ولادة طفلى الاول هنا ام فى مصر...افيدونا

[Egypt]

زوجتى حامل فى الشهر السادس

انا مقيم فى السعوديه

هذا هو الحمل الاول

لايوجد لدينا اصدقاء يعتمد عليهم

لايوجد امل ان مامتها تيجى تحضر الولاده هنا فى السعوديه

ايه رأيكم

وخصوصا السيدات

ينفع ارعى مراتى وهى حامل

وهى ينفع تعتنى باول طفل وبدون خبره

ارجو الافاده

[doha]

ينفع مينفعش ليه ..

لما ولدت اول مرة كنت لوحدي (وشلت الليلة ) كلها بدون مساعده بل اني ومن ثاني يوم نزلت بيها للدكاترة والمستشفيات والحضانات .. عادي جدا ..

اهم حاجه ان زوجتك تكون متقبلة الوضع ومستعده تتحمل المسؤولية وفي الاول والآخر الحياه كفاح لو هنقعد ننتظر المساعده في كل عقبه تعترض طريقنا ( مش هنخلص ) ..

طالما زوجتك مش موظفة مرتبطه بدوام تصحى له بدري فباذن الله سهل جدا انها تعتني بالطفل بنفسها بعد الولاده وباذن الله مش هتحتاج والدتها ولا شيء .. انت بس خليك جنبها وهون عليها وحسسها انك مقدر التعب الي هي بتتعبه ومقدر حجم المسؤوليه الي هي شيلاها وباذن الله ربنا هيكون معاكم وتعدي بدون حاجه لمساعده حد ..

وبالتاكيد صلي استخاره لو كان البديل هو ارسالها للولاده في مصر وعودتها بعد ذلك خاصه وان امامك اسبوعين تلاته بس ويبقى مينفعش تسافر مصر لان من اول السابع السفر ممكن يكون فيه خطر على الحمل .. بس ان شئت رايي فانها ( تنشف ) كده وتجمد وتيجي على نفسها وتعتمد عليها وتخليها هنا فده احسن لها وده الي ينفعها قدام باذن الله لما تدخل تجربة زي دي وتخوضها لوحدها وتثبت لنفسها انها باذن الله ( قدها وقدود ) ..

ربنا يتم لها الحمل والولاده على الف خير ويقر عينكم بالمولود ويطرح فيه البركه . .

[بنت الشاطئ1]

السلام عليكم

خلى بالك سواء مامتها جت واللا مجتش هى اللى هتولد ماحدش هيولد بدلها

الموضوع ده ليه رأيين لا ثالث لهما

اما ان والدتها تيجى تحضر ولادتها ..الميزة انها هتلاقى حد يطبخ لها ويغير للبيبى بس.. لكن لما يصحى البيبى بالليل هى اللى هتقوم ليه

الرأى الاخر انه لو مامتها مش هتقدر تيجى ..خلاص بقى جيبو اكل جاهز اول اسبوع ..وهى اللى هتغير للبيبى

المهم ممنوع منعا باتا السفر اثناء الحمل فما بالك بالشهور الاخيرة

بس على فكرة الطفل الاول مش مسئوليه كبيرة .. انا اختى الكبيرة ولدت اول ولادة بعيد عننا ..والحمد لله مفيش اى مشكلة المشكلة فى الطفل التانى والتالت..

