الف باء في تصنيف الأطباء

[se_ Elsyed]

أهو قولت لكم من أولها

ممكن يكون ده أنطباع شخصي خاطيء

السبب اللي خلاني أكتب الموضوع ده بصراحه هما سببين

سبب قديم قوي ييجي من 6 سنين لما كان عُمر صغير وكنت على وشك إني أضرب رئيس قسم العظام بالمستشفى لكني تماسكت واخدت حقي بالطرق الشرعية الرسمية وناري بردت

والسبب التاني لسه يادوب يوم الأربعاء الماضي .

- هاحكي الموقف الأولاني ... عُمري افندي كان بيلعب كوره في الجنينه وولد وقع عليه في ألتحام كروي قوي وأصيب بكسر مضاعف في عظام الفخذ وركب شريحه وكانت شغلانه .. المهم رئيس القسم في المستشفى السعودي الألماني بصراحه هو اللي كان متولي الحالة وراجل الحق يقال اكثر من محترف وإيده تتلف في حرير .. لكن يا خسارة الحلو ما يمكلش .. عنده كمية كِبر وعنجهيه مش على حد ... قولنا وماله إحنا هانناسبه ؟

لكن ده لما ينعكس على الحالة اللي بيعالجها فيبقى لأ ... فكانت زوجتي مرافقه لعُمر هي وخالتها ... وأنا بأزورهم بعد أنتهاء عملي .. فزوجتي ام ومنزعجه من حالة الطفل فبتسأل الدكتور أسألة طبية عاديه .. وصاحبنا مناخيره في السما ومش راضي يدينا عُقاد نافع ..

المهم كنت في زيارتهم مره لقيته بينده لي وبيقول لي بالحرف الواحد : يا احمد بيه عاوز أعمل معاك إتفاق

قلت له خير ؟

قال لي : لازم يكون تعاملك معايا مباشرة .. لإن المدام بتحب تسال عن كل حاجه تخص الحالة وأنا مش فاضي وورايا الف مريض ولو رديت على كل واحد يبقى مش هاخلص ... فقدامك حل من أتنين .. إما اتعامل معاك مباشرة وساعتها هاعتبر عُمر إبني وهاعمل اللازم معاه وزيادة .. أو براحتك وساعتها هاعتبره مريض عادي وخلاص ...!!!!!!!!!!

تخيلوا ؟؟؟؟؟ ... روحت طالع فيه طبعاً ومدي له في جنابه وواخد بعضي وطالع على المدير الطبي اللي أندهش من الكلام ده .. وقلت للراجل حاجه واحده بس

قلت له يا دكتور إذا كان المثل بيقول : الزبون دايماً على حق .. ده في البقالات سعادتك ... ما بالك بالمريض اللي بيبقى هو واهله في حاله صعبه ومن حقه يطمئن على كل شيء ويسأل عن كل شيء يخص الحاله ؟ المريض مش بيعمل شات مع سعادتك ويضيع وقتك يعني

وحقيقةً المدير الطبي مسكه بستفه قدامي وهو رئيس قسم وعلمه حقوق المريض إيه

الموقف التاني لسه طازه

انا باتابع مع طبيب اطفال محترم في مستشفى المركز التخصصي .. فالولد تعب وحرارته عليت يوم الأربعاء الماضي .. اخدته على المستشفى جري اتاريها كانت اجازة الدكتور .. ولاني روحت من غير موعد فقلت لهم شوفوا لي مين اللي فاضي وانا ممكن انتظر ساعه ولا حاجه .. فموظفي الأستقبال رشحوا لي طبيب اخر من جنسية عربيه .. بأمانه وبدون تعميم مشهور عن كتير من اهلها إنهم ديفشين وجافين في تعاملهم .. أنا قلت ربنا يُستر .. أقسم بالله لسه داخل وبأقول سلامو عليكم إلا وده بيبص في الملف ويقول لي : نعم عاوز إيه ؟

أنا بصيت ورايا قلت يمكن بيكلم حد تاني ... لقيته بيقول لي : إنت مش بتتابع عند الدكتور فلان ؟ ما روحتلوش ليه ؟

