إدمان الإنترنت والتقوقع على الذات..

[Folana]

السلام عليكم ورحمة الله....

سبق لنا أن طرحنا قضية الجرائم الديجيتال ، والتى تعرف أحياناً أخرى بإسم الجرائم الإلكترونية ، وكان مقصدنا فى ذلك الحين أن ندق ناقوس الخطر مُنذرين ومُحذرين من الوجه الأخر لثورة " الإنفوميديا " ، الثورة التى غيرت العالم ظاهره وباطنه وذلك إلى الحد الذى يمكن أن يؤرخ فيه بما قبل ، وما بعد " ثورة الإنفوميديا " ،

بما يذكرنا فى تاريخ العالم بما قبل وما بعد الثورة الصناعية ، وقد كان للمنتدى السبق فى طرح هذه القضية وكشف الستار عن إساءة أستخدام هذه التكنولوجيا وهانحن اليوم نعود لطرح الجانب الأكثر أهمية بعد أن وجدنا العالم بأسره ، ونحن بطبيعة الحال جزء من هذا العالم ، نعانى من الوجه الأخر لثورة الإنفوميديا وتأثيراتها السلبية .

ولا شك أن التناول المنهجى العلمى الرصين لأى قضية من القضايا يُلزمنا بأن نتعمق فى ما نطرحه من قضايا حتى لا نجنح نحو التطرف مع أو ضد هذا الرأى أو ذاك، فنحن لا نعتبر الإنترنت كله خير ، كما لا نعتبر أنه كله شر ، فكل إبداع بشرى ينطوى على الأمرين معًا كسلاح ذو حدين ، وهذا ما يجعلنا نقول أن الإنترنت نعمة يمكن أن تنقلب إلى نقمة بإساءة إستخدامها ، وتتنوع إساءات الإستخدام هذه بتنوع دوافع وميول ورغبات و أخلاقيات وقيم من يستخدمها.

وتأتى مشكلة " إدمان الإنترنت " Internet iddiction فى مقدمة الأخطار التى يقع فيها بعض الأطفال وبعض الشباب ، بل وحتى بعض المسنين ممن وقعوا فى براثن ما عُرف إصطلاحاً بإسم "إدمان الإنترنت " ، وفى إستعراضنا لبعض قواعد البيانات المتخصصة فى الطب النفسى وفى علم النفس مثل قاعدة psychic-info ,وغيرها من قواعد البيانات ، خلصنا إلى أن مصطلح إدمان الإنترنت من المصطلحات المعترف بها علمياً كنوع جديد من الإدمانات يضاف إلى الأنواع المتعارف عليها من قبل ، حتى أصبح لدينا فئتين من الإدمانات

أولاً : إدمانات العقاقير أو المخدرات والكحوليات

ثانياً : إدمانات بغير عقاقير أو كحوليات

وهذا النوع الثانى هو الذى يمثل إشكالية فى أذهان البعض ممن يشككون أن هناك ثمة إدمان إلا إدمان ماهو مادى وملموس ، كإدمان المخدرات أو الكحوليات أو العقاقير ، ولكن أثبتت الدراسات والبحوث العلمية المعاصرة وجود أنواع أخرى من الإدمان وهى ما تعرف بإسم " إدمان المعنويات " ، أو الإدمان بغير عقاقير .....

نذكر على سبيل المثال : إدمان التسوق ، إدمان الطعام ، إدمان القراءة ، إدمان المقامرة .......وأخيراً وليس أخراً " إدمان الإنترنت ".

وقد أثبتت البحوث العلمية على إدمان الإنترنت ، أنه إدمان حقيقى بكل ما ينطوى عليه المصطلح من معنى ، وهو إدمان تتوافر فيه الخصائص الإدمانية المتعارف عليها فى المراجع العلمية المُعتبرة من قبيل D.S.M IV وهو مختصر " الدليل الإحصائى والتشخيص للإضطرابات النفسية " والذى تصدره " رابطة الأطباء النفسيين الأمريكية " بشكل دورى كل عدة سنوات ، والذى وضعت فيه المؤاشرات التشخيصية لأى إدمان وهى على النحو التالى :

(أ)...الإعتمادية ...

ب)..التحمل..( أى زيادة الجرعة )

ج)الأعراض الإنسحابية

وأيضاً أثبتت الدراسات الحديثة وجود هذه المؤشرات التشخيصية على تلك الحالات التى عُرفت فيما بعد بحالات " إدمان الإنترنت " ، وأصبح لها الأن عيادات ومصحات لعلاجها شأنها فى ذلك شأن عيادات ومصحات علاج المخدرات .

