صيدلى يسأل عن استكمال التعليم

[بحار الغربة]

سؤالين وبس

اولهما

انا حابب اسأل عن دراسة دبلومة او ماجستير الجودة وخصوصا اللى بيتدرس فى الاكاديمية العربية للعلوم والتكنولوجيا

هل هو مفيد فى الحياة العملية بعد كده ؟؟؟؟؟؟؟

وايه الاستفادة اللى هاتعود عليا بعد دراسته ؟؟؟؟؟

ثانيا :-

هل حد عنده معلومات عن استكمال الدراسات فى الدول الاسكندنافيه ( النمسا والنرويج والسويد ) لان سمعت انها رخيصة جداااااااا

بس انا جايب تقدير جيد

حد عنده فكرة ازاى اعرف عنها اكتر

ولا اروح السفارات احسن

[om marawan]

اعتقد حضرتك بتسأل على ال CPHQ وده يعتبر بورد امريكى معترف بيه طبعا دوليا

لو هى.. تبقا فعلا مفيدة بس انا ماعنديش معلومات عن تدريسها بالاكاديمية العربية للعلوم

اللى اعرفه انها غاااالبا بتذاكر لوحدك self study واهم كتاب هو كتاب جانيت براون واللى لحد دلوقتى انا بادور عليه واللى شفته منه كان طبعة قديمة ودى لا أرجحها

طبعا مش بس الكتاب الموضوع محتاج بحث مطول ومش سهل وفيه ناس بتدى كورسات لكن يكفى اقول لحضرتك ان اللى بياخدوها كل سنة على مستوى مصر عدد محدود وهيكونوا مطلوبين جدااا جداا

حضرتك بتقدم عادى اون لاين وتدفع الرسوم وتدخل الامتحان والحقيقة انا مش باحبط حضرتك بالعكس باشجعك لكن الاحتمال الاكبر للنجاح من اول مرة ضعيف جدا والشهادة دى مش دائمة لان حضرتك لازم تقدم للامتحان كل سنتين لتجديدها

هى طبعا مفيدة جدا لان المفروض ان ده هيكون الاتجاه السائد لجميع المستشفيات فى الفترة الجاية حتى جوة مصر !!

الاحتمال التانى هو ان حضرتك تقدم فى الجامعة الامريكية دراسة لمدة 9 شهور وتمتحن TQMودى دبلوما بتؤهلك ل 70% من امتحان البورد ولكنها معترف بيها داخل مصر فقط

[انسان مخنوق]

حاولت اعمل توبيك جديد قالى

عفوا ليس لديك الصلاحية

هو انا مش عضو برضو ولا ايه يا باشمهندزين

انا بعتذر للاخ صاحب التوبيك لانى هاعرض موضوعى فى التوبيك باعة

واللى يرفع موضوعى فى توبيك لوحده يبقى حبيبى وكفاءة وربنا يكرمه

المهم انى صيدلى برضو زيك يا دكتور وعاوز ادرس طب اسنان

ايوة ما تستغربش

طب اسنان

مع انى لو اخدت الخطوة دى هايبقى عليا حمل كبير اوى بس هاعمل ايه

الله المستعان

عاوزين رايكو يا شباب فى الفكرة دى وايه العقبات اللى هاتواجهنى من وجهات نظركم

وشكرا

[superzok]

بالنسبة للاكاديمية العربية للعلوم والتكنولوجيا والنقل البحري ( انا بتكلم هنا عن اللي في الاسكندرية )

هي عملت اكاديمية بالتعاون مابينها ( الاكاديمية العربية ) ومستشفيات جامعة الاسكندرية < اكاديمية علوم الرعاية الصحية > وبتدرس 4 تراكات هي :

هي ماجستير ودبلومة الجودة في الرعاية الصحية

والمعلوماتية الصحية

وادارة المستشفيات

وال MBA في الرعاية الصحية

تمن المادة 1500 جنيه

دبلومة الجودة بتكلف في حدود 12000 جنيه والماجستير كامل 21000 جنيه

المعلوماتية الصحية زيها تقريبا

ادارة المستشفيات وال MBA الدبلومة 16000 تقريبا والماجستير اعتقد 31000

الشهادات معنمدة من المجلس الاعلى للجامعات وخاضعه لقوانين المجلس

الشهادة بتطلع باسم الاكاديمية وعليها ختم جامعة الاسكندرية

الدراسة بتكون يومين في الاسبوع غالبا 4 ساعات في اليوم وبيراعوا ظروف الناس المشتركة

هي دي المعلومات اللي افتكرتها دلوقتي

الاكاديمية عاملة عرض حاليا وهو لو حد قدر يجمع جروب من 10 اشخاص حتى لو في تراكات مختلفة كلهم ياخدوا خصم 30% على الماجستير او الدبلومة

وانا فعلا بجمع المجموعه دي حاليا

اتمنى اني اكون قدمت معلومات مناسبة ليك

تحياتي