انا قلت شويه وهايمد إيده عليه أو على الأقل يضرب عبد الرحمن بالشلوت في ودانه

فقلت له الدكتور في اجازه والولد تعب .. ولقيت مراتي بتلتفت لي وبتمسكني من إيدي عشان ما أطلعش المطوه وأغزه لأنها عارفاني ما باطقش دبانه تعدي قدامي ... وقالت لي عشان خاطر الواد ما تغزوش

المهم كمل كشف على الولد وهو متأفف وكأني جايب مبيض محاره يكمل مرمه بدأها صنايعي اخر

المهم من وجهة نظري بقى ولان كتر الحُزن بيعمل البكا أقدر أصنف الاطباء إلى التصنيف التالي :

1- طبيب متميز حرفيةً واخلاقاً ويُراعي نفسية المريض والمحيطين به ويعلم تماماً مدى اهمية الجانب النفسي

أه بالمناسبة ... لا أشجع تماماً الانبهار بأسلوب الأطباء الاجانب اللي الناس بتشكر فيهم وتقول : ما بيخبيسش على المريض حاجه وبيقول له الحالة بالتفصيل حتى لو كان خلاص في اللحظات الأخيرة وبيديها له في وشه زي قالب الطوب .... شيء بشع واحساس زي تنفيذ الاعدام بالظبط

2- طبيب على قده وماشي حاله .. لكنه عنده موهبة التواصل الأنساني مع المريض وبيعوض نقص مهارته في إعلاء الجانب النفسي لدى المريض والمحيطين به ... وبصراحه ده شيء ممتاز جداً لإن الجانب النفسي زي ما احنا عارفين بيقووي المناعه وما إلى ذلك

3- طبيب عالي قوي وبروفيشنال زي الراجل بتاع الألماني اللي بأقرف من سيرته .. لكنه متعجرف ويكاد يعمل في صمت ويمكن حتى ما بيقولش للمريض إنت عندك إيه وواخد الموضوع من طرف واحد ... وبصراحة ده يغور ولو كان اخر طبيب في الدنيا لأنه بيتعب المريض نفسياً اللي أساساً حالته ما بتبقاش ناقصه

4- طبيب نص لبه وتعبان ومش بيطرو نفسه وفي نفس الوقت متقوقع على نفسه وما بيقدرش يتواصل مع مريضه

شكراً ليكم

أ د ... سين سين

[fatfouta]

للا سف ان معظم الاطباء فى كل مكان مش بيحبوا المريض المثقف اللى ذى حضرتك يا سى السيد

وعاوزينك تكون واقف ادامهم يكتبولك الدوا وتاخده وتمشى من غير ماتسأل ولا تقول اى حاجة تانى

بس انا بقى برزل واسال فى كل حاجة.........ولا بيهمنى

هو فعلا فيه دكاترة بتبقى مش طايقة نفسها لكن انا بجبره على التعامل معايا ذى مانا عاوزة ومش بيهمنى منهم بصراحة

فى الاخر انا ليا مصلحتى انا كمريضة او اى حد بكون معاه ذى ولادى لما بيكونوا عيانين

وربنا مايوريك حاجة فى عزيز عليك يارب

تم تعديل 14 مارس 2010 بواسطة fatfouta

[ذهبية]

و الله لاحظت انا بعد اذن حضرتك يا ساتاذ سين ان الاطباء نوعين

واحد وصل و شبع فلوس و بيكلم المريض بزهق لانة شبع و لان العيادة مليانة و معندوش وقت ليك

وواحد لسة بيبدا حياتة و الطموح لسة فى بدايتة انى يعمل شهرة و اسم فبيكون متزاضع و لذيذ

ولان العيادة لسة فاضية بالتالى بيقعدو يتكلم عادىىى

انا هاحكى لحضرتك على اشهر طبيب عندنا فى المنصورة للاطفال اولا الحجز قبلها بشهر مليش دعوة بقى ابقى ضبط عي الولد على ميعاد الدكتور

ثانيا الدخول الى الطبيب اربعة اربعة و الله اربعة اطفال فى ذات الوقت

يعنى عقبال ما تقلع ابنك يكون كشف على اتين و تقلع تلبس برة فى الطرقة

[Alrefaey]

الاطباء بشر , والبشر انواع , فيهم البشوش الشاطر فى مهنته و ومنهم العبوس سواء كان شاطر او خايب , ومنهم اللى همه الاول والاخير الفلوس واذاى يستغلك ماديا باحترافية , ومنهم الانسان اللى بيراعى ربنا فى شغلة واخلاقياته مع المرضى .

