حمد الله على السلامة .. مع السلامه (نانسى)

[nancy]

حمد الله على السلامة ..... مع السلامه

وصلت الى مطار القاهره درجة الحراره بالخارج 32 حمد الله على السلامه

واخيراً رجعت الى مصر بعد عشر سنوات غياب كم اشتاق الى الاسكندريه الى البحر والشط والناس والمبانى رجعت وكم اتمنى ان ابقى ولا ارحل ثانيه عن حياتى الاولى مدينتى

فى المطار الدنيا شديدة الزحام وكأنه عالم كامل فى حيز صغير ومن لحظة نزولى وجدت اننى مطالبة بالمال فى كل خطوه بطريقة آمره او بطريقة لزجه او باخرى محرجه وكأنى جثه وفوقها جوارح تنهش من لحمها حتى وصلت الى سيارة الليموزين وقد اعتقدت انها سياره رائعه ولكن وجدتها أسوء من تاكسى المحافظات ولم يفتر حماسى فى ان القادم اكيد أفضل ومنيت نفسى بهواء مدينتى والسعاده التى تنتظرنى فطوت افكارى الطريق اسرع من السيارة وسبقتنى احلامى لتجرى على البحر ووصلت الى مدينتى ونزلت فى منزل العائله وبعد صعودى الادوار السته رحت الهث من التعب ما هذا الهلاك هل كنت اصعد هذا السلم كل يوم اكثر من مره كيف..؟؟؟ دخلت المنزل واحتضنت امى فقد مات ابى منذ زمن بعيد وسافر اخوتى قبلى

ولكنى لاحظت ان امى قد حفر الزمن على وجهها الجميل خطوطه الغائره واصبحت اكثر حده وحرصاً وصرامه واحسست البيت بارد لم اجد ضحكاتنا وشجارنا لم اجدنا نتزاحم فى المكان

ولكن الصمت غطى كل شىء كالأتربه المتراكمه فتحت شباك غرفتى لارى الشمس والجيران فرأيت أمامى مبنى متساقط الدهانات واُناس بعيون ذابله لم يعرفونى ولم اعرفهم وكأنى أنا الوحيده التى هربت روحها من طوفان الذبول

نزلت لآرى البحر كنت مشتاقه لأضع قدمى على الرمل ويجرى الموج لى ليستقبلنى فرآيت

أن السور بعيد والشارع سياراته سريعه جدا وبعد عناء عبرت الطريق وحاولت أن أنزل الى الرمل أين ذهب الرمل والشط كأنى امام المحيط جئت ابحث عن شط احتوانى سابقاً وبحر حدثته سابقاً عن احلام اودعتها فى حفره داخل رمل الشاطىء فلم أجده مكانه أسفلت ورصيف يبدوا جميلاً ولكن بلا روح مشيت حتى وصلت الى نادي القديم والشاطىء الذى نزلت فيه ألف مره لعبت فية ألف مره ودق قلبى لاول مره فاختلف المكان أمامى كل شىء اصبح مسطح وتم ردم الذكريات ولم اجد نادينا وشاطئنا والكبائن الصغيرة وكان المراجيح لم اجد الصخور التى كنت اعبرها لأعوم فيما كنا نسمية (الغويط) ولكن بدل من ذكرياتى وجدت شماسى وكراسى وناس أناس لا أعرفهم

وضعت البحر خلفى ونظرت الى المبانىتغيرت كانت لها ألوان مختلفة وكانت علامة شارعنا

عماره حمراء كبيره كل شىء أعيد دهانه بالجير الأبيض ولم تعد هناك علامات ولا صوت بحر ولا لون مبانى

حتى الناس كلها غطاها الجير الابيض من الخارج فقط أنما من الداخل فالأسود والرمادى والبيج والأحمر و الأزرق والأصفر كما هو

لقد اصبح الخارج مختلف عن الداخل واصبحت مدينتى كما لم تكن كل يوم تفقد جزء كل يوم

ننسى مبداء كل يوم نبيع عضو كل يوم

فرجعت واخذت حقيبى وذكرياتى وذهولى وودعت أمى ورجعت ألأى المطار أخذ الطائرة قبل ان تعود حتى اعود بذكرياتى القديمة قبل أن افقدها حتى اضل فى حلمى ولا اصحو

فليسقط التجديد والتحديث والتعمير والشفافية

فليسقط الكلام وتعيش الاحلام...ولكى منى يامصر ألف سلام

[The Professor]

ليس في الإمكان ابدع مما كان........

