حد يعرف حواديت حلوة

[Farida]

كل يوم مكتوب على احكى حدوته قبل النوم لبناتى او و هم بياكلوا و بصراحه خلصت حواديت مامتى و جدتى و الحواديت اللى ألفتها اصلى بألف حواديت ...

المهم حد عنده حواديت من اللى كانت والدته او جدته بتحكيها و فى نفس الوقت لها معنى و هدف ....الحقونى الله يكرمكم ....على فكره لما حاأفضى شويه حأحكى لكم شويه حواديت جميله و الله بس بناتى زهقوا منها

[فــيــروز]

طيب قصص المكتبه الخضراء حلوه .. خلصتوها دى؟

بس موضوع حلو اوى stnd:: f((: من الموضوعات المحببه الى قلبى كتير stnd:: ;)

[Farida]

أنا جبت قصص المكتبه السودا دى ,,,,لقيت كل قصه عشرين صفحه ,,,,,انا باحب الحكايات اللى بتتحكى على مر الأجيال و مش مكتوبه و وراها معنى ...خدى عندك حدوته من حواديت الست الوالدة ربنا يديها الصحه :

كان فيه ملك من كتر ما عنده كل حاجه و مس محتاج حاجه زهق و بقى مكتئب و حزين و ما فيش حد من المضحكاتيه عارف يضحكه ....اتنكر و نزل السوق و هناك لقى بيت فقير و قيه شمعه منورة و راجل بيغنى و مبسوط استغرب جدا هو مبسوط ليه .....فخبط عليه قال مين الملك قاله انا عادل سمير ......قصدى انا عابر سبيل قاله اهلا و دخله و عزمه على الأكل وكان رغيف و حته جبنه الملك سأله انت مبسوط ليه قاله و ما أبقاش مبسوط ليه انا صحتى كويسه و ضميرى مرتاح ,,,الملك سأله انت بتشتغل ايه قاله انا نجار ....المهم روح الملك و تانى يوم أمر وزيره انه يقفل كل دكاكين النجارين و بالليل راح لصاحبنا لاقاه منور شمعتين و بياكل بيض و فول و بيغنى برضه ....سأله ازاى و انا سامع ان الملك قفل دكاكين النجارين ....قاله و ماله انا ما سكتش دورت على شغل و اشتغلت فى دكان حلاق ....المهم تستمر الحدوته و كل ما يشتغل فى حته الملك يقفلها له و مع ذلك احوال الراجل الغلبان بتتحسن و لسه مبسوط لحد ما قفل الدنيا كلها و راح له لقاه بيغنى برضه و قلب بيته خالص و بياكل لحمه و فراخ استغرب الملك جدا ,,,,, و بعدها عرف ان الدنيا لما قفلت فى وش الرجل راح يصطاد طلعت له سمكه بيفتحها لقى فيها خاتم باعه و اشترى بيه اكل و جدد البيت لأن ربنا هو اللى بيرزق و ما حدش بيتدخل فى رزق حد

..... و توته توته خلصت الحدوته .....حلوة و لا ملتوته stnd:: f((:

تم تعديل 30 مارس 2004 بواسطة Farida

[فــيــروز]

حلوه جدا f((:

عاوزين تانى عاوزين تانى عاوزين تانى

حرام عليكى يا فريده انا باحب الحواديت جدا وعندى تجاهها ضعف فظيع stnd::

[ragab2]

صلى ع. النبى

كان فيه واحدة ست

عندها اتناشر بنت

يوم قلولها يا ماما

ناكل توت يا ماما

توتة توتة

خلصت الحدوتة

حلوة

والا ملتوتة

..........

هذه الحدوتة القصيرة التى تربينا عليها وربينا عليها الأولاد وكانت تعاد عشرات المرات

وحدوتة الثعلب المكار والثلاث ماعزات التى بنت احداها بيتا من قش والأخرى من خشب والثالثة من الطوب وقام الثعلب بأكلهم ماعدا التى بيتها من الطوب

[se_ Elsyed]

يا فريده ده يعتمد على سن الطفل ، يعني لو عبيط و3 سنين وإنتي نازلة يبقى ألفي أيه حاجة في البطيخ زي أنا شخصياً ما بأعمل ومش عارف مين اللي بيسرح بالتاني أنا ولا الواد عُمر .. فيوماتي عالله أحكي له نفس القصة بنفس السيناريو والحوار والإخراج وهي قصة السمكة سموكة والتعلب تعلوب والنملة نمولة والقرد قرود وهما بيتخانقوا مع بعض وييجي عمور يضربهم بالعصايا .. ومع إن الواد بيبقى حافظ الاحداث وعارف اللي هايحصل إلا إنه بيحسسني أنه مستمتع ومتشوق انه يسمع ..

