وتتوالى المصائب ... برنامج بيج برازر

[se_ Elsyed]

في خضم هوجة برامج الكاميرا الواقعية ومعايشة حياة الشباب العربي خرج عباقرة الإعلام العربي في عدة قنوات فضائية فضاحية فاضية بعدة برامج ومسابقات تحمل نفس المضمون والفكرة مع إختلاف طريقة العرض والتنفيذ ومنها " عالهوا سوا " " ستار اكاديمي " " بيج برازر ".

فبالأمس خرجت علينا قناة " إم بي سي تو " ببرنامج " بيج برازر " وهو نسخة معدلة من البرنامج زائع الصيت في أوروبا ....

وتتلخص فكرة البرنامج في إختيار 12 شاب وشابة من مختلف الجنسيات العربية- بعد ان تلقى البرنامج بالتأكيد آلاف الإتصالات التليفونية -

وسوف يمكث هؤلاء الشباب فمع بعضهم البعض في منزل واحد لمدة 3 شهور ( 90 يوم ) بدأ من يوم أمس وكل يوم سيكون فيه لقاء مباشر وتواصل بينهم وبين الجماهير لمدة 3 ساعات وتدور حوارات ونرى ملخص لحياتهم اليومية من لعب وضحك وجد وحب وقد تم زرع كاميرات تصوير في كل الاماكن - بإستثناء الحمامات دي موجودة بس في النسخة الاوروبية - وبين الحين والآخر سيتم تصفيتهم بناء على تصويت الجماهير التى ستتصل تليفونياً ومن سيجمع عليه الجميع بإنه أحسن شخصية بينهم سيربح جائزة البرنامج وقدرها 100 ألف دولار ...

وعلى فكره المنزل موجود في جزيرة بالبحرين .. والشباب هم من مصر والسعودية والكويت ولبنان وسوريا وسلطنة عمان والعراق والاردن وتونس والصومال ...

وهكذا يا سادة بعد ان يأسنا من محاولات تجميع العرب تحت مظلة واحده وتوقفت مساعينا عند الأغاني والأوبريتات من " امجاد يا عرب امجاد " لـ " وطني حبيب .. الوطن الأكبر " إلى " السراب العربي .. قصدي الحلم العربي "

ها نحن ذا امام تجربة وحدوية تقدمية تلتحم فيها الشعوب العربية مع بعضها البعض - ربنا يستر من الإلتحام ده - وعيشنا وشوفنا اليوم اللي فيه العرب جميعاً في منزل واحد تحت سقف واحد ويأكلون من طبق واحد ... فهنيئاً لنا بالوحدة الجديدة موديل 2004 ... وهنيئاً للغرب وشكراً للعولمة ...

[أسد]

بصراحة ...

شاهدت المأساة التي عرضت بالأمس ..

أصبت بالقرف .. والخزي من هؤلاء الشباب ..

لدرجة أنه كانت تأتي بعض اللحظات لا أقوى على الإستمرار في المشاهدة .. بل أدير وجهي الناحية الأخرى ....

وأردد في فسي ...

هي ناقصاكم انتم كمان ...

[abdo_bek]

مصر مشرفانا باشتراك انسه او سيدة فى البرنامج لا اعلم مبروك علينا

اما المشتركه السوريه الجميله امها ياعينى سيدة محجبه جت تودعها وهى داخله الفيلا وتقولها بالانجليزى احنا بنحبك مكتوبه على يافطه

والى زاد وغطى شاب مخنس معرفش من اى داهيه لابس زى المهرجين

وامراءة من مسقط عمان شوفتوا الخليج تطور ازاى

بعدين نتابع البرنامج ويمكن يعملوا محطه خاصه له زى ستار اكاديمى حتى نتابعهم 24 ساعه يوميا مااحنا فاضيين

[se_ Elsyed]

لفت نظري شاب مشترك من الأردن قد ضرفة الباب بالظبط وكل مؤهلاته حسب كلامه إنه بيعرف يرقص " صلصلة " انا سمعت كده "والدِمعة " كانت هاتفر من عيني ...