فقد وصل الأمر بمن وقعوا فى براثن إدمان الإنترنت إلى حد الإعتمادية فعلاً وفقدان الإستقلالية وإلى حد مضاعفة الجرعة بما يتخطى حدود الزمان والمكان ، كما أثبتت تلك الدراسات والبحوث العلمية ظهور بعض الأعراض الإنسحابية نتيجة لحرمانهم من الجلوس لساعات طوال بغير حدود ، ومن تلك الأعراض : الشعور بالتوتر والقلق والصداع الكلى أو النصفى وبعض الرغبات العدوانية تجاه الأخرين ، وذلك بالإضافة إلى بعض الأعراض الأخرى كالإنسحاب والإنطواء عن الأسرة وعن المجتمع حيث يتقوقع مدمن الإنترنت على عالمه الخيالى الإفتراضى ومنسحباً تماماً عن عالمه الواقعى الحقيقى ، وهى نفس الميكانيزمات التى تحدث مع إدمان المخدرات والكحوليات ، حيث يتم الهروب من الواقع الحقيقى المحبط وغير المشبع للدوافع والغرائز والحاجات إلى العالم الإفتراضى التخيلى الذى يستعيض فيه المدمن عن المتع الواقعية غير المتاحة بمتع ولذات مثخيَلة يعيشها فى عالمه الإفتراضى ، ويظل ينزلق وينزلق بعيداً عن الواقع حتى يهوى فى هوة سحيقة تصل به إلى حد الإضطرابات النفسية والعقلية ، كما يحدث تماماً فى إدمانات المخدرات والكحوليات ، فيفقد الطالب مستقبله وتنقطع أواشج القربة والصلات الإجتماعية فى شتى مجالات الواقع ولا يبقى إلا عالم التخيل والأوهام.

ولعل من أخطر أنواع المخدرات العنكبوتية - إن جاز لنا استخدام هذا التعبير أنواع الألعاب المختلفة على النت والتى تحولت إلى شبح يهدد مستقبل صغارنا وشبابنا ويقلق الأباء والأمهات ، بل لن نبالغ اذا قلنا أنها أصبحت خطر على جميع الفئات العمرية المختلفة ذكوراً وإناثاً ، حيث ينزلق إليها نسبة كبيرة من مستخدمى الشبكة العنكبوتية وتستحوذ على إهتمام الشرائح والنوعيات البشرية بما تثيره من حب إستطلاع وإثارة روح المغامرة والإستكشاف ومتعة الإنتصار أو الوصول إلى الهدف أو حل اللغز ....إلى غير ذلك من عمليات الإثارة واللذة العقلية التى يجد فيها الناس إشباعاً بديلاً لغرائزهم .

وقد ظهرت مؤخراً بعض هذه الألعاب والتى حاول مصمموها أن يربطوا بين العالم الإفتراضى وبين العالم الفعلى ، حيث يمكن لللاعب المشارك فى مثل هذه الألعاب أن يقوم بعمليات مختلفة للمشاركة والإقتناء والإضافة ، ووصل بهم الأمر إلى حد يشبه المقامرة بمبالغ مالية قد يكسب من خلالها أو يخسر شأنها فى ذلك شأن الألعاب المختلفة فى صالات القمار أو كالمتضاربين فى البورصة ، وقد أضافت هذه التطويرات الحديثة فى الألعاب ا؟لإلكترونية مساوئ جديدة وأخطار قد تؤدى بالمشارك إلى الإفلاس .

هذا جزء وليس كل الحقيقة ، لذلك رأينا أن من واجبنا أن ندق ناقوس الخطر من جديد ونسلط الضوء على شكل أخر من أشكال إساءة إستخدام الإنترنت وهو إدمان الإنترنت ، لكى لا نصل إلى حد المطالبة بإنشاء مصحات لإدمان الانترنت ، ويكفينا عجز المصحات المختلفة للصحة النفسية والجسدية عن تلبية حاجات الأمراض الجسدية وإدمانات المخدرات بمختلف أنواعها ......

كيف نحمى أبنائنا من الوقوع فى براثن إدمان الإنترنت ؟

وما هو المنحى الوقائى الذى نحمى به فلذات أكبادنا ...

وماهو البرنامج العلاجى الذى نتبعه......

للحديث بقية

[أحمد سيف]

كيف نحمى أبنائنا من الوقوع فى براثن إدمان الإنترنت ؟

وما هو المنحى الوقائى الذى نحمى به فلذات أكبادنا ...

يا مدام فولانه ... لما نقدر نحمي نفسنا الأول نبقى نفكر نحمي أبناءنا.

أنا شخصيا أعترف بأنني أحد المدمنين على الإنترنت ولو فتحوا مصحات مخصصة لعلاج هذا النوع من الإدمان فسأقصدها فورا.