[فــيــروز]

كان فيه واحدة ست

عندها اتناشر بنت

يوم قلولها يا ماما

ناكل توت يا ماما

فين باقى القصه ;)

جابت لهم توت

فى وابور بيقول توووت

كل واحده اكلت توته

توته توته خلصت الحدوته

بس انا اما كبرت شويه وكنت اطلب من اى حد يحكى لى حدوته وعشان يتهرب يقول لى الحدوته دى فبقيت اكرهها ;)

ولا الحدوته بتاعة احمد

ودى بقى حدوته تشلّ stnd::

فى يوم من الايام استيقظ احمد من النوم stnd::

وذهب احمد الى النادى f((:

ركب احمد الحصان

وبدا الحصان يجرى

درجن درجن درجن

وظل يجرى

درجن درجن درجن

وهنا شعر احمد ان الحصان يجرى

درجن درجن درجن

وممكن نملا كراستين درجن درجن بضمير مرتاح :D

اييييييييييييييه كانت ايام mc(:

[فــيــروز]

مش فيه غنوه لعلى الحجار اسمها يا طالع الشجره

كانت جدتى الله يرحمها بتحكى لنا حكايه زمان فيها الغنوه دى

الحدوته دى هى اجمل حدوته سمعتها فى حياتى بس للاسف مش فاكره تفاصيلها ;)

بس كان فيها بقره سحريه مصنوعه من الذهب .. يا ريت يا فريده لو تعرفيها تقوليها والنبى احسن انا زعلانه اوى انى مش فاكراها stnd::

ورغم اننا كنا بنبقى عارفين تفاصيلها الا انى كنت باستمتع جدا بسماعها من جدتى كل مره نروح نبات عندها mc(:

وكمان الحواديت اللى كان والدى الله يرحمه بيحكيهالى

دى مش فاكره منها اى شئ غير خيالات غامضه ;)

عمو احمد عنده كاموسه و كمل .. "عشان عمى كان عنده جاموسه و جمل فى الغيط" taz::

مش فاكره من القصص بتاعته اى شئ غير الجمله دى

بيتهيالى انى كنت بانام اول ما اسمع هذه الجمل و يمكن عشان كده مش فاكره اى حاجه من الحواديت

المهم

من القصص اللى باحبها جدا من المكتبه الخضراء

الملك عادل و البجعات المتوحشات :D وقصه كان تقريبا اسمها جبل العجائب .. فرحت اما لقيتها فى معرض الكتاب من كام سنه بعد ما كان فات على اول قراءه لها ييجى 15 سنه او اكتر f((:

اول ما ابتديت شغل كان ليا زميله بتشتغل فى مكان تانى

وكانت اما تزهق تكلمنى على الآى سى كيو "هييييييييييييييه دنيا" وتقول لى احكى لى حدوته عشان زهقانه gt:

آجى احكى حكاية البجعات المتوحشات الاقينى ناسيه النص stnd:: التانى اؤلفه

الحقيقه البنت كانت متقبله الموضوع تماما ومش حاسه باى اختلاف فى السيناريو

لغاية دلوقت كل ما نتقابل تقول لى اخبار الحواديت ايه

فريده .. عاوزينك تكتبى كل يوم حدوته .. شدى حيلك كده وبلاش تحنيس :)

[abofasad]

إليكم هذه الحدوتة الحلوة

وبصفة خاصة الى "ابو عمر" (سي السيد) وميضحكش على عمر ويألفله حكاية أي كلام

كان فيه يا حلوين جيران ساكنين قدام بعض، الجار اللي على اليمين كان عايش هو ومراته بس لأن أولادهم كبروا واتجوزا ومشيوا من البيت وكان عندهم دهب وجواهر وفلوس كتير اوي

والجار اللي على اليمين كان عايش راجل ومراته وأولاده وكان فقير جدا

في بيت الجار الفقير كان ضحك ولعب ومزيكا وسرور

وفي بيت الراجل الغني صمت وسكون وحزن

مرات الراجل الغني خبطت على باب الفقير وسألتهم : انتم ليه دايما عندكم فرح وسرور وضحك، فردوا عليها ان عندهم لعبة من الدهب، وبيلعبوا بيها كل يوم ، وعشان كده هما دائما فرحانين

الراجل الغني قال لمراته احنا عندنا فلوس كتير وتعالي نشتري كرة دهب كبيرة وفعلا اشتروا كرة دهب وزنها 10 كج، وابتدوا يلعبوا بيها . هو يحدفلها تيجي في وشها تعورها وهى ترميهاله تاني تيجي في راسه تعوره

راحوا تاني عند الجيران وحكولهم الحكاية وطلبوا منهم يشوفوا لعبتهم

فقام الجيران الفقرا فتحوا باب البيت ووجدوا طفل جميل طول النهار يلعبوا معاه وهو كان سبب سعادتهم وفرحهم.

