الي ناويين يحجوا السنة دي باذن الله ..

[doha]

زوجي ناوي باذن الله يحج السنة دي وبناء عليه بدأنا نبحث عن حملة مناسبة تكون لائقة ومستواها معقول وفي نفس الوقت متكونش غاليه .. واعتقد ده مطلب كل الي ناويين يحجوا السنة دي وعليه ففكرت افتح الموضوع ده نجمع فيه كل المعلومات والاراء الي نحصل عليها بخصوص الحج لهذا العام 1430 وان شاء الله يكون فيها فائده لنا جميعا ..

مبدئيا عشان تحج وانت مرتاح وشايل من بالك هم السكن والتنقلات او حتى اللخبطه في اداء المشاعر لازم تطلع مع حملة .. ده غير ان تقريبا قانونا مينفعش تطلع من غير حملة ..

الحملات مسمى يطلق على شركات بتقوم بتنظيم عملية الحج ( زي شركات السياحه عندنا في مصر كده ) تدفع لهم المبلغ المطلوب وهم يحددوا لك هتسافر امتى ويوفروا لك المواصلات والسكن والطعام ( بعض الحملات مش بتوفر ده كله ) ..

حملات الحج مقسمة لفئات احسنها ( أ )ثم الاقل. . وطبعا الفئة بتتحدد بناء على الخدمات الي بتقدمها ( ملهاش علاقه بالسفر بر ولا جو وانما بمستوى السكن والطعام .. الخ ) والاهم بتتحدد ببعد السكن فيها عن الجمرات ..

اول خطوة قلت استطلع الاسعار شكلها ايه .. سبق وقرأت خبر رسمي بان الحج السنة دي هتتراوح اسعاره مابين 2000 الى 4000 كحد اقصى .. للاسف يبدوا انها اشاعة .. الاسعار الحقيقية قريبة من التالي ...

اتصلت بشركة قالوا انهم فئة ( د ) ..

الشخص المسؤول علل الفئة بان السكن في موقع ( درج /سلم ) يعني على جبل او ماشابه عشان كده الفئة دال ..

قال بان السعر للسفر بالبر ( الرياض ـ مكة ـ الرياض ) 4500 ريال .. شاملة المواصلات والسكن والاقامة .

قال ايضا بان السكن بعيد عن الجمرات 500 متر تحديدا مخيم في منى عند كوبري الملك خالد ..

(( ممكن بالاستعانة بالجوجل ايرث تشوف المسافه دي بالظبط مابين بيتك وبين اي نقطه انت عارف مكانها وبالتالي تقدر تقريبا هتمشي قد ايه لو سكنت على البعد ده , ممكن برضه بنفس البرنامج تعرف المكان الي هتسكن فيه في الحملة بعيد قد ايه بالملي عن الجمرات ))

اتصلت بشركة تانيه فئة ( أ ) :

الاسعار كانت 6800 للسفر بالبر و 7900 للسفر بالطيران . طبعا الطيران بيكون ( الرياض ـ جده ـ الرياض )

قال بان السعر شامل كل شيء تماما ماعدا الهدي ( الخروف يعني الي هينذبح وطبعا لو الواحد حاج مفرد مش هيدبح حاجه يبقى هو ده السعر التوتال ) .

السكن هيكون على بعد 150 متر من الجمرات ( بصراحة ممتاز .. بس المبلغ كبير بجد على حج داخلي .. حوالي 10 الاف جنيه )

واخيرا اتصلت من باب التاكد بالرقم الموجود في موضوع يابلاش والخاص بحملات حج مخفضة بـ 2000 ريال ..

الرقم 4335888 طلعت لي رسالة مسجلة بان الرقم غير موجود بالخدمة ..

المهم عرفت بعض المعلومات الاضافية :

ـ الحملة هي الي هتطلع لك التصريح انت بس جهز الاوراق وسلمها لهم مع العربون وهم هيستخرجوه بمعرفتهم باذن الله.

- مفيش تصاريح حج للزيارة ( عند الي اتصلت بيهم ) لازم تكون اقامة .

- الاوراق المطلوبة لاستخراج تصاريح الحج للمقيمين صورة الاقامة والجواز واربع صور شخصية وفي رواية صورتين والاهم لازم موافقة الكفيل .. هتطبع ورقة من على النت من الموقع ده وتروح تمضيها من الكفيل وتختمها من الغرفة التجارية بالظبط زي اي تصريح استقدام او تاخذ نفس الاستماره دي من مكتب الحملة وبرضه تلف بيها نفس اللفة ..