بتعرفي ترقسي سلسة يا بيضا يأختي إن شاء الله تكبر وتتجوز ، يا ريتها كانت خلفت لنا كيس مكرونة كنا أستفدنا بيه أحسن..

وبعدين المذيعة سألته وطبعاً خلال التلات شهور اللي هاتقعدهم مع الشباب والشابات هاتعلمهم رقست السلسلة ... فقال لها طبعاً ده أكيد ....

وأنا أقول الطماطم شحة من السوق ليه ؟

وسألته أيضاً أيه اكتر حاجة هاتفتقدها خلال الفترة دي ؟ فقال لها سأفتقد أصدقائي ولمتنا مع بعض وجابوا مشهد مصور وهو مجتمع مع أصحابه في أحدى المقاهي وكلهم بلا إستثناء منسجمين وبيشربوا الشيشة ...

[صعيدي]

معلش ولو فيها رزالة fsh:: fsh::

الاخوة المشاركيين فى الموضوع كلهم بينقدوا البرنامج ومش موافقيين عليه.......

صح :)

طيب متقفلوا التليفزيون أحسن وكفاية ذنوب wlch:: وأضعف الايمان هو تغيير المحطة

أعتقد ان احجام المشاهديين عن تلك النوعية من البرامج هو افضل رد عليها....ولا ايه mfb:

وبصراحة اقولها لمن يسمح لابنته او زوجته او أخته بالمشاركة فى البرنامج والمبيت مع اغراب هو ديوث...

انا لا ادعى الافتاء ولكن أعتقد ان هذا لا يجوز حتى ولو ارتدت النقاب (بالرغم انه لا يوجد من ترتدى حتى ايشارب) اما من يشارك فى هذا السفه من الشباب فهو فاسق (الفاسق هو العاصى الذى يجاهر بمعصيته ولا يخجل منها)

[se_ Elsyed]

طيب متقفلوا التليفزيون أحسن وكفاية ذنوب  wlch:: وأضعف الايمان هو تغيير المحطة

أعتقد ان احجام المشاهديين عن تلك النوعية من البرامج هو افضل رد عليها....ولا ايه mfb:

عندك حق يا دكتور ، ولكن علشان كانت حاجة جديدة فلفتت إنتباهنا مش اكتر وبعدين دي لسه بقى لها يومين بدءه وقولنا نشوف إيه اللي بيحصل من باب العلم بالشيء ليس إلا ...

وأعتقد إن الواحد ليس بالسفاهه إن يفضل يتابعهم 3 شهور متواصلة بشكل يومي ..

[أسد]

بما إني مصاب بداء الريموت ...

فأنا بامر عليهم كل يوم شوية ... ده بحكم العلة اللي عندي ...

والكلام هنا .. ليس لتقييم البرنامج .. أو المشاركين في البرنامج ...

فمثل تلك البرامج هي هراء ليس إلا ..

أما ما يلفت الإنتباه ... هو كيف وصل الحال بشبابنا .... وما هذا المستوى الذي يتردى حالنا إليه ...

وهذا ما يجرى مناقشته ..

قطعاً نحن لا نتابع أو نقيم هذا البرنامج ...

ولكن في رأيي ... أن ما يحدث هذا .. هو حدث جلل ..

بالنسبة لأمتنا الإسلامية ... العربية ...

إجتماع رجال ونساء في بيت واحد ... يتفرج عليهم العالم كله ... فهذا حدث جلل.. لا ينبغي علينا أن نفوته ..

بل يجب علينا أن ندينه بأقصى ما نملك من قوة ...

أما الرأي في هؤلاء .. سواء كان فاسق أو فاجر . أو تافه ... فهذا لا يعنيه في شئ...

هؤلاء الأشخاص إرتضوا لأنفسهم أن يكونوا فرجة لكل من هب ودب ...

خلاص ... ماذا سنفعل بهم أكثر من ذلك ...

لا توجد عقوبة أكثر من ذلك ..

