ليه هما كده ... وإحنا كده ؟ أنا هاتجنن كده

[se_ Elsyed]

كنت سهران أمبارح أنا والرفيق زهيري ذو الأفكار اللوذعية .. واللي في كل قعده بينفخني عن أخبار كندا وحلاوة كندا وجمال كندا والبرتقان اللي هناك قددددددددددددد كدهو .. والمشمش الحموي الكنداوي اللي الواحده قددددد كده .. وكان قدامنا أمبارح بطيخه فقبل ما يمد إيده .روحت قايل له شيل إيدك من عالعنب .. ولأني عارف مفتاحه دلوقت فأول حاجه بأقولها له : لما أنت بتحبها قوي كده .. سيبتها ليه وجيت سكنت في المنفوحه ؟ ههههههههههههههههه ... فبيوطي راسه في ندم وبيسكت ...

ما علينا بالرغم من إن كلامه جارح ومحسسني إني عايش في عشش الترجمان إلا أنني قلبت دفة الحوار وقلت له : تفتكر هما كده ليه .. واحنا كده ليه ؟

وقبل ما ينطلق ببنت شفه ... هههههه .. روحت قافلها له زي الدومينو

وقلت له : إوعى تقول لي حُرية وديمقراطية .. لان ببساطه عندك التنين الصيني أهو .. اللي بيفتح بؤه هناك بيتسحل ... وحتى الأنترنت عندهم يمكن ما بيفتحش غير المواقع الصيني بتاعت الحزب الشيوعي ... وعندك العملاق الروسي اللي كان عز مجده أيام حُكم البلاشفه الجبابرة اللي كان أي حد بيحاول يقول بِم .. كان بيتنفي لسيبيريا لحد ما يبقى لوح تلج ..

هاتقول لي موارد طبيعية : هاقول لك ... انظر الكتاب صفحة دول شرق أسيا اللي ما عندهمش اللضا زي اليابان وكوريا والصين نفسها ... وكذلك أمريكا وأوربا كلها إلا قليل من الموارد لا تكفي وحدها لصنع نهضة

هاتقول لي أخلاق وطباع .... دي عندنا بالكيلو ومافيش أحسن من كده ويكفي إننا كعرب مثلاً مسلمين ومسيحين ما حيلتناش إلا شرفنا وأخلاقنا وديننا ومبادءنا .... يمكن عندنا أنفصام في الشخصية لكن هانعديها مقارنة باللي موجود في الغرب من أنحلال خارج أوقات العمل الرسمية ...

طب هاتقولي حب الوطن فرض عليه وأفديه بروحي وعنيه ؟ يا سلام ... يعني الظباط الأحرار الحلوين ما كانوش بيحبوا بلدهم ؟ طب لما هما بيحبوها .. بهدلوها ليه وبهدلونا معاها ليه ؟

طب يعني ما فيش حد عربي بيحب بلده وبالتالي بلده تبقى مميزة شويه عن الباقي وتبقى دولة مُنتجه مش مستهلكه وعايشه على الأعانات زي الجميع من المحيط للخليج ؟

ولا اقصد هنا إعانات مادية فقط ... لأن عندنا دول الخليج غنيه مادياً لكنها فقيرة إنتاجياً ولو أتقفلت حنفية المنتجات الغربية أو الخارجية بشكل عام يبقى هايشربوا البترول اللي عندهم

طب حد يدلني قبل ما أتجنن ... يكونش العيب في الجو ؟

أيوه يعني عندنا فيروسات في الهوا ولا الميه ومخليانا في ديل الأمم ؟

ولا العيب فينا كبني أدمين مخلوقين عشان يكونوا تابعين ؟

حد يقول حاجه أو يسمعنا الصلاة عالنبي حتى

[الباشمهندس ياسر]

اللهم صلي و سلم و بارك عليه

الفكرة كلها ف الارادة

ناس عاوزة تبقي كده و ناس تانية مش عاوزة

[MZohairy]

