ما هو معنى الرجوله ؟؟ وما هو معنى الانوثه ؟؟

[هيبو]

الرجوله والانوثه ليها معانى كثيره جداً وممكن تختلف من شخص الى اخر على حسب ثقافته بل وممكن تكون الرجوله فى نظر شخص تمثل بطلجه فى نظر شخص تانى وايضاً بالنسبه للانوثه عند المرأه ممكن تكون حاجه تانيه خالص عند اخرى وهكذا كل على حسب ثقافته ؟؟

انا اعرف ناس بالنسبه ليهم موضوع الرجوله هو انه يكون راجل ملو هدومه ويزعق ويشخط ويضرب وتبقى كلمته مسموعه على الفاضى والمليان ؟؟

واعرف ايضاً النساء فاكرين الانوثه انها تبقى مسكينه ضعيفه ملهاش كلمه ولا ليها رأى وبالعكس تلاقيهم بينتقدوا الى ليهم رأى ناهيك طبعاً عن الاعمال الى بتقوم بيها التى لا تتعلق بالانوثه بشىء وطبعاً ده كله علشان سى السيد يرتاح ؟؟

يلا بقى كل واحد يدخل يقول معنى الرجوله والانوثه بالنسبه له ايه ؟؟؟

[pocy]

إحم إحم إحم اهه بتنحنح واقول يا ساتر يمكن يكون فى راجل معري راسه ولا حاجه ههههههههههههههههه

لي عوده بعد قليل

[HDarwish]

في البداية أنا عايز أجاوبك على سؤالك بخصوص هل الرجولة هي سي السيد أحمد عبد الجواد والأنوثة هي أمينة ..؟

الإجابة ... نعم

لكن مع بعض التعديلات الخفيفة لمواكبة العصر ..

اللي أقصده هنا .. إن الراجل لازم يكون سي السيد في بيته بمعنى إنه يكون له شخصيته وهيبته وكلمته فعلا هي الأولى والأخيرة (مفيش مانع من شوية مناقشة) لكن في الأول والآخر كلمته هي اللي هتمشي .. لإن سواء غلط أو صح اللي حيتحمل النتيجة هو الرجل وليس الأنثى .. إذن فمبدأ الأخذ بكلمة المرأة لا يتم إلا في حالة واحدة وهي إذا توافق مع رأي الرجل وفي نفس اتجاهه وليس العكس .. والراجل اللي هو سي السيد بيحب إن تتم معاملته فعلا على إنه سي السيد ولو إختلفت المعاملة ممكن تؤدي بالنهاية إلى خراب البيت والعياذ بالله .. بعكس الرجل الأرنب .. اللي بيكون على العكس تماماً ولا يستطيع أن يتخذ أي قرار إلا بمشورة الأنثى حتى في أصغر صغائر الأمور ..

مش عايز حد يفهمني غلط ..

مش معنى إنك سي السيد يعني تشخط وتعلي صوتك وممكن تضرب دي مش اسمها رجولة ولا لها صلة بالرجولة أساساً (برغم إن بعض الإناث لا يصلح معهم إلا المعاملة بهذه الطريقة وما ترتحش إلا إذا خادتلها ألمين عالصبح .. طبعا ده بيكون مثال المرأة النكدية) .. في رأيي سي السيد يعني راجل له إحترامه في البيت له هيبته مش زيه زي أي قطعة أثاث في البيت .. متعاون مفيش مشكلة إنه يساعد الزوجة في أعمال المنزل لو حس إنها تعبانه (الرحمة حلوة برضوا) .. سي السيد مش دايما مكشر وعاقد حواجبه (مفيش مشكلة من نكته ابتسامه مداعبة) ..

كذلك الأنثى ..