-مطلوب شهاده تطعيم ضد الحمى المخية الشوكية ودي بتاخذها من اي مستوصف ( عن نفسي تطعمت السنة الي فاتت ببلاش في مستوصف حكومي والشهاده عباره عن ورقة صغيره فيها اسمك ومختومه بختم المستوصف )

-مفيش اشتراط لتطعيم انفلونزا الخنازير يعني لو مش عاوز تطعم مفيش مشكلة . .

- السفر هيكون باذن الله يوم 7 ذو الحجة والعوده بعد اسبوع تقريبا يوم 6 ذو الحجة .. يعني الحج هيبدأ باذن الله بعد اقل من شهر من الآن .

- بيقولوا ان كل ماتحجز بدري كل مايكون افضل عشان السعر كل مدى وبيغلى .. مش عارفه ليه شاكه في الحكايه دي لان المنطق ان كل مالوقت بيمر الناس بتخاف من الانفلونزا والموسم بينضرب لكن الله اعلم يمكن كلامهم صح ولو قل العدد اوي هيرفعوا السعر على الي طالع طالع .. ويجوز برضه ملوش علاقه الوقت بالسعر والي يحجز دلوقت زي الي يحجز قبل بيومين .. الله اعلم ..

- الدفع بيكون اي مبلغ مثلا 1000 ريال عربون بس المهم انك تدفع كامل المبلغ قبل يوم 25 /11 القادم .. يعني تقريبا عشر ايام من الآن .

بس دي تقريبا كانت المعلومات الي حصلت عليها هاتفيا في جولة اليوم بس اتوقع لو الواحد راح بنفسه لمقر الحملات ( ودي بتكون في شارع البطحا وفي منها برضه في شارع البديعه ) اعتقد هيكون الاتفاق هناك مختلف ..

ياريت لو اي حد عنده فكرة عن حملات كويسه باسعار معقوله يفيدنا وبرضه اي معلومه عن الحج او حج السنة دي بالذات وممكن تسهل المناسك على الي ناوي يطلع ياريت يقولها لنا

في رد قادم باذن الله اكتب لكم مناسك الحج باختصار شديد جدا للي ناوي يحج اول مرة وخايف يتلخبط ..... وربنا يتقبل من الجميع يارب ومتنسونيش من دعائكم هناك باذن الله ..

[OmarBak]

شوفي فيه حملة الاتقان والاسواف دول حج ميسر فئة أ ب 3900 باص -5400 طيران

فيه بقا شركات تاخد سكن بالعزيزية اقرب من فئة ج للجمرات

الشخص الفين شامل كل شيء وفيه 2200

فيه حل تالت ناس مع نفسها تأجر سكن وباص ومن غير وجبات والسكن بالعزيزية ب 1200 ريال أو 1400

طبعا كل العزيزية بدون تصريح رسمي واصلا الزيارة كلوش تصريح رسمي

بس هم ليهم سكك وطرق وبتتدخلي باذن الله

دى اخر معلومات اكيدة

[doha]

شوفي فيه حملة الاتقان والاسواف دول حج ميسر فئة أ ب 3900 باص -5400 طيران

فيه بقا شركات تاخد سكن بالعزيزية اقرب من فئة ج للجمرات

الشخص الفين شامل كل شيء وفيه 2200

فيه حل تالت ناس مع نفسها تأجر سكن وباص ومن غير وجبات والسكن بالعزيزية ب 1200 ريال أو 1400

طبعا كل العزيزية بدون تصريح رسمي واصلا الزيارة كلوش تصريح رسمي

بس هم ليهم سكك وطرق وبتتدخلي باذن الله

دى اخر معلومات اكيدة

طيب ياريت حضرتك رقم حملة الاتقان والاسواف .. وبعد اذنك يعني ايه ميسر ؟ هل معناها مدعم يعني ولا معناها سكن فقط بدون خدمات تانيه ؟

[OmarBak]

ميسر دا نظام جديد مع تقليل الرفاهية

والشركات دي بترفض الزيارة

الاتقان في مجمع الخليج بالملك فهد

الاسواف معرفش مكانها

تم تعديل 31 أكتوبر 2009 بواسطة OmarBak

[jamalpody]

تم تعديل 1 نوفمبر 2009 بواسطة jamalpody

[alex man]

