عمار يا مصر

[noureymo]

الرابط الي فوق ده لمشكلة كنت عرضتها على حضراتكم في شهر اغسطس 2009

الي حصل النهاردة حاجة بالنسبة ليا مش متوقعة بالمرة

وبصراحة عدم التوقع ده من الي الواحد بيقراه وبيشوفوا في الفضائيات

يا ريت لو حد من حضراتكم يقدر يتخيل نهاية المشكلة دي حصلت ازاي

مستني ردودكم علشان محتاج رايكم

[noureymo]

صباح الخير عليكم يا محاوراتية

84 واحد قروا الموضوع وما حدش كلف نفسه يسأل ايه الي حصل يعني

عموما انا هقولكم علشان بصراحة انا فعلا مش مصدق نفسي

طبعا بعد الي المدرسة عملته انا كنت متضايق جدا اني مش عارف اساعد بنتي وفعلا ما سكتش من ساعتها

المهم في فبراير الي فات بعت ميل لرئاسة مجلس الوزراء ولوزارة التربية والتعليم وبصراحة نسيت الموضوع خالص وقلت ان شاء الله في مايو وانا في القاهرة هروح المدرسة وان شاء الله هحل الموضوع ده.

يوم الخميس الي فات لقيت المدام بتكلمني وبتقولي ان مديرة المدرسة(الي كانت رفضت قبل كده) كلمتها وقالتلها البنت بنتنا وعاوزين نحل المشكلة دي واحنا تحت امرك

المهم بعد شوية مشرفة الباص اتكلمت وقالت للمدام خلاص عدلوا خط سير الباص وهيرجعوا البنت لحد البيت بس صعب نا خدها الصبح.

بعد شوية حد محترم جدا من وزارة التربية والتعليم كلم المدام وقالها عاوزين حضرتك في مكتب مديرعام الادارة التعليمية علشان نشوف ايه الي حصل في الموضوع.

المهم اخدت نمرته وكلمته وشكرته على الاهتمام

عارفين ايه الي حصل يا جماعة علشان الموضوع يوصل لكده

رئاسة الوزرا وصلتهم الشكوى الي بعتها وشكلوا لجنة من تلاتة منهم مندوب مجلس الوزرا ومندوب الوزارة ومندوب المنطقة التعليمية وراحوا لمديرة المدرسة وطلع ان مديرة المدرسة كلمت المدام وهما معاها في المكتب.

السؤال دلوقتي بما ان ده كله حصل هل من حقنا اننا نتمسك بموقفنا وياخدوا البنت ويرجعوها لحد البيت

ولا ايه رايكم نفهمهم اننا متفهمين ان السنة دي خلاص قربت تخلص واحنا متفهمين صعوبة تغيير خط السير في فترة الصبح بس السنة الجاية يا ريت الموضوع يتحل

وبصراحة في كل الاحوال انا حسيت اني كمواطن مصري ليا ضهر بصراحة وعرفت اخد حق بنتي

صحيح الموضوع تافه وليه اكتر من طريقة للحل لكن برده هي مشكلة بالنسبة ليا

[msayed]

الموضوع مش تافه خالص يا صديقى

الموضوع مهم وبيثبت إن إحنا إللى بنضيع حقنا بسلبيتنا

وبيثبت إن بلدنا فيها حاجات حلوة كثير بس عاوزة شوية حركة مننا لإخراجها

أنا رأيى إنك تتمسك بحقك فى إن الباص يغير إتجاهه طالما مش ها يأثر كثير على وقت الرحلة

وبعدين فيه بعض المسؤولين بيتمددوا على قدر إستطاعتهم حسب ما تنكمش أنت

فلو إنت إتنازلت من ناحيتك ها تلاقيهم لن يقابلوا صنيعك بالتقدير ولكن ها يستخلصوا إنك طيب ويمكنهم ييجوا عليك شويتين.

وتحية واجبة فى الآخر لمسؤولى وزارة التعليم إللى قاموا بواجبهم بدون أى ضغط عليهم او إلحاح

تم تعديل 21 مارس 2010 بواسطة msayed

[لماضة مصرية جدا]

السلام عليكم و رحمة الله و بركاته

استاذي الفاضل

ما حصلت عليه هو حقك كبني آدم ...كإنسان و ليس تفضلا من اي شخص

بس لاننا حرمنا منه لفترات طويلة....بنشتاقله و كأنه منحة او هبة او تفضل

ما يجب التحية.....انك أخدت موقف إيجابي للغاية

و احنا مش محتاجين اكتر من كده

ان يبدأ الفرد بنفسه.....

تحياتي

[fatfouta]

لا طبعا موضوعك مش تافه........ده كفاية انه بيعطى امل انه المظلوم ممكن ياخد حقه فى بلدنا

وبيجعلنى اتأكد ان فعلا بلدنا لسه بخير وهتفضل بخير ان شاء الله

بس معلش انت بتقول اقولهم نكمل السنة كده وخلاص؟؟ لا بقى معلش انت عملت ده كله عشان تاخد حقك فـ ياريت ماتسيبهوش

وخليك على موقفك وصمم ان بنتك توصل لغايت البيت

انا بستعجب بصراحة........مدرسة انا بدفع فيها فلوس عشان اعلم فيها ولادى وبالتالى هما بيأدولى خدمات من ضمنها الباص بتاع المدرسة اللى برضو بدفعله وده خارج مصاريف المدرسة

اذاى بقى معلش هما اللى يتنكوا عليا ويتأمروا (اعذرنى فى اللفظين دول) ويقولولى لا هاتها فى المكان الفولانى عشان الباص مش بيروح!!!!

لو انا والله عمرى ماكنت سكتت كل الشهور دى

الحمد لله ان ربنا رجعلك حقك واتمسك بيه واوعى تسيبه ولا تتراجع فيه لان ممكن السنة الجاية يرجعوا يقولولك لا مش هينفع.......مش انت اللى عاوز كده

فوضح الامور ليهم لان ده حقك

تحياتى ليك على موقفك المتحضر

[noureymo]

شكرا لحضراتكم على اهتمامكم بالرد

وانشاء الله مش هتنازل عن انهم ياخدوا البنت ويرجعوها لحد البيت

علشان كده هحاول اكون معاهم في الاجتماع الي الساعة 10 الصبح ده من خلال التليفون

دعواتكم .

شكرا مرة تانية ليكم كلكم

msayed

لماضة

fatfouta