الأنثى يعني أنثى بكل ما تحمله الكلمه من معنى .. وبلاش الجنس الرابع اللي بنشوفه الأيام دي .. (أنثى مترجله) .. أنثى يعني ناعمة رقيقة صوتها واطي .. لبسها لبس أنثى .. كلامها كلام أنثى .. وطبعا الضعف وأنها تبئا مسكينة من الحاجات اللي الراجل يحب يشوفها في الأنثى .. الراجل بطبيعته بيحب يحس إنه مصدر الأمان والحنان للأنثى ..

وده اللي بيخليني أقول إن الأساس هو إن الراجل هو سي السيد والأنثى هي أمينة .. لكن .. مع بعض التعديلات العصرية ..

كرجل أُفضِل الأنثى أن تكون أمينة عن أن تكون كوندوليسا رايس

وأظن أن الأنثى أيضاً تُفضل سي السيد عن الرجل الأرنب ..

ياريت الكلام في الموضوع ده يكون واقعي بدون شعارات ومجاراة للحديث السائد فقط

للحديث بقية

تم تعديل 27 أكتوبر 2009 بواسطة HDarwish

[ذهبية]

عجبى على الرجالة الىل محيرنا معاهم تيجى تسال اى رجل عايز النص التانى ازاى تلاقية يقولك امينة و يرجع فى دقيقة يقولك لا

بس قوى كدة برضة اناعايزها تشارك و تقف جنبى و احس انى متجوز واحدة بتفهم مش بكلم حيطة حاضر حاضر

انتم عايزين اية بالضبططططط

لو واحدة انوثة و ضعيفة و امينة مراة السيد على حق مكبراك و بتبص فى الارض لما تشخط فيها و تخليك على راحتكم تعلى صوتك و تحس بروجولتك مش عاجب

لو واحدة شخصية و دماغ و ليها راى و تعرف تحاور و تناقش و تفكر و لما اسافر اسيبها لوحدها تعرف تتصرف و تاخد قرار و انا مش هنا لو خرجت تشتغل اعرف انها هتعرف تحمى نفسها كويس بضة مش عاجب انا مش متجوز راجل

اة عايزنها جوة البيت امينة وبرة البيت ست بميت راجل

انتم عايزين اية بالضبططططط؟؟؟؟؟؟؟؟؟

[هيبو]

كده الموضوع بدأ يمشى فى الاتجاه الصحيح

بالنسبه للاخHDarwish

اللي أقصده هنا .. إن الراجل لازم يكون سي السيد في بيته بمعنى إنه يكون له شخصيته وهيبته وكلمته فعلا هي الأولى والأخيرة (مفيش مانع من شوية مناقشة) لكن في الأول والآخر كلمته هي اللي هتمشي .. لإن سواء غلط أو صح اللي حيتحمل النتيجة هو الرجل وليس الأنثى .. إذن فمبدأ الأخذ بكلمة المرأة لا يتم إلا في حالة واحدة وهي إذا توافق مع رأي الرجل وفي نفس اتجاهه وليس العكس .. والراجل اللي هو سي السيد بيحب إن تتم معاملته فعلا على إنه سي السيد ولو إختلفت المعاملة ممكن تؤدي بالنهاية إلى خراب البيت والعياذ بالله .. بعكس الرجل الأرنب .. اللي بيكون على العكس تماماً ولا يستطيع أن يتخذ أي قرار إلا بمشورة الأنثى حتى في أصغر صغائر الأمور ..

مش عايز حد يفهمني غلط ..

مش معنى إنك سي السيد يعني تشخط وتعلي صوتك وممكن تضرب دي مش اسمها رجولة ولا لها صلة بالرجولة أساساً (برغم إن بعض الإناث لا يصلح معهم إلا المعاملة بهذه الطريقة وما ترتحش إلا إذا خادتلها ألمين عالصبح .. طبعا ده بيكون مثال المرأة النكدية) .. في رأيي سي السيد يعني راجل له إحترامه في البيت له هيبته مش زيه زي أي قطعة أثاث في البيت .. متعاون مفيش مشكلة إنه يساعد الزوجة في أعمال المنزل لو حس إنها تعبانه (الرحمة حلوة برضوا) .. سي السيد مش دايما مكشر وعاقد حواجبه (مفيش مشكلة من نكته ابتسامه مداعبة) ..

