المقاولون بطل كأس مصر

[disappointed]

المقاولون العرب بطل كأس مصر بعد فوزه على النادى الأهلى 2/1

:P :P

للأسف الشديد , فاتنى أن أكون شاهد عيان على هذا الحدث التاريخى , فقد كنت أعتقد أن الأمور محسومة للأهلى و أنه سيفوز على فريق المقاولين الذى فشل فى العودة للدورى الممتاز منذ هبوطه آخر مرّة منذ موسمين , ولذلك فضلت أن أقوم بعمل شوبنج على أن أعود للمنزل على نهاية المباراة لمعرفة النتيجة التى إعتقدت أنها ستكون لصالح الأهلى

ولكن....

إذا بعاصفة من الرسائل القصيرة تهاجم موبايلى و أنا على الطريق السريع أثناء عودتى للمنزل لتبلغنى بالخبر الصاعقة : المقاولون بطل كأس مصر , و لأول مرّة نادى درجة ثانية يفوز بكأس مصر

لم ألحق عند دخولى للمنزل و فتحى للتليفزيون سوى الجزء الأخير من الأستوديو التحليلى على قناة النيل للرياضة, ولم أشاهد الأهداف ولكن فهمت من سياق كلام طاهر أبو زيد أن الأهلى أضاع ضربة جزاء فى الدقيقة الأخيرة من المباراة و النتيجة 1/1 و إرتدت الكرة بهدف للمقاولين ( مع ملاحظة أن طاهر أبو زيد قال أنه لا يرى فيها ضربة جزاء أساسا) ... وكذلك فهمت ضمنيّا أن أمير عبد الحميد حارس مرمى الأهلى أصيب إصابة بالغة ( ربّنا يشفيه و يقوّمه لأهله بالسلامه....أنا أصلى بأتغم و بأكتئب قوى لمّا لاعب كرة يصاب إصابة بالغة خصوصا لمّا يكون لسه فى أول الطريق......ربّنا يشفيه و يسترها معاه يا رب)

الغريب هو أننى فوجئت بطاهر أبو زيد و هو يشن هجوما ضاريا على مانويل جوزيه دون أن ألمّ بوضوح بأحداث المباراة التى أدت لهجوم طاهر أبو زيد العنيف على مانويل جوزيه (هوّه الراجل ده عمل إيه للدرجة اللى خلّت طاهر أبو زيد عايز يأكله بسنانه كده؟؟)

ماعلينا.....

للأسف.....

ستؤدى خسارة الأهلى للكأس إلى عدم مقابلة الزمالك له فى كأس السوبر فى بداية الموسم القادم – لم يفتنى طبعا مشاغبة سى السيّد برسالة قصيرة بهذا الخصوص- ( الواحد بقت هوايته و تسليته مقابلة الأهلى بصراحه smk: .... والواحد كان مستنّى الماتش ده بفارغ الصبر بعد الأهلى ما فلت من الزمالك بإنسحابه من البطولة العربيّة...... بس الظاهر مافيش نصيب n2&( ...... إنما حيروح مننا فين؟؟؟ جاى جاى فى الدورى الجاى ys): .... وفين تروح الشمس من على قفا الفلاّح؟؟؟ ;) )

عقلى الباطن بيقول :

  طب نعمل إيه يعنى علشان الأهلى يأخذ بطوله؟؟؟؟ فريق درجة ثانيه و جبنا له.... نعمل إيه يعنى أكثر من كده؟؟؟ نجيب له فريق درجة رابعه يعنى والاّ نلمّ له فريق يلاعبه من على القهاوى؟؟؟

أما عن أروش رسالة قصيرة وصلتنى فكانت بتقول :

ياللى عملتوا الفياجرا....ورجّعتوا الفحوله

إعملوا للأهلى حاجه...تخلّيه يأخذ بطوله lo:: lo::

و.....

