أسامي البنات

[حسام يوسف]

السلام عليكم ورحمة الله

ممكن البعض يشوف الموضوع مش مستاهل

أو حتى يشوفه غير ذي قيمة

لكنه يهمنى بشكل شخصي

وعشان كدة حطيته فى موضوعات شخصية

وحيث ان المحاورات بيتي

والمكان ده فيه أعز الشخصيات على قلبي سواء افتراضي أو من غير أبو افتراضي :ninja:

فأنا يهمني رأى من يهتم للموضوع ويهمه أمرى

هقول الموضوع أهو

منتظر بين لحظة والتانية قدوم مولودة

ونفسي أسميها خديجة

تيمنا باسم السيدة خديجة بنت خويلد زوجة رسول الله صلي الله عليه وسلم

وتيمنا بسيدة كانت عونا وسندا لزوجها فى حياته ورسالته

نفسي بنتى تطلع كدة سند لبيتها وزوجها وأولادها

بعيدا عن النماذج المشوهة وجمعية المرأة المتوحشة

والمجلس القومي لحقوق المرأة خصما من حقوق الرجل

والست نهاد أبو القمصان اللى شغلتها تطير ورا أى راجل متجوز فى مصر وتبهدله فى المحاكم

طيب فين المشكلة؟

لاحظت بعض الضيق والخوف على البنت فى العيلة عندي من أمى وأختى ولدرجة ما زوجتى من ان الاسم يبقي تقيل زي ما بيقولوا فى ظل وجود أسامي داليا وباكينام وماهيتاب وجلنار وجودي وريناد ومانويللا

على رأى الليمبي

ايه الأسامي اللى عايزة كتالوجات دي؟

ايه رأيكم دام فضلكم؟

أسميها خديجة وأثبت على المبدأ؟

وخصوصا ان اسم خديجة قريب هيبقي أهم اسم في مصر مع احترامي للوالد الفاضل العزيز محمد :lol:

ولا حرام هظلم البنت وأسميها أحسن زي اللى هيبقوا بنات جيلها؟

الكل مدعو

حتى وان كان القضية فيها اسم اسلامي

لكن حتى أخوانى واصدقائي المسيحيين أحب اسمع رأيهم

وياريت بلاش تشدد أو خناقات الله يكرمكم

كفاية الموضوعات اللى فوق اللى خلت مظهيري خلص باكتة دوا الضغط بتاعته :lol:

وعقبال عندكم

[Diab]

اتوكل علي الله يا دكتور

هو في احلي من إسم خديجة

قال صلى الله عليه وسلم عن السيدة خديجة

"أبصرتها على نهر من أنهار الجنة، في بيت من قصب، لا لغو فيه ولا نصب"( أخرجه الطبراني).

ثم انت هتروح بعيد ليه

ماهو مرات جمال مبارك اسمها خديجة واهي استايل طبعا

[قلب ابيض]

ربنا يبارك لك ويتم حملها ووضعها على خير ان شاء الله

سبحان الله --اقسم لك انى قبل ما افتح المحاورات حالا كانت بنتى بتقولى اسم خديجه من اجمل الاسماء القديمه

وهو بالنسبه لى اسم عزيز جدا

وبعدين على رأى دياب 00اسم ستايل دلوقتى طالما تبع جيمى :ninja:

ممكن يبقى ديدى --او جى جى

بس انا عن نفسى افضله خديجه بتعطيش الجيم

وربنا يجعلها فى اخلاق السيده خديجه ويرزقها بمن فى اخلاق سيدنا محمد يارب وفى حياتك انت وامها

مبروك ان شاء الله

[عاشق الترحال]

ألف مبروك يا عم حسااااام يوسف وربنا يجيبهالك بالسلامه وتتربى في عزك إن شاء الله وربنا يبارك لك فيها

مش محتاجه كلام يا ريس إسم خديجه الطاهره أم المؤمنين مفيش أجمل منه .