وعودة لنقطة كيفية وقاية الابناء من الإنترنت فهي كوقايتهم من أي نوع آخر من الإدمان ... أول خطوة هي إبعاد الإنترنت عن متناول يدهم ... وهذا ما أنوي فعله مع ابنائي.

[لماضة مصرية جدا]

السلام عليكم و رحمة الله و بركاته

أستاذتي فولانة

موضوع غاية في الاهمية...

يمكن يهمني جدا...لاني بحس اني في الفترة الاخرانية فعلا بقيت مدمنة انترنت....و علي وجه الخصوص المحاورات (فينك يا تانت قلب ابيض....اديني هسحب كرسي و اقعد معاكي)

كان فيه دكتورة في التلفزيون كانت بتتكلم عن الادمان بشكل عام......و من اجمل اللي قالته ان الادمان هو الهروب بالبحث عن اللذة أو المتعة......حرام أو حلال.....

هو البحث عن حالة بيبنبسط فيها العقل...او هكذا يهيء له

و الحقيقة ان فعلا العقل بينبسط......في باديء الامر....لكن بعد كده بيرتبط الامر ده من تدخين...من مخدرات من انترنت.....بحدوث و استدعاء المتعة دي....فبتنتفي اللذة الحقيقية......و الواحد بيوهم نفسه انه مبسوط...في حين انه مش كده فبيضطر يزود الجرعات.....او الساعات بمعني اصح

احب ااكد أوي علي اعراض الادمان......و الانترنت علي وجه الخصوص.......اهم حاجة فيه لما بيبتدي المستخدم (المدمن) يفضل الانترنت عن اي وسيلة ترفيهية أخري...

و من الاعراض الاخري....انه حتي و انت منهمك في انشطة اخري بتلاقي نفسك ممكن تسيبها بسرعة و ترجع لملاذك الآمن اللي هو اللاب توب...

=====================================

انا فاكرة حضرتك كنتي قولتي حاجة مهمة زمان....... لازم الواحد يبقي عنده انشطة تانية يقابل فيها ناس جديدة......او يتعلم مهارات جديدة من خلال الاحتكاك مع الناس.....دي بتسد عند الواحد الاحتياج انه يفضل مرابط كده قدام النت

لو احنا بنتكلم عن اطفال....هختلف مع استاذ احمد......لان احنا منقدرشي نمنع الاطفال انهم يخشوا ع النت...او يستخدموا العاب الكمبيوتر....ده احنا كتير لما بنحب نسكتهم او نشغلهم و يبعدوا عن دماغنا شوية......فنقعدهم قدام الكمبيوتر

بس متهيالي ممكن جدا نشركهم في انشطة.....و خصوصا حركية و فيها مجموعات اطفال تانيين

و الاهم ان يبقي فيه ساعات محددة في اليوم يستخدموا فيها الكمبيوتر.

موضوع نوعية الالعاب......ده موضوع فعلا خطير......و كنا بنستغرب ازاي ممكن يبقي فيه لعبة قاتلة.....سمعنا عن اللعبة اللي الطفل بيحاول فيها الانتحار مرات عديدة....و متهيالي دي محسومة او مرجعيتها اختيار الوالدين

=================================

انا شخصيا فاضلي زلطة و ابقي مدمنة رسمي ع النت..........بس ده بعتبره احد اعراض الغربة...مش الادمان...لاني لما بنزل مصر...استخدامي للانترنت بيبقي في اضيق الحدود...و الحقيقة مش بفتقده خالص.

طبيعة الشغل المنهك و ضيق الوقت و عدم معرفة كتير من الناسمش بتخلي الواحد في الغربة يعرف يمارس اي نشاط خارج البيت...فبيكون النت هو الحل السريع المؤقت

بس ربنا يتوب علينا بجد

لان ضهري خلاص اتطبق

تحياتي ع التوبيك

و هتابع

[عماد حمدي]

موضوع ممتاز

الإنترنت دلوقتي بقا من الأشياء الضرورية جدا ً سواء في العمل او البيت واصبح مثل التليفزيون والتليفون وكل هذه الأشياء

الموضوع الأن مبقاش إدمان او لا .. بقدر ما هو إنه شيء ضروري لابد من توافرة ..

النت من وجهة نظري إن كان إدمان فهوه إدمان جميل جدا ً ومفيد إذا تم إستخدامة بالطريقة الصحيحة النافعة والتي ترضي الله .. سواء في البحث عن مواضيع جديده او القراءة والإطلاع عن كل ما هو جديد يخص التعليم - الأخبار - الكتب ووو .. الخ

لكن إذا إستخدم بطريقة سلبية .. فهذا هو الإدمان .. ولنا كل الحق ان نقول عليه إدمان ..