حسن شحاته يا معلّم......خلّى الأهلى يتعلّم

[Farida]

مبروك للمقاولين علشان ربنا ما يرضاش بالظلم

[Modest]

أنا قاعد يا دكتور من الصبح قدام باب المحاورات مستني سي السيد يفتح الموضوع ده لكن علمت من مصادري إنه اعتذر لأسباب صحيه

الماتش كان عبارة عن هجوم من المقاولين في الشوط الأول و لولا أمير حارس الأهلى (ربنا يتم شفاه) كانت بقت فضيحة بجلاجل smk: .. يعني نقول أربع خمس ,, لأ نقول ست اجوان راحت من المقاولين في الشوط ده و كان دفاع الأهلي كتَّر ألف خيرهم كنوع من الكرم سايبين مهاجمي المقاولين يعملوا ما بدا لهم رايح جاي لغاية ما في نهاية الشوط محمد جودة جاب جول بصراحة جميل (على عكس سير المباراة) من ضربة حرة خارج منطقة الجزاء و رد عليه روبرت أكوروي بهدف شبيه من ضربة حرة برضه من خارج منطقة الجزاء غيرت اتجاهها و دخلت مرمى الأهلي.

و انعكس الحال في الشوط التاني بعد ما الخواجة جوزيه تفتق ذهنه عن فكرة خزعبليه و قام عامل الـ3 تغييرات مرة واحدة من غير ما يعمل حساب لا وقت إضافي و لا إصابات و لا دياولو.

تسيد الأهلي تقريباً الشوط الثاني بلا فاعليه تُذكر إلى أن أُصيب الحارس الأمير اللي كان شايل بلاوي لإصطدامه بزميله أثناء إنقاذه لهجمة خطرة.

و لبس عم شادي فانلة حارس المرمى مع تشجيع جنوني من الجماهير لكن تقول لمين lo::

حرص الأهلي على ابقاء الكره في نصف ملعب المقاولين لأطول فترة ممكنة و نجح إلى حد ما إلى أن """" احتسب له """" حكم اللقاء ضربة جزاء من تمثيلية لخالد بيبو ماحدش في الملعب و لا قدام التليفزيون شافها إلا هو و شوبير اللي كان بيعلق على الفضائية ... و كانت هاتتكرر مأساة ماتش نهائي الكاس مع المصري لما علاء ميهوب جاب جول تسلل بتلاتين متر في نهاية الماتش لكن ربنا لم ُيرِد و صد حارس مرمى المقاولين ضربة الجزاء و ارتدت على مرمى الأهلي هدف برأس لاعب مش فاكر اسمه أثناء ما الحارس شادي كان طالع يمسك الهوا كتر خيره n2&(

و دي كانت نهاية فرقة النادي الأهلي المسرحية و عقبال المواسم القادمة fsh::

[هشام عبد الوهاب]

ابو المحابيط .... اللى حصل لا ينقال ولا ينقرا ولا كان يحلم به اى اهلاوى ...

الشوط الأول باختصار ... سيطرة كاملة للمقاولون وهوباااااااا جودة يجيب جون n2&( بس ايه 3 دقايق والتعادل حصل .

الشوط الثانى ... السيد جوزيه عنتر الفزلكاوى يفاجئ نفسه اولا والجميع بتغيير 3 لاعبين للأهلى فى بداية الشوط s-: ax: me0:

وفى الدقيقة 31 يصاب امير حارس الأهلى (الله يشفيه) بكسر مضاعف فى قدمه لما سقط فوقه لاعب من المقاولين (دون قصد)

شادى محمد لعب حارس مرمى ( وهو اساسا مش نافع لاعب فى اى مركز)

فى الدقيقة 42 صاحبنا بيبو يعمل تمثليه هايفه على الحكم ( اللى ما صدق وهوباااااا) ضربة جزاء ( صديقى الأهلاوى اللى شاهدت المباراة مضطرا معه قال: ايه ده د حسبها )

جودة يسدد فى منتصف المرمى وبعدها اعتراض من احد اللاعبين على الحكم وهوبااااااااا كارت احمر .... هجمة للمقاولين .. جوووووووووو ل ....صدمة ... سيرك 5 دقايق .. جوزية وشه ازرق .. الجمهور بلم ... الحكم اتخض ... لاعبى الأهلى مبرقين ومحولين ... الكاس ضاع .. الموسم انتهى صفر كبير .

