عريس غني ولا خذوهم فقراء

[Folana]

السلام عليكم ورحمة الله ..

استاذ رمضان.....انت اخدت كلامى على محمل شخصى...مما يوضح ان هناك سوء فهم من حضرتك او عدم توضيح كفاية من ناحيتى..

على اى حال...انا بناتى لسه صغيرين ولسه بدرى انى اناقش حاجة زىى كده

اتفضلوا حضراتكم كملوا النقاش..

شكرا

[أبو حميد]

أخت فولانة

انا أسف يمكن ساعات بحط في وسط الأمثلة مثال واحد يضيع المعنى هاحاول أركز أكتر. بلاش الفرح الخمس نجوم وبلاش سقف الأنفاق لأنه مش محدد. نخلي الكلام عام ونقول أن الفقير بالنسبة للأسرة هو اللي ميقدرش يوصل لمستوى الأسرة الحالي لإلا بعد 15 أو 20 سنة من التدرج بدءا من الحياة البسيطة خالص اللي بدون كماليات تعودت عليها البنت في بيت أسرتها وكمان بدون مستوى الفرح المنشود والهدايا الغالية من العريس والشبكة المبهرة.

انا شايفة كده ان فيه اتهام خفى لأسر البنات بانهم السبب وراء ظاهرة العنوسة..لمغالاتهم فى الطلبات او بحثهم الدائم على العريس الجاهز...ماحدش سأل نفسه بصراحة...ليه ما يكونش السبب فى ارتفاع نسبة العنوسة هو احجام الشباب عن الزواج؟

بشكل عام نقدر نقول أن أسر كتير من البنات بيعملوا كده لحبهم لبناتهم ورغبتهم في الحصول على أفضل خيارات لبناتهم ومفيش أتهامات ولا حاجة "اسكت يا رمضان قولتلك بلاش تسرع" وفعلا في إحجام من الشباب وغالبا خوفا من الإحراج ومش هيغامر الا لو كان في قصة حب مع الفتاة. بس أنا شايف أن المجتمع كله بيدفع الأسر والشباب في هذا الإتجاه نتيجة لعادانتا السيئة في الفضول وحب التقصي عن أحوال الأخرين وعقد المقارنات بين الأقران وكذلك حب التفاخر بالشقة والعربية والأثاث. لكن لو كل واحد يخليه في نفسه كانت الأمور تمشي بسلاسة والناس تبسط الطلبات وتتغاضى عن الكماليات ومتحولهاش لضروريات.

يعنى لو شاب عايز يتجوز...وظروفه يادوب على قده ومش معتمد على اسرته فى حاجة ( بلاش اقول معتمد على مامى وبابى لان فى الزمن ده كل الشباب بيعتمدوا على اهلهم من غير مايكونوا مدللين )...وامام الشاب ده...عروستين..واحدة بيحبها (مثلا )..ومش حتقدر تساهم فى تكاليف الزواج..ومؤدبة وجميلة وملتزمة

وعروسة تانية..جميلة وملتزمة ومؤدبة وعندها شقة...حيختار مين فيهم؟...وبصراحة ...

الصح أنه لازم يختار الحب لأنه أكبر ضمان لنجاح الزواج حتى لو تعب في الأول شوية وأتشحطط في شقق الإيجار. ولو أختار الأسهل علشان ما يتعبش فميلومش إلا نفسه. وبصراحة كتير من الشباب هيختار الشقة.

يعنى فرضا ان بنتى عندها الشقة والعربية ورصيدها فى البنك ( مثلا لان بنتى لسه صغيرة على كل الكلام ده )..تفتكر حضرتك لو اتقدم لها عريس...واحنا كاسرة مش محتاجين فلوسه ولا عربيته ولا شقته...حنقييمه على اى اساس؟

مؤكد أخلاقه وظروفه الإجتماعية والمادية. بس أنتي ممكن لو كان كويس جدا خلقا وعلما وأنتوا عارفينه ممكن تديله الشقة والعربية يستخدمهم وتعملي الفرح على حسابك علشان بنتك تعيش في نفس المستوى؟؟؟

[أبو حميد]

ناش

شكرا على صراحتك ومحدش هايهاجمك لأن موقفك طبيعي وكل الناس بتفكر كده بس اوضحلك أن المشكلة اننا حولنا الطبقة الإجتماعية لقدرات مادية يعني مدير عام شركة أو وكيل وزارة متيسر أو صاحب شركة يعتبروا أجتماعيا من نفس طبقة مهندس شاب والده موظف محترم في القطاع العام بس معندوش القدرة على على شراء سيارة وشقة لأبنه.