اقولك اللي ما قلتهولكش امبارح

اول سر في الحكم

لو الحكم ديموقراطي عادل متاح لمن يستحق و متداول هنبقى زيهم

ليه بقى؟

عشان اللي قاعد على الكرسي مش هامه غير مصلحة الشعب

و مش خايف على كرسيه عشان سايبه كده ولا كده

و مفيش حد حاطط صوباعه تحت ضرسه

يبقى جاي و عايز يصلح و يحسن و يمشي

ده من ناحيه

الناحيه التانيه هي الشعب

الشعب حاسس انه له حقوق و عليه واجبات

لازم يعمل اللي عليه و ياخد اللي ليه

و من ضمن حقوقه ان لو الكبير غلط يبقى لازم يتصحح او حتى يتغير

تالت حاجه هي احترام البوليس للمواطن و للقانون و صرامته في التطبيق في نفس الوقت

رابع حاجه حرية و نزاهة و عدالة القضاء

اعتقد دول اهم الفروق المؤثره

ده غير طبعا النخبه من المثقفين أمثالي اللي راحوا هناك و اثروا الحياه الثقافيه

اورفوار

[miramikhail]

الفكرة كلها ف الارادة

أيوة بنسبة 90% لو الأدارة كويسة و فية عدل و كمان معرفة مين يتحط فين مش كوسة و بامية و حاجات من دية يعنى فلان كويس فى الكمبيوتر يتحط فى المكان ده فلان بيرسم كويس و عنده حس فنى يمسك الجزئية دية وده حتى لو الأتنين مهندسين لأن كل واحد حيبدع مدام محطوط فى الحته الصح و العشرة % الباقية الأمانة ودية بتقع على العامل نفسة يعنى معروفة أوى كلمة على قد فلوسهم فى الحكومة و اللى بيشتغل بذمة يتقال له هو الظاهر أن مش عارف أن طولها زى عرضها يعنى الناس بتشتغل مش بذمة و مش قلبها على شغلها يعنى أه أى حاجة و عشان تقبض أخر الشهر وخلاص طبعا مش كل الناس لكن الناس اللى بتشتغل بذمة تلاقى الناس التانية مش تسبها فى حالها لأ تقعد تزهقه لحد ما تطفش يعنى لا يرحموا ولا يسيبوا رحمة ربنا تنزل وديم المشكلة التانية و يمكن تأثيرها أوضح من سؤ الأدارة لأن لو الناس قلبها على الشغل و بتشتغل بذمة كان زمنا وصلنا أتأخرنا شوية لكن حنوصل لكن لو الناس ما بتشتغلش بذمة مهما كانت الأدارة ولا حاجة

[pink rose]

من كندا للمنفوحة

يا ليلة مالهاش ملامح يا ولاد wst::

اقولك يا مسيو زوهيري تعالى عندنا اسكندرية و احنا هانكرموك و نعملوا معاك الانسانية :aslam:

الجد بقى

الناس دي عندها نظام في كل حاجه

مديين كل حاجه اهميتها و وقتها اللي تستحقه

اللي جي يحكم عارف انه كده كده ماشي و سايبها مش قاعد و هايبلط فيها هو و عياله و الاصحاب و الاحباب و القرايب

عارف انه لو غلط هايتحاسب

لكن عندنا ابدا مين يقدر يحاسب الحاكم بامر الله

عندنا اي مسؤول اول ما يقعد على الكرسي كل همه هايلم اد ايه و يملى كرشه

يعني من الاخر كل واحد هامه مصلحته بس لكن الشعب و البلد يولعوا بجاز مش نضيف كمان

تم تعديل 13 فبراير 2010 بواسطة remo

[MZohairy]

من كندا للمنفوحة

يا ليلة مالهاش ملامح يا ولاد

ايه ياعم منفوحة ايه بس؟؟؟؟

خلاص صدقتوا سي السيد؟ wst::