[Cleo]

صفر كبير

و إيه يعنى....

عادى.... n2&(

[zamalkawy]

الف الف الف مبروك لهالة و جمهور هالة اللي شرفونا امبارح و بالمناسبة السعيدة دي نفسي اسمع اغنية مربوط على الدرجة التانية و الناس درجات و مرشح اخد التلاتة من غير علاوات n2&(

[Modest]

عقلى الباطن بيقول :

n2&(  طب نعمل إيه يعنى علشان الأهلى يأخذ بطوله؟؟؟؟ فريق درجة ثانيه و جبنا له.... نعمل إيه يعنى أكثر من كده؟؟؟ نجيب له فريق درجة رابعه يعنى والاّ نلمّ له فريق يلاعبه من على القهاوى؟؟؟

[zamalkawy]

لا و كله كوم و ضربة الجزاء كوم تاني و فين في الدقيقة قبل الأخيرة التحكيم المصري بيعمل شغال مع هالة

انا كان نفسي الماتش ينتهي تعادل علشان في الوقت الأضافي بقى اجوان بالهبل بس هالة محظوظة حتى و هي بتخسر:(

[kokowawa1979]

محبط كتب :

ياللى عملتوا الفياجرا....ورجّعتوا الفحوله
إعملوا للأهلى حاجه...تخلّيه يأخذ بطوله

أخونا العزيز محبط : إذا كانت الفياجرا بتعمل حاجة للميت يبقى الأهلى ينفع معاه اللي بتقول عليه .

طبعا أنا مسوط قوقوي قوي على رأي اسماعيل ياسين n2&( لإن ضربة الجزاء الظالمة التي احتسبها الظالم عصام عبد الفتاح قبل نهاية المباراة بدقيقتين كانت مسرحية هزلية عبثية بجد لأن خالد بيبو عرف يمثل بس هو عارف إن تمثيله الغشيم هيجيب فايدة مع طاقم حكام يمثل لاعبين استراتيجيين للنادي الأهلي !!

وصدقني ياأخ محبط حينما دخل محمد جودة لتسديد ضربة الجزاء قلت يارب اللهم اعمي بصيرته وذل عصام عبد الفتاح وجمهور الأهلي !!! وقد كان

المهم يا أخ محبط لك أن تتخيل لو كانت ضربة الجزاء الظالمة دخلت وفاز الأهلى بالكأس ماذا كانت ستكون عليه عناوين الصفحات الرياضية الحمراء . خد مثلا الأخبار الأهلوية العنصرية كان مانشيتها الرئيسي سيكون :

الأهلي يفوز على المقاولين بدون حارس مرمى وبعشرة لاعبين .

أما الأهرام : الأهلي يقهر المقاولين بدون أمير عبد الحميد.

الجمهورية : جوزيه وبس !!!

يعني ماكناش هانخلص ياأخ محبط وصدق كوكو واوا حينما قال إن الأهلي سيفوز بالسلطانية وطبعا الإخوة الكبار سنا يعرفون قصة السلطانية بتاعة تاج الجزيرة (أوبريت قسم وأرزاق) . smk:

[البحار الجريح]

دا كان ردي على زميل اهلاوي بيقول صحيح الاهلي محظوظ ياجماهير الزمالك والاسماعيلي والمصري ,,

قصده يعني يقول ان الاهلي منحوس والحارس اتصاب وبيلعب 10 ومش عارف اايه

رحت رديت عليه وقلت له /

هاردلك وخيرها في غيرها لكن انا عاوز اعلق على الكلمة الاخيرة بس

انت لو لاحظت ان ربنا رأف بحال جماهير الاهلي وانتهت المباراة في الشوط الاصلي 2/1

لكن لو كانت انتهت 1/1 .. كانت هتبقى فضيحة للاهلي

لانه ببساطه الاهلي بيلعب من غير جون ,,

وله في ذلك حكمه ,,

شفت جون المقاولون شادي طلع ازاي ؟؟؟؟ والله بجد اول مرة شادي يصعب عليا بجد مش تريقه والله

