من ساعة ما رجعت من الحج و انا متغيرة

[pink rose]

هاتكلم معاكم كأني باكلم نفسي

محتاجة اتكلم و حد يسمعني و يتكلم معايا

يمكن يكون حد فيكم مر بكده فا يطمني علي نفسي

بدل ما انا حاسة اني جالي هسهس

من يوم ما رجعت من الحج و انا فيا حاجات عجيبة بجد

غير التعب اللي مستمر من اول ليلة بيات في منى لحد دلوقتي باقول لنفسي دا عادي كل اللي بيروح الحج بيتظبط كده و الحمدلله احسن من غيري كتير

انما المش طبيعي اني من يوم ما رجعت و انا بتحلم بكوابيس كتير لدرجة اني باصحى مرعوبة و مش عارفة بيتنا

و افضل شوية كده على ما اركز اني الحمدلله في البيت

بارجع السبب في دا يمكن لاني كنت اول مرة ابات في الشارع و كان بالنسبالي بجد احساس صعب يوم البيات في مزدلفة نمنا في الشارع على الرصيف و بجد الحوار دا مأثر ف نفسيتي جدا

بجد حاسة باحساس الناس اللي بيناموا في الشارع عدم وجود مأوى احساس مؤلم مؤلم

حلم تاني كمان شغال معايا اني اصحى مخضوضة و انا مش عارفة انا في الشوط الكام من الطواف

و على ما اركز شوية و افوق الاقيني باحلم

مش عارفه ليه كده يمكن لان طواف الوداع انا هيست فيه على الاخر لانه بجد فعلا كان صعب اوي لدرجة اني ما كنتش حتى عارفة اقول اي حاجه م الطحن اللي كنا فيه

كان كل اللي باقوله بس اللهم آتنا في الدنيا حسنة و في الآخرة حسنة و قنا عذاب النار

بس ما قولتش غيرها في طواف الوداع دا و كل شوية اسأل الناس اللي معانا دا الشوط الكام

انا اصلا كنت مقتولة من البرد و كمان الزحمة فا كنت ضايعة فيه فعلا

و للاسف كان نفسي اطوف من فوق عشان التركيز لكن وجود ماما معايا كان مصعب دا لانها تعبانة و ما كانش اكبر عليها مسافة الطواف و ازود القطر

حاجه كمان و دي بقى اللي مزودة الليلة

مش عاوزة اتكلم مع حد و لا اتناقش مع حد

مش انعزال و لا اكتئاب و لا حاجه من دي

انما خوف

اه و الله خوف

حاسة اني خايفة اتكلم اغلط او تكتب سيئات في الصفحة البيضاء اللي ربنا من عليها بيها ان شاء الله

حد فيكم جالته الحالة دي بعد الحج و لا انا لوحدي اللي كده

اتكلموا معايا

[pink rose]

و لا حد عبرني

طب اضحكوا عليا حتى و قولولي اني شوية كده و هابقى كويسة

الله يسامحكم

[capitshino]

حصل لى نفس موضوع الاحلام او بمعنى ادق الكوابيس بس مش بعد ما رجعت من الحج انما بعد جٌمعة الغضب

والموضوع حصل لى لما رجعت للسعودية .. ساعتها كلمت طبيب صديقى وسئلته قالى دى حاجة طبيعية بعد المشاهد

الصعبة اللى شوفتها .

عموما اوصيكى بادعية ما قبل النوم .. وحاولى الوضوء قبل النوم .

[طارق مصرى]

-احتمال حضرتك دى اول حجة ليكى و كنتى مركزة جدا و خايفة تغلطى فى نسك مثلا مع ربما عدم المامك بكافة المناسك فده عمل على اعصابك ضغط رهيب وبتنفسيه فى الاحلام زى ما كان بيحصلى قبل الدخول امتحان ومش مذاكر كويس و كانت بتجيلى احلام كتير انى دخلت و معرفتش احل او تهت او اشياء مخيفة حتى بعد الامتحان

-التعب ده طبعا حاجة طبيعية جدا

- احمدى ربنا مليون مرة انك مطوفتيش فوق انا جيت متاخر وطوفت فوق وصلت فوق قبل المغرب بحوالى نصف ساعة خلصت الطواف حوالى 9.30 ده غير الضغط الرهيب بالذات عند الاقتراب من ركن اليمانى الى ما بعد الحجر الاسود و الله جالى احساس بالاحباط انى ممكن اخلص طواف الوداع بس الف حمد وشكر لله