انهم يبقوا جرسة ... ويبقوا فرجة ...

[DARWEEN]

أنا مع شديد الأسف شفت حوالي خمس دقايق كده من البرنامج

أنا طبعا ماكنتش فاهمه في الأول بس بعد شويه الحمد لله ربنا هداني وفهمت وأتجننت زياده

في بقى شاب (والله أعلم) اعتقد أنه لبناني ( واخده بالك ياشعنونه ) المهم الواد كان بيعلم بنت أزاي بيلبس غويشه في أيده ... آه والله العظيم ... وبيقولها أن عنده منها خمس ألوان .... لحد هنا انا بدأت أولع ... :D :D B) بعين قالها أيه بقى ؟؟؟

قالها أن بيركب خرزه في لسانه بلون الغويشه .... لحد هنا بقى ومقدرتش .... wlch:: mfb: :) :) :P

ربنا يرحمنا برحمته

السؤال بقى المهم جدا اللي قعد يلح على دماغي :

هو البرنامج أصلا عاوز يوصل لأيه في النهايه ؟؟

يعني أحسن واحد في أيه ؟؟

[فــيــروز]

أما ما يلفت الإنتباه ... هو كيف وصل الحال بشبابنا .... وما هذا المستوى الذي يتردى حالنا إليه ...

الحقيقه لا ادرى هل ما ساقوله سيعد من قبيل التفاؤل ام العبط ام ماذا

لكنى لا اظن ان هؤلاء الشباب فى تلك البرامج يمثلون بالفعل الشباب العربى او على اقل تقدير الشباب المصرى .. ولكن البرميل الفارغ يحدث ضجيجا اشد ..

بعد ان شاهدت فيلم سهر الليالى الصيف الماضى الذى يناقش مشاكل شريحه محدوده من الرجال و النساء فى المجتمع المصرى كان رايى كما هو الآن .. الاعلام يختار شريحه مرفهه يتحدث عنها ويسلط عليها الاضواء لانه يؤمن بالمثل القائل "الفقر ريحته وحشه" !! وهم لا يريدون ان يتحدثوا فى موضوعات كئيبه مثل ازمة الاسكان او البطاله او تلك الامور المقبضه و الاسهل و الافضل لهم ان ينتجوا برامج من نوعية بيج براذر و ستار اكاديمى .. لكنى فى النهايه لا ارى هؤلاء الشباب فى الشوارع التى امشى بها ولا اتعامل مع امثالهم فى مكان العمل ولازلت لا اعتقد انهم يمثلون نسبه يعتد بها فى المجتمع ولا يستحقون ان نتحدث عنهم اصلا او نفكر فيهم

[الأفوكاتو]

هذه البرامج هى بقليد أعمى لبرامج أمريكية, و هى تذكرنى بالأفلام المصرية التى عربت قصصا فرنسية عالمية, مثل قصة " كونت دى مونت كريسبو" التى أعادت السيما المصرية تثمثيلها نحت أسم

"أمير الإنتقام"

و جاء الفيلم مسخا لا هو فرنسى, و لا هو مصرى, و لا هو أمريكى.

إن البرامج المخصصة لعرض ثقافات و مجتمعات معينة, لا تصلح لكى تكون نموذجا يمكن تطبيقه على مجتمعات أخرى, و إلا ستكون النتيجة مسخا مشوها . مثلما حدث مع قصة " كونت دى مونت كريستو"

[Katamando]

انه حلقة جديدة من مسلسل الغزو الثقافي والفكري

ومحاولة لتغيير العادات بالقوة وبالإقناع البطيء وبالتحايل وبكل الوسائل

وقد كنت قد نبهت لمثل هذا الأمر من قبل ..... يرجى مراجعة الموضوع في الوصلة التالية

الوصلة

[MuslimaEgyptian]

أنا مسمعتش عن البرنامج ده..ولكنى فوجئت ببرنامج أخر أمريكى سيتم تقليده إسمه

Fear Factor ...عن شباب بيتحطوا فى مواقف صعبه "وهايفه" للغايه، فى سبيل نقود على ما أظن وعمرى ما قدرت أتفرج عليه لأنه فعلا فعلا مش ظريف...مواقف من نوع ان واحد ينام فى صندوق مليان دود ويديه مربوطه ويقفلوا الصندوق عليه ولازم يفك نفسه وحاجات كده مقززه والامريكان مهووسين بيه...