كفايه أنها زوجة النبي محمد (سيد ولد آدم أجمعين ) صلى الله عليه وسلم و رضى الله عنها وأرضاها وعن أمهات المؤمنين وآل البيت والصحابه أجمعين .

إتوكل على الله وإن شاء الله ربنا يبارك لك فيها

[fatfouta]

كان دايما ابويا يقول ان احب الاسماء عن سيدنا محمد عليه الصلاة والسلام هو فاطمة وبعده اسم خديجة وعشان كده سمانى فاطمة وجه يسمى اختى اللى بعدى خديجة امى رفضت وقلتله لا الاسم قديم اوى لكن دلوقتى اختى بتقول مش كانوا سمونى خديجة وهو حد يطول مش احسن من اسمى ده اللى منتشر بشدة

وانا كمان شايفة ذى دياب ان الاسم ستايل جداااااااا وجميل جداااا جداا اتكل على الله

اجنا كانت صاحبة الشركة اللى كنت بشتغل فيها من المانيا واتجوزت مصرى واسلمت وكانت سبحان الله آيه كده فى الايمان والحفاظ على الصلاة ولما جابت بنوتة سميتها خديجة ولنا سألناها ليه قالت الاسم غالى علينا لانه على اسم ستنا السيدة خديجة وستايل جداا وكمان هيكون سهل نطقه فى المانيا علشان حرف الخاء

يعنى يا دكتور والله الاسم جميل جداا

انا لسه مسمية جودى بس ده علشان بنتى الاكبر منها اسمها جنى وقولت عشان يبقى الاسمين لايقين عل بعض لكن والله لو عليا لا كنت سميت خديجة وفاطمة وزينب ومريم والاسامى الجميلة دى وماتقولش بقى قديم

ربنا يقوم المدام بالسلامة يارب وتفرحوا بنوتتكم

[لماضة مصرية جدا]

السلام عليكم و رحمة الله و بركاته

يا رب توصل بالسلامة إن شاء الله.... خديجة حسام يوسف

و يا رب تكون قرة عين لحضرتك و لمامتها في الدنيا و في الاخرة

كفاية ان البنت لما تكبر و يسألوها يعني ايه خديجة... تحكيلهم آد ايه السيدة خديجة كانت امراة بحق.... و بكل المقاييس

ع فكرة دلع خديجة هو "دوجا".... أو "ديجو"......أو......"ديجي"

انا مش قلقانة ع الدلع خالص عندنا في مصر بنتولد باسم و بنتنادي باسم تاني خااااااااااااااااااااالص

ممكن بقي حضرتك تطمنا عليها لما توصل بالسلامة

مساااااااااااااااك لحظة انتظار.... كلها يقين بالخير

[engmido]

الاسم ممتاز طبعا

وممكن يكون مش منتشر نوعا ما او تقيل على بعض الالسن ولكنه فى انتشار مرة اخرى مثل اسم حمزة كان صعب جدا دلوقتى اسم شيييك قوى وبيسموه علىطول

وليس خفيفا على اللسان مثل مى وملك وجنى و شهد والكلام ده

ولكن اذا حضرتك مقتنع .............توكل على الله الاسم ممتاز جدا..........وربنا يتمم بخير

[SophiaAstrophy]

السلام عليكم ورحمه الله وبركاته يارب يباركلك فيها ان شاء الله ويقوم مامتها بالسلامه يارب ............. بس بجد اتكل على الله وسمى خديجه اسم جميل جدا جدا حضرتك عارف انا برضه لسا معايا بيبى صغير مولود لو كان ربنا اراد وجه بنت كنت سميتها رقيه لانى بموت فى الاسم ده جدا جدا ولا تقولى قديم ولا غير قديم بس ربنا مااردش وجيه (على) الحمدلله بجد الاسم فى معناه وكفايه انه تيمنا باسم السيده خديجه وربنا يطمنك عليها يارب وتقوم بالسلامه

