رحلة روخيوصة .. لزيارة معالم المحروسة

[nash]

وفاضل 20 زياده ممكن استشير الفرقه نكفل بيها 4 تانيين <<<<<<<<<< سيوة ............ممكن تكفلوني .......؟؟ -_- -_-

وأوفر فلوس الجمعيه ...يمكن يكون فيه إعاده -_- -_-

وأهو كل من قدم خير بيداة إلتقاة.....وهنيالك يا فاعل الخير :huh: :huh:

أيه وافقوا.......طب ربنا يخليكوا :huh:

[shahd]

جدووووووو سين سين انا عايزة اجي معاكو ممكن :wub:

بس مافيش 5 جنيه كتيييييييير :sad:

في 5 ك عسل من انما ايييييييه ما تقولش لعدوك عليه .. والحساب عندك :D

تم تعديل 26 يناير 2007 بواسطة شهد

[se_ Elsyed]

أنا باتأسف لكم وأحب على راسكو واحد واحد للتأخير

والظاهر إني أنا اللي هاتعب لرحلة - بس لوحدي - وهاكون مشغول فيها جداً ..

لكن أول ما أرجع هانشر أحداث الرحلة وهاصالحكو

أخوكم المُعذب سين سين

[عازفه على أوتار الذهب]

الله كل دي اعانات نزلت عليه وانا معرفش....

دورارات (منتوشه) وخمسينات....

دهب يقوت مرجان احمدك يا رب.....

أنا قلت برضه مفيش غير نسر اللي....(مش هيدفعلي حاجه ):lol:

.

.

.

.س س لم القرشينات وخلع....

والظاهر انه طالع رحله ومش ناوي يرجع.... :lol:

:lol:

[نانو]

احم .......احم

انا بصراحه ما كنتش ناويه اطلع رحلات بس ....البنت اللي اسمها سيوه ديه خنقتني :)

كل شويه تزغلل عينيا بالخمسينات والعشرينات والعشرات

واضح ان فرقه حسب الله ديه الحاله... عندهم منغنغه ....والاشيه معدن

مره حضرت الفديه للعندليب الزرق 35 جنيه بحالهم ....و دلوقتي بتدفع خمس جندي للراس وبتبقشش كمان :lol:

وعليه قررنا نحن عصابه ِنِنف طلوع الرحله ديه بس علشان :ph34r: ......نغني مع فرقه حسب الله B)

انتظروناااااااااااااااااااااااااااااااااااااااااا

ن ناش :lol:

ن نانو :lol:

ف فولانه :wub:

[Siwa]

ماشي يا نانو......بتقري علينا.......ماشي :rolleyes:

وكمان عايزين تقطعوا علينا وتغنوا معانا.....عشان تقسمونا في النقطه........ :blink:

لأ بقا عض قلبي ولاتعض رغيفي......

وعشان كده انا ناويه اعملكم عمل على رجل جمل..... -_-

بس الراجل الدجال عاوز كمان دموع ديك يتيم ......عموما مش مشكله هاجيبها بردوه...... :P

وهاقول لمامتي.....الحاجه ام سيوة......تعملي عروسه وتشكشكهلى فين عين اللي بيحئدو عليه...... :)

و عموما ناش مش معاكي بقى في عصابة ننف

.....اصل احنا وفرنلها فلوس الجمعيه....

.ودفعنلها الخمسه جندي......بعد شوية لب سوبر معتبرين وصلولنا منها عبر الشبكه العنكبوتيه :)

[نانو]

ماشي يا نانو......بتقري علينا.......ماشي :blink:

وكمان عايزين تقطعوا علينا وتغنوا معانا.....عشان تقسمونا في النقطه........ :)

و عموما ناش مش معاكي بقى في عصابة ننف

.....اصل احنا وفرنلها فلوس الجمعيه....

.ودفعنلها الخمسه جندي......بعد شوية لب سوبر معتبرين وصلولنا منها عبر الشبكه العنكبوتيه :P

لأ لأ لأ ...يا سيوه يا بنتي ...انتي فهمتي غلط خالص ....نغني معاكوا ايه ...و نقطه ايه....ده انتي قلبك طيب

هما العصابات بيتجمعوا علشان يغنوا برضه :) :

يا بنتي ده انا من ساعه ماشوفت الورقه ام خمسين بتاعتك و انا مش جايلي نوم :rolleyes:

و عماله افكر ايه الخطه المناسبه للسطو علي فرقه حسب الله بتاعتكم ديه . -_-

بالنسبه لناش وهي عضو مؤسس في عصابه ننف ...فهيا مش مستنيه الخمسه جندي بتاعتك

لعلمك بقه ناش اصلا ماسكه ميزانيه العصابه ....وموضوع الجمعيه تمويه مش اكتر :P

[nash]

نانو

نتقابل علي الخاص.....