وعلى طول يابو عمر تقول عمر : انت كرتنا الحلوة اللي بنلعب بيها وانت سبب سعادتنا.

[se_ Elsyed]

عندك حق يابو فصاد هو دهب فعلاً لكن لما بيسوق في الرخامة بيبقى صفيح وبأبقى عايز أديلوه بوكس أطبقة واعمله لبيسة قلم جاف ... إمبارح ينزلني الساعة 11 بالليل السوبر ماركت عشان أشتريله أيس كريم stnd::

يبقى دهب أيه ده ؟

دهب مع الريح

[se_ Elsyed]

بس إنتي عشان صعبتي عليه يا فريده - ولو إنك زملكاوية من معسكر الاعداء - لكن حاسس بالمعانه اللي إنتي فيها ..

فإليكي هذه المفاجأة ومجموعة قصص تكفيكي لحد ما العيال يكبروا ويدخلوا الجامعة

آن آن آن تــــــــــــــش

قصص طفولية للعيال المستقوية

[ابو يوسف]

الاخت فريدة ..

انا خرجت من المطب ده بموضوع جميل ..

بسط قصص الانبياء لابنى و كنت باحكيها له مع اضافة شوية مغامرات و اثارة .. و اكررالحدوتة كل فترةو تدريجيا أققل الاضافات و ازود الحقايق ..

لغاية ما بقى حافظ قصص معظم الانبياء بكل تفاصيلها على انها حدوتة ...

مثلا ..

قصة سيدنا يوسف ..

حدوتة ممتعة جدا و مليانة بالتفاصيل المثيرة ..

و اضطريت فى الاول انى احذف موضوع المراودة .. و كنت مصر انى تدريجيا ابسط الموضوع ده ليه - على قد سنه - لغاية ما وفقنى الله لذلك ..

جربى !!!

[DARWEEN]

الأخت العزيزه فريده

طبعا مش محتاج أوصيكي ببعض الحواديت الممتعه مثل

أمنا الغوله stnd::

أبو رجل مسلوخه f((:

والحاجات الممتعه وصدقيني مش حيناموا بعدها طول الليل

stnd:: ;) mc(:

[خاطر]

فيه قصه سمعتها من قريب وعجبتنى جدا لان فيها دروس مهمه

القصه بتقول :

أن كان فيه ملك عنده وزيرأسمه "راضي"وكان دايما راضى بقدر الله أى شىء يحصله

يقول سيكون خيرا إن شاء الله

باقى الوزارء ما كنوش بيحبوا الوزير ده لانه قريب جدا من الملك

وديما كانوا بيحاولوا يوصلوا للملك كلام عنه.

المهم فى يوم من الأيام الملك خرج للصيد وفرحله الصيد حصلت له حادثه أتقطع فيها صباعه.

الوزير أول ما عرف قال جملته المشهوره "سيكون خيرا إن شاء الله"

أخونا سمعوه راحوا جري على الملك قالوله إن وزيرك "راضي " بيقول أن اللى حصلك ده خير ده كده فرحان فيك . طبعا الملك أتغاظ وحطه فى السجن.

تمر الأيام والملك يخرج فى رحلة صياد تانيه مع كل الحاشيه ومن غير الوزير راضي،، ويقبلهم هناك ناس من اللى بيذبحوا البشر ويقدموها للأله بتعتهم ،، وطبعا لازم تكون القربين خاليه من أى عيب أو نقص.

فمين اللى ناجى الملك علشان صباعه المقطوع والوزير راضى علشان فى السجن وباق الوزره راحوا فى الكزوزه .وتوته توته

حلوه ولا ملتوته؟؟

عقبال الوزره بتوعنا قولوا أمين

[ابو يوسف]

يا خاطر حرام عليك ؟؟؟؟

دى حدوته تتحكى قبل النوم ؟

taz:: vmp: vmp:

[Farida]

و الله انا سعيده جدا بالحواديت اللى اتقالت ...و بخصوص حكايات الأنبياء قلتها و الحمد لله ...اما بخصوص حواديت امنا الغوله و ابو رجل مسلوقه قصدى مسلوخه بابعد عنها خالص اصلى باحب الحدوته يبقى لها هدف....