النت من أهم الوسائل للأطفال ( التعليم - برامج - الإطلاع والمعرفة - تفتيح مدارك الطفل ) ولو أني متزوج ومنجب ولدي أطفال لنصحتهم بالجلوس ع النت وليس لدي أي مانع طالما يستخدم بطريقة كويسة وكذلك وجود إفاده سواء علمية أو لفتح مدارك العقل والتفكير لدي ابنائي ..

فا أنا أري انه ليس بإدمان ع الإطلاق ..

ع الوجه الأخر وبوجهة نظر آخري ..

أري ان الإنترنت والجلوس لفترات طويلة عليه .. يعزل الشخص عن العالم الخارجي .. وينطوي لانه امام شاشة واحده تطلعة ع كل مكان في العالم ويتقابل ويتحدث مع أشخاص كثيرين .. لذا فهذا الأمر يؤثر سلبا ً ع شخصية الطفل ..

نصيحتي .. ان الإستخدام للأطفال خاصة في البداية وحتي البلوغ .. يكون منظم كمثال :-

أسمح لهم بساعتين يوميا ً لا غير .. حتي يتأقلم الطفل ع ذلك ويحاول ان يستفيد بهذا الوقت ( ساعتين ) ع اكمل وجه ويستثمرة في اشاياء مفيدة ..

مع مرور الوقت وبلوغ الأطفال .. سيعلم الطفل قيمة الوقت جيدا ً وانه مخصص جزء من وقتة فقط للنت وباقي اليوم أنا كأب .. أفتح مجالات وأنشطة اخري لطفلي أو طفلتي

ياعني النت يكون بالنسبة ليهم جزء بسيط من ضمن وقتهم .. وليس كل وقتهم مثلنا ..

وذلك حتي أعطي له إنطباع أن النت وسيلة من ضمن وسائل كثيرة نستخدمها في حياتنا .. وليس هوه الشيء الوحيد الذي أهدر كل وقتي أمامة حتي لو كنت سأستفاد منه .. فهو جزء وليس كل ..

شكرا ً مرة تانية ع الموضوع ..

عماد

[اغابي]

استغاثة - ساعدونى

بصراحة الموضوع داه مشكلة كبيرة

ابتدينا فى البيت بكمبيوتر واحد بقينا نتخانق عليه

جبنا واحد تانى بحيث انا وجوزى كمبيوتر واولادى الاتنين يشتركو فى كمبيوتر

بدأت المشاكل بين جوزى واولادي ( 8 و 4 ) سنوات

اشترينا كمبيوتر تالت

ابتدوا ياخدو الكمبيوترات طوول اليوم وانا مش عارفة اعمل ايه

راح جوزى اشترى لنفسه لاب توب وكدا رابع كمبيوتر فى البيت

ابتديت اتعب من القعدة على النت وقت كبير

اشتريت لاب توب

لانه اريح لبرامج اللغة بتاعتى بدون ما يبقي فى ايد الاولاد يلعبو بيه

بعد كل داه - منظر البيت كل مكان كمبيوتر او لاب توب وبقينا كلنا كلنا

بالساعات كل واحد قاعد على النت ابنى الكبير مسيطر على كمبيوتر

وابنى الصغير بيستعمل التانى وجوزى على الكمبيوتر التالت وانا الكمبيوتر الرابع

كلنا فاتحين انترنت - اللى بيحمل برامج واللى بيحمل افلام واللى على منتدي واللى بيلعب جيمز

انا كتير سالت نفسي داه احنا بقينا كل حاجة قدام الكمبيوترات الاكل والاطباق الفاضية والكوبيات فوارغ علب العصير واوراق البسكوت اللى حيشوف المنظر حيعرف ان الموضوع خطير جدا كدا احنا كاسرة بقينا على النت طول الوقت ونادرا ما حد يحكى مع التانى

الا اذ شوية اولادى زهقو وقامو يتنططوا ويلعبو ويرجعو على النت مرة تانية رغم انى من فترة قريبة جدا كنت حريصة على اننا نتجمع مع بعضنا على الغدا - لكن انا لاحظت دلوقتى اننا بدانا كل واحد لوحده حتى فى الاكل

انا عاجزة على انى الاقى اى حل ليا او لاسرتي - حقيقي الموضوع بقي فوق الوصف ويخوف جدا

اريد حلا - ساعدو

اغابي

[عماد حمدي]

اغابي

أقري مشاركتي تاني اللي فوق .. وحاولي انك تعمليها .. لو اقتنعتي بالحل دا ..

دمتي بخير ,,

[اغابي]

اغابي

أقري مشاركتي تاني اللي فوق .. وحاولي انك تعمليها .. لو اقتنعتي بالحل دا ..