رووووووووووووووووووعه...

[shawshank]

وكأنى أنا الوحيده التى هربت روحها من طوفان الذبول

الفاضلة / نانسي

هايلة جدا ... تعبرين عن صرخة كل مغترب مصري عند زيارته لمدينته في إجازة .

واصبحت مدينتى كما لم تكن كل يوم تفقد جزء كل يوم

لكنك أنت أيضا لم تكوني مثلما كنت من قبل ! لقد اكتسب خبرات أكثر ، و ربما تغيرت عندك معايير الجمال . و تغير ما يمكن أن يُبهجك . ببساطة ، لن يعود الماضي أبدًا .

الكثير منا يتمنى الخروج من مصر لما بها من مشاكل . و الكثير ممن يغترب عن مصر لفترة يتمنى العودة النهائية . وعندما يعود ، يصبح ناقمًا على مصر و على حيث كان في غربته . لكنه ، مثلما يقول المثل الانجليزي :

The grass is always greener on the other side of the fence

أي أننا دائمًا لا نرى فيما نحن فيه سوى العيوب ونتصور أن الأمر هناك دائمًا أفضل .

تسلم ايدك .

[النسر المصري]

تحفة فنية....تحفة متفجرة بالمشاعر الدفينة

أعجتني جدا يا ناننسي

تسلم إيدك

ورجعت ألأي المطار أخذ الطائرة

عجبتني أوي كلمة (ألأي) دي....مش عارف كتبتيها ازاي بصراحة :rolleyes:

تم تعديل 7 مارس 2007 بواسطة النسر المصري

[Salwa]

نانسى ..

حمدلله على السلامة ..

عارفة يانانسى المشكلة فين ؟؟.....فينا احنا.

احنا اللى اخدناها جوانا ومشينا بيها وعشنا فيها وعاشت فينا ..الغربة ثبتت صورتها فى عينينا ..( الصورة القديمة ) ..احنا كبرنا واتغيرنا ومخطرش فى بالنا ان هى كمان كبرت واتغيرت ...عجبنى قوى تعليقك على الملامح....كان بيتهيألى ان ده وهم جوايا ( خايفة حتى اقوله بينى وبين نفسى ) ..بالذات فى الزيارات الأخيرة ..كنت بشوف الناس زى اللى بقت متهالكة ....الناس والبيوت...وكل حاجة ...يائسة ...حتى لو انتى ابتسمتى ( مجاملة ) وانتى بتشترى حاجة او بتقابلى حد ...بيبصوا لك وكأنك جاية من كوكب آخر ..ممكن يجاملوكى ويضحكوا فى وشك بس جواكى بتحسى انها ضحكة مصطنعة ...بيحطوها قدامك بس ..( كأنها علبة وافتح واقفل ) افتح..( ابتسامة ) اقفل ( تكشيرة ) وكأن الضحك بقى غالى ..غالى قوى ..

كنا واحنا صغيرين ساعات لما نتمشى على البحر ونروح نشترى جيلاتى ..او حد فينا يروح يشترى لباقى المجموعة ...كانت اختى تضحك وتقوللى متنسيش تجيبى معاكى كيلو ضحك ...واختى الاصغر تقوللى خليهم اتنين ...

وكنا نضحك على اى حاجة ..اى حاجة ...حتى اهالينا كانوا على طول فى حالة مرح ..( ناس رايقة ) ...كانت لنا تجمعاتنا...كان وكان وكان ...

الناس اتغيرت...الطبائع اتغيرت ...للاشرس.....ليه ؟؟

لان كل شئ اصبح يدعو للشراسة ...

عاوزة ادور لك يانانسى على تعبير .....بيعطى المعنى اللى عاوزة اوصله لك ...

البلد ب...(( تتنتش ))....(( بتتنهش )) ....فهمتى ؟؟

الكل بقى ماشى على مبدأ ...اضرب المربوط يخاف السايب .

الناس بقت فى حالة حذر..

بقوا فئتين.......مش حنقولك طبقة عليا ومتوسطة وعادية او فقيرة لالالالالا..

حنقولك بقوا ..........عسكر وحرامية .......بمعنى ؟؟

ناس بتنهش...وناس خايفة ينهشوها ....عايشين فى حالة حرص دائم على اللى فى ايدهم ..( من مال وعرض وبعض الطمأنينة )

اتغير كل شئ يانانسى ....اتغير كل شئ..