- احساسك انك خايفة تغلطى او تعملى سيئة انا بغبطك عليه يا رتنى زيك احمدى ربنا و الله اعلم دى من علام من علامات قبول الطاعة بس طبعا بدون افراط

اتمنى اكون اقتربت من التفسير الصحيح و الله اعلم

و ربنا يتقبل من حضرتك وجميع المسلمين و يرزق من لم يحج الحج ويقدرنا على ادائها مرات اخرى

[pink rose]

حصل لى نفس موضوع الاحلام او بمعنى ادق الكوابيس بس مش بعد ما رجعت من الحج انما بعد جٌمعة الغضب

والموضوع حصل لى لما رجعت للسعودية .. ساعتها كلمت طبيب صديقى وسئلته قالى دى حاجة طبيعية بعد المشاهد

الصعبة اللى شوفتها .

عموما اوصيكى بادعية ما قبل النوم .. وحاولى الوضوء قبل النوم .

ربنا يخليك يا كابيتشينو

انا الحمدلله باصلي وانام بعدها على طول

بس يمكن زي ما الدكتور قالك ان دا عادي بعد المواقف الصعبة

[capitshino]

طب اضحكوا عليا حتى و قولولي اني شوية كده و هابقى كويسة

على فكرة الموضوع خد كام يوم والحمد لله بعد كده الكوابيس انتهت .

[pink rose]

-احتمال حضرتك دى اول حجة ليكى و كنتى مركزة جدا و خايفة تغلطى فى نسك مثلا مع ربما عدم المامك بكافة المناسك فده عمل على اعصابك ضغط رهيب وبتنفسيه فى الاحلام زى ما كان بيحصلى قبل الدخول امتحان ومش مذاكر كويس و كانت بتجيلى احلام كتير انى دخلت و معرفتش احل او تهت او اشياء مخيفة حتى بعد الامتحان

-التعب ده طبعا حاجة طبيعية جدا

- احمدى ربنا مليون مرة انك مطوفتيش فوق انا جيت متاخر وطوفت فوق وصلت فوق قبل المغرب بحوالى نصف ساعة خلصت الطواف حوالى 9.30 ده غير الضغط الرهيب بالذات عند الاقتراب من ركن اليمانى الى ما بعد الحجر الاسود و الله جالى احساس بالاحباط انى ممكن اخلص طواف الوداع بس الف حمد وشكر لله

- احساسك انك خايفة تغلطى او تعملى سيئة انا بغبطك عليه يا رتنى زيك احمدى ربنا و الله اعلم دى من علام من علامات قبول الطاعة بس طبعا بدون افراط

اتمنى اكون اقتربت من التفسير الصحيح و الله اعلم

و ربنا يتقبل من حضرتك وجميع المسلمين و يرزق من لم يحج الحج ويقدرنا على ادائها مرات اخرى

فعلا دي كانت اول حجة ليا

و كنت من قبلها و انا شايلة هم ما بعد الحج من قبل ما اسافر

ما كانش هاممني اوي التعب او مشقة الحج على اد ما هاممني و مؤرقني هاعمل ايه في نفسي بعد الحج

هافضل زي ما انا و لا لازم اغير في نفسي حاجات كتير

عمالة احاسب نفسي على كل كلمة قبل ما اقولها

بس هو فعلا انا ضاغطة على نفسي كتير في الناحية دي لدرجة و الله فعلا خايفة اتكلم مع حد اي حد

اتمنى زي ما بتقول يكون علامة من علامات القبول

و ربنا ييسر الحج لكل المسلمين

اللهم آمين

[Dreamwithme]

معلش يابينكي ربنا يصلح أحوالك يارب ويطمن بالك والحالة دي تروح

أنا ما حجتش قبل كده عشان أفتيك بصراحة

بس بالنسبة لأحساس العزلة ده أعتقد أنه طبيعي لأن بعد طاعة كبيرة زي دي الواحد بيشعر بقرب شديد

من ربنا وبعدين يرجع فجأة للدنيا تاني فبيشعر بانعزال ورغبة في القرب تاني من الجو الروحاني

إلي جانب إحساس الواحد أنه راجع نضيف ومش عايز يتوسخ من الدنيا تاني

[Salwa]

مساء الرضا ياحاجة ام مريم .