حتى والاهلي بيخسر بيكون محظوظ

يعني جون المقاولون دا ,, جون غريب قوي وشادي طبعاً لايلام ابداً عمره ماوقف حارس ,,

ولو الشوط الاضافي استمر ,, كان ممكن نشوف اجوان كتيرة في الاهلي وكانت ممكن تبقى تاريخيه ,, وشادي محمد ممكن يدمر نفسياً

يعني الحمدلله على كل حال

وعشان تعرف بس ان الاهلي محظوظ

ودمتم

وهاردلك لكل الاهلاويه ,, بجد اول مرة في حياتي ازعل عشانكم

[DARWEEN]

معلش معلش

أدينا بنسيب الغلابه يمكن يقربوا شويه من الأرقام القياسيه

n2&( smk: lo::

طيب لعلمكم لو الأهلي كسب بضربة الجزاء كنت حازعل جدا علشان مش بأحب نكسب غير بأجوان ملعوبه زي بتوع

1

2

3

4

5

6

وبرضه

الأهلي عمهم وحابس دمهم

[se_ Elsyed]

تعودت دائماً بانظر للأمور نظرة شاملة ... المأساة لا تكمن في إن الاهلي خسر الدوري او الكأس .. طب ما إنجلترا وفرنسا واسبانيا وألمانيا خسروا .. لكن دول بيلعبوا كوره .

أما الاهلي فمصيبته لا تنكتب ولا تنقرا .... فالذي يجب ان يتم إعدامه رمياً بالكور هو حسن حمدي أفشل رئيس لمجلس إدارة الاهلي واللي أنا متأكد وجايب نتيجتها من الكنترول هايفوز في الإنتخابات بعد شهور قليلة .. فما إرتكبه في حق الاهلي كثير جداً ومنها على سبيل المثال الهزائم المذلة محلياً وعربياً وأفريقياً ، الخسارة المتكررة للدوري ، تدمير قطاع الناشئين بعد ان تم تعيين فتحي مبروك الفاشل والذي لم يأتي من وراءه اي خير ومافيش حد في ناشئين الاهلي الآن عليه الطلى ، كذلك تطعيم الفريق الاول بمجموعة من الفشلة في الأندية المحلية والذين كبيرهم قوي إنهم يلعبوا في ودانهم أمثال خالد بيبو وأحمد رضوان ورامي سعيد وسعيد عبد العزيز وإفيلينو المشلول وجيلبرسون أبو 150 ألف يورو في 6 شهور وآخرهم عماد النحاس أجدع واحد يدخل أجوان في نفسه واللي الزحلفة أسرع منه ومحمد بركات اللي طلع معاش من بدري ... وغيرهم وغيرهم من كُناسة الأندية .

ويكفي ان نُلقي نظرة على حال الاهلي لنجد بإن مافيش فيه رأس حربة صريح غير أحمد بلال اللي جاله رباط صليبي .. حتى اللي بيشتريهم الأهلي عمال يستفهم في الدفاع وخط الوسط وكأنه بيبني حيطة ...

لم أحزن بالامس لخسارة الكأس لأن كده كده الأهلي هايشترك في بطولة أفريقيا كوصيف للدوري .. ولكن احزن على حال النادي وجمهورة وأعضاءة الذي يلتزمون الصمت تجاه هؤلاء الفشلة وما يفعلونه ... حتى المدربين اللي جابهم في السنتين تلاته الأخرانيين كانوا نص لبه وما ينفعوش يدربوا مركز شباب ديرب نجم ومنهم جو بونفريير وأوليفييرا وتابعه قفه ولهفوا ملايين الدولارات في مقابل الصفر بالرغم من وجود مدربين عاطلين على قهوة السواقين أمثال الكابتن س س اللي عنده إستعدادا ياخد 140 ج ويحقق نفس الفشل ده ويمكن أفضل منه كمان ...