وإستغربت لفتاه عربيه من بلد شقيق متحمسه اوى للمشاركه به.. wlch::

سبحان الله، ناقشنا من عام خوفنا على تقليد مسلسل Baywatch الامريكى، ومتحققش ولكن طلعلنا عشره زيه...وأسوأ..

في بقى شاب كان بيعلم بنت أزاي بيلبس غويشه في أيده ... آه والله العظيم ... وبيقولها أن عنده منها خمس ألوان .... لحد هنا انا بدأت أولع ...    بعين قالها أيه بقى ؟؟؟

قالها أن بيركب خرزه في لسانه بلون الغويشه ....

لا حول ولا قوه الا بالله...

فين شباب المسلمين زمان لما كانوا بيقودوا جيوش!

دلوقتى بقوا بيترقصوا على المسارح ويعملوا شعورهم على الموضه...

أنا معاكى يا فيروز، هى محاولات للخلختنا بإظهار ذلك النموذج الشاذ (أخ بايت، تعبيرك فى الجون..بقي خلاص مصطلح قومى كلنا بنستعمله)mfb: ولكن بينى وبينك يا فيروز...وان كان شباب اليوم مش كله مايع اوى كده...ولكن برضه مفتقر للرجوله بشكل ملحوظ...ولا ايه رأيك؟

تم تعديل 24 فبراير 2004 بواسطة MuslimaEgyptian

[فــيــروز]

الاخت العزيزه مسلمه سالتنى :)

وان كان شباب اليوم مش كله مايع اوى كده...ولكن برضه مفتقر للرجوله بشكل ملحوظ...ولا ايه رأيك؟

طيب يعنى اقول ايه :D

انا عندى قضايا مع س.س. بسبب موضوعات الرجل و المراه التى لا تنتهى دى

ويمكن لو عبرت عن رايى بصراحه و جاوبت على سؤالك القضايا تكتر و تبقى مع المنتدى كله :P

شوفى يا ستى .. اعتقد و الله اعلم -عفوا للخروج عن الموضوع- ان الرجوله تحتاج لظروف اجتماعيه و بيئيه كى تنمو .. ويمكن كان اجدادنا الاوائل يتميزون بصلابه اكبر لظروف معيشتهم التى كانت تفرض عليهم الخشونه فرضا wlch:: ولكن حين تغيرت هذه الظروف الموضوع قل شويه .. بالاضافه طبعا الى ان الرجوله عباره عن مجموعه من الصفات الحميده التى قد يرى البعض الاتصاف بها الآن نوع من العبط .. يعنى ان الواحد يبقى شهم مثلا اصبحت الآن ليست دليل على رجولته ولكن على عبطه للاسف الشديد فى راى البعض .. فتراجعت الصفات الحسنه تدريجيا لصالح الصفات الاسوا و اصبحنا نشعر ان الرجوله انقرضت :D

بالاضافه ايضا الى ان الاعلام فى احيان كثيره يبرز نماذج مخنثه على انها فتى احلام البنات مما يدفع الشباب لتقليد هذه النماذج و تبقى الوكسه وكستين :) وعلى راى اللمبى "الرجوله مواقف مش هز كتاف" mfb:

تم تعديل 24 فبراير 2004 بواسطة فــيــروز

[Salwa]

انا بقى ماشفتش البرنامج ده ...بس عندنا هنا برنامج مثله تماما .....وطبعا معنى انك تراقب ناس لمدة ثلاث شهور يبقى اكيد حاتعرف عنهم حتى اللى هم مايعرفهوش على نفسهم ..