قال منفوحه قال هاااأأأوووو :aslam:

[سكر]

1- هات واحد يخاف ربنا فى شعبه وعنده رويه وفكر

2- اصرف نصف الميزانيه على التعليم الى بجد

3- انتظر من خمس الى عشر سنوات

4- هتشوف عجب العجاب

او

1-هات واحد يحب الاستقرار والاستمرار والاستعباط والاستهتار

2- اصرف ببذخ على الامن والامان والمامون

3-انتظر 30 عام او اكثر حسب قضاء الله

4- هتشوف عجب العجاب

هذا العرض سارى فقط فى الاسواق المصريه

[لماضة مصرية جدا]

السلام عليكم و رحمة الله و بركاته

انا قريت العنوان قولت ده الجزء التاني بتاع الاغنية الوطنية "مافيش حاجة تيجي كده......." لملهمة الاجيال الست نانسي عجرم

و بعد تفحيص و تمحيص....

التغيير يحتاج منظومة كاملة.... ناس....موارد.....قناعات و ايمان.....منظومة مؤسسية

لو واحدة فلتت منهم

يبقي كل ما هنلم الزعطلون الزوكتة هتضرب.....(وش مسعودي في المتزوجون)

و بعدين ايه الاحباط ده

يعني احنا لا شوفنا كندا و لا شمينا ريحتها...... عايزين تغيظونا بيها ليه بقي

خلونا قاعدين ساكتين....... ادينا عايشين و راضين

قال كندا قال....؟؟؟؟

فوتكم بعافية

لا هآخد عافية معايا..... عشان عندي تحمير سمك

بس خلاص

[se_ Elsyed]

لو الحكم ديموقراطي عادل متاح لمن يستحق و متداول هنبقى زيهم

تالت حاجه هي احترام البوليس للمواطن و للقانون و صرامته في التطبيق في نفس الوقت

اللي جي يحكم عارف انه كده كده ماشي و سايبها مش قاعد و هايبلط فيها هو و عياله و الاصحاب و الاحباب و القرايب

1- هات واحد يخاف ربنا فى شعبه وعنده رويه وفكر

غلط

وهما الحكام الصينيين الشيوعيين كانوا بيخرجوا من الحكم ولا بالسمن البلدي قصدي الطبل البلدي ؟

وولا هما ولا الروس كانوا يعرفوا ربنا من اساسه ؟

----------------------------

لكن أقدر أقول رأيي المتواضع في كلمتين

إرادة

و

إدارة

شوفوا حرف واحد نحركه كده وكده نبقى زيهم كده

إرادة لدى الحكام - بغض النظر كانوا ديكتاوريين ولا عفاريت زُرق - في إنهم يشوفوا بلدهم متقدمة لأ يغرض بقى مش مهم ... وتوصيل هذه الروح للشعب

إدارة .... تعاقب المُخطيء وتسحله زي ما كان بيحصل في الصين ومازال ... أينعم اللي عالكراسي فوق خلاص ما بيتحاكموش .. لكن على الأقل التنفيذيين بيتحاكموا ...

أما عندنا لا دول ولا دول بيتحكاموا

كمان الناس دي عندها

vision

و

mission

أما عندنا!!!!

فخليها على الله

وإيه يا عم أسامي المضادات الحيوية اللي جاي تكلمنا عنها دي ؟

يابا أحنا عايشين اليوم بيومه وأحيينا النهاردة وموتني بكره ... وموت يا دونكي لحد ما تجيلك الأنابيب

وأتحدى لو قلت الكلام ده للرئيس بتاعنا حتى .. أتحد تلاقي عنده إجابه .. ما بالك بالوزراء ....

عارفين الدليل إيه ؟

ما يقوم به الوزير الشاويش أحمد ذكي بدر

نازل تحقيق وفتح في ملفات الصفقات اللي تمت في وزارة التعليم والهبر اللي كان بيحصل وعمال ينقل في الناس الحرامية ويسحلهم

بقى هو ده المنطق ؟

قصدي ده تطوير تعليم

ماشي يسحلهم وينفخهم على 45 أوكي ومطلوب ..

