طلبت معايا العب جيم

[بحار الغربة]

بسبب ظروف الشغل التى تمتد ساعاته لما فوق ال 12 ساعة متواصلة

لا استطيع الذهاب لنادى

طلبت معايا العب جيم واشد عضلاتى شويتين لانى بقيت عامل شبه علامة الاستفهام ( الكرش اللعين ) غير ان دراعى واكتافى بقيت حاسس انهم ضعفوا اوى

عاوز اشترى ادوات الجيم الاساسية اللى اشد بيها جسمى واستعملها فى البيت

بماذا تنصحونى وخاصة انى فى اطراف مدينة الرياض ( الظريفة )

[بحار الغربة]

يعنى مافيش ولا واحد رياضى فى المحاورات

مافيش ابطال ؟؟؟؟

[doha]

انصحك انك متشتريش اي جهاز رياضي في المرحلة الحالية وانت لسه مبتديئ عشان متلعبش عليه يومين وتركنه بعد كده وتبقى دفعت مبلغ كبير في مجرد شماعه للملابس .

لو عاوز تبدأ من دلوقت اعمل بحث في النت على فيديو ايروبيكس هتلاقي كتير بس اختار واحد يكون طويل نص ساعه مثلا او ساعه والعب معاهم كل يوم .. لو انتظمت معاهم فكر تجيب جهاز ..

افضل جهاز في رايي الاوربيتراك .. الاصلي منه موجود عند اليومارك وهو انواع وبالمناسبة عليه تخفيض اليومين دول ..

انت روح اليومارك ولف عليه وتاكد من السعر ( بيختلف حسب الوزن الي بيقدر يتحمله كل ماكان يتحمل اكتر كل ماغلي سعره .. هتلاقيه بيتراوح مابين 400 - 1000 )

بعد ماتاخذ لك لفة كويسه وتعرف اسعار الجديد اوعى تشتري جديد وروح على المستعمل اشتري من هناك .. هتلاقي تقريبا كل الاجهزه الرياضية متباعه على انها مستعمله لكن لسه ( بورقها ) لان الحقيقة الخالده ان نسبة ضئيلة من الي بيشتروا الاجهزه بس هم الي بيكملوا بينما البقية بتجيبها ( اراحة ضمير ) على اساس ان فاكرين الجهاز هيلعب بدالهم ..

روح على المستعمل ( عندك سوق المستعمل جنب سوق الشمال في الرياض حاجته نظيفة جدا كانها لم تمس واسعارها ممتازه ) وبرضه ممكن تلاقي في جريده الوسيلة اعلانات لناس بتشتري الاجهزه المستعمله اتصل بيهم وشوف بيبيعوها فين .. لو ملقيتش حاجه تعجبك اشتري جديد مفيش مشكلة بس دور الاول في المستعمل لانك هتذهل .. على فكره برضه كتير بكون ماشيه في الشارع بالسيارة وبشوف محلات متخصصة في بيع اجهزة رياضية مخفصة بس للاسف ناسية شفتها في شوارع ايه ..

وزي ماقلت لك ابدأ مباشرة وفورا عشان حماسك ميفترش واول يوم خليه خمس دقائق بس بعدين عشرة واثبت على كده يومين بعدين خمستاشر وهكذا حتى تصل لساعه رياضه .. اوعى تبدأ بفترة طويلة مرة وحده احسن تبطل بعدها بيوم ولا اثنين .. واستمر وهتلاقي النتيجه باينة عليك من اول اسبوع ..

ربنا معاك ..

