد الأقامة وفقك الله لما فيه الخير لك وابعدك عن رفقاء السؤ

اخوك شعراوى ابو حديد

[amrhoras]

للاسف المصريين اللى حوليا كلهم والحمد لله ناس قديمة جدا جدا وغاية فى التكبر حاولت اتعرف عليهم بس لقيتهم بايعين القضية

بالنسبة للصدقات الحمد لله صداقات كتيير جدا مصريين وسعوديين كتيير اوى بيزرونى باستمرار وساعات لو توفرت عندى سيارة بروحلهم او هم لما بينزلو فى المكان بتاعى لا بيجولى ونخرج سوا بس للاسف كلهم من الرياض او جده او الخرج خارج البلد يعنى داخل الدمام لا اجد

تانى حاجة انا بصراحة متعتى الكبيره المحاورات اصبحت كعاده يوميه من عاداتى التى اقوم بها كالمأكل والشاى ههههه

بصراحة بحبكم كلكم جدا اوى خالص ربنا يخليكم ليا ورب فعلا اخ لم تلده ام لك والحمد لله حاسس ان ليا اخوان واخوات كتييييير اوى

وشكرا لكل واحد شارك ولم يشارك فانا اعتز جدا بمعرفتكم بجد

اخوكم حورس

[seeem]

الحقيقة الموضوع ده بيمس جرح قديم فى القلب.

نفسي الاقي حد مصري قريب منى ازوره ويزورني.

ممكن يكون عنده اولاد فى نفس سن اولادي.

يمكن احلم زياده وبدل واحد يبقوا اربعة او خمسة

الواحد بصراحة مشتاق للمة

[صـــــقـــــر]

نفس الاحساس والله يا اخوانى انا داخل على شهرين فى الغربة واول مرة اعيد بعيد عن اهلى

بالرغم انى مع ابى الا ان احساس الوحدة قاتل قاتل .... ربنا يصبرنا ان شاء الله وكل عام وانتم بخير

[hazimhsn]

والله دا برضه إحاسي بالرغم من إني لي 3 سنوات لم أنزل مصر وده حال كل البشر أو الغالبية العظمى من البشر في الكويت الكل مشغول بالدوام يا إما في الدوام يا إما نايم يعني محدش فاضي لحد لدرحة إن يوم الأجازه بيبقى يوم ممل بشكل وطويل بشكل

وزي ما قال الأخ Tafshan الغربه دي قدر

وللإسف أصبحت الدنيا كلها مصالح لو واحد له عندك مصلحه تلاقية يحاول يعزمك وكل شويه يتصل عليك وهات يا ضحك وكلام المجاملات ( النفاق ) وبمجرد ما تخلص المصلحه ميتصلش عليك نهائي بعد كده

ولا نقول إلا كما قال سيدنا يعقوب عليه السلام ( فصبر جميل )

أما الناس في مصر فأعتقد إنهم زي ماكنا إحنا في مصر المغترب مجرد ما يسافر بيتنسي وبمجرد ما يقفل السماعة تاني يوم يتنسي.

تم تعديل 17 أكتوبر 2007 بواسطة hazimhsn

[justtrying]

ايه يا جدعان التشاؤم ده

بصراحة انا مجربتش الاحساس ده لكن مجرد التفكير في حجم المعاناه اليومية الي الواحد بيحسها في مصر من مشاكل ورشاوي ومحسوبية وقلة ذوق وعدم إحساس وعدم تقدير لشخصك يهون صعوبة الإحساس بالغربة بدليل كله زهق من الغربة وصعوبة الاحساس بيها لكن بيكمل في العمل خارج مصر لأنه عارف أنه لو دخل مصر هيساوي صفر بدون أي مبالغة فعلا هيساوي صفر .. فالبلد الغريبة قدرت مجهودك وإمكانياتك حتى ولو نقول بالقدر اليسير لكن بلدك مقدرتكش ومش هتقدرك ولو بعد ميه سنة ... بأمانة الحياه في مصر بءت زي الجحيم .. الواحد بيرجع البيت كاره نفسة رغم أن وربنا يشهد شغال شغلانه كويسة جدا بالمقارنة بأماكن كتيرة لكن كنظام واسلوب حياه وناس حوليك ومجتمع وبيئة وتعاملات بجد تحت تحت الصفر .. نسأل الله أن يهيئ لنا من أمرنا رشدا وأن يرحمنا ويرزقنا بالحلال الطيب المبارك