بس اكيد حاتيجى ايام افضل....مش زى اللى فاتت ...لكن ؟؟ (( ربما استعادت رونقها بطريقة اخرى مغايرة ))

اكيد حاييجى اليوم اللى لازم يتشال ...الحائط الاسمنتى ..

وكلنا نرجع نشوف البحر ...

اكيد يانانسى ....

[inas]

ازيك يا نانسي مين مش متغرب عن نفسه نانسي كلامك جميل اوي

لانه ببساطه

صادق وبيعبر عن واقع بس فعلا زي ما المكان اتغير احنا كمان اتغيرنا وكتيييييييييييير كمان

[مهندس فراغى]

إيه يا جماعة النكد ده على الصبح

أنا صحيح جديد هنا، بس أنا كده حاطفش، وبصراحة أنا مش موافقك يا نانسى (حاف كده)

يعنى إنتى عايزة تسيبى إسكندرية من عشر سنين (يعنى من أيام الجوسقى) وترجعى تلاقى كل حاجة عاملة Pause و مستنية لما حضرتك ترجعى بالسلامة!

إزاى يعنى، دى حتى تبقى أنانية.

هو احنا كده يا مصريين كل ما نجيب سيرة مصر، نقلبها غم فى غم.

وعلى فكرة بقى البحر هو البحر والشط هو الشط، يمكن كمان أحسن شوية بعد ما بطلوا يصرفوا فيه.

لكن كل اللى حصل إن الدنيا اتغيرت، موش حاقول اتطورت وموش حاقول إتأخرت، بس اتغيرت، وإنتى ما كنتيش مستعدة تقبلى أى تغيير. بس كده (أه والله). شوفتى بقى الموضوع بسيط إزاى!

و بالمناسبة، جربى بقى إنت كده و هاتى الست والدتك تعيش معاكى شوية، والله ما حاتستحمل تبعد عن اسكندرية أسبوع على بعضه، وحتهرب زى ما إنت ما هربتى، بس المرة دى بقى، الهروب ده طبيعى لأنها فى السن ده (ما أقصدش حاجة والله) موش مطلوب منها إنها تتغير.

إنتى بس بطللى تاكلى سمك وبيض،

وحمدلله بالسلامة، جيبتلنا حاجة معاكى؟

[لخبطه]

معهلش هختلف معاكم شويه الكل متصور أن دا شكوى من الغربه أو نقد لأحوال مصر أو اسكندرية

أنا شايف أنها تجربه أدبية زيها زي التجارب الشعرية أو حتى القصه ......... تجربة مكتملة الأركان من وجود حالة معينة بتثير في النفس شجن من نوع ما ومحاولة وصف هذه الحالة بشكل أدبي

تجربة العودة لموطن الذكرايات وتغير هذا الموطن وما يحدثه في النفس من تصادم بين المشاعر الناتج عن المقارنة بين السابق المألوف و المحفور في داخل النفس والحالي المخالف والغير مألوف .... بيكون هدف الكاتب هو إيصال هذه الحالة لقارئه كما رأها وإن نجح في ذلك يكون عمل ادبي مميز وهو ما حدث في هذه الخاطره الجميله وإن شابها بعض الاخطاء العادية (نانسي هتقول انا مجرد واحده مبتدئه :rolleyes: -_- :D

[yacho]

نانسى الى انت كتبتيه اكثر من رائع .. فى ايه مالك ؟

اصل الكلام ما يطلعش كده الا اذا كانت الحالة النفسية منبعجة :D

بس لو الانبعاج حيخلليكى كده يبقى يا أهلا بالأنبعاج -_-

بغض النظر عن كونى موافقة أو لا على شعورك فى سفرك الأخير

لكن تعبيرك عن اللى جواكى هزنى .. عجبنى .. سهل

أقولك حاجه طول ما ريحة البحر فيها .. وريحه تانيه فاكراها نشمها الصبح بدرى واحنا رايحين المدرسه

ماتزعلوش منى يا اسكندرانيه .... دى ريحة ترعة المحمودية

حتفضل هى برضه اسكندرية

رسالة خارج الموضوع لشاوشنك

لو قريت المداخلة بتاعتى ماتركزش قوى فى ال ه و ال ة عشان انا تعبت من التنوين

كل ما اجى اكتب وما راجعتش بصراحتون (ة) صح؟ :rolleyes:

[Eldisel]

ايه الاحباط دة ......... :rolleyes:

كلامك وصل القلب يانانسي لانه صادق .... بس المشكلة مش في البلد او الناس الي انت جيت واتفاجئت بتغيرهم المشكلة فيكي برده انت كمان اتغيرتى وبعدتى عن اصدقائك وجيرانك واهلك ومدينتك ومفتكرتيش ترجعيلهم الا بعد 10 سنين .... فبالتبعيه هما كمان بعدوا عنك كما بعدتى انت عنهم

والبعيد عن العين بعيد عن القلب يانانسي .... باختصار (انت بقيتي غريبة على مدينتك ... ومحتاجة وقت عشان تتآلفي معاها تاني ) لكن لا تتركيها

بس احب اطمنك البلد لسه بخير ..... والضحكة المصريه لسة بتلعلع بين الاصحاب حتى لو كان سبب الضحكة دي احد الهموم الثقيلة .....

الشخصية المصرية هي هي مهما تكالبت عليها الهموم -_- وبلدنا احلى بلد وشعبها اطيب واجمل شعب ممكن تلاقيه في الدنيا :D

وربنا يصلح الاحوال

[وائل كيوان]

اهلا وسهلا بالأخت نانسى

اولا احب اقولك انك عبرتى عن اللى جواكى فى لوحة جمالية اكثر من رائعه من اول كلمة تقريها تحسى انك مشدودة مع الكلام علشان تكملية للأخر .

فإن كان اللى جواكى ده فكرة لعمل ادبى فبجد بهنيكى على احساسك المرهف اللى يوصل لاى شخص بسيط

اما بقى لو اللى جواكى عبرتى بيه عن حزن لمدينتك بعد طول غياب فإنتى عبرتى عنه فى اروع ما يكون وانا كمان معاكى فى غربة بس للإسف انتى نسيتى حاجه مهمة يا نانسى انك نسيتى مدنيتك عشر سنين حتى مامتك سيبتى الزمن يعدى عليها كل المده دى من غير ما تخديها فى خضنك وطبيعى ان الناس تتغير والمدينة تتغير وكل شئ يتغير فى هذه المده الطويلة والمشكلة اننا كمان اتغيرنا فى الغربة لدرجه انك مش مصدقه انك كنتى بتطلعى سلم بتكوا كام مرة فى اليوم ولو كل ما نرجع بلادنا ونحس انها اتغيرت ونهرب للغربة تانى من غير ما نخدها فى حضننا صدقينى يبقى كل اللى اتغربوا زينا مش هيرجعوا مصر تانى وعلى فكرة انا كمان حسيت احساسك ده لما رجعت مصر بس حاولت اتأقلم مع الناس وادور على صحابى اللى كنت هنساهم ورجعت تانى قبل ما ارجع الغربة وانساهم خالص .

متستغربيش من الواقع اللى احنا فيه .

[nancy]

اشكركم جدا على ردودكم واهتمامكم بقراءة ما كتبت

The Professor

shawshank

النسر المصري

inas

مهندس فراغى

لخبطه

Eldisel

اشكرك على رايك وردودكم الجميلة

مدام سلوى

مش عيزة اقولك ان كلامك نزل دموعى بجد لان احساسك بالظبط هو احساسى

ياشو وحشانى جدا يا صحيتى

وفعلا انا عندى حالة اكتئاب من الى بيحصل فى مصر

زعلانه انهم عوزين يبيعوا جامعة اسكندرية وبنك اسكندريه

وبعدين يا جماعة انا بانزل كل سنة مصر شهرين

يعنى نص الى حكيته تخيل بس الاماكن بالظبط زى ما وصفتها

بس انا بحب اسكندرية اوى من يومين سمعت فيروز شط اسكندرية ففكرت هو فين شط اسكندرية

تانى يوم سمعت مصر عادت شمسك الذهبُ بكيت وزعلت ان مصر معدش فيها شمس زهب اتسرقت زى كل حاجه

فعلا الموضوع دة حالة وملخص لمشاعرى

وونبى ياعمرو ما تالس عليا غلطة صغنونه وعديهالى

وانا سعيدة بدخولكم وردودكم

[مهندس فراغى]

خلاص، بس أخر مرة تعملى العملة دى (أقصد يعنى ترجعى وإيدك فاضية)

والمرة الجاية لما تيجى تفتحى الراديو إبقى خللى حد تانى يسمعلك الأول وبعدين ينده عليكى، لحسن يكون فيه أغنية "بين شطين وميه" ولا حاجة، ونلاقى الموضوع هنا على الصبح، وإحنا اللى فينا مكفينا.