وأنا متأكد بإن غداً سوف تظهر اللافتات الخايبة المعتادة التي تدعو إلى الإستقرار ومنح جوزية فرصة يبدأ على نضافة الموسم اللي جاي وبناء فريق قوي جديد ... ولكن لابد أن أعترف بإن جوزيه جه لقاها خربانه أساساً والكل زعل منه لما قال من حوالي شهر بإن قطاع الناشئين ليس فيه لاعب واحد يُمكن ان يتم تصعيده للفريق الأول ... وقد صدق .

[Guest Mohd Gramoun]

مبروك للمقاولين

كان الفريق الافضل اداءا و خططا و تكتيكيا و مهارة.

جوزيه غامر و أحيي فيه روح المغامرة و لكن أتت الرياح بما لا تشتهي السفن و لجمهور النادي الاهلي و محبيه.

النادي الاهلي لايزال الافضل علي الإطلاق و رغم الغيابات و الإصابات إلا أن روح جمهوره و صراحة مدربه و تحمله المسئولية كاملة يكشف ان الاهلي مؤسسة رياضية تختلف عن جميع المؤسسات الموجودة في مصر.

رغم حبي الشديد للنادي الأهلي و حزني علي الخسارة إلا إنها الرياضة ...لابد من فائز وخاسر..

والنادي الأهلي كان الخاسر فنيا و نتيجة...لكنه الفائز بروحه الرياضية و مثالية لاعبيه و عدم خروجهم عن الروح الرياضية مثلما نشاهد من بعض أشباه الفرق و مشجعيهم..

ولعل الجمهور الأهلاوي ضرب مثلا في أحترام الخصم و تقبله الفوز بروح رياضية و لم يعلق الخسارة علي عصام عبد المنعم او فتحي أبو ستيت و لم يأتي أهلاوي يتكلم في البصاق او المؤامرات السياضية..

نعم هذا هوالنادي الاهلي وجمهوره... إن فاز كان فوزا مستحقا نبارك و نهنئ و نربت علي كتف الخاسر... وإن خسر نقف بجانبه و ندفعه للقيام من كبوته..

الأهلي .....نادي القرن

إدلع يا كايدهم.....خسران ...كسبان.....برضه الاهلي...هو اهلي

[afiona]

مبروك للمقاولين و حظ سعيد للأهلى أمام فرق الدرجة الثانية فى المرات القادمة....

و كانت هاتتكرر مأساة ماتش نهائي الكاس مع المصري لما علاء ميهوب جاب جول تسلل بتلاتين متر

ياااه eey:: ha) ...فات عشرين سنة على المهزلة دى .....منك لله يا modest الواحد كان إبتدى ينسى الماتش المشئوم بتاع الأهلى والمصرى:3/1 فى نهائ كأس مصر 1984......

الجول بتاع علاء ميهوب كان فى الدقيقة الثامنة من الوقت بدل الضائع ha) وبعد إلغاء هدف لحسام غويبة ha) لأسباب لم يفصح عنها الحكم الأحمر حسين مهاود وحيفضل سره معاه لغاية لما ربنا يتوفاه بعد عمر طويل. هدف علاء ميهوب كان تسلل بفدان أرض ha) وكمان علاء وقف الكرة بإيده وبالراحة (مفيش حاجة) ولف ودار و شاط وعادى جدا ... :o

هيه،كانت أيام سودة(أو إدا شئت الدقة حمراء) فى التحكيم....

مهاود :lol: ...النادى :lol: ....الحمامصى :lol: ....صيام... :lol:

[zamalkawy]

ولعل الجمهور الأهلاوي ضرب مثلا في أحترام الخصم و تقبله الفوز بروح رياضية و لم يعلق الخسارة علي عصام عبد المنعم او فتحي أبو ستيت و لم يأتي أهلاوي يتكلم في البصاق او المؤامرات السياضية..

