السعوديون يطلبون 120000 شغالة مصرية ، و الوزيرة توافق

[se_ Elsyed]

يعني ايه الحوار بالظبط يا سي السيد.

فيه توريد جواري ولا مفيش توريد جواري.

و ايه الكلام عندكو في السعودية عن الموضوع دة

المصريين هناك بيقولوا ايه

ما فيش بإذن الله

ولو عيوشه قلت عقلها تاني .. أقسم بالله لنفضحها فضيحة اللحمه المتعلقة في السوق

كفايا ذُل وقرف بقى .. مش هاتبقى هي ورئيسها علينا

[eskanderani]

منقول عن موقع مصراوى :

تضارب في تصريحات المسئولين حول عمل الخادمات المصريات بالسعودية 5/29/2007 4:28:00 PM

القاهرة - محرر مصراوي - نفت السفارة المصرية بالسعودية حدوث أي تغيير فيما يتعلق برفع الحظر علي استقدام الخادمات أو العاملات المنزليات المصريات للعمل بالخارج بما فيها دول الخليج..

استكمالا لمسلسل الاستهبال الحكومي...التصريح اللي فوق دة معناه ايه بالظبط؟

"نفي حدوث تغيير فيما يتعلق برفع الحظر علي استقدام الخادمات"

هل معناه ان "الحظر" اللي هو كان الوضع الأساسي , مش حيتغير الى وضع "رفع حظر" تنفيذا لاتفاق المعلمة؟

ام ان المقصود ان الحظر اللي "رفعته" المعلمة عيوشة في اتفاقية التوريد مش حيتغير تاني الى حظر؟

[se_ Elsyed]

بالتأكيد الأمر قد أثار أستياء الجميع بالسعودية .. واعتقد في غير السعودية أيضاً

فهو حق أردوا به باطل

فحماية العامل المصري أياً كان .. هو حق

لكن الباطل ان تحل مشاكلك الإقتصادية المزمنة عن طريق رمي أبناء وبنات الشعب في الجحيم

ريسنا أتورط توريطه ما يعلم بها إلا ربنا .. لما أنسحب من لسانه ووعد بتوفير ملايين من فرص العمل للمصريين

عدت سنتين دلوقت وما شوفناش حاجه

طب والعمل يا ولاد .. نعمل إيه .. ونسوي إيه .. ... ايوه أفتكرت ... حد ينده لنا المعلمة عيوشة من حمام التلات يا رجاله

وجت عيوشه :

عيوشه : نعمين يا ريس .. أؤمرني ... بأبي أنت وأمي يا ريس

مبارك : تسلم لي هالعوينات ... بأقولك يا عيوشه ... أنا مزنوق في وظايف لمليون راس سكت بهم الشعب .. من هنا لحد 2010 .. لإن دي السنة السودا اللي فيها إنتخابات مجلس الشعب .. وبعدها سنة أسود وفيها إنتخابات الرياسة .. ومش عايز عيل مفعوص زي أيمن نور .. ولا كهل زي نعمان أبو جمعه ينط لي في أم العملية ويقولي .. فين وعودك يا مبارك ؟

عيوشه : أيوه يا ريس .. هو حضرتك ناوي تعيش لحد 2011 ؟

مبارك : نعم بتقولي إيه ؟ ... لأ مش قصدي حاجه يا ريس .. أنا قصدي إن العملية في مصر ناشفة .. والقطاع العام وبعناه .... وتوشكى وخربت ... وأراضي المدن اجديدة ورهناها ... أشغل الجرمأ ده كله فين ؟

مبارك : نعم يا روح طنط .. هو أنا جايبك القصر هنا عشان تسأليني ... إتصرفي يا عيشه .. بدل ما أركبك الطفطف وأقول للناس عيوشه انتحرت يا رجالة

عيوشه : طب سيبني قد يومين يا ريس .. أشاور فيهم الحريم اللي شغالين معايا في حمام التلات وأرجع لنيافتك بالحل الأكيد

وبالفعل أوفت عيوشه بوعدها وبعد يومين جاءت للكبير وفي يدها ورقتين ... فيهم الشفا

الريس : هــــا وشك بيقول حاجات كتير يا يوشه ... خير يا طير ؟

عيوشه : إنت عارفني يا ريس .. ده أنا تربيت إيدك ... وعيوشه لما تحط مناخيرها في حاجه .. يبقى يالله السلامه

الريس : إنجزي ولخصي ... أنا المفروض أقابل رئيس دولة فولتا العُليا كمان ساعة لبحث العلاقات الثنائية بين البلدين وسُبل دفع عربية السلام في الشرق الأوسط

عيوشه : ماشي يا كبير .. بقى بالصلاتو عالحبيب يا كبير .. أنا شايفه إن في عوق وقلق اليومين دول بين السعودية والفلبين ... والوليه المخبولة رئيسة الفلبين عملت فيها فتحيه كرامة ومنعت الخدامات إنهم يروحوا السعودية من يناير اللي فات .. فقلت أدخل اهدي النفوس بينهم وأقدم انا عرض في المناقصة دي واضرب أسعار الخدمات هناك

الريس : يا بنت العفريته .. إزاي ؟

عيوشه : قلت لي إزاي .. بقى الموضوع فيه طراطيش كلام إن الفلبين راسها وألف جزمة إن أقل خدامه فلبينينة سفروته ما تاخدش أقل من 1500 ج .. وكل عيله سعودية عايزة خدامه .. لازم تروح السفارة وتسيب عنوانها ووسائل الإتصال بيها هناك عشان يلحقوا الخدامة لما تحصل أي مصيبة ... والسعوديين بني وبينك زمزؤا من الموضوع ده .. وقالوا إن الـ 1500 مش واكله معاهم ... قلت أنا أنزل بالتقيلة وأورد لهم مليون راس على 800 ريال .. واهو نبقى شيلنا شويه من البلد وجيبنا عُملة صعبة .. ووثقنا العلاقة بين البلدين .. ويكن ربنا يوفق ويحصل في جواز وعيال إن شالله عُرفي حتى .. واهو شيلني وشيلك ... ويا حلوه يا بلحه يا مأمعه شرفتي إخواتك الأربعة ...