انا لسا حالا داخلة المحاورات .

يعنى دخلت الصبح شوية وخلاص.

ياريمو ده احساس طبيعى للى بيكون حاسس بالتعب من أول المناسك.

يعنى البيات ف المزدلفة خللاكى تحسى باحساس الضياع ..مع أن المفروض تحسى باحساس الصحبة الجميلة والائتناس .

يمكن علشان انا ليلتها منمتش رغم الارهاق .بس حاولت انى ارتاح نظام أسند على ظهر اخويا .( آه والله عملت كدة ) ومكانش نوم على رصيف ولا اى شئ من ده ...ده احنا كنا (( أمم وجماعات جماعات )) ....فيه طبعا ناس بتنام وشئ طبيعى انها تحس باحساسك ده يعنى انتى طبيعية جدااا وبلاش تقلقى .

كل الحكاية انك تعبتى ......لأنك مش واخدة على كدة .

وبعدين ...

حكاية الكوابيس ..........لها حل واحد او يمكن لها سبب واحد.

انتى يظهر اتفرجتى كتيررر على شرايط او برامج بتخوفك من النار وتخوفك من الموت وحاجات كدة يعنى .

ماهو فيه ناس بدل ما تحببك ف الحاجات دى .....تخليكى تحسى بالرعب .

يعنى يقولوا لى .انتى حاترجعى كما ولدتك امك .....واوعى تغلطى واوعى حتى تبصى من شباك واوعى واوعى واوعى ...

معايا ياريمو؟؟

ثانية واحدة ..

راجعة لك تانى ... :clappingrose: :clappingrose:

[عادل أبو عمر]

أنا لسة ما حجيتش بس بادعي ربنا يكرمني بالحج السنة الجاية إن شاء الله

أنا حسيت من كلام حضرتك لما رجعتي عن رحلة الحج بتاعتك إنها كانت شاقة جدا و مابقيتش عارف أقول إيه لحضرتك بس كل اللي قدرت أعمله إني فعلا دعيت لكم ربنا يجعل المشقة دي في ميزان حسناتكم ، الرحلة بالشكل اللي حضرتك وصفتيها بيه خصوصا مع وجود والدة حضرتك معاكي أكيد صعبة جدا حتى لو راجل بطوله

موضوع الكوابيس دي .. هاقول لحضرتك تجربتي فيها رغم إني ما حجيتش .. بس فيه حاجة بتحصل معايا زي كدة بس بشكل مختلف شوية و هي إني كل سنة في أول ليلة من رمضان صابح أول يوم صيام يجيلكي كابوس إني فطرت و مكملتش اليوم .. حاجة كدة ثابتة مع الهلال و مش لاقيلها حل حتى بعد ما كبرت .. فكرت إني ما أنامش بالليل و عملاها بس لما بنام بعد الفجر بيجي الحلم برده ... كل سنة .. ملهاش تفسير عندي غير إني أول ما بدأت أصوم و أنا لسة صغير بدأت و رمضان كان بييجي في الصيف فكان بيقى صعب جدا في أول يوم و تاني يوم صيام فالواحد كان بيكون نفسه يصوم بس خايف من الحر و العطش ...

وحضرتك برده نفس المشكلة تقريبا لإن ساعات الواحد لو حريص جدا على حاجة بيحبها بيكون عنده خوف أو قلق شديد من إنها تفوته أو ينساها أو ماتحصلش

ياريت حضرتك تستريحي و إن شاء الله تمر عليكي الأيام دي بخير و ربنا يصلح بالك و يهديكي للصالح من الأعمال بإذن الله

بس على فكرة أن كنت فاكر إن حضرتك أصلا مش موجود عشان بتعملي تورتة مريم أصل السنة دي الحفلة مليونية

رببنا يبارك فيها و يحفظها و كل سنة و إنتم طيبين و دايما يارب في كل خير و سعادة

كل الاحترام و التحية

[Salwa]

شوفى ياريمو .

اوقات كتير بتكون الكوابيس دى انعكاس للحالة النفسية .(( والله اعلم )) .