نعم هذا هوالنادي الاهلي  وجمهوره... إن فاز كان فوزا مستحقا نبارك و نهنئ و نربت علي كتف الخاسر... وإن خسر نقف بجانبه و ندفعه للقيام من كبوته..

ستات مصر قالو كلمتهم النخلتين سمنتهم

هو الجمهور كان له عين يفتح بوقة بعد ضربة الجزاء الظالمة و بعد ما الحكم طرد لاعب

و على فكرة بقى جوزية اصلا لطم لهم لما اتحسبت ضربو الجزاء وقعد يقول لا بلاش مش عايزن الكأس هنلاعب الزمالك في السوبر لا بلاش خاليها كدة انا صاحب مرض و نفسي اكمل الدوري اللي جاي مع الأهلي اهي سبوبة و رزق الهبل على المجانين

:rolleyes: tot::

لا انا اللي افتكرته ساعة ضربة الجزاء جون المعلم في الدوري اللي حسام حسابو اوفسيد رغم ان المعلم جاري من نص ملعبنا mf-:

[Guest Mohd Gramoun]

النشاز لا يزال يطفوا علي السطح...

تم الحذف بمعرفتي س س

شكرا للإدارة

العفو يا عم مجرمون يا متعصب ، س س برضوا أهلاوي حتى النخاع لكن بأشجع اللعبة الحلوة ( الأهلوية ) وبأقول اللي فاز جود لاك واللي خسر أقعد بالعافية

[se_ Elsyed]

النشاز لا يزال يطفوا علي السطح...

شكرا للإدارة 

إيه يا عم محمد .. إنت شككتني في نفسي وأعدت قرأة كل االمداخلات ولم أجد بها أي شيء خارج ... قولت يمكن موحبيط الزملكاوي مغني اغنية بصوت الأجش ومنشز فيها .. أما ادخل ألغيها له قبل ماحد يسمعه ويتصرع .. لا لقيت أغاني ولا أماني .

باب الرياضة يا أخي يعتبر ذو موضوعات خفيفة والكل بيدخل يتكلم ويشجع الفريق بتاعه ويقطع في فروة الفريق المنافس بشكل كوميدي وساخر وفي إطار محترم .. وعندك موحبيط مثلاُ هراني إس إم إس بعد الماتش وبيشمت فيه ولا كأن المقاولين هزموا فريق مكابي تل أبيب ... لكن انا ماسكتش رديت عليه بالمثل .. لكن لحد دلوقت لسه أصحاب :rolleyes: .

لكن لما نييجي للجد يبقى إن شالله يولع الاهلي على الزمالك إذا كانت المواضيع المتعلقة بهم هاتؤدي إلى خلافات ومشاحنات بين الزملاء ..

تيك إت إيزي يا عزيزي ...

مافيش فرقة في العالم بتكسب على طول ولا تخسر على طول ... وحتى الزمالك ماهو لسه متظبط في البطولة العربية وشرب قبلها كأس العذاب في مسابقة كأس مصر ..

وبعدين تعالى هنا .. هو بعد اللي شفناه في كأس الأمم الأوروبية حد يجرؤ ويقول عندنا كوره ...

يا حبيبي قول عندنا حوكشه ... بلي مسافات طويلة .... تشليت حر .... قول زي مانت عايز ..

وعندك النهاردة ماتش بنين لو خسرنا أو إتعادلنا يبقى ركبنا الطفطف وإلى اللقاء في تصفيات كأس العالم 2010 .

[Guest Mohd Gramoun]

ولعل الجمهور الأهلاوي ضرب مثلا في أحترام الخصم و تقبله الفوز بروح رياضية و لم يعلق الخسارة علي عصام عبد المنعم او فتحي أبو ستيت و لم يأتي أهلاوي يتكلم في البصاق او المؤامرات السياضية..