دمتي بخير ,,

يا عماد عملت حل شبه كدا

لكن انا بتكلم ازاى السيطرة عليهم ازاى انا اصلا انظم وقتى لما انا بطلت اذاكر بسيب ان اليوم كله قاعدة على النت

اولادى بقى يخف الكمبيوتر او يتحرمو منه فى حالة العقاب بمعنى العقاب فى حالات معينة هو مش علطول عقاب

انا مش قادرة انفذ الكلام داه - انا عاوزة فكرة خفيفة تسيطر على عقلهم كبديل بغاية ما ينسوا بيه الكمبيوتر شوية شوية

دا ابنى بقوله تعالى فيه توم وجيري كرتون فى mbc 3 - راح قالى لاء ما انا حملت من النت احدث افلام توم وجيري واحسن من اللى بتيجي على التلفزيون كمان

خلاص احنا اتدمرنا كاسرة يا عماد

تحياتى

اغابي

[عماد حمدي]

الموضوع فعلاً في غاية الأخمية مش علشانا احنا .. لكن هلشان خاطر الأولاد والأطفال الصغيريين

يا جماعة لازم يكون في شده في التعامل شويتين النت ساعتين بس يا أولاد وكل واحد يختار الساعتين بتوعه دول يكونوا أمته ..

غير كدا مفيش الأمر لو اتاخد بشدة في الاول مع الوقت الاولاد هتتأقلم وتتعود خلاص ان النت دا ساعتين بس في اليوم

دور الأباء إية بقا ..

أنهم ينظموا خطة لاولادهم ويعضوا باقي اليوم بتاعم زي مثلا ً تعالوا هنروح النادي يوم الخميس مثلا ً ..

هنروح يوم كذا لتيتة هنروح يوم كذا لعمو او طنط فلانة ..

تعالوا نتابع مثلا ً برنامج ع التليفزيون بيجي كل يوم كذا الساعة كذا ..

نقعد نلعب معاهم .. شطرنج مثلا ً .. اي لعبة

المهم نوصلهم في الأخر ..

انهم إزاي ينظموا وقتهم وموضوع النت دا يكون ساعتين بس في اليوم ..

انا من وجهة نظري شايف ان دا الحل المناسب ..

وكل ما كنا بنطبقة بدري هيكون أفضل ..

تعالوا نبدا نلحق أولادنا من الموضوع دا .. لانه هيأثر فعلا ً ع شخصية الطفل ..

ويخليه إنطوائي وهيأثر علي الحياه الأجتماعية في الأسرة الواحده مش هقول المجتمع ..

اي آب أو أم يعملوا خطة أو جدول مناسب لتنظيم مواعيد أولادهم ..

والأهداف المطلوب إنجازها وليكن في الاسبوع دا ..

ويوم الجمعة مثلا ً نجمع الأولاد وتعملوا إجتماعي وتشوفوا توصلتوا لأية من النتائج وكدة ..

صدقوني دي هتخلق عند الطفل إحساس أنه الوقت غالي جدا جدا جدا ويعرف يقدرة ..

وكمان هتعلموهم إزاي ينظموا مواعيدهم .. وكمان هيبقي في مجالات وانشطة تانية ..

دور الأب او الأم التوجيه ..

تقبلوا مروري ,,

متابع ..

عماد

[قلب ابيض]

تعقيبا على كل ماسبق

واذكركم انى اول من اعترف على الملاء بأننى اصبحت مدمنه نت ..." فاكرين "؟

منزلنا العامر اصبح سايبر نت به 5 اجهزه لاب توب وجهاز كمبيوتر 00يعنى 6 اجهزه بمكان واحد ولكم ان تتخيلوا الشكل العام للاسره والكل يتعامل مع الجهاز بعشق غريب م

بالتاكيد ليس كل الوقت من اجل الترفيه او النت بشكل خاص ولكن الكمبيوتر عااااااامه

جددت اشتراك النادى كحل للابناء واشركت كل منهم على حسب ميوله فى نشاط رياضى خاص وبالتالى خفضنا من عدد ساعت او ايام الجلوس على الكمبيوتر 000اعتبر انى نجحت فى ذلك بفضل الله

ويبقى انا ابتعد لساعات وربما ليوم فقط واجدنى اتحايل على المنع " هاشوف الميل بس -هاقرا الجرايد بس -هافسر الحلم بس .......وهكذا "

الحلول كثيره ولكن الاراده هى الاهم ....عذرت من اراد ان يبطل تدخين وفشل ولكن لن أيأس طالما انى مقتنعه بأن لابد ان اضع حد لهذا الادمان

ان شاء الله انا الاقوى 0000وربنا يساعدنى

شكرا فولانه على موضوعك الهادف

[عماد حمدي]

ممتاز يا قلب وربنا معاكي

و المطلوب

إرادة قوية وتوجيه سليم للابناء وشدة في التعامل في بداية الأمر ..

حتي يصبح هذا الأمر عادة

ويتم تقليل عدد الساعات أمام الكمبيوتر أو النت

ربنا معاكي

متابع ,,

تم تعديل 22 أبريل 2010 بواسطة omda2006

[hOuSsAm]

اغابي

أقري مشاركتي تاني اللي فوق .. وحاولي انك تعمليها .. لو اقتنعتي بالحل دا ..

دمتي بخير ,,

يا عماد عملت حل شبه كدا

لكن انا بتكلم ازاى السيطرة عليهم ازاى انا اصلا انظم وقتى لما انا بطلت اذاكر بسيب ان اليوم كله قاعدة على النت

اولادى بقى يخف الكمبيوتر او يتحرمو منه فى حالة العقاب بمعنى العقاب فى حالات معينة هو مش علطول عقاب

انا مش قادرة انفذ الكلام داه - انا عاوزة فكرة خفيفة تسيطر على عقلهم كبديل بغاية ما ينسوا بيه الكمبيوتر شوية شوية

دا ابنى بقوله تعالى فيه توم وجيري كرتون فى mbc 3 - راح قالى لاء ما انا حملت من النت احدث افلام توم وجيري واحسن من اللى بتيجي على التلفزيون كمان

خلاص احنا اتدمرنا كاسرة يا عماد

تحياتى

اغابي

اغابى

موضوعك بجد لفت انتباهى لانه محتاج لوقفة مع النفس

انا يمكن واقع فى نفس مشكلتك بس عالاقل انا عايش لواحدى وفعلا بقيت انسحب من النت واحدة واحدة

مبقتش ادخل الا للمهم واحدد ميعاد الدخول بوقت معين

نيجى بقى للاولاد

اول حاجة للنت او الكمبيوتر عيوبه الصحية انها بتضعف النظر وبتقلل التركيز ويمكن حجات تانية انا مش عارفها

حاجة تانية انه بيربى لدى الطفل عدم الاهتمام بالوقت

لاحظت كمان ان الولاد واخدينك وزوجك قدوة وفى سنهم ده المفروض بيقلدوكوا فى كل حاجة يعنى فى طريقة الكلام فى طريقة المشى التعبيرات نوع الرياضة الاهتمامات ...... عشان كدة من المهم انتى وزوجك تغيروا من سلوكك قدامهم ومن نمط المعيشة مش عشان يقللوا الجلوس عالنت وبس لاء ده عشان المميزات اللى فيكوا ياخدوها بسهولة بمعنى ان مش كل المعرفة والتربية ياخدوها من عالنت من مصادر الله اعلم بيها

بجد الوقت ده وقت ذهبى للتعلم عند الاطفال وممكن تديهم عدد سعات معتمدة على درجاتهم فى المذاكرة واتباع التعليمات بمعنى اللى يحقق سكور معين ليه كام ساعة فى اليوم وبقيت السعات تكون بالمحاكاة معاكى او مع زوجك سواء بالتبادل او الاسرة كلها

بالسبة ليكى انتى وزوجك ممكن تخلى النت من الشغل بس بطريقة متاثرش عالشغل بمعنى ممكن تروحى نص ساعة بدرى او تتاخرى نص ساعة بالاضافة انك تدخلى نص ساعة على مدار اليوم مقسمة على فترات وساعة بالليل قبل النوم

ممكن مثلا تعملى لستة بالحجات اللى هتدخلى تعمليها عالنت بالظبط ومش اكتر

الموضوع طبعا مش سهل بس مع الوقت هيجى منه وهيبقى باذن الله اكثر كفاءة وفاعلية

اتمنى التوفيق للجميع

[pink rose]

انا بقى عندي حالة غريبة جدا

من ساعة ما اتعرفت على المحاورات و انا كنت اغلب اليوم عليها يادوب اسيبها عشان اروق البيت و اطبخ غير كده قاعدة مربعة كمان

لان شغل جوزي طول اليوم بمعنى طول اليوم فا ما فيش اي حاجه تانية ممكن تتعمل و خصوصا في الرياض

لكن بقالي فترة كده مش عارفه ممكن افتح المحاورات و الاقي مواضيع كتير حلوة و اقعد اكتب مداخلة طويلة عريضة و المفروض خلاص ارسلها الاقيني اتخنقت فجأة و امسح اللي كتبته و اقفل الكومبيوتر و اقول ليه اكتب و ليه ابعت و ليه افتح اصلا

مش عارفه ليه زهق و لا احساس ان الكلام كله من اوله لاخره مالوش لازمة يعني مجرد كلام في كلام لا بيودي و لا بيجيب

فا بقيت اكتفى بالقراءة فقط و مش كل المواضيع و اقفل يعني حاجه في السريع كده و دمتم سالمين

مش عارفه دا كده كويس و لا انا عندي اكتئاب

بس لو في معلومة عاوزة اعرفها بافتح و افضل اقلب شمال و يمين لحد ما اجيبها و اقفل و خلاص

تم تعديل 22 أبريل 2010 بواسطة remo

[myusername]

انا مدمن... اذا انا موجود :lol:

انا مدمن للانترنت... و بشراهة.. و من سنين..

