يوميات عزيز بك الأليط

[MZohairy]

هو في أحلى و أطعم من طبق فول سخن بالسمنه البلدي وعيش بلدي سخن طالع من الفرن ومعاه بصل أخضر؟

و خصوصا لو الحلو بقى فروت سالات أو بنانا بوت بالشيكولاته السايحه؟ :angry:

[الأفوكاتو]

عزيزى الأخ زهيرى,

فهمنا ضرورة أكل الفول الذى أصبح فى غير متناول عديد من المواطنين تحت خط الفقر,

و لكن إيه حكاية :

و خصوصا لو الحلو بقى فروت سالات أو بنانا بوت بالشيكولاته السايحه؟

الناس الغلابة تيجب الحاجات دى منين؟ إلا إذا إنضموا للحزن الوطنى؟

هذه هى مؤامرة للقضاء على مناهضى النظام القائم, المايل.

تحياتى.

[سيزيف]

صديقى العزيز زهيرى ذكرنى بمارى انطوانيت اخر ملكات فرنسا قبيل الثوره الفرنسيه

عندما تساءلت عن سر ثوره الشعب فاخبرها احد افراد الحاشيه بان الشعب جائع لا يجد الخبز

فقالت بكل براءه : طب ليه ماياكلوش جاتوه ؟

B)

الظاهر انك من النبلاء يا زهيرى :)

[MZohairy]

عمي الأفوكاتو وأخي شاين كورنر

أولا الغلابه ممكن يجيبوا الكمبوننتس بتاعة الفروت سالات من عند بتاع الفاكهه

والشيكولاته السايحه من أي باتيسيري

وبعدين بذمتكم في واحد ياكل فول و بصل و ينفع يحلي بالحاجات دي؟ :blink:

[se_ Elsyed]

عمي الأفوكاتو وأخي شاين كورنر

أولا الغلابه ممكن يجيبوا الكمبوننتس بتاعة الفروت سالات من عند بتاع الفاكهه

والشيكولاته السايحه من أي باتيسيري

:blink:

<{POST_SNAPBACK}>

سيبك منهم يا زُهيري .. دول لازم يحبكوها زيادة عن اللازم ..

لكن قولي يا إكسلنس ... أنأ أعرف إن البنانا ممكن أجيبها من عند الفكهاني .. لكن البوت ده ألاقيه فين ؟ إوعى تقولي في باتا أو عند زلط ؟ هأ هأ هأ ...

في صحتك يا إكسلنس

مع تحيات أخوك سين سين ... قصدي البرنس سين سين سليل عائلات محمد علي باشا الكبير وجعيدي سيد جعيدي بالمغربلين ..

برايفت للدوق زُهيري

قابلني النهاردة ضروري في نادي السيارات .. في حفلة كوكتيل تجنن

( ما تنساش تجيب معاك فردة الكوتش اللي عايز تلحمها mfb: )

[MZohairy]

قولنالكم فول و بصل .......معجبكمش

قولنالكم بنانا بوت.........برضه معجبش

خلينا ننزل للدرك الأسفل من اكلات الافطار الشعبيه

كاس كروت باجيت بالفروماج والشامبينيون

و ده بقى في متناول الجميع ويارب يعجبكم

بالهنا والشفا :blink:

[se_ Elsyed]

كاس كروت باجيت بالفروماج والشامبينيون

:blink:

<{POST_SNAPBACK}>

داكووووور

لو سمحت يا أكس لارج .. إقطع لي إتنين كيلو بس وحياة أبوك عايز الفروماج يكون مشفي ( يعني من غير دهن ولا شغت .. عشان الكلسترول وكده )

بالنسبة للشامبليون .. يا ريت يكون من غير حجارة عشان بتوع رشيد ما يزعلوش مننا .

أما بقى أكلتي المُفضلة اللي هي " كرات بالبادجيت " فدي بقى كتر منها على قد ما تقدر .. لكن يا ريت تبعتلي السواق بتاعك يجيب لي فوار فواكه من الاجزخانه على أساس إن الكرات بيعملي إنتفاخ ومشاكل في القولون .

والله الواحد مش عارف من غيرك كان عمل إيه يا دوق زهيري ...