[التونسى]

لسه سامع حالا اسم جديد .. يعنى من باب التميز :ninja:

غزلان smk: .. وهو اسم مفروض مش جديده لانه اسم واحده عندها 28 سنه

[doha]

لو هتنادوا لها اسمها بحرف الجيم بطريقتنا يامصريين لما بنخففها يبقى بلاش هيبقى اسم مايع ملوش لازمه .. لكن لو هتناديلها خديجةـ بتعطيش الجيم ـزي ماكل الدنيا بتقولها يبقى ممكن يكون اسم جميل اوي ومميز جدا ..

لو لاحظت هتلاقي اسماء مشهورة زي عبد الله مثلا .. بننطقها بلهجتنا المصرية ( عبدله) وده اسم عادي مفيهوش ( جرس ) ولا بيدل على حاجه .. لكن لما تنطقها بطريقتها السليمه ( عبدُ الله ) بتحس له وقع تاني خالص ..

مش هقولك سميها او متسميهاش ده شيء راجع لك بس سؤالك فكرني بوحده اسمها ( حفصه ) قبل ماتعرف عليها وبصراحه مخبيش عليك مكانش الاسم ده بيعجبني ابدا .. بعد ماعرفتها وهي ماشاء الله عليها آية في الجمال والادب والدين وفوق ده كله في اعلى المراتب العلمية .. بصراحة الاسم دلوقت لما بسمعه بحس اني بسمع اسم دلع واجنبي كمان ..

تم تعديل 10 يناير 2010 بواسطة doha

[president]

وجود أسامي داليا وباكينام وماهيتاب وجلنار وجودي وريناد ومانويللا على رأى الليمبي ايه الأسامي اللى عايزة كتالوجات دي؟

ايه رأيكم دام فضلكم؟

أسميها خديجة وأثبت على المبدأ؟

أستاذ حسام انا بنتى اسمها نفس اللون اللى بالأحمر ده ... وبدلعها على طول بأمينه لأن باحب باسم امينه ... ولو جبت بنت كمان ان شاء الله هاسميها

أريام وادلعها بفاطمه ولو حد قالها فطمه هقتله .

انا عايز اقول لحضرتك حاول تسميها اسم خفيف ودلعها بخديجه .. دا مش تقليل من اسم خديجه ... بس زى ماقالت الأستاذه ضحى .

ان فى بعض الناس بتقول الأسامى بطريقه تخلى الواحد يكره نفسه ... عشان كده على قد الوسط اللى انت فيه البنت ممكن ماتحسش بحاجه .

بس لو اختلطت بعد كده باوساط تانيه وخاصه فى فترة المراهقه احتمال كبير تضايق من اسمها .

ربنا يجيبها بالسلامه ويجعلها قرة عين ليك .

[بنت الشاطئ1]

ممكن تسميها رقيه إسم خفيف و من أهل البيت برضه

[بنت الشاطئ1]

أختي مسميه الزهراء و بندلعها زهرة

[rewsha]

والله حضرتك اسم خديجه ما حدش يقدر يتكلم عليه

والاخوه الاعضاء هنا قالوا كلام وافي جدا

بس انا ليه ملحوظه صغيره

لو مامتها مش مرتاحه للاسم هيه ووالدة حضرتك يبقى لازم تحط ده في الاعتبار

كمان البنت نفسها لما تكبر .......ياترى راْيها هايكون ايه ؟

انا اعرف واحده كل ما اساْلها اسمك ايه ؟

تقول لي ام فارس

لحد ما في يوم قلت لها ايه السر انك مش بتعرفينا اسمك انت ؟

قالت لي اصله مش حلو (مش عاجبها يعني )

فمعليش لازم نحط في الاعتبار راْي الام وراْي البنت لما تكبر في الزمن اللي احنا فيه خصوصا ان فعلا ممكن الناس ما تنطقهوش صح (بالجيم المعطشه يعني)