شوفي فيه حملة الاتقان والاسواف دول حج ميسر فئة أ ب 3900 باص -5400 طيران

فيه بقا شركات تاخد سكن بالعزيزية اقرب من فئة ج للجمرات

الشخص الفين شامل كل شيء وفيه 2200

فيه حل تالت ناس مع نفسها تأجر سكن وباص ومن غير وجبات والسكن بالعزيزية ب 1200 ريال أو 1400

طبعا كل العزيزية بدون تصريح رسمي واصلا الزيارة كلوش تصريح رسمي

بس هم ليهم سكك وطرق وبتتدخلي باذن الله

دى اخر معلومات اكيدة

طيب ياريت حضرتك رقم حملة الاتقان والاسواف .. وبعد اذنك يعني ايه ميسر ؟ هل معناها مدعم يعني ولا معناها سكن فقط بدون خدمات تانيه ؟

الاخت ضحى

انا ذهبت الى الحج ثلاث مرات واخر مرة ذهبت قافلة ممتازة جدا وان شاء الله ناوى اطالع هذا العام معهم انا و والداى وسعر معقول جدا بمبلغ 2800 ريال فئة هـ شاملة كل شىء الانتقالات والوجبات وممتازة ومريحة مقرها الحملة فى المنفوحة مقابل بنك الراحجى اسمها نجد وان شاء الله سوف احجز اليوم واى استفسار ابعت على الاميل اوا اتصل بى

[Yasser_71]

السلام عليكم

أنا سمعت ان الزيارة حاليا مفتوحة للأب والأم ب 4500 ريال

سؤالي هل مسموح لهم بالحج يعني يمكن استخراج تصريح ولا برضه هيكون غير رسمي

[عنبو]

ياجماعه انا ليا سؤال على الماشى ايهم

الحمله الى فى العزيزيه ولا الى فى منى وعرفات

بس الراجل الى فى العزيزيه بيقول المسافه بينك وبين الجمرات مافيش 15 دقيقه مشى ؟؟ وبتاع منى بيقول المسافه تلاته كيلو

هو تقريباً مافيش فرق فى السعر ؟؟؟

[OmarBak]

هو اماكن في العزيزية اقرب للجمرات من الفئة ج

بس عيب العزيزية انك تعتبر خارج حدود منى

ولازم تروح كل يوم منى تجلس من 12 الى الفجر (جزء من اللليل بمنى) أيام التشريق

وطبعا اسعار العزيزية اقل من اى حملة بمنى بالف ريال ع الاقل

[Amr Radwan]

ياجماعه انا ليا سؤال على الماشى ايهم

الحمله الى فى العزيزيه ولا الى فى منى وعرفات

بس الراجل الى فى العزيزيه بيقول المسافه بينك وبين الجمرات مافيش 15 دقيقه مشى ؟؟ وبتاع منى بيقول المسافه تلاته كيلو

هو تقريباً مافيش فرق فى السعر ؟؟؟

بص يا سيدي .. الفكرة ان ما بين مخيمات مني و العزيزية جبل و الحكومة السعودية عاملة طرق رئيسية و كباري للسيارات و المشاة للدخول الي منى من العزيزية و العكس و لكن المشكلة ان العزيزية ليست داخل حدود مني .. و ستتطر الي المبيت في منى فترة الليل و العودة الي السكن فترة النهار .

و لذلك قالك ان المسافة بين العزيزية و منى 15 دقيقة فهو صادق ان شاء الله لانها يادوبك تعدي الطريق و لكن مع العلم انها خارج حدود منى

[Amr Radwan]

لي بعض النصائح و الملاحظات للاخوة الحجاج هذا العام ان شاء الله :

1- السؤال عن سمعة الحملة قبل الدفع .. لان بعض الحملات سمعتها زي الزفت بسبب شكاوي من الحجاج في الاعوام السابق و لذلك الافضل لك ان تبحث عن حملة و يكون لك اصدقاء او معارف قاموا بالحج معها من قبل .

2- انصح ان تذهبوا جماعات .. اي ان يتفق مجموعة من الاصدقاء و العائلات مع حملة واحدة .. ليه ؟ عشان لما بيكون معاكم ونس بيكون افضل في الحج و خاصة وقت الازمات لا قد الله .