من كذا سنة رحت اشتغلت فى كافى نت مخصوص علشان ماقومش من عالنت بوتاتا :rolleyes: بعد كده دخلت الدى اس ال فى البيت.. و عليه العوض..

مجرد احساسى ان الانترنت فاصل, حتى لو مبستخدمهوش... ده بيخنقنى و بيحسسنى انى مفصول عن العالم.

انا ساعات بقعد فى البيت اكتر من اسبوع مخرجش.. و بدون مبالغة... اصحى اقعد عاللابتوب.. انام.. اصحى تانى اقعد عاللابتوب.. بس كده!

فيه برامج لحماية الاطفال.. لو مش عايزينهم يدمنوا الانترنت.

فى المدارس فى أمريكا و كندا.. بيحطوا البرامج دى علشان يمنعوا التلاميذ من الدخول عالفيسبوك, المواقع الجنسية, و الى آخره من قائمة المواقع...

برنامج child control كويس جدا لو عايزين تتحكموا فى الساعات اللى الاطفال يقعدوها عالانترنت.. و كمان ممكن تعملوا هوايت ليست للمواقع اللى يقدروا يدخلوا عليها, و تعملوا ban لبقية المواقع..

[عادل أبوزيد]

ولعل من أخطر أنواع المخدرات العنكبوتية - إن جاز لنا استخدام هذا التعبير أنواع الألعاب المختلفة على النت والتى تحولت إلى شبح يهدد مستقبل صغارنا وشبابنا ويقلق الأباء والأمهات ، بل لن نبالغ اذا قلنا أنها أصبحت خطر على جميع الفئات العمرية المختلفة ذكوراً وإناثاً ، حيث ينزلق إليها نسبة كبيرة من مستخدمى الشبكة العنكبوتية وتستحوذ على إهتمام الشرائح والنوعيات البشرية بما تثيره من حب إستطلاع وإثارة روح المغامرة والإستكشاف ومتعة الإنتصار أو الوصول إلى الهدف أو حل اللغز ....إلى غير ذلك من عمليات الإثارة واللذة العقلية التى يجد فيها الناس إشباعاً بديلاً لغرائزهم .

وقد ظهرت مؤخراً بعض هذه الألعاب والتى حاول مصمموها أن يربطوا بين العالم الإفتراضى وبين العالم الفعلى ، حيث يمكن لللاعب المشارك فى مثل هذه الألعاب أن يقوم بعمليات مختلفة للمشاركة والإقتناء والإضافة ، ووصل بهم الأمر إلى حد يشبه المقامرة بمبالغ مالية قد يكسب من خلالها أو يخسر شأنها فى ذلك شأن الألعاب المختلفة فى صالات القمار أو كالمتضاربين فى البورصة ، وقد أضافت هذه التطويرات الحديثة فى الألعاب ا؟لإلكترونية مساوئ جديدة وأخطار قد تؤدى بالمشارك إلى الإفلاس .

فوائد و مزايا الإنترنت أكثر بكثير من مضارها

فكرت كثيرا أن أكتب موضوعا منفصلا فى نفس السياق و لكنى بعد قدر من التفكير رأيت أن أضمن وجهة نظرى كتعقيب أو مشاركة فى هذا الموضوع.

ما سبق كان إستهلالا لابد منه

ملاحظة : لهذه المشاركة بقية سأعود إليها بعد نصف ساعة تقريبا

[pocy]

انا بقى عندي حالة غريبة جدا

من ساعة ما اتعرفت على المحاورات و انا كنت اغلب اليوم عليها يادوب اسيبها عشان اروق البيت و اطبخ غير كده قاعدة مربعة كمان

لان شغل جوزي طول اليوم بمعنى طول اليوم فا ما فيش اي حاجه تانية ممكن تتعمل و خصوصا في الرياض

لكن بقالي فترة كده مش عارفه ممكن افتح المحاورات و الاقي مواضيع كتير حلوة و اقعد اكتب مداخلة طويلة عريضة و المفروض خلاص ارسلها الاقيني اتخنقت فجأة و امسح اللي كتبته و اقفل الكومبيوتر و اقول ليه اكتب و ليه ابعت و ليه افتح اصلا