انا معاك ان الراجل لازم يكون له كيانه واحترامه بره البيت وداخل البيت بس ده برده ميمنعش ان الواحده يكون ليها كيانها واحترامها فمو متنساش انها هى الى هتربى الاولاد فلازم يكون ليها شخصيه علشان العيال يطلعوا تمام

اما بالنسبه برده لاتخاذ القرار وخصوصاً القرارت المصيريه الى متعلقه بالمستقبل لازم يكون فيه مشاركه فى الرأى وكل واحد يقول رأيه والصح هو الى يمشى لان انتوا الاتنين الى هتشيلوا المسؤليه فى الاخر مافيش حد هيشيل والتانى لا ؟؟

لكن طبعاً ميمنعش ان فى رجاله بتخاف من ستاتهم وميعرفش يعمل اى حاجه الا لما ياخد رايها لا ده بقى بيكون خيييييييييييييبه وعلى ما اعتقد النساء مبحبوش النوع ده

طيب افرض واحنا بنتناقش موصلناش لحل وسط يبقى اتوماتيك رأى الراجل هو الى هيمشى ؟؟ لان لازم المركب يكون ليها قائد واحد ياخد برأى الاخرين ولكن وقت التنفيذ هو الى هينفذ

الأنثى يعني أنثى بكل ما تحمله الكلمه من معنى .. وبلاش الجنس الرابع اللي بنشوفه الأيام دي .. (أنثى مترجله) .. أنثى يعني ناعمة رقيقة صوتها واطي .. لبسها لبس أنثى .. كلامها كلام أنثى .. وطبعا الضعف وأنها تبئا مسكينة من الحاجات اللي الراجل يحب يشوفها في الأنثى .. الراجل بطبيعته بيحب يحس إنه مصدر الأمان والحنان للأنثى ..

كله تمام ولكن المسكنه لا هى الانثى اساساًَ بطبعها ضعيفه رقيقه ولكن لازم يكون ليها حضور وليها شخصيه برده بس فى المعقول يعنى متكنش متسلطه ومتكنش عنيده

pocy مشاركة بتاريخ اليوم, 12:24 PM

إحم إحم إحم اهه بتنحنح واقول يا ساتر يمكن يكون فى راجل معري راسه ولا حاجه ههههههههههههههههه

لي عوده بعد قليل

لا ادخلى تعالى انتى مش غريبه

ذهبية مشاركة بتاريخ اليوم, 01:34 PM

عجبى على الرجالة الىل محيرنا معاهم تيجى تسال اى رجل عايز النص التانى ازاى تلاقية يقولك امينة و يرجع فى دقيقة يقولك لا

بس قوى كدة برضة اناعايزها تشارك و تقف جنبى و احس انى متجوز واحدة بتفهم مش بكلم حيطة حاضر حاضر

انتم عايزين اية بالضبططططط

لو واحدة انوثة و ضعيفة و امينة مراة السيد على حق مكبراك و بتبص فى الارض لما تشخط فيها و تخليك على راحتكم تعلى صوتك و تحس بروجولتك مش عاجب

لو واحدة شخصية و دماغ و ليها راى و تعرف تحاور و تناقش و تفكر و لما اسافر اسيبها لوحدها تعرف تتصرف و تاخد قرار و انا مش هنا لو خرجت تشتغل اعرف انها هتعرف تحمى نفسها كويس بضة مش عاجب انا مش متجوز راجل

اة عايزنها جوة البيت امينة وبرة البيت ست بميت راجل

انتم عايزين اية بالضبططططط؟؟؟؟؟؟؟؟؟

الرجاله عاوزين كل الى انتى قولتى عليه

عاوزين امينه لم يكون وعاوز امينه وعاوزه تبقى شخصيه وقت لما يجى يتكلم معها وعاوز تبقى بمية راجل لو سابها وسافر عاوز واحده 100000000 فى واحد وتكون بتقبل الابديت كمان علشان لو فيه نسخه معدله ولا حاجه

تم تعديل 27 أكتوبر 2009 بواسطة هيبو

[مغتربة]

ابشر يا استاذ سى السيد

اسمك جه كتير فى الموضوع ده :) jmb-) jmb-)

و لسه :sad: :)

[pink rose]

اما بالنسبه برده لاتخاذ القرار وخصوصاً القرارت المصيريه الى متعلقه بالمستقبل لازم يكون فيه مشاركه فى الرأى وكل واحد يقول رأيه والصح هو الى يمشى لان انتوا الاتنين الى هتشيلوا المسؤليه فى الاخر مافيش حد هيشيل والتانى لا ؟؟

كنت هاقولها :blush2:

تم تعديل 27 أكتوبر 2009 بواسطة remo

[جيمي]

الرجوله فى نظري انك تقدر تصاحب شريك حياتك .... يعني تخليه يبقي صديقك ..... يرتاحلك ... يحكيلك .... ما ينطبق على شريك حياتك ينطبق على اولادك .... وينطبق كذلك على اخوانك وخصوصاا لو انت الكبير .... واكيد اباءك لو لسه موجودين ......

لو عرفت تخلق الجو ده ..من الاخر ...... تبقي انت واد .............. راااجل :blush2:

[Alrefaey]

الرجولة فى نظرى = تحمل المسئولية والقدرة على اتخاذ القرار وقيادة مركب الاسرة بسلام وامان

الانوثة فى نظرى = الجاذبية,الحب ,إحتواء الرجل والحفاظ على الكيان الاسرى ولم شمله

[rewsha]

في راْيي

الرجوله هي:العقل ....الحكمه.. الحزم .....تحمل المسؤليه .....الامان

لكن مش الشخط والنطر والزعيق

بمعنى اصح مش السدي عبد الجواد زي ماكان في المسلسل عامل رعب للي في البيت كله ......

الانوثه :دي بقه فن مش اي انثى تتقنه .وهوه فن التعامل مع الرجل . ومن اهم موقوماته ...الحياء:فقمة الانوثه تكمن في حياء الانثى وهدوءها

والانوثه هي:...الحنان

اما بالنسبه للقرارات المصيريه في الاسره :فانا شايفه ان مش لازم الرجل بس هوه اللي يقررها .لاْ ن الحياة الزوجيه شركه بين اتنين ومش لازم راْي الراجل يكون دايما هوه الصح .فلازم يكون في مناقشه بين الاتنين

لكن لو حصل اختلاف ......يبقى هنا يجي دور الرجل انه يحسم الامر ويتحمل نتيجة قراراته.وهنا على المراْه الانصياع لراْيه وتنفيذه ومتهياْلي في الوقت ده بقه تبقى قمة الانوثه وده الفن اللي باتكلم عليه :blush2:

[se_ Elsyed]

هابدأ بالأنوثة

الأنوثة هي أن تشعر المرأة أنها مخلوق رقيق .... ومِعطاء ... بالمناسبة الرقة لا تتعارض مع قوة الشخصية ... بالعكس .. فقمة رقة المرأة من وجهة نظري تكمُن في ضعفها النابع من قوتها .. كلام مكلكع مش كده ؟

لأ ... قوة المرآه مش معناها إنها تبقى فتوة ... بالعكس ... فهي برقتها وحنانها ممكن تآسر قلب الرجل وتجعل من نفسها شريكة حقيقية له .... واي ست تفتكر نفسها أقوى من الرجل بتخسر كتير ...

الرجولة ........ أتفق مع تعريف الزميل العزيز الرفاعي هي إنها القدرة على تحمُل المسئولية وقيادة سفينة البيت والقدرة على توصيل إحساس الأمان لأسرته ...