اريس : عفارم يا عيوشه ... صحيح اللي خلف ما مامتش ... بس تفتكري أبناء الشعب البواسل هايسكتوا لما يعرفوا إن إحنا هانصدر خدامات للسعودية ؟ أنا قلبي متوغوش يا عيوشه وخايف من الحراك السياسي ييجي على دماغي ودماغ إبني جمال .. ده الواد لسه في شهر العسل ومش عايز اي حاجه تجرح أحاسيسه

عيوشه : ما عاش اللي يجرح أحاسيس إبن سيد الناس .. طب وكتاب الله اللي يحاول يجرح أحاسيس جيمي لأكون مطلعه المطوة وشقاه نصين .. يا ريس إحنا هانقولهم إننا هانصدر الستات دول يشتغلوا مدبرات منزل او كمريرات او جليسة أطفال او راعية غنم قصدي راعية مُسنين ... وبعدين عليه الطلاق لو قلنا لهم إن إحنا هانصدر خدمات برضوا هايسكتوا وهايبلعوها ... ما هم ساكتين بقى لهم 26 سنة لحد ما لسانهم تيبس وقرب يقع إشمعنى هاييجوا دلوقت ويتكلموا ؟

الريس : إذاً .. على بركة الله .. وتأكدي بان روحي وعقلي ودموعي وأبتاساماتي تحرسك في كل خطوة سودا إنتي بتمشيها ... إطلعي خديلك 150 ج مكافأة من زكريا عزمي الكاشير .

[عبدالله عكاشه]

اخى العزيز:

السلام عليكم.

قد يكون رأى فى هذه القضية كما يسموه الافنديه رجعيا ومتخلفا عن الركب الحديث فيما يتصف بالامبدئية نحو عمل المرأة ولكن هذا رأى ان اصبت فأجران وان أخطأت فأجر ولله الحمد.

ان عمل المرأة من الاساس فى مجتمع كمجتمعنا العربى لا يرتب الا اخفاق فى شتى النواحى وهذا ليس تقليل من شان المرأة وانما رأفة بها ورحمة واليك الدليل .

من من الرجال يستطيع ان يوافق بين عملة واعمال المنزل وتربية الاولاد،؟ بمعنى هل يستطيع اى منا ان يبدأ يومه بإيقاظ الاولاد وتجهيز ملابسهم المدرسية واعداد فطارهم وسندوتشاتهم وتوصليهم الى المدرسة ثم يذهب الى عملة فؤديه على الوجه الامثل ثم يعود الى البيت بصحبة الاولاد ليجهز لهم الغداء ويراجع معهم دروسهم ويسامرهم ثم يرتب احتياجات المنزل حسب المتاح ثم العشاء ثم ثم ثم الى آخر ما يعلمه الجميع من التزامات الاسرة ,

لااظن ان هناك رجلا يمكنة القيام بهذا العبء اذا لماذا دفعنا المرأة الى تحمل هذا الذى لاتطيقه الرجال من المؤكد ان النتيجه النهائية لهذا العبث هى ضياع الاسرة وضعفها وانعدام القدرة على التعايش المستقر الذى هو نفسه الغايه من الزواج ، ومع انحطاط المستوى الاجتماعى تكون المرأة ايضا هى الوسيلة لتوفير العملة الصعبة و اعتقد ان ما نشهد علية هذه الايام هو الباطل الذى يلبسونة بالحق وصدق الله إذ يقول " قل هل ننبأكم بالاخسرين اعمالا الذين ضل سعيهم فى الحياة الدنيا وهم يحسبون انهم يحسنون صنعا"

[مهيب]

الأخ عكاشة .. ليس عن هذا نتحدث .. و الموضوع ليس عن عمل المرأة و ما الى هذا .. نحن نتحدث عن قضية و كارثة على وشك الوقوع ... الرجاء عدم الخلط و اخراج الموضوع عن مساره .. و الرجاء منك هو قراءة الموضوع قبل التعليق ... و شكراط

أرجو أيضا من الأعضاء المعلقين من بعدى تجاهل هذا التعليق ... و لنعد للسياق

مهيب

[نورت مصر!!!]

خلاص هوا ده الي ناقص

بعد ما السعودين بيعيرونا ببنات الليل وبائعات الهوا في مصر ومغامراتهم وغزواتهم مع بنات مصراثناء الأجازات الصيفيه لهم في مصر خلاص الموضوع قد لا يقف عند هذا الحد وانتم عارفين الباقي

وعليه العوض ومنه العوض

[darlengs]

تسلم ايدك يا سين سين الحوار اللي كتبته رائع 00واقعي جدا 00فطستني من الضحك و انا لسا مصدومه من موضوع منع الكويت تحويل الاقامه للمصريين 00 يا رب الواحد بس هيلاقيها منين ولا منين 00حسبي الله و نعم الوكيل 00 رضينا بالغلب و الغلب مش راضي بينا 00

[Folana]

السلام عليكم ورحمة الله....

الله يمسيك بالخير يا أبا عبرحمان....وعبد الرحمن ده يا سادة ياكرام كان المخدماتى اللى بيورد البنات للعيلة علشان يساعدوا فى الاعمال المنزلية...وكان بياخد 200 جنيه حلاوة على كل بنت...والتسعيرة كانت معروفة حسب السن...يعنى 12 سنة بتاخد 300 جنيه – الكلام ده من عشر سنين – والاكبر شوية بتاخد 450 – 500 جنيه...

كان رجل طيب معاه الاعداية برضه.......وأى اختلاف فى وجهات النظر بين ربة المنزل وبين البنت اللى بتساعدها ..يجى ابا عبرحمان ياخد البنت او هى تهرب وترجع لاهلها على طول وراحت عليك الحلاوة...يعنى تشعر كده انه بيتاجر فى الحمام الزاجل ..