يا لا اتجمعوا كده و ربعوا ايديكوا وعلشان زميلتكم فيروز طلبت من ماما فريده تقولها حدوته تانى ....كلنا نصقف لفيروز

كان يا ما كان و لا يحلى الكلام الا بذكر النبى عليه الصلاة و السلام

كان فيه ولد اسمه محروس و كان ابوه بيبيع عرقسوس و فى يوم باباه تعب جدا فقرر محروس انه يسيب المدرسه و يبيع عرقسوس ....كانت امه تجهزله العرقسوس و ينزل هو يبيعه فى السوق ...و فى مره كان الملك بيتمشى فى السوق شافه و نادى له و قاله ايه اللى مسيبك المدرسه قاله الحكايه الملك قاله هات العرقسوس اللى معاك و خد 50 جنيه و كل يوم الصبح تجيبلى العرقسوس و تاخد الفلوس و تروح مدرستك ........فضل الموضوع كده لحد ما فى مرة ولد زميل محروس لاحظ ان محروس مبسوط فساله عن الحكايه و حكى له محروس فالولد الشرير قرر يوقع بينه و بين الملك ...فطلب مقابله الملك و قاله انا زميل محروس و بصراحه محروس بيشتكى ان جلالتك ريحة بقك وحشه قوى كل ما يقرب لك فأنا حبيت اقولك الملك استغرب و قاله الكلام ده مش صحيح محروس ولد مؤدب و مهذب الولد الشرير قاله لاحظ كده و هو بيقدم لك العرقسوس حا تصدقنى ..... و بعد كده الولد راح لمحروس و قاله على فكره لى قريب فى القصر بقيول ان الملك بيتضايق قوى من ريحتك يا محروس و النبى و انت بتتكلم معاه ابقى ودى وشك الناحيه التانيه....لما محروس راح للملك و الملك لاحظ ان محروس بيدور وشه عنه صدق الكلام و طرد محروس و أمر الحراس ان لما يجى الولد اللى بيبيع العرقسوس تانى يضربوه ...... و فعلا قرر محروس ما يروحش للملك تانى و الولد صاحبه قرر انه هو اللى يبيع العرقسوس للملك و ياخد هو الخمسين جنيه ....ولما راح الولد ,,,انضرب علقه محترمة و اعترف بالحقيقه ......

نتعلم ايه يا أولاد يا حلوين من الحكايه دى ...ما نصدقش كل اللى بيتقالنا

تصبحوا على خير ........(مش عايزة تريقه و النبى و خصوصا من اللى فى بالى )

تم تعديل 31 مارس 2004 بواسطة Farida

[فــيــروز]

يا لا اتجمعوا كده و ربعوا ايديكوا وعلشان زميلتكم فيروز طلبت من ماما فريده تقولها حدوته تانى ....كلنا نصقف لفيروز

:P

عاوزين غنوه بقى يا ماما فريده عشان نحبس على الحدوته الحلوه دى :D lo::

تم تعديل 31 مارس 2004 بواسطة فــيــروز

[se_ Elsyed]

عرقسوس أيه وسوبيا أيه بس ؟ ...

طب وأخر الحدوتة مين هايحاسب على المشاريب دي ؟

مافيش أحسن من الحواديت التراثية اللي إتربينا عليها

أمنا الغولة

وأبو رجل مسلوخة

خصوصاً لما تحيكها للعيل من دول وهو مربوط في السرير اللي في أوضت الفيران

[DARWEEN]

و فعلا قرر محروس ما يروحش للملك تانى و الولد صاحبه قرر انه هو اللى يبيع العرقسوس للملك و ياخد هو الخمسين جنيه ....ولما راح الولد ,,,انضرب علقه محترمة و اعترف بالحقيقه ......

طيب محروس أستفاد أيه يافريده ؟؟؟ ماهو ضاع عليه الخمسين لحلوح اللي كان بيلهفهم كل يوم الصبح

داروين

ناقد أدب أطفال

[مصر عشقى]

هوة الملك دة لسة بيشرب عرقسوس؟

حد يدينى عنوانة وهقسم معاة الخمسين جنية بالنص