لكن كده التعليم هايتطور ونبقى حلوين ؟

حتى لو أعتبرناها خطوة أولى نحو الأصلاح .. إيش دراني إنه ما يعقدش سنتين وييجي بعده واحد يرجع كل حاجه زي ما كانت ؟

عارفين ليه ؟

لأن ما فيش vision وسيستم لا يتغير بتغير المسئولين ...

وبالتالي كل واحد بييجي بيفتي ويسخر ممن قبله ويستحضر الروح الفرعونية الأصيلة .. ويمسك الفاس ليمحو أثار من كان قبله ويفتكر نفسه بارم ديله اللي هايعدل المايله

تماماً تماماً مثلما فعل مبارك نفسه اللي في كل مناسبة بيذلنا ويقول إنه مستلم البلد عالمحارة ...

وشوفوا أهو هايقعد 30 سنة أو أكتر .. ومتأكد إلى حد اليقين إن اللي بعده هاييجي يقول كده

او لو كان آبيه جمال إبنه .. ممكن يتكسف ويقول " لأ ما أستلمتهاش عالمحارة .. لكن بابا ربنا يسامحه كان سايبها لي نص تشطيب .. يعني حلوق خشب وموايسر صرف واصله للشقة " وبالتالي بيبقى يا يعني مطلوب منه يشطب من أول السطر .

لا أعفي دور الشعب ..

فالشعب اللي ما عندوش القدرة على التضحية من أجل بلده وراضي إنه يتمرمط في طوابير العيش .. وإذا خرج منها سالماً غانماً بيبقى في أحتمال يحصل على أحدى الحُسنيين في طابور الأنابيب وإما النصر أو الشهادة ....

يبقى يستاهل اللي يجرا له

والنخبة المثقفة اللي شايفه ده كله وخايفة من الأعتقال والسحل وحاطهة لسانها في بؤها وماشيه جنب الحيط

برضوا تستاهل اللي يجرا للبلد ويجرا لهم هما كمان

أول أمس كان في فيلم تسجيلي عن نيلسون مانديلا وكانوا جايبين مشاه للزنزانة المتر في امتر اللي قعد فيها 20 سنة

فهكذا تتقدم الأمم

إذا لم يهبط علينا حاكم عادل عنده ضمير ... وإذا ظل الشعب يضع يده على خده كما نفعل جميعاً الأن ولا استثنى أحد وأنا أولكم ..

يبقى " حوش اللي وقع منك يا معلم ... وأشرب "

بالمناسبة

فاضل 8 شهور على أنتخابات مجلس الشعب

واقل من عامين على أنتخابات الرئاسة

ومن دلوقت بأبشركم

أكتسسسسسسسسسسسسسسساح للحزب الوطني بتاع العيش والأنابيب

وأكتساح لمبارك وآله ...

وكل سنة وإحنا طيبين

[msayed]

الأسباب كلها حقيقية ومؤثرة

وهناك سبب آخر قوى جداً وهو العامل الخارجى

أقصد الدول اللى بتدعم إن مصر يكون فيها فساد لأنها مصلحتها فى هذا الفساد.

وأى إتجاه للإصلاح لن تقف هذه الدول مباشرة فى وجهه ولكن ستستعمله ككارت للضغوط على النظام الحالى للحصول على مزيد من التنازلات منه. وبعد ذلك سيترك العنان للإنتقام الداخلى من هذا الإتجاه الإصلاحى.

[MaYousof]

أستاذي س السيد نبّه إن الصين كمثال هي بلد لا يوجد به أي ديمقراطية وأن الاستبداد فيه أكتر عشر مرات من الاستبداد في أي بلد من البلدان الأعضاء في جامعة الدول العربية ..

ياريت الردود عليه لا تطرح إن الدكتاتورية والاستبداد هم السبب.