اليومين دول ..اى واحدة بتيجى تساعد فى الاعمال المنزليه – وكلنا اخوة فى الله طبعا - ..بتاخد فوق الالف جنيه...- ده حقيقى – غير بقى السلفيات والمواصلات واللى تعبان واللى غضبان...وشروطها المجحفة بانها حتمشى فى وقت معين..ومش حتيجى اليوم الفولانى...وجوزها حلف عليها يمين طلاق ماهى نازلة الشغل ..ولا امها وحشتها – لو مقيمة – وماتقدرش تستغنى عنها..الى اخره..ده غير التلفيات اللى بتحصل ...ولهذا نجد معظم الاسر القادرة ماديا بتستقدم جنسيات اخرى للعمل عندها على الاقل حتبقى ضامنة النظافة والاستمرارية...

لدرجة انى وانا باتابع الموضوع كنت عايزة اطلب من حضراتكم كارت توصية للست الوز زيرة تسلفنى واحدة من الكونتينر ده.....- حقيقى انا مش عارفة حتجيب العدد ده منين !!.....طبعا غالبا حيكون هناك شروط للمتقدمة للسفر ..واظن اقلها انها تكون حاصلة على شهادة متوسطة ...يعنى اعتقد برضه هم مش حيقبلوا اوراق وطلبات اى شغالة مش مؤهلة...والا حتبقى حاجة كده عاملة زى عمال التراحيل - حد فاكر فيلم الحرام ؟ -

..دى حتبقى حاجة حكومى....ومن هنا حيفتح الباب على مصراعيه لكل اللى ذكرتوه حضراتكم....

حبيت بس بالمقدمة دى انى اوضح وضع الشغالة فى البلد...نعم هناك من يسيئون معاملتهم ولكنهم قلة..فى الغالب دلوقت صعب جدا انك تلاقى واحدة تيجى تساعد او تكون مقيمة فى البيت..ومافيش كمان سيدات بتقوم برعاية المسنين..الا قلة قليلة...وده عن تجربة ايضا...

نرجع للمهم...اذا هى فعلا زى ماقالت حاطة العمالة المصرية فوق رأسها...( بس هى ماوضحتش هم فوق راسها فى مشنة يعنى للبيع ولا فوق راسها حبا واعزازا ) ...كنت باقول اذا هى بتدور على مصلحة هؤلاء فعلا...ايه المانع انها تهتم بهم جوه بلدهم..يعنى تفتح مكتب تشغيل لهم – تحت اى مسمى مناسب – والاسر المحتاجة عاملة نظافة او جليسة مسنين او غيره..تتقدم للمكاتب دى ...وتعمل لهم تأمين ومعاشات كمان....ليه لأ...

واهو لو الست تقدم بها السن ولم تعد قادرة على الاعمال المنزلية الشاقة تضمن لنفسها معاش تاكل منه وتصون كرامتها المتبقى لها من العمر...

وفى نفس الوقت يبقى ضمانات للطرفين..للاسرة وللعاملة...ويبقى اسم الست عيشة برضه عملت حاجة كويسة لولاد بلدها...اللى هى مهمومة بهم.....وصانت كرامتها قبل كرامتهن......

تفتكروا ده حل وارد..ولا انا بأخرف من تأثير الامتحانات... :blink:

والله يمسيك بالخير يا دكتور ابويا عبد الرحمن..... :closedeyes:

[badroora]

طيب است عيشة مالها ومال الممرضات !!!

الممرضات لا يخضعوا لوزارة القوى العاملة !!!

ثم اساسا دى عندها نقص شنيع فى الممرضات ازاى تصدر عمالة للخارج وهى عندها المستشفيات بتنزف من نقص شديد فى التمريض !!!

ومن باب اولى يغطوا عدد ممرضات القصر العيني دول بيشغلوهم اضافي بعد الضهر بسبب النقص الشديد !!!

والفرنساوى يعنى نص الممرضات اللى فيه شغالين بعقد خاص !!

لان الممرضات اللى زى وتكلفهم كان فى الفرنساوي طفشنا وسبنلهم الدنيا !!!

ورافعين علينا قضايا بسبب ان البلد محتاجانا واحنا مش راضين نرد الجميل ليها ونشتغل !!

يبقي ازاى عاوزين يرجعونا نرد الجميل وهما اساسا مسفرنهم برة !!

حتى صحة الناس مبقاش ليها اى قيمة !!!

يهمها اوى السعودية عدد التمريض يكمل فيها عشان كل مريض ينال الرعاية المفروضة وفى بلدها المستفيات نقصة فى التمريض دا المريض لو شاف الممرضة وقت العلاج ولا الابر يبقي فضل وعدل بسبب الزحمة والممرضة الواحدة بتبقي مسئولى عن يجي 15 عيان او اكتر !!!

على الاقل السعودية على فلبها قد كدا وتقدر تجيب تمريض عمالة من دول تانية اما فى مصر احنا مش لاقين ناكل وكمان مش هنستورد تمريض ازاى نورد يا است عيشة منك لله !!!

تم تعديل 30 مايو 2007 بواسطة نجفة المغرورة

[amrhoras]

هى دى امى وامك واختى واختك وبنتي وبنتك

قاعدين نشقى ونتعب نبني ونرفع

كرامة شعب كرامة امة

بحبة حبر

قتلت عيشة عزم الشعب

لسة ولسة

يجي نظيف يصرخ ويقول

هاتى يابت القسمة بتاعتى

وعم مبارك قاعد فوق

يبص ويضحك عالسبعين مليون

حقيقى يامصر مبارك عليكي مبارك

واحنا ضيوف عند حكومتك

خلص الدم فحرب اكتوبر

علشان نبدأ عصر جديد

مهانه وذل وقله قيمة

نسمع بكره صرخة طفل رضيع

يبكى ويقول ايش لونكم وينه ابوى

اجرى ياعيشة دم خدمنا فى رقبة اهلك

دعوه يقولها 100 مليون

كلها سنه ولا اتنين ونوصل خلاص ل100مليون

وعصر الجوارى خلاص حيرجع

ويجي القاضي ينادى ويقول

يسجل طفل بدون الأب وعلى المتضرر تكاليف الزل

بذمتكم هى دى مصريتكم

بذمتكم عوزين وقفة

بذمتكم تعبت خلاص

ناقصين احنا قضايا جديدة مش كفاية فسادها

ناس تسرق وناس يكلوها ولعة

وناس تحمد ربنا على احوالها

لا تعليق

[badroora]