[hOuSsAm]

والله يا ريس انت جبت اللى فيها

فكرتنى بدكتور الاسنان بتاعى فى مصر مع انه كان اغلى واحد فى البلد وكنت بروح اتلطع 4 ساعات مستنى الدور بتاعى لحد مبكره حياتى :) بس كنت بدخل واقعد عالكرسى ولا اكنى بتفرج على مسرحية من كتر الضحك والانبساط

ونفضل نحكى فى حكايات بس طبعا من طرف واحد لانى مكنتش عارف انطق بكلمة -_-

كنت بحب اتكلم معاه اوى وياريت لو يطول فى وقت الحشو :wub:

وفجاة الاقيه بيخلع الجونتى ويقولى خلاص wst:: اقوله استنى بره يقولى لاء الحشو خلص ولا انا حسيت باى حاجة :)

وكان نضيف جدا ومتقن لعمله اوى

فى نفس الوقت كان مرة اخويا تعب وتقريبا والدتى اعطته حاجة غلط او كدة الدكور هب فيها وقالها انتى مبتفهميش مع انه تقريبا كان مشهور بس تقريبا معتناش بنتعامل معاه

ودكتور تانى لما كان يجيلى شوية برد او لوززززززززززززز مكنش يقول فيه ايه كان دايما يقول خير خير باذن الله هتبقى كويس

طيب ياعمنا فيه ايه يقولى خد بس الدوا ده وتعالى بعد اسبوع وتقريبا مكنتش بروحله لانى مبكونش محتاج ساعتها كان بيجيب من الاخر ربنا يرحمه بقى

دكتور بقى زى عينة الراجل بتاع المستشفى الالمانى مشهور جدا بس تنك ومش بيعرف حد حاجة بابا كان بيتعامل معاه ومكنش مفهمنا بابا حالته ايه بالظبط كان بيدى علاج ومواعيد بس لحد مدخل مستشفى غنيم وكان صحبى نايب هناك لاقيته بيكلمنى فى التليفون وقالى عايز اقابلك وفهمنى حالة بابا بالظبط

هى مكنتش خطيرة بس اهو من العلم وتبقى مقدر الظروف والعواقب

بس هى فعلا مهنة خطيرة ومحتاجة مزيد من الاهتمام بالتدريس لان اللى بيحصل مع العيال بتوع طب لحد مياخدوا الماجيستير كتير اوى ويمكن الله اعلم ده اللى بياثر على شخصيتهم بالسلب او الايجاب

اتمنى ان الدولة فى الفترة الجاية تهتم بمهنة الطبيب اكتر من دة بكتير

[hOuSsAm]

و الله لاحظت انا بعد اذن حضرتك يا ساتاذ سين ان الاطباء نوعين

واحد وصل و شبع فلوس و بيكلم المريض بزهق لانة شبع و لان العيادة مليانة و معندوش وقت ليك

وواحد لسة بيبدا حياتة و الطموح لسة فى بدايتة انى يعمل شهرة و اسم فبيكون متزاضع و لذيذ

ولان العيادة لسة فاضية بالتالى بيقعدو يتكلم عادىىى

انا هاحكى لحضرتك على اشهر طبيب عندنا فى المنصورة للاطفال اولا الحجز قبلها بشهر مليش دعوة بقى ابقى ضبط عي الولد على ميعاد الدكتور

ثانيا الدخول الى الطبيب اربعة اربعة و الله اربعة اطفال فى ذات الوقت

يعنى عقبال ما تقلع ابنك يكون كشف على اتين و تقلع تلبس برة فى الطرقة

فعلا يا ذهبية الاطباء فى المنصورة غاليين اوى لان المنصورة مشهورة انها مدينة طبية عالمية وان الدكاترة فيها بياخدوا تدريب كويس فى المستشفيات التعليمية