3- التاكد من بعد مخيم الحملة عن الجمرات .. و هل هناك درج ام لا .. و خاصة لو كان معكم كبار سن و لا تعتمد علي كلام المسؤول في الحملة بل تذهب الي الخريطة مع هذا المسؤول و تشاهد المسافة و تقدرها بنفسك علي الخريطة .

4- هل الحملة تقدم اسرة ام فقط فرش للنوم عليه و عدد الافراد في الخيمة الواحدة و مساحتها .

5- انصح بالذهاب في حملة بها الكثير من المصريين عشان هتحسوا بروح المصريين الجميلة في الحج .

6- عند الذهاب من عرفات الي المزدلفه .. توقع انك ممكن تسيب الاتوبيس اللي تبع الحملة و تركب اي مواصلة او عربية بين الجبال عشان تروح المزدلفة بدل ما يضيع عليك الوقت في الاتوبيس .

6- من كام يوم كان فيه شتاء و مطر في مكة .. و اكيد الجو بيكون بارد بالليل .. عشان الاولاد .. يا ريت تجيبوا معاكم لبس زيادة احتياطي .

7- اشترك في حملة عشان تكون متفرغ فقط فقط فقط للعبادة و بيكونوا مسؤولين عن الاكل و الشرب و السكن و المواصلات و غيرها .

8- ذاكر كويس في المناسك و فتاوي المناسك و خاصة فتاوي النساء .. عشان مش بعد الحج ترجع و يكون عندك شك في الحجة بسبب سهو او عدم خبرة و الحمد لله بيكون فيه ارقام للفتوي في الحج و كمان شيوخ في كل حملة (عادة) . و انا متذكر السنة اللي فاتت كان فيه ملف فيديو ممتاااااز للشيخ الجليل محمد حسان لمدة نصف ساعة شارح فيه الحج من الالف للياء علي اليوتيوب .

9- النصيحة الاخيرة .. اشغل نفسك بالعبادة و ابتعد عن الجدال و اللغط و الكلام اللي مالوش لازمة و خاصة لو لقيت حاجة غلط في الحملة ما تتخانقش و تعمل خناقة و انت حاج .. يعني حط اعصابك في الثلاجة :closedeyes:

يا رب اللهم تقبل منا و من كل المسلمين الاعمال الصالحة ..

[SDSL]

السلام عليكم

الأخوة الأعزاء

اتواجد انا و زوجتي في القصيم و قدمت على طلب زيارة لوالدتي

و أريد الذهاب للحج بمشيئة الله هذا العام

و يمكنني الذهاب بسيارتي

فهناك عدة اسئلة .رجاء الإجابة عليها ؟؟

اولا : لا استطيع ان اترك امي لوحدها في المنزل .. هل لو اخذتها معي بدون تصريح تستطيع ان تحج معنا ام ربنا اظطر للعودة من حيث اتيت ؟؟\

ثانيا : كيف اذهب بالسيارة و هل بعد إستخراج تصريح للسيارة استطيع الدخول بالسيارة في مكة للتنقل بين المشاعر ؟

ثالثا : هل تنصحوني بالسفر محرم من ميقات السيل أم اسافر إلى جدة غير محرم و احرم من هناك؟

رابعا : إذا لم اخرج تابع لحملة من الحملات .. كيف سأحمل اغراضي إذا منعت السيارة من الدخول

خامسا والأهم : هل يمكن استخراج تصريح حج بدون حملة ؟ سمعت انه ب 500 ريال للفرد

عسى الله ان يكتب لنا حجة هذا العام آمين آمين آمين

و شكرا

[SDSL]

خريطة لمخيمات منى

http://www.localhajj.gov.sa/lh/MenaMap

[OmarBak]

ياريت أي حد حج مع أي حملة كويسة يقول اسمها

[egyptinmyheart]

ده على كده الشركات فى مصر طلعت مظلومة كانوا مفهمنا فى الجرايد ان الحج بملاليم

[Amr Radwan]

السلام عليكم

الأخوة الأعزاء

اتواجد انا و زوجتي في القصيم و قدمت على طلب زيارة لوالدتي

و أريد الذهاب للحج بمشيئة الله هذا العام

و يمكنني الذهاب بسيارتي

فهناك عدة اسئلة .رجاء الإجابة عليها ؟؟

اولا : لا استطيع ان اترك امي لوحدها في المنزل .. هل لو اخذتها معي بدون تصريح تستطيع ان تحج معنا ام ربنا اظطر للعودة من حيث اتيت ؟؟