لكنهم غالبا مش هايوافقوا على المهندس لأنه لسه هايبتدي حياته وربنا يدينا طولة العمر. وهي دي بقى المشكلة!!

فولانة

أرجوكي لا تتركي النقاش لأن أنتي فعلا مشاركاتك أثرت الحوار.

رمضان

بجد هاموتك لما أشوفك.

[darker19]

عاوزين اجابات صريحة علشان الشباب يقرروا يقعدوا يحاربوا في مصر علشان يتجوزوا ولا ياخدوها من قصيرها وهجوا من البلد

من رأيي يا أبو حميد إلي معاه فلوس يشيل ويعد, والي معاهوش يقوم يروح, يهج من البلد ويصرف نظر عن موضوع الجواز وممكن يجيب من الأخر ويولع في نفسه, هما الي اتجوزوا خدوا ايه يعني غير الغلب....

مش عايز أدخل في ردود شخصية على حد بس بصراحة, أنا الي شايفه ان الأهالي زودتها, عايزين الشباب يخلصوا جامعة و يجيبوا شقة و عربية و يفرشوا الشقة ويشطبوها, في ظروف زي ظروف بلدنا بالسرعة الكافية الي لا تتسبب في عنوسة بناتهم, ولا ان الشباب دول يجيلهوم إحباط وكره للحياة وللبلد كلها....

حتى ان وجد الي بيقدر يعمل الي بيتطلب في البيعة أصدي الجوازة بيكون شعوره انه مش متجوز لأ ده اشترى واحده بفلوسة, ودفع وسوا وعمل وباع عشان يتجوزها, فبالتالي مابيبقاش متحمل منها حاجه, وهايتحمل ليه ده أهلها ذلوه عشان يتجوزها, ومش بعيد انه كمان عايش معاه مذلول لأنه مربوط بمؤخر هلامي, وقايمة ده في جوازات بتبقى بوصولات أمانة وكمبيلات....

خليكوا واقعيين لو كل واحد هايقول انا بنتي لازم تعيش في مستوى على الأقل نفس المستوى الي كانت عايشاه في بيتي يبأه العنوسة هاتزيد أكتر وأكتر.... والأثار العكسية هاتزيد أكتر السرقة هاتزيد ماهو الشباب دي عايزة تتجوز فا يمد ايه عشان يرضي أهل العروسة, و الزنا هايزيد وماحدش يستغرب من الحتة دي لأننا مش في المدينة الفاضلة زي ما ناس كتير فاكرة, ونزلاء مستشفى الأمراض النفسية و العصبية برضوا هايزيدوا.....

من فترة كنت قريت موضوع في منتدى عمرو خالد, اسمه مين لسة ماتخطبتش, تقريبا حوالي من 1500 - 2000 بنت داخلين بيكتبوا ردود بيدعوا ربنا انهم يتخطبوا, دول بس رودا المنتدى ده, والي ماتكسفتش انها تدخل تدعي كده والناس تشوف دعوتها أمال الواقع بأه كام...

المهم أنا الي عايز أقوله ليه مش بنحكم بدرجة التدين قبل كل شئ ياريت الناس تاخد موضوع زواج السيدة فاطمة و سيدنا علي رضي الله عنهما قدوة, ده سيدنا علي باع درع كان عنده ب 400 درهم وده كان مهر بنت خاتم الرسل و الأنبياء. وسيدنا محمد صلى الله عليه وسلم وافق على كده, ده بيتهم كله كان عبارة عن قطعة من حصير ووسادة محشية ليف, وجرة وكوباية....

هوا احنا أحسن من الناس دي ولا ايه؟

الإجابة معروفة طبعا بس ياريت الرد ما يكونش كلام ياريت الرد يكون فعل.

أنا مش بقول جوزوا البنات لشحاتين, بس عايز أقول بلاش تعجيز و التقيم مايكونش على اساس المادة لأنها مش بيعة دي جوازة.....

[nash]

أخي الكريم ابو حميد أنت قلت

,,,,,,,,,,,,,,,,,,,,,,,,,,,,,,,,

اوضحلك أن المشكلة اننا حولنا الطبقة الإجتماعية لقدرات مادية يعني مدير عام شركة أو وكيل وزارة متيسر أو صاحب شركة يعتبروا أجتماعيا من نفس طبقة مهندس شاب والده موظف محترم في القطاع العام بس معندوش القدرة على على شراء سيارة وشقة لأبنه.

لكنهم غالبا مش هايوافقوا على المهندس لأنه لسه هايبتدي حياته وربنا يدينا طولة العمر. وهي دي بقى المشكلة!!