وبمناسبة دكتور الاطفال ماهو راجل طيب اهو وبيخليكوا تستنوا شهر

مستشفى غنيم عشان حد يدخل يعمل عملية فيها كان قدامه 18 شهر :wub:

وجبناها بواسطة وتقيلة كمان -_- انه ياخد دور بعد شهرين

بس اوعى وشك مستشقى عالمية يعنى السرير اللى جنب بابا كان واحد جاى من سوريا واللى بعده من ليبيا واللى بيتعين فيها فى الغالب يكون الاول عالدفعة

دكتور تانى فى الزقازيق مرة رحت مع بابا وماما وانا صغير بدون مبالغة كان فيه ناس من الصعيد الجوانى واللى هما باين مستنين دورهم من 8 الصبح والحجز بيبقى بعد شهر (معلهش ممكن اكون مفوت فى بعض الارقام لانها حجات قديمة اوى)

[crossfield]

آااااااااااااه يا سى السيد قلبت عليه المواجع الله يسامحك -_-

بابا الله يرحمه عمل جراحة لاستئصال ورم فى الكبد و على اللى جرى له ...اهمال طبى و قلة أدب فى مستشفى الباشا وزير الصحة الله.... و الا بلاش . المهم بعدما خرجناه من المستشفى دى رحنا فيييييييين ؟؟؟؟؟؟ حالة متأخرة و مفيش و لا مستشفى خاصة راضية تقبله و فى الآخر استقرينا فى القصر العينى :wub:

و لانه عمل عملية تانية علشان يطلع الأنبوبة اللى نسيوها فى بطنه فى دار الفؤاد كانت حالته حرجة المهم دخل فى غيبوبة و حالته كانت سيئة جداً بس كان يفوق منها من وقت للتانى و هكذا

فى مرة بقى كنت معاه لوحدى فى الأوضة و شوية و جه خطيبى(جوزى حالياً) للزيارة و بابا كانت حالته أسوأ مما يمكن و كان بيتألم جداً الله يرحمه فى اليوم ده و قاللى اندهيلى الدكتور يدينى أى مسكن ... الله يرحمه تعب و اتبهدل قوى

المهم طلعت أدور على البيه الدكتور المسئول عن الحالة

ممرضة قالتلى تلاقيه فى أوضته (اللى هى فى نفس الكوريدور اللى فيه أوضة بابا)

خبطت على الباب فتح الباشا و على وشه غضب ربنا قلت له لوسمحت ممكن تيجى تشوف بابا تعبان قوى ادوله أى مسكن

قوم يقول ايه؟؟؟؟؟؟؟؟؟

أصل مش معقول يعنى كل ما يتعب تيجى تخبطى عليه ده وقت راحتى(على فكرة دى أول مرة أخبط على باب الباشا)

و عينك ما تشوف الا النور

صوتى على بقى و لعلعت فى المستشفى مكنش زعيق كان بعيد عنك هيستريا

كان خطيبى واقف جنبى يشدنى من إيدى و و الله كان شويه كمان و هيلاقى نفسه طاير بقلم على وشه يوصله لحد الكرسى اللى كان قاعد عليه

يعنى ايه يعنى يموت هوه علشان ما ازعجش سيادتك و انت بتعمل ايه يعنى ما انت قاعد تتفرج على التليفزيون مش شغلك ده

و الله الواد وشه جاب ألوان و مشى قدامى زى ال... و الا بلاش برضو .

طبعاً بعدها مسكتش فى نفس اليوم اللى كنا خارجين فيه من المستشفى رقعته عدد واحد شكوى محترمة عند رئيس القسم و هوشت بقى شويتن بإنى و الله لافضحكم فى الجرايد و الله لاعمل و اسوى و فعلاً الشويتين دول جابوا نتيجة و مخرجتش الا و هو متحول للتحقيق و بالشفا.

بصراحة كده و من غير زعل اللى شوفته فى مرض بابا من الدكاترة كرهنى فيهم كلهم.

موقف تانى.