يعنى فعلا حاتكون حالة مؤقتة ( ان شاء الله ) وحاتزول بعد أيام قليلة .

وعندى ليكى سؤال وجوابه يابنتى ...

ليه خايفة تتصرفى اى تصرف ويطلع غلط؟؟او خايفة تتكلمى اى كلمة وتأذى بيها حد مثلا .

دى مش حقولك تعتبر وسوسة .......لالالالا.

دى زى ما قلت لك قبل كدة تعتبر خوف .

فيه خوف صحى ....وفيه خوف مرضى .

ده لحد دلوقت خوف صحى بس لو زاد اكتر من كدة حايكون مرضى ولهذا حاولى تتحكمى فيه .

طاعة الله فى كل شئ حاتخليكى تحسى بالأمان .

ولازم تعرفى ان الانسان اللى ماشى ف دنيته صح مش بيؤذى اى مخلوق آخر .

وانتى ياريمو مفيش ف حياتك الا كل خير .

انتى انسانة ملتزمة وبتحبى اسرتك وحياتك وبتؤدى فروض الله سبحانه وتعالى .

حاتخافى ليه؟؟

بالعكس .طقوس الوضوء والصلاة بتديكى ثقة ف النفس وسكينة وهدوء ..

استهدى بالله ولما ترتاحى من السفر كل ده حايروح لحاله..

مساء الخيرات ياحاجة وعقبال المرة الجايا نحج بقى كلنا جماعة ان شاء الله .. :clappingrose: :clappingrose:

[pink rose]

باشكركم كلكم لمشاركتي و التهوين عليا

انا بجد لحد ما كتبت الكلام دا و كنت مخنوقة و مش عارفة اروح من نفسي فين

فعلا الرحلة كانت صعبة و في حاجات ما حكيتهاش بالتفصيل

و بادعي ربنا ان دا كله يتقبله ربنا و يجعله في ميزان الحسنات

كمان خوفي على ماما بجد كان عاملي توتر رهيب

و كان مزود الحمل عليا صحيح ماما كانت جدعة كده بس دا طبعا طلع عليها دلوقتي

يا حبيبتي باكلمها في التليفون تعبانة جدا جدا و جسمها مهدود جامد

الله يكون في عونها يعني يوم مشينا 3 ساعات متواصل في عز الحر و لا اخر يوم في رمي الجمرات بعد الزوال مباشرة تعب بجد

بس هي كانت مبسوطة الحمدلله

بس انا كنت زعلانة اننا طلعنا في الحملة دي و زودوا المشقة و كل شوية اعتذرلها و الله مع اني فعلا ما كانش ليا ذنب في اللي حصل بس كنت حاسة بتأنيب ضمير كل ما اشوفها تعبانة كده

يمكن دا كمان ضغط على اعصابي

الله اعلم

و الله يا ماما سلوى خايفة الموضوع يوصل للوسوسة بس باحاول كتير استعيذ بالله و اهدي نفسي

و يمكن فعلا الوضع ياخد وقته و تروح الكوابيس دي بعد كا ارتاح

على الله كله

و ربنا يخليكي يا ماما على كلامك الحلو فيا يا رب اكون عند حسن ظنك بيا دايما

اما بالنسبة لتورتة عيد ميلاد مريم و الاحتفال المليوني يا استاذ عادل

و الله ضحكتني

و عموما احنا قررنا نأجل الاحتفال شوية لحد ما اخف و اقدر اقوم اعمل تورتة

و مريم طيبة مش هاتزعل اوي يعني

[لونا]

حمدًا لله على السلامة يا حاجة pink

ربنا يتقبل منا و منكم

أنا مش حاعرف أفتيكي في موضوع الكوابيس

لكن بالنسبة لموضوع التعب .. عادي جدًا دور برد تمام و تكسير في الجسم و إرهاق شديد

كل ده عادي جدًا بعد الحج لمدة أسبوع أو أسبوعين .. إن شاء الله مش أكتر

عايزة أقول لك إني يوميًا بانام الساعة 8 أو 9 من يوم ما رجعت .. النهاردة كنت مضطرة أذاكر للأولاد عشان عندهم امتحانات.. و عشان كدة سهرت لغاية دلوقت