[سهيلة]

الرجوله

تصرفات قبل ما تكون كلام

احترام

ظهر تتسند عليه الاسرة

امان

حنيه

الانوثه

عطاء الام اللى ماله حدود

حياء

انها تتحاور وتاخد حقها من غير ما صوتها يعلى

الحفاظ على الكرامه من اهم معالم الانثى وليس التنازل عنها

واتفق كليا مع روشه

فى ان الانثى اللى على حق هىه اللتى تتقن فن التعامل مع الرجل

لان دة محتاج ذكاء بجد لان الراجل كائن كومبلكس زى ما قالت دهبيه انو ساعات يحب الست اللى شخصيتها قويه

ونفس الشخص ساعات يميل للشخصيه المستكينه الضعيفه

اذا المراة الذكيه اللى تختار الوقت المناسب تتصرف فيه التصرف اللى يناسبه

[ابوعاصم]

معني الرجولة والانوثة هو بسيط كما قال الحبيب صلي الله عليه وسلم

"خيركم خيركم لأهله، وأنا خيركم لأهلي"...

"لو كنتُ آمرًا بشرًا أن يسجد لبشر لأمرت المرأة أن تسجد لزوجها لعظم حقه عليها"،

ولا ننسي ايضا انك ايها الرجل عليك حقوق لزوجتك لقوله صلى الله عليه وسلم:

"أكمل المؤمنين إيمانا، وأقربهم مني مجلسًا، ألطفهم بأهله".

"إنما النساء شقائق الرجال، ما أكرمهن إلا كريم وما أهانهن إلا لئيم"

فمن منا يرضى أن يكون لئيما؟!!

وأخيرا هو بأبي وأمي نور للبشرية ومن مشى على خطاه والله لا يخسر ابدا

والنبي كان كذلك

الجانب الشرعي

نجده في سيرة النبي -صلى الله عليه وسلم- مع زوجاته؛ فعلى الرغم من انشغالاته الدائمة في الدعوة الي الله وفي امر المؤمنين كان كذلك في بيته

فإنه كان يخصف النعل.. ويحلب الشاة، ويقُمُّ البيت، ويكون في خدمة أهله،

وانتي ايها الزوجة فمطلوب منكي ان تكوني مثل زوجات الرسول في تعاملك مع زوجك

والحمد لله علي نعمة الاسلام وكفا بها نعمة

[الباشمهندس ياسر]

انتم عايزين اية بالضبططططط؟؟؟؟؟؟؟؟؟

انا عاوز الستر و الله

[ذهبية]

هههههههو الله كلناعايزين الستر يا باشمهندس ياسر ربنا يدينا جميعا الستر

بما انى امراءة فاتكلم من وجهة نظرى عن الرجولة

اول ما اتخطبت و حصل اول حوار بينى وبين خطيبى اللى اصبح زوجى الان قالى انتى تتمنى اية من الرجل اللى يرتبط بيكى

كان ردى وقتها كلمة واحدة

عايزة رجل يحتوينى

يكمل اللى ناقص فيا و اكمل انا الى ناقص فية احس وانا معاة اننا واحد مش اتنين

احس معاة بالامان و نظرة الاحترام اللى الاقيها فى عنية ليا والاقيها فى عنين الناس لة

الرجولة موقف وتصرف مش كلمة و كلام بلا فعل

الرجولة تدين اللى يعرف ربنا يعرف يحافظ عليا و يربى اولادنا و تبقى حياتى معاة بما يرضى الله

الرجولة يسمعنى و اسمعة ليا كل الدنيا زوجى و صديقى و حبيبى و ابويا و اخويا و اهلى كلهم

وانا لة امة وزوجتة و اختة و صحبتة و كل اهلة ااقرب الية من نفسة قبل ما يشكى لنفسة يلاقينى انا سبقتة و بقيت اقرب من نفسة