هى دى امى وامك واختى واختك وبنتي وبنتك

قاعدين نشقى ونتعب نبني ونرفع

كرامة شعب كرامة امة

بحبة حبر

قتلت عيشة عزم الشعب

لسة ولسة

يجي نظيف يصرخ ويقول

هاتى يابت القسمة بتاعتى

وعم مبارك قاعد فوق

يبص ويضحك عالسبعين مليون

حقيقى يامصر مبارك عليكي مبارك

واحنا ضيوف عند حكومتك

خلص الدم فحرب اكتوبر

علشان نبدأ عصر جديد

مهانه وذل وقله قيمة

نسمع بكره صرخة طفل رضيع

يبكى ويقول ايش لونكم وينه ابوى

اجرى ياعيشة دم خدمنا فى رقبة اهلك

دعوه يقولها 100 مليون

كلها سنه ولا اتنين ونوصل خلاص ل100مليون

وعصر الجوارى خلاص حيرجع

ويجي القاضي ينادى ويقول

يسجل طفل بدون الأب وعلى المتضرر تكاليف الزل

بذمتكم هى دى مصريتكم

بذمتكم عوزين وقفة

بذمتكم تعبت خلاص

ناقصين احنا قضايا جديدة مش كفاية فسادها

ناس تسرق وناس يكلوها ولعة

وناس تحمد ربنا على احوالها

لا تعليق

تسلم ايدك والله انجزت القضية فى كلماتك

وحلوة اوى ايشلونكم وين اوبى دى !!! :closedeyes:

منك لله يا عيشة وحسبي الله ونعم وكيل فيك يا مبارك !!

[Handicraft]

نرجع للمهم...اذا هى فعلا زى ماقالت حاطة العمالة المصرية فوق رأسها...( بس هى ماوضحتش هم فوق راسها فى مشنة يعنى للبيع ولا فوق راسها حبا واعزازا ) ...كنت باقول اذا هى بتدور على مصلحة هؤلاء فعلا...ايه المانع انها تهتم بهم جوه بلدهم..يعنى تفتح مكتب تشغيل لهم – تحت اى مسمى مناسب – والاسر المحتاجة عاملة نظافة او جليسة مسنين او غيره..تتقدم للمكاتب دى ...وتعمل لهم تأمين ومعاشات كمان....ليه لأ...

واهو لو الست تقدم بها السن ولم تعد قادرة على الاعمال المنزلية الشاقة تضمن لنفسها معاش تاكل منه وتصون كرامتها المتبقى لها من العمر...

وفى نفس الوقت يبقى ضمانات للطرفين..للاسرة وللعاملة...ويبقى اسم الست عيشة برضه عملت حاجة كويسة لولاد بلدها...اللى هى مهمومة بهم.....وصانت كرامتها قبل كرامتهن......

هذا بيت القصيد إيجاد آلية لحماية هؤلاء فى الداخل والخارج بما يكفل لهم دخل آمن وبما يصون كرامتهم ويحفظ حقوقهم .... وهذا هو الهدف الأسمى الذى يجب ان نجتهد لتحقيقه.

أرفع لك القبعة على كل كلمة فى مداخلتك.

[Folana]

السلام عليكم ورحمة الله...

بارك الله فيك اخى الفاضل Handicraft.........

طالعت اليوم فى جريدة الاهرام مقالا بعنوان " طاقة ضوء"..يعرض الافكار التى تم عرضها هنا فى المنتدى.....وهذا يعنى ان هناك بالفعل من يهتم لاراء المصريين ويعمل على توصليها للرأى العام...او ان الدنيا لسه بخير فعلا وهناك الالاف غيرنا يفكرون بنفس المنطق.....اسمحوا لى اعرض جزء من المقال على حضراتكم...

"حماية لهن ... نحن اولى بها "....

....................................................كما أن السوق المصرية فى واقع الامر تحتاج لتلك العمالة النادرة وبأعداد كبيرة خاصة لو كانت مدربة فوظيفة مديرة منزل فى مصر يمكنها حل مشاكل عدد ليس قليلا من العائلات المصرية التى لا يمكنها ان تدير اعمالها بشكل مستقر نتيجة عدم توافر الشخص المناسب الذى يمكن الاعتماد عليه فى ادارة منزلهم والعناية بأطفالهم وأمهاتهم المسنين وهم فى سبيل ذلك يدفعون الكثير بل ويلجأ الكثير منهم حاليا الى المكاتب المتخصصة والتى انتشرت اخيرا لاستقدام خادمات من الخارج يصل مرتب الواحد منهن الى 450 دولار فى الشهر بالاضافة الى تذاكر الطيران من والى دولتهم الى جانب عمولة المكتب....وهذا فان وضع برامج تدريبية لتلك الفتيات سوف يؤهلهن لشغل ذلك الوظائف التى سوف تتهافت عليها العائلات ...واعتقد انه سيدفع لهن فى مصر ما سيدفع لهن بالخارج وذلك سيكون افضل بكثير .....

.............

وأشعر أن هناك مشروعات حقيقية لاستدراج بناتنا للعمل بالخارج بدعوى المرتبات الوهمية التى تعرض على اسرهن فتسهم فى كسر ارادتهم عن التضحية ببناتهن ..وقد تنتهى حالات عديدة الى صور مأساوية كنا فى غنى عنها لو عانينا البقاء بعض الوقت بلا عمل فى مصر بدلا من التسرع الى مثل هذه النوعية من الاتفاقات المبدئية.......[/quote]

الكلام ده معناه ياجماعة ان مجهوداتكم ونقاشكم لم يذهب سدى....هناك فائدة مما تقولون...وده شىء مبشر يدعونا الى مزيد من النقاش حتى نصل لحلول عملية....

هل الست الوزيرة لغت هذا الاتفاق ..ولا انكرت وجود كلمة شغالة فى العقد؟؟؟؟...ماهو برضه التلاعب بالالفاظ ده شىء مش مريح ولا يعطى رؤية واضحة لما تحمله الايام...

ارى ان كانت - او ان كانوا يعنى علشان نكون اكثر امانة - مصرين على تنفيذ بنود العقد..فى الحالة دى ممكن الجاليات المصرية بالخارج تنشر اعلانات شجب و استهجان فى الجرائد المصرية.....واللى يقدر داخل حدود البلد انه يعمل كده برضه....( مش مصر فيها جاليات مصرية برضه؟..)

هناك سؤال يحيرنى...ماذا لو طلبت احد الاسر صبية للعمل عندهم بدلا من الفتيات؟؟؟هل ستوافق الوزيرة ايضا....؟؟

[badroora]

هناك سؤال يحيرنى...ماذا لو طلبت احد الاسر صبية للعمل عندهم بدلا من الفتيات؟؟؟هل ستوافق الوزيرة ايضا....؟؟

بالطبع لا مش عشان هى اللى مش عاوزة !!!

عشان هما اللى مش بيحبوا او يقبلوا حريمهم ينكشفوا على رجالة !!!

اما هما طبعا معندهومش مانع بنات غيرهم تنكشف عليهم !!!

وبفلوسهم واذا كان عجبكم !!!

[amrhoras]

وزيرة مين بقى دى رئيس الحشم بتاع الخليج المدللــــــــــــــــتيه اللى تجيب البنات من دار ابوهن وتشغلهن فى اى حته واى حاجة وتقبض التمن

حد فيكم شاف فيلم نحن لا نزرع الشوك ؟؟؟؟؟؟؟ بتاع شادية الست عيشة مرات ابوها اللى شغلتها فى الاواخر

هل سنرى السمس قصدى الشمس ولكن قبل فوات الاوان؟

أغدا تشرق اضواؤك في ليل عيوني اه من فرحة احلامى ومن خوف ظنونى كم اناديك وفى لحمى حنين ودعاء اه رجائي كم عذبني طول الرجاء (كوكب الشرق أم كلثوم)

صدفة انها تغنت المقطوعة دى وانا بكتب الان بصراحة هى المعنى بالنسبة ليا حاجة تانية لانى منتظر النور بعد ليل والعدل بعد الظلم

عندى ايمان ان غدا احسن ولكن الخوف منه يرعبني كل الظروف تساعد فى زيادة هذا الرعب الان اخاف على ابنتى (ابنة اختى) او اختى او زوجتى او اى سيدة او بنت مصرية أن تكون يوم ما فى ظرف يرغمها على قبول مثل هذه المهانة

عمل الخادمة ليس عيبا ولكن لاتصل هؤلاء اناس قد ارهقتهم الظروف المادية ومن واجب حكومتنا المبجله أن تساعدهم فى رفع المستوى الوظيفي او بأى شكل من الاشكال وليس بيعهم في سوق الرقيق تحت بند لراغبي زيادة الدخل حرام عليكم كدة حرام هى دى مصر بلد رفاعة الطهطاوى وطه حسين و أحمد زويل وغيره وغيره؟

هى دي بالسهوله دى شخصيه نتنة زي وزيرة القوى العاملة تتحكم فى ملايين؟

انا معرفش اعمل ايه وده فعلا اضعف الايمان انى اتكلم هنا بس نفسي نعمل بجد حاجة اكبر شكوه لوزارة العدل

شكوه للمدعى العام

نرفع قضية

نعمل تصويت في كل حته صوتنا يوصل للعالم اللى مبتسمعش

نكون ايجابين حقيقة بلدنا مليانة قضايا وبلاوى بس الا العرض البنت المصرية دى شرفها فوق كل شيء فى بنات بتسوء لسمعة مصر وفى وفى اشكال والوان بس فتات او حشرات قليلة مش تمثلنا بس البنت المصرية اللى هى كانت اختى وبنتى ومراتى وبنت عمى وبنت خالى وجارتى كل بنت فيكي يامصر كرامتها بمليون خليجي ومليون عيشة ومليون حكومة

معندتش لاقى كلام الا حسبي الله ونعم الوكيل

[se_ Elsyed]

طب تسمحوا لي أكتب رأيي بتشكل مُلخص في هذه المُشكلة اللي ما شاء الله كل ما افتح موضوع في المنتدى الاقي كلام عن الفقر وعن عيوشه لحد الواحد ما اتشتت :

س1 : هل هناك اي عيب او عار في عمل الخادمة ؟

ج : أبداً ... فطالما كانت مهنة شريفة تجعل الإنسان رجل ام إمرأة لا يمد يده أو لا ينحرف عن الفطرة والطريق السليم يبقى لا ضرر ولا ضرار فيها .

س 2 : إذا كانت هي مهنة شريف ولا عار فيها .. إذاً لماذا نقبلها داخل مصر ولا نقبلها خارجها ؟

ج : بكل بساطة .. داخل مصر لو الخدامة حصل لها حاجه ففي الأخير لها أهل ترجع لهم في لمح البصر وفي رأي عام ممكن يهد الدنيا زي ما حصل في مشكلة الخدامة التي كانت تعمل عند وفاء مكي واللي في الأخر أتسجنت هذه الإنسانة معدومة الضمير ... أما في دول الخليج حيث الكفيل وحيث باب يُغلق على الخادمة لتنهشاها الذئاب البشرية إلا من رحم ربي .. فهاتروح لمين لو حصل حاجه ؟ ولو سمحتو ما حدش يقولي هاتروح السفارة المصرية لإن السفارة في العمارة وقاعدين ياكلوا طعمية ومش فاضيين لحد .

س3 : هل يوجد فقراء في مصر يحتاجون ربع دخل هذه المهنة ؟

ج : نعم وكثيرون .

س 4 : وما سبب تزايد نسبة الفقر؟

ج : بكل بساطة السبب هي سياسات مبارك الفاشلة طوال الـ 26 عام الماضية وطوال فترات حكمه القادمة .. لإنه باع البلد لمن يدفع أكثر .. فأزداد الغني غنى فاحش .. والفقراء زادوا فقراً لوم يعد لهم شيء في البلد .

س 5 : لماذ أُثير هذا الموضوع في هذه الفترة بالذات؟

ج : كما قلنا ... إن هذا الموضوع هو حصاد لتلك السياساتللافاشلة وحان وقت القطاف .

س 6 : هل وظيفة وزارة القوى العاملة هو تصدير العمالة للخارج ؟

ج : أبداً ... ولكنهم فشلوا في توفير فرص في داخل مصر .. فقررت الوزيرة الجهولة التي أكاد أُجزم بإنها تفك الخط بالعافية - خرجية إبتدائية بقى عقبال أملتكم في سابقة هذ الأولى من نوعها - فقررت حل المشكلة بمصيبة أكبر وهي تصدير عرضنا وشرفنا في الخرج لكي يتم إلتهامه ... وببلاش كمان .

س 7 : هل كذبت الوزيرة بخصوص هذه الإتفاقية ؟

ج : لم يكن كذباً فقط ... ولكنها تمارس نوع من الدعارة الفكرية .. يعني على عينك يا تاجر .. فلما معاليها تطلع تقول إنها بالإتفاقية دي قضت على نظام الكفالة في السعودية وإن الخادمات وجليسات المنزل والممرضات - اللي كلهم هايشتغلوا داخل البيوت - هايبقوا تحت كفالة وزارة القوى العاملة - المصرية - !!!!!!!!!!!!!!........ يبقى كده أثبتت إنها إنسانة مُجرمة وكذابة وذات نوايا سيئة لإن نظام الكفالة هو جزء لا يتجزأ من النظام السعودي ... وأقل شيء إن التغيير يأتي من الداخل وليس من الخارج ومش مصر اللي هاتيجي تغير النظام ده .

س 8 : فما هو الحل او الحلول المقترحة لمعالجة هذه المشكلة ؟

ج : وهل مشكلة الفقر طفت على السطح بين عشية وضحاها ؟ وهل حلها يكمُن فقط في تسفير نساءنا وبناتنا دوناً عن الرجالة ؟ وأين المليارات التي تدخل جيب الحكومة كل يوم من بيع الأراضي والمصانع والشركات مش هاقول قناة السويس او الغاز اللي ما بنشوفوش في مصر وبيبتاع لدولة بني صهيون ؟ ألم تسمع الدولة عن شيء إسمه الأُسر المنتجة او المشروعات الصغيرة بدعم من الدولة واللي كانت سبب في نهضة المارد الصيني ؟ وهل لو وفرنا فرص عمل للشباب والرجال .. هل ستظل مشكلة بطالة وفقر النساء ؟

كلها إسئلة تكمُن إجابتها في جُملة واحده فقط " إذا صلح الراعي ... صلحت الرعية ... وإذا راعى ضميرة وفكر لو للحظة بإنه سيقابل الحي القيوم الذي لا يموت وسيسأله عن ماذا فعل في شعب مصر .... ساعتها فقط سينصلح حالنا "

س 9 : طيب .. رضينا بالهم وبالدواء المُر ... هل توجد هناك أي آلية للحماية هؤلاء النسوة الذين أضطرتهم ظروف الحياة للعمل طخادمات في دول الخليج وخصوصاً السعودية ؟

ج : صفر ... اتحدى واحد يقولي على آلية واحده فقط بعيداً عن الكلام المنمق وإن الست ممكن تحافظ على نفسها لو في وسط ألف ذئب وإن في سفارة وإن الفلبين بتحمي خادماتها ... كل ده لم يمنع حدوث بلاوي وكوارث يعترف بها المجتمع السعودي نفسه .... ويعترف بها شيوخ المساجد والدعاة ويحذورن من الكوارث التي تحدث في المنازل ... والله العظيم احضر خطبة الجمعة لأحد المشايخ الأجلاء هنا ويقولها عالية مدوية " أنتم تفتحون بيوت دعارة في منازلكم ... فبعد الأب والأم ما بيناموا .. بتلاقي الأولاد الشباب اللي في سن المراهقة لعابهم يسيل على تلك المسكينة الموجودة في منزلهم ... و دعونا لا ننسى بإنها أُنثى ولها إحتياجاتها .. وبالتالي بنلاقي كمية إنحرافات هنا بين الخدامات والسائقين او حتى عمال البقالة المجاورة للمنزل ... ويحكي لنا واقعة طريفة عن عمال تصليح اعمد الإنارة في الشوارع اللي كانوا مربطين مع كام خدامة .. وبعد الزوج والزوجة ما يروحوا شغلهم في الصباح .. يعدوا دول بالونش وكل زميل ينزل زميله داخل المنزل ليرتكب فاحشة الزنا بمساعدة الخادمة طبعاً ورضاها "

يبقى آلية إيه دي الي عايزينها تتوفر داخل المنزل ... وآلية إيه دي اللي تخلي واحد ساكن في شقة هي يادوب غرفتين وصالة ومطبخ وهو راجل مكتمل الرجولة ولدية زوجه .. وفي الحُق الصغير ده عندهم خدامة .. وهو داخل الحمام وخارج من الحمام .. وهي تلك الغريبة نفس الشيء .. وممكن الزوجة تذهب إلى أهلها او إلى عملها وينفرد هو بتلك المسكينة المغلوب على أمرها اللي لو كانت حتى مضروبة بالنار .. ولكنها في الاخير أُنثى .. والرسول الكريم لم يقل " ما اجتمع رجل وأمراة جميلة إلا وكان الشيطان ثالثهما " ولكنه 1ذر المرأة بشكل لعام أياً كان حُسنها وجمالها ...

س 10 : ... وهل مرتب 800 ريال هو ذلك الثمن الذي نبيع به بناتنا ؟

ج : . لا أقصد طبعاً بإن الثمن لو اعلى شويه يبقى ممكن نفكر .. ولكن كانت هناك عقود كانت مُتاحه لمثل هذه المهن بأضعاف هذا الراتب ومع ذلك كانت مصر ترفض مجرد التفكير في تلك المهن ... إذا لماذا الأن يا عيوشه ... وقبضتي كام في البيعة دي يا سعادة الوزيرة الشريفة العفيفة ؟

س 11 : هل دول الخليج او السعودية طرفاً في المشكلة ؟

ج : أبداً .. فسوق العمالة المنزلية مثل أي سوق أخر .. عرض وطلب .. وللسعودية الحق تعرض إن شاله مرتب 100 ريال ... واللي يوافق يبقى لا يلومن إلا نفسه ..