الراجل ده يا جماعة عليه نفس في الأكل لا تقولي بودا ولا أُسامه السيد ... والميزة في المينيو اللي زُهيري دايماً يختارها إنها إقتصادية وتُناسب ذوي الدخل المحدود ... وذوي الإحتياجات الخاصة .

تسلم إيدك يا زُهيري ...

مع زُهيري ... الإكل دايماً آمممممممممممممممممممم ... ألذ

[se_ Elsyed]

برايفت تو زُهيري بك

عزيزي زُهيري بك

ما أخبيش عليك بقى لي يومين تلاتة مش جايلي نوم إطلاقاً من التفكير في كيفية قضاء الويك إند بتاع الويك ده ...

حقيقي محتار والفكر قتلني ...

وقلت يا واد يا سين سين بك خد رأي أخوك زُهيري .. لإنه خبرة في المواضيع دي وما بيغلبش ..

فإيه رأيك يا إكس لانس لو أخدنا الطيارة الفوشيا بتعتي - مانت عارفها ويا ما إستلفتها مني وفحطت بيها في طريق الجصيم - وطلعنا على جُزر المالديف ؟

آووووووه إوعى وشك يا عزيزي

أنا عارف إنك زهقت من المالديف وهاواي وباربدوس والأشكال دي ..

لكن بليييز هيلب مي وساعدني عشان أخرج من الأزمة النفساوية اللي أنا فيها ..

وبالمرة فكرني وإحنا راجعين من الويك إند نعدي على ميت أبو الكوم ناكل فطير مشلتت وعسل نحل ... بالطيارة برضوا

أخوك / الأرشيدوق سين سين

[MZohairy]

ايه يابني الحتت البيئه دي؟

انت أي حته يعلنوا عنها تقوم طالعها كده؟

خليك ناصح واعمل زيي :D

انا دايما اروح اصيف في الدان هاخ بهولندا

وبختار دايما اي أوتيل على شاطئ التشيفينينجين روعه ياحمد روعه

و لو عايز نصيحتي؟

روح اوتيل مييرديرفورت هناك على البحر بيقدم مينيو للبتي ديجينى خرافي

بيبتديلك بالبيتراف سالاد

وممكن تتقل وتاخد فيتوتشيني خفيفه بالصوص بلانش و شوية سوب الونيو

وتحلي بقى بكاس ليتبول (موز باللبن يعني عشان الناس تفهمني ومتبقاش لوحدك فاهم)

مفيش احلى من التواضع ياحمد والعيشه على الطبيعه مع الشعب العادي :sad:

[عصفور طاير]

هو في أحلى و أطعم من طبق فول سخن بالسمنه البلدي وعيش بلدي سخن طالع من الفرن ومعاه بصل أخضر؟

و خصوصا لو الحلو بقى فروت سالات أو بنانا بوت بالشيكولاته السايحه؟

يا سلام عليك مون شير زهيري.. رجعتني لأيام زمان..

كنت بالبس الريتين جوت بتاعي واطلع على الجحش في السيدة زينب أضرب لي طبقين.. وبعدين اروح احبس بفنجان شاي بالمنتول من عند المتر عبد الصمد اللي بيفرش بالليل قدام مجمع التحرير.. دا عنده حتة صفيحة بيعمل فيها شاي.. فيري ماستربيس

[MZohairy]

باردون..........

ايه التحرير ده؟ :sad:

[wagdi]

لا لا يا زهيري بيه...

إنت حاتخليني أقول عليك نوفو ريش ولا إيه...

فيتوتشيني وسوب إيه إلي الواحد ياكلهم في البتي ديجونيه؟؟

أنا أعرف الناس العادية تاكل بريوليه أوتميل مع شويه باناناز، سافوري كريب بالجبنة الريكوتا وعليه شويه فروتس ... كدة ... أكل الناس الطبيعية...مش تقوللي سوب وبعدين تقوللي العيشة مع الشعب العادي...

حسوا بالناس بقى وعيشوا زيهم فعلاً علشان مايحقدوش علينا... :sad:

وبعدين مش عارف التحرير، إلى فيه الإيه يو سي يا سيدي... إلى فيه الجامع إلى روحنا عزينا فيه في طنط شمس النفوس الله يرحمها... وحتى يومها غامرنا وماستنيناش الشوفور ومشينا إحنا وسط الناس لحد العربية... كانت أدفنتشر قعدنا نحكي فيها شهور...

أه أه... أنت يمكن الإسم ملخبط معاك... طب شوف كدة ...تاهرير ....هيه إفتكرت؟؟

[MZohairy]

منك لله يا وجدي فكرتني بتاتا شمس النفوس!!! :sad:

مون ديو يرحمها

ويدينا الباسيانس على فراقها

سى لا في

فاكر الفواياج اللي خدتنا معاها بتاعة هامبورج؟

مون ديوووووووو

فانتاستييك

فورميدابل

كنا في عز البرد

لدرجة اني بعد ما قلعت الكاب دو با بتاعي بعد الشاور لبست الشميز وعليه بلوزون تقيل ومن كتر البرد رحت لابس ايمبيرميابل ده غير الديموفل والكاجول ونزلنا كلنا

رحنا الريستورا وعزمتنا الله يرحمها على تورساد بل ايبينار و كوكيياج بل بواسون

والحلو كان بيسكوي رولى بل ابريكو

وكان معايا ماكس الشيا بتاعي السان برنار وقضينا يوم ......... ديجا محصلش زيه

وبعدين انت مستكتر على اخونا دوبل سين انه ياخد فيتوتشيني بالصوص بلانش على البتيت ديجونيه؟

اذا كان بيفطر فول بالسمنه البلدي مع بصل اخضر ويحلي بفسيخ و زي الفل

وبعدين ليه فكرتني باليوم بتاع التهرير ده؟

انت تقصد ميدان اليبيراسيو؟

سى فرى فعلا كانت افونتير مش نورمال خالص

اقولك بونوي دلوقتي

و آتوتالور :sad:

بكره ماكسيم بقى وححكيلك اللي حصلنا في بولاق الدكرور

داكرور أقصد داكوور :D

[الاسكندرنى]

اكشلموا

جا نى سيى با بولاق الدكرور

سكوا سا

اسك فوا بوفا اكسبليك فوتخ افونتير سيلفوا بليه

[wagdi]

ماكسيم؟؟؟ ماتجبليش سيرتهم... مون ديو..أنت ماسمعتش على إلى عملته معاهم أخر مرة...

ده أنا عملتلهم سكاندال في المطعم... الجارسو الحقير فضل سايب السوندرييه قدامي على الترابيزة بعد ما طفيت فيها... أنا ماصدقتش نفسي... وأنا إلي كنت سايبلهم بوربوار المرة إلى الفاتت دو سان يورو...

حاولوا يهدوا فيا وأنا أبداً...وحلفت براس مو جرو بير ماعتب المكان ده تاني...

ياااه... الواحد بقت أعصابه تعبانه أوي يا زهيري بيه ولا بوتيت شوز لوي فيه لا تيت....

ماعنكش سوليسيو للبروبلام دي؟؟

[سيزيف]

كاس كروت باجيت بالفروماج والشامبينيون

بالهنا والشفا :sad:

<{POST_SNAPBACK}>

----------

يا خونا و النبى حد يترجم

الله يرحم انيس عبيد

[سيزيف]

على فكره احب انوه - حلوه انوه دى ؟ - عن اعجابى الشديد بالاخ زهيرى و خفه دمه

ياخونا الراجل ده اكتشاف و ف القافيه - زى ما شفت فى مشاركات اخرى - مالوش حل

لكن فى نفس الوقت احب احذر انه فى حاله حدوث مساجلات بينه و بين الاخ الفاضل سى السيد فانا هاخد صف سين سين على طول

وده طبعا بمنتهىىىىىىىىىى الموضوعيه و مالوش اى علاقه خااااااااااااالص بان سين سين مشرف جامد فى المنتدى :sad:

وده بيفكرنى ببيت شعر قاله واحد من الظرفاء - وكان عايش ايام معاويه - لما سالوه عن الشهيد الحسين :

احب الحسين و لكنما 000 لسانى عليه و قلبى معه

اذا الموت احدق من كل جانب 000 و رمت النجاه فكن امعه

تم تعديل 16 فبراير 2006 بواسطة shinercorner

[se_ Elsyed]