وحكاية الكاميرا 24 ساعة ...دى فضيحة بكل المقاييس ..// وهنا ..// اكثرهم بيطلعوا يخسروا حياتهم .........طبعا ....

ازاى برنامج زى ده ...يشترك فيه ناس عرب ..او مصريين ؟؟..اذن هذه موافقة علنية على تقبل كل عادات وقيم الغرب .....بس اخدوا الوحش بس ........وسابوا الحاجات الحلوة ..

هنا فيه برامج ثقافية رائعة ...وبرامج تستضيف المخترعين الشباب ...

وحتى حكاية الخرز اللى فى اللسان والغوايش ....قلة قليلة جدا جدا .....التى تجرى وراء هذه الموضة ...// الافريقية الأصل //...

سى السيد ....مش ممكن ؟؟.........مابين الصلصة والدمعة ...قلبى تعبنى من كتر الضحك ..

طيب اذا كان .........بابا صفوت ........كل يوم ..كل يوم ...كل يوم ...

بيعمل مانيكير وبادكير ........بتعايبوا ليه على الشباب ؟؟ على الأقل دول شباب ...

وده شاب .......

حتى البراعم ....بيحطوا لها ...تقاوى ...مسمومة !!!!

[أسد]

لكنى لا اظن ان هؤلاء الشباب فى تلك البرامج يمثلون بالفعل الشباب العربى او على اقل تقدير الشباب المصرى .. ولكن البرميل الفارغ يحدث ضجيجا اشد ..

كلامك صح ...

لأني باسأل كل اللي أعرفهم إذا كانوا يعرفوا أي شخص ممكن يقبل أنه يشترك في برنامج زي ده ...

الجميع أجاب بالنفي ...

أنا شخصياً على مدار عمري (40 سنة) لم أقابل شخصاً أعتقد أنه يقبل الإشتراك في مثل هذا برنامج ..

والمأساة فعلاً هي في القائمين على الإعلام في عالمنا العربي ....

وحكاية الكاميرا 24 ساعة ...دى فضيحة بكل المقاييس ..// وهنا ..// اكثرهم بيطلعوا يخسروا حياتهم .........طبعا ....

بالتأكيد .. هؤلاء الأشخاص يجب أن يخسروا حياتهم ...

بكل تأكيد هم أشخاص غير أسوياء في الأساس ..

يزيدهم هذا الوضع شذوذاً ومرضاً .. أكثر ...

[se_ Elsyed]

قبل ان يبدأوا في برنامج على الهوا سوا كانوا بيعلموا إستفتاء في الدول العربية وكان السؤال الموجه للناس هل تقبل إن بنتك تطلع في برنامج زي ده علشان تلاقي لها عريس ؟ ده بالنسبة للمتزوجين وبالنسبة للبنات كان نفس السؤال بس بصيغة آخرى ..

فيا للعجب حتى النساء اللي جابوهم قاعدين على قهاوي لبنان وفي بؤها زمارة وعماله تشد شيشة رفضت هذه الفكرة وأستنكرتها على بناتها ...

والحمد لله حتى الآن شبابنا بخير بالرغم من محاولات اللخلخة وبالرغم من هجمات التغريب ... ولكن إلى متى سيصمد أمام هذا الطوفان مع غياب القدوة الحسنة التى يمكن أن تكون نموذج يحتذى به ؟

بمناسبة الواد اللبناني جابوه وهو بيفضي شنطة هدومه في غرفة نومهم .. وأقسم بالله يا جماعه عنده كوليهات وغوايش وحلقان اكتر من أي واحده ست وعلى كل الأشكال والألوان .... حاجة مثيرة للغثيان ..

أنا حتى الأن لم أشاهد إلا دقائق معدودة وأصبت بالقرف ولم أستطع أن أٌكمل المشاهدة ..

بس البنت المصرية اللي شكلها زي المحروقة من كتر الماكياج كانت بتحكي عن مأساتها وإن جوزها مش عايز يطلقها ومتعنت معها بالرغم من انها مستعدة تتنازل له عن حقوقها .... إلخ ...