اللهم آمين والسلام عليكم

تم تعديل 17 أكتوبر 2007 بواسطة justtrying

[عطاء بلا حدود]

كل سنة وانتو طيبين العيد خلص

وانا لسا يادوب قريت الموضوع دلوقتي

انا بحمد ربنا ان العيد خلص

ده كأنه كان كابوس

بجد لما الواحد يفضل قاعد في مكانه اكتر من نص يوم لا يتكلم كلمة ولا بيشوف حد ده صعب اوي اوي

بال>ات لما نبقة عارفين ان احنا في عيد والناس هايصة وناس لايصة md2:

كنت كل يوم في العيد آخد العربية الساعة 6 او 7 وافضل الف لغاية 9 او 10 بالليل وهي دي خروجتي وياريت الواحد بيلف في اماكن مختلفة للاسف البلد صغيرة والمكان الواحد بعدي عليه 100 مرة عشان مفيش غيره هروح الصحرا يعني

لكن الحمد لله على كل شئ

[amrhoras]

تمر الدقائق الان فى ساعات لا أملك سوي فضاء شاسع من الرمال

الجميع نائم الان احساس جميل بل رائع اثناء المشي وسط الرمال لساعات كثيرة دون أن يراك احدا سوى البدر

منظر خلاب بتلاقى فيه ضوء القمر بالرمال الصفراء وتجد نفسك وحيدا وسط عالم من السكون

يجد البعض هذا جنون واجده سر من اسرار جمال الدنيا ارتاح كثيرا فى الخلاء واشعر بالحرية

اسنشق نسمات الصحراء والهواء صافى والتجوم لآليء تلمع فى سماء الدنيا

اجد كائنات تتحرك حولى وحياة لا يشعر بها انس حياه خلقت وكتب لها الرزق فى الظلام

سبحان الله رب العرش العظيم سبحان الله مالك الارض والسماء

هذا ما اشعر به الان كيوم ينقضى فى ايام غربتي بعيد عن ارض الواقع وبعيدا عن بشر كان

اجد صفاء ذهني وسط الرمال واجد راحتى عندما تداعب الرمال قدمى ويلامس ضى القمر وجهى

لا أشعر بالوحده بعد الان اجد صديقى ينير طريقي والصحراء مكان حياتى لاشعر اننى ولدت من جديد والذكريات انيسي والفكر رادعى دوما

وجدت الحياه مجرد لحظات تنقضي مهما طالت فهى اقصر مايكون يجري فيها ابن آدم جرى الوحوش فى البرية يفعل مايشاء لكن الله وحده القهار المطلع يكتب للدوده رزقها فى الصخر فلا يملأ عين ابن آدم سوى التراب .

اتعجب كثيرا ما سرا جمال الحياه لو عرف المرء حقيقتها ......لزهد الدنيا وتوقفت الحياه لكنها مشيئة المولى رب العالمين

يوم من غربتي 26/10/2007 الساعة 03:47ص ليوم الجمعة 14شوال 1428هـ

[ahmedarab]

بيتهيالى ان دة شعور عام لكل المغتربين وخصوصا اللى عايشين لوحدهم ..يعنى مش معاهم عيلة او زوجة

ربنا يصبرنا وزى ما قال الاستاذ طفشان الغربة قدر

كل ما افتكر العيد فى مصر واقارنة بالـ ما يسمى عيد هنا ....ابقى مش عارف اقول اية ؟!!!!