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

سأوضح لك وجهه نظري علي هذه النقطه....

إذا كانت إمكانيات أسرة الفتاة الماديه ميسورة....سيكون من الخطأ رفض هذا الشاب

هنا نقول خذوهم فقراء.....

علي الأسرة في هذه الحاله مساعه الشاب...والتيسير عليه...لإننا هنا أخذنا بالأسباب

علي أفتراض أن خريج الهندسه من أسرة محترمه..وخلفيته الإجتماعيه أيضا..خلفيه جيده.....لإن في هذه الحاله عوامل النجاح أكثر بكثير من عوامل الفشل....والنجاح والفشل بيد الله سبحانه وتعالي

[إبن مصر]

السلام عليكم.. موضوع جميل أشكر صاحبه عليه..

ولكن قبل كل شىء..

هل سائل السؤال.. أب ؟

لابن أو لابنه؟

ان كان نعم .. فسيقرأ بين السطور ويشعر ويحلل .. ان كان لا

فصدقنى يا اخى الحبيب ستشعر بكل ما يقال حين تنظر فى عينى ابناءك وتحلم لهم........

وهذا ما قصده استاذ عادل.. حين قسم وشرح الواعد والمستوى..

وما قصدته مدام فولانه فيما تتمناه لبناتها.. والذى اشاركها فيه فيما اخططه لبناتى...

ان كان نعم .. فسيقرأ بين السطور ويشعر ويحلل .. ان كان لا فلننتظر حتى يرزقه الله ونرى كيف سينظر الى زواج ابناءه..

ان الله سبحانه وتعالى قد خلقنا درجات.....وليس لنا فى ذلك اختيار..

وشكرا

[أبو حميد]

ناش

الله ينور عليكي لازم نقبله ونيسر عليه مش مهم حتى المساعدة.

المشكلة أنه غالبا الأسر لو بنتها لسه صغيرة في الدراسة أو لسه متخرجة طازة يا بترفض الإرتباط يا بتطلب طلبات عسيرة يا بتدور على عيب ثانوي وتمسك فيه يعني رفض لا إرادي وده بيحصل أكتر لو في عريس غني ظاهر في الصورة حتى من بعيد. وبيقبلوا ساعات بأقل من العريس اللي رفضوه ده لما البنت تطرق أبواب أواخر العشرينات بدون زواج.

لازم الشاب اليومين دول لو عاوز عروسة حلوة ومن عيلة يتفحت 10 سنين بعد التخرج في شغلانتين تلاتة علشان يقدر يوفر الحد الأدنى للطلبات اللي أصبحت ضروريات.

الأغلبية من الشباب أهليهم بيصرفوا عليهم لحد ما يخرجوهم وخلاص على كده والشغل فعلا قليل أو موجود بمرتب بسيط جدا والأسعار بتولع يوم عن يوم واللي مبتجيلوش فرصة سفر أو عمل في مكان بيدي مرتبات عالية بيبقى من المستحيل أنه يتجوز قبل التلاتينات.

تم تعديل 14 يناير 2007 بواسطة أبو حميد

[أبو حميد]

أستاذ أحمد

أنا أب لبنتين 4 سنوات وسنة والتالت جاي في السكة الحمد لله.

أنا طول المداخلات بتاعتي متفهم تماما للمداخلات التي بتدافع عن حق الأسرة في محاولة ضمان أفضل حياة لأولادهم. ما أنا متغرب وسايب بلدي وأنا ممكن أشتغل في مصر بمرتب كويس يكفيني وكل ده علشان خاطر ولادي يعيشول عيشة أحسن من اللي أنا عيشتها.

بس أنا شفت كتير من الأباء بيعجزوا الشباب ويخلوهم يفقدوا الأمل وبطلب من كل يقرأ هذا الموضوع الا يكون من هؤلاء وربنا يخليني متمسك بموقفي ده لما أجي أجوز بناتي بعد عمر طويل.

[kokowawa1979]

سيوا كتبت :

قال تعالى: "إن يكونوا فقراء يغنهم الله من فضله".

قال الرسول عليه الصلاة والسلام: "إذا جاءكم من ترتضون دينه وخلقه فزوجوه.."

انا مالقيتش غير كلام ربنا سبحانه وتعالى وكلام رسولنا الكريم صلوات الله عليه وسلامه ابدأ بيه كلامي....

اعتقد إن المقاييس الماديه لوحدها ماتبنيش حياه زوجيه سعيده...واعتقد إن كلنا متفقين على ده....