وفجأة وهي قاعدة مع البنات وبدون مقدمات وبكل عفوية راحت قايل لهم " إستنوني شوية أنا رايحه أخش الحمام " ... بجد بجد حاجة مثيرة للغثيان والقرف وكويس إن حتى الأن ما فيش كاميرات هناك ....

وزي ما قال الدكتور صعيدي الحل في الريموت وليكن شعارنا " لازم تغير المحطة "

[Seafood]

لكنى لا اظن ان هؤلاء الشباب فى تلك البرامج يمثلون بالفعل الشباب العربى او على اقل تقدير الشباب المصرى .. ولكن البرميل الفارغ يحدث ضجيجا اشد ..

الخطورة ليست في العدد أو النسبة .. ولكن في طرح الفكرة نفسها , وتقبلها من أشخاص ولو كانوا محدودي العدد , ثم السماح بعرضها على شاشات التلفزيون , والإقبال الجماهيري على مشاهدتها .. نظراً لأنها برامج بها عنصر الفضول الذي يدفع الناس للمشاهدة حتى وهم متأففين مما يرونه .. وهم يلعبون على هذا الوتر الضعيف في نفس كل واحد منا ..

وهذا كله يصب في نظرية اللخلخة ..

يعني المهم هو إلقاء الطعم .. أما مسألة كم من السمك سيأتي ليأكله ؟ .. فلا يهم في هذه المرحلة .. المهم هو .. التأثير الذي سيحدثه هذا الطعم .. وكم من المبادئ سيتم التهاون فيها بسبب هذا الطعم .. وكم من السلوكيات ستصبح مقبولة بعد أن كانت مرفوضة والسبب هو هذا الطعم .. وكم عدد الأسماك الأخرى التي ستأتي للفرجة على الطعم من بعيد .. ثم من قريب .. طب أجرب مرة .. عادي ما حصلش حاجة .. زي شكة الدبوس .. إنتو بس إللي كنتوا مكبرين المسائل .. ومتشددين حبتين .. وبتكفروا كل الناس ..

وربما يكون هذا الكلام مستبعد الآن .. ولن يصدق الكثيرون أن برنامج تافه سيكون له هذا التأثير في المستقبل .. ولكن لو نظرنا في الأمور التى كان يستهجنها أباؤنا وأمهاتنا منذ عشرين أو ثلاثين عاماً فقط .. فسنصعق لإكتشافنا لكم الأمور التي كانت في الماضي غير مقبولة وأصبحت الآن .. عادي خالص .. زي شكة الدبوس ..

تم تعديل 24 فبراير 2004 بواسطة Seafood

[yasser6666]

البرنامج ده بالرغم انه مشهور جدأ في الغرب الا ان نسبة قليلة جدأ جدأ من الناس الذين يتابعونه علي قدر معلوماتي ...واحيانا في اوقات الراحة من العمل هنا أجد بعض الشباب يقول شفت حصل ايه في بيج برزر امبارح ؟؟تلاقي الناس هاجت عليه وفيما معناه انهم لايتفرجون عليه ولايريدون حتي ان يعرفوا ايه اللي حصل وواضح جدأ انه برنامج للشباب الصغير جدأ الذي لايزيد عن 25 سنة مثلأ....

المهم ان البرنامج بيجمع ملايين من المكالمات التليفونية بالخارج بس لاأعتقد انه ممكن يعمل أي فلوس في الدول العربية ..لأن الناس بالخارج متعودة علي الأستفتاء في أي موضوع بالتليفون فقط فمثلأ كانوا عايزين يعملوا اكبر تجمع رياضي في منطقة معينة ويشمل ملاعب رياضية لمختلف الالعاب بالأضافة لحمامات سباحة ومشكلته انه سيكلف الدولة مبالغ خيالية وبالفعل فتحوا باب استفتاء بالتليفون والجميع شارك ...موافق اتصل برقم كذا...غير موافق برضه اتصل برقم كذا........................كمثال فقط....