علشان نحط اللمسات الأخيرة....

.........................................

سيوة......يااااااااا سيوة

ماعطلكيش يا ماما

ورانا مشاغل

[MZohairy]

خلاص انا جاي معاكو ياولاد :rolleyes:

و الغدا عليا لكل الرحله :blink:

حجيب معايا نص كيلو يوستفندي برتقاني نتشبرق فيه كولنا -_-

[nora]

عمو س س في ايه انا دهري وجعني من السكوتر خلاص مش قدرة كده هنطلع الرحله مكسحين ياعمو مفيناش نفس ولا هي دي الخطه المتبعه علشان تضمن الهدوء

[Siwa]

ماشي يا نانو انتي وناش......بقى كده اتفقتموا علينا..... ;)

ماشي احنا هنعمل قمه عاجله عشان النظر بأمركم...... :blink:

وغالبا هنتاخذ قرارات مصيريه بشأنكم....... :unsure:

ونداء إلى استاذنا زهيري الشهير بحسب الله السادس عشر..... -_-

سك على نص كيلو يوستفندي برتقاني...... -_-

احسن عصابه ننف ديه بيتأمروا علينا.... :huh:

.يا ساتر على الحئد بتاعكم....... :ph34r:

بس جاري إتخاذ إجراءات عاجله لسحق التمرد : :ph34r:

[se_ Elsyed]

وبعد أن تم تجميد أعضاء المحاورات في التلاجة لمدة شهر وسين سين كل يوم يثبت فيهم ويقلوظ لهم العِمه زي بتوع شركات الأموال ويسوف ويؤجل ويقولهم اصل الاتوبيس خربان ..... أصل البري بيء عطلان . أصلهم نقلوا القناطر وبقت في السلوم ... لم يستطع بمرور الوقت ان يتهرب من الأعضاء الأفاضل أكثر من ذلك خصوصاً وأنهم قد أستثمر الأموال التي هبرها منهم رسوماً الرحلة في شراء أسهم لشركة هيرمس واللعبة بليت معاه قصدي البليه لعبت معاه لذا فقد تم الإعلان عن موعد قيام الرحلة في تاريخ الخامس والعشرون من فبراير الموافق التاسع من أيلول لسنة 2007 بعد الميلاد .

---------------------

المشهد الأول

منظر عرضي طولي سمبوكسات لموقف عبود وذلك بعد شروق الشمس بقليل وأعضاء المحاورات قد بدأوا يتوافدون على الموقف لإستقلال الاتوبيس السياحي الفاخر الذي سوف يُقلهم من موقف عبود إلى موقف ماسبيرو على كورنيش النيل لإستقلال الباخرة العائمة إلى مدينة القناطر الخيرية .

سين سين ممسكاً بالميكرفون من داخل الأتوبيس السياحي الفاخر : سيادتي أنساتي أعضاء المحاورات الحلوين .. كابتن سين سين يُحييكم على متن الرحلة رقم تويلف أو سيفين المتجهة بمشيئة الله من موقف عبود إلى موقف ماسبيرو .. وللعلم فسوف نقوم بالتحليق على إرتفاع ستين ألف قدم بسرعة 200 عقد في الثانية ... وسوف يقوم بقيادة الأتوبيس السياحي الفاخر الأسطى المعلم " شكوكو " وده من أمهر سائقي الباصات المصريين منذ عهد الملك فاروق ملك مصر والسودان .

ياسو : ولسه عايش لحد دلوقت ؟

سين سين : يا فتاح يا عليم يا رزاق يا كريم ويا صباح الكلام الفاضي .. هو مين يا سي ياسو ما تلقحش الكلمة وتجري ؟

ياسو : أنا قصدي على الملك فاروق

س س : لأ إنت قصدك على شكوكو وأنا عارف نيتك لاسودا .. وربنا بيحبك إنه ما بقاش يسمع كويس عشان ده لو كان سمعك زمان كان زمانك محطوط تحت الدُبل دلوقتي .

