كندا... بداية ونهاية

[znaty]

أصدقائي واحبائي

وحشتوني جدا جدا جدا

اعتذر اولا عن اختفائي طول ما كنت في كندا بس دة بسبب ان الفندق مافيهوش في الغرف انترنت الا بكابل وسعره اليومي غالي جدا حوالي 21 دولار يوميا والمكان الوحيد اللي اخش عليه نت هو اللوبي

وكل نزلاء الفندق بالصلاة على النبي حاجزين اللوبي واللي واقف على رجل ونص واللي قاعد في التواليت ومهزلة تحت

وانا من ساعة مانزلت كندا وانا داير على حل شعري في الشوارع طول اليوم برجع على الفندق للنوم بس

قبل ما ابدا احكي اي حاجة والا اي تفاصيل

الرحلة القصيرة دي واللي بصراحة حسيت انهم سنتين موش اسبوعين

كانت اكبر مكاسبها هو الناس

خرجت منها بشكر وامتنان وعرفان كبير اوي ..لناس اصبح ليهم في قلبي مكانة كبيييرة اوي ...كان صعب اني ممكن اتخيل انه لسة فيه في العمر وقت انك تعرف ناس وتحبهم وكانهم اتربوا معاك ولا يقلوا ابدا عن اصدقاء الطفولة والشباب اللي كونتهم سنين وسنين ؟؟واكدت اللي كان في قلبي من زمان ان احنا موش زي ما كنا بنفتكر ..ان امصريين وحشين في الغربة ..لا ..لسة في ناس كتير حلوة اوي ..بس انت ادي لنفسك فرصة تعرف بس

شكر وامتنان لا حد له..لاخونا الكبير المهندس ياسر ..بصراحة موش عارف اكتب عن الراجل دة ااقول ايه ..انا عارف انه مابيخشش المنتدي حاليا الا للضرورة القصوي ..علشان كدة هاتكلم عنه براحتي ..كل الصفات اللي ممكن تجمعها كلمة الانسانية موش بس المصري الاصيل في الراجل دة ..

راجل كل همه في كندا انه يجمع المصريين ويسهل ليهم بداية الاستقرار والحياة هناك

مسخر وقته وبيته واولادة لمساعدة الناس هناك ..هو اول واحد شفته في كندا ..واخر واحد شفته قبل السفر

قضينا تاني يوم العيد في بيته وكاننا في مصر في بيت اخويا والا عمي والا حد من اهلي .. موش كندا والا حتى السعودية ..وقبل ما امشي عرفني على اسرة تانية رائعة لا تقل عنهم وزرناهم في بيتهم ليلة السفر

دة غير الاف والاف من النصائح والمعلومات اللس استفدها من المهندس ياسر عن الحياة في كندا والشغل هناك وازاي اعمل المعادلة وغيره وغيره ..حتى اداني كتب كمان وانا مسافر

وسبحان الله ..الطيبون للطيبات ..زوجته مثال للزوجات الصالحات ونسخة طبق الاصل في الاخلاق من المهندس ياسر ..يكفي الحب الغير عادي اللي في قلب زوجتي ليها من اسبوعين فقط اتعرفوا على بعض فيه ..وتكفي دموع الوداع وهما بيسلموا على بعض وكان اخت بتسلم على اخته وهيا مهاجرة برة ؟؟

شكر وامتنان لاخويا طارق جمعه اللي تقريبا كان يوميا بيتصل بيا في الفندق يطمن عليا عامل ايه وهاعمل ايه واستفدت منهم كتير جدا في حاجات كان ممكن اعملها غلط لولا ستر ربنا والتفاصيل قادمه :) طبعا دة غير انه استضافنا عنده مرتين والترحاب الغير عادي مع انه مبرر ..احنا عشرة طويلة وعيش وملح :

شكر وامتنان لاخويا وحبيبي د تو :) ..تهامي العزيز ...سيبكم من حركاته وانتقداته في المنتدي ..بس الراجل دة اتصل بيا ميت مرة ينصح ويدل ويطمن ويشور ...منتهي الاخوة والصداقة زي مانكون اتربينا مع بعض واكتر ...ونصائحة كالعادة ..لخصت كتير جدا وفادتني كتير جدا ..واللي بيني وبين اخويا تهامي غني عن التعريف

شكر ومتنان وعرفان لاخوانا د هشام ابراهيم ..الراجل دة جاب تليفوني وانا اصلا ماعرفش تليفونه ...ورغم ان ظروف شغله هو وزوجته بين بلدين بينهم 150 كم ..وبيشتغل من الفجر لغاية 5 او 6 بالليل غير الدراسة

يوم الوقفة كان شغال وصايم ورغم كدة بعد شغلة على طول عدي عليا لغاية الفندق في داون تاون ورحنا قضينا ليلة فكرتني بايام الكلية والعزوبية :) في بيت م ايهاب سالم

شكر وامتنان موصول لاخويا العزيز م ايهاب سالم ..واللي باعتبر من اكتر مكاسب الرحلة دي اني اتعرفت عليه شخصيا عن قرب ..يا اخوانا فعلا المعرفة عن قرب حاجة .ومداخلات الانترنت حاجة تانية خاااالص ..انسان في منتهي الروعة والتواضع والاخلاق ..في نفس اليوم وظروف العمل المتشابهة مع د هشام ..استضفنا عنده في بيته ربنا يملاه بركة و خير ..شخصية اعغتز بصداقتها اللي تعتبر مكسب كبير لاي انسان

والشئ بالشئ يذكر ..على ذكر موضوع شخصية النت حاجة والطبيعة حاجة تانية

الدكتور هشام ابراهيم :) ..صدمة كبري ..سيبكم خاااالص من شخصيته على المنتدي وحضرتك وسيادتك والكلام دة خااالص ..الراجل دة كتلة كوميديا متجسدة في شكل انسان :) ..من الاخر ..لا غني عنه في اي تجمع انساني :) ..متهيالي معندكش كاسيت رزع حلل علشان تعليه على الاخر علشان تسكتنا وتتكلم انت يا هيتش  قصدي د هيتش

شكر و وامتنان موصول لاخونا الكبير اوي د الشامي ..الراجل جه 150 كم من لندن لغاية بيت م ايهاب سالم علشان نتقابل كلنا في اليوم الظريف دة

شكر وامتنان كبير اوي اوي اوي لاختنا الفاضلة د سوسوراني ..والشكر بالنيابة عن زوجتي قبل ما يكون مني انا .. موش هاتكلم عن الاتصال اليومي وبعض الاحيان اكتر من مرة في اليوم بمراتي علشان تطمن عليها وبتعمل ايه

وموش هاتكلم عن عشرات عروض المساعدة اللي من القلب موش مجرد كلام في الفاضي مع انها هيا اللي محتاجة اللي ياخد بايدها في الظروف والمسئولية الصعبة اللي هيا شايلاها لوحدها هناك ..بس بابلدي كدة ..اجدع من كدة واحدة ..انا ماشفتش ..ومتهيالي كل الناس اللي يعرفوا الدكتورة سوسو هايبصموا على كدة بالعشرة

لكن الملفت في الامر ..ان هيا ومراتتي شبه بعض تقريبا في كل حاجة :) نفس الطباع والروح

ويكفي الشعر اللي بتقوله مراتي عنها :) خلاص ..اتفقوا مع بعض جدا وشكلنا لما نستقر ان شاء الله في كندا هاتسيب البيت وتروح تسكن معاها ..وانا اطبخ واوديلهم الاكل ديلفري هما الاتنين

مراتي بتقوللي ياريتني كنت عرفتها في السعودية ال8 سنين الللي فاتوا ..كل ما بتعيش لسه فيه فرصة تعرف ناس كويسة

طبعا بفضل الله ثم الجي بي اس الله يستره هو واللي اخترعه عرفت اوصل مراتي لغاية بيت الدكتورة سوسو ..وللاسف الشديد المنطقة اللي هيا ساكنة فيها نضيفة بشكل يفقع فمالقيتش حتة بلدي كدة والا قهوة والا حاجة اتاوي فيها لغاية لما زيارة مراتي تخلص غير تيم هورتونز ..اللي قرفت من كتر ماشفته ودخلته في الاجازة دي ..وبعدين لما الزيارة خلصت ..مراتي اتصلت على عبدة السواق اللي هو انا علشان ارجعها الفندق

انا هاشوف ايام سودا مع العالم دي ..بس بصراحة ..زيارة مراتي للدكتورة سوسو كانت الحاجة اللي مراتي كانت محتاجاها علشان كل مخاوف الغربة تروح ..وتحس انها ممكن تعوض بل تزيد عن اصحابها القدامي في مصر والسعودية ..يكفي انها حسوا انهم انتيم من زمان في مقابلة واحدة ومجموعة تليفونات

شكر وامتنان لكل اخوانا في المنتدي واحد واحد ..اللي مابطلوش يسالوا عننا اما رسائل تليفون او اتصال او رسائل خاصة او مداخلات

..انا حاسس اني عاوز شهر اقرا مداخلات الاسبوعين دول ..خصوصا قناوي توامي وحبيبي احمد سيف اللي اتصل بيا بالليل قبل السفر للاطمئنان دة غير الرسائل والاتصالات وانا هناك علشان يطمن عليا وحسيني صديقي الذي لا يكل ولا يمل ,واخويا الحبيب دكتور بريكناديان والدكتور سيرجيون ومدام باولا والاخت العزيزة سمية صالح ودكتورتنا العزيزة صفاء البنا واخويا اللذيذ مراد انور وكل حبايبنا بلا استثناء واحد اللي سالوا عليا ولسة لسة هاقرا مداخلتهم

انا كان لازم ابدا مذكراتي بالمقدمة دي ...علشان بصراحة ؟؟دي اكبر انطباع خدته من كندا في الاسبوعبن دول ..احنا ..واحنا بس ..اللي بايدينا نخلي الدنيا حلوة في اي مكان في الدنيا ..وصدقوني ..عمر كندا والا غير كندا ..هايتعاش فيها والا تنطاق او حتى تنداس ..من غيرنا مع بعض ..وخوفنا على بعض ..ومساعدتنا وحبنا للخير لبعض

بس خلاص :)

واعتذر منكم اني ابدا مذكراتي بكرة ..علشان انا عندي جيت لاج ماحصلش والا هايحصل لحد في الدنيا ابدا

يا عالم يا هووووو ..فيه حد يشوف الفجر 3 مرات في يوم واااحد ؟؟ صحيت الفجر في كندا ..رحت حوالي 5 مشاوير بعيدة عن بعضها علشان اخلص حاجات مهمة في اخر يوم وارجع العربية الايجار وبعدها مشي على رجلي في الداون تاون لما رجليا فقفقت ..وبعدين تشيك اوت الفندق الساعة 1 الضهر ورحنا اتغدينا واستنينا الطيارة في اللوبي زي الاجئين وركبت الطيارة 10 بالليل توقيت كندا ... الفجر طلع عليا تاني بعد 4 ساعات في الطيارة علشان طايرين عكس اتجاه دوران الارض.. وبعد رحلة 12 ساعة متصلة مزنوق في الكرسي اللي في النص لان الطيارة بالكامل مليانه فول .. لما بقيت شبة الجمبري المقلي.. قعدت 6 ساعات انتظار في ابوظبي وبعدين ساعة طيران للدمام ..وبعدين ساعة ونص بنوصل واحد صاحبنا وبعدها خدت عربيتي سواقة 200 كم للبيت والله ربنا نجانا ازاي وانا سايق عندي تخلف عقلي موش بس نايم وتقريبا موش شايف ودخلت البلد والفجر التالت بيطلع عليا في يوم واحد ..اول مرة اشوف الفجر 3 مرات وفي يوم واحد