لو حصل ليا اى موقف فى حياتى ادور علية و ارتمى فى حضنة و احس بالامان و اسعد بالضعف معاة

الرجولة

اخلاق المسلم و جدعنة ولاد البلد و احترام الكلمة و تنفيذ العهد و اداء الواجب و صيانة الامانة و الفعل مش كلام

[عنبو]

الرجوله صفه كما ان الانوثه صفه ايضاً

يعنى ليس كل ذكر راجل وليست كل ست انثى ؟؟ وممكن ايضاً صفت الرجوله تتصف للبنت كأن تقول بنت بمية راااااجل او ان تقول النبت دى جدعه وتقف جنبك وقفة رجاله ............ الخ

الرجوله ليها انواع كثيره ؟؟

الرجوله مع الاصدقاء , الرجوله فى البيت والتعامل مع الاولاد , الرجوله فى العمل , الرجوله فى الدين ............ والخ

وممكن تلاقى واحد فيه صفه واحده من الرجوله ومافيهوش الاخرى يعنى ممكن تلاقى واحد راجل مع صحابه وفى بيته ذكر بس ولكن ليس براجل

وهكذا

اما الانوثه فهى خاااااااااصه بحواء فقط ولكن ليس كل ست انثى ؟؟

فالانوثه هى فن التعامل مع الراجل بصفه عااااااااااامه وهو فن الثقه بالنفس فن الرقه وفن الاحساس فن الدفء والحنان وهو فن الشىء الجميل فى حياة الراجل

تم تعديل 28 أكتوبر 2009 بواسطة محمد العنبى

[otaka]

الرجوله معناها الحقيقى هو الفروسيه

اخلاق الفرسان هى مرادف لكلمه رجوله بالعربيه و يرجع الاستخدام لكون المجتمع العربى ذكورى

اما رجوله و انوثه على طريقه كلام مين اللى يمشى فلا استطيع القول ان تعريف تمشيه الكلام ينطبق

من الممكن استخدام مرادفات كرب البيت او كبير العائله و ما الى ذلك لكن رجل و انثى فده خلط بين الجنس و التصرف

[لولا]

الرجولة والأنوثة ..

مترادفان فى العمق مختلفان التعريف !

يبدو لى وضع تعريف ثابت امر مستحيل جدا ، اراها فعلا مقاييس نسبية تختلف باختلاف البشر واحتياجاتهم الإنسانية

البعض يحيا عمراً كاملا دون ان يفتقد شيء فى النصف الآخر قد يكون من اساسيات احتياجات فرد آخر.

لا اعرف لما ارى دوما ان الأنثى الحقيقة قادرة على اعادة قولبة كيان الرجل حتى لو بشكل ما لتجعله يدرك احتياجاتها

وما تنشده فى كنفه من احتواء فيه وانتماء له .

انوثة..

انوثة تعنى امرأة تعرف جيدا كيف تفرد اجنحتها لتحتوى كل من لهم حق الرعايه منها.

تعنى ان تكون للرجل الحبيبة والصديقه والزوجة ، ان تمنح بلا حدود وتنشر الدفء والحب والسكينة والرقة

ان تعرف ان الضعف فى حضرة الرجل قوة لا تقلل منها ولا تسلبها شخصيتها مهما كانت .

اما الرجولة ..

تبدو كلمة احتواء مستهلكة جدا .. لكن لها من العمق الشديد ما يجعل الوصول لقاعها امر ليس بسهل لذا لم اراها ابدا يوما مجرد كلمة

يمكن التوقف عن النبش فى ارضها واستخراج المعانى .

للرجولة حقا اوجه كثيرة جدا ويكفى كل رجل ان يكون رجلاً بحق فى ميدانه وعلى ارضه دون ادعاء ولا زيف .

تحياتى

لولا

[otaka]

و كما قال الاخ احمد ماهر الراجل مش بس بكلمته الراجل برعايته لبيته و اسرته