ياسو : كسبنا صلاة النبي .. ما بيسمعش ؟!!!! قشطه بجد

س س : طب مونكن نكمل ولا هاتقضيها لكلكه ورغي .

النسر المصري : كمل يا باشا وينقطع لسان اللي يقطاعك يارب ... جول أمين ؟

س س : أحب أديلكو نبذة مختصرة عن برنامج الرحلة .... الساعة دلوقت 6 وربع صباحاً ... لحد ما يكتمل وصول الأعضاء الأفاضل المتبقيين قول تبقى ستة ونص ... ستة ونص وخمسة سيقوم الأخ وليد بالمرور عليكم حاملاً صاجاً مملؤاً بساندوتشات الطعمية السخنة الملهلبة أم سمسم .. والساندوتش مُدعم وبإتنين جيني بس

وجدي مقاطعاً : سينكيوز مي ماي دير كابتن .. انا البامفليت اللي في إيدي بيقول عن الفيز بتاعت التور دي شاملة الأكل .. فإزاي بتطلب مننا ندفع تو باوند في الساندوتش الواحد ؟

وأكمل س س كلامه كأنه لم يستمع إلى تعليق وجدي : الساعة سبعة إلا ربع سوق يقوم الاخ عصام بالمرور عليكم بترمس شاي صعيدي تقيل سُكر زيادة والكوباية بجنية بس واللي هايحجز في الدور التاني الكوباية هاتبقى بنص جيني لإن التفل اللي هايتبقى في التُرمس هانزودوا ميه سُخنة من الريداتير كإعادة تدوير يعني

رمضان : ده إيه السرقة العلنية دي ؟ ... ده احنا لسه بنقول يا هادي وعمالين نتقلب عيني عينك .

وهنا زغر له س س زغرة لها معنى وأشار إلى عصام بطرف عينيه فوكزه عصام بكعب التُرمس فسكت رمضان عن الكلام المُباح .

س س : أسف لقطع الكلام من قِبل قِلة قليلة من مُثيري الفِتن والقلاقل .... الساعة سبعة بالظبط ستقوم الأخت فُلانة بالمرور عليكم بحلة مليئة بأصابع محشي ورق العنبب الطازج .. الصباع الواحد بربع جنية ... والله يا بلاش .

رمضان : ده إيه النهار الإسود الغميق ده ؟

ياسو : لإ ولسه ده مش بعيد نرجع من أم الرحلة دي من غير هدوم

وجدي : زاتس وات أي مين لما قلت إن ده مش في البامفليت

س س : ولمزيد من الإجراءات الإحترازية سنقوم بعملية تفتيش خفيفة أمتعة السادة الرُكاب للتأكد من عدم تهريب أي أطعمة مُعلبة أو محفوظة لإن صحتكم هي مسئوليتنا .

ياسو : إنت هاتعمل لي فيها إعلان حليب جُهينه وصحتكو مسئوليتنا وصحتكو في عنينا ؟ يا أخي مالكش دعوة بصحتنا وقول لنا المخروب ده هايتحرك إمتى خلينا نوصل القناطر وننفك منك ؟

س س : على فكرة يا أخ ياسو .. أنت شخص مُثير للفتن والبلابل وده مش كويس

ياسو : إنت لسه شوفت حاجه .. ده أنا هاخلي فضيحتكو ببلابل .

نورا وإيناس في نفس واحد : بالمناسبة .. على جثتنا إحنا الإتنين لو حد قرب من الشُنط بتاعتنا ...

نورا موجهةً حديثاً هامساً لإيناس : خبيتي السداني في حته أمان عشان الأشكيف ده ما ياخدش باله منه ويصادره ؟

إيناس : كله تمام وأنا متاويياه في حتة الجن البلو ما يعرفلوش طريق .. خلينا نأز أز ونتسلى بلا قرف .

نانو : أنا برضوا أتفق مع الاخوات ومش هاسمح لحد إنه يفتش شنطتي ولو وصلت للمحاكم حتى .

س س : نزولاً على رغبة الجماهير .. وطلوعاً على مباديء المحاورات .. وهبوطاص على أُسس المواطنة والديمقراطية والحياة الحزبية السليمة القائمة على التعدد ... قررنا التغاضي عن موضوع التفتيش .. لكن إعملوا حسابكو .. اللي مش هاينفعنا بحاجة أنا هابطحو .. أنا مش عامل الساندوتشات والشاي والمحشي ده عشان أكله في الأخر ... اللي أوله شرط أخره محشي .. قصدي اخره نور ..

رمضان : تعليق بسيط ... هو الاخ السواق ده مات قبل كده ولا هو شكله كده ولا أنا اللي ما بقتش أعرف أشوف ... سؤال بريء من شاب جريء ؟

س س : يا أخ رمضان .. الأسطى شكوكو حائز على جائزة الدريسكيون الذهبي في سباق رالي الفراعنة في مطلع الثلاثينيات ... وعشان كده الملك فاروق المُعظم إختاره عشان يسوق له الحنطور الذهببي الملكي الخاص به وياما كان ه صولات وجولات مع الملك فاروق حفظه الله .

ياسو : قولتيلي بقى .. طب سؤال سريع من شاب شجيع .. إيش جاب سواقة الحناطير للأتوبيسات السياحية الفاخرة ؟

س س : إرجع للتاريخ منذ بدء إختراع العجلة في القرن السادس قبل الميلاد وانت تلاقي إن الكونسيبت كلها واحدة .. إنت كنت علمي ولا أدبي ؟

ياسو : أنا كنت علمي مُتأدب ..

وهنا تدوي صرخة عالية في الأتوبيس ويلتفت الجميع إلي الكرسي الذي تجلس عليه نانو وهي تقول : حرامي حرامي إلحقوني يا بوليص يا بوليص ...

يُتبع

فاصل إعلاني ثم نعود

أيوه بيبس حاجة ساقعة ... سميط وبيض وجبنه ..... المتلج

[inas]

ونبي ونبي حصل ايه بعد كده مسكتم الحرامي

انا عرفه هو مين

كويس مفتشتوناش اصلي كنت مخبيه الشوايه واللزي منه لزوم الرحله باه

الي هيمد ايده هقطعهاله انا ونوره وناش ونانو ودهب وممكن داركر بس الي هناكل اما الاعدقاء المشرفين (بتوع الرحله متفهمونيش غلط) لااااااااااااااااااااااااااااااااا

تم تعديل 26 فبراير 2007 بواسطة inas

[Ahmad Farahat]

إنتوا فين يا شباب...............

أنا عايز آجي معاكوا.........

ممكن............

[se_ Elsyed]

عُدنا

كان المنظر في غاية الغرابة فلقد امسكت نانو بتلابيب سيوه ، اما سيوه فتشبثت بأطراف الفستان الاقحواني لنانو

نانو : الله يخرب بيتكو مليتو البلد وهريتونا سرقة .. وانا اقول ساندوتشات البسطرمة اللي مامي بتعملها لي كل يوم بتروح فين .. اتاريكو مقشطنا اول بأول .. جاتكو القرف

سيوه : استري عليه اللهي يستر عرضك ... والله يا نانو ياختشي بقى لي 3 ايام بلياليهم ما دوقت الزاد وعصافير بطني ماتت من اسبوع

نانو : يا حرام .. وايه اللي عمل فيكي كده ؟ ده انتي كنتي مغنية اوبراليه ولا نيفين علوبه وصاحبة رسالة؟

سيوه : قطيعه ... ده انا لو كنت صاحبة عيا ماكانش ده بقى حالي ... المهم الاول اصرفي العفريت اللي جاي ناحيتنا ده وانا احكيلك الحكاية من طأ طأ لسلامو عليكم

س س متجهاً اليهما : خير يا دكتورة نانو .. ايه البروبليم ؟

نانو : مافيش حاجه ياسي الافندي .. ده كان معايا ساندوتش عجوه بالبسطرمة وفار ابن حلال خطفه من الشنطة وجري ..

س س : عظيم عظيم ... يبقى انتي كسبتي المسابقة اللي كنا عاملينها وراصدين 75 ساغ للي يلاقي الفار ده ... نانو كسبت معانا مبلغ الجايزة ..هنوها ياولاد ...