وحاسس اني منهار جسديا مع اني نايم من 7 صبحا الي 7 مساءا توقيت السعودية ..بس حاسس كاني مرقوع علقة موت بصراحة ..حاليا باقوم من النوم في وقت النوم وانام في وقت الشغل واجوع الساعة 4 الفجر والدنيا بايظة عندي خالص :)

هاقسم التجربة كالعادة الى مراحل ..زي الايلتس بالظبط

1- الترتيبات والرحلة نفسها والاجرائات

2- انطباعات شخصية

3- مميزات

4- عيوب

5- صور الرحلة

خليتكم بالعافية ونبدا باسم الله على خير من بكرة

[znaty]

اولا اعتذر لو كنت نسيت حد بس اعذروني يا اخوانا

عنيا الاتنين بيلفوا عكس عقارب الساعة :lol: :lol:

الشكر لكم جميعا يا اخوانا بلا استثناء

نبدا الاول بالاسم

أي هجرة في الدنيا طبيعي تبقي نهاية مرحلة وبداية مرحلة جديدة ..بغض النظر باة مين من المرحلتين احلي وانجح

ممكن فعلا تتفهم انها بداية هجروة كندا وفي نفس الوقت خلاص شكرا على كدة وهاتبقي نهاية فكرة الهجرة ..واللي يفهمها كدة مرعوب من الهجرة وعنده استعداد بديهي للخلعان بدري

وممكن تتفهم انها نهاية حياة الخليج وبداية الحياة الرغدة المستقرة في كندا ...وربنا وفق وتمشي الامور بسلاسة واحلى من اروع احلامك ودة ممكن جدا وحصل كتير

او نهاية الدلع والاستقرار في الخليج وبداية الكفاح والتعب والكد في كندا علشان تعرف تثبت نفسك هناك وتعيش زي الناس العايشة هناك وتشيل الفروق والحواجز بينك وبينهم فتعرف تندمج في مجتمع يختلف كلية عن اللي اتربيت عليه ..ودة هايكلف تعب وجهد ومجهود مضني

وكل يغني بأه على ليلاه :lol:

بس بالنسبة ليا ..وانا باختار الاسم ...حسيت ان اللي عملته ده ...بداية ونهاية ...وكل الافكار اللي كتبتها الوقتي جت في دماغي ..وحتى هذة اللحظة انا ماعرفش هاكون تحت أي كاتجوري من دول ..لانه فعلا مهما اجتهدت واخدت بالاسباب فدة فعلم الغيب لسة ...بس اكيد هاتبقي واحدة من التلاته

المهم ..سيبكم من الانطباعات الوقتي لسة ماجاش وقتها

نبدا باسم الله العظيم الحلقة الاولي

الترتيبات والاجرائات

تذاكر الطيران كالعادة والسكن هو اول حاجتين بتفكر فيهم اول ماهتاخد التاشيرة

تذاكر الطيران ماتتعبش نفسك ..اكسيبديا فعلا هيا ارخص واوثق موقع لحجز الطيران

بس انا اختلفت اني اعرفت ارخص الاسعار منها وحجزت عند واحد صاحبي مدير شركة سفريات

الراجل قدام عنيا شال كل الارباح وادهاني بالسعر اللي بيتحاسبوا عليه هما مع الشركة الطيران ورغم كدة اكسبيديا كانت ارخص بخمسين ريال ازاي ماااااعرفش

حجزت على طيران الاتحاد لانها بصراحة كانت افضل برنامج قدامي

دمام – ابوظبي وبعدين ترانزيت 3 ساعات يعني تعتبر مافيش.. وبعدين دايركت تورونتو 15 ساعة

والاحلى من كدة انها كانت بتبدا من الفجر وتنتهي بتوقيت كندا الساعة 4.30 المغرب يعني الرحلة كلها في النهار ودي مفيدة لانها بتستغل اليوم وبتمنع عنك احساس الجيت لاج القاتل اللي جابلي تخلف عقلي وانا راجع

وانا راجع طالع 10 بالليل من كندا و 6 ساعات انتظار وصلت الفجر بردة بعد فجرين قبلها فاتهبلت بصراحة

مهم كمان اوي وانت بتختار الرحلة انك تختار معاد فاضي شوية لان لو الطيارة مليانه في رحلة طويلة دة احساس قاتل ...في حين طيارة فاضية هاتقوم وتروح تتفرش على أي 3 كراسي جنب بعض تريح ضهرك ..تتمشي ..تعملك أي منظر

بالنسبة لهدومك جوة الطيارة طبعا تعتمد على توقيت سفرك ..لو مسافر شتا ..يبقي هاتلبس ثيرمال وقميس او بلوفر خفيف ومعاك في شنطة على الطيارة بلوفر تاني تلبسة لما تنزل وجوة الشنط فرو دب والا حاجة وع الكوفية والجوانتي والايس كاب قبل ماتخرج تتلسع من البوابة

وحذاري تلبس شراب تخين لو مسافر دايركت علشان رجليك هاتورم من القعدة ومقاس رجلك هايبقي 90 عاوز جزمة تفصيل لا مؤاخذة

لو مسافر صيف يبقي عادي بقة كله محصل بعضة

..بدات الرحلة ظريفة ومافيش أي مشاكل وبعد ساعات طويلة وصلنا تورونتو بفضل الله ..قبل ما الطيارة توصل بساعة تقريبا وزعوا علينا ورق الجمارك

كل اسرة بتملا ورقة واحدة تتعهد فيها انك ماعكش حاجة ممنوع هاو زيادة عن الحد المطلوب زي اكتر من 10 الاف دولار او 200 سيجارة ا واو ليستة عبيطة كدة مالناش فيها

وبعدين نزلنا منها مشينا ورا الناس بتاع 10 دقائق لغاية ظباط الجوازات

ظابط الجوازات بياخد منك الباسبورات ويختمها وياخد منك ورقة الجوازات يختمها ويسالك الفلوس اللي معاك قد ايه

اوعي تقول اكتر من 10 حتى لو اسرتك مليون واحد

هو مابيسالش على فكرة انت المفروض تجيب كام والا الكلام دة خالص

بس فرضنا فرضا يعني انه سال

ببساطة مافيش مطار في الدنيا يسمح بسفر راكب معاه اكتر من 10 الاف دولار

وماتديش معلومات اكتر من كدة الا لو سالك

فرضنا جدلا سالك ولو اني متاكد مليون في المية انهم موش هايسالوا بس علشان اجاوب الاستفسارات اللي ممكن انتوا تفكروا فيها الوقتي ..طب وبقية المبلغ ..قوله معايا كريدت كارد فيها رصيد ببقية المبلغ وبس خلاص

الحكمة من كدة ان الكلام دة هايتسجل ..وساعة ماتقدم على قرض تعليمي اوساب او الاعانة الاجتماعية الويل فير هايخدوا المبلغ دة في الحسبان ويقل القرض بتاعك

واي مصاصة تجيبها في كندا تحتفظ بفاتورتها علشان لو سالك صرفت فلوسك فين يا حلاوة تقوله جبت بيهم بيبث وادي الفواتير يا اكسلانس

المهم الظابط هايسالك عندك عنوان في كندا ..تفقعه العنوان اللي معاك ..ويستحسن يكون معاك العنوان طابعه كمبيوتر على ورقة بيضا بخد كبير تفاديا للخطا وسهولة في الاستخدام ..هايفرحوا بالحركة دي قوي ..انا قالي ماتش ابريشياتد انك طبعتها كدة

وفي منتهي الذوق والادب والاخلاق العالية اللي ممكن اكتب عنها توبيك لوحدة في البلد دي هايديك الباسبور ويقولك ويلكم انتو كنا ويدلك على مكان ظابط الهجرة

المطار كله يفط تدل النيو اميجرانت يمشوا ازاي ..كانه شغال بس على الهجرة المطار دة ...هاتروح تقف في طوابير قدام ظابط الهجرة

كان عندي راجل هااااااااااااااااادي ورااااااااااااااااااايق خد مني الباسبورات والورقة المكربنة اياها وقعد يتكتك على الكمبيوتر بتاع 10 دقائق واداني الجزء بتاع الورقة اللي يخصني والباسبورات وطبعا طلب مني العنوان بردة وابتسم اويييييي والي ويلكم تو كندا قلته وعلبكم السلام ياخويا ورحمة الله وبركاته

وبعدبن مشيت ورا الاسهم بردة لغاية مكتب تاني خدوا اسامينا وادونا شنطة متحملة بروشورات وكاتالوجات وبلاوي زرقة مافتحتهاش لغاية دلوقتي J

بعدين نزلنا على الجمارك

دول بقة اللي ولا يعرفوا ابوهم ولا بيبتسموا ولا عنده يما ارحميني J

بس بصراحة مع النيو اميجرانت بردة منتهي الذوق

خد مني الباسبورات والبروف اوف لاندنج وورقة الجمارك بتاعة الطيارة

انا كنت مالي استمارة من على النت بتاعة البي 4 دي

قاللي بلها واشرب ميتها موش عاوزينها

وراح هو جاب استمارة من عنده كتب فيها كله تمام من غير مايبص في الشنط ولا يفتحها

وبعدين سالني هاتجيب حاجة تانية بعد كدة

قلتله انا كاتب عريضة على الكمبيوتر في ورقة بيضا

كاتبها بنظام الوصف (ايتم) والسعر التقريبي بالدولار الكندي

قاللي عظيم

بص فيها اوي وبعدين جمع المبلغ اللي فيها وكتبه عنده في الاستمارة وبعدين ختم على الورقة بتاعتي وادهاني تاني

وبعدين اديته صورة كنت مصورها لدهب مراتي كله

قاللي هو الدهب دة معاكم الوقتي ؟

قلتله اه

قاللي وريهوني

شافه وطابقة مع الصورة وقام لاطع الورقة الختم المتين وقالي تقدر تتفضل ومن غير ويلكم تو كندا

وانا كمان من غير السلام عليكم

بس وفجاة

فجاه

فجاه لقيت نفسي واقف في الشارع بره المطار ولاول مرة في حياتي

لاول مرة

اقعد 22 ساعة مادخنش

لاول مرة

هاولع سيجارة ..كنت خرمان مووووت

يتبع يا اخوانا

[znaty]

الحلقة التانية

خرجنا من المطار وشربت اول سيجلرة خليتني رجعتني مصر موش السعودية ..و رجليا اليمين لفت الشمال واشيل شنطة اوقع التانية ومسخره ..ومراتي قاعده بتضحك عليا

المهم

انا ماكنتش حاجز تاكسي او باص من الاكسبيديا ( بيسموه شاتل ) مع انه ارخص كتير ..بس اخدت بالنصيحة القائلة ان ممكن الحجز يروح عليا في حالة اني اتاخرت في الطلوع

كدة يتبقي خيارين

تاخد تاكسي او تستني باص

او تتصل بالفندق من بره المطار يدلك

انا استسهلت واخترت تاكسي

وقفت زي الشاطر تحت يافطة التاكسي ومستني

وناس كتير وقفة

كل ما ييجي تاكسي الاقي واحد اتخطاني من غير ما يتكلم ويهجم على التاكسي

لغاية ما جه راجل كبرة كدة محترم وقاللي شكلك جديد

قلتله اه لا مؤاخذة

قاللي طب اقف في الطابور

ودة اول درس اتعلمته في كندا

كل حاجة واي حاجة بطوابير ومن غير مزاحمة وبمنتهي النظام

اتاري الناس اللي واقفة متبعترة دي كلها على الرصيف واقفين طابور

كنت هاقع من طولي لما عرفت دوري فين

ايييلمهم

خت تاكسي لداون تاون

اي تاكسي في المطار سعره ثابت والبلد مافيهاش فصال

هما 50 دولار

وهنا نبدا عن اختيار الفندق

في اختيار الفندق باة ماتعتمدش على اكسبيديا

افضل موقع لاختيار الفنادق في العالم هو موقع : http://www.tripadvisor.com/

دي بصراحة نصيحة غالية للكوتش تو

وفيه كمان موقع مهم هو http://travel.yahoo.com/;_ylt=Aogb8hpMRC.DAZc5cmvWQQ8J8b8F

ياهو ترافيل من الاخر يعني

بس الاولاني اوقع

تريب ادفايزور هايرتبلك الفنادق صح وحسب رغابات

والنقط اللي تشوفها وانت بتختار

1- الموقع

موقع فندق دلتا تشيلز من الداون تاون بصراحة خلاني خلصت كل مشاويري الاساية قريبة وخطوات

بس اللي اكتشفته بعد كدة انها موش فارقة خالص وانا اللي خسرت باختياريفندق غالي حوالي 120 دولار في الليلة لانك ممكن توصل للي انت عاوزة بالساب واي وموش فارقة كتير

وبعدين مشاويرك كلها بتخلص في خلال يومين تلاتة وبعدين تقدر تنزل براحتك داون تاون مرة او اتنين كفاية

المهم جدا انك تختار فندق على بعد امتار من محطة ساب واي

والساب واي اصلا مقسم البلد بالتساوي من النص

خط رئيسي من الشمال الى الجنوب تحت شارع يانج اشهر شوارع تورونتو وكندا كلها

ولما يوصل للجنوب قرب بحيرة تونونتو يلف ويرجع تاني على هيئة حرف يو ويطلع للشمال تاني بس من سكة تانية

والمحطات قريبة جدا جدا من بعضها يعني موش هاتمشي كتير

والخط التاني الافقي ماسك من اقصي الشرق وسط سكاربروه المنطقة العربية هناك الى اقصي الغرب ودة ماشي تحت شارع بلور تاني اشهر الشوارع هناك وتقاطع الشارعين دول يعتبر بداية الداون تاون وانت نازل جنوبا

واقصي الغرب من قبل اخر محطة في خط بلور تبدا تركب الاوتوبيسات المتجهة الى ميساساجا والمناطق الغربية

شارع يانج دة مشهور لانه قاسم البلد شرق وغرب

يعني اي عنوان تبص فيه تلاقيه مثلا 25 شارع جيررارد غرب ..معناها تقاطع شارع يانج مع جيرراد ..اتجه غربا ودور على 25

في حين لو اتجهت شرقا هتلاقي بردة نفس الرقم 25 جيررارد بس شرق

كذلك مقسم البلد من حيث اسعار السكن ومستوي النضافة والمتعارف عليه انك كلما تجهت غربا كان افضل

ولو ان سكاربروه استثناء حاحكي عليه بالتفصيل فيما بعد

مع انها شرق بس مالهاش علاقة بيانج اوي وليا عندها وقفة طويلة بعدين بالتفصيل

لكن اللي مافيش اي اختلاف عليه

حذاري من داون تاون شرق يانج حذاري

الا اذا كنت لا مؤاخذة من الهلاسين في الارض :lol:

وحتى لو كنت هلاس

انت موش قد الناس دي بصراحة :lol:

خد بالك مع ان ميساساجا جميلة بردة بس بعيييييييييييييييدة جداااااااااا ولا انصح بيها في فترة الاستكشاف لانك هاتاخد وقت طويل علشان تنزل مشوار ترونتو من غير عربية فيها ساعتين وباصات وساب واي ودنيا

المهم نرجع للفندق

تاني حاجة تختارها بعد الموقع هو اراء الناس فيه

ودي هتلاقيه واضحة جدا في موقع تريب ادفايزور ولازم تاخدها في الحسبان

تالت حاجة هل بيحاسبك على التليفون المحلي والا لا ؟؟ انا اتبهدلت ..هو فري في اي حته انا حاسبني على دولارين الا ربع للمكالمة

والاهم منه النت

طبعا انتوا عارفين اللي حصللي في النت

بس المهم في النت موش المنتدي والايميل في الفترة دي

المهم هو انك لما تحب تدور على اقرب اي حاجة ليك زي مثلا سيرفيس اونتريو اللي بتعمل منها السوشيال نامبر ,او مثلا اقرب موقع علشان رخصة القيادة , او مثلا اقرب فرع لبنك تي دي كندا تراست او بنك نوفا سكوتشيا او بنك مونتريال او اي بنك هاتفتح فيه حسابك ,او مثلا بتدور على اقرب ووال مارت او زيلر ودول من ارخص المحلات واكثرها انتشارا وبيبيعوا من الابره للصاروخ هناك علشان تشتري هدوم تقيلة او تشتري اكل او اي حاجة , او مثلا بتدور على عنوان واحد صاحبك او مزار سياحي ,او بتدور على المكان اللي هاتقدم فيه على المعادلة او جامعه او او او

اول حاجة هاتعملها انك تعمل سيرش في النت او جوجل ايرث وتطلع العنوان بالكامل

ومنه تفتح الخريطة اللي معاك ودي هتلاقيها بسهولة هيا وخريطة الساب واي وخريطة مسارات الباصات وتحدد موقعه عليها وتبدا تعرف انت هاتركب ايه

يعني من غير نت هاتتبهدل

بصراحة اللي كان قايم بالموضوع ده عني اخويا طارق جمعه الله يجزيه خير

اخر حاجة لو سعادتك مبتلي بالتدخين تاخد بالك فيه غرف للمدخنين والا لا :lol:

لان مافيش اربع جدران في كندا مسموح فيها التدخين الا بعض الفنادق النادرة

واي نفس تسول لك نفسك شربه هاتتلطع 500 دولار غرامة

دي بلد في منتهي العنصرية ضد المدخنين

بعد ما تستقر على الفندق ..موقع تريب ادفايزور بيديك الفرصة انك تعمل تشيك على المواقع اللي بتدفع من خلالها وتحجز

زي اكسبيديا او هوتيل دوت كوم او غيرة وغيره

تشيك على كله

لان ممكن فندق تكون اكسبيديا ارخص حجز فيه وممكن فندق تاني يكون هوتيلز دوت كوم مثلا رخص

كله حسب الديل مع الفنادق المختلفة

ودور على العروض والخصومات الخاصة

مثلا انا كان عندي الديلوكس كنج في حالة حجز اكتر من 4 ليالي خصم 30 في المية تبقي شبه الاوضة العادية في السعر

وعايز نصيحتي بقة

انا مافيش حاجة خربت بيتي الا الفنادق دي

شوف اسعار الشقق وحدد عدد غرف مناسب وموقع مناسب من خلال مواقع التاجير اللي محطوطة في التوبيكات المثبته

حتى لو كان سعر الشقة قريب من الفندق خد الشقة

اولا هاتتعذب في الاكل جدا جدا

لما تدفعلك كل يوم 50 والا 60 دولار مطاعم وكمان مطاعمهم اكلها وحش ويجيلك فوبيا ياتري دي فيها بورك (خنزير ) والا لا ..والا معموله على صاج كان معمول مكانه خنزير ..والا محطوط فيها خمره ودي كيفهم هناك وموضوع الدبح الاسلامي ولو ان فيه اقاويل يعني هاتتعذب

وكمان المطاعم الحلال هناك حاجة بشعة ..لا تؤكل صراحة

لكن لو اشتريتوا الاكل وطبختم في البييت هاتوفر ما لا يقل عن 40 في المية من مصاريف الرحلة

طبعا انا باتكلم عن اللي بيعمل لاندنج ويرجع موش اللي هايستقر

لان موضوع الاستقرار من اول مرة دي عندي مبدا مرفوض بالذات بعد رحلتي

ولو انه ممكن يبقي في وجهة نظر البعض مضيعة للوقت بس لما نيجي للانطباعات هاتعرفوا السبب

الخلاصة

شقة موش فندق ...قريبة من محطة ساب واي ...في غرب يانج

خليتكم بالعافية

يتبع علشان قفعت النهاردة وموش حاسس بلوح الكتف الايمن

[znaty]

الحلقة التالتة

خلاص كدة يا اعزائي السفر والسكن

ومازلنا في مرحلة الاجرائات والترتيبات طبعا

اول حاجة هاتيجي في دماغك بعد الرحلة والسكن هو الكروت والاوراق

وخصوصا لو كنت مخطط للاندنج سريع لا يزيد عن اسبوعين

والمنطقي طالما هاتعمل لاندنج بس انك تعمله بسرعة لان كل يوم زيادة معناه فلوس زيادة والبلد دي غالية بشكل لا يطاق وبالذات طالما موش شغال فيها وبتحول من عملة ااقل زي الريال والجنيه الى عملة كبيرة زي الدولار

دة الى جانب ان الدولار هناك زي الجنيه والريال في عندنا ..لا وكمان يزيد عليه مجموعة من الضرائب القاتلة زي ضريبة الولاية وضريبة الدولة والخدمه والذي منه

بس للاسف بردة ماتقدرش تقل عن اسبوعين علشاتن تلحق تستلم وتفعل بعض الكروت زي الفيزا زتستلم السوشيال بالمرة

لكن لو ماعندكش عنوان امن او شاكك في كارت الاقامة يبقي هاتضطر تكملهم 5 اسابيع علشان تستلم البي ار في ايدك وتطمن ودة للاسف اللي انا ماعملتوش

عموما

يبقي بالترتيب كدة هاتفكر في :

1- السوشيال نامبر

2- حساب البنك والفيزا علشان تاريخك الائتماني يبدا بدري

3- خط تليفون موبايل

4- رخصة القيادة النظري

5- التعرف على خطوات المعادلة وزيارة الجهة المسئوله عن اعطاء رخصة مزاوله مهنتك

6- الهيلث انشورانس ودة للمقيمين موش للاندنج بس او في حالة انك عملت او عرفت تجيب عقد سكن 6 شهور

1- السوشيال نامبر دة بيتعمل من جهة اسمها سيرفيس اونتاريو .ودي موجودة في كل حتة يعني دور علي اقرب فرع ليها منك وروحلها

مثلا لو انت قريب من داون تاون هتلاقيها في السيتي هول في شارع كوين مع باي ...وبرده هتلاقيها في 777 شارع باي

لو انت قريب من سكاربروه هتلاقيها في سكاربوروه سيتي سنتر

وهكذا ..دور عهلى اقرب فرع

احنا روحنا اللي في سيتي هال ..خدنا رقم واستنينا دورنا

بعدبن كل واحد مننا بيروح لوحدة على موظف موش مع بعض

بيفتح الفايل بتاعك على الكمبيوتر ويسالك شوية اسئلة من ملفك زي تاريخ ميلادك واسم والدتك وحاجات زي كدة

الورق المطلوب هو باسبورك والبروف اوف لاندنج بس

وبعدين بياخد منك عنوان المراسلات

ويطبعلك السوشيال بتاعك في ورقة مؤقته علشان تمشي حالك علبال مايجيلك على البريد

الكارت نفسه بيجيلك في خلال 10 ايام من اليوم دة

الرقم دة في منتهي الخطورة

هو زي بصمة صابعك كدة او توقيعك هناك

ممكن اي حد يعرفة ويعرف اسمك ينصب بيه ويوقفلك حالك وتبقي مسجل خطر :closedeyes:

ولا تعرف تبيع ولا تشتري ولا تشتغل ولا تعيش اصلا

فيه عصابات بتشتريه ب 5000 دولار علشان تنصب بيه

لذلك الكارت دة او الورقة ماتمشيش بيها ..تعينها في حته امينة وتحفظ الرقم دة في مخك

الرقم ضروري علشان تفتح حساب في البنك وتعمل فيزا كارد

2- الفيزا كارد

طبعا لازم تفتح حساب في البنك الاول

افضل البنوك هناك من حيث السمعه والخدمات هو تي دي كندا تراست ..وبالمناسبة هو تاني افضل بنك في امريكا حاليا

فروعه منتشرة جدا و الماشين بتاعته في كل حته

الحسابات انواع مختلفة

اللي تاخد بالك منه هو الرسوم اللي بتتحط على العمليات البنكية والرسوم الشهرية للحد الادني لو حسابك قل عن المبلغ دة

كل ما يقل الحد الادني تزيد الرسوم على العمليات

في حساب يخصم عليك لو قل حسابك عن 2000 دولار

وفيه 3000 دولار وكله يتوقف على رسوم باقي العمليات

انا بالنسبة ليا فضلت حساب اسمه انفنيتي ( شيكنج اكاونت يعني جاري عندنا )بيخصم لو حسابك اقل من 3000 دولار 12 دولار شهريا بس كل العمليات تقريبا فري

وبيديك عليه وانت واقف مجموعة شيكات بتنفعك طبعا لما تدفع ايجار شقة لو كنت هاتقيم

واخترت انه يكون بيبرليس يعني مافيش كشف حساب يتبعت بالبريد لان انا موش مقيم حاليا

واستلمنا كارت الايه تي ام واحنا واقفين مافيش مشاكل

لكن علشان تعمل فيزا وانت مالكش كريدت ولا تاريخ ولا عمل في كندا يعتبر مستحيل طب ايه الحل ؟؟؟

الحل في حاجة اسمها سيكيور فيزا

السيكيور فيزا دي يعني انت بتحط وديعة قيمتها 500 او الف دولار وديعة في حساب اسمه سايفنج اكاونت يطلعلك على اساسه الفيزا بنفس الحد الئتماني للمبلغ اللي هاتحطه

وبكدة يبدا تاريخك الائتماني في كندا اول ماتشتري اي حاجة بيها

بس اوعي تشتري وتنسي تسدد

اشتري وسدد فورا بدون تاخير

المهم انك تعمل حركة في الفيزا تفيدك بعد كدة في تاريخك الائتماني

الفيزا دي بتاخد حوالي 10 ايام او 12 يوم علبال ماتروح تستلمها وتفعلها عندهم علشان كدة قلت ماتخليش الرحلة اقصر من اسبوعين

كمان فتحت حساب بالدولار الامريكي علشان في حالة حبيت اعمل تحويلات من برة هاتبقي بالدولار الامريكي فلو حلولت انا على حساب كندي هايتحول فورا على كندي بالسعر الحالي

والدولار الكندي متعفرت يوم فوق ويوم تحت

فادي لنفسك وقت تعرف تحول امتي بينهم

كدة خلاص سوشيال وفيزا نخش في الرخصة

الموضوع دة قتل بحثا قبل كدة لذلك موش هاطول فيه

اقرب فرع ليا كان في مبني حكومي في 777 باي ستريت

هناك اشتريت الكتاب ب 16 دولار

بس قلت اذاكر الاول وبعدين ااقدم بس للاسف مالقيتش وقت

الكتاب دة لازم يتذاكر كلمة كلمة

وفايدة الرخصة في الوقت دة انه بتستخد ك اي دي

احيانا بعض الجهات زي الشغل بيطلب اتنين اي دي

ساعتها الرخصة هاتفيد جدا

الامتحان النظري سهل جدا في حالة انك ذاكرت الكتاب غير كدة لا

لان في اسئلة احنا ماتعودناش عليها

زي نسبة الكحول المسموحة في انواع الرخص المختلفة

مثلا المسافة اللي ماتقدرش تركن فيها جنب حنفية الحريق ومداخل العمارات وعند المزلاقانات

المسافة الي لازم تقف عندها لما تشوف اتوبيس مدارس او ستريت كار اللي هو الترماي عندنا

كدة يعني فلازم تقرا الكتاب من الجلدة للجلدة

تمن الامتحان 175 دولار

والرخصة بتجيلك على البريد بعد 20 يوم بس ساعتها بتاخد ورقة اثبات انك نجحت فيها

بعديه زي مانتوا عارفين امتحان السواقة جي 2 و جي بعدها

لو معاك رخصة من بلدك او بلد تاني هايديك عليها سنة خبرة ولو جبت شهادة خبرة من المرور هايديك سنة كمان وكدة تقدر تخش الجي علطول موش محتاج جي 1

بس هما حاليا موقفين كل الامتحان العملية من 4 شهور بسبب اضراب الممتحنين

يتبع يا اخوانا ان شاء الله

تم تعديل 9 ديسمبر 2009 بواسطة znaty

[znaty]

بص يا زناتي يا حبيبي...

كلامك بالنسبة للداون تاون سليم تماماً... الويست أنضف ميت مرة ، وإن كانت منطقة تشاينا تاون مش قد كده الصراحة ، رغم إنها في الويست.

ولو طلعت شمالاً شوية (الميد تاون) ، الحتى اللي ساكن فيها (يانج مع إجلنتون) ، أو (يانج مع لورانس) ، فهتلاقي إن الإيست أنضف بكتير من الويست.

كل منطقة وليها نظام.

إلاّ صحيح يا زناتي... أنا قعدت ألف في الإيست لما الجزم اتهرت... ما شفتش أي هلس! إنتا بتجيب الكلام ده منين؟!

يمكن محتاج أغيّر النضارة؟! :blink:

:lol: :lol: :lol:

ااقولك ايه يا تو بس ؟؟؟ربنا موش كاتبهالك يا زعامة

بص انا شخصيا ماشفتش كدة خالص بالمعني المفهوم

بس انا قريت الكلام دة في كتاب عندي في البيت ضخم كدة اسمه كندا كنت جبته من مكتبة جرير

ومحدد مربع معين بين 4 شوارع شرق يانج في منطقة الدوان تاون

لو مهتم اوي يعني ممكن ااقولهولك علشان ربنا يوفقك وتشوف :)

شارع لورنس واجلنتون دول انا سقت فيهم العربية من غربهم لشرقهم يا زعيم تحفة الاتنين

ولونس في سكاربروه نضيف جدا ومليان مطاعم حلال لبناني تحفة صراحة

لورانس في سكاربروه تحس انك موش في غربة حقيقي

[ehabtaher]

ايه رايك انزلك الكتاب بتاع ارشادات المرور فى كندا

علشان كل القهاوى بتاعتك تكون مفيده زى القهوه بتاعه الايلتس

شوف الرابط ده

http:///jbyatv9/Driver_s%20Handbook.rar

http:///jbyatv9

الكتاب ده متجمع من الرابط اللى انت وضعته

يارب تكون الهديه عجبتك

[adamdec]

وتاني حاجة هو انت ليه بتروح تسدد لو اشتريت بالكريديت كارد ما انت دافعه مسبقا

وهل الوديعة بتسيبها وانت مسافر ولا بتاخدها والكارت .....

انا حرد على الجزء ده لأن انا قعدت كتير على ما فهمته

باختصار شديد الكريديت كارد مش بيسحب من الحساب, ده بيسحب بضمان الحساب, كأنك مستلف من البنك. يعنى لو دفعت حاجة ب10 دولار يبقى انت مديون للبنك بعشرة و لو عديت فترة السماح بتدفع زيادة.

اما التانى ده بقى اسمه debit card , ده بيسحب من الحساب على طول و ده برده لازم تسدده لأن لو الحساب قل عن المنيمم 3000 دولار مثلا برده بتدفع غرامة.

و لو فيه حد عايز يصلح على الى انا قولته يتفضل لأنى برده لسة بتلخبط فالمو ضوع ده.

تم تعديل 9 ديسمبر 2009 بواسطة adamdec

[د هشام ابراهيم]

كلام كبير قوي يا معلم زناتي ...بارك الله فيك و جزاك كل خير

علي فكرة المعلومة بتاعة غرب يانج مقارنة بشرق يانج صحيحة ١٠٠ ٪ كل الأحصائيات بتاعة مستوي المعيشة بما فيها متوسط الدخل و معدلات الجريمة إلخ أفضل غربا عنها شرقا ...ما يمنعش إن فيه مناطق في الشرق أحسن من مناطق في الغرب انما الكلام علي العموم

يمكن اللي نطلع بيه من القصة ديه كلها إن الواحد لازم يشوف و يعاين بنفسه قبل ما يأجر أو يشتري عقار .....أرض الواقع حاجة و معلومات من نت أو كتب حاجة تانية

متابعين مهللين شاكرين :)

[znaty]

مساء الفل يا عمنا.....

احنا كده قاعدين اخر سلطنة على القهوة...........

مش ناقصنا غير حبة سكر على المشاريب................

يعني مثلا هل الواحد ممكن يسوق بالنظري بس.............

وتاني حاجة هو انت ليه بتروح تسدد لو اشتريت بالكريديت كارد ما انت دافعه مسبقا

وهل الوديعة بتسيبها وانت مسافر ولا بتاخدها والكارت .....

عزيزي منجي

اتفضل السكر برة اهو

النظري تسوق بيه لو راكب جنبك في الكرسي اللي جنبك واحد تاني معاه رخصة جي كاملة ...ومافيش غيركم في العربية

لازم جي 1 على الاقل علشان تسوق

بس انت عندك 3 شهور تسوق برخصتك او رخصة دولية

حساب السايفنج اللي انت حاطط فيه 500 او 1000 دولار عندهم ده ضمان فقط

لكن انت مابتسحبش منه

انت بتسحب من الكريدت وبتسدد فيها

طبعا الكريدت الكاملة ممكن مايكونش عندك ولا مليم في الحساب وبتسحب من الكريدت الاف مؤلفة

لكن الحساب بيتسحب منه بكارت الايه تي ام ( الصراف ) العادي

والتفسير اللي قالته ام ادم سليم ميه في الميه

لا الوديعة بتسيبها طبعا في حساب السيفنج علشان تفضل البطاقة شغالة

بس ماحدش هايمنعك لو سحبتها

الحلو في حساب السيفنج دة انه مافيش عليه ضرائب ولذلك ماتقدرش تحط فيه اكتر من 5000 دولار

لو حسيت ان انا نسيت معلومات او في حاجة محتاجة توضيح ياريت تقوللي علطول يا صديقي :)

[znaty]

موقع سيرفيس اونتاريو بتاع السوشيال :

http://www.ontario.ca/en/residents/index.htm

موقع الرخصة والهاند بوك

http://www.mto.gov.on.ca/english/dandv/dri...tion1.0.0.shtml

موقع تي دي كندا تراست بنك

http://www.tdcanadatrust.com/

موقع بينيفت دة هايديك معلومات مهمة عن القروض والاعانات والمساعدات الاخري اللي بتبقي من حقك لما تبقي مقيم دائم لكندا

http://www.canadabenefits.gc.ca/faechome.jsp?lang=en

ودة موقع مهم جدا في الايام الاولي

http://www.settlement.org/index.asp

نسيت اضيف الموقع دة مهم جداااااااااا

دة اهداء من الدكتورة سوسو راني

جرب نفسك كدة في امتحان النظري بتاع القياده منه

http://www.yd.com/legacy/YoungDrivers/default.asp?page_id=24

[znaty]

والله العظيم انتوا نفسكم لو جربتم اكل المطاعم هناك يومين هاتقولوا نفسنا نطبخ :lol:

هو فيه عدو المطبخ اكتر من مراتي ؟؟ورغم كدة كانت بتحلم باليوم اللي تطبخ فيه ونرجع ناكل زي الناس

نشفنا والله :happy:

المعلم الكبير زناتي باشا .... الصراحة ديه غلطتي ....كان مفروض اوريك المطاعم الحلوة اللي في تورنتو ....يا راجل ده الداون تاون بالذات ملغم مطاعم و الأكل فيها رهيب .....غير المطاعم الأثنية بقي ..... عربي و هندي و فارسي و أفغاني و تركي .....و لو ليك في السي فود يبقى كمان صيني و جريكي .....فيه سلسلة مطاعم كمان اسمها Red lobster و ديه موجودة في كل حتة .....جمبري و أستاكوزا و كابوريا و محار و لو عايز كمان سمك ....... الكائنات البحرية بتاعة المحيط حاجات تانية خالص غير بتاعة البحور ....... تتعوض إن شاء الله smk:

يا باشا انت عارف طبعا ان ريد لوبستر لازق جنب الفندق في شارع باي الناصية اللي بعد الفندق ..بعد ايج سمارت علطول

اتغديت فيه مرتين

المرة التانية قبل ماطلع على المطار على طول يعني اخر وجبة في كندا

بصراحة هو انضف مطعم كلت فيه هناك وفاتورته معقولة بصراحة

الاولانية بتاع 95 دولار والتانية حوالي 90

بس صعب بصراحة انك تصرف لك علة المنوال دة من 2000 الى 2500 دولار في الشهر مطاعم :sad:) وخصوصا انها لاندنج طياري

بس اكيد كان فيه مطاعم حلوة ومالحقتش اروحها

ولو ان المرة التانية كنت طالب طبق مكس كدة جابلي فيه سلمون مسكر كدة وجمبري بالكوكونت مسكر بردة كنت هاجيب اللي بطني :blink:

جربت عنده الاستاكوزا اول مرة تحفة ..وطبعا الكابوريا الكنج رجليها طولي كدة حاجة تخض تحفة بردة ..يام يام :sad:

وعلى فكرة ايج سمارت دة احلى حته تفطر فيها في وسط البلد سعادتك على ضمانتي

[znaty]

الحلقة الرابعة

اخواني الاعزاء

قررت افرد للحتة دي حلقة لواحدها لاهميتها القصوي وخصوصا لو هاتعمل لاندنج سريع زي حالاتي

طبعا كلنا عارفين اهمية كارت البي ار ..من غيره ماتقدرش تخش كندا تاني

الا اذا قدمت على ترافيل دوكيمنت ودي موالها طويل وس و ج وسافرت ليه وكنت بتعمل ايه بره وهاتلي اثباتات ويا تيجي يا ماتجيش

لذلك مهم جدا انك تتاكد انك مقدم الصور والاسم والعنوان في منتهي الدقة والا الكارت موش هيوصل في موعده بعد 5 اسابيع

وفي الحالة دي لازم تكون انت شخصيا في كندا علشان تقدر تتصل بيهم من داخل كندا وتعرف ايه المشكلة علشان تحلها

وماحدش يقدر يتصل بالنيابة عنك اطلاقا لانه بيتحقق من شخصية المتصل من خلال اسئلة كتيرة وكمان المكالمة بتتسجل وبتفضل ريكورد عليك ليوم الدين موش الجنسية بس

نبدا بالعنوان

بصراحة انا كنت ناوي اني اديهم عنوان صديقي طارق وكنا انا وهو متفقين على كدة والموضوع منتهي

المهم سبحان الله قبل مانزل من البيت في السعودية بكام ساعة كدة اتصلت على طارق علشان اتاكد من حرف الاريا كود هل هو ال والا اي ؟؟:)

ونظرا لان طارق كان لسة هاينقل على العنوان دة بعد اسبوع وقلبه كله ليكون واخد العنوان غلط قال لما اتصل بصاحب البيت اتاكد بدل ما يحصل غلط

الراجل صدمه وقاله اسف مافيش جوابات تيجي على صندوق البريد دة الا اللي ساكنين فيه والا هارجعها تاني للبريد

طارق اتجنن واتخانق مع الراجل وكانت هاتوصل لحد انه يسيب البيت دة اصلا

وماكنش ناوي يقوللي على اساس اني لما اجي نرتب الموضوع ونتصل تاني بالسي اي سي نغير العنوان لما نلاقي عنوان تاني

وبعدين قلق لتحصل مشكلة وكلمني قاللي ودة قبل سفري بساعتين بس اثناء ماتش الجزائر الحزين

طبعا انا دماغي باظت وبدات اتصل باصحابي وبداو هما كمان يتصرفوا حتى ولو جت على حسابهم هما

المهم طارق برده هو اللي حلها في ربع ساعة وما هداش الا لما جاب لي عنوان تاني

عنوان محامي سمسار هناك

لبناني بتاع كله ..بيبيع ارضي وشقق وبيوت وشرابات وفانلات وفلايات وبياجر صندوق البريد بتاعة ب 100 دولار في الشهر

انا استخرت الله وقلت ماشي ..هو راجل امين وبتاع بيزنس فما فيش قلق منه

واللبنانيين بصفة عامة في البيزنس حلوين وبيحترموا كلمتهم

عموما لو حد فيكم اتزنق في عنوان وعايزه يبعتلي على الخاص وانا ابعت للمحامي دة اقوله واديلكم عنوانه وتليفونه وايميله ترتبوا معاه

كدة موضوع العنوان اتحل خلاص

يتبقي الخوف من الصورة

لما زرت طارق وانتوا عارفين ان طارق البي ار بتاعة رجع برده بسبب الصورة

شفت الصورة بتاعته اللي اترفضت لقيتها نسخة طبق الاصل من الصورة اللي انا مقدمها في ورقي

خدوا بالكم بقة من اللي جاي

بالرغم انك ممكن تكون مقدم الصورة بنفس المواصفات المطلوبة اللي هيا :

1- المقاس 45 في 35

2 - وشك متسنتر في النص ومن غير نضارة او ابتسامة

3 - خلفية بيضا والوان طبيعية

4- كتافك باينة من الناحيتين

5- المسافة من طرطوفة شعرك لغاية طرطوفة دقنك من 25 مم الى 35 مم

بالرغم انك ممكن تكون عامل كل المواصفات دي معمولة الا ان ممكن الصورة تترفض بسبب حجم الوش

للاسف احنا بنشدد على المواصفات ونظرا لان حجم الوش موش واضح مواصفاته فالصورة يطلع فيها حجم وشك مبطرخ كدة :)

لو انت شفت كارت بي ار ..هتلاقي ان المساحة المخصصة للصورة فيه صغيرة جدا وتحتها التوقيع بتاعك

لو هما قصقصوا الصورة وانت موش عامل حساب كدة يبقي هايطيرولك رقبة والا كتف

فبيرفضوا الصورة

فلازم تتاكد ان وشك في الصورة صغير ما يكفي انه ينفع يتحط بالسكال الطبيعي دوة الكارت

انا طبعا شفت الفرق بين الصورة اللي اتقبلت عند طارق والصورة بتاعتي جالي ارتكاريا

الاجراء الطبيعي والمقبول عند السي اي سي انك بعد 5 اسابيع لو الكارت ماوصلكش انك تتصل بيهم بالرقم اللي من داخل كندا دة وتسالهم الكارت ماجاش ا اخوانا

يتحققوا من شخصيتك كالعادة

وبعدين يقولولك عندك غلط في الصورة روح اتصور تاني وقدم الصور في فرع السي اي سي في تورونتو

طبعا انا مسافر بعد اسبوع ومعنديش وقت للكلام دة

واتباعا لنصيحة طارق عملت اللي هو عمله بس من غير اتصال كحركة استباقية

المكان الوحيد في تورونتو اللي مسئول عن عملية التصحيح دة موجود في

25 شارع سانت كلير شرق

يعني شرق يانج

بتركب الساب واي اللي ماشي تحت شارع يانج

وتنزل محطة سانت كلير

وتشوق شرق شارع يانج تمشي خطوتين تلاقي المبني الحكومي المهيب بتاع الهجرة رقم 25

في نفس المبني على الناصية التانية في بنك ..خش البنك دة هتلاقي سلك ينزلك لمول ..فيه في وشك محل تصوير معتمد عندهم بيصور الصورة الي عاوزينها بالظبط

نزلت عنده وريته الصور قاللي طبعا مرفوضة وشك فيها كبير وغير طبيعي

قلتله صورني

فصورني صورتين ب 13 دولار ولازم الصور تتختم بالتاريخ من وراها

خدت الصور وانا بجرجر رجليا وطلعتلهم

الاستقبال قالتلي بعد صعوبة علبال ما شرحتلها انا عاوز ايه

اديني البروف اوف لاندنج

بصت في الكمبيوتر وقالتلي بس مافيش اي حاجة عندنا بتقول ان فيه حاجة غلط عندك في الصورة

قلتلها اكيد علشان انا لسة عامل لاندنج من اسبوع مالحقوش

قالتلي انت كلمتهم

طبعا كل كلمة بتتسجل عليك

قلتلها الصراحة لا بس انا متاكد

قالتلي بص

انا هاديك رقم وانت احكي حكايتك للاوفيسر

المهم خدنا رقم وقعدنا نتفرج على الناس

بتاع ساعتين كدة واحنا بس بنراقب

وشوش ومهاجرين من كل صوب وحدب

لخصنا الاوفيسرز لاتنين عاديين واتنين زي السكر وواحدة تقطع الخميرة من البيت

الاتين العسل واحده افريقية وواحدة صينية

والاتنين العاديين واحدة هندية وواحد عرق اوروبي

والمصيبة السودة الاخيرة عرق اوروبي وعجوزة وموش طايقة نفسها والا الناس

مافيش واحد مشي ورقه معاها ابدا ..زتقعد تزعق وتصيح وتديله محاضرة لما يزهق ويقفل الملف بتاعة ويمشي يرغي ويزبد