فى أواخر فترة الحمل جالى فجأة دور غريب كده فقدان توازن و قئ

كانت الساعة 2 الفجر و زوجى العزيز طبعاً قلق و خدنى على المستشفى

بس فيه مشكلة

البيه نائب الدكتور ناااااااااااااااااااااااايم

صحوه

و يا ريتهم ما صحوه

وش ابلاكاش و يقوللى ايه تفتكر؟؟؟؟

طيب لما انت تعبانة من ساعة بس ما استنيتيش ليه للصبح لما تشوفى الحالة زى ما هيه و الا بتتحسن؟ (بصيغة أخرى ما تتلقحوا فى بيوتكم للصبح حلونا ننام شويه ) حاجة كده شبه الرد السمج بتاع الدكتور اللى كشف على ابنك

المهم ما اقتنعش انى تعبانة فعلاً إلا لما رجعت قدامه (آه ياما كان فى نفسى أرجع فى وشه)

و يا ريته عرف يشخص الحالة كمان

اضطر فى الآخر يكلم الدكتوراللى بيتابعنى أصلاً و هو اللى قال له فى التليفون خليها تروح لدكتور أذن و حنجرة.

فعلاً دكاترة على ما تفرج

المفروض الدكتور ده يبقى راقى و محترم و ابن ناس و بيحب مهنته و حاسس بالمرضى بتوعه

يالا معلش يمهل و لا يهمل. وحسبى الله فى اللى عملهم دكاترة أصلاً.

تم تعديل 14 مارس 2010 بواسطة crossfield

[غريب الخبر]

السادة الافاضل . شكرا على التعليق ومروركم الكريم .

انا لا ادافع ولا اهاجم . ولكن يعلم الجميع مدى الضغط النفسى والعصبى الذى يقابله الطبيب فى عيادته او المستشفى عامة .

لما الواحد بيشوف 30 او 40 حالة فى اليوم على الاقل وكل واحد عنده مشكلة واللى عايز يسال فى مشكلة غيره ايا كان قريب لى او صاحبه . و اللى عايز يعرف اشمعنى الدواء ده وليه الجرعة دى و هكذا .............................. .

ولكن للامانه . الدكتور الشاطر هو اللى يقدر يسمع المريض للاخر ودائما يهتم بالجانب النفسى له قبل الجانب العلاجى لانكم كما تعرفون ان بعض المرضى يحتاج للدعم النفسى زى مثلا .. انت كويس... الموضوع بسيط ... ..........الخ .

الطبيب الناجح حقا هو الذى يجمع بين الجانب العلمى والنفسى معا . ويمكن لان ده مجالى اقدر اقول ان التعامل مع المريض بصورة ايجابية اهم من التاثير الايجابى للعلاج . يمكن فى بعض الاحيان الدوا يكون غير فعال بس العيان طالع مبسوط ويخف بعدها بيومين حتى لو ماخدش العلاج ويقولك الدكتور ده عشرة على عشرة .

كلنا بشر وكل انسان له طاقة والكل فى عمله يتعرض لضغوط ايا كانت مهنته فارجو العذر لبعض الاطباء والذين حتى لا يملكون الوقت احيانا للرد على التليفونات .

دعائى بالشفاء للجميع والبعد دائما عن الاطباء والمستشفيات

تحياتى

[se_ Elsyed]

دكتور غريب دكتور رفاعي . تعالوا لي على جنب

أنا عارف إن الطبيب زيه زي أي أنسان به متناقضات وطباع مختلفه ومنهم السوي ومنهم من دون ذلك و و و و .. وإنه بيتعرض لضغوط خارجية وداخلية .. إلخ

لكن هناك فرق .. بين إنسان هانقول مثلاً مهندس بيتعامل مع آلات وحجارة ومواد بناء وضغوطه لاتؤئي ولا تؤثر على أحد

وبين طبيب بيتعامل بشكل مباشر مع البشر وربنا سبحانه وتعالى وضع في أصحاب تلك المهنة - في إعتقادي يعني - شيء من قدرته في الشفاء وتصل إلى حد أحياء الموتى بإذن الله طبعاً ... وبالتالي تُؤثر تلك الضغوطات على من هم أمامه ويُعاني المريض من ذلك ويدفع ثمن شيء ليس له فيه أي دخل ...