نانو: يالله اديني صرفته .. احكيلي بقى .. انا باحب الحكاوي دي قوي

سيوه : الفرقة ياستي كانت بقى لها ييجي شهرين قاعدة من غير شغل .. فالمهم فجأة التليفون اللي كان زي الجثة الهامدة نطق ... المهم لقيت واحد بيتكلم صعيدي وماعرفش مين دلو علينا وقالي ان اسمه جعيدي وان صميده ابن اخوه هايتجوز في سوهاج يوم الخميس الجاي .. وحيث ان صميده واد صعيدي روش وكوول ومعاه دبلون تجارة فعايز يعمله فرح ما تعملش في نجع الزغاليل قبل كده ... قلت له من عيني يا حاج ده احنا عندنا فرقة هاتخلي راسك فوق فوق وماحدش هايعرف يكلمك بعد كده في الناحيه كلاتها

نانو : اللهم صلي عالنبي .. يعني فرح زي ده ما تاخدوش فيه اقل من 10 باكو .. ده غير العشا ,, يبقى بتمتهني مهنة سرقة الشاندوتشات ليه ؟

سيوه : مانا جايالك ياماما .. ماهو نقكم الدكر ده هو اللي جبنا ورا ومابقناش لاقيين البتاو الحاف

نانو: طب خديلك قطمة بسطرمه وكملي

سيوه: المهم قعدت انا وواحد تاني وموديست نحضر للفرح ولمينا العده وخدنا التوربيني على سوهاج ، احنا يابنتي وصلنا من هنا والاقيلك الحريم والبنات اتلموا على موديست وهاتك يا طفعيس فيه ويصرخوا ويقولوا تامر ابو حسني اهو يابت انتي وهيا .. هجووووووووووم

نانو : ياه للدرجة دي ... معقول موديست شبه تامر ابو حسني قصدي تامر حسني ؟

سيوه : واحلى يابنتي .. بس لو يقطع زرارين القميص الفوقانين ويوصل حواجبه ببعض ويتسهوك شويه وهو بيتكلم ويتسجن له قد سنة سنتين في قضية أداب .. ساعتها يبقى صورة تيبك الأصل منه .. المهم .. وصل عم جعيدي خلصهم من ايده واداله جلبيه بدل القميص اللي اتقطع .. وسبحان الله .. موديست لبس الجلبيه من هنا وبقى شبه الريس بيره من هنا .. مافيش ثواني والاقيلك العيال والرجالة بتوع النجع هجموا عليه والكل عمال يصرخ ويقول " الريس بيره وصل يا رداله ... هجوووووووووووووووووم

نانو : يا حرام ... ده الولد اتبهدل معاكو ... طب مافيش حد جه ناحيتك انتي او واحد تاني ؟

سيوه : ناحيتنا مين يا ماما احنا اول ما شوفنا كده كل واحد اخد له ساتر ويا فكيك ... المهم بدأ الفرح وطلع الحاج جعيدي ينقط وبعدين قدمنا وقال بؤين حلوين في حقنا .... واحنا كنا متفقين ان اضرب انا موال في البداية ويدخل بعد كده واحد تاني يديها حزايني عشان أهل الصعيد بيحبوا الحاجات دي زي ذئاب الجبل أو حدائق الشيطان والمواويل اللي إنتي عارفاها دي ، ويكون موديست اخد نفسه ويقوم مديها مسك الختام بحاجه عاتفيه من اياهم ...

نانو : لحد هنا كويس .. يا ترى غنيتي ايه ؟

سيوه : انا قلت اعمل لها مفاجأة لاهل الصعيد الكرام اصحاب الاصل والفصل ورمز النخوة واديهم حته وطني اهيج بها مشاعر الوطنية عندهم .. فروحت مدياها موال " وطني حبيبي الوطن الاكبر "

نانو : اخص عليكي يا سيوه .. بقى الصعيد وفرح وجعيدي وصميده وتديها وطني حبيبي الوطن الاكبر .. تلاقيهم زعلوا ؟

سيوه : لأ ابداً هما ما لحقش يبان عليهم اي ري أكشن والله .. فأنا مالحقتش اكمل الكوبليه التاني ولقيت دول بيبصوا لبعض وفاجأة صميده المعفن رمى العروسة من على الكرسي وراح ماسك في رقبة عمه جعيدي وقال له " بقى دي فرجه تجيبها لي في ليلة فرحي يا ظالم ؟ " والله مانا سايبك