تحياتي للجميع :aslam:

[من بعيد]

مره فى اوائل التسعينات جمعنى لقاء مع المشستشار الاعلامى لسفاره مصر فى احدى العواصوم الاوروبيه وطرحت عليه هذا السؤال واقسم بالله العلى العظين ان هذا الكلام حصل

انتوا عارفين الرد كان ايه؟

كان كالاتى اصل الاوربيين لما بيجوا بالدانا كسياح بيحبوا يشوفوا البلد على طبيعتها

رد مقنع مش كده؟

نسيت اصلى على الحبيب

اللهم صلى وسلم على سيدنا محمد وعلى اله والتابعين باحسانالى يوم الدين

[حسام يوسف]

زي ما قلت يا عم س س

الادارة

والارادة

وحتى فى غياب الديموقراطية

وقيم الحكم الرشيد

فان كانت ارادة الحاكم -وان كان مستبدا -مع ارادة شعبه كما فى ثورة يوليو اللى أنت مش معاها يا عم س س

فلابد من أن يحدث نهضة

وكما قال الشاعر العظيم ابو قاسم الشابي

اذا الشعب يوما أراد الحياة

فلابد للشعب أن ينتصر

واللى مع الارادة طبعا وهو ما نفتقده تماما

الادارة wst::

السر في النظام يا -------

عفوا يعنى زي ما قال الريس برايز فى فيلم ثقافي جملته الخالدة :aslam:

تم تعديل 13 فبراير 2010 بواسطة حسام يوسف

[أسد]

طبعاً الإدارة ..

والديمقراطية في حد ذاتها هي إختيار إدارة الدولة ..

وقد تكون جزء من رؤية قيادة الدولة أو لا تكون ..

ولنضرب مثال آخر من المنطقة ..

دبي .. التي نشأت من العدم ..

ليس فيها أي ديمقراطية أو حريات سياسية .. أو أي شكل من أشكال المؤسسات الديمقراطية ..

السعودية .. برغم ما فيها من مشكلات .. إلا أن لديهم رؤية خاصة في السنوات الأخيرة .. تسمح لهم بالتقدم عما كانوا عليه ..

إذا كان الحديث عن كندا بشكل خاص .. فهي دولة ذات طبيعة خاصة .. فقد إجتمع فيها النخب من العالم .. أو هكذا يتم إختيارهم .. فالمهاجرون إلى كندا يجب أن يمتلكوا مواصفات محددة تؤهلهم للرقي بالبلد وتؤهلهم للتعايش الجيد في تلك البلاد ..

ولكن يمكننا أن نرى دول أوروبا .. والتي بدأت من الصفر بعد الحروب المتتالية فيما بينهم في القرن الماضي ..

كوريا .. واليابان ..وماليزيا وسنغافورا .. كل تلك الدول ارتقت بفضل الإدارة والقيادة ذات الرؤية ..

التعليم .. والذي هو جزء من تلك الرؤية التي نتحدث عنها .. الشعوب المتعلمة أفضل بكثير وأكثر جودة من الشعوب الجاهلة ..

إعمال القوانين .. والذي هو أيضاً جزء من رؤية الإدارة .. وأهميته في تحضر ونمو الشعوب ..

أمر آخر .. وهو الأكثر أهمية من وجهة نظري .. في الإدارة الجيدة .. من أهم الأمور التي يجب عملها .. هو تحديد الأولويات ..

فما هي أولويات تلك الأمم والشعوب ..

وما هي أولوياتنا نحن

كإدارة ....

أو كشعوب ..