بس حاولي ما تحسيش بالذنب من ناحية ماما

ربنا يديها الصحة و يتقبل منها

ظروف الزيارة هي اللي أجبرتك على نوع الحملة

و في الآخر الحج هو جهاد المرأة و لازم فيه التعب .. حتى لو الحملة ممتازة لازم يكون فيه قصور كدة و لا كدة

و كلنا تعبنا جدًا في طواف الوداع .. اللي أتم ليوم 13 أكيد هو اللي إرتاح فيه و قدر يركز في الدعاء و الذكر

أما عن موضوع إنك خايفة تكلمي الناس عشان ما تغلطيش

أنا معاكي الموضوع مقلق فعلًا

أنا كمان من يوم ما رجعت عمالة أعد الأخطاء اللي عملتها و الله و أستغفر ربنا عليها

لكن مش حننقطع عن الدنيا

بس وجود النفس اللوامة دي شيء جميل ..

يا رب نفضل كدة على طول و لا تلهينا الدنيا عن محاسبة أنفسنا

[م تيمور المراغي]

الكوابيس تخشى ان تزور اركيتكت في منامو :happy:

هههههه

روقي يا بينك انا حبيت اتكلم بالطريقه اللي بتنرفزك دي عشان تفكي

شغلي قرآن بصوت خفيف جدا جنبك وانتي نايمه وان شاء الله لن تزورك الكوابيس

لي عوده ,,

[لماضة مصرية جدا]

السلام عليكم و رحمة الله و بركاته

إنت جيت....شااااااااهقة يا رمضان:)

حمدلله علي سلامتك يا كابتشن ريمو و الف سلامة عليكي من الهس هس...طب هش السلعوة:)

بصي يا جميل

واضح انك اخدتي الحج رحلة جسدية و نفسية منهكة جدا...و ده واضح من التوتر النفساوي اللي كنتي فيه علشان قلقانة علي ماما

الحمدلله رب العالمين ربنا كتبلي الحج و اسرتي كانت خايفة عليا جدا لاني مناعتي ضعيفة و تعبي قريب...و تقريبا بابا و ماما تعبولي مقدما...بس الحمد لله ر بالعالمين ربنا كمله بعفوه و رحمته

مش هتصدقي اني مشيت من عرفة للمزدلفة لمني....ايون الحمد لله اخدناها مشي مع ان كان فيه اصابة في الضهر من اثر حادث

و مش هتصدقي برضه ان احنا بتناها في الشارع و لغاية دلوقتي لما اخويا و مراته بيحكولي انهم كانوا بايتين في خيم مكيفة بتنرفز عليهم اوي

مش علشان انا كنت غاوية بهدلة

علشان اللي فهمته عن الحج انه حالة زهد من كل الدنيا دي

حالة تجرد من همك و قلقك و حيرتك و تفاصيل الصخب اللي مالين بيها حياتنا

الحاج لما بيخفف ملابسه (الراجل طبعا) ده رمزية انك بتتجردي من كل قيد عمال يشدك للارض

و عشان كده حبيناها تكون حاالة "هجرة" حقيقية و الحمد لله ربنا كتبها لينا

او ليلة بقي رجعنا البيت في السعودية...(في جدة) انا فاكرة كويس

دخلت اوضتي و اول مرة احس اني مستغرباها

اينعم هي مبهدلة و مكركبة بشكل غير عادي...(ماتاخديش في بالك بقي)