نانو : بابص ورايا لقيت موديست بيعيط وواحد تاني مستخبي ورا الترومبيطه وباسأل موديست : انا عارفه انك بتحب تسمع الاغنية دي مني يا موديست ولإن حسك مرهف فدمعتك بتبقى قريبه .. فقالي : اغنية ايه وزفت ايه .. انا بأعيط من اللي هايحصل

ولسه ماكلمش ياختشي إلا والاقي كرسي لابس في راسي وفجأة واحد شد موديست من الجلبية وجرجره من على المسرح وهو بيقول : والله مانا .. دي هي اللي غنت .. انا باضرب عود بس .. انا راجل عندي عيال .. وبابص على واحد تاني لقيته مستخبي ورا الترومبيطه وبيتمم ويقول : يا خسارتك في الهوا يا واحد .. والظاهر ان في شوية عيال خطفوه من ورا المسرح لإني ماشوفتوش بيتجرجر زي موديست

نانو : ايه الوحشية دي ... كل ده عشان وطني حبيبي .. اومال لو كنت غنيتي الحلم العربي ؟

سيوه : وحشيه ؟!!!!! انتي لسه شوفتي حاجه ... يا ماما ده احنا التلاته اكلنا ضرب .. ماكلهوش الامريكان في فيتنام ... اللي غاظني بقى اني لقيت جعيدي جاي ناحيتي وشايل شومه قد شجرة البلوط ولسه هايفلق بها دماغي روحت مصرخه بصوت اوبرالي وقايله له : عيب يا جعيدي .. إنت عايز اهالي النجع ياكلو وشك ويقولوا جعيدي ضرب حُرمه يا رداله ؟ ..

نانو: الله عليكي يا سيوه .. عرفتي تنفدي وتخرجي من الموقف

سيوه : اخرج من الموقف ؟ !!!! بطلي التسرع اللي انتت فيه ده واسمعي للأخر .... انا لقيت جعيدي طاطا راسه في الارض وقال : صُح .. يادي العيب ياولاد .. وبعلو صوته اللي شبه النفير راح قايل : يا بت يا روحيه يا بت يا سعدية يا بت يا فتحيه ..خدوووووووووووووووووووها .. وإذ بي أُفاجأ بعدد من النسوه لا يربطهم بجنس النساء الا اساميهم وراحوا مجرجريني من شعري وهاتك يا ضرب وكأن كوندليزا رايس بتتفسح مع مادلين اولبريت ونزلوا النجع فالكل نزل فيهم هرس ... انا ما وجعنيش الضرب على قد ما وجعني ان واحده من دول ماعرفش سعديه ولا روحيه مسكت وداني باسنانها وفضلت تُعض فيها لحد ما طلعت الحلق في بؤها وسابتني بربع ودن

نانو : يا حرام ... هييييي وبعدين

سيوه : ما تراعي مشاعري يا نانو هو انا بأحكي حدوته من بتوع قبل النوم .. المهم انا كان شاغلني برضوا مصير واحد تاني وموديست .. وفعلاً ببص على يمين المسرح لقت واحد تاني عمال يطير في الهوا ويروح الاخوة الصعايدة يستلقفوه بالشوم وهما بيقولوا الله واكبر .. وهو مافيش على لسانه غير جملة واحده : قسم قسم .. مش كل الضرب في حته واحده .. لكن فين السميعة يا ماما ولا حد معبره

نانو : ده واحد تاني ... طب وموديست ؟

سيوه : موديست بقى بيثبت كل يوم انه ستايل ... حتى وهو بينضرب ستايل برضوا وله طريقه بينضرب فيها وهو راسه مرفوعه ... فببص قدام المسرح كده لقيت الاخوة الصعايدة فكين الخشب بتاع المصري وهاتك يا رزع في موديست .. والشهادة لله ما سمعتش حتى كلمة أي منه ... فين وفين بقى اكتشفت ان الاخوة الصعايدة اول ما هجموا عليه راحو قافلين بقه ببلاستر عشان ما يطلعش صوت

س س : انتي يا ست انتي وهي ... بطلو الكلام الجانبي ده عشان نكمل البروجرام بتاعنا

يُتبع

( يادي يُتبع دي اللي بيرقد عليها شهر ويرجع تاني )

[Scorpion]

يادي يُتبع دي اللي بيرقد عليها شهر ويرجع تاني

بس انا كده اطمنيت عليك يا ابو السيد ... رجعت لروائع العصر البائد عندما كنت رائد رعيل الكتابة الساخرة في محاورات المصريين و طق الحنك .... و ها أنت سيدي اللورد عدت تمسك بصولجان الكتابة ..