مش عارفه ليه زهق و لا احساس ان الكلام كله من اوله لاخره مالوش لازمة يعني مجرد كلام في كلام لا بيودي و لا بيجيب

فا بقيت اكتفى بالقراءة فقط و مش كل المواضيع و اقفل يعني حاجه في السريع كده و دمتم سالمين

مش عارفه دا كده كويس و لا انا عندي اكتئاب

بس لو في معلومة عاوزة اعرفها بافتح و افضل اقلب شمال و يمين لحد ما اجيبها و اقفل و خلاص

نفس الحاله اللى عندى بقالى كام يوم والله ياريمو ربنا يصبرنا يارب اللهم امين

[pocy]

حبيت بس اضيف ان ابن اختى 6 سنوات بقي بيتفرج على كل حاجه للاطفال على الكمبيوتر وبقي بيحمل حاجات من النت عرفته ازاى ينزلها على الجهاز ولانه حابب يعرف اتعلم بسرعه بقي ويا سلام على اللعب على النت ده حفظ ازاى يكتب العاب بالعربي والانجليزى ومن ساعتها الولد عن النت على طول تخيلوا بقي لما يكبر شويه؟؟؟؟؟؟؟؟؟؟؟؟؟اهه نسيت بيحفظ القران من على النت برضه او ع الكمبيوتر وهو اللى اقترح على امه الاقتراح ده تخيلوا بقي اطفال الجيل الجديد هيكونوا ازاى؟؟؟؟؟؟؟؟؟؟؟

[مغتربة]

مجرد احساسى ان الانترنت فاصل, حتى لو مبستخدمهوش... ده بيخنقنى و بيحسسنى انى مفصول عن العالم

عارف استاذ ماى يوزرنيم

انا دايما بقول للى حواليا ان انا ممكن اقعد فى البيت من غير ما يكون فيه تليفون و لا تلفزيون و لا حتى كهربا

لكن من غير نت لا صعبه قوى

القعدا من غير نت مبقتش استحملها ابدا

سبحان الله الواحد بيفكر فى انه عاش جزء كبير من حياته من غير الاختراع دا اساسا

لكن دلوقتى و بدون مبالغه

بقى من ضروريات الحياه بالنسبه لى

[Folana]

السلام عليكم ورحمة الله...

الاخوة والاخوات الافاضل...

بأعتذر لحضراتكم جدا لتأخرى فى الرد....و إن شاء سوف أقوم باستكمال الموضوع حين أمتلك وقت للكتابة وهذا مالا يتوفر لى فى الوقت الحالى...

بأشكركم جميعا على مروركم الكريم وعلى مداخلاتكم القيمة...وبأعتذر مرة اخرى لحضراتكم

ولى عودة قريبة ان شاء الله

خالص مودتى واحترامى

[عماد حمدي]

Folana

ربنا يعينك ومنتظرين مشاركاتك معانا ..

[عبير يونس]

انا بقى عندي حالة غريبة جدا

من ساعة ما اتعرفت على المحاورات و انا كنت اغلب اليوم عليها يادوب اسيبها عشان اروق البيت و اطبخ غير كده قاعدة مربعة كمان

لان شغل جوزي طول اليوم بمعنى طول اليوم فا ما فيش اي حاجه تانية ممكن تتعمل و خصوصا في الرياض

لكن بقالي فترة كده مش عارفه ممكن افتح المحاورات و الاقي مواضيع كتير حلوة و اقعد اكتب مداخلة طويلة عريضة و المفروض خلاص ارسلها الاقيني اتخنقت فجأة و امسح اللي كتبته و اقفل الكومبيوتر و اقول ليه اكتب و ليه ابعت و ليه افتح اصلا

مش عارفه ليه زهق و لا احساس ان الكلام كله من اوله لاخره مالوش لازمة يعني مجرد كلام في كلام لا بيودي و لا بيجيب

فا بقيت اكتفى بالقراءة فقط و مش كل المواضيع و اقفل يعني حاجه في السريع كده و دمتم سالمين

مش عارفه دا كده كويس و لا انا عندي اكتئاب

بس لو في معلومة عاوزة اعرفها بافتح و افضل اقلب شمال و يمين لحد ما اجيبها و اقفل و خلاص

نفس الحاله اللى عندى بقالى كام يوم والله ياريمو ربنا يصبرنا يارب اللهم امين

اللهم إني أعوذ بك من الهم والحزن

و من العجز والكسل

و من الجبل و البخل

و من غلبة الدين و قهر الرجال

اللهم اسعدك يا ريمو انتي و بوسي و كل من في المحاورات

آمين