اما موضوع انها تتسمى باسم وتتنادى باسم تاني ....من راْيي انه غلط

طب ليه نعمل كده مانسميها الاسم اللي هاتتنادى بيه علطول .كمان بيحصل لخبطه كتير لما يكون للواحد اسمين

اما عن ان حضرتك عاوز تسميها كده تيمنا بالسيده خديجه

فربنا يارب يكرمك فعلا وتطلع بخلق السيده خديجه .....مش الاسم هوه اللي بيعمل كده (التربيه والنشاْه ) هي اللي بتاْثر في اخلاق الواحد

وربنا يكرمك فيها ويجعلها قرة عين لحضرتك ولمامتها

[سهران]

و الله يا دكتور أنا داخل أباركلك و ربنا يكملكم على خير و يفرحك بأولادك أن شاء الله و يتربوا في عزك ..... ما تشغلش بالك ... كتير بنفكر و نقارن و بعدين أول ما الهانم الصغيرة توصل هاتلاقي أسمها معاها ..... لما ربنا عطاني بنت قعدت أدور شهرين على أسم قبل الولادة ..و أول ما ربنا كرمني بيها أخترت أسم تاني خالص .

ما تنساش تعزمنا على السبوع ... هانجيلك أسوان ... فرصة الجو شتا .

تحياتي

[ozoozo]

يمكن تضرب معاها وتجوز هي كمان

محمد جمال مبارك وتكون سيده الرابطه الاولي

[Diab]

يمكن تضرب معاها وتجوز هي كمان

محمد جمال مبارك وتكون سيده الرابطه الاولي

ايه عم ازوزو انت هتوقعني

انا قصدي ان الاسم استايل وزي ما قالو ان دلعوا يبقي ديجو ( مارادونا ) :lol:

[mama nona]

ان شاء الله تيجى ست البنات الاول ومنقاطعش وهتلاقى اسمها معاها من غير تفكير

طبعا اسم خديجة لا غبار عليه

واكيد هنرجع لوقت هترجع الاسامى الجميلة دى من تانى

لازم تكون الناس كلها مقتنعة بالاسم

عندنا لو محتارين فى اكتر من اسم بنحط شموع ونسمى كل شمعة اسم والشمعة التفضل منورة لاخرلحظة هو ده الاسم المنتظر

انا عندى جنى

ولو ربنا اكرمنى ببنت كمان ان شاء الله هسميها لمى (القافية تحكم )

اخر سم جديد فالعيلة من اسبوع آسيل

وادخل على النت واكتب اسامى البنات هتلاقى اسامى للركب

ولو حابب اسم جديد وقديم فى نفس الوقت هاجر - مريم - نور

وان شاء الله نباركلك على سلامة الام والمولودة

:lol:

[عنبو]

الف مبروك يا دكتور حسام

ويارب ربنا يوصلها بالسلامه ان شاء الله

بس احب قلوك حاجه بالنسبه للاسم الطفل يستحب يكون فيه تناسق بينه وبين اسم الاب

وبعدين مينفعش نربط بين الاسم والشخصيه مش شرط اسمى بنتى خديجه علشان قول انا بحب السيده خديجه وانما اذا كنت فعلاً بحب السيدجه خديجه اربيها واعلمها كويس علشان تطلع نفس اخلاق السيده خديجه

انا اعرف ناس سموا فعلاً خديجه وبعدين بدأوا يدلعوا البنت باسم تانى خالص

البنت كبرت وبقى الاسم المشهور بتاعها دلع خديجه ومش خديجه طيب سميتوها ليه من الاول متعرفش ؟؟

لو مقتنع بالاسم توكل على الله يادكتور لو حاسس انه تقيل نوعاً ما شوف اسم تانى وهتلاقى فى الصحابيات اسامى كتير

شكراً

[hebapharm]

توكل على الله ..خديجه ..بتعطيش الجيم