إذا أجبنا بصدق عن ذلك .. سنعرف .. ليه إحنا كده

[سكر]

إقتباس

1- هات واحد يخاف ربنا فى شعبه وعنده رويه وفكر

غلط

وولا هما ولا الروس كانوا يعرفوا ربنا من اساسه ؟

ليس المقصود هنا العبادة للخالق فقط ولكن الخوف على الشعب ومن الشعب

الخوف على الشعب فى اطار اصلاح له

الخوف منه فى الخوف من غضبه وعقابه

فكرة الدكتاتور العادل فكر موقت يوتى بثمارة فقط على المدى القصير

لان هذا الدكتاتور له عمر افتراضى مهما طال وعمر الشعوب اكبر بكثير

وانت لا تامن مع الديكتاتوريه من هو التالى

ولذا مازلت مصر على ان التعليم قبل كل شى لانك لما تتعلم هتعرف حقك وعمرك ما هتعلم ابنك اقل منك حتى لو هتشحت

فيا سلام بقى لو واحد حاكم كدة عادل وبيحب العلم ياسلام

دى تبقى فرجت وياريت تزود الدقه شويه

بالمناسبه صلاح الدين الايوبى لو وصل مصر حاليا احتمال يدور على هجرة او عقد فى الخليج

لان البيئه غير مناسبه

عشان كدة لازم نصلح البيئه الاول وبعدين نقول احنا عايزين ايه

العدل +العلم=حياة افضل

[zika]

لأ طبعا الاستبداد و غياب الديمقراطية هو سبب تخلفنا

و الصين دليل على كدة مش العكس

المشكلة في البداية ان عندنا تصور مغلوط عن الديمقراطية

فلو مثلا تنظيم التكفير و الهجرة كان دخل الانتخابات و فاز بنسبة 99 في المية و مكنوه من الحكم فعلا

في ناس ساعتها هتفتكر ان الديمقراطية نجحت

في حين انها هتكون راحت في ستين داهية

الحكاية ان الديمقراطية اللى بيتكلمو عنها في الزمن ده هي اتاحة الحرية و المساواة للجميع

و ده بيشمل حاجات كتيرة زى حرية التعبير و التعددية السياسية و الحرية الاقتصادية و غيرهم

الحاجة الاخيرة دي اللى هي الحرية الاقتصادية (بمعنى التقليل بقدر الامكان من تدخل الدولة في الاقتصاد)

هي اللى كانت السبب في النمو الرهيب اللى بتحققو الصين و اماكن تانية دلوقت

يعنى المزيد من الحرية هو ما حقق المزيد من التقدم

لكن لغياب حريات أخري تظل الصين مثلا دولة فقيرة فمستوى دخل الفرد قريب جدا من ما هو عليه في مصر

ده غير ان معدلات الفساد فيها لا تختلف كثيرا عن اى دول عربية بل حتى أسوأ من بعضهم ( راجع تقرير منظمة الشفافية)

كما ان الصورة البراقة التى تبدو بها المدن الكبرى كشنغهاى و بكين تضللنا عن الاوضاع البائسة التى يعيشها ابناء الريف (و هم نصف السكان تقريبا)

لكن حيث المزيد من الحريات نجد الصورة تختلف تماما حتى في تلك الدول التى بها القليل جدا او حتى لا يوجد اصلا موارد , اليابان و كوريا الجنوبية مثالا

كل ده على فرض ان التقدم الاقتصادى او التكنولوجى هو فقط معيار التقدم

في حين ان المعيار الاساسي هو تحقيق العدالة للجميع

الفرد و شعوره بالرضا هو الاساس

لو اصبحت مصر اكبر دولة في اى مجال , اقتصادى , علمى , عسكري .. الخ و كان في عدد و لو قليل من المظلومين

لا يمكن ساعتها ان نسميها دولة متقدمة

لو كنا اغنيا بس مش احرار مش هنكون متقدمين

المفارقة الجميلة جدا ان الحرية هى ما تأتى ايضا بالثروة

مما لا يجعلنا في حيرة ايهما نختار

في نقطة أخيرة عايز اوضحها و هى انو بجانب الحرية و المساواة كركن اساسي للديمقراطية و امور لا تقبل النقاش حتى لو اغلب الناس مش موافقة (و هى دي الديمقراطية على عكس ما البعض فاكر)