فهنيئآ لنا بقريحة افكارك ... دمت ذخرآ و ذخيرة للجيش الرابع ....

أحسنت يا فتي .... بجد

[نانو]

اضحك الله سنك ( يعني 35 سنه بتوعك .... :rolleyes: ) يا سي السيد يااخويا ....زي ما بتدخل الفرحه علي قلوبنا

انا باكتب بنص ايد يعني يجي 3 صوابع بس وباقي الايد والصوابع في الجبس ...بس قلت برضه لازم ادخل احييك اوقولك تسلم ياكبير :)

وفي انتظار باقي الرحله المشوكه

[DARWEEN]

وأنا أقول هو س س كان غايب فين ده كله أتاري الواد شغال مشاريع وعاملها سياحي

إنت يابني معاك تصريح من الإداره تطلع رحلات ؟ :) :rolleyes:

ومطلع رحله من غير مشرفين كمان ؟؟ :Exclam:

إبعت لي النحته بتاعتي ولا كأني شفت حاجه :pasha: :ninja:

[ahmed_tito91]

بسم الله الرحمن الرحيم

الاخ الفاضل س س ممكن تورينى الرخص وكمان تورينى اذن الاداره للرحله وكمان عليك غرامه 300000شلم وترجع الاشتراكات كلها ليه وانا حرجعها بمعرفتى الى الاعضاء ( فى المشمش طبعا) شكرا على التوبيك الحلو ده وكنت اتمىن ان اكون على متن الرحله بس يلا شكراااااااااااا

[se_ Elsyed]

مشكر جيدان جيدان على تشجيعكم ...

وده متوقع من ناس بتقدر الفن الروفيع

-------------- نعود لرحلتنا الميمونة

ارجو الإنتباه ايها السادة .. عايز اقول للسادة رواد هذه الرحلة الممتعة اننا مش في مجرد رحلة نتفرج فيها على مناظر وحركات ... مش صحيح ... ابسيليوتولي ... ولكننا في رحلة معرفة وثقافة وحركات برضوا ... فمن مكان تحركنا لحد ما نوصل موقف ماسبيرو عشان نركب الباخرة .. أي حد عنده سؤال تاريخي او جغرافي او كليشنكان ... ما يتكسفش .. وخلوا شعارنا في الرحلة دي " وخلوا شعارنا في الرحلة دي " إسال وإتطقس "

نورا : الله يخليك يا اونكل ثين ثين ده انا كان عندي كام سؤال مجننيني

س س : نورا .. ماما .. إسألي ما تتكسفيش .. احنا هنا عشان نفيدكم يا امي

نورا : هما ليه سموا موقف عبود موقف عبود

س س : يا نورا اناعايز اسئله اعوص من كده ... على العموم هما سموه كده عشان المقاول اللي بنى الموقف كان اسمه المعلم عبود وبعدين لما خلص المرمه بتاعت الموقف كان له باقي حساب .. وكعادة الحكومة .. الحي ماطل في الدفع وفي الخير ساوموه وقالوا له : ايه رأيك نسمي الموقف بإسمك في مقابل انك تتنازل عن بقية حقك .. فالراجل وافق غصبٍ عن قفاه ...

بس خلاص

رمضان : يا سلام لام لام لام .... شوف ازاي .. ده العلم نورون صحيح يا ولاد

س س : عندك اعتراض يا حج روميو ؟

رمضان : أبداً يا باشا .. ارجوك زيدنا من علمك وما تحرمناش من سيكلوبيديتك

ياسو : إيه يا جدعان هو في ايه ؟.... انتوا مش ملاحظين ان بقى لنا ساعة واقفين محشورين في نفق شبرا والاتوبيس ما بيتحركش ... هي ناقصة قرف .. مش كفايه علينا سين سين

س س : بص كده على الطريق وشوف في ايه يا شكوكو الله يكرمك

شكوكو : ده باين موكب السلطان معدي ,,, اصلي شايف عساكر كتير واقفين على الجانبين

ياسو : الله يخرب بيته هو ورانا ورانا

س س : انت تقصد مين يا جدع انت ؟ ,,, ده انا هاسلمك لسلطات ولايه شبرا بتهمة العيب في الذات السلطانية