[Ambitious]

والله يا بحار انا شايف لو عرفت تشترك فى صالة ألعاب رياضية هيبقى افضل ليك بكتير من انك تتمرن فى البيت .. لو فى صالة جيم قريبة منك انصحك تستمر فيها بس المشكلة فعلا زى ما مدام ضحى قالت بتبقى فى الاستمرار عشان كده شوف حد يروح معاك وتشجعوا بعض .. انا بعد انقطاع طويل لسه بادئ تانى من يومين اهو وربنا يكرم والواحد يستمر

[مغتربة]

انا شايفه انك تنتظم فى جيم افضل لك

لانك هناك فى اوبشن المدرب الشخصى

و دا اوبشن جميل جدا

لانه الاول بيوزنك و بعدين يشوف الحاله العامه لجسمك و تاريخه المرضى ان وجد

و بعدها بيصمم لحضرتك برنامج تدريب

بيراعى كل العوامل السابقه مع تطلعاتك انت و اهدافك من التمرين

و بيتابع معاك خطوه بخطوه

لكن لو تعذر على حضرتك الجيم

فاكيد اول حاجه لازم تشتريها هى مجموعه الاوزان

الاوربت تراك طبعا

[joo]

أنا يا سيدى رياضى قديم فى البدى بلدينج ومازالت . وعندى خبرى لا بأس بها فى هذا المجال أولا حدد لنفسك مدة تتراوح من 3 أشهر الى 4 أشهر ودة يكون الحافز بتاعك خلال الفترة .

موضوع شراء الاجهزة مش هوى الحل ولكن الفكرة كلها فى النظام .

أولا : حاول على الاقل أنك تجرى ثلاثة مرات فى الاسبوع الواحد حوالى 45 دقيقة عشان بعد 30 ثانية يتم حرق الدهون . ودة يكون فى مكان مفتوح وممكن يكون بعد الظهر أو فى الليل. (ممكن بعد فترة تجيب مشاية كهربة )

ثانيا : ممكن تمشى على نظام غذائى مع دكتور ولو مش عاوز هنالك بعض الاشياء الى ممكن تبتعد عنها خلال الفترة وهتشوف النتيجة

1 - تقليل العيش خلال الفترة السابقة وجود النشويات مثل الارز والمكرونا والسكريات الى الخ...

2- عدم شرب شاى أو قهوة بعد الاكل الا بعد ساعة بسبب عسر الهضم .

3- توزيع خمس وجبات خلال اليوم بدلا من ثلاثة وعدم ترك مسافات كبيرة بين الوجبات عندما تشعر بالجوع وبالتالى ستقم بمضاعفة الكميات وبالتالى هو دة اسباب الكرش .

4 - حاول تشرب كميات ماء مناسبة قبل الاكل بحوالى نصف ساعة وعدم شرب الماء على الاكل ومنع البيبسى والكواكولا .وأى مشروبات غازية ( بسبب كثرة السعرات الحرارية الموجودة )

5 - ألعب كل يوم 20 مرة بطن ويوم الجرى 50 مرة خلال الشهر الاول .

التكملة الحلقة الجاية

تم تعديل 8 أبريل 2010 بواسطة joo

[Alrefaey]

زى ما الاخت ضحى قالت بالظبط جبت جهاز الجرى الكهربائى من يو مارك (1000) ريال تقريبا وجريت عليه اسبوع بس وحاليا عليه كيلو تراب من عدم الاستعمال .

اهم شىء ان حد يحفزك عشان تكمل وتبدأ وتستمر , ممكن صديق لك او تشترك فى جيم او اى محفز اخر لأنك غالبا هتتوقف بعد اسبوع ولا اتنين لو بدأت لوحدك .

[بحار الغربة]

بشكر كل الاخوة والاخوات اللى شاركونى رأيهم

وافكاكم قيمة وهاخدها فى الاعتبار ان شاء الله

انا على فمرة بقالى اسبوعين كده بلعب ضغط يوم بعد يوم وتمارين بطن بصفة يومية

وبالعكس شايف ان الموضوع ممتع لانى الصراحة لما بلعب و اخد شاور بحس احساس جميل كده

بحس ان الواحد استرد صحته وتركيزه

طبعا نفسى اجرى بس المنطقة اللى انا ساكن فيها لو نزلت جريت اعتقد هالاقى الكل بيجرى ورايا

وبرده شكر خاص للاخت ضحى على افادتها لانى فعلا كنت عاوز اشترى جهاز

والاخ جوو البطل ... شكرا جزيلا

تقعدوا بالعافية

[واحد تاني]

اشترك في Fitness-Time وهتلاقي دايما عندك وقت :lol: