حد هنا بيحب الفسيخ....؟

[Cinnamon lover]

واللهي مش عارف اقول ايه ولا ايه انا بجد السعاده مش عارفه تروح فين اي واللهي انا سبب دخولي المنتدى اصلا انتوا ما بزهقش منكوا والنهارده بالزات اقتنعت وفكرتيني لما كنت بقف اتفرج عللى ماما بقى ويا سلام وهيا بتتفنن كده بقى الله يرحم ايام العز بس بعد كده وحياتك انا كنت بحمله واوديهولها وفعلا زي ما قالوا تقولي للراجل انك حتسفريه وتلفيه الف لفه انا عن نفسي بعد اللفه المحترمه بحطه في كيس جوا كيس جوا كيس والكيس جوا شنطه والشنطه ده فيها بن يعني اللي هوا مستحيل يطلع ولو اقولك باخد ايه معايا كمان حتقوليلي انتي ازاي اصلا دخلتي المطار .......... اه لو تعرفي بيطلبوا مني ايه ومش تقلقي مش ام الخلول لا ده حاجة افظع et:(:D:Dمعتقدش انكوا ممكن تتخيلوا فمنعا للاحراج مش حقول :lol: عموما انا فرحانه قوي بالطريقه واحلا حاجة اني خلاص عملتها ميمورايز في دماغي يعني مستحيل انساها الا موضوع الميه الاخير ده لكن الترتيبات في الاول ميه ميه يا باشا يا كبير بس انا مش بحبه مالح قوي ايه الحل سعادتك هل ااقلل الملح ولا اعمل ايه ولو حطيته في ميه والميه طلعت منيله ومالحه جدا ما العمل بعد كده؟؟؟؟؟؟؟؟؟؟ wst:: gsm:: :sad: po::

[rewsha]

الا موضوع الميه الاخير ده لكن الترتيبات في الاول ميه ميه يا باشا يا كبير بس انا مش بحبه مالح قوي ايه الحل سعادتك هل ااقلل الملح ولا اعمل ايه ولو حطيته في ميه والميه طلعت منيله ومالحه جدا ما العمل بعد كده؟؟؟؟؟؟؟؟؟؟ :lol: wst:: gsm:: :sad:

شوفي حضرتك .موضوع الميه ده بيفرق في انه بيبقى طري جدا ولحمه سايح كده

بس اهم حاجه يا جماعه الدنكار ..ثم الدنكار ...ثم الدنكار

اما بالنسبه لموضوع الملح اللي اعرفه انك تعملي بالمقادير اللي قلت عليها وبعدين لما تنقعيه في الخل والزيت وكتري الزيت شويه وبلاش تكتري الليمون بقه علشان ما يزودش ملوحتهلما بيتنقع لمدة يومين كده في الزيت والخل ده بيقلل ملوحته .وكمان بيخليه مش زفر خالص ومالوش ريحه نهائيا

ده عن تجربه لاني من فتره كده اتعزمت على فسيخ جاي من مصر ومعتق .لكن قعدت طول اليوم باغسل في ايدي والريحه ما بتروحش

لكن اللي عملته ده .كان ملحوظ جدا ان مالوش ريحه نهائي

وممكن يفضل منقوع في الخل والزيت والليمون في علبه في الثلاجه لمده اسبوعين وله حاجه وكل ما قعد في الزين والخل كل ما فقد ملوحته وبقى مستوي اكتر

لكن بشكل عام ممكن ناكله بعد وضعه في الزيت والخل والليمون بساعه او ساعتين

[rewsha]

ولو اقولك باخد ايه معايا كمان حتقوليلي انتي ازاي اصلا دخلتي المطار .......... اه لو تعرفي بيطلبوا مني ايه ومش تقلقي مش ام الخلول لا ده حاجة افظع :sad::D:Dمعتقدش انكوا ممكن تتخيلوا فمنعا للاحراج مش حقول :blink: :lol: :lol: :sad: :sad:

اثرتي فضولي بصراحه ....بيطلبوا ايه .........ها......ها...؟

قوليلي وانا مش هاقول لحد خاااااالص

انت بتقولي مش ام الخلول .....امال ايه ؟

اوعي يكون .........

..........يكون

......يكون................ابو الخلول؟ :blink:

[doha]

ولو اقولك باخد ايه معايا كمان حتقوليلي انتي ازاي اصلا دخلتي المطار .......... اه لو تعرفي بيطلبوا مني ايه ومش تقلقي مش ام الخلول لا ده حاجة افظع :sad::D:Dمعتقدش انكوا ممكن تتخيلوا فمنعا للاحراج مش حقول :blink: :lol: :lol: :sad: :sad:

اثرتي فضولي بصراحه ....بيطلبوا ايه .........ها......ها...؟

قوليلي وانا مش هاقول لحد خاااااالص

انت بتقولي مش ام الخلول .....امال ايه ؟

اوعي يكون .........

..........يكون

......يكون................ابو الخلول؟ :blink:

لا ده ولا ده .. اكيد خلول بذات نفسه ..

بصي ياستي .. الطريقة مشهية اوي وباين عليها ممتازه بس سؤال بعد اذنك .. الي فهمته كده ومش عارفه ان كان صح ولا غلط انه بيستوي بعد 3 ايام بس .. هل ده صحيح ؟ امال انا اسمع انه بيقعد بالشهور في صفيحه مغلقة ومش عارف ايه ..

ياريت تصححي لي المعلومه ..

[rewsha]

شوفي يا ضحى

انا فعلا لما جيت ادور على طريقة عمل الفسيخ على النت لقيت كل الناس بتقول سيبوه من اسبوعين ل 3 اسابيع علشان يتعمل

لكن عن تجربه

ولما ساْلت ماما عندي كمان .

قالت لي 3 ايام في الشوال مع الملح .+ 3 ايام تانيين في الميه مع الملح المذ اب فيها

ويوم غسيل في الاول ونقع وكدهوت =7 ايام يعني اسبوع بالظبط

وانا لسه عاملاه الجمعه اللي قبل اللي فاتت

واكلنا منه الجمعه اللي فاتت دي علطول .اول امبارح يعني

وكان جميل بصراحه ومستوي جدا لدرجة ان لما ماما قالت لي اسبوع وتاكلي منه ماصدقتش وكنت خايفه يطلع لسه ما استواش

بس طلع لحمه سايح وطري زي الزبده ومش ناشف خالص

في حاجه كمان انا كتبتها ومش عارفه اذا كنت اخدتي بالك منها وله لاْ وهيه اني بكده باعرضه للهواء في الاول لما باحطه في شوال خيش.مش باقفل عليه في كذا كيس

لان في بكتيريا بتسبب تسسم الفسيخ وتنمو في الوسط اللا هوائي علشان كده الفسخانيه البروفيشينال بيحطوه في صناديق خشب بالخبره علشان التهويه

وكمان ساْلت ماما عن موضوع اني ما احطهوش في الميه .فقالت لي ده بيخليه يطلع لحمه ناشف

واهم حاجه وانتي بتغسليه وتعمليه تكوني حريصه على ان ما فيش دبانه رخمه تقف عليه او على الشوال من بره .دي ملحوظه الحاجه الوالده اْكدت لي عليها

وبعدين استني عليه بس كده اريح شويه واروح اجيب قد 10 كيلو بوري واعملهم واعزم اعضاء المحاورات عليهم

وهاتكوني انت اول واحده يا ضحى :blink:

تم تعديل 10 يناير 2010 بواسطة rewsha

[Tafshan]

رغم انى عملت البدع .. و لفيت على كل الدكاتره .. و كنست لكل الاوليه .. ح اعترف اخيراً بعد ما عرفت انى مش لوحدى ..

انا مش بحب الفسيخ :blink:

انا بحب الملوحه :blink:

تم تعديل 10 يناير 2010 بواسطة Tafshan

[الغريب]

حبايبي

أحب أقولكم بلا فخر أن نسايبي يمتلكو أكبر محل فسيخ له سمعة في مصر

زباينهم ممثلين ومشهورين وأقولكم سر كمان (البابا شنودة بيبعت ياخد منهم من الاسكندرية) والناس اللي بتروح السيدة زينب أكيد تعرف المحل

وأنا حاضر وبالخدمة لأي استفسار يخص الفسيخ

أستراتيجية العمل.. فسيخة متنضفة كويس في سيرفيس صيني عليها ليمون وشوية خل وطحينة خام تتقلب كويس وشوووووووووووووف العجب ومتنساش السفن أب في النهاية

.

[rewsha]

طب ممكن اعرف الفرق بين الفسيخ ..............والملوحه ؟ :blink:

[MZohairy]

طب ممكن اعرف الفرق بين الفسيخ ..............والملوحه ؟ :lol:

:blink:

و الله دي احتار فيها العلماء

فيه ناس قالت ان الفسيخ بيبقى من السمك البوري و الملوحه بتكون نوع تاني

و فيه اراء أخرى لم تصنف

عموما ما اود الإشارة اليه.......

لأ اللغه العربيه هنا ما تنفعش و مش راكبه خالص مع الفسيخ

اللي كنت عايز اقوله ان الفسيخ من غير عيش صابح و طري مالوش قيمه

و فيه ناس بتاكله في عيش فينو

و انا نفسي كلته بالباجيت الفرنساوي

يعني السر في الفسيخ هو العيش

فوتكم بعافيه :blink:

[rewsha]

حبايبي

أحب أقولكم بلا فخر أن نسايبي يمتلكو أكبر محل فسيخ له سمعة في مصر

زباينهم ممثلين ومشهورين وأقولكم سر كمان (البابا شنودة بيبعت ياخد منهم من الاسكندرية) والناس اللي بتروح السيدة زينب أكيد تعرف المحل

وأنا حاضر وبالخدمة لأي استفسار يخص الفسيخ

أستراتيجية العمل.. فسيخة متنضفة كويس في سيرفيس صيني عليها ليمون وشوية خل وطحينة خام تتقلب كويس وشوووووووووووووف العجب ومتنساش السفن أب في النهاية

.

وااااااااااااااااااااااااو......اكبر محل فسيخ في مصر؟؟؟!!!!!!!!!

طب مش كان انت اولى تفتح الموضوع من الاول :lol:

.

يا جماعه .............لو اختفيت من المحاورات ابقوا دوروا عليه ...........هنااااااااك....في السيده زينب

يمكن اكون اتخطفت .............علشان طلعت سر الفسيخ :ninja:

نتكلم جد بقه ....

حضرتك ممكن تعرض عليهم طريقتي وانا متاْكده لو نفذوها حجم مبيعات المحل هايبقى ...................اضعاف الاضعاف :lol:

بس استنى لما اروح اسجل حق الاختراع الاول wst::

لا والله بصراحه حضرتك هاتنفعنا جدا لو تكرمت وقولته لنا طريقه عمل الفسيخ في المحلات بجد .

مهما كان

ادي العيش لخبازه ..........

صحيح الفسيخ بتاعي طلع توحفه وهايل .........بس ما فبش ما نع نكتسب خبرة ........اهل الخبره .........اكيد هايبقى في حاجه جديده عن اللي كتبته

كمان حضرتك هاتكون انسب واحد يجاوب على الفرق بين الفسيخ والملوحه

وادينا نعرف مدى صحة معلومات الاستاذ زوهيري :wub:

تم تعديل 10 يناير 2010 بواسطة rewsha

[Tafshan]

طب ممكن اعرف الفرق بين الفسيخ ..............والملوحه ؟

الماوحه الاصلى بتيجي من جنوب السودان .. السمكه اسمها African Tiger Fish .. لحمها احمر زي السلامون و بعد التمليح بيبقى طري جداً زي الكفيار بالضبط .. بس اوعى .. فوق الفظيع ..

دي صورة المرحومه قبل ما تتملح :

تم تعديل 10 يناير 2010 بواسطة Tafshan

[engmido]

حبايبي

أحب أقولكم بلا فخر أن نسايبي يمتلكو أكبر محل فسيخ له سمعة في مصر

زباينهم ممثلين ومشهورين وأقولكم سر كمان (البابا شنودة بيبعت ياخد منهم من الاسكندرية) والناس اللي بتروح السيدة زينب أكيد تعرف المحل

وأنا حاضر وبالخدمة لأي استفسار يخص الفسيخ

أستراتيجية العمل.. فسيخة متنضفة كويس في سيرفيس صيني عليها ليمون وشوية خل وطحينة خام تتقلب كويس وشوووووووووووووف العجب ومتنساش السفن أب في النهاية

.

ايوة ياباشا

فسخانى شاهين ..........

اوعى تكون فسخانى الهلوتى :ninja:

[بنت الشاطئ1]

عزيزتي rewsha بما انك لسة عاملة الفسيخ ممكن صورة لهذا الفسيخ الشهي

[rewsha]

عزيزتي rewsha بما انك لسة عاملة الفسيخ ممكن صورة لهذا الفسيخ الشهي

ياااااااااااااه تخيلي ماجاش على بالي خالص اصوره md2:

وانت اوحيتي لي بالفكره وان شاء الله اول ما اعمل دفعه تانيه هاصوره وانزل صورته هنا

واصل انا كنت متردده بصراحه اني افتح الموضوع هنا علشان الناس اللي مابتحبش ريحة الفيسخ ودخلوا عقدوني في اول الموضوع

وبعدين اقول لك على اللي حصل

اللي حصل بصراحه ومن غير (فشر) فشر يعني كدب مش يعني فشار

انا كنت عامله 3 كيلو ومش عارفه اذا كنت قلتلكوا اني عزمت عليهم اسرتين من جيراني المصريين وله لا .....بس ده اللي حصل

انا نظفت الفسيخ وقطعته كل واحده بالنص ونقعته في علب فيها ليمون وزيت وخل

وطلعنا الجونينه (مش هاقول اسمها ) لاحسن يكون حد شافنا واحنا قاعدين ناكل فسيخ فيها :ninja:

المهم اللي اتبقى كان 3 علب اخدت انا علبه واديت لكل اسره من اللي كانوا معانا علبه

والعلبه بتاعتي اكلنا منها امبارح

يعني من الاخر

اتنسف ..............اتنسف اتنسف بجد يعني

لكن وعد مني انا هاعمل دفعه تانيه اول ما اعملها هاصورها............ قبل ما تتنسف برضو smk:

[Cinnamon lover]

اثرتي فضولي بصراحه ....بيطلبوا ايه .........ها......ها...؟

قوليلي وانا مش هاقول لحد خاااااالص

انت بتقولي مش ام الخلول .....امال ايه ؟

اوعي يكون .........

......يكون................ابو الخلول؟

لا ده ولا ده .. اكيد خلول بذات نفسه ..

مساء الخير ,,,,,,,

لولا اني خايفه اقول ومحرجه لحسن تجرو من اللي حقولوا وتهربوا smk:

لكن تصميمك واحساسي انكوا بتتريقوا عليا انا صممت اني اقول ويحصل اللي يحصل بقى wst::

ولكن احب اذكر في الاول ان انا ماما من ابو قير يعني اصل السمك كله يعني اسكندراني اسكندراني يعني اللي تعد كده في اكله السمك تمزمز بس في الراس عامله زي القطط يعني :$ ( اي واللهي واحشاني الست ده هيا والراجل داد bv:- )

المهم في مره بقى عملت غلطه عمري وقلتلها نفسك في ايه يا ست الكل انتي بس اؤمريني كده ومن العين ده قبل ده ( مكنتش عارفه اني حدخل نفسي في مصيبه امن دوله ) المهم صعبت عليا نفسي لما لقيتها متردده قلتلها انتي حتترددي كتير انجزي مفيش وقت ومش تقلقي حجيبهالك يعني حجيبهالك لو طلبتي لبن العصفور قالتلي طيب يا حبيبتي ,,,,,,, أن أن أأأأأأأأه قلت في عقل بالي هيا بتقولي -----> حبيبتي يبقى ربنا يستر

( انا بس بحكيلكوا عشان لما اقولكوا تقدروا انا عملت كده ليه بس مش اكتر عشان تحسوا موقفي وكمان عشان تعرفوا ان كلمه حبيبتي ده مش من فراغ ده مكر عشان تستدرج عواطفي وتستغل واحشتي ليها)

المهم الخط قطع اتصلت تاني لقيتها بتقولي حضري ورقه وقلم قلت حللللللو قوي بدأنا ربنا يستر

( طبعا اللسته الغريبه اللي حتتقال ده ناو ممكن يعني .... مش عارفه تعمل فيكوا ايه بس الحقيقه تقال زي ما بيتقال يعني وعشان الواحد يقدر الاهل بيبقوا عاملين في الواحد ايه )المهم قلتلها اتحفيني يا مزه اؤمري

والمطلوب كان كالأتي:

حمام

بط

ورنجه اسكندرانيه من واحد هيا عارفاه مخصوص

وجاندوفلي ( ده طبعا بالاضافه لام الخلول " مش ابوه ولا خلول نفسه md2: "

وسمنه فلاحي من عند ست بتيجي في الصيف بس وده لازم بالحجز والطلب ويا تلحق يا متلحقش

واخيرا وده المفاجأه القــــــــــــــراميط

واللهي ميعرفش القراميط بقى اقولوا انا ايه هوا وهوا ثعبان البحر md2:

طبعا متخيله الوشوش عامله ازاي ناو انا بس اي والله انا اول ما سمعت كنت حقفل السكه ققلتلها ,,,,,, ست بدوي تحبي الحجات ده منين بقى ان شاء الله اجيبها؟؟؟؟؟؟؟ وانا واللهي على اخري وهمي الاخير في الشنطه اللي حتروحلها ده حتروحلها ازاي والحجات الزفاااااااااااار ده كله حيصمد في السفر يا رب ساترك

وتخيلي بقى يا ريوشه لما تبقى وانتي بتحضري شنطه مش حاطه هدوم لا انت بتحطي اكل مش عاوزة اقولك يعني اني كنت على اخري وكمان لان الحجات المجمده ده لازم تتحضر الصبح منك على جوه الطياره

انا عن نفسي الهاند باج كانت شنطه سفري والشطنه الاساسيه كان اللي في عونها مصيرها كان الزباله بعد التخلص من محتوياتها

ومش حقولك بقى الوزن كان عامل ازاي ؟؟؟؟؟ظ

مش قادره اوصفلك منظري وانا في المطار والراجل خايفه يفتح الشنطه يقولي ايه الريحه ده سعادتك ولا الشنطه ده فيها ايه كنت بخلي الباس بور مع اللي سايق العربانه وانا بقف مترين بعيد تحسبا لاي حاجة ممكن تحصل عشان اطلع اجري

طبعا لاقيتوا بيشاورلي وبيقولي تعاليلي يا بطه wst:: وروحتله حعمل ايه يعني

ومشيت بخطوات يملاؤها الخوف والرعب وسألني وقالي انتي جايه منين ؟ قلتله زي ما مكتوب عندك اسكندريه وجايه اشوف الماما بتاعتي والشنطه ده بتاعتها مش بتاعتي هيا طلبت حجات مني :S قالي اه الامهات علطول كده وعاداني يختي ومقولكيش كنت طالعه اجري من السعاده واول ما ركبت السياره قلتلهم بينا عالبيت بسررعه لحسن الشنطه خلاص حتفك

وطبعا ماما تقريبا مكنتش مصدقه اني ممكن اسمع الكلام واجيبلها كل حاجة بس الواحد وقلبه بقى :D وكفايه انها كانت مبسوطه يعني

وهوا ده يا ست روشه بقى اللي انا اخدته معايا وكل مره الطلب بيتغير لحد ما حاولنا نقنعها ان مصر البلد الوحيد او الاكثر شيوعا ان تلاقيله محل مصري اصلي في كل مكان وفيه كل حاجة تريد مارك مصري وان هاندريد بيرسينت يعني ,,,,, والحمدلله على كده صدعتكوا معايا اسفه :ninja:

[Cinnamon lover]

حبايبي

أحب أقولكم بلا فخر أن نسايبي يمتلكو أكبر محل فسيخ له سمعة في مصر

زباينهم ممثلين ومشهورين وأقولكم سر كمان (البابا شنودة بيبعت ياخد منهم من الاسكندرية) والناس اللي بتروح السيدة زينب أكيد تعرف المحل

وأنا حاضر وبالخدمة لأي استفسار يخص الفسيخ

أستراتيجية العمل.. فسيخة متنضفة كويس في سيرفيس صيني عليها ليمون وشوية خل وطحينة خام تتقلب كويس وشوووووووووووووف العجب ومتنساش السفن أب في النهاية

.

ايوة ياباشا

فسخانى شاهين ..........

اوعى تكون فسخانى الهلوتى :ninja:

لااااااااا مادام اسكندريه و بابا شنوده يبقى مفيش غيره ,,,,,,,,,,, سلطــــــــــــان الفسيخ اللي في المانشيه تقريبا والازاريطه والله واعلم md2: bv:-

ولو صدق حدسي يعني يبقى الراجل كمان صاحب المكان يعرفني ولانه كل ما يشوفني السلام ينزل والشاي والقهوه والطلبيه المعتبره عشان زي ما قلتلك يا روشه لزوم السفر فبيتوصى بقى هوا واللفه المعتبره smk:

[rewsha]

عموما يا cinnamon lover

كل اللي اقدر اقوله ..........

ربنا يخليكي لمامتك ويخليها ليكي وتفرحيها دايما كده :lol:

[Morial]

انا مشكلتي اني بحب كل انواع ال اي حاجة فيها ملح كتييييييييييييييير يعني فسيخ رنجة انشوجة ملوحة سردين وهلم جرا

[اغابي]

انا مشكلتي اني بحب كل انواع ال اي حاجة فيها ملح كتييييييييييييييير يعني فسيخ رنجة انشوجة ملوحة سردين وهلم جرا

على فكرة انت زي بالظبط وكمان انا متخصصة فى اكل الفسيخ ومتخصصة انى افضل تعباة اليوم كلة لو اكلت فسيخ

بس برضوه حتتاكل يعنى حتتاكل زي ما سمير غانم قال - حاكلها والله لاكلها انشالله ..... ايه

تحياتي :)

[shiko]

...انا جيت على الريحة والله ...

شميت الريحة ...عرفت طوالى انها عزومة ...واسمى ماجاش فيها ...لاقيت القطط جلها فى الشوارع بتجرى على الناحيدى قلت امشى معاهم ....وايه نظام الشوك طب ...ايتها حاجة ...؟؟

لا فسيخ وانشوجة ...امووووووووووووت فيهم ...بس ماما مابترداش ...وماحدش بيجيبه ......وباستنى اختى بس هى اللى بتجيبهولى ...

ممكن ساندوتش ...طب لقمة