انما عندنا الوضع مختلف تمامأ!!

ثانيأ البرنامج ده هنا مش كل المشاركين فيه عايزين يكسبوا انما فقط عايزين يبقوا معروفين للجمهور لانه بعد كده تجدهم برضه في التليفزيون ولكن بيتم اختيارهم لأعمال اخري مثل مقدم برنامج أو دور صغير في مسلسل ......

انما عندنا الوضع مختلف برضه!!!

لذلك انا شايف انه تقليد اعمي يفتقد ماتعودنا عليه وطبائعنا وديننا...

وقبل ان انتهي من المداخلة اقولكم حاجة تانية ..فيه برنامج برضه مشهور جدأ اسمه (I am Celeberty.get me out of here)...ده ممكن يكون مفيد لنا لو غاويين نقلد وخلاص وهو كما شرحت الأخت مسلمة (مثل برنامج Fear Factor)..ولكنه للمشاهير فقط وفي نهايته يتم التبرع بكل ما حصل عليه البرنامج لجهه معينة يحددها الفائز من هؤلاء المشاهير لانهم طبعأ ناس مليانة ومش محتاجين وتذهب الفلوس لجمعية خيرية أو مستشفي أو جامعة دراسية.....علي الأقل يبقي الناس عملت حاجة نفعتهم مش تهليس والسلام

[فــيــروز]

لكنى لا اظن ان هؤلاء الشباب فى تلك البرامج يمثلون بالفعل الشباب العربى او على اقل تقدير الشباب المصرى .. ولكن البرميل الفارغ يحدث ضجيجا اشد ..

الخطورة ليست في العدد أو النسبة .. ولكن في طرح الفكرة نفسها

البديل الوحيد لهذا هو منع البرنامج نهائيا !! وفكرة المنع او الحظر لم تعد متصوره فى عصر الفضائيات و القنوات الخاصه .. و الحل الوحيد المتبقى هو مقاطعة هذه البرامج اختياريا و الدعوه لهذا كلما امكن .. وبالطبع زيادة الوعى الدينى و الثقافى لدى الاسر التى تشاهد البرنامج .. ام ان هناك حلول اخرى لمثل هذه البرامج خافيه علينا هنا فى المناقشه !! :lol: :rolleyes: :lol:

[أسد]

لكنى لا اظن ان هؤلاء الشباب فى تلك البرامج يمثلون بالفعل الشباب العربى او على اقل تقدير الشباب المصرى .. ولكن البرميل الفارغ يحدث ضجيجا اشد ..

الخطورة ليست في العدد أو النسبة .. ولكن في طرح الفكرة نفسها

البديل الوحيد لهذا هو منع البرنامج نهائيا !! وفكرة المنع او الحظر لم تعد متصوره فى عصر الفضائيات و القنوات الخاصه .. و الحل الوحيد المتبقى هو مقاطعة هذه البرامج اختياريا و الدعوه لهذا كلما امكن .. وبالطبع زيادة الوعى الدينى و الثقافى لدى الاسر التى تشاهد البرنامج .. ام ان هناك حلول اخرى لمثل هذه البرامج خافيه علينا هنا فى المناقشه !! :lol: :rolleyes: :lol:

الظاهر والواضح أن مثل تلك البرامج تربح ..

وهذا بسبب عدد الإتصالات التليفونية الكبير للمشاركة في الإختيار أو التصويت أو ما إلى ذلك ....

وهذا ما يجعل القائمين على تلك المحطات والبرامج أن يتمادوا في مثل تلك البرامج ..

والأكيد أنهم لو لم يجدوا إستجابة من الشباب لما فعلوا ..

ولكني اعتقد أن مثل تلك الهوجة ... ستأخذ وقتها ثم تنتهي ...

ودور المثقفين والعقلاء .. لا يتوقف عند تغيير المحطة فقط ..

بل يجب علينا أن ندعو لمعارضة ومقاطعة مثل تلك البرامج ..

بكل الوسائل .. وبكل مانستطيع ...