بالمناسبة وقطعاً لأي تشكيك في الموضوع ... موقع الحزب الوطني نفسه يتفاخر بهذه الإتفاقية اللي هاتنغنغ المصريين وها تحل مشاكلهم

شوفتوا إزاي بقى لما يبقى الحزب الحاكم بيشتغل بعد الضهر في مهنة القوادة والنخاسة ؟

[Eemaan]

وشهد شاهد من أهلها...

المصرى اليوم

بقلم مجدى مهنا ٣١/٥/٢٠٠٧

حول قضية الخادمات المصريات، وعملهن في دول الخليج بتنسيق بين وزارة القوي العاملة والسلطات في تلك الدول.. تلقيت رسالة مهمة من أحد الدبلوماسيين المصريين العاملين في الخليج.. والتي أنشرها كاملة، وأعتذر عن عدم نشر اسمه.

السيد/.....

١ـ إن العمالة الآسيوية الموجودة حاليا في دول الخليج من الفلبين وبنجلاديش والهند وسريلانكا وباكستان بها عنف دموي فطري، ولها رد فعل عنيف علي الإهانات، وكثيرا ما تجد الخادمة تهرع إلي المطبخ لتأتي بسكين تطارد بها سيدة المنزل إذا ما تعرضت للإهانات والتعالي المعروفة به الأسر الخليجية «باستثناء الإمارات».

٢ـ إن كثيرا من الخادمات الآسيويات قمن بإحراق منازل مخدوميهن في الخليج بدافع الانتقام، نتيجة لتكرار الإهانات، كما أن العديد منهن قمن بقتل الأطفال انتقاما من ربة الأسرة.

٣ـ العلاقات الشائنة التي تقوم بين الخادمات الآسيويات والسائقين والعاملين الآسيويين أيضا، سواء العاملين لدي الأسرة نفسها أو أسر المنطقة أو الحي، والتي تحرر عنها العديد من محاضر الزنا في أقسام شرطة دول الخليج.

٤ـ كثيرا ما تعاونت الخادمات الآسيويات مع السائقين والعمال الآسيويين في سرقة الأسر التي يعملون لديها، وهناك العديد من المحاضر المسجلة بذلك.

٥ـ تعمد الخادمات الآسيويات تعليم الأطفال المسلمين بعض العادات السيئة، التي لا تتناسب مع تقاليدنا الإسلامية، والتي اشتكت منها العديد من الأمهات الخليجيات عند ضبطهن أبناءهن.

٦ـ الخادمة الفلبينية تشترط علي مخدومها أن تبيت يوما كل أسبوع خارج المنزل، والسبب معروف طبعا.

٧ـ قيام العديد من العمال الآسيويين بتصنيع الخمور يدويا، وكذلك جلبهم المخدرات إلي دول الخليج، للمتاجرة بها وتعليم أبناء الأسر الخليجية المسلمة الخمور والمخدرات.

لهذه الأسباب طلبت العديد من الأسر الخليجية خادمات من مصر، للهروب من اختلاف التقاليد والعادات الآسيوية عن العادات الإسلامية والعربية، وللهروب من السلوك الدموي العدائي أو الجنسي الفاضح لهذه الجنسيات، وللأسف الشديد وافقت مصر علي ذلك، واسمح لي بأن أتساءل: لماذا لم يطلبوا خادمات من بعض الدول المصدرة للعمالة إلي الخليج، مثل: تونس والجزائر والمغرب وفلسطين ولبنان وسوريا والأردن والسودان؟

أستطيع أن أتفهم العمل في القطاعين الحكومي والخاص للدول الخليجية، فله العديد من الضوابط التي ربما تحكمه، أما العمل داخل الأسر الخليجية فليست له علي الإطلاق أي قواعد أو ضوابط تحكمه، وإذا أرادت إحدي هذه الأسر حبس المصرية أو عزلها عن العالم ومنعها من الخروج أو الاتصال، فليست هناك من وسيلة ما لاستعادة هذه المصرية، كما أن أي اعتداء بدني أو جنسي ليس له من إثباتات أو إصلاح، سوي ما تقوم به الخادمات الآسيويات من عنف مضاد بالقتل أو الحرق أو السرقة أو الانتقام في الأبناء.

** لعل الوزيرة عائشة عبدالهادي تطلع علي رسالة الدبلوماسي المصري، وتهتدي بما جاء فيها من واقع خبرته وعمله بالخليج.. وكلي أمل في ألا تركب الوزيرة رأسها.. فالرجوع إلي الحق فضيلة يا معالي الوزيرة.

فى الوقت الذى تتفق فيه دول الخليج على وقف التعامل مع العماله الفلبينيه بعد القرارات الفرديه من الجانب الفلبينى... فى هذا الوقت بالذات تقوم الحكومه بصياغه مثل هذا البروتوكول المشين تحت مسميات وهميه...

حتى فى الكذب مش نافعين...

أقل شئ لرد ولو القليل من كرامتنا

"إقاله الست الوزيره"

.