هل تستطيع الوالدة اكرمها الله الحج و هل تستطيع الاعتناء بنفسها في حالة تواجدها في المنزل او هل هناك من يطمئن عليها في حالة ذهابك للحج ؟

لا انصحك ان تذهب في سيارتك لانك لن تستطيع الدخول بها الي مكة و انصحك بالاتفاق مع شركة حج او حملة تستطيع ان توفر لك التصاريح او علي الاقل هناك اتوبيس تكون فيه زوجتك و والدتك و اولادك في مأمن و يكون مسؤول الحملة هو المسؤول عن دخولها حتي لو بدون تصريح و دائما "اهل مكة ادري بشعبها"

ثانيا : كيف اذهب بالسيارة و هل بعد إستخراج تصريح للسيارة استطيع الدخول بالسيارة في مكة للتنقل بين المشاعر ؟

لا بد من وجود تصريح للتنقبل بين المشاعر و التصريح صعب جدا انك تحصل عليه

ثالثا : هل تنصحوني بالسفر محرم من ميقات السيل أم اسافر إلى جدة غير محرم و احرم من هناك؟

رابعا : إذا لم اخرج تابع لحملة من الحملات .. كيف سأحمل اغراضي إذا منعت السيارة من الدخول

لو انت رايح بدون حملة كل ما كنت خفيف كان افضل

خامسا والأهم : هل يمكن استخراج تصريح حج بدون حملة ؟ سمعت انه ب 500 ريال للفرد

انا سمعت برده السنة اللي فاتت عن الموضوع ده .. و كل ما استطيع نصحك به .. هو احذر النصب و الاحتيال و خاصة ان تصاريح الحج لا تخرج من وزارة الحج الا للحملات و يكون مختوما بختم الوزارة و عموما موقع وزارة الحج تستطيع التاكد من صحة التصريح

عسى الله ان يكتب لنا حجة هذا العام آمين آمين آمين

و شكرا

يا جماعة اي حد اول مرة يحج الافضل له انه يكون مع حملة او مع اي حد حج قبل كده

[Amr Radwan]

ده على كده الشركات فى مصر طلعت مظلومة كانوا مفهمنا فى الجرايد ان الحج بملاليم

ايوة فعلا بملاليم في السعودية ..

معظم العروض الان لو في فئة د او ج بتبدأ من 3300 ريال يعني 4800 جنية

شاملة : التنقل و الاتوبيسات و الطعام و الشراب و السكن و بيسلموك فرش جديد و بطانية و حاجات كتيرة ..

مع العلم ان السعر ده فيه مكسب شركات السياحة السعودية اللي بتنتظر الموسم ده من السنة للسنة ....

انما لو في مصر .. شوف سعره كام .. السياحي بيبدأ من 35000 جنيه و علي فكرة الحج القرعة المصري -----> غير ادمي للاسف الناس السنة اللي فاتت اتبهدلت في مخيمات الحج القرعة .

اي حد في السعودية و ما اداش فريضة الحج فهو مقصر في حق نفسه الا لو عنده ظروف خارجة عن ارادته لان الحج من السعودية ميسر جدا

تم تعديل 2 نوفمبر 2009 بواسطة Amr Radwan

[egyptinmyheart]

لا الحج القرعة ممتاز و بلاش بقى اننا نقلل من كل حاجة بلدنا بتعملها و انها اوحش بلد فى الدنيا , حج القرعة بيطلعوا فى اماكن قريبة جدا للحرم و الناس بتتهافت عليه فبلاش كل حاجة نقلل منها

[OmarBak]

17 الف حج طيران لمدة 25 يوم مبلغ كويس ومش غالي قوي للدرجة دي

احسن من الزيارة ميت مره

بس المفروض الدولة متكسبش من الحج كمان

يعني لو شويه ذمة اعتقد ينزل الى 12 و10

بس طبعا الحرامية هيكسبوا منين

تم تعديل 2 نوفمبر 2009 بواسطة OmarBak

[Amr Radwan]

لا الحج القرعة ممتاز و بلاش بقى اننا نقلل من كل حاجة بلدنا بتعملها و انها اوحش بلد فى الدنيا , حج القرعة بيطلعوا فى اماكن قريبة جدا للحرم و الناس بتتهافت عليه فبلاش كل حاجة نقلل منها

اللي شاف بعينه غير اللي سمع .. brth) و عموما لا اريد تحويل الموضوع خلينا في المهم