بس مع الاسف إن الكلام مابيطبقش خالص في الواقع....و دا واحد مش بس من اسباب نسبة العنوسه في مصر....لكن كمان إرتفاع نسبة الطلاق المخيفه....احنا بنشوف العريس الجاهزابو شقه وعربيه....ونقول ياسلام.... اهي ديه العرسان ولا بلاش.....

هتقولي لأ احنا بنبص على الدين والاخلاق كمان....هأقوكم آه صح بس كنقاط مكمله مش اساسيه... والله إني مابسمعش عبارة ياابني احنا بنشتري راجل غير في الافلام.....

ربنا يرزق البنات بالازواج الصالحين ويرزق الشباب بالزوجات الصالحات إن شاء الله

بصراحة كل ماكتب في التوبك جميل لكن كلام الأخت سيوا أفضله على الإطلاق .

للأسف أصبح معظم الآباء يختارون الزوج الغني حتى لو كان عربيدا وهذه حقيقة - ومع ارتفاع نسبة العنوسة بدرجة رهيبه في مصر أصبحت البنت للأسف الشديد عبئا ثقيلا على الآباء قليلي الإيمان فأصبحت مهمتهم للأسف هو كيفية الخلاص من البنت بأية طريقة ولأي عريس لايهم مستواه الثقافي أو الاجتماعي بل إن الناحية الدينية أصبحت آخر نقطة يسأل عنها الآباء .

وصدقوني إذا عاش الآباء الواقع وقبلوا بالفقراء الذين على خلق لبناتهم لربما فتحت لهم أبواب السماء أوسع أبوابها من الرزق .

مشكلتنا الأساسية أننا لايخطر ببالنا أبدا أن الحق سبحانه وتعالى كفل رزق الإنسان يوما بيوم - ولكننا دائما نفكر في أبنائنا كيف نوفر لهم رزقهم ل 25 سنه قدام !!! وننسى إن من كفل لنا الرزق سيكفله لهم أيضا إذا كنا قد ضمنا الأعمار التي ننسى أيضا إنها بيد الله ولانتذكرها إلا عند التعزية في عزيز ووقتها نقول الأعمار بيد الله !!!

[Folana]

السلام عليكم ورحمة الله ...

اخى الفاضل رمضان...ربنا يكرمك يارب..مافيش حاجة صدقنى...أنا فاهمة كل كلامك ...ربنا يديم المعروف..

اخى الفاضل ابو حميد..أنا متابعة المناقشة وموجودة..لكنى أثرت التأخر فى الرد شوية..لانى شعرت بأن الموضوع حيفقد هدفه الاساسى ويتحول الى موضوع بعنوان " بنات فولانة"...:blink:

أولا انا ذكرت ان كلامى ده بيمثل حالتى فقط..ولم اضع قواعد او افرض رائى فى هذا الموضوع..وقلت انى مش بأعمم كلامى...لان انا مثلا لى ظروف مختلفة عن الباقى فا لايجوز ابدا لى ان اضع قوانين عامة للموضوع...كل واحد بيحكم من وجهة نظره الخاصة...

أنا حأرد على اخر جزئية بس فى تساؤلاتك اخى الكريم ابو حميد...

لو جالنا عريس ظروفه مش زى ماكنا نتمنى لكن على خلق (وانا اعنى كلمة على خلق دى بكل ماتشمله من معانى)...

وله مستقبل واعد وطموح...فطبعا ممكن نقبل به...والعربية والشقة دول انا مش حاديهم له هو علشان يستعملهم..انا حاديهم لبنتى علشان ترتاح ...يعنى الهدف راحة بنتى اولا...وبعد كده هى وزوجها حيكونوا شىء واحد يعنى حاجتهم واحدة...

شىء طبيعى جدا ان اى شاب لسه فى بداية حياته مش حيقدر يوفر لنا كل اللى بنحلم به..لكن فيه مؤشرات تدل على انه حيكون فعلا انسان ناجح او لأ..

برضه ياجماعة انا حابقى كدابة لو قلت ..ايوه ...احنا نقبل باى شاب المهم يكون كويس..احسن البت يفوتها قطر الجواز وتبقى عانس ..كأننا مش حنعرف نأكلها مثلا..

بعد الزواج تبان كل مساوءه..واقول استحملى يابنتى نصيبك كده بقى..احسن تحملى لقب مطلقة ..والناس تقول ايه

وبعد كده برضه لما ربنا سبحانه وتعالى يرزقها بالخلف الصالح..وجوزها تظهر مساؤه اكتر ..اقولها برضه ..خلاص نصيبنا كده استحملى علشان العيال ..حتروحى بهم فين...