وانا ومراتي قاعدين نتابع الارقام بقلق ونتابع حركة الناس ولوحة الارقام ونقول يارب مانقع في قرعتها الهباب

لغاية ما جه الرقم اللي قبلنا

زكل الموظفين عندهم ناس الا المصيبة دي

وخلاص مراتي اتشاهدت وايقنا انها هاتدوس على الدور وهاتاكلنا احياء

فجأة قامت ودخلت مكتب تاني جوا

تخيلوا اللحظات الرهيبة واحننا عنينا بتدور على الموظفين التانيين وعنينا التاينة على المكتب اللي دخلت فيه البومة دي

وانا خدت نفس عميق وباحاول ارتب في مخي ايه اللي هاقوله ليها علشان تعدي الموضوع ومراتي لسة بتتشاهد

المهم ربنا كرمن وقبل ما البومة ترجع عشها بلحظات ..الافريقية العسل مشي اللي عندها وداست على الدور

طرنا عليها زي السهم ..نقع ونقو م ونخبط في الناس وموش عاوزين نبص ورانا لحسن نلاقي البومة طايرة ورانا ونازلة بمخالبها على قفانا

على فيييييين يا حلوييييييييييين ..ولا ترشق بمقشات الساحرين في نص راسي

المهم وقفنا قدام الاوفيسر الافريقية وحكينا الحكاية

قالت نفس الكلام

قلتلها انا راضي ذمتك

ادي الصورة الصح

وادي الصورة اللي في الملف

صرخت اوووه ماييي جااااد

ايه اللي عمل فيكم كدة؟؟

قلنالها المصوراتي السعودي يا طنط واحنا بنعيط

قالتلنا بس انا ماقدرش اعمل اي حاجة الا لما يجي ليكم ريد ليتر او تتصلوا بيهم في السي اي سي ويقولوا صوركم غلط

قلتلها دة هاياخد وقت كبير ونعيد الكرة تاني فانا قلت اوقر وقت من دلوقتي

فكرت شوية وبعدين قالتلي بس انتوا عرفتوا منين اصلا ان صوركم غلط ؟؟

قلتلها كل اصحابنا اللي اتصوروا عند الراجل دة صورهم اترفضت :)

قالتلنا هو مافيش غيره في البلد والا ايه ؟

قلتلها اه ..زهاننزل كلنا نقتله

ريفينج از مااااااين

المهم قالتلي هو احنا عمرنا ماعملنا كدة قبل كدة بس انا هاعملهولكم

وملت استمارتين وخدت مننا الصور وصورت الباسبورات والبروف اوف لاندنج وسلمت علينا وشكرناها ومشينا

بصراحة هيا خطوة في غاية الاهمية

بس لغاية دلوقتي انا مرعوب وموش عارف اذا كان الموضوع هايمشي بالشكل دة والا لا

بس ماكنش عندي طريقة تانية اطلاقا ولا يمكن اني اسافر من غير كدة ولا يمكن برده اني اطول الاجازة عن كدة

ادعولي يا اخوانا انها تمشي وربنا يستر يارب

والفضل لله وحده ثم اخويا طارق اللي لفت انتباهي

بكدة اعتقد ان معظم ملاحظاتي على الاوراق تعتبر خلصت

لسة التامين الصحي ودة انا ماعملتوش لسببين

الاول ان لازم يكون معايا عقد سكن لمدة 6 شهور والكارت بيوصل برضة بعد 3 شهور

الثاني انك لو مسافر بره كندا اكتر من 6 شهور لازم تسلم الكارت دة والا تعتبر مخالف القوانين

وموضوع المعادلة دة يختلف من شخص لشخص حسب شهادته واجرائاته

بالنسبة للمهندسين ماعنديش اي جديد اكتر من اللي وضحه استاذنا المهندس ياسر في توبيك المهندسون في اونتاريو

اصلا هو اللي نصحني اعمل ايه

عموما انا حاحكيلك انا عملت ايه لان دة كان اخر يوم في الرحلة

اشوفكم على خير

[znaty]

فيه اقتراح مش عارف اذا كان واقعى ولا لا...

حتى لو لا قدر الله مقدرتش تنزل كندا, و لازم انك تكلمهم من تليفون فى كندا... ممكن تربط حساب السكاى بى بتليفون محمول من بتوع حد من صحابك... و لما تيجى تتكلم من الحساب بتاع السكاى بى, هيبان كأنك بتتكلم من رقم التليفون ده...

أتمنى ان الفكرة تكون واضحة..

لا الاحلى منها بقة ومجربة قبل كدة

انك تتصل بوزارة الخارجية الكندية وتطلب منهم يحولوك على سي اي سي في نوفا سكوتشيا

كدة هما هايحولوك داخلي زي الفل

بس موش هيا دي المشكلة

المشكلة هيا لا قدر الله لو فيه مشكلة

لازم تروح هناك الفرع بتاع سانت كلير بنفسك

ربنا يستر

تم تعديل 10 ديسمبر 2009 بواسطة znaty

[znaty]

http://www.cic.gc.ca/ENGLISH/information/a...ides/5445EB.asp

ده الينك بتاع مقاس الصورة بالضبط بتاع الprكارد,ممكن تطبعوا المقاسات وتدوها للمصوراتي,أنا طبعتها واديتها للمصوراتي الهندي اللي هنا في الشارقة و اولتلو Same Sameهذا الشكل مع هزة خفيفة للرأس,والحمد لله فهم "وده طبعا شيء نادر,إخواني الي في الخليج فاهمني طبعا",وطبعم مضبوطين

ماهو كلنا يا صاحبي بناخد نفس الورقة للمصوراتي وبتطلع نفس المواصفات

ودة اللي انا حاولت اركز عليه وانا باحكي النقطة دي

ممكن تكون الصورة طبقا للمواصفات بس حجم وشك طالع عريض ..مبطط يعني ؟؟مايجيش في مكان البي ار فيرفضوها

اتاكد ان وشك طبيعي موش عامل عليه زوم ان

[znaty]

واضح إن القلقاس بقى مطلب شعبى فى المنتدى وأى حد ناوى يعمل لاندنج بيفكر فى القلقاس ويفتكرنى...

أنا خايفة يسمونى سوسورانى قلقاس :sad:

بس إحنا عايزين نبتدى نلم إشتراكات عشان جمعية السيدات المتوحشات...

وإتاوة على كل واحدة تجيب معاها على كافبه..

أو ربع كيلو بن محوج..

صافى عشان هتبقى شايلة لستة كبيرة عشانى

هنعينها مديرة تنفيذية..

لأ ...لأ ...مافيش إعتراضات..

دى منتهى الديموقراطية...

ما أنا لما أعدل مزاجى هاقدر أسعدكم :lol:

تحياتى

سوسورانى

:lol: lmo:

طول عمري اسمع عن ملكة الفراولة في اسماعيلية جنبنا

اول مرة اعرف ان فيه في كندا مسابقة ملكة القلقاااس

انا جبتلك شبهة يا دكتورة سوسو

[znaty]

أنا معاكم يا د/سوسو و يا د/صفاء و مدام زيزى و ما فيش مشكلة أنا باجيب القلقاس و البن المحوج معايا وخاصة إن العميد فتح فرع له بالرياض إمتى حنبتدى مزاولة النشاط و حنبدأ بمين؟

يا باشمهندس زناتى متهيأ لى تنزل بالحلقة الخامسة وإلا !!!!!!!!

مدام زيزي ميييييييييييين ؟؟؟ :lol: :sad:

الا المصيبة لمراتي تفتكر اني ماتجوز من وراها والا حاجة ؟؟؟

انا مراتي ماسمهاش زيزي )))

المعلش يا صديقي العزيز رامي ويا اخت بنت مصر ويا اخت اسكندرانية بقالنا يومين مسافرين خميس وجمعه زيارات اصدقاء علشان كنا في العيد بره

والنهاردة ماعرفش ليه طبقنا يومين من غير نوم ولسة صاحي ولازم اروح المكتب

بالليل ان شاء الله نمخمخ في الخماسة واسف جدا على التاخير

[znaty]

كدة خلاص سوشيال وفيزا نخش في الرخصة

الموضوع دة قتل بحثا قبل كدة لذلك موش هاطول فيه

اقرب فرع ليا كان في مبني حكومي في 777 باي ستريت

هناك اشتريت الكتاب ب 16 دولار

بس قلت اذاكر الاول وبعدين ااقدم بس للاسف مالقيتش وقت

الكتاب دة لازم يتذاكر كلمة كلمة

وفايدة الرخصة في الوقت دة انه بتستخد ك اي دي

احيانا بعض الجهات زي الشغل بيطلب اتنين اي دي

ساعتها الرخصة هاتفيد جدا

الامتحان النظري سهل جدا في حالة انك ذاكرت الكتاب غير كدة لا

لان في اسئلة احنا ماتعودناش عليها

زي نسبة الكحول المسموحة في انواع الرخص المختلفة

مثلا المسافة اللي ماتقدرش تركن فيها جنب حنفية الحريق ومداخل العمارات وعند المزلاقانات

المسافة الي لازم تقف عندها لما تشوف اتوبيس مدارس او ستريت كار اللي هو الترماي عندنا

كدة يعني فلازم تقرا الكتاب من الجلدة للجلدة

تمن الامتحان 175 دولار

والرخصة بتجيلك على البريد بعد 20 يوم بس ساعتها بتاخد ورقة اثبات انك نجحت فيها

بعديه زي مانتوا عارفين امتحان السواقة جي 2 و جي بعدها

لو معاك رخصة من بلدك او بلد تاني هايديك عليها سنة خبرة ولو جبت شهادة خبرة من المرور هايديك سنة كمان وكدة تقدر تخش الجي علطول موش محتاج جي 1

بس هما حاليا موقفين كل الامتحان العملية من 4 شهور بسبب اضراب الممتحنين

يتبع يا اخوانا ان شاء الله

بسيطة يا صديقي

لو كنت في مصر او في الخليج..هاتروح ادارة المرور اللي طالعة منها رخصتك وتطلب كشف تفصيلي بتاريخ الرخصة بتاعتك

بيطلعلك ورقة كدة رسمية فيها بياناتك وتاريخ ماخدت الرخصة ولو عندك ملاحظات حصلت اثناء تاريخ قيادتك ( موش مخالفات ..زي وقف او سجن او كدة بس ) ولو في مصر بتتختم من المرور ولو في السعودية مابتتختمش زخلاص

وماتترجمهاش في بلدك

اي ترجمه خارج كندا غير معترف بيها ..فلوس على الفاضي

لازم تترجم داخل كندا من مترجم معتمد عندهم وهانيجي بالتفصيل للمرحلة دي بعدين

اخونا المهندس زناتى...

انت قلت لو جبت شهاده خبره من المرور تدخل على اختبار الطريق على طول....تقصد ايه بشهاده خبره من المرور؟

واحنا كمان فى انتظار الحلقة الخامسة........وبالنسبة لموضوع المعادلة هل ممكن تبدا فيه قبل اللاندنج؟؟؟وازاى؟؟؟

تحياتى

[znaty]

الحلقة الخامسة

مقتطفات من الرحلة

طبعا بعد ما تقريبا انتهت مرحلة الورق والكروت ..وفي انتظار جني المحصول ولم الكروت ..هاتبدا دماغك تدريجيا تتجه لاكتشاف البلد

1- من الناحية السياحية

2- احنا فين ؟؟..لانك حاتحن بعد لما تقعد كام يوم ماتشوفش ولا تسمع غير اجانب هاتبدا تدور اومال احنا موش باينين ليه ؟:danger:

3- تبدا تجس نبض الشغل والحياة العملية هناك شكلها ايه بالظبط

هاتستسهل طبعا وخصوصا انك لسة جاي ومعاك فلوس وعاوز تشوف الحاجات الحلوة الاول وتبدا تدور على الاماكن الحلوة والفسح

ودة اللي احنا عملناه وهابدا احكي بنفس التسلسل

ولما نقول فسح ..يبقي شلالات نياجرا

اول يوم بعد ماخلص الورق

فايدة الفنادق النضيفة بصراحة هو تنظيم الرحلات اللي زي دي

سعرها بيبقي معقول وشاملة وجبة فاخرة ودليل سياحي مابيبطلش رغي من اول وسط البلد لغاية الرجوع

كلفتنا حوالي 240 دولار احنا الاتنين

طبعا دة يعتبر رخيص

اتوبيس نضيف موش شايل هم حاجة وغداء فاخر وبروجرام مليان الصراحة من 8 الصبح الى 8 بالليل

ولو هاتحجز الرحلة من فندق خليك في الويك ايند

عندنا بيستغلوا الويك ايند ويضاعفوا الاسعار علشان الناس عايزة تتفسح في اليوم دة

عندهم العكس

اي حاجة بترخص النص في الويك ايند

فلو عاوز تروح مزار او تاجر عربية او تعمل اي حاجة خليك في الويك ايند

المهم ماطولش عليكم المكان ولا الاحلام ..واعتقد انك لو عايش في تورونتو دي نعمة كبيرة انك تاخد عيالك وهما 140 كم بقيت هناك هاتشيل كل هموم الدنيا هناك

الطبيعة ساحرة والهواء في منتهي النقاء يكفي بس انك تعمل كامبنج هناك وتشوي وعيالك يجروا ورا السناجب :blush2:) حكاية تانية

قبل ما توصل نياجرا فولز بكام كيلو في مدينة هناك وقفنا عندها ساعة علشان ناخد هناك جولة حرة

بصراحة يا اخوانا ولا شفت ولا هاشوف

تعرف افلام والت ديزني لما تفتح كتاب حكايات مصورة وبعدين الكاميرا تخش جوه الكتاب ويتحول المشهد ان الصور تبدا تتحرك وانت تخش جوا الكتاب ؟؟

اهي المدينة دي كدة

كانها خارجة من عالم الروايات والقصص

اسمها نياجرا اون ذي لايك

تمشي في الشارع وكانك بتحلم من روعة وجمال وهدور المكان وحلاوة المحلات المتزوقة والبيوت القديمة الجميلة وفي منتهي الشياكة

كلها محلات سوفينيرز وتذكارات ومطاعمها في منتهي الروعه واهلها لا يختلفوا عن بقية اهل كندا ..منتهي الادب والبشاشة والحب والابتسامة لا تفارق الوجهة بسبب وبدون سبب

قضينا ساعة في المكان الرائع دة وكانها عشر دقايق

وبعدين على نياجرا عدل

طبعا لا تعليق على مكان الشلالات نفسة اوقع من الصور

بس المزيج بين صوت هدير المياة الرهيب مع رذاذ المية المنعش المنتشر في كل مكان مع ريحة الهوا والشجر وقوس الالوان اللي ملون السما يخليك تقف تتسمر شوية ولا تملك غير انك تقول من قلبك سبحان الله

الصور اكيد موش هاتنقلاك الاحساس دة بس لو خيالك واسع هاتشعر بيه :blink:

نزلنا بالاسانسير اللي جوا الجبل 38 دور علشان نبقي خلف الشلالات بالظبط

اتفرجنا على الشلالات من وراها ..يعني انت وراه المية ..طبعا ملبسينا اكياس بلاستيك علشان مانغرقش من الرذاذ بس مافيش فايدة ..هاتغرق هاتغرق swar:: ..وطبعا صوت الهدير مخليك موش عارف تكلم اللي جنبك

وبعدين روحنا على ساحة المشاهده ومنها هاتشوفو صور بالهبل

وفيه هناك بعد الدش دة حاجتين تعملهم

الاولي : في نفس مبني المطاعم هتلاقي زي مول صغير كدة ممكن تقضي وقتك فيه

التانية وهي الاروع : فيه خلف فنادق نايجرا الشهيرة ..مدينة ترفيهيه تحفةةةةة

هناك هتلاقي كل حاجة

اماكن العاب رائعه للاطفال وملاهي

اماكن ترفيهية للكبار وبيوت اشباح وكهوف وطاويط ورحلة تحت الارض وخزعبلات من دي

ومجموعة من اشهر المطاعم والكافيهات العالمية زي رينفوريست ( موجود منه في سيتي ستار القاهرة في اخر دور وهما 5 او 6 فروع في العالم بس ) وهارد روك كافية الشهير ..ربنا يتوب عليك من هورتونز يا تو

مكان لا يترك بصراحة

بعدها استمتعنا بجولة ليلية بالاتوبيس تحفة بردة

لييه؟

بالليل كل الغابة اللي خلف نياجرا مزوقينها برسومات بالوان معمولة من الانوار الكهربا الملونة مخليين الغابة بالليل كانها فيلم خيال علمي كبير وانت ماشي جواه

حتة كدة تلاقي الاشجار بينها مخلوقات جوراسيك بارك منورة بانوار جميلة واحيانا متحركة زي ديناصور طائر بيهبط علشان يخطف فريسة

ومرة تلاقي مكان كامل معمول باشهر ابطال والت ديزني زي سنو وايت والاقزام وغيرة وغيره

وشوية كانها غابة مشروم عملاقة

ومرة كائنات فضائية

كل دو باين كانوار هادية كدة والغابة كلها مضلمة شكلها رهيب

بس اللي وقف شعر راسي هو رسمة كبيرة

فيها الكعبة والمسجد الحرام وناس بتطوف حوالين الكعبة ؟؟؟!!!!!!!!!!

وجنبها الشمعدان بتاع اليهود

وجنبها شجرة الكريسماس والصليب

التلاتة جنب بعض كهربوني بصراحة ؟؟

ياااه ؟؟ لو اصحاب الاديان السماوية يبقوا كدة ..ربنا واحد وانبيائنا اخوة ؟؟ ونهدي بقة كدة ونعيش مع بعض واحنا بس اللي من حقنا نفخر باننا لا نعبد حجر ولا وثن ؟؟؟

بس بردة حرية الاديان والعبادة في كندا وعدم العنصرية نموذج لا اعتقد ان فيه زيه في العالم ابدا

فيه مثل في كندا قاللي عليه المهندس ياسر

عايز تعبد حجر براحتك ..بس ما لا تقذفني به

والامثلة اللي انا شفتها بردة كفاية

مثلا

وانا في المطار يوم ما كنت راجع

عايز اصلي العشا

رحت اتوضيت وبعدين موش معقولة هاقف في وسطهم واصيح ..هو القبلة منييييييين

فاستنضفت ظابط امن مطار كدة وسالته

ممكن تدلني على اتجاه الشرق لو سمحت

قام قاللي بابتسامة عريضة كدة

انت شكلك عاوز تصلي

قلتله بابتسامة مذهولة بلهاء كدة اه ه ه ه

قاللي وماتصليش في المسجد ليه ؟

قلتله نعم ؟؟ قاللي عندنا هنا مسجد ووصفلي

المهم مشيت في اتجاه الوصف

وبعدين قلت اتاكد لاكون ماشي غلط

فلقيت مجموعة تانية من الموظفين كلهم عرق اوروبي

وقفت سالت وانا مكسوف

ردوا عليا وكاني باسالهم هو باب المطار منين

معروف جدا

والصدمة الكبري اللي قضت عليا ساعتها

المسجد جنب تيم هورتونز !!!!!

يارب توب عليا بقة من تيم هورتونز دة ....دة انا كنت خايف الاقيه فتح فرع في حمام الاوضة في الفندق

دعيت عليه وانا باصلي

وفعلا لقيت مسجد في منتهي الشياكة وسجاد الصلاة المعتاد ورسمة القبلة وفوقيها بالعربي ايه ( شهر رمضان الذي انزل فيه القران )

وجنة كنيسة صغنونة شيك كدة فيها صفوف كراسي وصليب على الحيطة والبينج بتاع القس او الواعظ

حاجة جميلة جدا ترد الروح وتحسسك باحترام الناس دي لعقيدتك وديانتك بدون اي تميز

مثل اخر واتكرر كتير

اكتر من مرة دخلنا مطعم فخم وشيك ..الله يخرب بيوتهم

المهم

ونطلب صنف كدة ..وقبل مانقول الاحتياطات المعتادة ..لا خنزير ..لا خمره ..ماتتعملش على صاج كان معمول عليه خنزير او لحمة بخمور او او

قبل مانتكلم

الاقي الوايتر يقولنا خدوا بالكم انتوا مسلمين ( من حجاب مراتي موش من الجلبية والدقن ) دة بيدخل فيه خمور

حتى ياربي في نايجرا اون ذي لايك اللي اشك ان فيه حد ركعها فيها بردة واخدين بالهم وبيحترمك

الدرس المستفاد من القصة اللي فاتت ...خدوا بالكم ...المسجد جنب توم هورتونز :blush2:

بعد الجولة دي كانت الشلالات نورت بالوان باضائات جميلة بكل الوان الطيف بسبب انوار مسلطة عليها من فوق الجبل

الرجل خدنا فوق الجبل وودانا في غرفة التحكم باضاءة الشلالات

وقالنا كل واحد يوقع اسمه وبلدة في سجل الزيارات ويخش يلعب ويغير في الوان الشلالات براحته

العبوااااااااااااا

متعه انك تقعد تغير في الزراير وتبص تلاقي شلالات نايجرا بضخامتها ورهبتها وانت بعيد عنها جدا تتلون اخضر وازرق واحمر

حاولت الون عليها علم مصر الاحملر والابيض والاسود

بس دايما بقية الاوان الرزلة كانت بتبوظلي العلم

ماهو انا بردة في احلى اماكن كندا وانا في قمة استمتاعي كنت بادندن وانا ماشي ..حلوة بلادي السمرة بلادي الحرة بلادي

وفي ايام الي بردت فيها مع المطر والويند في اخر يوم كدة قبل ما نسافر كنت بادندن ..حلاوة شمسنا تراراا بتاعة فرقة رضا

اللذيذ بقة ان السواق طلع قالنا في المايك

في حالة انك قلت لاهلك ولاصحابك انك لونت نايجرا وماصدقكش

ادي شهادة من ادارة الشلالات بتقول كدة

وقام مدينا شهادات فاخرة دوبلكس مختومة من ادارة نياجرا بارك عليها اسامينا بتقول اننا نشهد ان السيد فلان الفلاني لون شلالات نياجرا

وعنوانها من فوق بالبنط العريض جدا

انا اضأت نايجارا فواز !!!! وعليها صورة الشلالات متلونة بالليل

تحفةةةة

وكدة انتهت رحلة نايجرا على شخير الراكبين طول السكة واحنا راجعين بما فيهم السواق

المهم

الرحلة التانية

تبع الفندق بردة

جولة حرة في داون تاون مدتها ساعتين بالباص

تمنها 50 دولار للفرد

سواق سكر سويسري الاصل هاجر لكندا سنة 88 وحاليا اصحاب انا وهو

سكر مكرر

علشان ماطولش عليكم احلى الاماكن اللي تتراح في داون تاون:

1- طبعا سي ان تاور :

اركب الصاب واي وانزل في محطة يونيون ..اقرب محطة من بحيرة اونتاريو وتقع في شارع كينج

اطلع منه واسال على شارع فرونت هتلاقية جنبك بخطوتين

امشي في اتجاه الغرب دقائق هتلاقي يافطة كبيرة تخش منها على السي ان

النصيحة ماتروحش في يوم فيه ضباب او مطر علشان تستمتع بالمنظر

تورونتو كلها نمنم من فوق واحلى اتجاه هو اتجاه البحيرة

هاتشوف جزيرة تورونتو الرائعة ..بينها وبين كورنيش تورونتو داون تاون 10 دقائق بالمعدية والطبيعة هناك اكثر من ساحرة

وهاتشوف المطار الصغير بتاع سيتي سنتر اللي بيقرفك في جوجل ايرث كل شوية لما تنزل على تورونتو وانت بتحلم ومستني التاشيرة !! عقبالكم كلكم ان شاء الله

2- شارع كينج دة بيسموه شارع الترفيه

تحديدا كينج ويست

يعني تاخد تقاطع يانج الشهير من كينج وتاخد الاتجاه الغربي من النقطة دي

هتلاقي مليار مطعم من كافة ثقافات العالم ..انجليزي فرنساوي ايطالي هندي صيني يوناني بس مافيش عربي :lol:)

هتلاقي كمان اشهر مسرح هناك ..ساوند او ميوزيك ..افتتحته اميرة القلوب ديانا وسمي على اسمها ..مشهور بان بيتعمل فيه دايما اشهر المسرحيات العالمية وروايات الادب العالمي زي الجميلة والوحش .. ولورد اوف رينجز ..وارثر ..ومسرحيات شكسبير

لو انت نظام مسرحيات حزمني يا والخرط دة يبقي المكان دة غير ملائم وانسي اللي انا قلتله

وهتلاقي كمان فيه اقبال جماهيري واخر حفلة الساعة 8 مساءا

هتلاقي كمان المسرح الكوميدي الكندي بيقدم اشهر العروض الكوميدية وعلى فكرة كندا ام الكاميرا الخفية في العالم حاليا

اصلا التمشية في الشارع دة تحفة ومصورلكم حاجات كتيرة منه

3- شارع شيرش ..الشارع دة في كمية كنائس اثرية رهيبة ..ااقل واحدة عمرها 200 سنة وتعتبر تحف فنية لا تعوض

4- لو غاوي متاحف عندك رويال اونتاريو ميوزيم ..وما يتوهش ابدا ..ارك الساب واي وانزل محطة ميوزيام ..بس خلاص

فيه على كل لون ياباتيستا

جميع انواع الحضارات ..صيني هندي فرعوني هنود حمر هود زرق الماو ماو اي حاجة في الدنيا وكمان الانسان البدائي

وجزء للاحياء الطبيعية واحلى واروع جزء فيه في نظري هو الجيولوجيا او الاحجار الطبيعية

اسم السيكشن دة ..كنوز الارض

رااااائع ..نوعيات من الكوبلت والكوارتز والجرانيت والاحجار الكلسية ولا شفت ولا هاشوف

وطريقة العرض بتاعته تحفة ..شاشات كمبيوتر صغيرة تختار شكل الحجر اللي تختاره ويجيبلهم جابوة منين وتركيبه الكيميائي وخواصه واسمه وكله

بس بجد تحفة

لكن المتحف بصفة عامة منظم حلو جدا وواسع لكن مافيهوش اثار قيمة

يعني مومياء واحدة عندنا تمنها يسوي المتحف دة باللي فيه

لكن الفرق ان الموميا عندنا يا عيني بتاعاني من اللي بيعاني منه البشر اللي بره المتحف !!

زحمة ومافيش تنظيم للاسف الشديد

قفلوا علييكي يا حلوة تابوت !!

طبعا فبه متاحف تانية متخصصة زي متحف الفنون ومتحف للسيراميك ومتحف لقشر اللب وخلافة

4- كمان فيه منطقة ورا المتحف طالما انت رحت هناك تعتبر من اروع الاماكن لقضاء فترة بعد الضهر هناك

بجد دة مشوار موش هاتندم عليه

شوبنج ومطاعم بسعر معقول ..وكمان اشهر فروع الماركات العالمية زي بيير كاردان وكارتية وغيره وغيره ..هتلاقي الفرع الرئيسي موش المنتجات قصدي

المنطقة دي تبدا من شارع المتحف وتتجه شمالا الى ان تصل الى تاني اشهر شوارع تورونتو شارع بلور بس غرب

5- احلى احلى سوق شفته في حياتي

مصوره من برة مع الصور

سوق سانت لورنس كاركت

السوق دة علشان تروحة انزل من محطة كينج وامشي في اتجاه شرق يانج

10 دقائق مشي

دة مبني اثري فيه سوق الخضار واللحمة والسمك ومتطلبات البيت على طريقة المحلات البلدي بس من غير 3 بجنيه ياااااااا بصل

ولو اها وحشتني اوي اوي 3 بجنيه يا بصل ..تلاقيها بقت 3 ب 300 جنيه يا بصل الوقت !!!

دة الى جانب مطاعم وكافيهات وتيم زفت كالعادة

شفت خضار وفاكهة ماشفتش في نضافتهم وطريقة تغليفهم والوانهم في الخليج كله ..ولا دبي ولا السعودية ولا البحرين ولا قطر ولا مصر ..لا ..فيه في مصر حاجات حلوة والله بردة بس شخلل جيبك

ومحلات متخصصة جبنه بس

مليار نوع جبنه من كل بلاد العالم

ومحلات متخصصة خمور والعياذ بالله

ومحلات لحمة بالهبل مزوقنها حلو وعاملين جميع انواع الستيك والريش والسوسيس بانواعه والميت رولز و طبعا ماسابوش حاجة الا لما دبحوها ..تيران وعجول وبقر وغنم وخنازير وغزلان ورنة ورومي وفراخ وطيارات بوينج

السمك ما بهرنيش اوي ..كله تونا وسلمون وانواع متحورة من المرجان وسمكه في الخليج اسمها الحمرا ..وطبعا تشكيلة لا بأس بها من الجمبري الضخم والمحار واللوبيستر والكاليماري بس اللي لفت انتباهي

الكابوريا الكنج ..رجلها ما شاء الله طول العيل الصغير كدة

من الاخر

سوق يستحق الزيارة

5- الحي الصيني

انزل محطة الساب واي في سبادينا

واختم باسبورك دخول الصين

صينيين صيننين يعني موش اي كلام

خش بس اي محل وقوله ضفري بيوجعني هايعملولك لبخة شاي مخصوصة لضفرك

بس نصيحتي

مكان لا يستحق الزيارة

6- اهم اهم حتة تروحوها جزيرة تورونتو

جنة من جنات الله في الارض

بس ماتترحش طبعا في الشتا

تنزلوا في محطة يونيون وتاخدوا اتجاه الجنوب لغاية الكورنيش واسال على الفيري دوك

هاتركبوا معدية ب 13 دولار وتبدا المتعه

الصور في الطريق

7- الباركات بالهبل ومنطقة الجامعه من اروع المناطق اللي فيها باركات هناك

انا تعبت !! روستخ شوية يا ولاد

8- نسيت طبعا اهم حته تروحها

ايتون سينتر

مول كبير وظريف وهاتقضي فيه يوم حلو اوي

وكمان فيه فروع شركات التصالات زي روجر وفيدو

من المهم ذكرة

انك من اي مكان في الداون تاون

لو نزلت تحت الارض هتلاقي مدينة تانية مساحتها تقريبا زي مساحة الداون تاون كدة تحت الارض

تمشي شوارع وشوارع تحت الارض في وسط الاف والاف من المحلات والمطاعم والبنوك وحتي مباني حكومية كلها كلها تحت الارض

طبعا تستخدم بشدة في ايام التلج والبرد

ممكن تنزل في محطة مترو وتتطلع بعدها ب خمس او ست محطات ..وتحت فيه يفط موضحه كل حاجة وتمشي فين وترجع منين

لازم تنزلو تتوهو تحت

مكان يستحق الزيارة

على فكرة انا خسيت جدا ورجعت سمباتيك بعد الرحلة دي

وبالعند فيك يا توووووو

البنزين خلص

يتبع ان شاء الله يا اصدقائي

خليتكم بالعافية

تم تعديل 12 ديسمبر 2009 بواسطة znaty

[znaty]

بيان عاجل لجمعية النساء المتوحشات

السيدات اعضاء الجمعية دكتورة سوسو راني و دكتورة صفاء والاخت اسكندرانية

اكتب الان وانا تحت تهديد السلام ومافيش غير ايدي اليمين اللي بتتحرك حاليا

زوجتي العزيزة اسمها جيجي ..مابين الجيم والزين فرق كبير

والتهديد بتاع العضوة المحترمة سوسو راني بتاع مدام زناتي وامينة دة سببه ان زوجتي العزيزة نظرا لانها مهنسة كهربا على سن ورمح

ناوية تكهرب عيشتي لو ماكملتش ماجستير وبدات تشتغل في كندا علشان السعودية مافهاش غير شغل مدرسات وهو ما ترفضة مبادئها الهندسية

والله على ما اقول شهيد

وحسبي الله ونعم الوكيل فيكي يا سوسو

وانزل بتتر

يا عيني يا عيني ..يا عيني على الولد :blush2:

[znaty]

إيه الجمال ده يا معلم زناتي ...الحلقة الخامسة ديه في الجووول :ninja:

عمار يا تورنتو ...عمار يا أونتاريو ...عمار يا كندا :wub:

شعارات الأديان التلاتة ديه علشان الأعياد جاية ورا بعضها....العيد الكبير (الكعبة و الطواف ) و الكريسماس (أشجار الميلاد) و الشمعدان علشان عيد اليهود (Hanukah)

سانت كاثرين المدينة اللي اخترتها باذن الله علشان استقر فيها ١٥ دقيقة من نياجارا أون ذا ليك و ٢٠ دقيقة من الشلالات

حبيب قلبي ماهو انا في الرحلة دي كان فيها زيارة في اطراف سانت كاترين لكلية بتعلم تصنيع الواين ..اسم الفقرة واين تاستنج ..طبعا احنا قعدنا نبرا نصور في المنطقة وطبعا افتكرتك

مايجيش من بعدك يا صديقي شرح

وبرده تو هايفضل تو :)

على فكرو اسم الدكتورة سوسو راني الثلاثي

005 + 0.75 ( مرمر ) +0.25 النونو الصغيرة خالص

سوسوراني وملحقاتها :))