أحب أرحب بالباكاوات الأعضاء الجدد في نادي الأرستقراط النُبلاء ( ووووسع وووسع للنبلاء .... لاء لاء )

- عصفور بك طاير ...... من أول ما شوفتك يا مون شيري طاير ومحلق في المنتدى أنا قلت عليك إنك مش عصفور بلدي عادي ... لا .. ده إنت عصفور متأصل ، وإن ما خانتنيش الميموري فإنت من فصيلة ( عصفوريدس موسيقيدس ) ودي سلالة إغريقية أصيلة .... يُسعدني أن تنضم إلى نادي الصفوة يا صديقي.. متمنياً لك إقامة سعيدة في النادي ... بس ما تنساش الترانسيفير بتاع الميمبرشيب فيز على حسابي في بنك ناصر .. قصدي بنك كريديت دي سويز ( ربع مليون يورو سنوياً ... يا بلاش .. إيتس ريلي أوكازيون )

- وجدي باشا كعب الغزال .... إنت فين يا مان ؟ من ساعة ما ربنا فتحها عليك وأصبحت ون مان شو ، وأكبر مورد للعطور في العالم وإحنا مش عارفين نتلايم عليك ؟ صحتك يا صديقي . ما حدش واخد منها إيني سينج ... إسألني أنا .. أو إسأل العزيز زُهيري اللي بيهتم بصحته أكثر من اللازم .. إنت راخر اللهم صلي عالنبي بطرخ وقلوظ ولا البطة الأورينتال .

- إكسلنس إسكندراني ... شيخ الصيادين بالعصافرة وكامب شيزار .. وصاحب أكبر أسطول لصيد القراميط ... أنا فيري هابي إنك معانا في النادي .. ويُسعدنا إنك تكون المورد الأول لكل السي فوود للبكوات الأعضاء - فري طبعاً - وياريت نطلع كلنا بربطة المعلم آز أجروب في رحلة بحر متوسطية على أي مركب من مراكبك إن شالله تكون مركبتك النفاثة " نورماندي تو " أو " الأميرة هبه "

- شاين بك كورنر .... سليل عائلات كورنر بشارع رمسيس ... يُسعدني يا عزيزي أن تكون من ضمن البلاط الملكي الخاص بنا .. على أن يتم إهداء ميمبرشيب كارد .. كادو لجنابك لمدة ون كوارتر .. وإذا أثبتت فعلاً إنك نبيل .. فسيتم ضمك بيرمينانتلي للكلوب ....

------------

والآن فلنشرب نخب تلك الصحبة الجميلة

العرقسوووووووس يا عبدو .

[se_ Elsyed]

البكوات أعضاء النادي الريسبيكتيد..... كنت محضر لكم مفاجأة هايلة هاتعجبكم .. لكني مضطر أقولها لكم النهاردة قبل ما نخطف رجلينا أنا وزُهُيري بك على المالديف ساعتين زمن وبعدين نروح نضرب غطس في ترعة التشيفنجيين اللي في هولندا ...

المفاجأة هي إني أنا وزهيري عزمينكم يوم الإثنين الجاي - على أساس أكون قافل الصالون يعني - على رحلة إلى جبال القلب في سويسرا علشان نتزفلط على الجليد .... واووووووووووو

وجميع العدة بتاعت الزفلطة هاتكون على حسابنا ( من عكاكيز لقبايب حديد لطواقي صوف لتليفريكات .... كله من مجاميعه هانتكفل به ) أتمنى إننا نقضي هابي منداي أوفر زير .

[tarek_almeghallawy]

س س وصاحبه الحاج زهيري

استولوا على المحاورات كلها

وخطفوا المشاهدين

وباعوا تذاكر الشو بتاعهم

في البورصة..حسب مؤشر داو جونز عبد الصمد

بسعر إقفال تلات تعريفة

فيه شكوى مقدمة ضدهم من ناس نكدية

إنهم عاملين إغراق

محدش ها يقرأ مكتوبات تانيه بعد كده

هما بيجيبوا الكلام ده منين

اقطع دراعي.. دول طقين طقم كوارع ومحلين برجلين فراخ في المنفوحة

جتنا نيلة فحظنا الهباب

طارق السماوي