نعم هذا هوالنادي الاهلي  وجمهوره... إن فاز كان فوزا مستحقا نبارك و نهنئ و نربت علي كتف الخاسر... وإن خسر نقف بجانبه و ندفعه للقيام من كبوته..

ستات مصر قالو كلمتهم النخلتين سمنتهم

اخي احمد ..

لو يرضيك الكلام المكتوب فوق ده......

فستكون هذه آخر مشاركة لي بالمنتدي.

[se_ Elsyed]

ولعل الجمهور الأهلاوي ضرب مثلا في أحترام الخصم و تقبله الفوز بروح رياضية و لم يعلق الخسارة علي عصام عبد المنعم او فتحي أبو ستيت و لم يأتي أهلاوي يتكلم في البصاق او المؤامرات السياضية..

نعم هذا هوالنادي الاهلي  وجمهوره... إن فاز كان فوزا مستحقا نبارك و نهنئ و نربت علي كتف الخاسر... وإن خسر نقف بجانبه و ندفعه للقيام من كبوته..

ستات مصر قالو كلمتهم النخلتين سمنتهم

اخي احمد ..

لو يرضيك الكلام المكتوب فوق ده......

فستكون هذه آخر مشاركة لي بالمنتدي.

يا حاج محمد ... سيبهم يقولوا اللي عايزينه ... إنت عارف الأهلي قلعة كبيرة والزمالك هو قلعة الكبش .. ودائماً هذا هو حال الكبار لازم يتحملوا قلة عقل الصغيرين .. إنت مش بتشوف لما تيجي تلاعب عيل صغير مش ممكن يبهدل هدومك ويخليك تغير أو حتى ينقض وضؤك :rolleyes:

تعالى بس بكره نتقابل على قهوة كتكوت أنا وإنت حاكم هاندي كرافت في دبي الأسبوع ده والمشاريب على حسابي وليك عليه أقعد أجيبلك في سيرة الزملكاوية ونتكلم عن تاريخهم الإجرامي الأسود المليء بالحركات ...

وإدعي معايا يارب مرتضى منصور يكسب الإنتخابات عشان يكبس عليهم البوليس يلم الفريق والجمهور وأعضاء النادي وكل اللي في ميت عقبة .

وبعدين مالها سمنة النخلتين .. أنا عن نفسي بأطبخ بها لأنها رخيصة ومرملة .. بس مازلت سمنة الروابي أطعم .... لأن فيها طعم الزبدة الفلاحي . tot::

[R.M.G.]

الأهلي قلعة كبيرة

صح

يسيب واحد زي خوزيه يلعب بيه!

غلط

على مدار سنوات طويلة أراقب فيها الكرة كمراقب فقط دون انتماء لم أر الأهلي يتردى فيما تردى فيه على مدار السنوات الماضية

يلهث وراء لاعبين منتهى الشرف لهم ولأنديتهم ان يلعبوا للأهلي

يتنازل ويفرط في لاعبين ثم يعود لطلبهم

تنازل عن خوزيه ثم عاد اليه يطلب العفو والسماح فتحول من مجرد مدرب إلى صاحب عزبه أسمها الأهلي وتصور أنك تفرط في موظف لديك لأي سبب ثم تعود إليه طالبا منه العفو والعوده لما أصبك من فشل بعد رحيله فكيف سيتعامل معك بعدها

صدقوني

الزمالك هو الزمالك بكل قرفه ومشاكله

الأهلي لم يعد الأهلي وعندما يعود أهلي ستعود البطولات إلا أنني لا أرى ما يشير إلى هذا في المدى القريب

الأخوه الكرام جميعا لاداعي لمجرد الحديث عن هؤلاء اللاعبون المرتزقه عديمي الموهبه لأنهم جميعا أقل من هذا بكثير وأقسم بالله أنني كدت أتقيأ وأنا أتابع مباراة نهائي الكأس وتصورت من بطئهم أن الأرض مرشوشه غراء واللاعيبه مش قادرين يرفعوا رجولهم

حاجة تقرف