سلام بقى عشان اروح اعيط شوية

بالمناسبه انت فين ؟.؟؟

ممكن الحوارات تساعدك على تكوين صدقات تعينك على الغربه و قد فعلت معى هنا في الامارات .. تعرفت على شخصيات كلها عزيزه على قلبى و اقابلهم باستمرار ..

جرب !

طب يا عزيزى طفشان

بما انك كونت صدقات من خلال المحاورات و

بما انك بتعرض الفكرة دى على عمرو و

بما انك بتقابلهم باستمرار و

بما انك فى الامارات وتحديدا فى دبى ...

طب ما تحنوا علينا مرة ونتقابل بدل ما الواحد مش لاقى حاجة يعملة والزهق والملل محيط بيه من كل اتجاة وخصوصا فى ظروف الاجازات والاعياد؟؟؟

[amrhoras]

:wub: سؤال فى الصميم يا أ/ أحمد لأ/ طفشان انا جاى اهدى النفوس :)

الحمد لله أنا بدأت اتواصل مع اخين عزيزين عليا واصبح ليا اكثر من صديق هنا فى المملكة وفى مصر من خلال المحاورات وبعتز بيهم جدا جدا جدا

اتمنى ان المحاورات تكون محور لصداقة قويه بين اعضائها ونكون بنيان قوى يكتمل يوما بعد يوم

شكرا لكم جميعا

[ahmedarab]

كويس جدا يا عزيزى ا / عمرو

عظيم ان المحاورات تقدر تساعدنا فى تكوين صدقات وخصوصا فى الغربة

وانا معاك فعلا لما كنت بتقول ان المحاورات بقت حاجة اساسية زى الاكل والشرب

اما بالنسبة للسؤال فاتمنى ان الاستاذ طفشان يقراة لحسن فعلا ساعات كتير قوى الواحد بيكون محتاج لحد يقعد يتكلم ويدردش معاة

تحياتى ليك وبالتوفيق فى صداقاتك الجديدة

[sameh elbosaty]

أيه يا عم عمرو ؟ مالك مغمقة ليه يا أخى ؟

هى المسألة كلها بسبب الوحدة ؛ لكن أنت لو قدرت أن تلاقى أصدقاء هتلاقى الوضع مختلف

وتقدر تعمل ده ؛ من خلال عملك ؛ جيرانك ؛ ولو مفيش ده ولا ده ؛ تقدر تعملها من المنتدى هنا أنك تتعرف على ناس وتتقابلوا ؛ أو انك تروح نادى المصريين فى استراحة الكبرى فى السلى ( جمعية النادى المصرى ) تتعرف على ناس وتلعب رياضة وتجلس جلسات حلوه ؛ وتحس فعلاً بالمجتمع المصرى هناك

جرب وإن شاء الله هتكسب موش هتخسر

بس ابقى ادعيلى

تم تعديل 31 أكتوبر 2007 بواسطة sameh elbosaty

[amrhoras]

عزيزى سامح الدنيا يا صديقى يومان يوم لك ويوم عليك

لازم يكون في شويه انكسارات كى تشعر بنجاحك فى يوم من الايام انشا الله

اما بالنسبة للاصدقاء عندى والحمد لله الكثيرون جدا جدا جدا لكن والوحده معى ليس لها علاج

اما بالنسبه للالوان الغامقة دى مجرد اممم زى ماتقول اوقات ضعف بتروح وبتيجي

بالنسبة للنوادى مفيش وقت والحمد لله كمان انا خارج الدمام يعنى صعب انى اخرج بعد الدوام لانه بمعنى اصح بيخلص 9 مساءا

اه للعلم انا والحمد لله اللون يمكن غامق عشان المقابر قريبة منى :)

شكرا لمرورك الطيب