ينبغى ايضا وجود الأدوات التى تمكنا من تحقيق المساواة و الحرية و هى العدالة الاجتماعية

زى التعليم و الرعاية الصحية المجانية و الضمانات الاجتماعية عموما

و الا ساعتها حيكون الفقير قانونا بيتمتع بالحرية و المساواة

انما فعليا هو مستعبد بسبب لقمة العيش

[الغريب]

ليه هما كدة ... وأحنا كدة ؟

1- لأن الإنفاق على أهم مركز بحثي للزراعة في مصر وهو مركز البحوث الزراعية 25 مليون في 2009 والمنتخب الوطني حصل كل لاعب فيه على جائزة مليون جنيه مكافأة مبارة الجزائر بالقاهرة ويريتهم صعدوا كأس العالم.

2- لأن مفيش حاجة إسمها عدالة إجتماعية.

[MaYousof]

- من هي أكبر ديموقراطيات العالم من حيث عدد السكان؟ وكم يبلغ متوسط دخل الفرد فيها؟

سؤالي للأخ الفاضل الأستاذ zika.

------------

وسؤال آخر:

أمريكا هي أكبر دولة في المجال الاقتصادى, العلمي, والعسكري. وبها عدد و لو قليل من المظلومين.

- هل بذلك أمريكا لا يمكن أن نسميها دولة متقدمة؟

------------

وسؤال تالت معلش يا أستاذ zika:

- من هم التلات دول الوحيدة في العالم اللي من تقدمهم الخرافي طلّعوا بشر للفضاء؟

تم تعديل 13 فبراير 2010 بواسطة MaYousof

[MaYousof]

أنا بقول إن أفضل نظام سياسي اجتماعي هو بلا شك النظام الشيوعي .. لأنه النظام الوحيد اللي هدفه الأساسي هو عدم وجود فقراء في أي مكان في الدولة :lol:

تم تعديل 13 فبراير 2010 بواسطة MaYousof

[أحمد سيف]

والله يا أبو الأسيان باين عليه ال MBA عامل شغل جامد والدليل كلامك عن ال mission وال vision

نيجي للجد بأه

التقدم أو التخلف ليس مسارا ذو اتجاه واحد ولكنه أشبه بحلقة متصلة من العوامل المترابطة مثل:

التعليم ... الاقتصاد ... الحكم الرشيد ... الحرية ... الثروة

يعني بالتعليم الجيد يصبح لديك شعب منتج ... يصنع لك اقتصادا قويا ... عندها يصبح لدى الناس قدرة على تغيير واقعهم وإنتاج حكم رشيد يرعى مصالحهم ويحافظ على حقوقهم وحرياتهم ... ويسود الرخاء ... ويستغل جزء من الثروة المنتجة لتحسين التعليم والصحة والاقتصاد ... الخ لتستمر الدورة التصاعدية

بالمقابل إذا كان لديك تعليم سئ ستحصل على شعب جاهل وضعيف الإنتاجية ... وبالتالي اقتصاد هزيل ومنهك وشعب فقير ... وطبعا لن تحصل على حكومة جيدة بل على نظام فاسد وفاشل ... يوجه موارد البلد القليلة لدعم مصالحة واستمرارية بقاءه في الحكم ... وبالتالي يتدهور التعليم أكثر وتستمر دورة الهبوط

هذا يفسر الى حد كبير اختلاف مسارات التقدم لدى الدول ... كل دولة بدأت من نقطة معينة وركزت عليها وفقا لظروفها وثقافتها ... دولة مثل اليابان بدأت بالتعليم ... الصين بدأت بالاقتصاد ... الغرب بدأ بالحرية والإصلاح السياسي ... السعودية بدأت بالثروة واستغلال الموارد ... لكن المحصلة ستكون في النهاية متقاربة ... شعوب متعلمة حرّة منتجة سعيدة

السؤال هو : من أين نبدأ؟