بس حسيت اني لا انتمي ليها

و لا انتمي للبيت دوت

و ان الدنيا اللي الواحد كان عمال يجري فيها يعني متستاهلشي كل ده

يمكن الليلة دي فكرت في الموت

و فكرت في القبر و يا تري حتي بعد الحج هكون مستعدة و لا لا

بس تاني يوم كان عندي مدرسة الحقيقة

فنمت

و لما صحيت

لقيت

حقيقي انا كنت بفكر في الموت

بس مش الموت اللي احنا عارفينه

ده موت الخوف جواكي

ده موت القلق جوه منك اللي بيصاحبنا منين ما نكون

ده موت انك تتعلقي بحد او بحاجة و متتعلقيش برب العالمين

حسيت ساعتها معني انك تتولدي من جديد

تتولدي بس المرة دي حبلك هيكون متعلق بربنا مش ببني آدم

روحت المدرسة

و كأني بشوف اصحابي لاول مرة

و كأني بشوف الديسك لاول مرة

كلهم جم يباركولي و كدهوت

بس انا حسيت اني عليا مسئولية اكبر

انا عايزة اكون الكائن اللي ربنا يفاخر بيه بين ملايكته

انا عايزة اكون العبد الرباني اللي هو متشعلق بربنا في كل خطوة بيعملها

كنت ساعتها في تانية ثانوي

و ابتديت اقول لاصحابي علي الفكرة دي

و من ساعتها حاجات كتير اتغيرت جوه مني

حقيقي في لحظة اتمنيت اموت...علشان يعني يبقي الواحد حج و مات

بس طالما ربنا كتب لي الحياة

يبقي ربنا لسه شايف فيا اني اكون خليفته في الارض

و لازم بكرمه اعمرها علي مراده

نصيحتي ليكي

استريحي جسديا علي اد ما تقدري

و داومي علي الصلاة بنفس الروح اللي كانت في الحج

صلي في مكان مغلق علشان تركيزك ميتشتتشي

و ابتدي حطي خطة بقي

يا تري هتكوني عبد رباني ازاي؟؟؟

من خلال بنتك

و بيتك و زوجك

و اهلك

و كل دايرة انتي بتقربي منها

صدقيني يا ريمو

عينيكي هتقري كل المعطيات بشكل تاني خالص

بس افتكري دايما ان حبلك هيكون متعلق بربنا

و ان الحج مش بيخلص برمي الجمرات...انتي في رحلة هجرة لغاية ما نوصل للبر التاني باذن الله

حمدلله ع السلامة

و ربنا يكتبهالنا تاني و يتقبلها مننا اولاني

صباحك.......قرب من كل طاعة تيحي قلبك و روحك

[طه بدر]

اولا حمد الله على السلامة وواضح ان الحج عمل عمايله

يعنى كتبتى المداخلة الاولى وبعدها بدقائق خناقة علشان ما حدش رد

بالراحة يا حاجة

طبعا انا ها اقولك ما تحرج منه الباقون

انت مصدومة وحاسة ان الحج مش مفروض يكون كده

كنت متصورها رحلة مع الملائكة لقيتهيها حاجة ثانية خالص

اكتشفتى ان الروحانية اللى بتشوفيها فى الافلام مش موجودة

وما فيش اغانى ليلى مراد وام كلثوم تبدا عند دخولك الحرام

والشكوى من الحملة والزحمة والتعب والحاجات الانسا نية جعانه مشغولة بماما تعبانة

صدقينى هذا ما يحدث للغالبية خاصة فى اول مرة

الحج مشقة وهو الجهاد للنساء وليس مفروض ان الجهاد يكون مريح

كل الحجاج ناموا مثلك فى مزدلفة لانها ببساطة لا يوجد بها مبانى الا الحمامات والمسجد يعنى كله كده

المشكلة اختى العزيزة اننا نتصور شىء والواقع لا يمكن تصوره الا لمن كتب الله له الحج

انا شخصيا لم اشعر بكوابيس بعد الحج لانى اخذت اسبوع كامل لا اصحو من النوم الا للصلاة ولا كوابيس الدنيا كانت ها تعمل حاجة

حج مقبول ان شاء الله وتاكدى من القبول والمغفرة كما امرنا الرسول صلى الله عليه وسلم فهناك حديث بمعنى ان من نزل من عرفات وظن ان لم يفغر له فقد اذنب

احمدى الله على كرمه ان كتب لك الحج

وادعى بالقبول رغم التقصير

وربنا يكتب لك الحج مرات ومرات

تحياتى

[عصام أبوالفتح]

حج مبرور وذنب مغفور يا بينك ان شاء الله ... اختى حجت هذه السنة معكى ولله الحمد

انا شايف ان عقلك الباطن بيبعتلك رسالة واضحة انتى لسه مقريتهاش ... عدم اطمئنانك اثناء المشاعر المقدسة لهاكى عن ذكر الله وربنا بيقول ألا بذكر الله تطمئن القلوب .. وعلاجك فى المداومة على الأذكار ... تأكدى من ذلك