وبعدين أنا مستغرب إزاى يذيعوا الحاجات دى من غير ما ينبهوا الواحد الأول، يعنى ولا عاملين حساب اللى جوه ولا حتى حساب اللى بره. موش ممكن ... أنا خلاص زهقت من البلد دى :rolleyes:

[أحمد رشاد شلبى]

جميل ماكتبتى يانانسى

وأعتقد أنى قرأت موضوع

عن الاسكندريه ومعاناتها

وسوف أبحث عنه

ليقرأه الجميع

[عبده بيه]

العزيزة نانسي المتفائلة دائما

كلامك جميل وصادق وصريح ولمسني من جوايا اللي انا نسيته انا نسيت اللي جوايا جاية نانسي دلوقتي بتصحيني وتفكرني

للاسف الشديد اتضح الان اننا نحن المغتربين اللي واخدين مصرمعانا وماشين بحلوها مرها واللي قاعدين مكانا الله يهديهم

فكرتيني اولمرة نزلت فيها مصر وكان بعد 5سنوات بكيت من الفرحة بكيت وما حدش حس بيه كانوا اشلاء مش ارواح او حتي ناس

من المقابلة الاولي في المطار انا في احساس الولاء واللي امامي بيسلب مني كل شيء

في الليموزيين من بره غير جوه وكان فاتر و بيجبرك علي الدفع ده كان عايز يكلني

يايايااااااااااااااااااااااااااااااااا احاسننا مش رخيصة

الله يحفظك اختي العزيزة نانسي وحمد عالسلامة

[Modest]

رائعة

رسمتي القصة بريشة تحركها مشاعر أغلب المغتربين في زياراتهم القصيرة لمصر.

قصة شديدة الواقعية "للأسف".

مش عارف اقول ايه ... هايلة في النكد يا نانسي

[nancy]

وائل كيوان

اشكرك على مشاركتى الرأى وكلامك المشجع

مهندس فراغى

خلاص المره الجاية حاجبلك كاسيت ومروحه

أحمد رشاد شلبى

اشكرك وفى انتظار موضوعك

عبده بيه

الله يسلمك وترجع مصر تلاقى كل الى بتحبه

Modest

كدة يا محمود انا نكديه ولله انا بالعكس متفائله جدا بس هى لحظة اكتئاب وبس

ومرسى على الوردة

[عازفه على أوتار الذهب]

العزيزه نانسي......

كلماتك تحرك المشاعر وتذكرنا بكل مايدفن مع مرور الزمن....الاحلام والذكريات والطفوله......

وعندما يأخذني الحنين الى البحر اجد انه حتى الحريه على الشاطئ اصبحت مقيده

بالشماسي والكراسي والزحام..والرمل والشط اختفوا....

اسكندريه اتغيرت زي ما كل حاجه اتغيرت......

عمل ادبي رائع يا نانسي ومضمونه افصح عن كثير مما بداخلنا.....

خالص تقديري واحترامي لك اختي الفاضله نانسي....

ودول 3 وردات احلى من وردة موديست... :lol:

تم تعديل 10 مارس 2007 بواسطة عازفه على أوتار الذهب

[nancy]

دهب انا سعيدة ان القصة لمست حاجه جواكى انت كمان

وان هم خسارة الذكريات مش تعبنى وحدى

ومرسى على وردك الجميل حاحطة فى نفس الفازه مع وردة مودست

[Tafshan]

يا صباح الخير

جميل ما كتبت يا نانسى

طبعاً انتِ حره تشوفى البلد زي ما انتِ ما عايزه .. بس تنكرى ان كوب من الخروب من عند خروب كلية الطب ممكن يمسح كل الالم ده في ثانيه

بلدنا يمكن تكون مش حلوه قوى .. و مش نظيفه قوى .. عامله بالضبط زي الفرق بين امى و نانسى عجرم .. ممكن تكون نانسى اموره شويه .. لكن اكيد حضنها مش ح يبقى احلى من حضن امى الله يرحمها .. طبعاً مفهوم مين احلى