ياترى انا كده ابقى أم صالحة..واتقيت الله فى اولادى.؟...مش انا حاتحاسب عليهم برضه؟...

طيب ما من البداية اساعدها على حسن الاختيار...واساعدها بكل ما اوتيت من قوة...انا مثلا مش حادور على عريس غنى وعنده عربية وشقة..الموضوع ده مش شغلنى..لكن برضه انتقى لها انسان يكون من نفس المستوى وفاهم هى عايشة ازاى ..بس كده

حد عنده اعتراض؟؟؟ :ninja:

وبرضه باتكلم بس عن فولانة مش عن قاعدة عامة يجب ان تطبق....

[MZohairy]

التناسب

اجتماعيا و ثقافيا و ماديا

بالترتيب و بس

و طبعا بإفتراض وجود العنصر العاطفي بين الطرفين

شكرا

[the sad man]

أختى العزيزة فلانة

انا احترم تماما اختلاف الطبقات ووجود اغنياء و فقراء فهذه حكمة الله سبحانه و تعالى فى خلقه

و لا يضايقنى ابدا ان يتكلم كلا على قدر مستواه طالما هذا هو حاله و رزق الله الجميع و اغنانا من فضله

بالعكس انا قلت اننى احترم كلامك جدا لما فيه من استشفاف الصدق الذى يحويه

و فعلا انا رأيى عدم اختلاف الطبقات فى الزواج لما فيه لشعور بالنقص يولد المشكلات من ايا من الطرفين و خصوصا اذا كان من جانب الزوج الذى ارى ان يكون اعلى درجة من الزوجة و ذلك لطبيعتنا كشرقيين و عرب و كل رجل يحب ان يكون هو المتفوق فى كثير من الاوجه و خصوصا المادية

على العموم خلاصة رأيى هو لابد من التوافق و المودة و التناسب

[Alshiekh]

عريس غني ولا خذوهم فقراء

مافيش حاجة مابين الاثنين ، يعنى لازم يكون شمال شمال او يمين يمين؟

طبعا هناك اساسيات تضعها كل اسرة لعريس بنتها

1- عائلة العريس

2- مؤهل وتعليم العريس

3- وظيفته

4- أخلاقه وشخصيته

5- دينه

واعتقد انه لاخلاف على ان تلك النقاط تعتبر من الاساسيات التى لايمكن التغاضى عنها

يأتى بعد ذلك المستوى المادى والذى قد يعوضه مؤهل وتعليم العريس ووظيفته ، مستقبله يعنى وطبعا الشقة التى سيتزوجون فيها. ثم بعد ذلك موضوع السيارة او العمارة ( اربعة ع )

واعتقد ان هذا لايخالف حديث الرسول عليه الصلاة والسلام "إذا جاءكم من ترتضون دينه وخلقه فزوجوه.." فوقت الرسول عليه الصلاة والسلام كانت مؤهلات العريس هى:

1- الحسب

2- المال

3-الدين

فلم تكن هناك ازمة اسكان ، ولم تكن هناك مؤهلات البكالوريوس او الليسانس او الماجستير ولا الدكتوراة ، ولا اتوبيسات ولا سيارات ، كان اقصاها خيمة وجمل وحصان ووبعض الاغنام والماعز.

والسؤال للأبناء من الشباب والشابات اللى على وش زواج

انتوا متخيلين ايه المطلوب من الاسرة ان تتساهل فيه علشان بنتهم تتجوز؟

هل المطلوب من الوالد ان يوافق على ان تتزوج بنته فى غرفة فى شقة اسرة العريس؟ أم توفر اسرة العروس غرفة لهم ليتزوجوا فيها حتى لايضيقوا على العريس بموضوع الشقة؟

أم المطلوب من الاب او الام التى تعودت ابنتهم على قيادة سيارة الاسرة (بلاش سيارتها ) او التى تعودت ان تستقل تاكسى فى ذهابها لكليتها أن تتشعبط فى الاتوبيس بعد الزواج ، ده مايبقاش زواج ده يبقى بهدلة وعذاب.

عموما ابنائى الشباب الموضوع نسبة وتناسب ولما بيكون العريس ذو شخصية وذو مؤهل جيد ومستقبل واعد فان اسرة العروس ستقف بجانبهم اذا كان جادا ومقدرا لمسئولية الزواج ، اما ان يكون العريس رايح يجوز ولسان حاله بيقول غطينى وصوتى ، اعتقد انه فى هذه الحالة يجب عليه ان يرجع لحديث الرسول عليه الصلاة والسلام " من استطاع منكم الباءة فليتزوج ، فإن لم يستطع فعليه بالصوم ، فإنه له وجاء "