تم تعديل 3 يونيو 2007 بواسطة Eemaan

[amrhoras]

الاخ والاستاذ الكبير سي السيد الاخت الفاضلة ايمان

بصراحة مفيش كلام بعد اللى قاله سي السيد والرأى اللى اضافته الاخت الفاضلة

بس عاوز بعد إذنك يا اختى ان اقوم بتعديل بسيط فى رأيك الخاص بعد اذنك طبعا

"إقاله الست الوزيره"

بس لما هى حتمشي حيجي ألعن منها الحكاية دى مش حتنتهى ببتر عضو واحد لأن المرض انتشر فى الجهاز كله

الحل هو إقالة الحكومة كلها وعمل لجنة شعبية باختيار الشعب هذه اللجنة تكون من القضاء العالى باعتباره الجزء العادل وتقوم باستجواب أفراد هذه الحكومة المتمثلة فى القائد واعوانه وليس الحاليين فقط بل جميع الوزراء من بداية عهد سيادته وحتى يومنا هذا وطبعا حتقولو فى ناس ماتت حتى اللى مات يقدم قائمة بمركزه المالى وممتلكاته قبل وبعد الوزارة

وأعتقد أن هذه التحقيقات سوف تفتح ملفات للآشخاص وأفراد كانو يعملون فى الخفاء

أعلم انها عمليه مستحيلة ولكن من حقنا أن نعرف أين الحقيقة ولو جزء بسيط جدا؟ وأين حق المواطن الكادح الذى أهلكته الظروف ؟ وكيف يتم استراجاع ما مضي وماتبقى من حقوقنا

شكرا ولا تعليق

[النسر المصري]

ذكرت جريدة الأهرام الموقرة في عددها الصادر اليوم مقالة كان محتواها الآتي...

عائشة عبدالهادي‏:‏

المرأة المصرية لن تعمل خادمة أو مديرة منزل في أي دولة

أكدت السيدة عائشة عبدالهادي وزيرة القوي العاملة والهجرة أنه لن يتم تسفير أي عمالة نسائية مصرية للعمل في أي دولة في وظيفة خادمة‏,‏ أو شغالة‏,‏ أو مديرة منزل‏,‏ أو مربية‏.‏

وقالت الوزيرة ـ لمندوب الأهرام محمد العجرودي ـ‏:‏ إنها لن تسمح بالإساءة لأي عامل أو عاملة مصرية‏,‏ مؤكدة حرصها علي كرامة العامل المصري في أي دولة‏,‏ وأن ادعاء البعض بأن هناك مذكرة تفاهم سرية موقعة بين الوزارة واللجنة الوطنية للاستقدام بالسعودية ليس صحيحا‏,‏ وإن الهدف هو حماية وتقنين أوضاع العمالة‏,‏ وإخضاع عقودها لإشراف رسمي يكفل تنفيذ بنودها التي تخضع لمعايير لا يمكن إغفالها حفاظا وصونا لكرامتهم‏.‏

وشددت علي ضرورة التأكد من أن الوزارة حريصة علي أن يكون العامل المصري محل تقدير في أي دولة يعمل بها‏.

هل هذا نوع من التنويم الوثني (الوطني) للشعب المصري.... أم أنها الحقيقة وقد أرضخت الوزيره الشريفه العفيفه للرأي العام ...!!!

أنا الصراحة الفيل بيلعب في عبي........رأيك إيه يا أبو السيد س س؟!!

[أسد]

في السعودية يعمل الملايين من الخدم من جنسيات أسيوية غالباً .. أغلبهم من الجنسية الأندونيسية ، والفلبينية والسيرلانكية .. وحسب علمي أن بنجلاديش لا تسمح لنساؤهم بالعمل خادمات في السعودية..

معظم هؤلاء لا يتم إنتهاكهم جنسياً أو جسدياً .. ولكن هناك بالقطع بعض الحالات الإستثنائية ..

بعضهم يتعرض لإنتهاكات غير قسرية من بعض أفراد العائلة أو من العمالة الأخرى المحيطة بهم ...

هناك أمر هام هو عدم إمكانية معرفة أو السيطرة على عد ساعات العمل .. أو أسلوب الرعاية الصحية أو نوعية وكمية وكيفية الغذاء الذي يمنح لهؤلاء ...

قد تحدث إنتهاكات .. وقد يتم التحقيق فيها .. ومتابعتها من أعلى السلطات في البلاد ..

ولكن قد تنتهي على لا شئ إلا ضياع الحقيقة ..

هناك قضية شهيرة حدثت في الرياض منذ فترة .. وهي خادمة أندونيسية إسمها (نور مياوتي) تعرضت للضرب والتنكيل من قبل مخدوميها .. أدى إلى حدوث غرغرينا في أطرافها ومن ثم بترها ..

تلك القضية حظيت باهتمام على أعلى المستويات .. بل من الملك شخصياً .. والذي أمر بعلاجها ومتابعة الموضوع والتحقيق.

وبعد أن أقرت الخادمة بأنها تعرضت للتعذيب ..

وتم حبس الكفيل وزوجته ..

وحيث أن السفارة الأندونيسية حالها من حال سفارتنا ...

فيبدو أنه قد تم التسوية والترضية والتعويض ..

وتراجعت الخادمة (نور) عن أقوالها في مفاجأة درامية .. وأفادت بأن كل تلك الإصابات التي في يديها ورجليها ليست من أثر التعذيب .. وإنما من أثر إستخدام مساحيق الغسيل والتنظيف ..

وخرج الكفيل والكفيلة من السجن .. وسافرت الخادمة ...

وتوته توته .. فرغت الحدوتة ..

للإستزادة حول هذا الموضوع .. بمكن الإطلاع على نتائج البحث في الوصلة التالية .. وإقرأوا العجب العجاب ..

http://www.google.com.sa/search?hl=ar&...80%8F&meta=

فطالما مايحدث ... يحدث خلف الأبواب المغلقة والمحصنة .. فلا يمكن لخادمة أن تشتكي ..

إذ أنها لا يسمح لها حتى بالإقتراب من باب المسكن .. ويغلق عليها بالمفتاح إذا خرج أصحاب البيت .. ولا يسمح لها باستعمال التليفون .. ويقرأ أغلب الكفلاء رسائل مخدوميهم .. ويستعينون في ذلك بسائق أو عامل من نفس الجنسية لفهم المحتوى ... أو يذهب لمكتب إستقدام ويستعين بالمترجم الموجود هناك ... بمقابل طبعاً ..

أي كان ...

يجب ألا يسمح للمصريات بالعمل خادمات في أي بلد آخر ...

قد تحدث كوارث من جراء هذا الأمر ..

لايمكن السيطرة عليها .. ولا يمكن معرفتها ..