[mama nona]

من الناحية الطبية للولادة فهنا احسن كتير من مصر

لوجود اجهزة حديثة لمتابعة الولادة لا توجد بمصر

من ناحية ينفع ترعاها........ اكيد ينفع طبعا

ممكن تاخد يومين تلاتة كده اجازة بعد الولادة ترعاها

بالنسبة للاكل ممكن تجهز اكلها قبل الولادة بيوم مثلا وما عليك الا التسخين

ولو صعبة دى ما عليك الا الاكل الجاهز

طبعا واكيد انها هتقدر ترعى مولودها بإذن الله لوحدها بس اكيد انه هتحتاج لبعض النصائح

او الاستفسارات ودى اكيد مش هتغلب فيها ممكن تسألنا واحنا ندلك او تتصل بوالدتها تسألها

والاهم انه بعد الولاده بأسبوعين بيكون لها متابعة هى والبيبى لعيادة النسا والاطفال

تقدر تسأل عن اى استفسار لها وللبيبى

متقلقش هو عشان اول مولود اكيد هتحس بالرهبة

وان شاء الله تقوم بالسلامة

[عبير يونس]

اسمح لي يا فندم ادلو بدلوي في الموضوع

بصفتي أم مخضرمة ما شاء الله لخمسة من الأطفال و السادس في الطريق

ولادة اول بيبي مفيهاش مشكلة غير الخوف الشديد من التجربة اللي بتحصل لأول مرة

و دي لازم تحاول تتغلب عليها قبل الولادة

و لازم تبقى زوجة حضرتك عارفة

أن التجربة مش بالفظاعة اللي الناس بتهول فيها

فيها ألم

أكيد

طب ما الأبرة فيها ألم

و لسعة البوتجاز اثناء الطبخ مؤلمة

و جرح السكين أثناء تقطيع الخضار بيبقى مؤلم

و لو ودنة في الصباع بتبقى مؤلمة

;)

الألم مش هو المشكلة

المشكلة هي توقع الألم و الخوف منه حتى قبل حدوثه

و نصيحة مهمة جدا لزوجة حضرتك

أثناء الولادة

و عندما تبدأ الانقباضات

contractions

أو ما نسميه الطلق

لا تصرخ

لأن الصراخ بيزود انقباض الرحم و بالتالي يزداد الألم

و الانقباضة الواحدة تستغرق 30

ثانية

تحاول تاخد نفس عميق و تكتم الألم بلا صراخ

حتعدي بإذن الله

هي حتكون مجهدة شوية عند تسارع الانقباضات عند اقتراب لحظات الولاة

بس معلش

تحاول تحافظ على هدؤها

لان الانهيار مش في صالحها

و لا أفضل من ذكر الله عز وجل في هذه اللحظات

و في الآخر

زمان كانوا بيسموها الساعة المنسية

لأنها بجد بتتنسي

و ده من رحمة ربنا

و الا ماكنش حد فكر يخلف تاني

:blink:

و بجد في لحظة لا يمكن تنساها الأم و هي لحظة خروج البيبي الي الدنيا

لحظة يمتزج بها الألم مع الفرح

ربنا يكتبها لها

و تقوم بألف سلامة

و البيبي يكون في أحسن حال

آمين

صدقني يا أخي الفاضل

مفيش حد بينفع غير ربنا سبحانه و تعالى

لا أم و لا أهل و لا أصدقاء

دول ممكن يقفوا جنبها و يخدموها

لكن ربنا وحده اللي يقدر يشيل عنها التعب و يزيل الألم

و الله انا لما ولدت في مصر قبل ما اجي السعودية

كان جنبي جيش بيخدموني

و كنت ملكة

لا أقوم بأي شيء

حتى البنت كانوا بيجيبوهالي للرضاعة فقط و انا في سريري

و لا بأغير لها و لا بأعمل أي حاجة في حياتي

و رغم كده كنت تعبانة جدا و زهقانة

و لما جيت هنا

و ولدت بنتي التانية

كنت لوحدي تماما

و كان جوزي معتكف في العشر الأواخر بيجي بس يجيب طلباتي و يرجع

و كنت مسئولة عن طفل 3 سنين

و طفلة سنة و 3 شهور

بالإضافة للبيبي

و مع ذلك ربنا سبحانه و تعالى قدرني أقوم أعمل كل حاجة و أخدم طفلين مع البيبي

مش باقول لحضرتك ربنا احسن من الكل

توكلوا على الله

و ان شاء الله

حتكون أحلى و أسهل ولادة

اللي يتوكل على ربنا حق توكله عمره ما يشوف خذلان

تحياتي

:smart:

[pink rose]

و الله انا ليا رأي مختلف عن الاخوات

رأيي انها تولد في مصر و مامتها تراعيها في الايام الاولى

مش لان ربنا مش هايقدرها تقوم بالمسؤولية لوحدها لا اطلاقا

بس الفكرة ان الولادة الاولى فيها مزيج من الخوف و القلق و الرهبة من الولادة لانها مجهولة بالنسبة ليها تجربة جديدة فالبتالي هاتكون فعلا خايفة فا وجود مامتها جنبها هايبقى عامل امان نفسي شوية

غير كده و كده ربنا ما يكتبها عليها يا رب بس ممكن تولد قيصري و دا فعلا صعب بتكون تعبانة في الايام الاولى فا مامتها و اخواتها هايريحوها في الاول من غيار للبيبي و استحمام بقى و طبعا برضه اكيد مامتها ممكن تشيل عنها البيبي شوية بالليل عشان هي ترتاح

كنت انا و ماما بنعمل دوريات انا صاحية بمريم طول الليل و ماما تستلم الوردية ابتدءا من 8 الصبح

و كمان بالنسبة لام لاول مرة بتكون الخبرة زيرو طبعا في حاجات كتير فا وجود مامتها هايسهل عليها شوية و هاتعلمها حاجات اكيد

انا رأيي انها تنزل تولد في مصر بالسلامة و ترجع لما البيبي يعدي شهر كده عشان يستحمل الطيران و ضغط الهواء في الطيارة

انا عن نفسي عملت كده لما جيت اولد مريم و جيت بيها و هي عندها 40 يوم

و ربنا يكملها حملها على خير و يقومها بالسلامة و يرزقكم بطفل سليم معافي يكون قرة عين ليكم ان شاء الله

اللهم آمين

[سهيلة]

فى مصر

بصراحه الطفل الاول بتبقى خبرة الام ف التعامل معاة صفر

انا كنت بخاف اشيل بنتى اول ما اتولدت

بجد حاجة صغيرة كدة وشكلها احمر وملامحها موش باينه واصلا موش عارفه اشيلها ازاى

حاجات محتاجه حد مجرب قبل كده يعلمك

لو الظروق ما تسمحش تنزل مصر حضرتك ممكن تشوف بيبى سيتر تقعد معاها اول شهر وتاخد بالها من البيبى لغاية ما تسترد صحتها

وان شاء الله تقوم بالسلامه

[pocy]

زوجتى حامل فى الشهر السادس

انا مقيم فى السعوديه

هذا هو الحمل الاول

لايوجد لدينا اصدقاء يعتمد عليهم

لايوجد امل ان مامتها تيجى تحضر الولاده هنا فى السعوديه

ايه رأيكم

وخصوصا السيدات

ينفع ارعى مراتى وهى حامل

وهى ينفع تعتنى باول طفل وبدون خبره

ارجو الافاده

هلا باخى ايجيبت بص بقي يا سيدى انا مش فى السعوديه انا فى الكويت وكنت مصممه انى اولد فى الكويت علشان الرعايه الطبيه و محدش من اهلى قدر يجي للاسف وبالتالى انا وجوزى اللى شلنا اليله بس انا ولدت قيصري يعنى قعدت فى المستشفي حوالى اربع ايام وخرجت وعايزه اقولك ان شاء الله تولد طبيعي والطبيعي تعبه بالكتير يوم الولاده واليوم اللى بعديه وبعدين بتقدر تتحرك وتروح وتيجي وتعمل الاكل عادى انا خامس يوم كنت فى المطبخ وبطبخ مع انى قيصري والجرح في القيصري بياخد اسبوعين على ما يلم فمش تقلق يا اخي الكريم والله الولاده دى تساهيل واعرف كتير جدا ولدوا طبيعي وتانى يوم كانوا بيرتبوا الشقه ويطبخوا عادى بس انت اهم حاجه كون معاها دايما وابقي حنين جدا لابعد الحدود لانها هتبقي محتاجه ليك وعندها احساس انها لوحدها لكن وجودك جنبها دا شئ مهم جدا وربنا يكرمنا فى ازواجنا (ملحوظه : انا جوزى مكنش بيقوم يجيب لنفسه كوبايه ميه تخيلوا لما ولدت كان بيعملى حلبه فى البيت ويجبهالى المستشفي وكان بيسلق الفراخ ويجبهالى بشربتها و................... وربنا ما يحرمنا من أزواجنا يارب )

[egyptinmyheart]

ممكن تسمحوا للعزاب يشتركوا فى الموضوع لانى كنت بفكر فى الموضوع ده من فترة

ده على اساس انى هكمل هنا لغاية ما اتجوز و مراتى ان شاء الله تكون حامل

اعتقد ان الامور لازم تتحسب بعفلانية اكتر شوية على اساس ظروفك انت و هى :

اولا : هل وقت شغلك سهل انك تطلع منه و تروح لمراتك لو حصل و جه وقت الولادة او احتاجتك لالم او خوف

ثانيا : لو حصل ان مراتك تعبت قبل الولادة بكام يوم هتعرف تسيب شغلك و تقعد معاه

ثالثا : لما مراتك تولد ان شاء الله هتعرف تفضى نفسك يومين تلاتة تقعد معاها

و كمان لو هى من النوع الخواف ان شاء الله هتبقى جنبمها و هتعدى

انما السئوال اللى ما حدش ساله لو الولادة قيصرى هل هتعرف تتحرك و بعد كام يوم ان شاء الله بالسلامة و كده

و ان شاء الله تتعرف على حد قريب ليك جار او صديق و يكون معاه مراته على الاقل مراتك تحس بونس و شكرا

و ان شاء الله بالخير

[tantrum]

فيه نقطة مهمة لما تضعها بالإعتبار ممكن تساعدك فى ترجيح إحدى الخيارين

وهى أن ركوب الطائرة غير مستحب فى أخر الحمل

[Egypt]

تحية تقدير وشكر لكل من ساهم بالنصيحه

doha

remo

mama nona

pocy

بنت الشاطئ

سهيله

مصريه مغتربه

egyptinmyheart

tantrum

[alshater]

السلام عليكم

كامل إحترامي لكل الردود لكن نصيحة بص لقدام

لو إنصلح حال بلدنا و حبيت تدخله كلية شرطة أو حربية حيأثر عليه ولادته في الخارج

و بعدين ولادة السعودية مش ميزة أوي عشان تحتار

يعني مش حياخدالجنسية مثلا و لا حتفرق معاك في حاجة

و يا رب تقوم المدام بالسلامة فين ما كانت و ربنا يديك طولة العمر و تشوفه أو تشوفها في الكوشة

تم تعديل 29 أكتوبر 2009 بواسطة alshater

[اغابي]

شوفو انا ولدت ابنى الاول هو حاليا 8 سنين فى مصر وابنى التاني هو حاليا 4 سنين اتولد فى الكويت

مش حتفرق اوى لان الدول العربية وخاصة الخليجية عمرهم ما حيدولك جنسية فمش فارقة اوى انك تولد بره مصر مفيش فيها مميزات

اما الرعاية والاهل اكيد مصر اما الرعاية الطبيه والعلاج افضل طبعا كانت بالنسبالى الكويت لانى انا ولدت فى مصر وولدت فى الكويت فكان فيه فرق طبعا مستوي المستشفي على الرغم ان ولدت فى مصر فى مستشفي خاص وكلفتنى كتير اوى

تحياتي للجميع