ياسو : سلطانية ايه وحلة ايه ,,,, انا بأقصد الله يخرب بيت الزحام وربنا ياخده عشان الدنيا تبقى رايقه

وهنا يقترب سكوربيون من الأذن الوسطى لسين سين هامساً : صباحو يابو الاسيان ... باقولك ايه .. في العطلة اللي احنا فيها دي عاي استغل الموقف واعمل سبوبه صغيرة عالسريع

س س : خسئت .... هي حصلت تقلب زمايلك في الرحلة ... ايه خلاص روح الاجرام تمكنت منك وأخذت منها مأخذها ايها الرعديد المتحوصل ؟

سكوربيون : ايه يا عم يوسف وهبي ... متحوصل ايه ومتقوقع ايه .. مين جاب سيرة سرقة يا سو انت ... انا توبت وبقيت اكل لقمتي بعرق جبينك .... انا قصدي اضرب بنطه في الاتوبيس وابيع شوية امشاط وفلايات على بنس شعر ... واهي تُرزق

س س : ما فيش مانع ... بس نسبة الـ 25 % بتاعتي محفوظه

سكوربيون : ماشي يا حوت

وبالفعل اخرج سكوربيون مافي جعبته واخذ في اللف على رواد الرحلة ملقياً على حجر كل واحد نوع من البضاعة المضروبة التي يسرح بها وهنا تعالى صوت الركاب

نورا : إيه الأرف ده ... هو الشيرا بالعافية يا جدع إنت ؟ وبعدين أنا شعري حرير ونضيف ولا محتاجة فلايات ولا نافتلين بيليه والحاجات الغريبة دي

سكوربيون : طب خودي بسكوت لسيف

نورا : سيف مابياكلش حاجات مقرفة ومالهاش مصدر موثوق فيه .

سكوربيون : طب إشتري بنس لشعر أختك إيناس ؟

نورا : إبناس بتضفر شعرها ومش محتاجه بنس ... يا جماعة حرام عليكو كده حد ييجي يشيل اللزقة الإنجليزي دي من هنا

سكوربيون صائحاً : علي الطلاق مانا نازل من الاتوبيس ده فاضي .. مانتو هاتشتروا هاتشتروا .. وإلا أبطح حد فيكو

س س : ما تعليش حسك يا جدع إنت .. وإتفضل أخرج بره أتوبيسي بدل ما أكلم الأمن ياخدوك على قسم الشرطة .

سكوربيون : والله عال .. ما بقاش إلا أنت كمان اللي تتكلم ... إنت يا جدع إنت مش مقاسم معايا في السبوبة دي ؟

داروين : أصمت يا فتى ... قطع لسانك ... بقى س س رمز الطهارة والنقاء يقاسم معاك بسكوت ونفتالين .. صحيح الإنصاص نامت والقوالب كمان نامت .... يا عبدو يا عثمان تعالو خدو الجدع ده وسلموه لشرطة المرافق

سكوربيون وهو يصرخ بين يدي الجلادين : حرام عليكو يا جدعان .. ده سكوربيون بتاع التلاتلاف .. أنا صاحبكو في فريق الإشراف ...

داروين : فريق الإشراف كله ناس أشراف وليس من بيننا باعة جائلين أو مهلباتيه ... برررررررررررررررره

وفجأة صاح س س : انتي يا ست ياللي هناك في أخر الأتوبيس انتي وعماله تسرحي في الاتوبيس ... ايه هي سايبة ومالهاش اصحاب ؟ ماحدش قال لك ان الباعة الجائلين ممنوعين هنا ؟

ناش : ايه يا سي الافندي .... اني ست غلبانه ولسه جايه من عُمره وجايبه معايا من الحجاز شوية مناديل بؤيه على شويه مسك عشان أبيعهم وأجيب تكاليف الرحلة .

س س : طب طب بس انتي عارفه النظام ...

سكوربيون في أخر جُملة قبل أن يطير خارج الاتوبوس : ... 25 % من النت بروفيت للاخ الشريف س س يا ست ناش بس خلي بالك هايبيعك عند أول محطة

ناش : ربنا على الميفتيري ... ربنا على الميفتيري

يُتبع