هاقول لكم على حاجه

لما روحت رفعت شكوى رسمية لمدير المستشفى الألماني ... ما عملتش كده إلا بعد ما أستنفذت كل الصبر وكل الطرق السلمية في التعامل مع مثل هؤلاء

ومن ضمن ما قلته للمدير الطبي إني أعمل في وظيفة أتعامل فيها يومياً مع ما لا يقل عن 1500 موظف ... ده غير عائلتهم .. وأعلم تماماً إن صاحب أي مشكة بيبقى مفكر نفسه هو محور الكون وإن مشكلته دي هي المشكلة الوحيدة في الكون كله وطالما الواحد وُضع في موقع يتعامل فيها مع بني أدمين .. يبقى يا يستحمل يا ينسحب ويشوف أي عمل إداري أو مع جمادات ...

لكن أقول أنا عليه ضغوط والناس لازم تعذر وما تتكلمش كتير و و و ؟

فهذا غير مقبول

تخيلوا يا جماعة لو جراح مثلاً وعنده مشاكل عائلية وحالته كرب ... تخيلوا لو هو من الناس اللي المشاكل بتأثر جامد على تصرفاته وسلوكه وأداءه ... كان إيه اللي حصل ؟

[mama nona]

استغربت كلامك جدا يا سي السيد

لانك اتكلمت عن مستشفيات خاصة مش حكومى

والمفروض فالخاص ده بندلع الزبون

ال حصل معاك حالة خاصة مش عامة

وغالبا الاستشاريين هما ال بيتعاملو كده

والمسأله مش انه مشاكله الشخصية بتأثر عليه

الموضوغ ضغط الشغل مش اكتر

واصحاب المستشفيات الخاصة دى مبترحمش بيكونو عاوزين وخلاص ومش مهم الدكتور ده هيجيبلهم اززاى

ان شالله يتشحط مش هتفرق معاهم

تخيل مثلا نفسك طبيب وده طبعا فالمشمش (والله هتغز المرضى بالسكينة ومش هتستحمل )

وبتدوام المطلوب منك فاليوم غيرانهم يتصلو بيك قاوقات غير الدوام للمرضى ال ظهرو فجأة

وكمان بيصلو عليك للمرضىالمتنومين فالمستشفى

فين حياتك ونومك وراحتك ؟؟؟

مش بدافع عن الغلط انا بحاول التمس عذر فقط للاطباء ال صدر منهم كده

اوعدك ان شاء الله اول ما ابقى استشارية انى هاعمل اكتر من كده :lol:

تم تعديل 15 مارس 2010 بواسطة mama nona

[se_ Elsyed]

الموضوع يا ماما الدكتور نونا لا علاقة له بأستشاري أو حتى طبيب أمتياز .. كما لا أتفق مع اختنا جولدن اللي قالت إن الدكتور بيبقى شبع

لأن ده بيبقى Attitude سواء دكتور كبير ولا صغير هو شخصيته كده

بدليل الواحد إتعامل مع دكاترة كبار وأصحاب أسماء ورؤساء أقسام لكن عندهم سعة صدر وسماحه ما حصلتش ..

طيب . هاضرب لكم مثل ...

رئيس قسم الكلى والمسالك البولية في المستشفى الألماني .. الدكتور هشام الشواف .. بصراحه شخص في منتهى الأخلاق العالية والتفاهم .. لدرجة من فترة كنا بنتابع معاه وبأقعد في عيادته وبأبقى ماسك نفسي من الضحك .. لأن بتوصل درجة الإقناع عنده إنه بيشغل اللاب توب وبيعرض لي برزينتيشن بالباور بوينت وبعض البرامج الطبية الأخرى ولا كأني بأدرس طب .. والله استفدت حاجات كتيرة منه وبأفكر أفتح عيادة بعد الضهر أنا كمان ...

وأهو رجل مشغول ورئيس قسم وتحت إيده العديد من الأطباء وعنده مرضى كثيرين جداً ...