الف مبروك يا حاجة بينك .. رسمة كعبة وناس بتطوف .. وطيارة .. وواحدة لابسه ابيض فى ابيض او اسود فى اسود مش عارف :)

[Howayda Ismail]

حمد لله على سلامتك ياريمو

حج مبرور وذنب مغفور ان شاء الله

هو صحيح لم احج بعد

لكن احساسك وحالتك دى بالضبط مريت بيها من مدة

واعتقد ماهى الا حالة وسوسة من الشيطان بتحصل لما الانسان فى لحظة مايكون قريب اوى اوى من ربنا

بيحاول يخوفه ويبعده عن حالة الطمئنينة والسكون واكتر الشفافية فى علاقته بربه

احلامى وصلت كنت باشوف غسلى وكفنى وكنت مرعوبة وسالت فى المسجد عنه قالولى ده خير متخفيش

كنت تايهة عن كل اللى حواليا كانهم حلم نفس احساسك دلوقت والله ياريمو

بس هى فترة وحتعدى ان شاء الله اطمنى

[عبير يونس]

الحمد لله ع السلامة يا قمر

و الكوابيس دي عادي جدا

ما تقلقيش

فترة و حتعدي

اصل الحج له رهبة كده

بالاضافة للتعب و الارهاق

اما حكاية انك خايفة تغلطي دي

فاحب افكرك يا جميل

ان ربنا سبحانه و تعالى بيحب الخطائين التوابين

امال الاستغفار و الذكر ليه يافندم؟؟؟

و العبادات اصلا مكفرات للذنوب الصغيرة ( اللمم) اللي حضرتك خايفة منها

الاحساس بتاعك ده حيوديكي في سكك تانية

احنا مش ملايكة

و طبيعي نقع في ذنوب

عيشي حياتك عادي و الزمي الاستغفار

ده المطلوب من البشر

المطلوب هو اجتناب الكبائر ربنا يعافينا جميعا

اما خايفة تتكلمي دي اوعي تستلمي لها

آخرها العُجب بالنفس و العياذ بالله

اللهم عافينا و إياكي

انتي انساااااااااااانة و مش ملاك

المهم اخلاص النية مع الله تعالى وذكره جل و علا و سؤاله الدائم بالثبات على الطاعة

و غير كده

مدخل شيطان كبيييييييييير

خدي دي لمريومة

و ما تنسيش عيد ميلاد مريومة و حبيبة بنتي كمان 3 أيام

يعني تورتيتين سعادتك

:closedeyes:

هههههههههههههههههه

فرفشي بقى

ربنا يكتب لك الحج مرات و مرات ويتقبل منك

آمين

[طبيبة بالخارج]

الصراحة بعد الحج أنا أخذت نومة طويلة لأني في الحج كنت تقريبا لا أنام ده طبعا بجانب المجهود الجسماني

بس لم يكن هناك ضغط عصبي (من كلامك انك سبتي بنتك لأول مرة و كمان شلتي مسئولية القلق على الست الوالدة ربنا يطول في عمرها و يديها الصحة) فمتهيألي التوتر ده بجانب الغيظ المكبوت من مشاكل الحملة و نوع من الذنب عشان عدم التركيز في آخر طواف انعكس في صورة كوابيس بعد ما روحتي

الكوابيس علاجها زي ما قالوا لك أذكار و قرآن قبل النوم

أما مسألة الخوف من الوقوع في سيئات فده بيكون أكيد مع كل واحد راجع من الحج بس بدرجات مختلفة

و اطمأني لن يستمر لأننا كبشر مش معصومين من الخطأ

انظري لقصة خروج آدم من الجنة لأن قصته أصبحت سنة على البشرية اننا كبشر حنغلط بس الصالح فينا اللي يتذكر ربه و يستغفر و يتوب

و تذكري أيضا آخر آية في سورة البقرة و ادعي بها: " ربنا لا تؤاخذنا إن نسينا أو أخطأنا ربنا و لا تحمل علينا إصرا كما حملته على الذين من قبلنا ربنا و لا تحملنا ما لا طاقة لنا به و اعف عنا و اغفر لنا و ارحمنا أنت مولانا فانصرنا على القوم الكافرين"

و لا تخافي أن يصبح خوفك من الذنوب مرضي لو كده يبقى يا ليتنا جميعنا عندنا هذا المرض